విశ్వామిత్రతపఃఫలాం ప్రియతరాం విప్రాలిసంసేవితాం
నిత్యానిత్యవివేకదాం స్మితముఖీం ఖణ్డేన్దుభూషోజ్జ్వలామ్ ।
తామ్బూలారుణభాసమానవదనాం మార్తాణ్డమధ్యస్థితాం
గాయత్రీం హరివల్లభాం త్రిణయనాం ధ్యాయామి పఞ్చాననామ్ ॥ 1 ॥
జాతీపఙ్కజకేతకీకువలయైః సమ్పూజితాఙ్ఘ్రిద్వయాం
తత్త్వార్థాత్మికవర్ణపఙ్క్తిసహితాం తత్త్వార్థబుద్ధిప్రదామ్ ।
ప్రాణాయామపరాయణైర్బుధజనైః సంసేవ్యమానాం శివాం
గాయత్రీం హరివల్లభాం త్రిణయనాం ధ్యాయామి పఞ్చాననామ్ ॥ 2 ॥
మఞ్జీరధ్వనిభిః సమస్తజగతాం మఞ్జుత్వసంవర్ధనీం
విప్రప్రేఙ్ఖితవారివారితమహారక్షోగణాం మృణ్మయీమ్ ।
జప్తుః పాపహరాం జపాసుమనిభాం హంసేన సంశోభితాం
గాయత్రీం హరివల్లభాం త్రిణయనాం ధ్యాయామి పఞ్చాననామ్ ॥ 3 ॥
కాఞ్చీచేలవిభూషితాం శివమయీం మాలార్ధమాలాదికా-
-న్బిభ్రాణాం పరమేశ్వరీం శరణదాం మోహాన్ధబుద్ధిచ్ఛిదామ్ ।
భూరాదిత్రిపురాం త్రిలోకజననీమధ్యాత్మశాఖానుతాం
గాయత్రీం హరివల్లభాం త్రిణయనాం ధ్యాయామి పఞ్చాననామ్ ॥ 4 ॥
ధ్యాతుర్గర్భకృశానుతాపహరణాం సామాత్మికాం సామగాం
సాయఙ్కాలసుసేవితాం స్వరమయీం దూర్వాదలశ్యామలామ్ ।
మాతుర్దాస్యవిలోచనైకమతిమత్ఖేటీన్ద్రసంరాజితాం
గాయత్రీం హరివల్లభాం త్రిణయనాం ధ్యాయామి పఞ్చాననామ్ ॥ 5 ॥
సన్ధ్యారాగవిచిత్రవస్త్రవిలసద్విప్రోత్తమైః సేవితాం
తారాహారసుమాలికాం సువిలసద్రత్నేన్దుకుమ్భాన్తరామ్ ।
రాకాచన్ద్రముఖీం రమాపతినుతాం శఙ్ఖాదిభాస్వత్కరాం
గాయత్రీం హరివల్లభాం త్రిణయనాం ధ్యాయామి పఞ్చాననామ్ ॥ 6 ॥
వేణీభూషితమాలకధ్వనికరైర్భృఙ్గైః సదా శోభితాం
తత్త్వజ్ఞానరసాయనజ్ఞరసనాసౌధభ్రమద్భ్రామరీమ్ ।
నాసాలఙ్కృతమౌక్తికేన్దుకిరణైః సాయన్తమశ్ఛేదినీం
గాయత్రీం హరివల్లభాం త్రిణయనాం ధ్యాయామి పఞ్చాననామ్ ॥ 7 ॥
పాదాబ్జాన్తరరేణుకుఙ్కుమలసత్ఫాలద్యురామావృతాం
రమ్భానాట్యవిలోకనైకరసికాం వేదాన్తబుద్ధిప్రదామ్ ।
వీణావేణుమృదఙ్గకాహలరవాన్ దేవైః కృతాఞ్ఛృణ్వతీం
గాయత్రీం హరివల్లభాం త్రిణయనాం ధ్యాయామి పఞ్చాననామ్ ॥ 8 ॥
హత్యాపానసువర్ణతస్కరమహాగుర్వఙ్గనాసఙ్గమా-
-న్దోషాఞ్ఛైలసమాన్ పురన్దరసమాః సఞ్చ్ఛిద్య సూర్యోపమాః ।
గాయత్రీం శ్రుతిమాతురేకమనసా సన్ధ్యాసు యే భూసురా
జప్త్వా యాన్తి పరాం గతిం మనుమిమం దేవ్యాః పరం వైదికాః ॥ 9 ॥
ఇతి శ్రీమచ్ఛఙ్కరాచార్య విరచితం శ్రీ గాయత్ర్యష్టకమ్ ।
