॥ ದ್ವಿತೀಯಃ ಸರ್ಗಃ ॥
॥ ಅಕ್ಲೇಶಕೇಶವಃ ॥
ವಿಹರತಿ ವನೇ ರಾಧಾ ಸಾಧಾರಣಪ್ರಣಯೇ ಹರೌ ವಿಗಲಿತನಿಜೋತ್ಕರ್ಷಾದೀರ್ಷ್ಯಾವಶೇನ ಗತಾನ್ಯತಃ ।
ಕ್ವಚಿದಪಿ ಲತಾಕುಞ್ಜೇ ಗುಞ್ಜನ್ಮಧುವ್ರತಮಣ್ಡಲೀ-ಮುಖರಶಿಖರೇ ಲೀನಾ ದೀನಾಪ್ಯುವಾಚ ರಹಃ ಸಖೀಮ್ ॥ 14 ॥
॥ ಗೀತಂ 5 ॥
ಸಞ್ಚರದಧರಸುಧಾಮಧುರಧ್ವನಿಮುಖರಿತಮೋಹನವಂಶಮ್ ।
ಚಲಿತದೃಗಞ್ಚಲಚಞ್ಚಲಮೌಲಿಕಪೋಲವಿಲೋಲವತಂಸಮ್ ॥
ರಾಸೇ ಹರಿಮಿಹ ವಿಹಿತವಿಲಾಸಂ ಸ್ಮರತಿ ಮನೋ ಮಮ ಕೃತಪರಿಹಾಸಮ್ ॥ 1 ॥
ಚನ್ದ್ರಕಚಾರುಮಯೂರಶಿಖಣ್ಡಕಮಣ್ಡಲವಲಯಿತಕೇಶಮ್ ।
ಪ್ರಚುರಪುರನ್ದರಧನುರನುರಞ್ಜಿತಮೇದುರಮುದಿರಸುವೇಶಮ್ ॥ 2 ॥
ಗೋಪಕದಮ್ಬನಿತಮ್ಬವತೀಮುಖಚುಮ್ಬನಲಮ್ಭಿತಲೋಭಮ್ ।
ಬನ್ಧುಜೀವಮಧುರಾಧರಪಲ್ಲವಮುಲ್ಲಸಿತಸ್ಮಿತಶೋಭಮ್ ॥ 3 ॥
ವಿಪುಲಪುಲಕಭುಜಪಲ್ಲವವಲಯಿತವಲ್ಲವಯುವತಿಸಹಸ್ರಮ್ ।
ಕರಚರಣೋರಸಿ ಮಣಿಗಣಭೂಷಣಕಿರಣವಿಭಿನ್ನತಮಿಸ್ರಮ್ ॥ 4 ॥
ಜಲದಪಟಲವಲದಿನ್ದುವಿನನ್ದಕಚನ್ದನತಿಲಕಲಲಾಟಮ್ ।
ಪೀನಪಯೋಧರಪರಿಸರಮರ್ದನನಿರ್ದಯಹೃದಯಕವಾಟಮ್ ॥ 5 ॥
ಮಣಿಮಯಮಕರಮನೋಹರಕುಣ್ಡಲಮಣ್ಡಿತಗಣ್ಡಮುದಾರಮ್ ।
ಪೀತವಸನಮನುಗತಮುನಿಮನುಜಸುರಾಸುರವರಪರಿವಾರಮ್ ॥ 6 ॥
ವಿಶದಕದಮ್ಬತಲೇ ಮಿಲಿತಂ ಕಲಿಕಲುಷಭಯಂ ಶಮಯನ್ತಮ್ ।
ಮಾಮಪಿ ಕಿಮಪಿ ತರಙ್ಗದನಙ್ಗದೃಶಾ ಮನಸಾ ರಮಯನ್ತಮ್ ॥ 7 ॥
ಶ್ರೀಜಯದೇವಭಣಿತಮತಿಸುನ್ದರಮೋಹನಮಧುರಿಪುರೂಪಮ್ ।
ಹರಿಚರಣಸ್ಮರಣಂ ಪ್ರತಿ ಸಮ್ಪ್ರತಿ ಪುಣ್ಯವತಾಮನುರೂಪಮ್ ॥ 8 ॥
ಗಣಯತಿ ಗುಣಗ್ರಾಮಂ ಭಾಮಂ ಭ್ರಮಾದಪಿ ನೇಹತೇ ವಹತಿ ಚ ಪರಿತೋಷಂ ದೋಷಂ ವಿಮುಞ್ಚತಿ ದೂರತಃ ।
ಯುವತಿಷು ವಲಸ್ತೃಷ್ಣೇ ಕೃಷ್ಣೇ ವಿಹಾರಿಣಿ ಮಾಂ ವಿನಾ ಪುನರಪಿ ಮನೋ ವಾಮಂ ಕಾಮಂ ಕರೋತಿ ಕರೋಮಿ ಕಿಮ್ ॥ 15 ॥
॥ ಗೀತಂ 6 ॥
ನಿಭೃತನಿಕುಞ್ಜಗೃಹಂ ಗತಯಾ ನಿಶಿ ರಹಸಿ ನಿಲೀಯ ವಸನ್ತಮ್ ।
ಚಕಿತವಿಲೋಕಿತಸಕಲದಿಶಾ ರತಿರಭಸರಸೇನ ಹಸನ್ತಮ್ ॥
ಸಖಿ ಹೇ ಕೇಶಿಮಥನಮುದಾರಂ ರಮಯ ಮಯಾ ಸಹ ಮದನಮನೋರಥಭಾವಿತಯಾ ಸವಿಕಾರಮ್ ॥ 1 ॥
ಪ್ರಥಮಸಮಾಗಮಲಜ್ಜಿತಯಾ ಪಟುಚಾಟುಶತೈರನುಕೂಲಮ್ ।
ಮೃದುಮಧುರಸ್ಮಿತಭಾಷಿತಯಾ ಶಿಥಿಲೀಕೃತಜಘನದುಕೂಲಮ್ ॥ 2 ॥
ಕಿಸಲಯಶಯನನಿವೇಶಿತಯಾ ಚಿರಮುರಸಿ ಮಮೈವ ಶಯಾನಮ್ ।
ಕೃತಪರಿರಮ್ಭಣಚುಮ್ಬನಯಾ ಪರಿರಭ್ಯ ಕೃತಾಧರಪಾನಮ್ ॥ 3 ॥
ಅಲಸನಿಮೀಲಿತಲೋಚನಯಾ ಪುಲಕಾವಲಿಲಲಿತಕಪೋಲಮ್ ।
ಶ್ರಮಜಲಸಕಲಕಲೇವರಯಾ ವರಮದನಮದಾದತಿಲೋಲಮ್ ॥ 4 ॥
ಕೋಕಿಲಕಲರವಕೂಜಿತಯಾ ಜಿತಮನಸಿಜತನ್ತ್ರವಿಚಾರಮ್ ।
ಶ್ಲಥಕುಸುಮಾಕುಲಕುನ್ತಲಯಾ ನಖಲಿಖಿತಘನಸ್ತನಭಾರಮ್ ॥ 5 ॥
ಚರಣರಣಿತಮನಿನೂಪುರಯಾ ಪರಿಪೂರಿತಸುರತವಿತಾನಮ್ ।
ಮುಖರವಿಶೃಙ್ಖಲಮೇಖಲಯಾ ಸಕಚಗ್ರಹಚುಮ್ಬನದಾನಮ್ ॥ 6 ॥
ರತಿಸುಖಸಮಯರಸಾಲಸಯಾ ದರಮುಕುಲಿತನಯನಸರೋಜಮ್ ।
ನಿಃಸಹನಿಪತಿತತನುಲತಯಾ ಮಧುಸೂದನಮುದಿತಮನೋಜಮ್ ॥ 7 ॥
ಶ್ರೀಜಯದೇವಭಣಿತಮಿದಮತಿಶಯಮಧುರಿಪುನಿಧುವನಶೀಲಮ್ ।
ಸುಖಮುತ್ಕಣ್ಠಿತಗೋಪವಧೂಕಥಿತಂ ವಿತನೋತು ಸಲೀಲಮ್ ॥ 8 ॥
ಹಸ್ತಸ್ರಸ್ತವಿಲಾಸವಂಶಮನೃಜುಭ್ರೂವಲ್ಲಿಮದ್ಬಲ್ಲವೀ-ವೃನ್ದೋತ್ಸಾರಿದೃಗನ್ತವೀಕ್ಷಿತಮತಿಸ್ವೇದಾರ್ದ್ರಗಣ್ಡಸ್ಥಲಮ್ ।
ಮಾಮುದ್ವೀಕ್ಷ್ಯ ವಿಲಕ್ಷಿತಂ ಸ್ಮಿತಸುಧಾಮುಗ್ಧಾನನಂ ಕಾನನೇ ಗೋವಿನ್ದಂ ವ್ರಜಸುನ್ದರೀಗಣವೃತಂ ಪಶ್ಯಾಮಿ ಹೃಷ್ಯಾಮಿ ಚ ॥ 16 ॥
ದುರಾಲೋಕಸ್ತೋಕಸ್ತಬಕನವಕಾಶೋಕಲತಿಕಾ-ವಿಕಾಸಃ ಕಾಸಾರೋಪವನಪವನೋಽಪಿ ವ್ಯಥಯತಿ ।
ಅಪಿ ಭ್ರಾಮ್ಯದ್ಭೃಙ್ಗೀರಣಿತರಮಣೀಯಾ ನ ಮುಕುಲ-ಪ್ರಸೂತಿಶ್ಚೂತಾನಾಂ ಸಖಿ ಶಿಖರಿಣೀಯಂ ಸುಖಯತಿ ॥ 17 ॥
॥ ಇತಿ ಗೀತಗೋವಿನ್ದೇ ಅಕ್ಲೇಶಕೇಶವೋ ನಾಮ ದ್ವಿತೀಯಃ ಸರ್ಗಃ ॥
