విరిఞ్చ్యాదిభిః పఞ్చభిర్లోకపాలైః
సమూఢే మహానన్దపీఠే నిషణ్ణమ్ ।
ధనుర్బాణపాశాఙ్కుశప్రోతహస్తం
మహస్త్రైపురం శఙ్కరాద్వైతమవ్యాత్ ॥ 1 ॥
యదన్నాదిభిః పఞ్చభిః కోశజాలైః
శిరఃపక్షపుచ్ఛాత్మకైరన్తరన్తః ।
నిగూఢే మహాయోగపీఠే నిషణ్ణం
పురారేరథాన్తఃపురం నౌమి నిత్యమ్ ॥ 2 ॥
విరిఞ్చాదిరూపైః ప్రపఞ్చే విహృత్య
స్వతన్త్రా యదా స్వాత్మవిశ్రాన్తిరేషా ।
తదా మానమాతృప్రమేయాతిరిక్తం
పరానన్దమీడే భవాని త్వదీయమ్ ॥ 3 ॥
వినోదాయ చైతన్యమేకం విభజ్య
ద్విధా దేవి జీవః శివశ్చేతి నామ్నా ।
శివస్యాపి జీవత్వమాపాదయన్తీ
పునర్జీవమేనం శివం వా కరోషి ॥ 4 ॥
సమాకుఞ్చ్య మూలం హృది న్యస్య వాయుం
మనో భ్రూబిలం ప్రాపయిత్వా నివృత్తాః ।
తతః సచ్చిదానన్దరూపే పదే తే
భవన్త్యమ్బ జీవాః శివత్వేన కేచిత్ ॥ 5 ॥
శరీరేఽతికష్టే రిపౌ పుత్రవర్గే
సదాభీతిమూలే కలత్రే ధనే వా ।
న కశ్చిద్విరజ్యత్యహో దేవి చిత్రం
కథం త్వత్కటాక్షం వినా తత్త్వబోధః ॥ 6 ॥
శరీరే ధనేఽపత్యవర్గే కలత్రే
విరక్తస్య సద్దేశికాదిష్టబుద్ధేః ।
యదాకస్మికం జ్యోతిరానన్దరూపం
సమాధౌ భవేత్తత్త్వమస్యమ్బ సత్యమ్ ॥ 7 ॥
మృషాన్యో మృషాన్యః పరో మిశ్రమేనం
పరః ప్రాకృతం చాపరో బుద్ధిమాత్రమ్ ।
ప్రపఞ్చం మిమీతే మునీనాం గణోఽయం
తదేతత్త్వమేవేతి న త్వాం జహీమః ॥ 8 ॥
నివృత్తిః ప్రతిష్ఠా చ విద్యా చ శాన్తి-
స్తథా శాన్త్యతీతేతి పఞ్చీకృతాభిః ।
కలాభిః పరే పఞ్చవింశాత్మికాభి-
స్త్వమేకైవ సేవ్యా శివాభిన్నరూపా ॥ 9 ॥
అగాధేఽత్ర సంసారపఙ్కే నిమగ్నం
కలత్రాదిభారేణ ఖిన్నం నితాన్తమ్ ।
మహామోహపాశౌఘబద్ధం చిరాన్మాం
సముద్ధర్తుమమ్బ త్వమేకైవ శక్తా ॥ 10 ॥
సమారభ్య మూలం గతో బ్రహ్మచక్రం
భవద్దివ్యచక్రేశ్వరీధామభాజః ।
మహాసిద్ధిసఙ్ఘాతకల్పద్రుమాభా-
నవాప్యామ్బ నాదానుపాస్తే చ యోగీ ॥ 11 ॥
గణేశైర్గ్రహైరమ్బ నక్షత్రపఙ్క్త్యా
తథా యోగినీరాశిపీఠైరభిన్నమ్ ।
మహాకాలమాత్మానమామృశ్య లోకం
విధత్సే కృతిం వా స్థితిం వా మహేశి ॥ 12 ॥
లసత్తారహారామతిస్వచ్ఛచేలాం
వహన్తీం కరే పుస్తకం చాక్షమాలామ్ ।
శరచ్చన్ద్రకోటిప్రభాభాసురాం త్వాం
సకృద్భావయన్భారతీవల్లభః స్యాత్ ॥ 13 ॥
సముద్యత్సహస్రార్కబిమ్బాభవక్త్రాం
స్వభాసైవ సిన్దూరితాజాణ్డకోటిమ్ ।
ధనుర్బాణపాశాఙ్కుశాన్ధారయన్తీం
స్మరన్తః స్మరం వాపి సమ్మోహయేయుః ॥ 14 ॥
మణిస్యూతతాటఙ్కశోణాస్యబిమ్బాం
హరిత్పట్టవస్త్రాం త్వగుల్లాసిభూషామ్ ।
హృదా భావయంస్తప్తహేమప్రభాం త్వాం
శ్రియో నాశయత్యమ్బ చాఞ్చల్యభావమ్ ॥ 15 ॥
మహామన్త్రరాజాన్తబీజం పరాఖ్యం
స్వతో న్యస్తబిన్దు స్వయం న్యస్తహార్దమ్ ।
భవద్వక్త్రవక్షోజగుహ్యాభిధానం
స్వరూపం సకృద్భావయేత్స త్వమేవ ॥ 16 ॥
తథాన్యే వికల్పేషు నిర్విణ్ణచిత్తా-
స్తదేకం సమాధాయ బిన్దుత్రయం తే ।
పరానన్దసన్ధానసిన్ధౌ నిమగ్నాః
పునర్గర్భరన్ధ్రం న పశ్యన్తి ధీరాః ॥ 17 ॥
త్వదున్మేషలీలానుబన్ధాధికారా-
న్విరిఞ్చ్యాదికాంస్త్వద్గుణామ్భోధిబిన్దూన్ ।
భజన్తస్తితీర్షన్తి సంసారసిన్ధుం
శివే తావకీనా సుసమ్భావనేయమ్ ॥ 18 ॥
కదా వా భవత్పాదపోతేన తూర్ణం
భవామ్భోధిముత్తీర్య పూర్ణాన్తరఙ్గః ।
నిమజ్జన్తమేనం దురాశావిషాబ్ధౌ
సమాలోక్య లోకం కథం పర్యుదాస్సే ॥ 19 ॥
కదావా హృషీకాణి సామ్యం భజేయుః
కదా వా న శత్రుర్న మిత్రం భవాని ।
కదా వా దురాశావిషూచీవిలోపః
కదా వా మనో మే సమూలం వినశ్యేత్ ॥ 20 ॥
నమోవాకమాశాస్మహే దేవి యుష్మ-
త్పదామ్భోజయుగ్మాయ తిగ్మాయ గౌరి ।
విరిఞ్చ్యాదిభాస్వత్కిరీటప్రతోలీ-
ప్రదీపాయమానప్రభాభాస్వరాయ ॥ 21 ॥
కచే చన్ద్రరేఖం కుచే తారహారం
కరే స్వాదుచాపం శరే షట్పదౌఘమ్ ।
స్మరామి స్మరారేరభిప్రాయమేకం
మదాఘూర్ణనేత్రం మదీయం నిధానమ్ ॥ 22 ॥
శరేష్వేవ నాసా ధనుష్వేవ జిహ్వా
జపాపాటలే లోచనే తే స్వరూపే ।
త్వగేషా భవచ్చన్ద్రఖణ్డే శ్రవో మే
గుణే తే మనోవృత్తిరమ్బ త్వయి స్యాత్ ॥ 23 ॥
జగత్కర్మధీరాన్వచోధూతకీరాన్
కుచన్యస్తహారాఙ్కృపాసిన్ధుపూరాన్ ।
భవామ్భోధిపారాన్మహాపాపదూరాన్
భజే వేదసారాంశివప్రేమదారాన్ ॥ 24 ॥
సుధాసిన్ధుసారే చిదానన్దనీరే
సముత్ఫుల్లనీపే సురత్రాన్తరీపే ।
మణివ్యూహసాలే స్థితే హైమశాలే
మనోజారివామే నిషణ్ణం మనో మే ॥ 25 ॥
దృగన్తే విలోలా సుగన్ధీషుమాలా
ప్రపఞ్చేన్ద్రజాలా విపత్సిన్ధుకూలా ।
మునిస్వాన్తశాలా నమల్లోకపాలా
హృది ప్రేమలోలామృతస్వాదులీలా ॥ 26 ॥
జగజ్జాలమేతత్త్వయైవామ్బ సృష్టం
త్వమేవాద్య యాసీన్ద్రియైరర్థజాలమ్ ।
త్వమేకైవ కర్త్రీ త్వమేకైవ భోక్త్రీ
న మే పుణ్యపాపే న మే బన్ధమోక్షౌ ॥ 27 ॥
ఇతి ప్రేమభారేణ కిఞ్చిన్మయోక్తం
న బుధ్వైవ తత్త్వం మదీయం త్వదీయమ్ ।
వినోదాయ బాలస్య మౌర్ఖ్యం హి మాతస్-
తదేతత్ప్రలాపస్తుతిం మే గృహాణ ॥ 28 ॥
॥ ఇతి శ్రీమచ్ఛఙ్కరాచార్యవిరచితా దేవీభుజఙ్గం సమ్పూర్ణమ్ ॥
