ಕ್ರಮೇಣ ಸರ್ಗೇ ಪರಿವರ್ಧಮಾನೇ
ಕದಾಪಿ ದಿವ್ಯಾಃ ಸನಕಾದಯಸ್ತೇ ।
ಭವದ್ವಿಲೋಕಾಯ ವಿಕುಣ್ಠಲೋಕಂ
ಪ್ರಪೇದಿರೇ ಮಾರುತಮನ್ದಿರೇಶ ॥1॥
ಮನೋಜ್ಞನೈಶ್ರೇಯಸಕಾನನಾದ್ಯೈ-
ರನೇಕವಾಪೀಮಣಿಮನ್ದಿರೈಶ್ಚ ।
ಅನೋಪಮಂ ತಂ ಭವತೋ ನಿಕೇತಂ
ಮುನೀಶ್ವರಾಃ ಪ್ರಾಪುರತೀತಕಕ್ಷ್ಯಾಃ ॥2॥
ಭವದ್ದಿದ್ದೃಕ್ಷೂನ್ಭವನಂ ವಿವಿಕ್ಷೂನ್
ದ್ವಾಃಸ್ಥೌ ಜಯಸ್ತಾನ್ ವಿಜಯೋಽಪ್ಯರುನ್ಧಾಮ್ ।
ತೇಷಾಂ ಚ ಚಿತ್ತೇ ಪದಮಾಪ ಕೋಪಃ
ಸರ್ವಂ ಭವತ್ಪ್ರೇರಣಯೈವ ಭೂಮನ್ ॥3॥
ವೈಕುಣ್ಠಲೋಕಾನುಚಿತಪ್ರಚೇಷ್ಟೌ
ಕಷ್ಟೌ ಯುವಾಂ ದೈತ್ಯಗತಿಂ ಭಜೇತಮ್ ।
ಇತಿ ಪ್ರಶಪ್ತೌ ಭವದಾಶ್ರಯೌ ತೌ
ಹರಿಸ್ಮೃತಿರ್ನೋಽಸ್ತ್ವಿತಿ ನೇಮತುಸ್ತಾನ್ ॥4॥
ತದೇತದಾಜ್ಞಾಯ ಭವಾನವಾಪ್ತಃ
ಸಹೈವ ಲಕ್ಷ್ಮ್ಯಾ ಬಹಿರಮ್ಬುಜಾಕ್ಷ ।
ಖಗೇಶ್ವರಾಂಸಾರ್ಪಿತಚಾರುಬಾಹು-
ರಾನನ್ದಯಂಸ್ತಾನಭಿರಾಮಮೂರ್ತ್ಯಾ ॥5॥
ಪ್ರಸಾದ್ಯ ಗೀರ್ಭಿಃ ಸ್ತುವತೋ ಮುನೀನ್ದ್ರಾ-
ನನನ್ಯನಾಥಾವಥ ಪಾರ್ಷದೌ ತೌ ।
ಸಂರಮ್ಭಯೋಗೇನ ಭವೈಸ್ತ್ರಿಭಿರ್ಮಾ-
ಮುಪೇತಮಿತ್ಯಾತ್ತಕೃಪಂ ನ್ಯಗಾದೀಃ ॥6॥
ತ್ವದೀಯಭೃತ್ಯಾವಥ ಕಾಶ್ಯಪಾತ್ತೌ
ಸುರಾರಿವೀರಾವುದಿತೌ ದಿತೌ ದ್ವೌ ।
ಸನ್ಧ್ಯಾಸಮುತ್ಪಾದನಕಷ್ಟಚೇಷ್ಟೌ
ಯಮೌ ಚ ಲೋಕಸ್ಯ ಯಮಾವಿವಾನ್ಯೌ ॥7॥
ಹಿರಣ್ಯಪೂರ್ವಃ ಕಶಿಪುಃ ಕಿಲೈಕಃ
ಪರೋ ಹಿರಣ್ಯಾಕ್ಷ ಇತಿ ಪ್ರತೀತಃ ।
ಉಭೌ ಭವನ್ನಾಥಮಶೇಷಲೋಕಂ
ರುಷಾ ನ್ಯರುನ್ಧಾಂ ನಿಜವಾಸನಾನ್ಧೌ ॥8॥
ತಯೋರ್ಹಿರಣ್ಯಾಕ್ಷಮಹಾಸುರೇನ್ದ್ರೋ
ರಣಾಯ ಧಾವನ್ನನವಾಪ್ತವೈರೀ ।
ಭವತ್ಪ್ರಿಯಾಂ ಕ್ಷ್ಮಾಂ ಸಲಿಲೇ ನಿಮಜ್ಯ
ಚಚಾರ ಗರ್ವಾದ್ವಿನದನ್ ಗದಾವಾನ್ ॥9॥
ತತೋ ಜಲೇಶಾತ್ ಸದೃಶಂ ಭವನ್ತಂ
ನಿಶಮ್ಯ ಬಭ್ರಾಮ ಗವೇಷಯಂಸ್ತ್ವಾಮ್ ।
ಭಕ್ತೈಕದೃಶ್ಯಃ ಸ ಕೃಪಾನಿಧೇ ತ್ವಂ
ನಿರುನ್ಧಿ ರೋಗಾನ್ ಮರುದಾಲಯೇಶ ॥10।
