॥ ಏಕಾದಶಃ ಸರ್ಗಃ ॥
॥ ಸಾನನ್ದದಾಮೋದರಃ ॥
ಸುಚಿರಮನುನಯನೇ ಪ್ರೀಣಯಿತ್ವಾ ಮೃಗಾಕ್ಷೀಂ ಗತವತಿ ಕೃತವೇಶೇ ಕೇಶವೇ ಕುಞ್ಜಶಯ್ಯಾಮ್ ।
ರಚಿತರುಚಿರಭೂಷಾಂ ದೃಷ್ಟಿಮೋಷೇ ಪ್ರದೋಷೇ ಸ್ಫುರತಿ ನಿರವಸಾದಾಂ ಕಾಪಿ ರಾಧಾಂ ಜಗಾದ ॥ 59 ॥
॥ ಗೀತಂ 20 ॥
ವಿರಚಿತಚಾಟುವಚನರಚನಂ ಚರಣೇ ರಚಿತಪ್ರಣಿಪಾತಮ್ ।
ಸಮ್ಪ್ರತಿ ಮಞ್ಜುಲವಞ್ಜುಲಸೀಮನಿ ಕೇಲಿಶಯನಮನುಯಾತಮ್ ॥
ಮುಗ್ಧೇ ಮಧುಮಥನಮನುಗತಮನುಸರ ರಾಧಿಕೇ ॥ 1 ॥
ಘನಜಘನಸ್ತನಭಾರಭರೇ ದರಮನ್ಥರಚರಣವಿಹಾರಮ್ ।
ಮುಖರಿತಮಣೀಮಞ್ಜೀರಮುಪೈಹಿ ವಿಧೇಹಿ ಮರಾಲವಿಕಾರಮ್ ॥ 2 ॥
ಶೃಣು ರಮಣೀಯತರಂ ತರುಣೀಜನಮೋಹನಮಧುಪವಿರಾವಮ್ ।
ಕುಸುಮಶರಾಸನಶಾಸನಬನ್ದಿನಿ ಪಿಕನಿಕರೇ ಭಜ ಭಾವಮ್ ॥ 3 ॥
ಅನಿಲತರಲಕಿಸಲಯನಿಕರೇಣ ಕರೇಣ ಲತಾನಿಕುರಮ್ಬಮ್ ।
ಪ್ರೇರಣಮಿವ ಕರಭೋರು ಕರೋತಿ ಗತಿಂ ಪ್ರತಿಮುಞ್ಚ ವಿಲಮ್ಬಮ್ ॥ 4 ॥
ಸ್ಫುರಿತಮನಙ್ಗತರಙ್ಗವಶಾದಿವ ಸೂಚಿತಹರಿಪರಿರಮ್ಭಮ್ ।
ಪೃಚ್ಛ ಮನೋಹರಹಾರವಿಮಲಜಲಧಾರಮಮುಂ ಕುಚಕುಮ್ಭಮ್ ॥ 5 ॥
ಅಧಿಗತಮಖಿಲಸಖೀಭಿರಿದಂ ತವ ವಪುರಪಿ ರತಿರಣಸಜ್ಜಮ್ ।
ಚಣ್ಡಿ ರಸಿತರಶನಾರವಡಿಣ್ಡಿಮಮಭಿಸರ ಸರಸಮಲಜ್ಜಮ್ ॥ 6 ॥
ಸ್ಮರಶರಸುಭಗನಖೇನ ಕರೇಣ ಸಖೀಮವಲಮ್ಬ್ಯ ಸಲೀಲಮ್ ।
ಚಲ ವಲಯಕ್ವಣೀತೈರವಬೋಧಯ ಹರಮಪಿ ನಿಜಗತಿಶೀಲಮ್ ॥ 7 ॥
ಶ್ರೀಜಯದೇವಭಣಿತಮಧರೀಕೃತಹಾರಮುದಾಸಿತವಾಮಮ್ ।
ಹರಿವಿನಿಹಿತಮನಸಾಮಧಿತಿಷ್ಠತು ಕಣ್ಠತಟೀಮವಿರಾಮಮ್ ॥ 8 ॥
ಸಾ ಮಾಂ ದ್ರಕ್ಷ್ಯತಿ ವಕ್ಷ್ಯತಿ ಸ್ಮರಕಥಾಂ ಪ್ರತ್ಯಙ್ಗಮಾಲಿಙ್ಗನೈಃ ಪ್ರೀತಿಂ ಯಾಸ್ಯತಿ ರಮ್ಯತೇ ಸಖಿ ಸಮಾಗತ್ಯೇತಿ ಚಿನ್ತಾಕುಲಃ ।
ಸ ತ್ವಾಂ ಪಶ್ಯತಿ ವೇಪತೇ ಪುಲಕಯತ್ಯಾನನ್ದತಿ ಸ್ವಿದ್ಯತಿ ಪ್ರತ್ಯುದ್ಗಚ್ಛತಿ ಮೂರ್ಚ್ಛತಿ ಸ್ಥಿರತಮಃಪುಞ್ಜೇ ನಿಕುಞ್ಜೇ ಪ್ರಿಯಃ ॥ 60 ॥
ಅಕ್ಷ್ಣೋರ್ನಿಕ್ಷಿಪದಞ್ಜನಂ ಶ್ರವಣಯೋಸ್ತಾಪಿಚ್ಛಗುಚ್ಛಾವಲೀಂ ಮೂರ್ಧ್ನಿ ಶ್ಯಾಮಸರೋಜದಾಮ ಕುಚಯೋಃ ಕಸ್ತೂರಿಕಾಪಾತ್ರಕಮ್ ।
ಧೂರ್ತಾನಾಮಭಿಸಾರಸತ್ವರಹೃದಾಂ ವಿಷ್ವಙ್ನಿಕುಞ್ಜೇ ಸಖಿ ಧ್ವಾನ್ತಂ ನೀಲನಿಚೋಲಚಾರು ಸದೃಶಾಂ ಪ್ರತ್ಯಙ್ಗಮಾಲಿಙ್ಗತಿ ॥ 61 ॥
ಕಾಶ್ಮೀರಗೌರವಪುಷಾಮಭಿಸಾರಿಕಾಣಾಂ ಆಬದ್ಧರೇಖಮಭಿತೋ ರುಚಿಮಞ್ಜರೀಭಿಃ ।
ಏತತ್ತಮಾಲದಲನೀಲತಮಂ ತಮಿಶ್ರಂ ತತ್ಪ್ರೇಮಹೇಮನಿಕಷೋಪಲತಾಂ ತನೋತಿ ॥ 62 ॥
ಹಾರಾವಲೀತರಲಕಾಞ್ಚನಕಾಞ್ಚಿದಾಮ-ಕೇಯೂರಕಙ್ಕಣಮಣಿದ್ಯುತಿದೀಪಿತಸ್ಯ ।
ದ್ವಾರೇ ನಿಕುಞ್ಜನಿಲಯಸ್ಯಹರಿಂ ನಿರೀಕ್ಷ್ಯ ವ್ರೀಡಾವತೀಮಥ ಸಖೀ ನಿಜಗಾಹ ರಾಧಾಮ್ ॥ 63 ॥
॥ ಗೀತಂ 21 ॥
ಮಞ್ಜುತರಕುಞ್ಜತಲಕೇಲಿಸದನೇ ।
ವಿಲಸ ರತಿರಭಸಹಸಿತವದನೇ ॥
ಪ್ರವಿಶ ರಾಧೇ ಮಾಧವಸಮೀಪಮಿಹ ॥ 1 ॥
ನವಭವದಶೋಕದಲಶಯನಸಾರೇ ।
ವಿಲಸ ಕುಚಕಲಶತರಲಹಾರೇ ॥ 2 ॥
ಕುಸುಮಚಯರಚಿತಶುಚಿವಾಸಗೇಹೇ ।
ವಿಲಸ ಕುಸುಮಸುಕುಮಾರದೇಹೇ ॥ 3 ॥
ಚಲಮಲಯವನಪವನಸುರಭಿಶೀತೇ ।
ವಿಲಸ ರಸವಲಿತಲಲಿತಗೀತೇ ॥ 4 ॥
ಮಧುಮುದಿತಮಧುಪಕುಲಕಲಿತರಾವೇ ।
ವಿಲಸ ಮದನರಸಸರಸಭಾವೇ ॥ 5 ॥
ಮಧುತರಲಪಿಕನಿಕರನಿನದಮುಖರೇ ।
ವಿಲಸ ದಶನರುಚಿರುಚಿರಶಿಖರೇ ॥ 6 ॥
ವಿತತ ಬಹುವಲ್ಲಿನವಪಲ್ಲವಘನೇ ।
ವಿಲಸ ಚಿರಮಲಸಪೀನಜಘನೇ ॥ 7 ॥
ವಿಹಿತಪದ್ಮಾವತೀಸುಖಸಮಾಜೇ ।
ಭಣತಿ ಜಯದೇವಕವಿರಾಜೇ ॥ 8 ॥
ತ್ವಾಂ ಚಿತ್ತೇನ ಚಿರಂ ವಹನ್ನಯಮತಿಶ್ರಾನ್ತೋ ಭೃಶಂ ತಾಪಿತಃ ಕನ್ದರ್ಪೇಣ ತು ಪಾತುಮಿಚ್ಛತಿ ಸುಧಾಸಮ್ಬಾಧಬಿಮ್ಬಾಧರಮ್ ।
ಅಸ್ಯಾಙ್ಗಂ ತದಲಙ್ಕುರು ಕ್ಷಣಮಿಹ ಭ್ರೂಕ್ಷೇಪಲಕ್ಷ್ಮೀಲವ-ಕ್ರೀತೇ ದಾಸ ಇವೋಪಸೇವಿತಪದಾಮ್ಭೋಜೇ ಕುತಃ ಸಮ್ಭ್ರಮಃ ॥ 64 ॥
ಸಾ ಸಸಾಧ್ವಸಸಾನನ್ದಂ ಗೋವಿನ್ದೇ ಲೋಲಲೋಚನಾ ।
ಸಿಞ್ಜಾನಮಞ್ಜುಮಞ್ಜೀರಂ ಪ್ರವಿವೇಶ ನಿವೇಶನಮ್ ॥ 65 ॥
॥ ಗೀತಂ 22 ॥
ರಾಧಾವದನವಿಲೋಕನವಿಕಸಿತವಿವಿಧವಿಕಾರವಿಭಙ್ಗಮ್ ।
ಜಲನಿಧಿಮಿವ ವಿಧುಮಣ್ಡಲದರ್ಶನತರಲಿತತುಙ್ಗತರಙ್ಗಮ್ ॥
ಹರಿಮೇಕರಸಂ ಚಿರಮಭಿಲಷಿತವಿಲಾಸಂ ಸಾ ದದಾರ್ಶ ಗುರುಹರ್ಷವಶಂವದವದನಮನಙ್ಗನಿವಾಸಮ್ ॥ 1 ॥
ಹಾರಮಮಲತರತಾರಮುರಸಿ ದಧತಂ ಪರಿರಭ್ಯ ವಿದೂರಮ್ ।
ಸ್ಫುಟತರಫೇನಕದಮ್ಬಕರಮ್ಬಿತಮಿವ ಯಮುನಾಜಲಪೂರಮ್ ॥ 2 ॥
ಶ್ಯಾಮಲಮೃದುಲಕಲೇವರಮಣ್ಡಲಮಧಿಗತಗೌರದುಕೂಲಮ್ ।
ನೀಲನಲಿನಮಿವ ಪೀತಪರಾಗಪತಲಭರವಲಯಿತಮೂಲಮ್ ॥ 3 ॥
ತರಲದೃಗಞ್ಚಲಚಲನಮನೋಹರವದನಜನಿತರತಿರಾಗಮ್ ।
ಸ್ಫುಟಕಮಲೋದರಖೇಲಿತಖಞ್ಜನಯುಗಮಿವ ಶರದಿ ತಡಾಗಮ್ ॥ 4 ॥
ವದನಕಮಲಪರಿಶೀಲನಮಿಲಿತಮಿಹಿರಸಮಕುಣ್ಡಲಶೋಭಮ್ ।
ಸ್ಮಿತರುಚಿರುಚಿರಸಮುಲ್ಲಸಿತಾಧರಪಲ್ಲವಕೃತರತಿಲೋಭಮ್ ॥ 5 ॥
ಶಶಿಕಿರಣಚ್ಛುರಿತೋದರಜಲಧರಸುನ್ದರಸಕುಸುಮಕೇಶಮ್ ।
ತಿಮಿರೋದಿತವಿಧುಮಣ್ದಲನಿರ್ಮಲಮಲಯಜತಿಲಕನಿವೇಶಮ್ ॥ 6 ॥
ವಿಪುಲಪುಲಕಭರದನ್ತುರಿತಂ ರತಿಕೇಲಿಕಲಾಭಿರಧೀರಮ್ ।
ಮಣಿಗಣಕಿರಣಸಮೂಹಸಮುಜ್ಜ್ವಲಭೂಷಣಸುಭಗಶರೀರಮ್ ॥ 7 ॥
ಶ್ರೀಜಯದೇವಭಣಿತವಿಭವದ್ವಿಗುಣೀಕೃತಭೂಷಣಭಾರಮ್ ।
ಪ್ರಣಮತ ಹೃದಿ ಸುಚಿರಂ ವಿನಿಧಾಯ ಹರಿಂ ಸುಕೃತೋದಯಸಾರಮ್ ॥ 8 ॥
ಅತಿಕ್ರಮ್ಯಾಪಾಙ್ಗಂ ಶ್ರವಣಪಥಪರ್ಯನ್ತಗಮನ-ಪ್ರಯಾಸೇನೇವಾಕ್ಷ್ಣೋಸ್ತರಲತರತಾರಂ ಪತಿತಯೋಃ ।
ಇದಾನೀಂ ರಾಧಾಯಾಃ ಪ್ರಿಯತಮಸಮಾಲೋಕಸಮಯೇ ಪಪಾತ ಸ್ವೇದಾಮ್ಬುಪ್ರಸರ ಇವ ಹರ್ಷಾಶ್ರುನಿಕರಃ ॥ 66 ॥
ಭವನ್ತ್ಯಾಸ್ತಲ್ಪಾನ್ತಂ ಕೃತಕಪಟಕಣ್ಡೂತಿಪಿಹಿತ-ಸ್ಮಿತಂ ಯಾತೇ ಗೇಹಾದ್ಬಹಿರವಹಿತಾಲೀಪರಿಜನೇ ।
ಪ್ರಿಯಾಸ್ಯಂ ಪಶ್ಯನ್ತ್ಯಾಃ ಸ್ಮರಶರಸಮಾಕೂಲಸುಭಗಂ ಸಲಜ್ಜಾ ಲಜ್ಜಾಪಿ ವ್ಯಗಮದಿವ ದೂರಂ ಮೃಗದೃಶಃ ॥ 67 ॥
॥ ಇತಿ ಶ್ರೀಗೀತಗೋವಿನ್ದೇ ರಾಧಿಕಾಮಿಲನೇ ಸಾನನ್ದದಾಮೋದರೋ ನಾಮೈಕಾದಶಃ ಸರ್ಗಃ ॥
