কৃষ্ণ যজুর্বেদীয় তৈত্তিরীয় সংহিতায়াং সপ্তমকাণ্ডে পঞ্চমঃ প্রশ্নঃ - সত্রবিশেষাভিধানং

ও-ন্নমঃ পরমাত্মনে, শ্রী মহাগণপতয়ে নমঃ,
শ্রী গুরুভ্য়ো নমঃ । হ॒রিঃ॒ ওম্ ॥

গাবো॒ বা এ॒ত-থ্স॒ত্র-মা॑সতাশৃ॒ঙ্গা-স্স॒তী-শ্শৃঙ্গা॑ণি নো জাযন্তা॒ ইতি॒ কামে॑ন॒ তাসা॒-ন্দশ॒মাসা॒ নিষ॑ণ্ণা॒ আস॒ন্নথ॒ শৃঙ্গা᳚ণ্যজাযন্ত॒ তা উদ॑তিষ্ঠ॒ন্নরা॒থ্স্মেত্যথ॒ যাসা॒-ন্নাজা॑যন্ত॒ তা-স্সং॑​বঁথ্স॒র-মা॒প্ত্বোদ॑তিষ্ঠ॒ -ন্নরা॒থ্স্মেতি॒ যাসা॒-ঞ্চাজা॑যন্ত॒ যাসা᳚-ঞ্চ॒ ন তা উ॒ভয়ী॒রু-দ॑তিষ্ঠ॒-ন্নরা॒থ্স্মেতি॑ গোস॒ত্রং-বৈঁ [গোস॒ত্রং-বৈঁ, সং॒​বঁ॒থ্স॒রো য] 1

সং॑​বঁথ্স॒রো য এ॒বং-বিঁ॒দ্বাগ্​ম্স॑-স্সং​বঁথ্স॒র-মু॑প॒যন্ত্য়ৃ॑দ্ধ্নু॒বন্ত্য়ে॒ব তস্মা᳚-ত্তূপ॒রা বার্​ষি॑কৌ॒ মাসৌ॒ পর্ত্বা॑ চরতি স॒ত্রাভি॑জিত॒গ্গ্॒হ্য়॑স্য়ৈ॒ তস্মা᳚-থ্সং​বঁথ্সর॒সদো॒ য-ত্কি-ঞ্চ॑ গৃ॒হে ক্রি॒যতে॒ তদা॒প্ত-মব॑রুদ্ধ-ম॒ভিজি॑ত-ঙ্ক্রিযতে সমু॒দ্রং-বাঁ এ॒তে প্র প্ল॑বন্তে॒ যে সং॑​বঁথ্স॒রমু॑প॒যন্তি॒ যো বৈ স॑মু॒দ্রস্য়॑ পা॒র-ন্ন পশ্য়॑তি॒ ন বৈ স তত॒ উদে॑তি সং​বঁথ্স॒রো [উদে॑তি সং​বঁথ্স॒রঃ, বৈ স॑মু॒দ্র-] 2

বৈ স॑মু॒দ্র-স্তস্য়ৈ॒ত-ত্পা॒রং-য়ঁদ॑তিরা॒ত্রৌ য এ॒বং-বিঁ॒দ্বাগ্​ম্স॑-স্সং​বঁথ্স॒র-মু॑প॒যন্ত্যনা᳚র্তা এ॒বোদৃচ॑-ঙ্গচ্ছন্তী॒য়ং-বৈঁ পূর্বো॑-ঽতিরা॒ত্রো॑ ঽসাবুত্ত॑রো॒ মনঃ॒ পূর্বো॒ বাগুত্ত॑রঃ প্রা॒ণঃ পূর্বো॑-ঽপা॒ন উত্ত॑রঃ প্র॒রোধ॑ন॒-ম্পূর্ব॑ উ॒দয়॑ন॒মুত্ত॑রো॒ জ্য়োতি॑ষ্টোমো বৈশ্বান॒রো॑ ঽতিরা॒ত্রো ভ॑বতি॒ জ্য়োতি॑রে॒ব পু॒রস্তা᳚দ্দধতে সুব॒র্গস্য়॑ লো॒কস্য়া-নু॑খ্য়াত্য়ৈ চতুর্বি॒গ্​ম্॒শঃ প্রা॑য়॒ণীয়ো॑ ভবতি॒ চতু॑র্বিগ্​ম্শতি-রর্ধমা॒সা- [চতু॑র্বিগ্​ম্শতি-রর্ধমা॒সাঃ, সং॒​বঁ॒থ্স॒রঃ] 3

-স্সং॑​বঁথ্স॒রঃ প্র॒যন্ত॑ এ॒ব সং॑​বঁথ্স॒রে প্রতি॑ তিষ্ঠন্তি॒ তস্য়॒ ত্রীণি॑ চ শ॒তানি॑ ষ॒ষ্টিশ্চ॑ স্তো॒ত্রীয়া॒স্তাব॑তী-স্সং​বঁথ্স॒রস্য়॒ রাত্র॑য় উ॒ভে এ॒ব সং॑​বঁথ্স॒রস্য়॑ রূ॒পে আ᳚প্নুবন্তি॒ তে সগ্গ্​স্থি॑ত্য়া॒ অরি॑ষ্ট্য়া॒ উত্ত॑রৈ॒রহো॑ভিশ্চরন্তি ষড॒হা ভ॑বন্তি॒ ষ-ড্বা ঋ॒তব॑-স্সং​বঁথ্স॒র ঋ॒তুষ্বে॒ব সং॑​বঁথ্স॒রে প্রতি॑ তিষ্ঠন্তি॒ গৌশ্চা-ঽঽয়ু॑শ্চ মদ্ধ্য়॒ত-স্স্তোমৌ॑ ভবত-স্সং​বঁথ্স॒রস্য়ৈ॒ব তন্মি॑থু॒ন-ম্ম॑দ্ধ্য়॒তো [তন্মি॑থু॒ন-ম্ম॑দ্ধ্য়॒তঃ, দ॒ধ॒তি॒ প্র॒জন॑নায়॒] 4

দ॑ধতি প্র॒জন॑নায়॒ জ্য়োতি॑র॒ভিতো॑ ভবতি বি॒মোচ॑নমে॒ব তচ্ছন্দাগ্॑স্য়ে॒ব ত-দ্বি॒মোকং॑-য়ঁ॒ন্ত্যথো॑ উভ॒যতো᳚জ্য়োতিষৈ॒ব ষ॑ড॒হেন॑ সুব॒র্গং-লোঁ॒কং-য়ঁ॑ন্তি ব্রহ্মবা॒দিনো॑ বদ॒ন্ত্য়াস॑তে॒ কেন॑ য॒ন্তীতি॑ দেব॒য়ানে॑ন প॒থেতি॑ ব্রূয়া॒চ্ছন্দাগ্​ম্॑সি॒ বৈ দে॑ব॒য়ানঃ॒ পন্থা॑ গায়॒ত্রী ত্রি॒ষ্টুব্-জগ॑তী॒জ্য়োতি॒র্বৈ গা॑য়॒ত্রী গৌস্ত্রি॒ষ্টুগায়ু॒র্জগ॑তী॒ যদে॒তে স্তোমা॒ ভব॑ন্তি দেব॒য়ানে॑নৈ॒ব [ ] 5

ত-ত্প॒থা য॑ন্তি সমা॒নগ্​ম্ সাম॑ ভবতি দেবলো॒কো বৈ সাম॑ দেবলো॒কাদে॒ব নয়॑ন্ত্য়॒ন্য়াঅ॑ন্য়া॒ ঋচো॑ ভবন্তি মনুষ্যলো॒কো বা ঋচো॑ মনুষ্যলো॒কাদে॒বান্যম॑ন্য়-ন্দেবলো॒কম॑ভ্য়া॒রোহ॑ন্তো যন্ত্যভিব॒র্তো ব্র॑হ্মসা॒ম-ম্ভ॑বতি সুব॒র্গস্য়॑ লো॒কস্য়া॒ভিবৃ॑ত্য়া অভি॒জি-দ্ভ॑বতি সুব॒র্গস্য়॑ লো॒কস্য়া॒ভিজি॑ত্য়ৈ বিশ্ব॒জি-দ্ভ॑বতি॒ বিশ্ব॑স্য়॒ জিত্য়ৈ॑ মা॒সিমা॑সি পৃ॒ষ্ঠান্য়ুপ॑ যন্তি মা॒সিমা᳚স্যতিগ্রা॒হ্য়া॑ গৃহ্যন্তে মা॒সিমা᳚স্য়ে॒ব বী॒র্য়॑-ন্দধতি মা॒সা-ম্প্রতি॑ষ্ঠিত্য়া উ॒পরি॑ষ্টান্মা॒সা-ম্পৃ॒ষ্ঠান্য়ুপ॑ যন্তি॒ তস্মা॑দু॒পরি॑ষ্টা॒দোষ॑ধয়ঃ॒ ফল॑-ঙ্গৃহ্ণন্তি ॥ 6 ॥
(গো॒স॒ত্রং-বাঁ - এ॑তি সং​বঁথ্স॒রো᳚ - ঽর্ধমা॒সা - মি॑থু॒ন-ম্ম॑দ্ধ্য়॒তো - দে॑ব॒য়ানে॑নৈ॒ব - বী॒র্য়ং॑ - ত্রয়ো॑দশ চ) (অ. 1)

গাবো॒ বা এ॒ত-থ্স॒ত্রমা॑সতাশৃ॒ঙ্গা-স্স॒তী-শ্শৃঙ্গা॑ণি॒ সিষা॑সন্তী॒স্তাসা॒-ন্দশ॒ মাসা॒ নিষ॑ণ্ণা॒ আস॒ন্নথ॒ শৃঙ্গা᳚ণ্যজাযন্ত॒ তা অ॑ব্রুব॒ন্নরা॒থ্স্মো-ত্তি॑ষ্ঠা॒মাব॒ ত-ঙ্কাম॑মরুথ্স্মহি॒ যেন॒ কামে॑ন॒ ন্যষ॑দা॒মেতি॒ তাসা॑মু॒ ত্বা অ॑ব্রুবন্ন॒র্ধাবা॒ যাব॑তী॒র্বা-ঽঽসা॑মহা এ॒বেমৌদ্বা॑দ॒শৌ মাসৌ॑ সং​বঁথ্স॒রগ্​ম্ স॒পান্দ্য়ো-ত্তি॑ষ্ঠা॒মেতি॒ তাসা᳚- [তাসা᳚ম্, দ্বা॒দ॒শে মা॒সি] 7

-ন্দ্বাদ॒শে মা॒সি শৃঙ্গা॑ণি॒ প্রাব॑র্তন্ত শ্র॒দ্ধয়া॒ বা-ঽশ্র॑দ্ধয়া বা॒ তা ই॒মা যাস্তূ॑প॒রা উ॒ভয়্য়ো॒ বাব তা আ᳚র্ধ্নুব॒ন্॒. যাশ্চ॒ শৃঙ্গা॒ণ্যস॑ন্ব॒ন্॒. যাশ্চোর্জ॑ম॒বারু॑ন্ধত॒র্ধ্নোতি॑ দ॒শসু॑ মা॒সূ᳚ত্তিষ্ঠ॑ন্নৃ॒দ্ধ্নোতি॑ দ্বাদ॒শসু॒ য এ॒বং-বেঁদ॑ প॒দেন॒ খলু॒ বা এ॒তে য॑ন্তি বি॒ন্দতি॒ খলু॒ বৈ প॒দেন॒ য-ন্তদ্বা এ॒তদৃ॒দ্ধময়॑ন॒-ন্তস্মা॑ দে॒ত-দ্গো॒সনি॑ ॥ 8 ॥
(তি॒ষ্ঠা॒মেতি॒ তাসাং॒ - তস্মা॒-দ্- দ্বে চ॑) (অ. 2)

প্র॒থ॒মে মা॒সি পৃ॒ষ্ঠান্য়ুপ॑ যন্তি মদ্ধ্য়॒ম উপ॑ যন্ত্য়ুত্ত॒ম উপ॑ যন্তি॒ তদা॑হু॒র্য়াং-বৈঁ ত্রিরেক॒স্য়াহ্ন॑ উপ॒সীদ॑ন্তি দ॒হ্রং-বৈঁ সা-ঽপ॑রাভ্য়া॒-ন্দোহা᳚ভ্য়া-ন্দু॒হে-ঽথ॒ কুত॒-স্সা ধো᳚ক্ষ্যতে॒ যা-ন্দ্বাদ॑শ॒ কৃত্ব॑ উপ॒সীদ॒ন্তীতি॑ সং​বঁথ্স॒রগ্​ম্ স॒পান্দ্য়ো᳚ত্ত॒মে মা॒সি স॒কৃ-ত্পৃ॒ষ্ঠান্য়ুপে॑য়ু॒স্ত-দ্যজ॑মানা য॒জ্ঞ-ম্প॒শূনব॑ রুন্ধতে সমু॒দ্রং-বাঁ [সমু॒দ্রং-বৈঁ, এ॒তে॑-ঽনবা॒রম॑পা॒র-ম্প্র] 9

এ॒তে॑-ঽনবা॒রম॑পা॒র-ম্প্র প্ল॑বন্তে॒ যে সং॑​বঁথ্স॒রমু॑প॒যন্তি॒ য-দ্বৃ॑হ-দ্রথন্ত॒রে অ॒ন্বর্জে॑য়ু॒র্যথা॒ মদ্ধ্য়ে॑ সমু॒দ্রস্য়॑ প্ল॒বম॒ন্বর্জে॑য়ুস্তা॒দৃ-ক্তদনু॑থ্সর্গ-ম্বৃহ-দ্রথন্ত॒রাভ্য়া॑মি॒ত্বা প্র॑তি॒ষ্ঠা-ঙ্গ॑চ্ছন্তি॒ সর্বে᳚ভ্য়ো॒ বৈ কামে᳚ভ্য়-স্স॒ন্ধির্দু॑হে॒ ত-দ্যজ॑মানা॒-স্সর্বা॒ন্ কামা॒নব॑ রুন্ধতে ॥ 10 ॥
(স॒মু॒দ্রং-বৈঁ - চতু॑স্ত্রিগ্​ম্শচ্চ) (অ. 3)

স॒মা॒ন্য়॑ ঋচো॑ ভবন্তি মনুষ্যলো॒কো বা ঋচো॑ মনুষ্যলো॒কাদে॒ব ন য॑ন্ত্য়॒ন্যদ॑ন্য়॒-থ্সাম॑ ভবতি দেবলো॒কো বৈ সাম॑ দেবলো॒কাদে॒বান্যম॑ন্য়-ম্মনুষ্যলো॒ক-ম্প্র॑ত্যব॒রোহ॑ন্তো যন্তি॒ জগ॑তী॒মগ্র॒ উপ॑ যন্তি॒ জগ॑তীং॒-বৈঁ ছন্দাগ্​ম্॑সি প্র॒ত্যব॑রোহন্ত্য়া-গ্রয়॒ণ-ঙ্গ্রহা॑ বৃ॒হ-ত্পৃ॒ষ্ঠানি॑ ত্রযস্ত্রি॒গ্​ম্॒শগ্গ্​স্তোমা॒-স্তস্মা॒-জ্জ্য়ায়াগ্​ম্॑স॒-ঙ্কনী॑য়া-ন্প্র॒ত্যব॑রোহতি বৈশ্বকর্ম॒ণো গৃ॑হ্যতে॒বিশ্বা᳚ন্য়ে॒ব তেন॒ কর্মা॑ণি॒ যজ॑মানা॒ অব॑ রুন্ধত আদি॒ত্য়ো [আদি॒ত্য়ঃ, গৃ॒হ্য়॒ত॒ ই॒য়ং-বাঁ] 11

গৃ॑হ্যত ই॒য়ং-বাঁ অদি॑তির॒স্য়ামে॒ব প্রতি॑ তিষ্ঠন্ত্য়॒ন্য়ো᳚-ঽন্য়ো গৃহ্য়েতে মিথুন॒ত্বায়॒ প্রজা᳚ত্য়া অবান্ত॒রং-বৈঁ দ॑শরা॒ত্রেণ॑ প্র॒জাপ॑তিঃ প্র॒জা অ॑সৃজত॒ য-দ্দ॑শরা॒ত্রো ভব॑তি প্র॒জা এ॒ব ত-দ্যজ॑মানা-স্সৃজন্ত এ॒তাগ্​ম্ হ॒ বা উ॑দ॒ঙ্ক-শ্শৌ᳚ল্বায়॒ন-স্স॒ত্রস্যর্ধি॑মুবাচ॒ য-দ্দ॑শরা॒ত্রোয়-দ্দ॑শরা॒ত্রো ভব॑তি স॒ত্রস্যর্ধ্য়া॒ অথো॒ যদে॒ব পূর্বে॒ষ্বহ॑স্সু॒ বিলো॑ম ক্রি॒যতে॒ তস্য়ৈ॒বৈ ( )-ষা শান্তিঃ॑ ॥ 12 ॥
(আ॒দি॒ত্য় - স্তস্য়ৈ॒ব - দ্বে চ॑) (অ. 4)

যদি॒ সোমৌ॒ সগ্​ম্সু॑তৌ॒ স্য়াতা᳚-ম্মহ॒তি রাত্রি॑য়ৈ প্রাতরনুবা॒ক-মু॒পাকু॑র্য়া॒-ত্পূর্বো॒ বাচ॒-ম্পূর্বো॑ দে॒বতাঃ॒ পূর্ব॒-শ্ছন্দাগ্​ম্॑সি বৃঙ্ক্তে॒ বৃষ॑ণ্বতী-ম্প্রতি॒পদ॑-ঙ্কুর্য়া-ত্প্রাতস্সব॒নাদে॒বৈষা॒মিন্দ্রং॑-বৃঁ॒ঙ্ক্তে ঽথো॒ খল্বা॑হুস্সবনমু॒খে-স॑বনমুখে কা॒র্য়েতি॑ সবনমু॒খা-থ্স॑বনমুখা-দে॒বৈষা॒মিন্দ্রং॑-বৃঁঙ্ক্তে সং​বেঁ॒শায়ো॑পবে॒শায়॑ গাযত্রি॒য়াস্ত্রি॒ষ্টুভো॒ জগ॑ত্য়া অনু॒ষ্টুভঃ॑ প॒ঙ্ক্ত্য়া অ॒ভিভূ᳚ত্য়ৈ॒ স্বাহা॒ ছন্দাগ্​ম্॑সি॒ বৈ সং॑​বেঁ॒শ উ॑পবে॒শ-শ্ছন্দো॑ভি-রে॒বৈষা॒- [উ॑পবে॒শ-শ্ছন্দো॑ভি-রে॒বৈষা᳚ম্, ছন্দাগ্​ম্॑সি] 13

-ঞ্ছন্দাগ্​ম্॑সি বৃঙ্ক্তে সজ॒নীয়॒গ্​ম্॒ শস্য়ং॑-বিঁহ॒ব্য়গ্​ম্॑ শস্য়॑ম॒গস্ত্য়॑স্য় কয়াশু॒ভীয়॒গ্​ম্॒ শস্য়॑মে॒তাব॒দ্বা অ॑স্তি॒ যাব॑দে॒ত-দ্য়াব॑দে॒বাস্তি॒ তদে॑ষাং-বৃঁঙ্ক্তে॒ যদি॑ প্রাতস্সব॒নে ক॒লশো॒ দীর্য়ে॑ত বৈষ্ণ॒বীষু॑ শিপিবি॒ষ্টব॑তীষু স্তুবীর॒ন্॒.যদ্বৈ য॒জ্ঞস্য়া॑-তি॒রিচ্য়॑তে॒ বিষ্ণু॒-ন্তচ্ছি॑পিবি॒ষ্টম॒ভ্যতি॑ রিচ্যতে॒ তদ্বিষ্ণু॑-শ্শিপিবি॒ষ্টো-ঽতি॑রিক্ত এ॒বাতি॑রিক্ত-ন্দধা॒ত্যথো॒ অতি॑রিক্তেনৈ॒বা-তি॑রিক্তমা॒প্ত্বা-ঽব॑ রুন্ধতে॒ যদি॑ ম॒দ্ধ্যন্দি॑নে॒ দীর্য়ে॑ত বষট্কা॒রনি॑ধন॒গ্​ম্॒ সাম॑ কুর্য়ুর্বষট্কা॒রো বৈ য॒জ্ঞস্য়॑ প্রতি॒ষ্ঠা প্র॑তি॒ষ্ঠামে॒বৈন॑-দ্গমযন্তি॒ যদি॑ তৃতীযসব॒ন এ॒তদে॒ব ॥ 14 ॥
(ছন্দো॑ভিরে॒বৈষা॒ - মবৈ - কা॒ন্নবিগ্​ম্॑শ॒তিশ্চ॑) (অ. 5)

ষ॒ড॒হৈ-র্মাসা᳚ন্-থ্স॒ম্পাদ্য়া-ঽহ॒রু-থ্সৃ॑জন্তি ষড॒হৈর্​হি মাসা᳚ন্-থ্স॒ম্পশ্য়॑ন্ত্য়-র্ধমা॒সৈর্মাসা᳚ন্-থ্স॒ম্পাদ্য়াহ॒রু-থ্সৃ॑জন্ত্য়-র্ধমা॒সৈর্​হি মাসা᳚ন্-থ্স॒ম্পশ্য়॑ন্ত্যমাবা॒স্য়॑য়া॒ মাসা᳚ন্-থ্স॒ম্পাদ্য়াহ॒রু-থ্সৃ॑জন্ত্যমাবা॒স্য়॑য়া॒ হি মাসা᳚ন্-থ্স॒ম্পশ্য়॑ন্তি পৌর্ণমা॒স্য়া মাসা᳚ন্-থ্স॒ম্পাদ্য়া-ঽহরু-থ্সৃ॑জন্তি পৌর্ণমা॒স্য়া হি মাসা᳚ন্-থ্স॒ম্পশ্য়॑ন্তি॒ যো বৈ পূ॒র্ণ আ॑সি॒ঞ্চতি॒ পরা॒ স সি॑ঞ্চতি॒ যঃ পূ॒র্ণাদু॒দচ॑তি [ ] 15

প্রা॒ণম॑স্মি॒ন্​থ্স দ॑ধাতি॒ য-ত্পৌ᳚র্ণমা॒স্য়া মাসা᳚ন্-থ্স॒পান্দ্য়াহ॑রু-থ্সৃ॒জন্তি॑ সং​বঁথ্স॒রায়ৈ॒ব ত-ত্প্রা॒ণ-ন্দ॑ধতি॒ তদনু॑ স॒ত্রিণঃ॒ প্রাণ॑ন্তি॒ যদহ॒র্নো-থ্সৃ॒জেয়ু॒র্যথা॒ দৃতি॒রুপ॑নদ্ধো বি॒পত॑ত্য়ে॒বগ্​ম্ সং॑​বঁথ্স॒রো বি প॑তে॒দার্তি॒-মার্চ্ছে॑য়ু॒র্য়-ত্পৌ᳚র্ণমা॒স্য়া মাসা᳚ন্-থ্স॒পান্দ্য়াহ॑রু-থ্সৃ॒জন্তি॑ সং​বঁথ্স॒রায়ৈ॒ব তদু॑দা॒ন-ন্দ॑ধতি॒ তদনু॑ স॒ত্রিণ॒ উ- [স॒ত্রিণ॒ উত্, অ॒ন॒ন্তি॒ না-ঽঽর্তি॒-মার্চ্ছ॑ন্তি] 16

-দ॑নন্তি॒ না-ঽঽর্তি॒-মার্চ্ছ॑ন্তি পূ॒র্ণমা॑সে॒ বৈ দে॒বানাগ্​ম্॑ সু॒তো য-ত্পৌ᳚র্ণমা॒স্য়া মাসা᳚ন্-থ্স॒পান্দ্য়াহ॑রু-থ্সৃ॒জন্তি॑ দে॒বানা॑মে॒ব ত-দ্য়॒জ্ঞেন॑ য॒জ্ঞ-ম্প্র॒ত্যব॑রোহন্তি॒ বি বা এ॒ত-দ্য়॒জ্ঞ-ঞ্ছি॑ন্দন্তি॒ য-থ্ষ॑ড॒হস॑তন্ত॒গ্​ম্॒ সন্ত॒মথাহ॑রু-থ্সৃ॒জন্তি॑ প্রাজাপ॒ত্য়-ম্প॒শুমা ল॑ভন্তে প্র॒জাপ॑তি॒-স্সর্বা॑ দে॒বতা॑ দে॒বতা॑ভিরে॒ব য॒জ্ঞগ্​ম্ স-ন্ত॑ন্বন্তি॒ যন্তি॒ বা এ॒তে সব॑না॒দ্য়ে-ঽহ॑- [সব॑না॒দ্য়ে-ঽহঃ॑, উ॒-থ্সৃ॒জন্তি॑] 17

-রু-থ্সৃ॒জন্তি॑ তু॒রীয়॒-ঙ্খলু॒ বা এ॒ত-থ্সব॑নং॒-য়ঁ-থ্সা᳚নাং॒য়্য়ং-য়ঁ-থ্সা᳚নাং॒য়্য়-ম্ভব॑তি॒ তেনৈ॒ব সব॑না॒ন্ন য॑ন্তি সমুপ॒হূয়॑ ভক্ষযন্ত্য়ে॒তথ্- সো॑মপীথা॒ হ্য়ে॑তর্​হি॑ যথাযত॒নং-বাঁ এ॒তেষাগ্​ম্॑ সবন॒ভাজো॑ দে॒বতা॑ গচ্ছন্তি॒ যে-ঽহ॑রু-থ্সৃ॒জন্ত্য়॑নুসব॒ন-ম্পু॑রো॒ডাশা॒-ন্নির্ব॑পন্তি যথাযত॒নাদে॒ব স॑বন॒ভাজো॑ দে॒বতা॒ অব॑ রুন্ধতে॒ ঽষ্টাক॑পালা-ন্প্রাতস্সব॒ন একা॑দশকপালা॒-ন্মাদ্ধ্য়॑ন্দিনে॒ সব॑নে॒ দ্বাদ॑শকপালাগ্​-স্তৃতীযসব॒নে ছন্দাগ্॑স্য়ে॒বা-ঽঽপ্ত্বা -ঽব॑ রুন্ধতে বৈশ্বদে॒ব-ঞ্চ॒রু-ন্তৃ॑তীযসব॒নে নির্ব॑পন্তি বৈশ্বদে॒বং-বৈঁ তৃ॑তীযসব॒ন-ন্তেনৈ॒ব তৃ॑তীযসব॒নান্ন য॑ন্তি ॥ 18 ॥
(উ॒দচ॒ - ত্য়ু - দ্য়ে-ঽহ॑ - রা॒প্ত্বা - পঞ্চ॑দশ চ) (অ. 6)

উ॒থ্সৃজ্য়াং(3)নোথ্সৃজ্য়া(3)মিতি॑ মীমাগ্​ম্সন্তে ব্রহ্মবা॒দিন॒-স্তদ্বা॑হুরু॒-থ্সৃজ্য়॑মে॒বেত্য়॑-মাবা॒স্য়া॑য়া-ঞ্চ পৌর্ণমা॒স্য়া-ঞ্চো॒-থ্সৃজ্য়॒মিত্য়া॑হুরে॒তে হি য॒জ্ঞং-বঁহ॑ত॒ ইতি॒ তে ত্বাব নোথ্সৃজ্য়ে॒ ইত্য়া॑হু॒র্য়ে অ॑বান্ত॒রং-য়ঁ॒জ্ঞ-ম্ভে॒জাতে॒ ইতি॒ যা প্র॑থ॒মা ব্য়॑ষ্টকা॒ তস্য়া॑মু॒-থ্সৃজ্য়॒মিত্য়া॑হুরে॒ষ বৈ মা॒সো বি॑শ॒র ইতি॒ না-ঽঽদি॑ষ্ট॒- [না-ঽঽদি॑ষ্টম্, উথ্সৃ॑জেয়ু॒-] 19

-মুথ্সৃ॑জেয়ু॒-র্যদাদি॑ষ্ট-মুথ্সৃ॒জেয়ু॑র্য়া॒দৃশে॒ পুনঃ॑ পর্য়াপ্লা॒বে মদ্ধ্য়ে॑ ষড॒হস্য়॑ স॒পন্দ্য়ে॑ত ষড॒হৈর্মাসা᳚ন্-থ্স॒পান্দ্য়॒ য-থ্স॑প্ত॒ম- মহ॒স্তস্মি॒ন্নু-থ্সৃ॑জেয়ু॒-স্তদ॒গ্নয়ে॒ বসু॑মতে পুরো॒ডাশ॑ম॒ষ্টাক॑পাল॒-ন্নির্ব॑পেয়ুরৈ॒ন্দ্র-ন্দধীন্দ্রা॑য় ম॒রুত্ব॑তে পুরো॒ডাশ॒মেকা॑দশকপালং-বৈঁশ্বদে॒ব-ন্দ্বাদ॑শকপালম॒গ্নের্বৈ বসু॑মতঃ প্রাতস্সব॒নং-য়ঁদ॒গ্নয়ে॒ বসু॑মতে পুরো॒ডাশ॑ম॒ষ্টাক॑পাল-ন্নি॒র্বপ॑ন্তি দে॒বতা॑মে॒ব ত-দ্ভা॒গিনী᳚-ঙ্কু॒র্বন্তি॒ [-ঙ্কু॒র্বন্তি॑, সব॑ন] 20

সব॑ন-মষ্টা॒ভিরুপ॑ যন্তি॒ যদৈ॒ন্দ্র-ন্দধি॒ ভব॒তীন্দ্র॑মে॒ব ত-দ্ভা॑গ॒ধেয়া॒ন্ন চ্য়া॑বয়॒ন্তীন্দ্র॑স্য়॒ বৈ ম॒রুত্ব॑তো॒ মাদ্ধ্য়॑ন্দিন॒গ্​ম্॒ সব॑নং॒-য়ঁদিন্দ্রা॑য় ম॒রুত্ব॑তে পুরো॒ডাশ॒মেকা॑দশকপাল-ন্নি॒র্বপ॑ন্তি দে॒বতা॑মে॒ব ত-দ্ভা॒গিনী᳚-ঙ্কু॒র্বন্তি॒ সব॑নমেকাদ॒শভি॒রুপ॑ যন্তি॒ বিশ্বে॑ষাং॒-বৈঁ দে॒বানা॑মৃভু॒মতা᳚-ন্তৃতীযসব॒নং​য়ঁ-দ্বৈ᳚শ্বদে॒ব-ন্দ্বাদ॑শকপাল-ন্নি॒র্বপ॑ন্তি দে॒বতা॑ এ॒ব ত-দ্ভা॒গিনীঃ᳚ কু॒র্বন্তি॒ সব॑ন-ন্দ্বাদ॒শভি॒- [সব॑ন-ন্দ্বাদ॒শভিঃ॑, উপ॑ যন্তি] 21

-রুপ॑ যন্তি প্রাজাপ॒ত্য়-ম্প॒শুমা ল॑ভন্তে য॒জ্ঞো বৈ প্র॒জাপ॑তি-র্য়॒জ্ঞস্য়া-ন॑নুসর্গায়াভিব॒র্ত ই॒ত-ষ্ষণ্মা॒সো ব্র॑হ্মসা॒ম-ম্ভ॑বতি॒ ব্রহ্ম॒ বা অ॑ভিব॒র্তো ব্রহ্ম॑ণৈ॒ব ত-থ্সু॑ব॒র্গং-লোঁ॒ক-ম॑ভিব॒র্তয়॑ন্তো যন্তি প্রতিকূ॒লমি॑ব॒ হীত-স্সু॑ব॒র্গো লো॒ক ইন্দ্র॒ ক্রতু॑-ন্ন॒ আ ভ॑র পি॒তা পু॒ত্রেভ্য়ো॒ যথা᳚ । শিক্ষা॑ নো অ॒স্মি-ন্পু॑রুহূত॒ যাম॑নি জী॒বা জ্য়োতি॑-রশীম॒হীত্য়॒-মুত॑ আয়॒তাগ্​ম্ ষণ্মা॒সো ব্র॑হ্মসা॒ম-ম্ভ॑বত্য়॒য়ং-বৈঁ লো॒কো জ্য়োতিঃ॑ প্র॒জা জ্য়োতি॑রি॒মমে॒ব তল্লো॒ক-ম্পশ্য়॑ন্তো-ঽভি॒বদ॑ন্ত॒ আ য॑ন্তি ॥ 22 ॥
(না-ঽঽদি॑ষ্টং - কু॒র্বন্তি॑ - দ্বাদ॒শভি॒ - রিতি॑- বিগ্​ম্শ॒তিশ্চ॑) (অ. 7)

দে॒বানাং॒-বাঁ অন্ত॑-ঞ্জ॒গ্মুষা॑মিন্দ্রি॒য়ং-বীঁ॒র্য়॑-মপা᳚ক্রাম॒-ত্ত-ত্ক্রো॒শেনাবা॑রুন্ধত॒ ত-ত্ক্রো॒শস্য়॑ ক্রোশ॒ত্বং-য়ঁ-ত্ক্রো॒শেন॒ চাত্বা॑ল॒স্য়ান্তে᳚ স্তু॒বন্তি॑ য॒জ্ঞস্য়ৈ॒বান্ত॑-ঙ্গ॒ত্বেন্দ্রি॒য়ং-বীঁ॒র্য়॑মব॑ রুন্ধতে স॒ত্রস্যর্ধ্য়া॑ ঽঽহব॒নীয়॒স্য়ান্তে᳚ স্তুবন্ত্য়॒গ্নি-মে॒বোপ॑-দ্র॒ষ্টার॑-ঙ্কৃ॒ত্বর্ধি॒মুপ॑ যন্তি প্র॒জাপ॑তে॒র্॒হৃদ॑য়েন হবি॒র্ধানে॒-ঽন্ত-স্স্তু॑বন্তি প্রে॒মাণ॑মে॒বাস্য়॑ গচ্ছন্তি শ্লো॒কেন॑ পু॒রস্তা॒-থ্সদ॑স- [পু॒রস্তা॒-থ্সদ॑সঃ, স্তু॒ব॒ন্ত্যনু॑শ্লোকেন] 23

-স্স্তুব॒ন্ত্যনু॑শ্লোকেন প॒শ্চা-দ্য়॒জ্ঞস্য়ৈ॒বান্ত॑-ঙ্গ॒ত্বা শ্লো॑ক॒ভাজো॑ ভবন্তি ন॒বভি॑-রদ্ধ্ব॒র্য়ুরু-দ্গা॑যতি॒ নব॒ বৈ পুরু॑ষে প্রা॒ণাঃ প্রা॒ণানে॒ব যজ॑মানেষু দধাতি॒ সর্বা॑ ঐ॒ন্দ্রিয়ো॑ ভবন্তি প্রা॒ণেষ্বে॒বেন্দ্রি॒য়-ন্দ॑ধ॒-ত্যপ্র॑তিহৃতাভি॒রু-দ্গা॑যতি॒ তস্মা॒-ত্পুরু॑ষ॒-স্সর্বা᳚ণ্য়॒ন্য়ানি॑ শী॒র্​ষ্ণো-ঽঙ্গা॑নি॒ প্রত্য়॑চতি॒ শির॑ এ॒ব ন প॑ঞ্চদ॒শগ্​ম্র॑থন্ত॒র-ম্ভ॑বতীন্দ্রি॒যমে॒বাব॑ রুন্ধতে সপ্তদ॒শ- [সপ্তদ॒শম্, বৃ॒হ-দ॒ন্নাদ্য়॒স্য়া] 24

-ম্বৃ॒হ-দ॒ন্নাদ্য়॒স্য়া-ঽব॑রুদ্ধ্য়া॒ অথো॒ প্রৈব তেন॑ জাযন্ত একবি॒গ্​ম্॒শ-ম্ভ॒দ্র-ন্দ্বি॒পদা॑সু॒ প্রতি॑ষ্ঠিত্য়ৈ॒ পত্ন॑য়॒ উপ॑ গাযন্তি মিথুন॒ত্বায়॒ প্রজা᳚ত্য়ৈ প্র॒জা॑পতিঃ প্র॒জা অ॑সৃজত॒ সো॑-ঽকামযতা॒-ঽঽসাম॒হগ্​ম্ রা॒জ্য়-ম্পরী॑য়া॒মিতি॒ তাসাগ্​ম্॑ রাজ॒নেনৈ॒ব রা॒জ্য়-ম্পর্য়ৈ॒-ত্ত-দ্রা॑জ॒নস্য়॑ রাজন॒ত্বং-য়ঁ-দ্রা॑জ॒ন-ম্ভব॑তি প্র॒জানা॑মে॒ব ত-দ্যজ॑মানা রা॒জ্য়-ম্পরি॑ যন্তি পঞ্চবি॒গ্​ম্॒শ-ম্ভ॑বতি প্র॒জাপ॑তে॒- [প্র॒জাপ॑তেঃ, আপ্ত্য়ৈ॑ প॒ঞ্চভি॒-স্তিষ্ঠ॑ন্ত-স্স্তুবন্তি] 25

-রাপ্ত্য়ৈ॑ প॒ঞ্চভি॒-স্তিষ্ঠ॑ন্ত-স্স্তুবন্তি দেবলো॒কমে॒বাভি জ॑যন্তি প॒ঞ্চভি॒রাসী॑না মনুষ্যলো॒কমে॒বাভি জ॑যন্তি॒ দশ॒ সম্প॑দ্যন্তে॒ দশা᳚ক্ষরা বি॒রাডন্নং॑-বিঁ॒রা-ড্বি॒রাজৈ॒বা-ন্নাদ্য়॒মব॑ রুন্ধতে পঞ্চ॒ধা বি॑নি॒ষদ্য়॑ স্তুবন্তি॒ পঞ্চ॒ দিশো॑ দি॒ক্ষ্বে॑ব প্রতি॑তিষ্ঠ॒ন্ত্য়েকৈ॑ক॒য়া-ঽস্তু॑তয়া স॒মায়॑ন্তি দি॒গ্ভ্য় এ॒বান্নাদ্য়॒গ্​ম্॒ স-ম্ভ॑রন্তি॒ তাভি॑-রুদ্গা॒তো-দ্গা॑যতি দি॒গ্ভ্য় এ॒বা-ঽন্নাদ্য়গ্​ম্॑ [এ॒বা-ঽন্নাদ্য়᳚ম্, স॒ম্ভৃত্য়॒ তেজ॑] 26

স॒ম্ভৃত্য়॒ তেজ॑ আ॒ত্ম-ন্দ॑ধতে॒ তস্মা॒দেকঃ॑ প্রা॒ণ-স্সর্বা॒ণ্যঙ্গা᳚ন্যব॒ত্যথো॒ যথা॑ সুপ॒র্ণ উ॑ত্পতি॒ষ্যঞ্ছির॑ উত্ত॒ম-ঙ্কু॑রু॒ত এ॒বমে॒ব ত-দ্যজ॑মানাঃ প্র॒জানা॑মুত্ত॒মা ভ॑বন্ত্য়াস॒ন্দী-মু॑দ্গা॒তা ঽঽরো॑হতি॒ সাম্রা᳚জ্যমে॒ব গ॑চ্ছন্তি প্লে॒ঙ্খগ্​ম্ হোতা॒ নাক॑স্য়ৈ॒ব পৃ॒ষ্ঠগ্​ম্ রো॑হন্তি কূ॒র্চাব॑দ্ধ্ব॒র্য়ু-র্ব্র॒দ্ধ্নস্য়ৈ॒ব বি॒ষ্টপ॑-ঙ্গচ্ছন্ত্য়ে॒তাব॑ন্তো॒ বৈ দে॑বলো॒কাস্তেষ্বে॒ব য॑থাপূ॒র্ব-ম্প্রতি॑ তিষ্ঠ॒ন্ত্যথো॑ আ॒ক্রম॑ণমে॒ব ত-থ্সেতুং॒-য়ঁজ॑মানাঃ কুর্বতে সুব॒র্গস্য়॑ লো॒কস্য়॒ সম॑ষ্ট্য়ৈ ॥ 27 ॥
(সদ॑সঃ-সপ্তদ॒শং-প্র॒জাপ॑তে-র্গাযতি দি॒গ্ভ্য় এ॒বান্নাদ্য়ং॒-প্রত্য়ে-কা॑দশ চ) (অ. 8)

অ॒র্ক্য়ে॑ণ॒ বৈ স॑হস্র॒শঃ প্র॒জাপ॑তিঃ প্র॒জা অ॑সৃজত॒ তাভ্য়॒ ইলা᳚দে॒ন্নেরাং॒-লূঁতা॒মবা॑রুন্ধ॒ যদ॒র্ক্য়॑-ম্ভব॑তি প্র॒জা এ॒ব ত-দ্যজ॑মানা-স্সৃজন্ত॒ ইলা᳚দ-ম্ভবতি প্র॒জাভ্য়॑ এ॒ব সৃ॒ষ্টাভ্য়॒ ইরাং॒-লূঁতা॒মব॑ রুন্ধতে॒ তস্মা॒দ্য়াগ্​ম্ সমাগ্​ম্॑ স॒ত্রগ্​ম্ সমৃ॑দ্ধ॒-ঙ্ক্ষোধু॑কা॒স্তাগ্​ম্ সমা᳚-ম্প্র॒জা ইষ॒গ্গ্॒ হ্য়া॑সা॒মূর্জ॑মা॒দদ॑তে॒ যাগ্​ম্ সমাং॒-ব্য়ৃঁ॑দ্ধ॒-মক্ষো॑ধুকা॒স্তাগ্​ম্ সমা᳚-ম্প্র॒জা [সমা᳚-ম্প্র॒জাঃ, ন হ্য়া॑সা॒মিষ॒] 28

ন হ্য়া॑সা॒মিষ॒-মূর্জ॑-মা॒দদ॑ত উত্ক্রো॒দ-ঙ্কু॑র্বতে॒ যথা॑ ব॒ন্ধা-ন্মু॑মুচা॒না উ॑ত্ক্রো॒দ-ঙ্কু॒র্বত॑ এ॒বমে॒ব ত-দ্যজ॑মানা দেবব॒ন্ধা-ন্মু॑মুচা॒না উ॑ত্ক্রো॒দ-ঙ্কু॑র্বত॒ ইষ॒মূর্জ॑মা॒ত্ম-ন্দধা॑না বা॒ণ-শ্শ॒তত॑ন্তুর্ভবতি শ॒তায়ুঃ॒ পুরু॑ষ-শ্শ॒তেন্দ্রি॑য়॒ আয়ু॑ষ্য়ে॒বেন্দ্রি॒য়ে প্রতি॑ তিষ্ঠন্ত্য়া॒জি-ন্ধা॑ব॒ন্ত্যন॑ভিজিতস্য়া॒-ভিজি॑ত্য়ৈ দুন্দু॒ভীন্-থ্স॒মাঘ্ন॑ন্তি পর॒মা বা এ॒ষা বাগ্য়া দু॑ন্দু॒ভৌ প॑র॒মামে॒ব [ ] 29

বাচ॒মব॑ রুন্ধতে ভূমিদুন্দু॒ভিমা ঘ্ন॑ন্তি॒ যৈবেমাং-বাঁ-ক্প্রবি॑ষ্টা॒ তামে॒বাব॑ রুন্ধ॒তে ঽথো॑ ই॒মামে॒ব জ॑যন্তি॒ সর্বা॒ বাচো॑ বদন্তি॒ সর্বা॑সাং-বাঁ॒চামব॑রুদ্ধ্য়া আ॒র্দ্রেচর্ম॒ন্ ব্য়ায়॑চ্ছেতে ইন্দ্রি॒যস্য়া ব॑রুদ্ধ্য়া॒ আ-ঽন্য়ঃ ক্রোশ॑তি॒ প্রান্য়-শ্শগ্​ম্॑সতি॒ য আ॒ক্রোশ॑তি পু॒নাত্য়ে॒বৈনা॒ন্​থ্স যঃ প্র॒শগ্​ম্স॑তি পূ॒তেষ্বে॒বা-ঽন্নাদ্য়॑-ন্দধা॒ত্য়ৃষি॑কৃত-ঞ্চ॒ [-ন্দধা॒ত্য়ৃষি॑কৃত-ঞ্চ॒, বা এ॒তে] 30

বা এ॒তে দে॒বকৃ॑ত-ঞ্চ॒ পূর্বৈ॒র্মাসৈ॒রব॑ রুন্ধতে॒ য-দ্ভূ॑তে॒চ্ছদা॒গ্​ম্॒ সামা॑নি॒ ভব॑ন্ত্য়ু॒ভয়॒স্য়াব॑রুদ্ধ্য়ৈ॒ যন্তি॒ বা এ॒তে মি॑থু॒নাদ্য়ে সং॑​বঁথ্স॒র-মু॑প॒যন্ত্য়॑ন্তর্বে॒দি মি॑থু॒নৌ স-ম্ভ॑বত॒স্তেনৈ॒ব মি॑থু॒নান্ন য॑ন্তি ॥ 31 ॥
(ব্য়ৃ॑দ্ধ॒মক্ষো॑ধুকা॒স্তাগ্​ম্ সমা᳚-ম্প্র॒জাঃ - প॑র॒মামে॒ব - চ॑ - ত্রি॒গ্​ম্॒শচ্চ॑) (অ. 9)

চর্মাব॑ ভিন্দন্তি পা॒প্মান॑মে॒বৈষা॒মব॑ ভিন্দন্তি॒ মা-ঽপ॑ রাথ্সী॒র্মা-ঽতি॑ ব্য়াথ্সী॒রিত্য়া॑হ সম্প্র॒ত্য়ে॑বৈষা᳚-ম্পা॒প্মান॒মব॑ ভিন্দন্ত্য়ুদকু॒ম্ভান॑ধিনি॒ধায়॑ দা॒স্য়ো॑ মার্জা॒লীয়॒-ম্পরি॑ নৃত্যন্তি প॒দো নি॑ঘ্ন॒তীরি॒দম্ম॑ধু॒-ঙ্গায়॑ন্ত্য়ো॒ মধু॒ বৈ দে॒বানা᳚-ম্পর॒ম-ম॒ন্নাদ্য়॑-ম্পর॒মমে॒বা-ন্নাদ্য়॒মব॑ রুন্ধতে প॒দো নি ঘ্ন॑ন্তি মহী॒য়ামে॒বৈষু॑ দধতি ॥ 32 ॥
(চর্মৈ - কা॒ন্নপ॑ঞ্চা॒শত্) (অ. 10)

পৃ॒থি॒ব্য়ৈ স্বাহা॒ ঽন্তরি॑ক্ষায়॒ স্বাহা॑ দি॒বে স্বাহা॑ সম্প্লোষ্য়॒তে স্বাহা॑ স॒প্লং​বঁ॑মানায়॒ স্বাহা॒ সম্প্লু॑তায়॒ স্বাহা॑ মেঘায়িষ্য়॒তে স্বাহা॑ মেঘায়॒তে স্বাহা॑ মেঘি॒তায়॒ স্বাহা॑ মে॒ঘায়॒ স্বাহা॑ নীহা॒রায়॒ স্বাহা॑ নি॒হাকা॑য়ৈ॒ স্বাহা᳚ প্রাস॒চায়॒ স্বাহা᳚ প্রচ॒লাকা॑য়ৈ॒ স্বাহা॑ বিদ্য়োতিষ্য়॒তে স্বাহা॑ বি॒দ্য়োত॑মানায়॒ স্বাহা॑ সং​বিঁ॒দ্য়োত॑মানায়॒ স্বাহা᳚ স্তনয়িষ্য়॒তে স্বাহা᳚ স্ত॒নয়॑তে॒ স্বাহো॒ -গ্রগ্গ্​ স্ত॒নয়॑তে॒ স্বাহা॑ বর্​ষিষ্য়॒তে স্বাহা॒ বর্​ষ॑তে॒ স্বাহা॑ ঽভি॒বর্​ষ॑তে॒ স্বাহা॑ পরি॒বর্​ষ॑তে॒ স্বাহা॑ সং॒​বঁর্​ষ॑তে॒ [সং॒​বঁর্​ষ॑তে, স্বাহা॑ ঽনু॒বর্​ষ॑তে॒ স্বাহা॑] 33

স্বাহা॑ ঽনু॒বর্​ষ॑তে॒ স্বাহা॑ শীকায়িষ্য়॒তে স্বাহা॑ শীকায়॒তে স্বাহা॑ শীকি॒তায়॒ স্বাহা᳚প্রোষিষ্য়॒তে স্বাহা᳚ প্রুষ্ণ॒তে স্বাহা॑ পরিপ্রুষ্ণ॒তে স্বাহো᳚-দ্গ্রহীষ্য়॒তে স্বাহো᳚ দ্গৃহ্ণ॒তে স্বাহো-দ্গৃ॑হীতায়॒ স্বাহা॑ বিপ্লোষ্য়॒তে স্বাহা॑ বি॒প্লব॑মানায়॒ স্বাহা॒ বিপ্লু॑তায়॒ স্বাহা॑ ঽঽতফ্স্য়॒তে স্বাহা॒ ঽঽতপ॑তে ॒স্বাহো॒-গ্রমা॒তপ॑তে॒ স্বাহ॒ -র্গ্ভ্য়-স্স্বাহা॒ যজু॑র্ভ্য়॒-স্স্বাহা॒ সাম॑ভ্য়॒-স্স্বাহা ঽঙ্গি॑রোভ্য়॒-স্স্বাহা॒ বেদে᳚ভ্য়॒-স্স্বাহা॒ গাথা᳚ভ্য়॒-স্স্বাহা॑ নারাশ॒গ্​ম্॒সীভ্য়॒-স্স্বাহা॒ রৈভী᳚ভ্য়॒-স্স্বাহা॒ সর্ব॑স্মৈ॒ স্বাহা᳚ ॥ 34 ॥
(সং॒​বঁর্​ষ॑তে॒ - রৈভী᳚ভ্য়॒-স্স্বাহা॒ - দ্বে চ॑) (অ. 11)

দ॒ত্বতে॒ স্বাহা॑ ঽদ॒ন্তকা॑য়॒ স্বাহা᳚ প্রা॒ণিনে॒ স্বাহা᳚ ঽপ্রা॒ণায়॒ স্বাহা॒ মুখ॑বতে॒ স্বাহা॑-ঽমু॒খায়॒ স্বাহা॒ নাসি॑কবতে॒ স্বাহা॑ ঽনাসি॒কায়॒ স্বাহা᳚ ঽক্ষ॒ণ্বতে॒ স্বাহা॑-ঽন॒ক্ষিকা॑য়॒ স্বাহা॑ ক॒র্ণিনে॒ স্বাহা॑ ঽক॒র্ণকা॑য়॒ স্বাহা॑ শীর্​ষ॒ণ্বতে॒ স্বাহা॑-ঽশী॒র্॒ষকা॑য়॒ স্বাহা॑ প॒দ্বতে॒ স্বাহা॑ ঽপা॒দকা॑য়॒ স্বাহা᳚ প্রাণ॒তে স্বাহা ঽপ্রা॑ণতে॒ স্বাহা॒ বদ॑তে॒ স্বাহা ঽব॑দতে॒ স্বাহা॒ পশ্য়॑তে॒ স্বাহা ঽপ॑শ্যতে॒ স্বাহা॑ শৃণ্ব॒তে স্বাহা ঽশৃ॑ণ্বতে॒ স্বাহা॑ মন॒স্বিনে॒ স্বাহা॑- [মন॒স্বিনে॒ স্বাহা᳚, অ॒ম॒নসে॒ স্বাহা॑] 35

-ঽম॒নসে॒ স্বাহা॑ রেত॒স্বিনে॒ স্বাহা॑ ঽরে॒তস্কা॑য়॒ স্বাহা᳚ প্র॒জাভ্য়॒-স্স্বাহা᳚ প্র॒জন॑নায়॒ স্বাহা॒ লোম॑বতে॒ স্বাহা॑ ঽলো॒মকা॑য়॒ স্বাহা᳚ ত্ব॒চে স্বাহা॒ ঽত্বক্কা॑য়॒ স্বাহা॒ চর্ম॑ণ্বতে॒ স্বাহা॑ ঽচ॒র্মকা॑য়॒ স্বাহা॒ লোহি॑তবতে॒ স্বাহা॑-ঽলোহি॒তায়॒ স্বাহা॑ মাগ্​ম্স॒ন্বতে॒ স্বাহা॑ ঽমা॒গ্​ম্॒সকা॑য়॒ স্বাহা॒ স্নাব॑ভ্য়॒-স্স্বাহা᳚ ঽস্না॒বকা॑য়॒ স্বাহা᳚ স্থ॒ন্বতে॒ স্বাহা॑-ঽন॒স্থিকা॑য়॒ স্বাহা॑ মজ্জ॒ন্বতে॒ স্বাহা॑ ঽম॒জ্জকা॑য়॒ স্বাহা॒ ঽঙ্গিনে॒ স্বাহা॑-ঽন॒ঙ্গায়॒ স্বাহা॒ ঽঽত্মনে॒ স্বাহা ঽনা᳚ত্মনে॒ স্বাহা॒ সর্ব॑স্মৈ॒ স্বাহা᳚ ॥ 36 ॥
(ম॒ন॒স্বিনে॒ স্বাহা - ঽনা᳚ত্মনে॒ স্বাহা॒ - দ্বে চ॑) (অ. 12)

কস্ত্বা॑ যুনক্তি॒ স ত্বা॑ যুনক্তু॒ বিষ্ণু॑স্ত্বা যুনক্ত্ব॒স্য় য॒জ্ঞস্যর্ধ্য়ৈ॒ মহ্য়॒গ্​ম্॒ সন্ন॑ত্য়া অ॒মুষ্মৈ॒ কামা॒য়া-ঽঽয়ু॑ষে ত্বা প্রা॒ণায়॑ ত্বা ঽপা॒নায়॑ ত্বা ব্য়া॒নায়॑ ত্বা॒ ব্য়ু॑ষ্ট্য়ৈ ত্বা র॒য়্য়ৈ ত্বা॒ রাধ॑সে ত্বা॒ ঘোষা॑য় ত্বা॒ পোষা॑য় ত্বা ঽঽরাদ্ঘো॒ষায়॑ ত্বা॒ প্রচ্য়ু॑ত্য়ৈ ত্বা ॥ 37 ॥
(কস্ত্বা॒ - ঽষ্টাত্রিগ্​ম্॑শত্) (অ. 13)

অ॒গ্নয়ে॑ গায়॒ত্রায়॑ ত্রি॒বৃতে॒ রাথ॑ন্তরায় বাস॒ন্তায়া॒-ষ্টাক॑পাল॒ ইন্দ্রা॑য়॒ ত্রৈষ্টু॑ভায় পঞ্চদ॒শায়॒ বার্​হ॑তায়॒ গ্রৈষ্মা॒য়ৈকা॑দশকপালো॒ বিশ্বে᳚ভ্য়ো দে॒বেভ্য়ো॒ জাগ॑তেভ্য়-স্সপ্তদ॒শেভ্য়ো॑ বৈরূ॒পেভ্য়ো॒ বার্​ষি॑কেভ্য়ো॒ দ্বাদ॑শকপালো মি॒ত্রাবরু॑ণাভ্য়া॒-মানু॑ষ্টুভাভ্য়া-মেকবি॒গ্​ম্॒শাভ্য়াং᳚-বৈঁরা॒জাভ্য়াগ্​ম্॑ শার॒দাভ্য়া᳚-ম্পয়॒স্য়া॑ বৃহ॒স্পত॑য়ে॒ পাঙ্ক্তা॑য় ত্রিণ॒বায়॑ শাক্ব॒রায়॒ হৈম॑ন্তিকায় চ॒রু-স্স॑বি॒ত্র আ॑তিচ্ছন্দ॒সায়॑ ত্রযস্ত্রি॒গ্​ম্॒শায়॑ রৈব॒তায়॑ শৈশি॒রায়॒ দ্বাদ॑শকপা॒লো ঽদি॑ত্য়ৈ॒ বিষ্ণু॑পত্ন্য়ৈ চ॒রুর॒গ্নয়ে॑ বৈশ্বান॒রায়॒ দ্বাদ॑শকপা॒লো ঽনু॑মত্য়ৈ চ॒রুঃ কা॒য় এক॑কপালঃ ॥ 38 ॥
(অ॒গ্নয়ে-ঽদি॑ত্য়া॒ অনু॑মত্য়ৈ - স॒প্তচ॑ত্বারিগ্​ম্শত্) (অ. 14)

যো বা অ॒গ্নাব॒গ্নিঃ প্র॑হ্রি॒যতে॒ যশ্চ॒ সোমো॒ রাজা॒ তয়ো॑রে॒ষ আ॑তি॒থ্য়ং-য়ঁদ॑গ্নীষো॒মীয়ো-ঽথৈ॒ষ রু॒দ্রো যশ্চী॒যতে॒ য-থ্সঞ্চি॑তে॒-ঽগ্নাবে॒তানি॑ হ॒বীগ্​ম্ষি॒ ন নি॒র্বপে॑দে॒ষ এ॒ব রু॒দ্রো-ঽশা᳚ন্ত উপো॒ত্থায়॑ প্র॒জা-ম্প॒শূন্ যজ॑মানস্য়া॒ভি ম॑ন্য়েত॒ য-থ্সঞ্চি॑তে॒-ঽগ্নাবে॒তানি॑ হ॒বীগ্​ম্ষি॑ নি॒র্বপ॑তি ভাগ॒ধেয়ে॑নৈ॒বৈনগ্​ম্॑ শমযতি॒ নাস্য়॑ রু॒দ্রো-ঽশা᳚ন্ত [রু॒দ্রো-ঽশা᳚ন্তঃ, উ॒পো॒ত্থায়॑] 39

উপো॒ত্থায়॑ প্র॒জা-ম্প॒শূন॒ভি ম॑ন্যতে॒ দশ॑ হ॒বীগ্​ম্ষি॑ ভবন্তি॒ নব॒ বৈ পুরু॑ষে প্রা॒ণা নাভি॑র্দশ॒মী প্রা॒ণানে॒ব যজ॑মানে দধা॒ত্যথো॒ দশা᳚ক্ষরা বি॒রাডন্নং॑-বিঁ॒রা-ড্বি॒রাজ্য়ে॒বান্নাদ্য়ে॒ প্রতি॑ তিষ্ঠত্য়ৃ॒তুভি॒র্বা এ॒ষ ছন্দো॑ভি॒-স্স্তোমৈঃ᳚ পৃ॒ষ্ঠৈশ্চে॑ত॒ব্য়॑ ইত্য়া॑হু॒র্যদে॒তানি॑ হ॒বীগ্​ম্ষি॑ নি॒র্বপ॑ত্য়ৃ॒তুভি॑রে॒বৈন॒-ঞ্ছন্দো॑ভি॒-স্স্তোমৈঃ᳚ পৃ॒ষ্ঠৈশ্চি॑নুতে॒ দিশ॑-স্সুষুবা॒ণেনা॑ - [ ] 40

-ভি॒জিত্য়া॒ ইত্য়া॑হু॒র্যদে॒তানি॑ হ॒বীগ্​ম্ষি॑ নি॒র্বপ॑তি দি॒শাম॒ভিজি॑ত্য়া এ॒তয়া॒ বা ইন্দ্র॑-ন্দে॒বা অ॑য়াজয়॒-ন্তস্মা॑দিন্দ্রস॒ব এ॒তয়া॒ মনু॑-ম্মনু॒ষ্য়া᳚স্তস্মা᳚-ন্মনুস॒বো যথেন্দ্রো॑ দে॒বানাং॒-য়ঁথা॒ মনু॑র্মনু॒ষ্য়া॑ণামে॒ব-ম্ভ॑বতি॒ য এ॒বং-বিঁ॒দ্বানে॒তয়েষ্ট্য়া॒ যজ॑তে॒ দিগ্ব॑তীঃ পুরো-ঽনুবা॒ক্য়া॑ ভবন্তি॒ সর্বা॑সা-ন্দি॒শাম॒ভিজি॑ত্য়ৈ ॥ 41 ॥
(অশা᳚ন্তঃ - সুষুবা॒ণেনৈ - ক॑চত্বারিগ্​ম্শচ্চ) (অ. 15)

যঃ প্রা॑ণ॒তো নি॑মিষ॒তো ম॑হি॒ত্বৈক॒ ইদ্রাজা॒ জগ॑তো ব॒ভূব॑ । য ঈশে॑ অ॒স্য় দ্বি॒পদ॒শ্চতু॑ষ্পদঃ॒ কস্মৈ॑ দে॒বায়॑ হ॒বিষা॑ বিধেম ॥ উ॒প॒য়া॒মগৃ॑হীতো-ঽসি প্র॒জাপ॑তয়ে ত্বা॒ জুষ্ট॑-ঙ্গৃহ্ণামি॒ তস্য়॑ তে॒ দ্য়ৌর্ম॑হি॒মা নক্ষ॑ত্রাণি রূ॒পমা॑দি॒ত্যস্তে॒ তেজ॒স্তস্মৈ᳚ ত্বা মহি॒ম্নে প্র॒জাপ॑তয়ে॒ স্বাহা᳚ ॥ 42 ॥
(য়ঃ প্রা॑ণ॒তো দ্য়ৌরা॑দি॒ত্য়ো᳚ - ঽষ্টাত্রিগ্​ম্॑শত্ ) (অ. 16)

য আ᳚ত্ম॒দা ব॑ল॒দা যস্য়॒ বিশ্ব॑ উ॒পাস॑তে প্র॒শিষং॒-য়ঁস্য়॑ দে॒বাঃ । যস্য়॑ ছা॒য়া-ঽমৃতং॒-য়ঁস্য়॑ মৃ॒ত্য়ুঃ কস্মৈ॑ দে॒বায়॑ হ॒বিষা॑ বিধেম ॥ উ॒প॒য়া॒মগৃ॑হীতো-ঽসি প্র॒জাপ॑তয়ে ত্বা॒ জুষ্ট॑-ঙ্গৃহ্ণামি॒ তস্য়॑ তে পৃথি॒বী ম॑হি॒মৌষ॑ধয়ো॒ বন॒স্পত॑য়ো রূ॒পম॒গ্নিস্তে॒ তেজ॒স্তস্মৈ᳚ ত্বা মহি॒ম্নে প্র॒জাপ॑তয়ে॒ স্বাহা᳚ ॥ 43 ॥
(য় আ᳚ত্ম॒দাঃ পৃ॑থি॒ব্য়॑গ্নি-রেকা॒ন্নচ॑ত্বারি॒গ্​ম্॒শত্) (অ. 17)

আ ব্রহ্ম॑-ন্ব্রাহ্ম॒ণো ব্র॑হ্মবর্চ॒সী জা॑যতা॒মা ঽস্মি-ন্রা॒ষ্ট্রে রা॑জ॒ন্য়॑ ইষ॒ব্য়॑-শ্শূরো॑ মহার॒থো জা॑যতা॒-ন্দোগ্ধ্রী॑ধে॒নুর্বোঢা॑ ঽন॒ড্বানা॒শু-স্সপ্তিঃ॒ পুর॑ন্ধি॒র্য়োষা॑ জি॒ষ্ণূ র॑থে॒ষ্ঠা-স্স॒ভেয়ো॒ যুবা ঽঽস্য় যজ॑মানস্য় বী॒রো জা॑যতা-ন্নিকা॒মেনি॑কামে নঃ প॒র্জন্য়ো॑ বর্​ষতু ফ॒লিন্য়ো॑ ন॒ ওষ॑ধয়ঃ পচ্যন্তাং-য়োঁগক্ষে॒মোনঃ॑ কল্পতাম্ ॥ 44 ॥
(আ ব্রহ্ম॒ - ন্নেক॑চত্বারিগ্​ম্শত্ )(আ18)

আ-ঽক্রান্॑ বা॒জী পৃ॑থি॒বীম॒গ্নিং-য়ুঁজ॑মকৃত বা॒জ্যর্বা ঽঽক্রান্॑ বা॒জ্য়॑ন্তরি॑ক্ষং-বাঁ॒য়ুং-য়ুঁজ॑মকৃত বা॒জ্যর্বা॒ দ্য়াং-বাঁ॒জ্য়া-ঽক্রগ্গ্॑স্ত॒ সূর্য়ং॒-য়ুঁজ॑মকৃত বা॒জ্যর্বা॒ ঽগ্নিস্তে॑ বাজি॒ন্॒ যুঙ্ঙনু॒ ত্বা ঽঽ র॑ভে স্ব॒স্তি মা॒ স-ম্পা॑রয় বা॒য়ুস্তে॑ বাজি॒ন্॒ যুঙ্ঙনু॒ ত্বা ঽঽ র॑ভে স্ব॒স্তি মা॒ স- [স্ব॒স্তি মা॒ সম্, পা॒র॒য়া॒ ঽঽদি॒ত্যস্তে॑] 45

-ম্পা॑রয়া ঽঽদি॒ত্যস্তে॑ বাজি॒ন্॒ যুঙ্ঙনু॒ ত্বা ঽঽ র॑ভে স্ব॒স্তি মা॒ স-ম্পা॑রয় প্রাণ॒ধৃগ॑সি প্রা॒ণ-ম্মে॑ দৃগ্​ম্হ ব্য়ান॒ধৃগ॑সি ব্য়া॒ন-ম্মে॑ দৃগ্​ম্হা ঽপান॒ধৃগ॑স্যপা॒ন-ম্ম॑ দৃগ্​ম্হ॒ চক্ষু॑রসি॒ চক্ষু॒র্ময়ি॑ ধেহি॒ শ্রোত্র॑মসি॒ শ্রোত্র॒-ম্ময়ি॑ ধে॒হ্য়ায়ু॑র॒স্য়ায়ু॒র্ময়ি॑ ধেহি ॥ 46 ॥
(বা॒য়ুস্তে॑ বাজি॒ন্॒ যুঙ্ঙনু॒ ত্বা ঽঽ র॑ভে স্ব॒স্তি মা॒ সং - ত্রিচ॑ত্বারিগ্​ম্শচ্চ) (অ. 19)

জজ্ঞি॒ বীজং॒-বঁর্​ষ্টা॑ প॒র্জন্য়ঃ॒ পক্তা॑ স॒স্য়গ্​ম্ সু॑পিপ্প॒লা ওষ॑ধয়-স্স্বধিচর॒ণেয়গ্​ম্ সূ॑পসদ॒নো᳚-ঽগ্নি-স্স্ব॑দ্ধ্য়॒ক্ষম॒ন্তরি॑ক্ষগ্​ম্সুপা॒বঃ পব॑মান-স্সূপস্থা॒না দ্য়ৌ-শ্শি॒বম॒সৌ তপ॑ন্ যথাপূ॒র্বম॑হোরা॒ত্রে প॑ঞ্চদ॒শিনো᳚ ঽর্ধমা॒সা-স্ত্রি॒গ্​ম্॒শিনো॒ মাসাঃ᳚ কৢ॒প্তা ঋ॒তব॑-শ্শা॒ন্ত-স্সং॑​বঁথ্স॒রঃ ॥ 47 ॥
(জজ্ঞি॒ বীজ॒ - মেক॑ত্রিগ্​ম্শত্) (অ. 20)

আ॒গ্নে॒য়ো᳚-ঽষ্টাক॑পাল-স্সৌ॒ম্যশ্চ॒রু-স্সা॑বি॒ত্রো᳚-ঽষ্টাক॑পালঃ পৌ॒ষ্ণশ্চ॒রূ রৌ॒দ্রশ্চ॒রুর॒গ্নয়ে॑ বৈশ্বান॒রায়॒ দ্বাদ॑শকপালো মৃগাখ॒রে যদি॒ না-ঽঽগচ্ছে॑-দ॒গ্নয়ে-ঽগ্​ম্॑হো॒মুচে॒-ঽষ্টাক॑পাল-স্সৌ॒র্য়-ম্পয়ো॑ বায়॒ব্য়॑ আজ্য়॑ভাগঃ ॥ 48 ॥
(আ॒গ্নে॒য় - শ্চতু॑র্বিগ্​ম্শতিঃ) (অ. 21)

অ॒গ্নয়ে-ঽগ্​ম্॑হো॒মুচে॒-ঽষ্টাক॑পাল॒ ইন্দ্রা॑য়া-ঽগ্​ম্হো॒মুচ॒ একা॑দশকপালো মি॒ত্রাবরু॑ণাভ্য়া-মাগো॒মুগ্ভ্য়া᳚-ম্পয়॒স্য়া॑ বায়োসাবি॒ত্র আ॑গো॒মুগ্ভ্য়া᳚-ঞ্চ॒রুর॒শ্বিভ্য়া॑-মাগো॒মুগ্ভ্য়া᳚-ন্ধা॒না ম॒রুদ্ভ্য়॑ এনো॒মুগ্ভ্য়॑-স্স॒প্তক॑পালো॒ বিশ্বে᳚ভ্য়ো দে॒বেভ্য়॑ এনো॒মুগ্ভ্য়ো॒ দ্বাদ॑শকপা॒লো ঽনু॑মত্য়ৈ চ॒রুর॒গ্নয়ে॑ বৈশ্বান॒রায়॒ দ্বাদ॑শকপালো॒ দ্য়াবা॑পৃথি॒বীভ্য়া॑-মগ্​ম্হো॒মুগ্ভ্য়া᳚-ন্দ্বিকপা॒লঃ ॥ 49 ॥
(অ॒গ্নয়ে-ঽগ্​ম্॑হো॒মুচে᳚ - ত্রি॒গ্​ম্॒শত্) (অ. 22)

অ॒গ্নয়ে॒ সম॑নম-ত্পৃথি॒ব্য়ৈ সম॑নম॒দ্যথা॒-ঽগ্নিঃ পৃ॑থি॒ব্য়া স॒মন॑মদে॒ব-ম্মহ্য়॑-ম্ভ॒দ্রা-স্সন্ন॑তয়॒-স্স-ন্ন॑মন্তু বা॒যবে॒ সম॑নমদ॒ন্তরি॑ক্ষায়॒ সম॑নম॒দ্যথা॑ বা॒য়ুর॒ন্তরি॑ক্ষেণ॒ সূর্য়া॑য়॒ সম॑নমদ্দি॒বে সম॑নম॒দ্যথা॒ সূর্য়ো॑ দি॒বা চ॒ন্দ্রম॑সে॒ সম॑নম॒ন্নক্ষ॑ত্রেভ্য়॒-স্সম॑নম॒দ্যথা॑ চ॒ন্দ্রমা॒ নক্ষ॑ত্রৈ॒র্বরু॑ণায়॒ সম॑নমদ॒দ্ভ্য়-স্সম॑নম॒-দ্যথা॒ [-স্সম॑নম॒-দ্যথা᳚, বরু॑ণো॒-ঽদ্ভি-স্সাম্নে॒] 50

বরু॑ণো॒-ঽদ্ভি-স্সাম্নে॒ সম॑নমদৃ॒চে সম॑নম॒দ্যথা॒ সাম॒র্চা ব্রহ্ম॑ণে॒ সম॑নম-ত্ক্ষ॒ত্রায়॒ সম॑নম॒দ্যথা॒ ব্রহ্ম॑ ক্ষ॒ত্রেণ॒ রাজ্ঞে॒ সম॑নম-দ্বি॒শে সম॑নম॒দ্যথা॒ রাজা॑ বি॒শা রথা॑য়॒-স্সম॑নম॒দশ্বে᳚ভ্য়॒-স্সম॑নম॒দ্যথা॒ রথো-ঽশ্বৈঃ᳚ প্র॒জাপ॑তয়ে॒ সম॑নম-দ্ভূ॒তেভ্য়॒-স্সম॑নম॒দ্যথা᳚ প্র॒জাপ॑তির্ভূ॒তৈ-স্স॒মন॑মদে॒ব-ম্মহ্য়॑-ম্ভ॒দ্রা-স্সন্ন॑তয়॒-স্স-ন্ন॑মন্তু ॥ 51 ॥
(অ॒দ্ভ্য়-স্সম॑নম॒দ্যথা॒-মহ্য়ং॑-চ॒ত্বারি॑ চ) (অ. 23)

যে তে॒ পন্থা॑ন-স্সবিতঃ পূ॒র্ব্য়াসো॑-ঽরে॒ণবো॒ বিত॑তা অ॒ন্তরি॑ক্ষে । তেভি॑র্নো অ॒দ্য় প॒থিভি॑-স্সু॒গেভী॒ রক্ষা॑ চ নো॒ অধি॑ চ দেব ব্রূহি ॥ নমো॒-ঽগ্নয়ে॑ পৃথিবি॒ক্ষিতে॑ লোক॒স্পৃতে॑ লো॒কম॒স্মৈ যজ॑মানায় দেহি॒ নমো॑ বা॒যবে᳚-ঽন্তরিক্ষ॒ক্ষিতে॑ লোক॒স্পৃতে॑ লো॒কম॒স্মৈ যজ॑মানায় দেহি॒ নম॒-স্সূর্য়া॑য় দিবি॒ক্ষিতে॑ লোক॒স্পৃতে॑ লো॒কম॒স্মৈ যজ॑মানায় দেহি ॥ 52 ॥
(য়ে তে॒ - চতু॑শ্চত্বারিগ্​ম্শত্) (অ. 24)

যো বা অশ্ব॑স্য়॒ মেদ্ধ্য়॑স্য়॒ শিরো॒ বেদ॑ শীর্​ষ॒ণ্বা-ন্মেদ্ধ্য়ো॑ ভবত্য়ু॒ষা বা অশ্ব॑স্য়॒ মেদ্ধ্য়॑স্য়॒ শির॒-স্সূর্য়॒শ্চক্ষু॒র্বাতঃ॑ প্রা॒ণশ্চ॒ন্দ্রমা॒-শ্শ্রোত্র॒-ন্দিশঃ॒ পাদা॑ অবান্তরদি॒শাঃ পর্​শ॑বো-ঽহোরা॒ত্রে নি॑মে॒ষো᳚-ঽর্ধমা॒সাঃ পর্বা॑ণি॒ মাসা᳚-স্স॒ধান্না᳚ন্য়ৃ॒তবো-ঽঙ্গা॑নি সং​বঁথ্স॒র আ॒ত্মা র॒শ্ময়ঃ॒ কেশা॒ নক্ষ॑ত্রাণি রূ॒প-ন্তার॑কা অ॒স্থানি॒ নভো॑ মা॒গ্​ম্॒সান্য়োষ॑ধয়ো॒ লোমা॑নি॒ বন॒স্পত॑য়ো॒ বালা॑ অ॒গ্নির্মুখং॑-বৈঁশ্বান॒রো ব্য়াত্তগ্​ম্॑ [ব্য়াত্ত᳚ম্, স॒মু॒দ্র উ॒দর॑ম॒ন্তরি॑ক্ষ-] 53

সমু॒দ্র উ॒দর॑ম॒ন্তরি॑ক্ষ-ম্পা॒য়ু-র্দ্য়াবা॑পৃথি॒বী আ॒ণ্ডৌ গ্রাবা॒ শেপ॒-স্সোমো॒ রেতো॒ যজ্জ॑ঞ্জ॒ভ্যতে॒ তদ্বি দ্য়ো॑ততে॒ যদ্বি॑ধূনু॒তে ত-থ্স্ত॑নযতি॒ যন্মেহ॑তি॒ তদ্ব॑র্​ষতি॒ বাগে॒বাস্য়॒ বাগহ॒র্বা অশ্ব॑স্য়॒ জায়॑মানস্য় মহি॒মা পু॒রস্তা᳚জ্জাযতে॒ রাত্রি॑রেন-ম্মহি॒মা প॒শ্চাদনু॑ জাযত এ॒তৌ বৈ ম॑হি॒মানা॒-বশ্ব॑ম॒ভিত॒-স্স-ম্ব॑ভূবতু॒র্॒হয়ো॑ দে॒বান॑বহ॒ দর্বা-ঽসু॑রান্ বা॒জী গ॑ন্ধ॒র্বা-নশ্বো॑ মনু॒ষ্য়া᳚ন্-থ্সমু॒দ্রো বা অশ্ব॑স্য়॒ যোনি॑-স্সমু॒দ্রো বন্ধুঃ॑ ॥ 54 ॥
(ব্য়াত্ত॑ - মবহ॒-দ্- দ্বাদ॑শ চ ) (অ. 25)

(গাবো॒ - গাব॒-স্সিষা॑সন্তীঃ- প্রথ॒মে মা॒সি - স॑মা॒ন্য়ো॑ - যদি॒ সোমৌ॑- ষড॒হৈ - রু॒-থ্সৃজ্য়া(3)ন্ - দে॒বানা॑ - ম॒র্ক্য়ে॑ণ॒ - চর্মা-ঽব॑ - পৃথি॒ব্য়ৈ - দ॒ত্বতে॒ - কস্ত্বা॒ - ঽগ্নয়ে॒ - যো বৈ - যঃ প্রা॑ণ॒তো - য আ᳚ত্ম॒দা - আ ব্রহ্ম॒ - ন্না-ঽক্রা॒ন্ - জজ্ঞি॒ বীজ॑ - মাগ্নে॒য়ো᳚-ঽষ্টাক॑পালো॒ - ঽগ্নয়ে-ঽগ্​ম্॑হো॒মুচে॒-ঽষ্টাক॑পালো॒ - ঽগ্নয়ে॒সম॑নম॒--দ্য়ে তে॒ পন্থা॑নো॒ - যো বা অশ্ব॑স্য়॒মেদ্ধ্য়॑স্য়॒ শিরঃ॒ - পঞ্চ॑বিগ্​ম্শতিঃ)

(গাবঃ॑ - সমা॒ন্য়ঃ॑ - সব॑নমষ্টা॒ভি - র্বা এ॒তে দে॒বকৃ॑তঞ্চা - ঽভি॒জিত্য়া॒ ইত্য়া॑হু॒ -র্বরু॑ণো॒-ঽদ্ভি-স্সাম্নে॒ - চতু॑ষ্ পঞ্চা॒সত্)

(গাবো॒, যোনি॑ স্সমু॒দ্রো বন্ধুঃ॑)

(প্র॒জনন॑গ্​ম্ - সাদ্য়াঃ - প্র॒জবং॒ - বৃহ॒স্পতি॒ - র্গাবঃ - পঞ্চ॑) (7)

(ই॒ষে, বা॑য়॒ব্য়॑, ম্প্র॒জাপ॑তি, র্য়ুঞ্জা॒না, স্সা॑বি॒ত্রাণি॑, প্রাচীন॑বগ্​ম্শ, ম্প্র॒জন॑নগ্​ম্, সপ্ত) (7)

॥ হরিঃ॑ ওম্ ॥

॥ কৃষ্ণ যজুর্বেদীয় তৈত্তিরীয় সংহিতায়াং সপ্তমকাণ্ডে পঞ্চমঃ প্রশ্ন-স্সমাপ্তঃ ॥

॥ ইতি তৈত্তিরীযসংহিতা সমাপ্তা ॥