ಶ್ರೀಕ್ಷೋಣ್ಯೌ ರಮಣೀಯುಗಂ ಸುರಮಣೀಪುತ್ರೋಽಪಿ ವಾಣೀಪತಿಃ
ಪೌತ್ರಶ್ಚನ್ದ್ರಶಿರೋಮಣಿಃ ಫಣಿಪತಿಃ ಶಯ್ಯಾ ಸುರಾಃ ಸೇವಕಾಃ ।
ತಾರ್ಕ್ಷ್ಯೋ ಯಸ್ಯ ರಥೋ ಮಹಶ್ಚ ಭವನಂ ಬ್ರಹ್ಮಾಣ್ಡಮಾದ್ಯಃ ಪುಮಾನ್
ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಳಮ್ ॥ 1 ॥
ಯತ್ತೇಜೋ ರವಿಕೋಟಿಕೋಟಿಕಿರಣಾನ್ ಧಿಕ್ಕೃತ್ಯ ಜೇಜೀಯತೇ
ಯಸ್ಯ ಶ್ರೀವದನಾಮ್ಬುಜಸ್ಯ ಸುಷಮಾ ರಾಕೇನ್ದುಕೋಟೀರಪಿ ।
ಸೌನ್ದರ್ಯಂ ಚ ಮನೋಭವಾನಪಿ ಬಹೂನ್ ಕಾನ್ತಿಶ್ಚ ಕಾದಮ್ಬಿನೀಂ
ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಳಮ್ ॥ 2 ॥
ನಾನಾರತ್ನ ಕಿರೀಟಕುಣ್ಡಲಮುಖೈರ್ಭೂಷಾಗಣೈರ್ಭೂಷಿತಃ
ಶ್ರೀಮತ್ಕೌಸ್ತುಭರತ್ನ ಭವ್ಯಹೃದಯಃ ಶ್ರೀವತ್ಸಸಲ್ಲಾಞ್ಛನಃ ।
ವಿದ್ಯುದ್ವರ್ಣಸುವರ್ಣವಸ್ತ್ರರುಚಿರೋ ಯಃ ಶಙ್ಖಚಕ್ರಾದಿಭಿಃ
ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಳಮ್ ॥ 3 ॥
ಯತ್ಫಾಲೇ ಮೃಗನಾಭಿಚಾರುತಿಲಕೋ ನೇತ್ರೇಽಬ್ಜಪತ್ರಾಯತೇ
ಕಸ್ತೂರೀಘನಸಾರಕೇಸರಮಿಲಚ್ಛ್ರೀಗನ್ಧಸಾರೋ ದ್ರವೈಃ ।
ಗನ್ಧೈರ್ಲಿಪ್ತತನುಃ ಸುಗನ್ಧಸುಮನೋಮಾಲಾಧರೋ ಯಃ ಪ್ರಭುಃ
ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಳಮ್ ॥ 4 ॥
ಏತದ್ದಿವ್ಯಪದಂ ಮಮಾಸ್ತಿ ಭುವಿ ತತ್ಸಮ್ಪಶ್ಯತೇತ್ಯಾದರಾ-
-ದ್ಭಕ್ತೇಭ್ಯಃ ಸ್ವಕರೇಣ ದರ್ಶಯತಿ ಯದ್ದೃಷ್ಟ್ಯಾಽತಿಸೌಖ್ಯಂ ಗತಃ ।
ಏತದ್ಭಕ್ತಿಮತೋ ಮಹಾನಪಿ ಭವಾಮ್ಭೋಧಿರ್ನದೀತಿ ಸ್ಪೃಶನ್
ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಳಮ್ ॥ 5 ॥
ಯಃ ಸ್ವಾಮೀ ಸರಸಸ್ತಟೇ ವಿಹರತೋ ಶ್ರೀಸ್ವಾಮಿನಾಮ್ನಃ ಸದಾ
ಸೌವರ್ಣಾಲಯಮನ್ದಿರೋ ವಿಧಿಮುಖೈರ್ಬರ್ಹಿರ್ಮುಖೈಃ ಸೇವಿತಃ ।
ಯಃ ಶತ್ರೂನ್ ಹನಯನ್ ನಿಜಾನವತಿ ಚ ಶ್ರೀಭೂವರಾಹಾತ್ಮಕಃ
ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಳಮ್ ॥ 6 ॥
ಯೋ ಬ್ರಹ್ಮಾದಿಸುರಾನ್ ಮುನೀಂಶ್ಚ ಮನುಜಾನ್ ಬ್ರಹ್ಮೋತ್ಸವಾಯಾಗತಾನ್
ದೃಷ್ಟ್ವಾ ಹೃಷ್ಟಮನಾ ಬಭೂವ ಬಹುಶಸ್ತೈರರ್ಚಿತಃ ಸಂಸ್ತುತಃ ।
ತೇಭ್ಯೋ ಯಃ ಪ್ರದದಾದ್ವರಾನ್ ಬಹುವಿಧಾನ್ ಲಕ್ಷ್ಮೀನಿವಾಸೋ ವಿಭುಃ
ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಳಮ್ ॥ 7 ॥
ಯೋ ದೇವೋ ಭುವಿ ವರ್ತತೇ ಕಲಿಯುಗೇ ವೈಕುಣ್ಠಲೋಕಸ್ಥಿತೋ
ಭಕ್ತಾನಾಂ ಪರಿಪಾಲನಾಯ ಸತತಂ ಕಾರುಣ್ಯವಾರಾಂ ನಿಧಿಃ ।
ಶ್ರೀಶೇಷಾಖ್ಯಮಹೀನ್ಧ್ರಮಸ್ತಕಮಣಿರ್ಭಕ್ತೈಕಚಿನ್ತಾಮಣಿಃ
ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಳಮ್ ॥ 8 ॥
ಶೇಷಾದ್ರಿಪ್ರಭುಮಙ್ಗಳಾಷ್ಟಕಮಿದಂ ತುಷ್ಟೇನ ಯಸ್ಯೇಶಿತುಃ
ಪ್ರೀತ್ಯರ್ಥಂ ರಚಿತಂ ರಮೇಶಚರಣದ್ವನ್ದ್ವೈಕನಿಷ್ಠಾವತಾ ।
ವೈವಾಹ್ಯಾದಿಶುಭಕ್ರಿಯಾಸು ಪಠಿತಂ ಯೈಃ ಸಾಧು ತೇಷಾಮಪಿ
ಶ್ರೀಮದ್ವೇಙ್ಕಟಭೂಧರೇನ್ದ್ರರಮಣಃ ಕುರ್ಯಾದ್ಧರಿರ್ಮಙ್ಗಳಮ್ ॥ 9 ॥
ಇತಿ ಶ್ರೀ ವೇಙ್ಕಟೇಶ ಮಙ್ಗಳಾಷ್ಟಕಮ್ ।
