(শ্রীদেবীভাগবতং, দ্বাদশ স্কংধং, দশমোঽধ্য়ায়ঃ, , মণিদ্বীপ বর্ণন - 1)

ব্য়াস উবাচ –
ব্রহ্মলোকাদূর্ধ্বভাগে সর্বলোকোঽস্তি যঃ শ্রুতঃ ।
মণিদ্বীপঃ স এবাস্তি যত্র দেবী বিরাজতে ॥ 1 ॥

সর্বস্মাদধিকো যস্মাত্সর্বলোকস্ততঃ স্মৃতঃ ।
পুরা পরাংবয়ৈবায়ং কল্পিতো মনসেচ্ছয়া ॥ 2 ॥

সর্বাদৌ নিজবাসার্থং প্রকৃত্য়া মূলভূতয়া ।
কৈলাসাদধিকো লোকো বৈকুংঠাদপি চোত্তমঃ ॥ 3 ॥

গোলোকাদপি সর্বস্মাত্সর্বলোকোঽধিকঃ স্মৃতঃ ।
নৈতত্সমং ত্রিলোক্য়াং তু সুংদরং বিদ্যতে ক্বচিত্ ॥ 4 ॥

ছত্রীভূতং ত্রিজগতো ভবসংতাপনাশকম্ ।
ছায়াভূতং তদেবাস্তি ব্রহ্মাংডানাং তু সত্তম ॥ 5 ॥

বহুয়োজনবিস্তীর্ণো গংভীরস্তাবদেব হি ।
মণিদ্বীপস্য় পরিতো বর্ততে তু সুধোদধিঃ ॥ 6 ॥

মরুত্সংঘট্টনোত্কীর্ণতরংগ শতসংকুলঃ ।
রত্নাচ্ছবালুকায়ুক্তো ঝষশংখসমাকুলঃ ॥ 7 ॥

বীচিসংঘর্ষসংজাতলহরীকণশীতলঃ ।
নানাধ্বজসমায়ুক্তা নানাপোতগতাগতৈঃ ॥ 8 ॥

বিরাজমানঃ পরিতস্তীররত্নদ্রুমো মহান্ ।
তদুত্তরময়োধাতুনির্মিতো গগনে ততঃ ॥ 9 ॥

সপ্তয়োজনবিস্তীর্ণঃ প্রাকারো বর্ততে মহান্ ।
নানাশস্ত্রপ্রহরণা নানায়ুদ্ধবিশারদাঃ ॥ 10 ॥

রক্ষকা নিবসংত্যত্র মোদমানাঃ সমংততঃ ।
চতুর্দ্বারসমায়ুক্তো দ্বারপালশতান্বিতঃ ॥ 11 ॥

নানাগণৈঃ পরিবৃতো দেবীভক্তিয়ুতৈর্নৃপ ।
দর্শনার্থং সমায়াংতি যে দেবা জগদীশিতুঃ ॥ 12 ॥

তেষাং গণা বসংত্যত্র বাহনানি চ তত্র হি ।
বিমানশতসংঘর্ষঘংটাস্বনসমাকুলঃ ॥ 13 ॥

হযহেষাখুরাঘাতবধিরীকৃতদিংমুখঃ ।
গণৈঃ কিলকিলারাবৈর্বেত্রহস্তৈশ্চ তাডিতাঃ ॥ 14 ॥

সেবকা দেবসংগানাং ভ্রাজংতে তত্র ভূমিপ ।
তস্মিংকোলাহলে রাজন্নশব্দঃ কেনচিত্ক্বচিত্ ॥ 15 ॥

কস্যচিচ্ছ্রূযতেঽত্য়ংতং নানাধ্বনিসমাকুলে ।
পদে পদে মিষ্টবারিপরিপূর্ণসরান্সি চ ॥ 16 ॥

বাটিকা বিবিধা রাজন্ রত্নদ্রুমবিরাজিতাঃ ।
তদুত্তরং মহাসারধাতুনির্মিতমংডলঃ ॥ 17 ॥

সালোঽপরো মহানস্তি গগনস্পর্শি যচ্ছিরঃ ।
তেজসা স্য়াচ্ছতগুণঃ পূর্বসালাদয়ং পরঃ ॥ 18 ॥

গোপুরদ্বারসহিতো বহুবৃক্ষসমন্বিতঃ ।
যা বৃক্ষজাতয়ঃ সংতি সর্বাস্তাস্তত্র সংতি চ ॥ 19 ॥

নিরংতরং পুষ্পয়ুতাঃ সদা ফলসমন্বিতাঃ ।
নবপল্লবসংয়ুক্তাঃ পরসৌরভসংকুলাঃ ॥ 20 ॥

পনসা বকুলা লোধ্রাঃ কর্ণিকারাশ্চ শিংশপাঃ ।
দেবদারুকাংচনারা আম্রাশ্চৈব সুমেরবঃ ॥ 21 ॥

লিকুচা হিংগুলাশ্চৈলা লবংগাঃ কট্ফলাস্তথা ।
পাটলা মুচুকুংদাশ্চ ফলিন্য়ো জঘনেফলাঃ ॥ 22 ॥

তালাস্তমালাঃ সালাশ্চ কংকোলা নাগভদ্রকাঃ ।
পুন্নাগাঃ পীলবঃ সাল্বকা বৈ কর্পূরশাখিনঃ ॥ 23 ॥

অশ্বকর্ণা হস্তিকর্ণাস্তালপর্ণাশ্চ দাডিমাঃ ।
গণিকা বংধুজীবাশ্চ জংবীরাশ্চ কুরংডকাঃ ॥ 24 ॥

চাংপেয়া বংধুজীবাশ্চ তথা বৈ কনকদ্রুমাঃ ।
কালাগুরুদ্রুমাশ্চৈব তথা চংদনপাদপাঃ ॥ 25 ॥

খর্জূরা যূথিকাস্তালপর্ণ্যশ্চৈব তথেক্ষবঃ ।
ক্ষীরবৃক্ষাশ্চ খদিরাশ্চিংচাভল্লাতকাস্তথা ॥ 26 ॥

রুচকাঃ কুটজা বৃক্ষা বিল্ববৃক্ষাস্তথৈব চ ।
তুলসীনাং বনান্য়েবং মল্লিকানাং তথৈব চ ॥ 27 ॥

ইত্য়াদিতরুজাতীনাং বনান্য়ুপবনানি চ ।
নানাবাপীশতৈর্য়ুক্তান্য়েবং সংতি ধরাধিপ ॥ 28 ॥

কোকিলারাবসংয়ুক্তা গুন্জদ্ভ্রমরভূষিতাঃ ।
নির্য়াসস্রাবিণঃ সর্বে স্নিগ্ধচ্ছায়াস্তরূত্তমাঃ ॥ 29 ॥

নানাঋতুভবা বৃক্ষা নানাপক্ষিসমাকুলাঃ ।
নানারসস্রাবিণীভির্নদীভিরতিশোভিতাঃ ॥ 30 ॥

পারাবতশুকব্রাতসারিকাপক্ষমারুতৈঃ ।
হংসপক্ষসমুদ্ভূত বাতব্রাতৈশ্চলদ্দ্রুমম্ ॥ 31 ॥

সুগংধগ্রাহিপবনপূরিতং তদ্বনোত্তমম্ ।
সহিতং হরিণীয়ূথৈর্ধাবমানৈরিতস্ততঃ ॥ 32 ॥

নৃত্যদ্বর্হিকদংবস্য় কেকারাবৈঃ সুখপ্রদৈঃ ।
নাদিতং তদ্বনং দিব্য়ং মধুস্রাবি সমংততঃ ॥ 33 ॥

কাংস্যসালাদুত্তরে তু তাম্রসালঃ প্রকীর্তিতঃ ।
চতুরস্রসমাকার উন্নত্য়া সপ্তয়োজনঃ ॥ 34 ॥

দ্বয়োস্তু সালয়োর্মধ্য়ে সংপ্রোক্তা কল্পবাটিকা ।
যেষাং তরূণাং পুষ্পাণি কাংচনাভানি ভূমিপ ॥ 35 ॥

পত্রাণি কাংচনাভানি রত্নবীজফলানি চ ।
দশয়োজনগংধো হি প্রসর্পতি সমংততঃ ॥ 36 ॥

তদ্বনং রক্ষিতং রাজন্বসংতেনর্তুনানিশম্ ।
পুষ্পসিংহাসনাসীনঃ পুষ্পচ্ছত্রবিরাজিতঃ ॥ 37 ॥

পুষ্পভূষাভূষিতশ্চ পুষ্পাসববিঘূর্ণিতঃ ।
মধুশ্রীর্মাধবশ্রীশ্চ দ্বে ভার্য়ে তস্য় সম্মতে ॥ 38 ॥

ক্রীডতঃ স্মেরবদনে সুমস্তবককংদুকৈঃ ।
অতীব রম্য়ং বিপিনং মধুস্রাবি সমংততঃ ॥ 39 ॥

দশয়োজনপর্য়ংতং কুসুমামোদবায়ুনা ।
পূরিতং দিব্যগংধর্বৈঃ সাংগনৈর্গানলোলুপৈঃ ॥ 40 ॥

শোভিতং তদ্বনং দিব্য়ং মত্তকোকিলনাদিতম্ ।
বসংতলক্ষ্মীসংয়ুক্তং কামিকামপ্রবর্ধনম্ ॥ 41 ॥

তাম্রসালাদুত্তরত্র সীসসালঃ প্রকীর্তিতঃ ।
সমুচ্ছ্রায়ঃ স্মৃতোঽপ্যস্য় সপ্তয়োজনসংখ্যয়া ॥ 42 ॥

সংতানবাটিকামধ্য়ে সালয়োস্তু দ্বয়োর্নৃপ ।
দশয়োজনগংধস্তু প্রসূনানাং সমংততঃ ॥ 43 ॥

হিরণ্য়াভানি কুসুমান্য়ুত্ফুল্লানি নিরংতরম্ ।
অমৃতদ্রবসংয়ুক্তফলানি মধুরাণি চ ॥ 44 ॥

গ্রীষ্মর্তুর্নাযকস্তস্য়া বাটিকায়া নৃপোত্তম ।
শুক্রশ্রীশ্চ শুচিশ্রীশ্চ দ্বে ভার্য়ে তস্য় সম্মতে ॥ 45 ॥

সংতাপত্রস্তলোকাস্তু বৃক্ষমূলেষু সংস্থিতাঃ ।
নানাসিদ্ধৈঃ পরিবৃতো নানাদেবৈঃ সমন্বিতঃ ॥ 46 ॥

বিলাসিনীনাং বৃংদৈস্তু চংদনদ্রবপংকিলৈঃ ।
পুষ্পমালাভূষিতৈস্তু তালবৃংতকরাংবুজৈঃ ॥ 47 ॥

[পাঠভেদঃ- প্রাকারঃ]
প্রকারঃ শোভিতো এজচ্ছীতলাংবুনিষেবিভিঃ ।
সীসসালাদুত্তরত্রাপ্য়ারকূটময়ঃ শুভঃ ॥ 48 ॥

প্রাকারো বর্ততে রাজন্মুনিয়োজনদৈর্ঘ্যবান্ ।
হরিচংদনবৃক্ষাণাং বাটী মধ্য়ে তয়োঃ স্মৃতা ॥ 49 ॥

সালয়োরধিনাথস্তু বর্ষর্তুর্মেঘবাহনঃ ।
বিদ্য়ুত্পিংগলনেত্রশ্চ জীমূতকবচঃ স্মৃতঃ ॥ 50 ॥

বজ্রনির্ঘোষমুখরশ্চেংদ্রধন্বা সমংততঃ ।
সহস্রশো বারিধারা মুংচন্নাস্তে গণাবৃতঃ ॥ 51 ॥

নভঃ শ্রীশ্চ নভস্যশ্রীঃ স্বরস্য়া রস্যমালিনী ।
অংবা দুলা নিরত্নিশ্চাভ্রমংতী মেঘয়ংতিকা ॥ 52 ॥

বর্ষয়ংতী চিবুণিকা বারিধারা চ সম্মতাঃ ।
বর্ষর্তোর্দ্বাদশ প্রোক্তাঃ শক্তয়ো মদবিহ্বলাঃ ॥ 53 ॥

নবপল্লববৃক্ষাশ্চ নবীনলতিকান্বিতাঃ ।
হরিতানি তৃণান্য়েব বেষ্টিতা যৈর্ধরাঽখিলা ॥ 54 ॥

নদীনদপ্রবাহাশ্চ প্রবহংতি চ বেগতঃ ।
সরাংসি কলুষাংবূনি রাগিচিত্তসমানি চ ॥ 55 ॥

বসংতি দেবাঃ সিদ্ধাশ্চ যে দেবীকর্মকারিণঃ ।
বাপীকূপতডাগাশ্চ যে দেব্যর্থং সমর্পিতাঃ ॥ 56 ॥

তে গণা নিবসংত্যত্র সবিলাসাশ্চ সাংগনাঃ ।
আরকূটময়াদগ্রে সপ্তয়োজনদৈর্ঘ্যবান্ ॥ 57 ॥

পংচলোহাত্মকঃ সালো মধ্য়ে মংদারবাটিকা ।
নানাপুষ্পলতাকীর্ণা নানাপল্লবশোভিতা ॥ 58 ॥

অধিষ্ঠাতাঽত্র সংপ্রোক্তঃ শরদৃতুরনাময়ঃ ।
ইষলক্ষ্মীরূর্জলক্ষ্মীর্দ্বে ভার্য়ে তস্য় সম্মতে ॥ 59 ॥

নানাসিদ্ধা বসংত্যত্র সাংগনাঃ সপরিচ্ছদাঃ ।
পংচলোহময়াদগ্রে সপ্তয়োজনদৈর্ঘ্যবান্ ॥ 60 ॥

দীপ্যমানো মহাশৃংগৈর্বর্ততে রৌপ্যসালকঃ ।
পারিজাতাটবীমধ্য়ে প্রসূনস্তবকান্বিতা ॥ 61 ॥

দশয়োজনগংধীনি কুসুমানি সমংততঃ ।
মোদয়ংতি গণান্সর্বান্য়ে দেবীকর্মকারিণঃ ॥ 62 ॥

তত্রাধিনাথঃ সংপ্রোক্তো হেমংতর্তুর্মহোজ্জ্বলঃ ।
সগণঃ সায়ুধঃ সর্বান্ রাগিণো রংজযন্নপঃ ॥ 63 ॥

সহশ্রীশ্চ সহস্যশ্রীর্দ্বে ভার্য়ে তস্য় সম্মতে ।
বসংতি তত্র সিদ্ধাশ্চ যে দেবীব্রতকারিণঃ ॥ 64 ॥

রৌপ্যসালময়াদগ্রে সপ্তয়োজনদৈর্ঘ্যবান্ ।
সৌবর্ণসালঃ সংপ্রোক্তস্তপ্তহাটককল্পিতঃ ॥ 65 ॥

মধ্য়ে কদংববাটী তু পুষ্পপল্লবশোভিতা ।
কদংবমদিরাধারাঃ প্রবর্তংতে সহস্রশঃ ॥ 66 ॥

যাভির্নিপীতপীতাভির্নিজানংদোঽনুভূযতে ।
তত্রাধিনাথঃ সংপ্রোক্তঃ শৈশিরর্তুর্মহোদয়ঃ ॥ 67 ॥

তপঃশ্রীশ্চ তপস্যশ্রীর্দ্বে ভার্য়ে তস্য় সম্মতে ।
মোদমানঃ সহৈতাভ্য়াং বর্ততে শিশিরাকৃতিঃ ॥ 68 ॥

নানাবিলাসসংয়ুক্তো নানাগণসমাবৃতঃ ।
নিবসংতি মহাসিদ্ধা যে দেবীদানকারিণঃ ॥ 69 ॥

নানাভোগসমুত্পন্নমহানংদসমন্বিতাঃ ।
সাংগনাঃ পরিবারৈস্তু সংঘশঃ পরিবারিতাঃ ॥ 70 ॥

স্বর্ণসালময়াদগ্রে মুনিয়োজনদৈর্ঘ্যবান্ ।
পুষ্পরাগময়ঃ সালঃ কুংকুমারুণবিগ্রহঃ ॥ 71 ॥

পুষ্পরাগময়ী ভূমির্বনান্য়ুপবনানি চ ।
রত্নবৃক্ষালবালাশ্চ পুষ্পরাগময়াঃ স্মৃতাঃ ॥ 72 ॥

প্রাকারো যস্য় রত্নস্য় তদ্রত্নরচিতা দ্রুমাঃ ।
বনভূঃ পক্ষিনশ্চৈব রত্নবর্ণজলানি চ ॥ 73 ॥

মংডপা মংডপস্তংভাঃ সরান্সি কমলানি চ ।
প্রাকারে তত্র যদ্যত্স্য়াত্তত্সর্বং তত্সমং ভবেত্ ॥ 74 ॥

পরিভাষেযমুদ্দিষ্টা রত্নসালাদিষু প্রভো ।
তেজসা স্য়াল্লক্ষগুণঃ পূর্বসালাত্পরো নৃপ ॥ 75 ॥

দিক্পালা নিবসংত্যত্র প্রতিব্রহ্মান্ডবর্তিনাম্ ।
দিক্পালানাং সমষ্ট্য়াত্মরূপাঃ স্ফূর্জদ্বরায়ুধাঃ ॥ 76 ॥

পূর্বাশায়াং সমুত্তুংগশৃংগা পূরমরাবতী ।
নানোপবনসংয়ুক্তা মহেংদ্রস্তত্র রাজতে ॥ 77 ॥

স্বর্গশোভা চ যা স্বর্গে যাবতী স্য়াত্ততোঽধিকা ।
সমষ্টিশতনেত্রস্য় সহস্রগুণতঃ স্মৃতা ॥ 78 ॥

ঐরাবতসমারূঢো বজ্রহস্তঃ প্রতাপবান্ ।
দেবসেনাপরিবৃতো রাজতেঽত্র শতক্রতুঃ ॥ 79 ॥

দেবাংগনাগণয়ুতা শচী তত্র বিরাজতে ।
বহ্নিকোণে বহ্নিপুরী বহ্নিপূঃ সদৃশী নৃপ ॥ 80 ॥

স্বাহাস্বধাসমায়ুক্তো বহ্নিস্তত্র বিরাজতে ।
নিজবাহনভূষাঢ্য়ো নিজদেবগণৈর্বৃতঃ ॥ 81 ॥

যাম্য়াশায়াং যমপুরী তত্র দংডধরো মহান্ ।
স্বভটৈর্বেষ্টিতো রাজন্ চিত্রগুপ্তপুরোগমৈঃ ॥ 82 ॥

নিজশক্তিয়ুতো ভাস্বত্তনয়োঽস্তি যমো মহান্ ।
নৈরৃত্য়াং দিশি রাক্ষস্য়াং রাক্ষসৈঃ পরিবারিতঃ ॥ 83 ॥

খড্গধারী স্ফুরন্নাস্তে নিরৃতির্নিজশক্তিয়ুক্ ।
বারুণ্য়াং বরুণো রাজা পাশধারী প্রতাপবান্ ॥ 84 ॥

মহাঝশসমারূঢো বারুণীমধুবিহ্বলঃ ।
নিজশক্তিসমায়ুক্তো নিজয়াদোগণান্বিতঃ ॥ 85 ॥

সমাস্তে বারুণে লোকে বরুণানীরতাকুলঃ ।
বায়ুকোণে বায়ুলোকো বায়ুস্তত্রাধিতিষ্ঠতি ॥ 86 ॥

বায়ুসাধনসংসিদ্ধয়োগিভিঃ পরিবারিতঃ ।
ধ্বজহস্তো বিশালাক্ষো মৃগবাহনসংস্থিতঃ ॥ 87 ॥

মরুদ্গণৈঃ পরিবৃতো নিজশক্তিসমন্বিতঃ ।
উত্তরস্য়াং দিশি মহান্যক্ষলোকোঽস্তি ভূমিপ ॥ 88 ॥

যক্ষাধিরাজস্তত্রাঽঽস্তে বৃদ্ধিঋদ্ধ্য়াদিশক্তিভিঃ ।
নবভির্নিধিভির্য়ুক্তস্তুংদিলো ধননাযকঃ ॥ 89 ॥

মণিভদ্রঃ পূর্ণভদ্রো মণিমান্মণিকংধরঃ ।
মণিভূষো মণিস্রগ্বী মণিকার্মুকধারকঃ ॥ 90 ॥

ইত্য়াদিযক্ষসেনানীসহিতো নিজশক্তিয়ুক্ ।
ঈশানকোণে সংপ্রোক্তো রুদ্রলোকো মহত্তরঃ ॥ 91 ॥

অনর্ঘ্যরত্নখচিতো যত্র রুদ্রোঽধিদৈবতম্ ।
মন্য়ুমাংদীপ্তনযনো বদ্ধপৃষ্ঠমহেষুধিঃ ॥ 92 ॥

স্ফূর্জদ্ধনুর্বামহস্তোঽধিজ্যধন্বভিরাবৃতঃ ।
স্বসমানৈরসংখ্য়াতরুদ্রৈঃ শূলবরায়ুধৈঃ ॥ 93 ॥

বিকৃতাস্য়ৈঃ করালাস্য়ৈর্বমদ্বহ্নিভিরাস্যতঃ ।
দশহস্তৈঃ শতকরৈঃ সহস্রভুজসংয়ুতৈঃ ॥ 94 ॥

দশপাদৈর্দশগ্রীবৈস্ত্রিনেত্রৈরুগ্রমূর্তিভিঃ ।
অংতরিক্ষচরা যে চ যে চ ভূমিচরাঃ স্মৃতাঃ ॥ 95 ॥

রুদ্রাধ্য়ায়ে স্মৃতা রুদ্রাস্তৈঃ সর্বৈশ্চ সমাবৃতঃ ।
রুদ্রাণীকোটিসহিতো ভদ্রকাল্য়াদিমাতৃভিঃ ॥ 96 ॥

নানাশক্তিসমাবিষ্টডামর্য়াদিগণাবৃতঃ ।
বীরভদ্রাদিসহিতো রুদ্রো রাজন্বিরাজতে ॥ 97 ॥

মুংডমালাধরো নাগবলয়ো নাগকংধরঃ ।
ব্য়াঘ্রচর্মপরীধানো গজচর্মোত্তরীযকঃ ॥ 98 ॥

চিতাভস্মাংগলিপ্তাংগঃ প্রমথাদিগণাবৃতঃ ।
নিনদড্ডমরুধ্বানৈর্বধিরীকৃতদিংমুখঃ ॥ 99 ॥

অট্টহাসাস্ফোটশব্দৈঃ সংত্রাসিতনভস্তলঃ ।
ভূতসংঘসমাবিষ্টো ভূতাবাসো মহেশ্বরঃ ॥ 100 ॥

ঈশানদিক্পতিঃ সোঽয়ং নাম্না চেশান এব চ ॥ 101 ॥

ইতি শ্রীদেবীভাগবতে মহাপুরাণে দ্বাদশস্কংধে মণিদ্বীপবর্ণনং নাম দশমোঽধ্য়ায়ঃ ॥