॥ ಷಷ್ಠಃ ಸರ್ಗಃ ॥
॥ ಕುಣ್ಠವೈಕುಣ್ಠಃ ॥
ಅಥ ತಾಂ ಗನ್ತುಮಶಕ್ತಾಂ ಚಿರಮನುರಕ್ತಾಂ ಲತಾಗೃಹೇ ದೃಷ್ಟ್ವಾ ।
ತಚ್ಚರಿತಂ ಗೋವಿನ್ದೇ ಮನಸಿಜಮನ್ದೇ ಸಖೀ ಪ್ರಾಹ ॥ 37 ॥
॥ ಗೀತಂ 12 ॥
ಪಶ್ಯತಿ ದಿಶಿ ದಿಶಿ ರಹಸಿ ಭವನ್ತಮ್ ।
ತದಧರಮಧುರಮಧೂನಿ ಪಿಬನ್ತಮ್ ॥
ನಾಥ ಹರೇ ಜಗನ್ನಾಥ ಹರೇ ಸೀದತಿ ರಾಧಾ ವಾಸಗೃಹೇ - ಧ್ರುವಮ್ ॥ 1 ॥
ತ್ವದಭಿಸರಣರಭಸೇನ ವಲನ್ತೀ ।
ಪತತಿ ಪದಾನಿ ಕಿಯನ್ತಿ ಚಲನ್ತೀ ॥ 2 ॥
ವಿಹಿತವಿಶದಬಿಸಕಿಸಲಯವಲಯಾ ।
ಜೀವತಿ ಪರಮಿಹ ತವ ರತಿಕಲಯಾ ॥ 3 ॥
ಮುಹುರವಲೋಕಿತಮಣ್ಡನಲೀಲಾ ।
ಮಧುರಿಪುರಹಮಿತಿ ಭಾವನಶೀಲಾ ॥ 4 ॥
ತ್ವರಿತಮುಪೈತಿ ನ ಕಥಮಭಿಸಾರಮ್ ।
ಹರಿರಿತಿ ವದತಿ ಸಖೀಮನುವಾರಮ್ ॥ 5 ॥
ಶ್ಲಿಷ್ಯತಿ ಚುಮ್ಬತಿ ಜಲಧರಕಲ್ಪಮ್ ।
ಹರಿರುಪಗತ ಇತಿ ತಿಮಿರಮನಲ್ಪಮ್ ॥ 6 ॥
ಭವತಿ ವಿಲಮ್ಬಿನಿ ವಿಗಲಿತಲಜ್ಜಾ ।
ವಿಲಪತಿ ರೋದಿತಿ ವಾಸಕಸಜ್ಜಾ ॥ 7 ॥
ಶ್ರೀಜಯದೇವಕವೇರಿದಮುದಿತಮ್ ।
ರಸಿಕಜನಂ ತನುತಾಮತಿಮುದಿತಮ್ ॥ 8 ॥
ವಿಪುಲಪುಲಕಪಾಲಿಃ ಸ್ಫೀತಸೀತ್ಕಾರಮನ್ತ-ರ್ಜನಿತಜಡಿಮಕಾಕುವ್ಯಾಕುಲಂ ವ್ಯಾಹರನ್ತೀ ।
ತವ ಕಿತವ ವಿಧತ್ತೇಽಮನ್ದಕನ್ದರ್ಪಚಿನ್ತಾಂ ರಸಜಲಧಿನಿಮಗ್ನಾ ಧ್ಯಾನಲಗ್ನಾ ಮೃಗಾಕ್ಷೀ ॥ 38 ॥
ಅಙ್ಗೇಷ್ವಾಭರಣಂ ಕರೋತಿ ಬಹುಶಃ ಪತ್ರೇಽಪಿ ಸಞ್ಚಾರಿಣಿ ಪ್ರಾಪ್ತಂ ತ್ವಾಂ ಪರಿಶಙ್ಕತೇ ವಿತನುತೇ ಶಯ್ಯಾಂ ಚಿರಂ ಧ್ಯಾಯತಿ ।
ಇತ್ಯಾಕಲ್ಪವಿಕಲ್ಪತಲ್ಪರಚನಾಸಙ್ಕಲ್ಪಲೀಲಾಶತ-ವ್ಯಾಸಕ್ತಾಪಿ ವಿನಾ ತ್ವಯಾ ವರತನುರ್ನೈಷಾ ನಿಶಾಂ ನೇಷ್ಯತಿ ॥ 39 ॥
ಕಿಂ ವಿಶ್ರಾಮ್ಯಸಿ ಕೃಷ್ಣಭೋಗಿಭವನೇ ಭಾಣ್ಡೀರಭೂಮೀರುಹಿ ಭ್ರಾತ ರ್ಯಾಹಿ ನದೃಷ್ಟಿಗೋಚರಮಿತಸ್ಸಾನನ್ದನನ್ದಾಸ್ಪದಮ್।
ರಧಾಯಾವಚನಂ ತದಧ್ವಗಮುಖಾನ್ನನ್ದಾನ್ತಿಕೇಗೋಪತೋ ಗೋವಿನ್ದಸ್ಯಜಯನ್ತಿ ಸಾಯಮತಿಥಿಪ್ರಾಶಸ್ತ್ಯಗರ್ಭಾಗಿರಃ॥ 40 ॥
॥ ಇತಿ ಗೀತಗೋವಿನ್ದೇ ವಾಸಕಸಜ್ಜಾವರ್ಣನೇ ಕುಣ್ಠವೈಕುಣ್ಠೋ ನಾಮ ಷಷ್ಠಃ ಸರ್ಗಃ ॥
