కల్లోలోల్లసితామృతాబ్ధిలహరీమధ్యే విరాజన్మణి-
-ద్వీపే కల్పకవాటికాపరివృతే కాదమ్బవాట్యుజ్జ్వలే ।
రత్నస్తమ్భసహస్రనిర్మితసభామధ్యే విమానోత్తమే
చిన్తారత్నవినిర్మితం జనని తే సింహాసనం భావయే ॥ 1 ॥
ఏణాఙ్కానలభానుమణ్డలలసచ్ఛ్రీచక్రమధ్యే స్థితాం
బాలార్కద్యుతిభాసురాం కరతలైః పాశాఙ్కుశౌ బిభ్రతీమ్ ।
చాపం బాణమపి ప్రసన్నవదనాం కౌసుమ్భవస్త్రాన్వితాం
తాం త్వాం చన్ద్రకళావతంసమకుటాం చారుస్మితాం భావయే ॥ 2 ॥
ఈశానాదిపదం శివైకఫలదం రత్నాసనం తే శుభం
పాద్యం కుఙ్కుమచన్దనాదిభరితైరర్ఘ్యం సరత్నాక్షతైః ।
శుద్ధైరాచమనీయకం తవ జలైర్భక్త్యా మయా కల్పితం
కారుణ్యామృతవారిధే తదఖిలం సన్తుష్టయే కల్పతామ్ ॥ 3 ॥
లక్ష్యే యోగిజనస్య రక్షితజగజ్జాలే విశాలేక్షణే
ప్రాలేయామ్బుపటీరకుఙ్కుమలసత్కర్పూరమిశ్రోదకైః ।
గోక్షీరైరపి నారికేలసలిలైః శుద్ధోదకైర్మన్త్రితైః
స్నానం దేవి ధియా మయైతదఖిలం సన్తుష్టయే కల్పతామ్ ॥ 4 ॥
హ్రీం‍కారాఙ్కితమన్త్రలక్షితతనో హేమాచలాత్సఞ్చితైః
రత్నైరుజ్జ్వలముత్తరీయసహితం కౌసుమ్భవర్ణాంశుకమ్ ।
ముక్తాసన్తతియజ్ఞసూత్రమమలం సౌవర్ణతన్తూద్భవం
దత్తం దేవి ధియా మయైతదఖిలం సన్తుష్టయే కల్పతామ్ ॥ 5 ॥
హంసైరప్యతిలోభనీయగమనే హారావలీముజ్జ్వలాం
హిన్దోలద్యుతిహీరపూరితతరే హేమాఙ్గదే కఙ్కణే ।
మఞ్జీరౌ మణికుణ్డలే మకుటమప్యర్ధేన్దుచూడామణిం
నాసామౌక్తికమఙ్గులీయకటకౌ కాఞ్చీమపి స్వీకురు ॥ 6 ॥
సర్వాఙ్గే ఘనసారకుఙ్కుమఘనశ్రీగన్ధపఙ్కాఙ్కితం
కస్తూరీతిలకం చ ఫాలఫలకే గోరోచనాపత్రకమ్ ।
గణ్డాదర్శనమణ్డలే నయనయోర్దివ్యాఞ్జనం తేఽఞ్చితం
కణ్ఠాబ్జే మృగనాభిపఙ్కమమలం త్వత్ప్రీతయే కల్పతామ్ ॥ 7 ॥
కహ్లారోత్పలమల్లికామరువకైః సౌవర్ణపఙ్కేరుహై-
-ర్జాతీచమ్పకమాలతీవకులకైర్మన్దారకున్దాదిభిః ।
కేతక్యా కరవీరకైర్బహువిధైః క్లుప్తాః స్రజో మాలికాః
సఙ్కల్పేన సమర్పయామి వరదే సన్తుష్టయే గృహ్యతామ్ ॥ 8 ॥
హన్తారం మదనస్య నన్దయసి యైరఙ్గైరనఙ్గోజ్జ్వలై-
-ర్యైర్భృఙ్గావలినీలకున్తలభరైర్బధ్నాసి తస్యాశయమ్ ।
తానీమాని తవామ్బ కోమలతరాణ్యామోదలీలాగృహా-
-ణ్యామోదాయ దశాఙ్గగుగ్గులుఘృతైర్ధూపైరహం ధూపయే ॥ 9 ॥
లక్ష్మీముజ్జ్వలయామి రత్ననివహోద్భాస్వత్తరే మన్దిరే
మాలారూపవిలమ్బితైర్మణిమయస్తమ్భేషు సమ్భావితైః ।
చిత్రైర్హాటకపుత్రికాకరధృతైర్గవ్యైర్ఘృతైర్వర్ధితై-
-ర్దివ్యైర్దీపగణైర్ధియా గిరిసుతే సన్తుష్టయే కల్పతామ్ ॥ 10 ॥
హ్రీం‍కారేశ్వరి తప్తహాటకకృతైః స్థాలీసహస్రైర్భృతం
దివ్యాన్నం ఘృతసూపశాకభరితం చిత్రాన్నభేదం తథా ।
దుగ్ధాన్నం మధుశర్కరాదధియుతం మాణిక్యపాత్రే స్థితం
మాషాపూపసహస్రమమ్బ సఫలం నైవేద్యమావేదయే ॥ 11 ॥
సచ్ఛాయైర్వరకేతకీదలరుచా తామ్బూలవల్లీదలైః
పూగైర్భూరిగుణైః సుగన్ధిమధురైః కర్పూరఖణ్డోజ్జ్వలైః ।
ముక్తాచూర్ణవిరాజితైర్బహువిధైర్వక్త్రామ్బుజామోదనైః
పూర్ణా రత్నకలాచికా తవ ముదే న్యస్తా పురస్తాదుమే ॥ 12 ॥
కన్యాభిః కమనీయకాన్తిభిరలఙ్కారామలారార్తికా
పాత్రే మౌక్తికచిత్రపఙ్క్తివిలసత్కర్పూరదీపాలిభిః ।
తత్తత్తాలమృదఙ్గగీతసహితం నృత్యత్పదామ్భోరుహం
మన్త్రారాధనపూర్వకం సువిహితం నీరాజనం గృహ్యతామ్ ॥ 13 ॥
లక్ష్మీర్మౌక్తికలక్షకల్పితసితచ్ఛత్త్రం తు ధత్తే రసా-
-దిన్ద్రాణీ చ రతిశ్చ చామరవరే ధత్తే స్వయం భారతీ ।
వీణామేణవిలోచనాః సుమనసాం నృత్యన్తి తద్రాగవ-
-ద్భావైరాఙ్గికసాత్త్వికైః స్ఫుటరసం మాతస్తదాకర్ణ్యతామ్ ॥ 14 ॥
హ్రీం‍కారత్రయసమ్పుటేన మనునోపాస్యే త్రయీమౌలిభి-
-ర్వాక్యైర్లక్ష్యతనో తవ స్తుతివిధౌ కో వా క్షమేతామ్బికే ।
సల్లాపాః స్తుతయః ప్రదక్షిణశతం సఞ్చార ఏవాస్తు తే
సంవేశో నమసః సహస్రమఖిలం త్వత్ప్రీతయే కల్పతామ్ ॥ 15 ॥
శ్రీమన్త్రాక్షరమాలయా గిరిసుతాం యః పూజయేచ్చేతసా
సన్ధ్యాసు ప్రతివాసరం సునియతస్తస్యామలం స్యాన్మనః ।
చిత్తామ్భోరుహమణ్టపే గిరిసుతా నృత్తం విధత్తే రసా-
-ద్వాణీ వక్త్రసరోరుహే జలధిజా గేహే జగన్మఙ్గళా ॥ 16 ॥
ఇతి గిరివరపుత్రీపాదరాజీవభూషా
భువనమమలయన్తీ సూక్తిసౌరభ్యసారైః ।
శివపదమకరన్దస్యన్దినీయం నిబద్ధా
మదయతు కవిభృఙ్గాన్మాతృకాపుష్పమాలా ॥ 17 ॥
ఇతి శ్రీమత్పరమహంసపరివ్రాజకాచార్యస్య శ్రీగోవిన్దభగవత్పూజ్యపాదశిష్యస్య శ్రీమచ్ఛఙ్కరభగవతః కృతౌ మన్త్రమాతృకాపుష్పమాలా స్తవః ।
