ಕೌಸಲ್ಯಾ ಸುಪ್ರಜಾ ರಾಮ ಪೂರ್ವಾಸನ್ಧ್ಯಾ ಪ್ರವರ್ತತೇ ।
ಉತ್ತಿಷ್ಠ ನರಶಾರ್ದೂಲ ಕರ್ತವ್ಯಂ ದೈವಮಾಹ್ನಿಕಮ್ ॥ 1 ॥
ಉತ್ತಿಷ್ಠೋತ್ತಿಷ್ಠ ಗೋವಿನ್ದ ಉತ್ತಿಷ್ಠ ಗರುಡಧ್ವಜ ।
ಉತ್ತಿಷ್ಠ ಕಮಲಾಕಾನ್ತ ತ್ರೈಲೋಕ್ಯಂ ಮಙ್ಗಳಂ ಕುರು ॥ 2 ॥
ಮಾತಸ್ಸಮಸ್ತ ಜಗತಾಂ ಮಧುಕೈಟಭಾರೇಃ
ವಕ್ಷೋವಿಹಾರಿಣಿ ಮನೋಹರ ದಿವ್ಯಮೂರ್ತೇ ।
ಶ್ರೀಸ್ವಾಮಿನಿ ಶ್ರಿತಜನಪ್ರಿಯ ದಾನಶೀಲೇ
ಶ್ರೀ ವೇಙ್ಕಟೇಶ ದಯಿತೇ ತವ ಸುಪ್ರಭಾತಮ್ ॥ 3 ॥
ತವ ಸುಪ್ರಭಾತಮರವಿನ್ದ ಲೋಚನೇ
ಭವತು ಪ್ರಸನ್ನಮುಖ ಚನ್ದ್ರಮಣ್ಡಲೇ ।
ವಿಧಿ ಶಙ್ಕರೇನ್ದ್ರ ವನಿತಾಭಿರರ್ಚಿತೇ
ವೃಶ ಶೈಲನಾಥ ದಯಿತೇ ದಯಾನಿಧೇ ॥ 4 ॥
ಅತ್ರ್ಯಾದಿ ಸಪ್ತ ಋಷಯಸ್ಸಮುಪಾಸ್ಯ ಸನ್ಧ್ಯಾಂ
ಆಕಾಶ ಸಿನ್ಧು ಕಮಲಾನಿ ಮನೋಹರಾಣಿ ।
ಆದಾಯ ಪಾದಯುಗ ಮರ್ಚಯಿತುಂ ಪ್ರಪನ್ನಾಃ
ಶೇಷಾದ್ರಿ ಶೇಖರ ವಿಭೋ ತವ ಸುಪ್ರಭಾತಮ್ ॥ 5 ॥
ಪಞ್ಚಾನನಾಬ್ಜ ಭವ ಷಣ್ಮುಖ ವಾಸವಾದ್ಯಾಃ
ತ್ರೈವಿಕ್ರಮಾದಿ ಚರಿತಂ ವಿಬುಧಾಃ ಸ್ತುವನ್ತಿ ।
ಭಾಷಾಪತಿಃ ಪಠತಿ ವಾಸರ ಶುದ್ಧಿ ಮಾರಾತ್
ಶೇಷಾದ್ರಿ ಶೇಖರ ವಿಭೋ ತವ ಸುಪ್ರಭಾತಮ್ ॥ 6 ॥
ಈಶತ್-ಪ್ರಫುಲ್ಲ ಸರಸೀರುಹ ನಾರಿಕೇಳ
ಪೂಗದ್ರುಮಾದಿ ಸುಮನೋಹರ ಪಾಲಿಕಾನಾಮ್ ।
ಆವಾತಿ ಮನ್ದಮನಿಲಃ ಸಹದಿವ್ಯ ಗನ್ಧೈಃ
ಶೇಷಾದ್ರಿ ಶೇಖರ ವಿಭೋ ತವ ಸುಪ್ರಭಾತಮ್ ॥ 7 ॥
ಉನ್ಮೀಲ್ಯನೇತ್ರ ಯುಗಮುತ್ತಮ ಪಞ್ಜರಸ್ಥಾಃ
ಪಾತ್ರಾವಸಿಷ್ಟ ಕದಲೀ ಫಲ ಪಾಯಸಾನಿ ।
ಭುಕ್ತ್ವಾಃ ಸಲೀಲ ಮಥಕೇಳಿ ಶುಕಾಃ ಪಠನ್ತಿ
ಶೇಷಾದ್ರಿ ಶೇಖರ ವಿಭೋ ತವ ಸುಪ್ರಭಾತಮ್ ॥ 8 ॥
ತನ್ತ್ರೀ ಪ್ರಕರ್ಷ ಮಧುರ ಸ್ವನಯಾ ವಿಪಞ್ಚ್ಯಾ
ಗಾಯತ್ಯನನ್ತ ಚರಿತಂ ತವ ನಾರದೋಽಪಿ ।
ಭಾಷಾ ಸಮಗ್ರ ಮಸತ್-ಕೃತಚಾರು ರಮ್ಯಂ
ಶೇಷಾದ್ರಿ ಶೇಖರ ವಿಭೋ ತವ ಸುಪ್ರಭಾತಮ್ ॥ 9 ॥
ಭೃಙ್ಗಾವಳೀ ಚ ಮಕರನ್ದ ರಸಾನು ವಿದ್ಧ
ಝುಙ್ಕಾರಗೀತ ನಿನದೈಃ ಸಹಸೇವನಾಯ ।
ನಿರ್ಯಾತ್ಯುಪಾನ್ತ ಸರಸೀ ಕಮಲೋದರೇಭ್ಯಃ
ಶೇಷಾದ್ರಿ ಶೇಖರ ವಿಭೋ ತವ ಸುಪ್ರಭಾತಮ್ ॥ 10 ॥
ಯೋಷಾಗಣೇನ ವರದಧ್ನಿ ವಿಮಥ್ಯಮಾನೇ
ಘೋಷಾಲಯೇಷು ದಧಿಮನ್ಥನ ತೀವ್ರಘೋಷಾಃ ।
ರೋಷಾತ್ಕಲಿಂ ವಿದಧತೇ ಕಕುಭಶ್ಚ ಕುಮ್ಭಾಃ
ಶೇಷಾದ್ರಿ ಶೇಖರ ವಿಭೋ ತವ ಸುಪ್ರಭಾತಮ್ ॥ 11 ॥
ಪದ್ಮೇಶಮಿತ್ರ ಶತಪತ್ರ ಗತಾಳಿವರ್ಗಾಃ
ಹರ್ತುಂ ಶ್ರಿಯಂ ಕುವಲಯಸ್ಯ ನಿಜಾಙ್ಗಲಕ್ಷ್ಮ್ಯಾಃ ।
ಭೇರೀ ನಿನಾದಮಿವ ಭಿಭ್ರತಿ ತೀವ್ರನಾದಮ್
ಶೇಷಾದ್ರಿ ಶೇಖರ ವಿಭೋ ತವ ಸುಪ್ರಭಾತಮ್ ॥ 12 ॥
ಶ್ರೀಮನ್ನಭೀಷ್ಟ ವರದಾಖಿಲ ಲೋಕ ಬನ್ಧೋ
ಶ್ರೀ ಶ್ರೀನಿವಾಸ ಜಗದೇಕ ದಯೈಕ ಸಿನ್ಧೋ ।
ಶ್ರೀ ದೇವತಾ ಗೃಹ ಭುಜಾನ್ತರ ದಿವ್ಯಮೂರ್ತೇ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 13 ॥
ಶ್ರೀ ಸ್ವಾಮಿ ಪುಷ್ಕರಿಣಿಕಾಪ್ಲವ ನಿರ್ಮಲಾಙ್ಗಾಃ
ಶ್ರೇಯಾರ್ಥಿನೋ ಹರವಿರಿಞ್ಚಿ ಸನನ್ದನಾದ್ಯಾಃ ।
ದ್ವಾರೇ ವಸನ್ತಿ ವರನೇತ್ರ ಹತೋತ್ತ ಮಾಙ್ಗಾಃ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 14 ॥
ಶ್ರೀ ಶೇಷಶೈಲ ಗರುಡಾಚಲ ವೇಙ್ಕಟಾದ್ರಿ
ನಾರಾಯಣಾದ್ರಿ ವೃಷಭಾದ್ರಿ ವೃಷಾದ್ರಿ ಮುಖ್ಯಾಮ್ ।
ಆಖ್ಯಾಂ ತ್ವದೀಯ ವಸತೇ ರನಿಶಂ ವದನ್ತಿ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 15 ॥
ಸೇವಾಪರಾಃ ಶಿವ ಸುರೇಶ ಕೃಶಾನುಧರ್ಮ
ರಕ್ಷೋಮ್ಬುನಾಥ ಪವಮಾನ ಧನಾಧಿ ನಾಥಾಃ ।
ಬದ್ಧಾಞ್ಜಲಿ ಪ್ರವಿಲಸನ್ನಿಜ ಶೀರ್ಷದೇಶಾಃ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 16 ॥
ಧಾಟೀಷು ತೇ ವಿಹಗರಾಜ ಮೃಗಾಧಿರಾಜ
ನಾಗಾಧಿರಾಜ ಗಜರಾಜ ಹಯಾಧಿರಾಜಾಃ ।
ಸ್ವಸ್ವಾಧಿಕಾರ ಮಹಿಮಾಧಿಕ ಮರ್ಥಯನ್ತೇ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 17 ॥
ಸೂರ್ಯೇನ್ದು ಭೌಮ ಬುಧವಾಕ್ಪತಿ ಕಾವ್ಯಶೌರಿ
ಸ್ವರ್ಭಾನುಕೇತು ದಿವಿಶತ್-ಪರಿಶತ್-ಪ್ರಧಾನಾಃ ।
ತ್ವದ್ದಾಸದಾಸ ಚರಮಾವಧಿ ದಾಸದಾಸಾಃ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 18 ॥
ತತ್-ಪಾದಧೂಳಿ ಭರಿತ ಸ್ಫುರಿತೋತ್ತಮಾಙ್ಗಾಃ
ಸ್ವರ್ಗಾಪವರ್ಗ ನಿರಪೇಕ್ಷ ನಿಜಾನ್ತರಙ್ಗಾಃ ।
ಕಲ್ಪಾಗಮಾ ಕಲನಯಾಽಽಕುಲತಾಂ ಲಭನ್ತೇ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 19 ॥
ತ್ವದ್ಗೋಪುರಾಗ್ರ ಶಿಖರಾಣಿ ನಿರೀಕ್ಷಮಾಣಾಃ
ಸ್ವರ್ಗಾಪವರ್ಗ ಪದವೀಂ ಪರಮಾಂ ಶ್ರಯನ್ತಃ ।
ಮರ್ತ್ಯಾ ಮನುಷ್ಯ ಭುವನೇ ಮತಿಮಾಶ್ರಯನ್ತೇ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 20 ॥
ಶ್ರೀ ಭೂಮಿನಾಯಕ ದಯಾದಿ ಗುಣಾಮೃತಾಬ್ದೇ
ದೇವಾದಿದೇವ ಜಗದೇಕ ಶರಣ್ಯಮೂರ್ತೇ ।
ಶ್ರೀಮನ್ನನನ್ತ ಗರುಡಾದಿಭಿ ರರ್ಚಿತಾಙ್ಘ್ರೇ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 21 ॥
ಶ್ರೀ ಪದ್ಮನಾಭ ಪುರುಷೋತ್ತಮ ವಾಸುದೇವ
ವೈಕುಣ್ಠ ಮಾಧವ ಜನಾರ್ಧನ ಚಕ್ರಪಾಣೇ ।
ಶ್ರೀ ವತ್ಸ ಚಿಹ್ನ ಶರಣಾಗತ ಪಾರಿಜಾತ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 22 ॥
ಕನ್ದರ್ಪ ದರ್ಪ ಹರ ಸುನ್ದರ ದಿವ್ಯ ಮೂರ್ತೇ
ಕಾನ್ತಾ ಕುಚಾಮ್ಬುರುಹ ಕುಟ್ಮಲ ಲೋಲದೃಷ್ಟೇ ।
ಕಲ್ಯಾಣ ನಿರ್ಮಲ ಗುಣಾಕರ ದಿವ್ಯಕೀರ್ತೇ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 23 ॥
ಮೀನಾಕೃತೇ ಕಮಠಕೋಲ ನೃಸಿಂಹ ವರ್ಣಿನ್
ಸ್ವಾಮಿನ್ ಪರಶ್ವಥ ತಪೋಧನ ರಾಮಚನ್ದ್ರ ।
ಶೇಷಾಂಶರಾಮ ಯದುನನ್ದನ ಕಲ್ಕಿರೂಪ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 24 ॥
ಏಲಾಲವಙ್ಗ ಘನಸಾರ ಸುಗನ್ಧಿ ತೀರ್ಥಂ
ದಿವ್ಯಂ ವಿಯತ್ಸರಿತಿ ಹೇಮಘಟೇಷು ಪೂರ್ಣಮ್ ।
ಧೃತ್ವಾದ್ಯ ವೈದಿಕ ಶಿಖಾಮಣಯಃ ಪ್ರಹೃಷ್ಟಾಃ
ತಿಷ್ಠನ್ತಿ ವೇಙ್ಕಟಪತೇ ತವ ಸುಪ್ರಭಾತಮ್ ॥ 25 ॥
ಭಾಸ್ವಾನುದೇತಿ ವಿಕಚಾನಿ ಸರೋರುಹಾಣಿ
ಸಮ್ಪೂರಯನ್ತಿ ನಿನದೈಃ ಕಕುಭೋ ವಿಹಙ್ಗಾಃ ।
ಶ್ರೀವೈಷ್ಣವಾಃ ಸತತ ಮರ್ಥಿತ ಮಙ್ಗಳಾಸ್ತೇ
ಧಾಮಾಶ್ರಯನ್ತಿ ತವ ವೇಙ್ಕಟ ಸುಪ್ರಭಾತಮ್ ॥ 26 ॥
ಬ್ರಹ್ಮಾದಯ-ಸ್ಸುರವರಾ-ಸ್ಸಮಹರ್ಷಯಸ್ತೇ
ಸನ್ತಸ್ಸನನ್ದನ-ಮುಖಾಸ್ತ್ವಥ ಯೋಗಿವರ್ಯಾಃ ।
ಧಾಮಾನ್ತಿಕೇ ತವ ಹಿ ಮಙ್ಗಳವಸ್ತುಹಸ್ತಾಃ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 27 ॥
ಲಕ್ಶ್ಮೀನಿವಾಸ ನಿರವದ್ಯ ಗುಣೈಕ ಸಿನ್ಧೋ
ಸಂಸಾರಸಾಗರ ಸಮುತ್ತರಣೈಕ ಸೇತೋ ।
ವೇದಾನ್ತ ವೇದ್ಯ ನಿಜವೈಭವ ಭಕ್ತ ಭೋಗ್ಯ
ಶ್ರೀ ವೇಙ್ಕಟಾಚಲಪತೇ ತವ ಸುಪ್ರಭಾತಮ್ ॥ 28 ॥
ಇತ್ಥಂ ವೃಷಾಚಲಪತೇರಿಹ ಸುಪ್ರಭಾತಂ
ಯೇ ಮಾನವಾಃ ಪ್ರತಿದಿನಂ ಪಠಿತುಂ ಪ್ರವೃತ್ತಾಃ ।
ತೇಷಾಂ ಪ್ರಭಾತ ಸಮಯೇ ಸ್ಮೃತಿರಙ್ಗಭಾಜಾಂ
ಪ್ರಜ್ಞಾಂ ಪರಾರ್ಥ ಸುಲಭಾಂ ಪರಮಾಂ ಪ್ರಸೂತೇ ॥ 29 ॥
