షడాధారపఙ్కేరుహాన్తర్విరాజ-
-త్సుషుమ్నాన్తరాలేఽతితేజోల్లసన్తీమ్ ।
సుధామణ్డలం ద్రావయన్తీం పిబన్తీం
సుధామూర్తిమీడే చిదానన్దరూపామ్ ॥ 1 ॥
జ్వలత్కోటిబాలార్కభాసారుణాఙ్గీం
సులావణ్యశృఙ్గారశోభాభిరామామ్ ।
మహాపద్మకిఞ్జల్కమధ్యే విరాజ-
-త్త్రికోణే నిషణ్ణాం భజే శ్రీభవానీమ్ ॥ 2 ॥
క్వణత్కిఙ్కిణీనూపురోద్భాసిరత్న-
-ప్రభాలీఢలాక్షార్ద్రపాదాబ్జయుగ్మమ్ ।
అజేశాచ్యుతాద్యైః సురైః సేవ్యమానం
మహాదేవి మన్మూర్ధ్ని తే భావయామి ॥ 3 ॥
సుశోణామ్బరాబద్ధనీవీవిరాజ-
-న్మహారత్నకాఞ్చీకలాపం నితమ్బమ్ ।
స్ఫురద్దక్షిణావర్తనాభిం చ తిస్రో
వలీరమ్బ తే రోమరాజిం భజేఽహమ్ ॥ 4 ॥
లసద్వృత్తముత్తుఙ్గమాణిక్యకుమ్భో-
-పమశ్రి స్తనద్వన్ద్వమమ్బామ్బుజాక్షి ।
భజే దుగ్ధపూర్ణాభిరామం తవేదం
మహాహారదీప్తం సదా ప్రస్నుతాస్యమ్ ॥ 5 ॥
శిరీషప్రసూనోల్లసద్బాహుదణ్డై-
-ర్జ్వలద్బాణకోదణ్డపాశాఙ్కుశైశ్చ ।
చలత్కఙ్కణోదారకేయూరభూషో-
-జ్జ్వలద్భిర్లసన్తీం భజే శ్రీభవానీమ్ ॥ 6 ॥
శరత్పూర్ణచన్ద్రప్రభాపూర్ణబిమ్బా-
-ధరస్మేరవక్త్రారవిన్దాం సుశాన్తామ్ ।
సురత్నావళీహారతాటఙ్కశోభాం
మహాసుప్రసన్నాం భజే శ్రీభవానీమ్ ॥ 7 ॥
సునాసాపుటం సున్దరభ్రూలలాటం
తవౌష్ఠశ్రియం దానదక్షం కటాక్షమ్ ।
లలాటే లసద్గన్ధకస్తూరిభూషం
స్ఫురచ్ఛ్రీముఖామ్భోజమీడేఽహమమ్బ ॥ 8 ॥
చలత్కున్తలాన్తర్భ్రమద్భృఙ్గబృన్దం
ఘనస్నిగ్ధధమ్మిల్లభూషోజ్జ్వలం తే ।
స్ఫురన్మౌళిమాణిక్యబద్ధేన్దురేఖా-
-విలాసోల్లసద్దివ్యమూర్ధానమీడే ॥ 9 ॥
ఇతి శ్రీభవాని స్వరూపం తవేదం
ప్రపఞ్చాత్పరం చాతిసూక్ష్మం ప్రసన్నమ్ ।
స్ఫురత్వమ్బ డిమ్భస్య మే హృత్సరోజే
సదా వాఙ్మయం సర్వతేజోమయం చ ॥ 10 ॥
గణేశాభిముఖ్యాఖిలైః శక్తిబృన్దై-
-ర్వృతాం వై స్ఫురచ్చక్రరాజోల్లసన్తీమ్ ।
పరాం రాజరాజేశ్వరి త్రైపురి త్వాం
శివాఙ్కోపరిస్థాం శివాం భావయామి ॥ 11 ॥
త్వమర్కస్త్వమిన్దుస్త్వమగ్నిస్త్వమాప-
-స్త్వమాకాశభూవాయవస్త్వం మహత్త్వమ్ ।
త్వదన్యో న కశ్చిత్ ప్రపఞ్చోఽస్తి సర్వం
సదానన్దసంవిత్స్వరూపం భజేఽహమ్ ॥ 12 ॥
శ్రుతీనామగమ్యే సువేదాగమజ్ఞా
మహిమ్నో న జానన్తి పారం తవామ్బ ।
స్తుతిం కర్తుమిచ్ఛామి తే త్వం భవాని
క్షమస్వేదమత్ర ప్రముగ్ధః కిలాహమ్ ॥ 13 ॥
గురుస్త్వం శివస్త్వం చ శక్తిస్త్వమేవ
త్వమేవాసి మాతా పితా చ త్వమేవ ।
త్వమేవాసి విద్యా త్వమేవాసి బన్ధు-
-ర్గతిర్మే మతిర్దేవి సర్వం త్వమేవ ॥ 14 ॥
శరణ్యే వరేణ్యే సుకారుణ్యమూర్తే
హిరణ్యోదరాద్యైరగణ్యే సుపుణ్యే ।
భవారణ్యభీతేశ్చ మాం పాహి భద్రే
నమస్తే నమస్తే నమస్తే భవాని ॥ 15 ॥
ఇతీమాం మహచ్ఛ్రీభవానీభుజఙ్గం
స్తుతిం యః పఠేద్భక్తియుక్తశ్చ తస్మై ।
స్వకీయం పదం శాశ్వతం వేదసారం
శ్రియం చాష్టసిద్ధిం భవానీ దదాతి ॥ 16 ॥
భవానీ భవానీ భవానీ త్రివారం
ఉదారం ముదా సర్వదా యే జపన్తి ।
న శోకం న మోహం న పాపం న భీతిః
కదాచిత్కథఞ్చిత్కుతశ్చిజ్జనానామ్ ॥ 17 ॥
॥ ఇతి శ్రీమచ్ఛఙ్కరాచార్యవిరచితా భవానీ భుజఙ్గం సమ్పూర్ణమ్ ॥
