కళ్యాణం నో విధత్తాం కటకతటలసత్కల్పవాటీనికుఞ్జ-
-క్రీడాసంసక్తవిద్యాధరనికరవధూగీతరుద్రాపదానః ।
తారైర్హేరమ్బనాదైస్తరళితనినదత్తారకారాతికేకీ
కైలాసః శర్వనిర్వృత్యభిజనకపదః సర్వదా పర్వతేన్ద్రః ॥ 1 ॥

యస్య ప్రాహుః స్వరూపం సకలదివిషదాం సారసర్వస్వయోగం
యస్యేషుః శార్‍ఙ్గధన్వా సమజని జగతాం రక్షణే జాగరూకః ।
మౌర్వీ దర్వీకరాణామపి చ పరిబృఢః పూస్త్రయీ సా చ లక్ష్యం
సోఽవ్యాదవ్యాజమస్మానశివభిదనిశం నాకినాం శ్రీపినాకః ॥ 2 ॥

ఆతఙ్కావేగహారీ సకలదివిషదామఙ్ఘ్రిపద్మాశ్రయాణాం
మాతఙ్గాద్యుగ్రదైత్యప్రకరతనుగలద్రక్తధారాక్తధారః ।
క్రూరః సూరాయుతానామపి చ పరిభవం స్వీయభాసా వితన్వ-
-న్ఘోరాకారః కుఠారో దృఢతరదురితాఖ్యాటవీం పాటయేన్నః ॥ 3 ॥

కాలారాతేః కరాగ్రే కృతవసతిరురఃశాణశాతో రిపూణాం
కాలే కాలే కులాద్రిప్రవరతనయయా కల్పితస్నేహలేపః ।
పాయాన్నః పావకార్చిఃప్రసరసఖముఖః పాపహన్తా నితాన్తం
శూలః శ్రీపాదసేవాభజనరసజుషాం పాలనైకాన్తశీలః ॥ 4 ॥

దేవస్యాఙ్కాశ్రయాయాః కులగిరిదుహితుర్నేత్రకోణప్రచార-
-ప్రస్తారానత్యుదారాన్పిపఠిషురివ యో నిత్యమత్యాదరేణ ।
ఆధత్తే భఙ్గితుఙ్గైరనిశమవయవైరన్తరఙ్గం సమోదం
సోమాపీడస్య సోఽయం ప్రదిశతు కుశలం పాణిరఙ్గః కురఙ్గః ॥ 5 ॥

కణ్ఠప్రాన్తావసజ్జత్కనకమయమహాఘణ్టికాఘోరఘోషైః
కణ్ఠారావైరకుణ్ఠైరపి భరితజగచ్చక్రవాలాన్తరాళః ।
చణ్డః ప్రోద్దణ్డశృఙ్గః కకుదకబలితోత్తుఙ్గకైలాసశృఙ్గః
కణ్ఠేకాలస్య వాహః శమయతు శమలం శాశ్వతః శాక్వరేన్ద్రః ॥ 6 ॥

నిర్యద్దానామ్బుధారాపరిమలతరలీభూతరోలమ్బపాలీ-
-ఝఙ్కారైః శఙ్కరాద్రేః శిఖరశతదరీః పూరయన్భూరిఘోషైః ।
శార్వః సౌవర్ణశైలప్రతిమపృథువపుః సర్వవిఘ్నాపహర్తా
శర్వాణ్యాః పూర్వసూనుః స భవతు భవతాం స్వస్తిదో హస్తివక్త్రః ॥ 7 ॥

యః పుణ్యైర్దేవతానాం సమజని శివయోః శ్లాఘ్యవీర్యైకమత్యా-
-ద్యన్నామ్ని శ్రూయమాణే దితిజభటఘటా భీతిభారం భజన్తే ।
భూయాత్సోఽయం విభూత్యై నిశితశరశిఖాపాటితక్రౌఞ్చశైలః
సంసారాగాధకూపోదరపతితసముత్తారకస్తారకారిః ॥ 8 ॥

ఆరూఢః ప్రౌఢవేగప్రవిజితపవనం తుఙ్గతుఙ్గం తురఙ్గం
చేలం నీలం వసానః కరతలవిలసత్కాణ్డకోదణ్డదణ్డః ।
రాగద్వేషాదినానావిధమృగపటలీభీతికృద్భూతభర్తా
కుర్వన్నాఖేటలీలాం పరిలసతు మనఃకాననే మామకీనే ॥ 9 ॥

అమ్భోజాభ్యాం చ రమ్భారథచరణలతాద్వన్ద్వకుమ్భీన్ద్రకుమ్భై-
-ర్బిమ్బేనేన్దోశ్చ కమ్బోరుపరి విలసతా విద్రుమేణోత్పలాభ్యామ్ ।
అమ్భోదేనాపి సమ్భావితముపజనితాడమ్బరం శమ్బరారేః
శమ్భోః సమ్భోగయోగ్యం కిమపి ధనమిదం సమ్భవేత్సమ్పదే నః ॥ 10 ॥

వేణీసౌభాగ్యవిస్మాపితతపనసుతాచారువేణీవిలాసా-
-న్వాణీనిర్ధూతవాణీకరతలవిధృతోదారవీణావిరావాన్ ।
ఏణీనేత్రాన్తభఙ్గీనిరసననిపుణాపాఙ్గకోణానుపాసే
శోణాన్ప్రాణానుదూఢప్రతినవసుషమాకన్దలానిన్దుమౌళేః ॥ 11 ॥

నృత్తారమ్భేషు హస్తాహతమురజధిమిద్ధిఙ్కృతైరత్యుదారై-
-శ్చిత్తానన్దం విధత్తే సదసి భగవతః సన్తతం యః స నన్దీ ।
చణ్డీశాద్యాస్తథాన్యే చతురగుణగణప్రీణితస్వామిసత్కా-
-రోత్కర్షోద్యత్ప్రసాదాః ప్రమథపరిబృఢాః పాన్తు సన్తోషిణో నః ॥ 12 ॥

ముక్తామాణిక్యజాలైః పరికలితమహాసాలమాలోకనీయం
ప్రత్యుప్తానర్ఘరత్నైర్దిశి దిశి భవనైః కల్పితైర్దిక్పతీనామ్ ।
ఉద్యానైరద్రికన్యాపరిజనవనితామాననీయైః పరీతం
హృద్యం హృద్యస్తు నిత్యం మమ భువనపతేర్ధామ సోమార్ధమౌళేః ॥ 13 ॥

స్తమ్భైర్జమ్భారిరత్నప్రవరవిరచితైః సమ్భృతోపాన్తభాగం
శుమ్భత్సోపానమార్గం శుచిమణినిచయైర్గుమ్భితానల్పశిల్పమ్ ।
కుమ్భైః సమ్పూర్ణశోభం శిరసి సుఘటితైః శాతకుమ్భైరపఙ్కైః
శమ్భోః సమ్భావనీయం సకలమునిజనైః స్వస్తిదం స్యాత్సదో నః ॥ 14 ॥

న్యస్తో మధ్యే సభాయాః పరిసరవిలసత్పాదపీఠాభిరామో
హృద్యః పాదైశ్చతుర్భిః కనకమణిమయైరుచ్చకైరుజ్జ్వలాత్మా ॥
వాసోరత్నేన కేనాప్యధికమృదుతరేణాస్తృతో విస్తృతశ్రీః
పీఠః పీడాభరం నః శమయతు శివయోః స్వైరసంవాసయోగ్యః ॥ 15 ॥

ఆసీనస్యాధిపీఠం త్రిజగదధిపతేరఙ్ఘ్రిపీఠానుషక్తౌ
పాథోజాభోగభాజౌ పరిమృదులతలోల్లాసిపద్మాదిరేఖౌ ।
పాతాం పాదావుభౌ తౌ నమదమరకిరీటోల్లసచ్చారుహీర-
-శ్రేణీశోణాయమానోన్నతనఖదశకోద్భాసమానౌ సమానౌ ॥ 16 ॥

యన్నాదో వేదవాచాం నిగదతి నిఖిలం లక్షణం పక్షికేతు-
-ర్లక్ష్మీసమ్భోగసౌఖ్యం విరచయతి యయోశ్చాపరే రూపభేదే ।
శమ్భోః సమ్భావనీయే పదకమలసమాసఙ్గతస్తుఙ్గశోభే
మాఙ్గళ్యం నః సమగ్రం సకలసుఖకరే నూపురే పూరయేతామ్ ॥ 17 ॥

అఙ్గే శృఙ్గారయోనేః సపది శలభతాం నేత్రవహ్నౌ ప్రయాతే
శత్రోరుద్ధృత్య తస్మాదిషుధియుగమధో న్యస్తమగ్రే కిమేతత్ ।
శఙ్కామిత్థం నతానామమరపరిషదామన్తరఙ్కూరయత్త-
-త్సఙ్ఘాతం చారు జఙ్ఘాయుగమఖిలపతేరంహసాం సంహరేన్నః ॥ 18 ॥

జానుద్వన్ద్వేన మీనధ్వజనృవరసముద్రోపమానేన సాకం
రాజన్తౌ రాజరమ్భాకరికరకనకస్తమ్భసమ్భావనీయౌ ।
ఊరూ గౌరీకరామ్భోరుహసరససమామర్దనానన్దభాజౌ
చారూ దూరీక్రియాస్తాం దురితముపచితం జన్మజన్మాన్తరే నః ॥ 19 ॥

ఆముక్తానర్ఘరత్నప్రకరకరపరిష్వక్తకళ్యాణకాఞ్చీ-
-దామ్నా బద్దేన దుగ్ధద్యుతినిచయముషా చీనపట్టామ్బరేణ ।
సంవీతే శైలకన్యాసుచరితపరిపాకాయమాణే నితమ్బే
నిత్యం నర్నర్తు చిత్తం మమ నిఖిలజగత్స్వామినః సోమమౌళేః ॥ 20 ॥

సన్ధ్యాకాలానురజ్యద్దినకరసరుచా కాలధౌతేన గాఢం
వ్యానద్ధః స్నిగ్ధముగ్ధః సరసముదరబన్ధేన వీతోపమేన ।
ఉద్దీప్తైః స్వప్రకాశైరుపచితమహిమా మన్మథారేరుదారో
మధ్యో మిథ్యార్థసధ్ర్యఙ్మమ దిశతు సదా సఙ్గతిం మఙ్గళానామ్ ॥ 21 ॥

నాభీచక్రాలవాలాన్నవనవసుషమాదోహదశ్రీపరీతా-
-దుద్గచ్ఛన్తీ పురస్తాదుదరపథమతిక్రమ్య వక్షః ప్రయాన్తి ।
శ్యామా కామాగమార్థప్రకథనలిపివద్భాసతే యా నికామం
సా మా సోమార్ధమౌళేః సుఖయతు సతతం రోమవల్లీమతల్లీ ॥ 22 ॥

ఆశ్లేషేష్వద్రిజాయాః కఠినకుచతటీలిప్తకాశ్మీరపఙ్క-
-వ్యాసఙ్గాదుద్యదర్కద్యుతిభిరుపచితస్పర్ధముద్దామహృద్యమ్ ।
దక్షారాతేరుదూఢప్రతినవమణిమాలావలీభాసమానం
వక్షో విక్షోభితాఘం సతతనతిజుషాం రక్షతాదక్షతం నః ॥ 23 ॥

వామాఙ్కే విస్ఫురన్త్యాః కరతలవిలసచ్చారురక్తోత్పలాయాః
కాన్తాయా వామవక్షోరుహభరశిఖరోన్మర్దనవ్యగ్రమేకమ్ ।
అన్యాంస్త్రీనప్యుదారాన్వరపరశుమృగాలఙ్కృతానిన్దుమౌళే-
-ర్బాహూనాబద్ధహేమాఙ్గదమణికటకానన్తరాలోకయామః ॥ 24 ॥

సమ్భ్రాన్తాయాః శివాయాః పతివిలయభియా సర్వలోకోపతాపా-
-త్సంవిగ్నస్యాపి విష్ణోః సరభసముభయోర్వారణప్రేరణాభ్యామ్ ।
మధ్యే త్రైశఙ్కవీయామనుభవతి దశాం యత్ర హాలాహలోష్మా
సోఽయం సర్వాపదాం నః శమయతు నిచయం నీలకణ్ఠస్య కణ్ఠః ॥ 25 ॥

హృద్యైరద్రీన్ద్రకన్యామృదుదశనపదైర్ముద్రితో విద్రుమశ్రీ-
-రుద్ద్యోతన్త్యా నితాన్తం ధవలధవలయా మిశ్రితో దన్తకాన్త్యా ।
ముక్తామాణిక్యజాలవ్యతికరసదృశా తేజసా భాసమానః
సద్యోజాతస్య దద్యాదధరమణిరసౌ సమ్పదాం సఞ్చయం నః ॥ 26 ॥

కర్ణాలఙ్కారనానామణినికరరుచాం సఞ్చయైరఞ్చితాయాం
వర్ణ్యాయాం స్వర్ణపద్మోదరపరివిలసత్కర్ణికాసన్నిభాయామ్ ।
పద్ధత్యాం ప్రాణవాయోః ప్రణతజనహృదమ్భోజవాసస్య శమ్భో-
-ర్నిత్యం నశ్చిత్తమేతద్విరచయతు సుఖేనాసికాం నాసికాయామ్ ॥ 27 ॥

అత్యన్తం భాసమానే రుచిరతరరుచాం సఙ్గమాత్సన్మణీనా-
-ముద్యచ్చణ్డాంశుధామప్రసరనిరసనస్పష్టదృష్టాపదానే ।
భూయాస్తాం భూతయే నః కరివరజయినః కర్ణపాశావలమ్బే
భక్తాలీభాలసజ్జజ్జనిమరణలిపేః కుణ్డలే కుణ్డలే తే ॥ 28 ॥

యాభ్యాం కాలవ్యవస్థా భవతి తనుమతాం యో ముఖం దేవతానాం
యేషామాహుః స్వరూపం జగతి మునివరా దేవతానాం త్రయీం తామ్ ।
రుద్రాణీవక్త్రపఙ్కేరుహసతతవిహారోత్సుకేన్దిన్దిరేభ్య-
-స్తేభ్యస్త్రిభ్యః ప్రణామాఞ్జలిముపరచయే త్రీక్షణస్యేక్షణేభ్యః ॥ 29 ॥

వామం వామాఙ్కగాయా వదనసరసిజే వ్యావలద్వల్లభాయా
వ్యానమ్రేష్వన్యదన్యత్పునరలికభవం వీతనిఃశేషరౌక్ష్యమ్ ।
భూయో భూయోపి మోదాన్నిపతదతిదయాశీతలం చూతబాణే
దక్షారేరీక్షణానాం త్రయమపహరతాదాశు తాపత్రయం నః ॥ 30 ॥

యస్మిన్నర్ధేన్దుముగ్ధద్యుతినిచయతిరస్కారనిస్తన్ద్రకాన్తౌ
కాశ్మీరక్షోదసఙ్కల్పతమివ రుచిరం చిత్రకం భాతి నేత్రమ్ ।
తస్మిన్నుల్లీలచిల్లీనటవరతరుణీలాస్యరఙ్గాయమాణే
కాలారేః ఫాలదేశే విహరతు హృదయం వీతచిన్తాన్తరం నః ॥ 31 ॥

స్వామిన్గఙ్గామివాఙ్గీకురు తవ శిరసా మామపీత్యర్థయన్తీం
ధన్యాం కన్యాం ఖరాంశోః శిరసి వహతి కిం న్వేష కారుణ్యశాలీ ।
ఇత్థం శఙ్కాం జనానాం జనయదతిఘనం కైశికం కాలమేఘ-
-చ్ఛాయం భూయాదుదారం త్రిపురవిజయినః శ్రేయసే భూయసే నః ॥ 32 ॥

శృఙ్గారాకల్పయోగ్యైః శిఖరివరసుతాసత్సఖీహస్తలూనైః
సూనైరాబద్ధమాలావలిపరివిలసత్సౌరభాకృష్టభృఙ్గమ్ ।
తుఙ్గం మాణిక్యకాన్త్యా పరిహసితసురావాసశైలేన్ద్రశృఙ్గం
సఙ్ఘం నః సఙ్కటానాం విఘటయతు సదా కాఙ్కటీకం కిరీటమ్ ॥ 33 ॥

వక్రాకారః కలఙ్కీ జడతనురహమప్యఙ్ఘ్రిసేవానుభావా-
-దుత్తంసత్వం ప్రయాతః సులభతరఘృణాస్యన్దినశ్చన్ద్రమౌళేః ।
తత్సేవన్తాం జనౌఘాః శివమితి నిజయావస్థయైవ బ్రువాణం
వన్దే దేవస్య శమ్భోర్ముకుటసుఘటితం ముగ్ధపీయూషభానుమ్ ॥ 34 ॥

కాన్త్యా సమ్ఫుల్లమల్లీకుసుమధవళయా వ్యాప్య విశ్వం విరాజ-
-న్వృత్తాకారో వితన్వన్ముహురపి చ పరాం నిర్వృతిం పాదభాజామ్ ।
సానన్దం నన్దిదోష్ణా మణికటకవతా వాహ్యమానః పురారేః
శ్వేతచ్ఛత్రాఖ్యశీతద్యుతిరపహరతాదాపదస్తాపదా నః ॥ 35 ॥

దివ్యాకల్పోజ్జ్వలానాం శివగిరిసుతయోః పార్శ్వయోరాశ్రితానాం
రుద్రాణీసత్సఖీనాం మదతరలకటాక్షాఞ్చలైరఞ్చితానామ్ ।
ఉద్వేల్లద్బాహువల్లీవిలసనసమయే చామరాన్దోలనీనా-
-ముద్భూతః కఙ్కణాలీవలయకలకలో వారయేదాపదో నః ॥ 36 ॥

స్వర్గౌకఃసున్దరీణాం సులలితవపుషాం స్వామిసేవాపరాణాం
వల్గద్భూషాణి వక్రామ్బుజపరివిగలన్ముగ్ధగీతామృతాని ।
నిత్యం నృత్తాన్యుపాసే భుజవిధుతిపదన్యాసభావావలోక-
-ప్రత్యుద్యత్ప్రీతిమాద్యత్ప్రమథనటనటీదత్తసమ్భావనాని ॥ 37 ॥

స్థానప్రాప్త్యా స్వరాణాం కిమపి విశదతాం వ్యఞ్జయన్మఞ్జువీణా-
-స్వానావచ్ఛిన్నతాలక్రమమమృతమివాస్వాద్యమానం శివాభ్యామ్ ।
నానారాగాతిహృద్యం నవరసమధురస్తోత్రజాతానువిద్ధం
గానం వీణామహర్షేః కలమతిలలితం కర్ణపూరయతాం నః ॥ 38 ॥

చేతో జాతప్రమోదం సపది విదధతీ ప్రాణినాం వాణినీనాం
పాణిద్వన్ద్వాగ్రజాగ్రత్సులలితరణితస్వర్ణతాలానుకూలా ।
స్వీయారావేణ పాథోధరరవపటునా నాదయన్తీ మయూరీం
మాయూరీ మన్దభావం మణిమురజభవా మార్జనా మార్జయేన్నః ॥ 39 ॥

దేవేభ్యో దానవేభ్యః పితృమునిపరిషత్సిద్ధవిద్యాధరేభ్యః
సాధ్యేభ్యశ్చారణేభ్యో మనుజపశుపతజ్జాతికీటాదికేభ్యః ।
శ్రీకైలాసప్రరూఢాస్తృణవిటపిముఖాశ్చాపి యే సన్తి తేభ్యః
సర్వేభ్యో నిర్విచారం నతిముపరచయే శర్వపాదాశ్రయేభ్యః ॥ 40 ॥

ధ్యాయన్నిత్థం ప్రభాతే ప్రతిదివసమిదం స్తోత్రరత్నం పఠేద్యః
కిం వా బ్రూమస్తదీయం సుచరితమథవా కీర్తయామః సమాసాత్ ।
సమ్పజ్జాతం సమగ్రం సదసి బహుమతిం సర్వలోకప్రియత్వం
సమ్ప్రాప్యాయుఃశతాన్తే పదమయతి పరబ్రహ్మణో మన్మథారేః ॥ 41 ॥

ఇతి శ్రీమత్పరమహంసపరివ్రాజకాచార్యస్య శ్రీగోవిన్దభగవత్పూజ్యపాదశిష్యస్య శ్రీమచ్ఛఙ్కరభగవతః కృతౌ శ్రీ శివ పాదాదికేశాన్తవర్ణన స్తోత్రమ్ ॥