ಆಲೋಕ್ಯ ಶೈಲೋದ್ಧರಣಾದಿರೂಪಂ ಪ್ರಭಾವಮುಚ್ಚೈಸ್ತವ ಗೋಪಲೋಕಾಃ ।
ವಿಶ್ವೇಶ್ವರಂ ತ್ವಾಮಭಿಮತ್ಯ ವಿಶ್ವೇ ನನ್ದಂ ಭವಜ್ಜಾತಕಮನ್ವಪೃಚ್ಛನ್ ॥1॥
ಗರ್ಗೋದಿತೋ ನಿರ್ಗದಿತೋ ನಿಜಾಯ ವರ್ಗಾಯ ತಾತೇನ ತವ ಪ್ರಭಾವಃ ।
ಪೂರ್ವಾಧಿಕಸ್ತ್ವಯ್ಯನುರಾಗ ಏಷಾಮೈಧಿಷ್ಟ ತಾವತ್ ಬಹುಮಾನಭಾರಃ ॥2॥
ತತೋಽವಮಾನೋದಿತತತ್ತ್ವಬೋಧಃ ಸುರಾಧಿರಾಜಃ ಸಹ ದಿವ್ಯಗವ್ಯಾ।
ಉಪೇತ್ಯ ತುಷ್ಟಾವ ಸ ನಷ್ಟಗರ್ವಃ ಸ್ಪೃಷ್ಟ್ವಾ ಪದಾಬ್ಜಂ ಮಣಿಮೌಲಿನಾ ತೇ ॥3॥
ಸ್ನೇಹಸ್ನುತೈಸ್ತ್ವಾಂ ಸುರಭಿಃ ಪಯೋಭಿರ್ಗೋವಿನ್ದನಾಮಾಙ್ಕಿತಮಭ್ಯಷಿಞ್ಚತ್ ।
ಐರಾವತೋಪಾಹೃತದಿವ್ಯಗಙ್ಗಾಪಾಥೋಭಿರಿನ್ದ್ರೋಽಪಿ ಚ ಜಾತಹರ್ಷಃ ॥4॥
ಜಗತ್ತ್ರಯೇಶೇ ತ್ವಯಿ ಗೋಕುಲೇಶೇ ತಥಾಽಭಿಷಿಕ್ತೇ ಸತಿ ಗೋಪವಾಟಃ ।
ನಾಕೇಽಪಿ ವೈಕುಣ್ಠಪದೇಽಪ್ಯಲಭ್ಯಾಂ ಶ್ರಿಯಂ ಪ್ರಪೇದೇ ಭವತಃ ಪ್ರಭಾವಾತ್ ॥5॥
ಕದಾಚಿದನ್ತರ್ಯಮುನಂ ಪ್ರಭಾತೇ ಸ್ನಾಯನ್ ಪಿತಾ ವಾರುಣಪೂರುಷೇಣ ।
ನೀತಸ್ತಮಾನೇತುಮಗಾಃ ಪುರೀಂ ತ್ವಂ ತಾಂ ವಾರುಣೀಂ ಕಾರಣಮರ್ತ್ಯರೂಪಃ ॥6॥
ಸಸಮ್ಭ್ರಮಂ ತೇನ ಜಲಾಧಿಪೇನ ಪ್ರಪೂಜಿತಸ್ತ್ವಂ ಪ್ರತಿಗೃಹ್ಯ ತಾತಮ್ ।
ಉಪಾಗತಸ್ತತ್ಕ್ಷಣಮಾತ್ಮಗೇಹಂ ಪಿತಾಽವದತ್ತಚ್ಚರಿತಂ ನಿಜೇಭ್ಯಃ ॥7॥
ಹರಿಂ ವಿನಿಶ್ಚಿತ್ಯ ಭವನ್ತಮೇತಾನ್ ಭವತ್ಪದಾಲೋಕನಬದ್ಧತೃಷ್ಣಾನ್ ॥
ನಿರೀಕ್ಷ್ಯ ವಿಷ್ಣೋ ಪರಮಂ ಪದಂ ತದ್ದುರಾಪಮನ್ಯೈಸ್ತ್ವಮದೀದೃಶಸ್ತಾನ್ ॥8॥
ಸ್ಫುರತ್ಪರಾನನ್ದರಸಪ್ರವಾಹಪ್ರಪೂರ್ಣಕೈವಲ್ಯಮಹಾಪಯೋಧೌ ।
ಚಿರಂ ನಿಮಗ್ನಾಃ ಖಲು ಗೋಪಸಙ್ಘಾಸ್ತ್ವಯೈವ ಭೂಮನ್ ಪುನರುದ್ಧೃತಾಸ್ತೇ ॥9॥
ಕರಬದರವದೇವಂ ದೇವ ಕುತ್ರಾವತಾರೇ
ನಿಜಪದಮನವಾಪ್ಯಂ ದರ್ಶಿತಂ ಭಕ್ತಿಭಾಜಾಮ್ ।
ತದಿಹ ಪಶುಪರೂಪೀ ತ್ವಂ ಹಿ ಸಾಕ್ಷಾತ್ ಪರಾತ್ಮಾ
ಪವನಪುರನಿವಾಸಿನ್ ಪಾಹಿ ಮಾಮಾಮಯೇಭ್ಯಃ ॥10॥
