భగవతి భవలీలామౌళిమాలే తవామ్భః
కణమణుపరిమాణం ప్రాణినో యే స్పృశన్తి ।
అమరనగరనారీచామరగ్రాహిణీనాం
విగతకలికలఙ్కాతఙ్కమఙ్కే లుఠన్తి ॥ 1 ॥

బ్రహ్మాణ్డం ఖణ్డయన్తీ హరశిరసి జటావల్లిముల్లాసయన్తీ
స్వర్లోకాదాపతన్తీ కనకగిరిగుహాగణ్డశైలాత్ స్ఖలన్తీ ।
క్షోణీపృష్టే లుఠన్తీ దురితచయచమూర్నిర్భరం భర్త్సయన్తీ
పాథోధిం పూరయన్తీ సురనగరసరిత్పావనీ నః పునాతు ॥ 2 ॥

మజ్జన్మాతఙ్గకుమ్భచ్యుతమదమదిరామోదమత్తాలిజాలం
స్నానైః సిద్ధాఙ్గనానాం కుచయుగవిగలత్కుఙ్కుమాసఙ్గపిఙ్గమ్ ।
సాయం ప్రాతర్మునీనాం కుశకుసుమచయైశ్ఛిన్నతీరస్థనీరం
పాయాన్నో గాఙ్గమమ్భః కరికరమకరాక్రాన్తరహస్తరఙ్గమ్ ॥ 3 ॥

ఆదావాదిపితామహస్య నియమవ్యాపారపాత్రే జలం
పశ్చాత్పన్నగశాయినో భగవతః పాదోదకం పావనమ్ ।
భూయః శమ్భుజటావిభూషణమణిర్జహ్నోర్మహర్షేరియం
కన్యా కల్మషనాశినీ భగవతీ భాగీరథీ పాతు మామ్ ॥ 4 ॥

శైలేన్ద్రాదవతారిణీ నిజజలే మజ్జజ్జనోత్తారిణీ
పారావారవిహారిణీ భవభయశ్రేణీసముత్సారిణీ ।
శేషాఙ్గైరనుకారిణీ హరశిరోవల్లీదళాకారిణీ
కాశీప్రాన్తవిహారిణీ విజయతే గఙ్గా మనోహారిణీ ॥ 5 ॥

కుతో వీచీ వీచిస్తవ యది గతా లోచనపథం
త్వమాపీతా పీతామ్బరపురవాసం వితరసి ।
త్వదుత్సఙ్గే గఙ్గే పతతి యది కాయస్తనుభృతాం
తదా మాతః శాన్తక్రతవపదలాభోఽప్యతిలఘుః ॥ 6 ॥

భగవతి తవ తీరే నీరమాత్రాశనోఽహం
విగతవిషయతృష్ణః కృష్ణమారాధయామి ।
సకలకలుషభఙ్గే స్వర్గసోపానసఙ్గే
తరలతరతరఙ్గే దేవి గఙ్గే ప్రసీద ॥ 7 ॥

మాతర్జాహ్నవి శమ్భుసఙ్గమిలితే మౌళౌ నిధాయాఞ్జలిం
త్వత్తీరే వపుషోఽవసానసమయే నారాయణాఙ్ఘ్రిద్వయమ్ ।
సానన్దం స్మరతో భవిష్యతి మమ ప్రాణప్రయాణోత్సవే
భూయాద్భక్తిరవిచ్యుతా హరిహరాద్వైతాత్మికా శాశ్వతీ ॥ 8 ॥

గఙ్గాష్టకమిదం పుణ్యం యః పఠేత్ప్రయతో నరః ।
సర్వపాపవినిర్ముక్తో విష్ణులోకం స గచ్ఛతి ॥ 9 ॥

ఇతి శ్రీమత్పరమహంసపరివ్రాజకాచార్యస్య శ్రీగోవిన్దభగవత్పూజ్యపాదశిష్యస్య శ్రీమచ్ఛఙ్కరభగవతః కృతౌ గఙ్గాష్టకం సమ్పూర్ణమ్ ।