ఓం అథాత్మానగ్ం శివాత్మానం శ్రీ రుద్రరూప-న్ధ్యాయేత్ ॥
శుద్ధస్ఫటిక సఙ్కాశ-న్త్రినేత్ర-మ్పఞ్చ వక్త్రకమ్ ।
గఙ్గాధర-న్దశభుజం సర్వాభరణ భూషితమ్ ॥
నీలగ్రీవం శశాఙ్కాఙ్క-న్నాగ యజ్ఞోప వీతినమ్ ।
వ్యాఘ్ర చర్మోత్తరీయ-ఞ్చ వరేణ్యమభయ ప్రదమ్ ॥
కమణ్డల్-వఖ్ష సూత్రాణా-న్ధారిణం శూలపాణినమ్ ।
జ్వలన్త-మ్పిఙ్గళజటా శిఖా ముద్ద్యోత ధారిణమ్ ॥
వృష స్కన్ధ సమారూఢం ఉమా దేహార్థ ధారిణమ్ ।
అమృతేనాప్లుతం శాన్త-న్దివ్యభోగ సమన్వితమ్ ॥
దిగ్దేవతా సమాయుక్తం సురాసుర నమస్కృతమ్ ।
నిత్య-ఞ్చ శాశ్వతం శుద్ధ-న్ధ్రువ-మఖ్షర-మవ్యయమ్ ।
సర్వ వ్యాపిన-మీశానం రుద్రం-వైఀ విశ్వరూపిణమ్ ।
ఏవ-న్ధ్యాత్వా ద్విజ-స్సమ్య-క్తతో యజనమారభేత్ ॥
అథాతో రుద్ర స్నానార్చనాభిషేక విధిం-వ్యాఀ᳚ఖ్ష్యాస్యామః ।
ఆదిత ఏవ తీర్థే స్నాత్వా,
ఉదేత్య శుచిః ప్రయతో బ్రహ్మచారీ శుక్లవాసా దేవాభిముఖ-స్స్థిత్వా,
ఆత్మని దేవతా-స్స్థాపయేత్ ॥
ప్రజననే బ్రహ్మా తిష్ఠతు ।
పాదయోర్విష్ణుస్తిష్ఠతు ।
హస్తయోర్హరస్తిష్ఠతు ।
బాహ్వోరిన్ద్రస్తిష్టతు ।
జఠరే-ఽఅగ్నిస్తిష్ఠతు ।
హృద॑యే శివస్తిష్ఠతు ।
కణ్ఠే వసవస్తిష్ఠన్తు ।
వక్త్రే సరస్వతీ తిష్ఠతు ।
నాసికయో-ర్వాయుస్తిష్ఠతు ।
నయనయో-శ్చన్ద్రాదిత్యౌ తిష్టేతామ్ ।
కర్ణయోరశ్వినౌ తిష్టేతామ్ ।
లలాటే రుద్రాస్తిష్ఠన్తు ।
మూర్థ్న్యాదిత్యాస్తిష్ఠన్తు ।
శిరసి మహాదేవస్తిష్ఠతు ।
శిఖాయాం-వాఀమదేవాస్తిష్ఠతు ।
పృష్ఠే పినాకీ తిష్ఠతు ।
పురత-శ్శూలీ తిష్ఠతు ।
పార్శ్వయో-శ్శివాశఙ్కరౌ తిష్ఠేతామ్ ।
సర్వతో వాయుస్తిష్ఠతు ।
తతో బహి-స్సర్వతో-ఽగ్నిర్జ్వాలామాలా-పరివృతస్తిష్ఠతు ।
సర్వేష్వఙ్గేషు సర్వా దేవతా యథాస్థాన-న్తిష్ఠన్తు ।
మాగ్ం రఖ్షన్తు ।
అ॒గ్నిర్మే॑ వా॒చి శ్రి॒తః । వాఘృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
వా॒యుర్మే᳚ ప్రా॒ణే శ్రి॒తః । ప్రా॒ణో హృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
సూర్యో॑ మే॒ చఖ్షుషి శ్రి॒తః । చఖ్షు॒ర్హృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
చ॒న్ద్రమా॑ మే॒ మన॑సి శ్రి॒తః । మనో॒ హృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
దిశో॑ మే॒ శ్రోత్రే᳚ శ్రి॒తాః । శ్రోత్ర॒గ్ం॒ హృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
ఆపోమే॒ రేతసి శ్రి॒తాః । రేతో హృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
పృ॒థి॒వీ మే॒ శరీ॑రే శ్రి॒తా । శరీ॑ర॒గ్ం॒ హృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
ఓ॒ష॒ధి॒ వ॒న॒స్పతయో॑ మే॒ లోమ॑సు శ్రి॒తాః । లోమా॑ని॒ హృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
ఇన్ద్రో॑ మే॒ బలే᳚ శ్రి॒తః । బల॒గ్ం॒ హృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
ప॒ర్జన్యో॑ మే॒ మూ॒ర్ద్ని శ్రి॒తః । మూ॒ర్ధా హృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
ఈశా॑నో మే॒ మ॒న్యౌ శ్రి॒తః । మ॒న్యుర్హృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
ఆ॒త్మా మ॑ ఆ॒త్మని॑ శ్రి॒తః । ఆ॒త్మా హృద॑యే । హృద॑య॒-మ్మయి॑ । అ॒హమ॒మృతే᳚ । అ॒మృత॒-మ్బ్రహ్మ॑ణి ।
పున॑ర్మ ఆ॒త్మా పున॒రాయు॒ రాగా᳚త్ । పునః॑ ప్రా॒ణః పున॒రాకూ॑త॒మాగా᳚త్ । వై॒శ్వా॒న॒రో ర॒శ్మిభి॑ర్వావృధా॒నః । అ॒న్తస్తి॑ష్ఠ॒త్వమృత॑స్య గో॒పాః ॥
అస్య శ్రీ రుద్రాధ్యాయ ప్రశ్న మహామన్త్రస్య,
అఘోర ఋషిః,
అనుష్టు-ప్ఛన్దః,
సఙ్కర్షణ మూర్తి స్వరూపో యో-ఽసావాదిత్యః పరమపురుష-స్స ఏష రుద్రో దేవతా ।
నమ-శ్శివాయేతి బీజమ్ ।
శివతరాయేతి శక్తిః ।
మహాదేవాయేతి కీలకమ్ ।
శ్రీ సామ్బ సదాశివ ప్రసాద సిద్ధ్యర్థే జపే వినియోగః ॥
ఓం అగ్నిహోత్రాత్మనే అఙ్గుష్ఠాభ్యా-న్నమః ।
దర్శపూర్ణ మాసాత్మనే తర్జనీభ్యా-న్నమః ।
చాతుర్మాస్యాత్మనే మధ్యమాభ్యా-న్నమః ।
నిరూఢ పశుబన్ధాత్మనే అనామికాభ్యా-న్నమః ।
జ్యోతిష్టోమాత్మనే కనిష్ఠికాభ్యా-న్నమః ।
సర్వక్రత్వాత్మనే కరతల కరపృష్ఠాభ్యా-న్నమః ॥
అగ్నిహోత్రాత్మనే హృదయాయ నమః ।
దర్శపూర్ణ మాసాత్మనే శిరసే స్వాహా ।
చాతుర్మాస్యాత్మనే శిఖాయై వషట్ ।
నిరూఢ పశుబన్ధాత్మనే కవచాయ హుమ్ ।
జ్యోతిష్టోమాత్మనే నేత్రత్రయాయ వౌషట్ ।
సర్వక్రత్వాత్మనే అస్త్రాయఫట్ । భూర్భువస్సువరోమితి దిగ్బన్ధః ॥
ధ్యానం
ఆపాతాళ-నభస్స్థలాన్త-భువన-బ్రహ్మాణ్డ-మావిస్ఫురత్-
జ్యోతి-స్స్ఫాటిక-లిఙ్గ-మౌళి-విలసత్-పూర్ణేన్దు-వాన్తామృతైః ।
అస్తోకాప్లుత-మేక-మీశ-మనిశం రుద్రాను-వాకాఞ్జపన్
ధ్యాయే-దీప్సిత-సిద్ధయే ధ్రువపదం-విఀప్రో-ఽభిషిఞ్చే-చ్చివమ్ ॥
బ్రహ్మాణ్డ వ్యాప్తదేహా భసిత హిమరుచా భాసమానా భుజఙ్గైః
కణ్ఠే కాలాః కపర్దాః కలిత-శశికలా-శ్చణ్డ కోదణ్డ హస్తాః ।
త్ర్యఖ్షా రుద్రాఖ్షమాలాః ప్రకటితవిభవా-శ్శామ్భవా మూర్తిభేదాః
రుద్రా-శ్శ్రీరుద్రసూక్త-ప్రకటితవిభవా నః ప్రయచ్చన్తు సౌఖ్యమ్ ॥
ఓ-ఙ్గ॒ణానా᳚-న్త్వా గ॒ణప॑తిగ్ం హవామహే క॒వి-ఙ్క॑వీ॒నాము॑ప॒మశ్ర॑వస్తమమ్ ।
జ్యే॒ష్ఠ॒రాజ॒-మ్బ్రహ్మ॑ణా-మ్బ్రహ్మణస్పద॒ ఆ న॑-శ్శృ॒ణ్వన్నూ॒తిభి॑స్సీద॒ సాద॑నమ్ ॥
మహాగణపతయే॒ నమః ॥
శ-ఞ్చ॑ మే॒ మయ॑శ్చ మే ప్రి॒య-ఞ్చ॑ మే-ఽనుకా॒మశ్చ॑ మే॒ కామ॑శ్చ మే సౌమనస॒శ్చ॑ మే భ॒ద్ర-ఞ్చ॑ మే॒ శ్రేయ॑శ్చ మే॒ వస్య॑శ్చ మే॒ యశ॑శ్చ మే॒ భగ॑శ్చ మే॒ ద్రవి॑ణ-ఞ్చ మే య॒న్తా చ॑ మే ధ॒ర్తా చ॑ మే॒ ఖ్షేమ॑శ్చ మే॒ ధృతి॑శ్చ మే॒ విశ్వ॑-ఞ్చ మే॒ మహ॑శ్చ మే సం॒విఀచ్చ॑ మే॒ జ్ఞాత్ర॑-ఞ్చ మే॒ సూశ్చ॑ మే ప్ర॒సూశ్చ॑ మే॒ సీర॑-ఞ్చ మే ల॒యశ్చ॑ మ ఋ॒త-ఞ్చ॑ మే॒-ఽమృత॑-ఞ్చ మే-ఽయ॒ఖ్ష్మ-ఞ్చ॒ మే-ఽనా॑మయచ్చ మే జీ॒వాతు॑శ్చ మే దీర్ఘాయు॒త్వ-ఞ్చ॑ మే-ఽనమి॒త్ర-ఞ్చ॒ మే-ఽభ॑య-ఞ్చ మే సు॒గ-ఞ్చ॑ మే॒ శయ॑న-ఞ్చ మే సూ॒షా చ॑ మే॒ సు॒దిన॑-ఞ్చ మే ॥
ఓం శాన్తి॒-శ్శాన్తి॒-శ్శాన్తిః॑ ॥