ಶ್ರಿಯಃ ಕಾನ್ತಾಯ ಕಲ್ಯಾಣನಿಧಯೇ ನಿಧಯೇಽರ್ಥಿನಾಮ್ ।
ಶ್ರೀವೇಙ್ಕಟ ನಿವಾಸಾಯ ಶ್ರೀನಿವಾಸಾಯ ಮಙ್ಗಳಮ್ ॥ 1 ॥
ಲಕ್ಷ್ಮೀ ಸವಿಭ್ರಮಾಲೋಕ ಸುಭ್ರೂ ವಿಭ್ರಮ ಚಕ್ಷುಷೇ ।
ಚಕ್ಷುಷೇ ಸರ್ವಲೋಕಾನಾಂ ವೇಙ್ಕಟೇಶಾಯ ಮಙ್ಗಳಮ್ ॥ 2 ॥
ಶ್ರೀವೇಙ್ಕಟಾದ್ರಿ ಶೃಙ್ಗಾಗ್ರ ಮಙ್ಗಳಾಭರಣಾಙ್ಘ್ರಯೇ ।
ಮಙ್ಗಳಾನಾಂ ನಿವಾಸಾಯ ಶ್ರೀನಿವಾಸಾಯ ಮಙ್ಗಳಮ್ ॥ 3 ॥
ಸರ್ವಾವಯವ ಸೌನ್ದರ್ಯ ಸಮ್ಪದಾ ಸರ್ವಚೇತಸಾಮ್ ।
ಸದಾ ಸಮ್ಮೋಹನಾಯಾಸ್ತು ವೇಙ್ಕಟೇಶಾಯ ಮಙ್ಗಳಮ್ ॥ 4 ॥
ನಿತ್ಯಾಯ ನಿರವದ್ಯಾಯ ಸತ್ಯಾನನ್ದ ಚಿದಾತ್ಮನೇ ।
ಸರ್ವಾನ್ತರಾತ್ಮನೇ ಶ್ರೀಮದ್-ವೇಙ್ಕಟೇಶಾಯ ಮಙ್ಗಳಮ್ ॥ 5 ॥
ಸ್ವತ ಸ್ಸರ್ವವಿದೇ ಸರ್ವ ಶಕ್ತಯೇ ಸರ್ವಶೇಷಿಣೇ ।
ಸುಲಭಾಯ ಸುಶೀಲಾಯ ವೇಙ್ಕಟೇಶಾಯ ಮಙ್ಗಳಮ್ ॥ 6 ॥
ಪರಸ್ಮೈ ಬ್ರಹ್ಮಣೇ ಪೂರ್ಣಕಾಮಾಯ ಪರಮಾತ್ಮನೇ ।
ಪ್ರಯುಞ್ಜೇ ಪರತತ್ತ್ವಾಯ ವೇಙ್ಕಟೇಶಾಯ ಮಙ್ಗಳಮ್ ॥ 7 ॥
ಆಕಾಲತತ್ತ್ವ ಮಶ್ರಾನ್ತ ಮಾತ್ಮನಾ ಮನುಪಶ್ಯತಾಮ್ ।
ಅತೃಪ್ತ್ಯಮೃತ ರೂಪಾಯ ವೇಙ್ಕಟೇಶಾಯ ಮಙ್ಗಳಮ್ ॥ 8 ॥
ಪ್ರಾಯಃ ಸ್ವಚರಣೌ ಪುಂಸಾಂ ಶರಣ್ಯತ್ವೇನ ಪಾಣಿನಾ ।
ಕೃಪಯಾಽಽದಿಶತೇ ಶ್ರೀಮದ್-ವೇಙ್ಕಟೇಶಾಯ ಮಙ್ಗಳಮ್ ॥ 9 ॥
ದಯಾಽಮೃತ ತರಙ್ಗಿಣ್ಯಾ ಸ್ತರಙ್ಗೈರಿವ ಶೀತಲೈಃ ।
ಅಪಾಙ್ಗೈ ಸ್ಸಿಞ್ಚತೇ ವಿಶ್ವಂ ವೇಙ್ಕಟೇಶಾಯ ಮಙ್ಗಳಮ್ ॥ 10 ॥
ಸ್ರಗ್-ಭೂಷಾಮ್ಬರ ಹೇತೀನಾಂ ಸುಷಮಾಽಽವಹಮೂರ್ತಯೇ ।
ಸರ್ವಾರ್ತಿ ಶಮನಾಯಾಸ್ತು ವೇಙ್ಕಟೇಶಾಯ ಮಙ್ಗಳಮ್ ॥ 11 ॥
ಶ್ರೀವೈಕುಣ್ಠ ವಿರಕ್ತಾಯ ಸ್ವಾಮಿ ಪುಷ್ಕರಿಣೀತಟೇ ।
ರಮಯಾ ರಮಮಾಣಾಯ ವೇಙ್ಕಟೇಶಾಯ ಮಙ್ಗಳಮ್ ॥ 12 ॥
ಶ್ರೀಮತ್-ಸುನ್ದರಜಾ ಮಾತೃಮುನಿ ಮಾನಸವಾಸಿನೇ ।
ಸರ್ವಲೋಕ ನಿವಾಸಾಯ ಶ್ರೀನಿವಾಸಾಯ ಮಙ್ಗಳಮ್ ॥ 13 ॥
ಮಙ್ಗಳಾ ಶಾಸನಪರೈರ್-ಮದಾಚಾರ್ಯ ಪುರೋಗಮೈಃ ।
ಸರ್ವೈಶ್ಚ ಪೂರ್ವೈರಾಚಾರ್ಯೈಃ ಸತ್ಕೃತಾಯಾಸ್ತು ಮಙ್ಗಳಮ್ ॥ 14 ॥
ಶ್ರೀ ಪದ್ಮಾವತೀ ಸಮೇತ ಶ್ರೀ ಶ್ರೀನಿವಾಸ ಪರಬ್ರಹ್ಮಣೇ ನಮಃ
