అథ మన్యుసూక్తం
ఋగ్వేద సంహితా; మణ్డలం 10; సూక్తం 83,84
యస్తే᳚ మ॒న్యో-ఽవి॑ధద్ వజ్ర సాయక॒ సహ॒ ఓజః॑ పుష్యతి॒ విశ్వ॑మాను॒షక్ ।
సా॒హ్యామ॒ దాస॒మార్య॒-న్త్వయా᳚ యు॒జా సహ॑స్కృతేన॒ సహ॑సా॒ సహ॑స్వతా ॥ 1 ॥
మ॒న్యురిన్ద్రో᳚ మ॒న్యురే॒వాస॑ దే॒వో మ॒న్యుర్ హోతా॒ వరు॑ణో జా॒తవే᳚దాః ।
మ॒న్యుం-విఀశ॑ ఈళతే॒ మాను॑షీ॒ర్యాః పా॒హి నో᳚ మన్యో॒ తప॑సా స॒జోషాః᳚ ॥ 2 ॥
అ॒భీ᳚హి మన్యో త॒వస॒స్తవీ᳚యా॒-న్తప॑సా యు॒జా వి జ॑హి శత్రూ᳚న్ ।
అ॒మి॒త్ర॒హా వృ॑త్ర॒హా ద॑స్యు॒హా చ॒ విశ్వా॒ వసూ॒న్యా భ॑రా॒ త్వ-న్నః॑ ॥ 3 ॥
త్వం హి మ᳚న్యో అ॒భిభూ᳚త్యోజా-స్స్వయ॒మ్భూర్భామో᳚ అభిమాతిషా॒హః ।
వి॒శ్వచ॑ర్-షణి॒-స్సహు॑రి॒-స్సహా᳚వాన॒స్మాస్వోజః॒ పృత॑నాసు ధేహి ॥ 4 ॥
అ॒భా॒గ-స్సన్నప॒ పరే᳚తో అస్మి॒ తవ॒ క్రత్వా᳚ తవి॒షస్య॑ ప్రచేతః ।
త-న్త్వా᳚ మన్యో అక్ర॒తుర్జి॑హీళా॒హం స్వాత॒నూర్బ॑ల॒దేయా᳚య॒ మేహి॑ ॥ 5 ॥
అ॒య-న్తే᳚ అ॒స్మ్యుప॒ మేహ్య॒ర్వాఙ్ ప్ర॑తీచీ॒న-స్స॑హురే విశ్వధాయః ।
మన్యో᳚ వజ్రిన్న॒భి మామా వ॑వృత్స్వహనా᳚వ॒ దస్యూ᳚న్ ఋ॒త బో᳚ధ్యా॒పేః ॥ 6 ॥
అ॒భి ప్రేహి॑ దఖ్షిణ॒తో భ॑వా॒ మే-ఽధా᳚ వృ॒త్రాణి॑ జఙ్ఘనావ॒ భూరి॑ ।
జు॒హోమి॑ తే ధ॒రుణ॒-మ్మధ్వో॒ అగ్ర॑ముభా ఉ॑పాం॒శు ప్ర॑థ॒మా పి॑బావ ॥ 7 ॥
త్వయా᳚ మన్యో స॒రథ॑మారు॒జన్తో॒ హర్ష॑మాణాసో ధృషి॒తా మ॑రుత్వః ।
తి॒గ్మేష॑వ॒ ఆయు॑ధా సం॒శిశా᳚నా అ॒భి ప్రయ᳚న్తు॒ నరో᳚ అ॒గ్నిరూ᳚పాః ॥ 8 ॥
అ॒గ్నిరి॑వ మన్యో త్విషి॒త-స్స॑హస్వ సేనా॒నీర్న॑-స్సహురే హూ॒త ఏ᳚ధి ।
హ॒త్వాయ॒ శత్రూ॒న్ వి భ॑జస్వ॒ వేద॒ ఓజో॒ మిమా᳚నో॒ విమృధో᳚ నుదస్వ ॥ 9 ॥
సహ॑స్వ మన్యో అ॒భిమా᳚తిమ॒స్మే రు॒జ-న్మృ॒ణ-న్ప్ర॑మృ॒ణ-న్ప్రేహి॒ శత్రూ᳚న్ ।
ఉ॒గ్ర-న్తే॒ పాజో᳚ న॒న్వా రు॑రుధ్రే వ॒శీ వశ᳚-న్నయస ఏకజ॒ త్వమ్ ॥ 10 ॥
ఏకో᳚ బహూ॒నామ॑సి మన్యవీళి॒తో విశం᳚విఀశం-యుఀ॒ధయే॒ సం శి॑శాధి ।
అకృ॑త్తరు॒-క్త్వయా᳚ యు॒జా వ॒య-న్ద్యు॒మన్త॒-ఙ్ఘోషం᳚-విఀజ॒యాయ॑ కృణ్మహే ॥ 11
వి॒జే॒ష॒కృదిన్ద్ర॑ ఇవానవబ్ర॒వో॒(ఓ)3॑-ఽస్మాక᳚-మ్మన్యో అధి॒పా భ॑వే॒హ 3
ప్రి॒య-న్తే॒ నామ॑ సహురే గృణీమసి వి॒ద్మాతముత్సం॒-యఀత॑ ఆబ॒భూథ॑ ॥ 12 ॥
ఆభూ᳚త్యా సహ॒జా వ॑జ్ర సాయక॒ సహో᳚ బిభర్ష్యభిభూత॒ ఉత్త॑రమ్ ।
క్రత్వా᳚ నో మన్యో స॒హమే॒ద్యే᳚ధి మహాధ॒నస్య॑ పురుహూత సం॒సృజి॑ ॥ 13 ॥
సంసృ॑ష్ట॒-న్ధన॑ము॒భయం᳚ స॒మాకృ॑తమ॒స్మభ్య᳚-న్దత్తాం॒-వఀరు॑ణశ్చ మ॒న్యుః ।
భియ॒-న్దధా᳚నా॒ హృద॑యేషు॒ శత్ర॑వః॒ పరా᳚జితాసో॒ అప॒ నిల॑యన్తామ్ ॥ 14 ॥
ధన్వ॑నా॒గాధన్వ॑ నా॒జిఞ్జ॑యేమ॒ ధన్వ॑నా తీ॒వ్రా-స్స॒మదో᳚ జయేమ ।
ధను-శ్శత్రో᳚రపకా॒మ-ఙ్కృ॑ణోతి॒ ధన్వ॑ నా॒సర్వాః᳚ ప్ర॒దిశో᳚ జయేమ ॥
ఓం శాన్తా॑ పృథివీ శి॑వమ॒న్తరిఖ్ష॒-న్ద్యౌర్నో᳚ దే॒వ్య-ఽభ॑యన్నో అస్తు ।
శి॒వా॒ దిశః॑ ప్ర॒దిశ॑ ఉ॒ద్దిశో᳚ న॒-ఽఆపో᳚ వి॒శ్వతః॒ పరి॑పాన్తు స॒ర్వత॒-శ్శాన్తి॒-శ్శాన్తి॒-శ్శాన్తిః॑ ॥
