ಓಂ ಅಸ್ಯ ಶ್ರೀವಿಷ್ಣುಪಞ್ಜರಸ್ತೋತ್ರ ಮಹಾಮನ್ತ್ರಸ್ಯ ನಾರದ ಋಷಿಃ । ಅನುಷ್ಟುಪ್ ಛನ್ದಃ । ಶ್ರೀವಿಷ್ಣುಃ ಪರಮಾತ್ಮಾ ದೇವತಾ । ಅಹಂ ಬೀಜಮ್ । ಸೋಹಂ ಶಕ್ತಿಃ । ಓಂ ಹ್ರೀಂ ಕೀಲಕಮ್ । ಮಮ ಸರ್ವದೇಹರಕ್ಷಣಾರ್ಥಂ ಜಪೇ ವಿನಿಯೋಗಃ ।
ನಾರದ ಋಷಯೇ ನಮಃ ಮುಖೇ । ಶ್ರೀವಿಷ್ಣುಪರಮಾತ್ಮದೇವತಾಯೈ ನಮಃ ಹೃದಯೇ । ಅಹಂ ಬೀಜಂ ಗುಹ್ಯೇ । ಸೋಹಂ ಶಕ್ತಿಃ ಪಾದಯೋಃ । ಓಂ ಹ್ರೀಂ ಕೀಲಕಂ ಪಾದಾಗ್ರೇ । ಓಂ ಹ್ರಾಂ ಹ್ರೀಂ ಹ್ರೂಂ ಹ್ರೈಂ ಹ್ರೌಂ ಹ್ರಃ ಇತಿ ಮನ್ತ್ರಃ ।
ಓಂ ಹ್ರಾಂ ಅಙ್ಗುಷ್ಠಾಭ್ಯಾಂ ನಮಃ ।
ಓಂ ಹ್ರೀಂ ತರ್ಜನೀಭ್ಯಾಂ ನಮಃ ।
ಓಂ ಹ್ರೂಂ ಮಧ್ಯಮಾಭ್ಯಾಂ ನಮಃ ।
ಓಂ ಹ್ರೈಂ ಅನಾಮಿಕಾಭ್ಯಾಂ ನಮಃ ।
ಓಂ ಹ್ರೌಂ ಕನಿಷ್ಠಿಕಾಭ್ಯಾಂ ನಮಃ ।
ಓಂ ಹ್ರಃ ಕರತಲಕರಪೃಷ್ಠಾಭ್ಯಾಂ ನಮಃ ।
ಇತಿ ಕರನ್ಯಾಸಃ ।
ಓಂ ಹ್ರಾಂ ಹೃದಯಾಯ ನಮಃ ।
ಓಂ ಹ್ರೀಂ ಶಿರಸೇ ಸ್ವಾಹಾ ।
ಓಂ ಹ್ರೂಂ ಶಿಖಾಯೈ ವಷಟ್ ।
ಓಂ ಹ್ರೈಂ ಕವಚಾಯ ಹುಮ್ ।
ಓಂ ಹ್ರೌಂ ನೇತ್ರತ್ರಯಾಯ ವೌಷಟ್ ।
ಓಂ ಹ್ರಃ ಅಸ್ತ್ರಾಯ ಫಟ್ ।
ಇತಿ ಅಙ್ಗನ್ಯಾಸಃ ।
ಅಹಂ ಬೀಜಂ ಪ್ರಾಣಾಯಾಮಂ ಮನ್ತ್ರತ್ರಯೇಣ ಕುರ್ಯಾತ್ ।
ಧ್ಯಾನಮ್ ।
ಪರಂ ಪರಸ್ಮಾತ್ಪ್ರಕೃತೇರನಾದಿಮೇಕಂ ನಿವಿಷ್ಟಂ ಬಹುಧಾ ಗುಹಾಯಾಮ್ ।
ಸರ್ವಾಲಯಂ ಸರ್ವಚರಾಚರಸ್ಥಂ ನಮಾಮಿ ವಿಷ್ಣುಂ ಜಗದೇಕನಾಥಮ್ ॥ 1 ॥
ಓಂ ವಿಷ್ಣುಪಞ್ಜರಕಂ ದಿವ್ಯಂ ಸರ್ವದುಷ್ಟನಿವಾರಣಮ್ ।
ಉಗ್ರತೇಜೋ ಮಹಾವೀರ್ಯಂ ಸರ್ವಶತ್ರುನಿಕೃನ್ತನಮ್ ॥ 2 ॥
ತ್ರಿಪುರಂ ದಹಮಾನಸ್ಯ ಹರಸ್ಯ ಬ್ರಹ್ಮಣೋ ಹಿತಮ್ ।
ತದಹಂ ಸಮ್ಪ್ರವಕ್ಷ್ಯಾಮಿ ಆತ್ಮರಕ್ಷಾಕರಂ ನೃಣಾಮ್ ॥ 3 ॥
ಪಾದೌ ರಕ್ಷತು ಗೋವಿನ್ದೋ ಜಙ್ಘೇ ಚೈವ ತ್ರಿವಿಕ್ರಮಃ ।
ಊರೂ ಮೇ ಕೇಶವಃ ಪಾತು ಕಟಿಂ ಚೈವ ಜನಾರ್ದನಃ ॥ 4 ॥
ನಾಭಿಂ ಚೈವಾಚ್ಯುತಃ ಪಾತು ಗುಹ್ಯಂ ಚೈವ ತು ವಾಮನಃ ।
ಉದರಂ ಪದ್ಮನಾಭಶ್ಚ ಪೃಷ್ಠಂ ಚೈವ ತು ಮಾಧವಃ ॥ 5 ॥
ವಾಮಪಾರ್ಶ್ವಂ ತಥಾ ವಿಷ್ಣುರ್ದಕ್ಷಿಣಂ ಮಧುಸೂದನಃ ।
ಬಾಹೂ ವೈ ವಾಸುದೇವಶ್ಚ ಹೃದಿ ದಾಮೋದರಸ್ತಥಾ ॥ 6 ॥
ಕಣ್ಠಂ ರಕ್ಷತು ವಾರಾಹಃ ಕೃಷ್ಣಶ್ಚ ಮುಖಮಣ್ಡಲಮ್ ।
ಮಾಧವಃ ಕರ್ಣಮೂಲೇ ತು ಹೃಷೀಕೇಶಶ್ಚ ನಾಸಿಕೇ ॥ 7 ॥
ನೇತ್ರೇ ನಾರಾಯಣೋ ರಕ್ಷೇಲ್ಲಲಾಟಂ ಗರುಡಧ್ವಜಃ ।
ಕಪೋಲೌ ಕೇಶವೋ ರಕ್ಷೇದ್ವೈಕುಣ್ಠಃ ಸರ್ವತೋದಿಶಮ್ ॥ 8 ॥
ಶ್ರೀವತ್ಸಾಙ್ಕಶ್ಚ ಸರ್ವೇಷಾಮಙ್ಗಾನಾಂ ರಕ್ಷಕೋ ಭವೇತ್ ।
ಪೂರ್ವಸ್ಯಾಂ ಪುಣ್ಡರೀಕಾಕ್ಷ ಆಗ್ನೇಯ್ಯಾಂ ಶ್ರೀಧರಸ್ತಥಾ ॥ 9 ॥
ದಕ್ಷಿಣೇ ನಾರಸಿಂಹಶ್ಚ ನೈರೃತ್ಯಾಂ ಮಾಧವೋಽವತು ।
ಪುರುಷೋತ್ತಮೋ ವಾರುಣ್ಯಾಂ ವಾಯವ್ಯಾಂ ಚ ಜನಾರ್ದನಃ ॥ 10 ॥
ಗದಾಧರಸ್ತು ಕೌಬೇರ್ಯಾಮೀಶಾನ್ಯಾಂ ಪಾತು ಕೇಶವಃ ।
ಆಕಾಶೇ ಚ ಗದಾ ಪಾತು ಪಾತಾಳೇ ಚ ಸುದರ್ಶನಮ್ ॥ 11 ॥
ಸನ್ನದ್ಧಃ ಸರ್ವಗಾತ್ರೇಷು ಪ್ರವಿಷ್ಟೋ ವಿಷ್ಣುಪಞ್ಜರಃ ।
ವಿಷ್ಣುಪಞ್ಜರವಿಷ್ಟೋಽಹಂ ವಿಚರಾಮಿ ಮಹೀತಲೇ ॥ 12 ॥
ರಾಜದ್ವಾರೇಽಪಥೇ ಘೋರೇ ಸಙ್ಗ್ರಾಮೇ ಶತ್ರುಸಙ್ಕಟೇ ।
ನದೀಷು ಚ ರಣೇ ಚೈವ ಚೋರವ್ಯಾಘ್ರಭಯೇಷು ಚ ॥ 13 ॥
ಡಾಕಿನೀಪ್ರೇತಭೂತೇಷು ಭಯಂ ತಸ್ಯ ನ ಜಾಯತೇ ।
ರಕ್ಷ ರಕ್ಷ ಮಹಾದೇವ ರಕ್ಷ ರಕ್ಷ ಜನೇಶ್ವರ ॥ 14 ॥
ರಕ್ಷನ್ತು ದೇವತಾಃ ಸರ್ವಾ ಬ್ರಹ್ಮವಿಷ್ಣುಮಹೇಶ್ವರಾಃ ।
ಜಲೇ ರಕ್ಷತು ವಾರಾಹಃ ಸ್ಥಲೇ ರಕ್ಷತು ವಾಮನಃ ॥ 15 ॥
ಅಟವ್ಯಾಂ ನಾರಸಿಂಹಶ್ಚ ಸರ್ವತಃ ಪಾತು ಕೇಶವಃ ॥
ದಿವಾ ರಕ್ಷತು ಮಾಂ ಸೂರ್ಯೋ ರಾತ್ರೌ ರಕ್ಷತು ಚನ್ದ್ರಮಾಃ ॥ 16 ॥
ಪನ್ಥಾನಂ ದುರ್ಗಮಂ ರಕ್ಷೇತ್ಸರ್ವಮೇವ ಜನಾರ್ದನಃ ।
ರೋಗವಿಘ್ನಹತಶ್ಚೈವ ಬ್ರಹ್ಮಹಾ ಗುರುತಲ್ಪಗಃ ॥ 17 ॥
ಸ್ತ್ರೀಹನ್ತಾ ಬಾಲಘಾತೀ ಚ ಸುರಾಪೋ ವೃಷಲೀಪತಿಃ ।
ಮುಚ್ಯತೇ ಸರ್ವಪಾಪೇಭ್ಯೋ ಯಃ ಪಠೇನ್ನಾತ್ರ ಸಂಶಯಃ ॥ 18 ॥
ಅಪುತ್ರೋ ಲಭತೇ ಪುತ್ರಂ ಧನಾರ್ಥೀ ಲಭತೇ ಧನಮ್ ।
ವಿದ್ಯಾರ್ಥೀ ಲಭತೇ ವಿದ್ಯಾಂ ಮೋಕ್ಷಾರ್ಥೀ ಲಭತೇ ಗತಿಮ್ ॥ 19 ॥
ಆಪದೋ ಹರತೇ ನಿತ್ಯಂ ವಿಷ್ಣುಸ್ತೋತ್ರಾರ್ಥಸಮ್ಪದಾ ।
ಯಸ್ತ್ವಿದಂ ಪಠತೇ ಸ್ತೋತ್ರಂ ವಿಷ್ಣುಪಞ್ಜರಮುತ್ತಮಮ್ ॥ 20 ॥
ಮುಚ್ಯತೇ ಸರ್ವಪಾಪೇಭ್ಯೋ ವಿಷ್ಣುಲೋಕಂ ಸ ಗಚ್ಛತಿ ।
ಗೋಸಹಸ್ರಫಲಂ ತಸ್ಯ ವಾಜಪೇಯಶತಸ್ಯ ಚ ॥ 21 ॥
ಅಶ್ವಮೇಧಸಹಸ್ರಸ್ಯ ಫಲಂ ಪ್ರಾಪ್ನೋತಿ ಮಾನವಃ ।
ಸರ್ವಕಾಮಂ ಲಭೇದಸ್ಯ ಪಠನಾನ್ನಾತ್ರ ಸಂಶಯಃ ॥ 22 ॥
ಜಲೇ ವಿಷ್ಣುಃ ಸ್ಥಲೇ ವಿಷ್ಣುರ್ವಿಷ್ಣುಃ ಪರ್ವತಮಸ್ತಕೇ ।
ಜ್ವಾಲಾಮಾಲಾಕುಲೇ ವಿಷ್ಣುಃ ಸರ್ವಂ ವಿಷ್ಣುಮಯಂ ಜಗತ್ ॥ 23 ॥
ಇತಿ ಶ್ರೀಬ್ರಹ್ಮಾಣ್ಡಪುರಾಣೇ ಇನ್ದ್ರನಾರದಸಂವಾದೇ ಶ್ರೀವಿಷ್ಣುಪಞ್ಜರಸ್ತೋತ್ರಮ್ ॥
