లక్ష్మీభర్తుర్భుజాగ్రే కృతవసతి సితం యస్య రూపం విశాలం
నీలాద్రేస్తుఙ్గశృఙ్గస్థితమివ రజనీనాథబిమ్బం విభాతి ।
పాయాన్నః పాఞ్చజన్యః స దితిసుతకులత్రాసనైః పూరయన్స్వై-
-ర్నిధ్వానైర్నీరదౌఘధ్వనిపరిభవదైరమ్బరం కమ్బురాజః ॥ 1 ॥

ఆహుర్యస్య స్వరూపం క్షణముఖమఖిలం సూరయః కాలమేతం
ధ్వాన్తస్యైకాన్తమన్తం యదపి చ పరమం సర్వధామ్నాం చ ధామ ।
చక్రం తచ్చక్రపాణేర్దితిజతనుగలద్రక్తధారాక్తధారం
శశ్వన్నో విశ్వవన్ద్యం వితరతు విపులం శర్మ ధర్మాంశుశోభమ్ ॥ 2 ॥

అవ్యాన్నిర్ఘాతఘోరో హరిభుజపవనామర్శనాధ్మాతమూర్తే-
-రస్మాన్విస్మేరనేత్రత్రిదశనుతివచఃసాధుకారైః సుతారః ।
సర్వం సంహర్తుమిచ్ఛోరరికులభువన స్ఫారవిష్ఫారనాదః
సంయత్కల్పాన్తసిన్ధౌ శరసలిలఘటావార్ముచః కార్ముకస్య ॥ 3 ॥

జీమూతశ్యామభాసా ముహురపి భగవద్బాహునా మోహయన్తీ
యుద్ధేషూద్ధూయమానా ఝటితి తటిదివాలక్ష్యతే యస్య మూర్తిః ।
సోఽసిస్త్రాసాకులాక్షత్రిదశరిపువపుఃశోణితాస్వాదతృప్తో
నిత్యానన్దాయ భూయాన్మధుమథనమనోనన్దనో నన్దకో నః ॥ 4 ॥

కమ్రాకారా మురారేః కరకమలతలేనానురాగాద్గృహీతా
సమ్యగ్వృత్తా స్థితాగ్రే సపది న సహతే దర్శనం యా పరేషామ్ ।
రాజన్తీ దైత్యజీవాసవమదముదితా లోహితాలేపనార్ద్రా
కామం దీప్తాంశుకాన్తా ప్రదిశతు దయితేవాస్య కౌమోదకీ నః ॥ 5 ॥

యో విశ్వప్రాణభూతస్తనురపి చ హరేర్యానకేతుస్వరూపో
యం సఞ్చిన్త్యైవ సద్యః స్వయమురగవధూవర్గగర్భాః పతన్తి ।
చఞ్చచ్చణ్డోరుతుణ్డత్రుటితఫణివసారక్తపఙ్కాఙ్కితస్యం
వన్దే ఛన్దోమయం తం ఖగపతిమమలస్వర్ణవర్ణం సుపర్ణమ్ ॥ 6 ॥

విష్ణోర్విశ్వేశ్వరస్య ప్రవరశయనకృత్సర్వలోకైకధర్తా
సోఽనన్తః సర్వభూతః పృథువిమలయశాః సర్వవేదైశ్చ వేద్యః ।
పాతా విశ్వస్య శశ్వత్సకలసురరిపుధ్వంసనః పాపహన్తా
సర్వజ్ఞః సర్వసాక్షీ సకలవిషభయాత్పాతు భోగీశ్వరో నః ॥ 7 ॥

వాగ్భూగైర్యాదిభేదైర్విదురిహ మునయో యాం యదీయైశ్చ పుంసాం
కారుణ్యార్ద్రైః కటాక్షైః సకృదపి పతితైః సమ్పదః స్యుః సమగ్రాః ।
కున్దేన్దుస్వచ్ఛమన్దస్మితమధురముఖామ్భోరుహాం సున్దరాఙ్గీం
వన్దే వన్ద్యామశేషైరపి మురభిదురోమన్దిరామిన్దిరాం తామ్ ॥ 8 ॥

యా సూతే సత్త్వజాలం సకలమపి సదా సన్నిధానేన పుంసో
ధత్తే యా తత్త్వయోగాచ్చరమచరమిదం భూతయే భూతజాతమ్ ।
ధాత్రీం స్థాత్రీం జనిత్రీం ప్రకృతిమవికృతిం విశ్వశక్తిం విధాత్రీం
విష్ణోర్విశ్వాత్మనస్తాం విపులగుణమయీం ప్రాణనాథాం ప్రణౌమి ॥ 9 ॥

యేభ్యోఽసూయద్భిరుచ్చైః సపది పదమురు త్యజ్యతే దైత్యవర్గై-
-ర్యేభో ధర్తుం చ మూర్ధ్నా స్పృహయతి సతతం సర్వగీర్వాణవర్గః ।
నిత్యం నిర్మూలయేయుర్నిచితతరమమీ భక్తినిఘ్నాత్మనాం నః
పద్మాక్షస్యాఙ్ఘ్రిపద్మద్వయతలనిలయాః పాంసవః పాపపఙ్కమ్ ॥ 10 ॥

రేఖా లేఖాదివన్ద్యాశ్చరణతలగతాశ్చక్రమత్స్యాదిరూపాః
స్నిగ్ధాః సూక్ష్మాః సుజాతా మృదులలితతరక్షౌమసూత్రాయమాణాః ।
దద్యుర్నో మఙ్గళాని భ్రమరభరజుషా కోమలేనాబ్ధిజాయాః
కమ్రేణామ్రేడ్యమానాః కిసలయమృదునా పాణినా చక్రపాణేః ॥ 11 ॥

యస్మాదాక్రామతో ద్యాం గరుడమణిశిలాకేతుదణ్డాయమానా
దాశ్చ్యోతన్తీ బభాసే సురసరిదమలా వైజయన్తీవ కాన్తా ।
భూమిష్ఠో యస్తథాన్యో భువనగృహబృహత్‍స్తమ్భశోభాం దధౌ నః
పాతామేతౌ పాయోజోదరలలితతలౌ పఙ్కజాక్షస్య పాదౌ ॥ 12 ॥

ఆక్రామద్భ్యాం త్రిలోకీమసురసురపతీ తత్క్షణాదేవ నీతౌ
యాభ్యాం వైరోచనీన్ద్రౌ యుగపదపి విపత్సమ్పదోరేకధామః ।
తాభ్యాం తామ్రోదరాభ్యాం ముహురహమజితస్యాఞ్చితాభ్యాముభాభ్యాం
ప్రాజ్యైశ్వర్యప్రదాభ్యాం ప్రణతిముపగతః పాదపఙ్కేరుహాభ్యామ్ ॥ 13 ॥

యేభ్యో వర్ణశ్చతుర్థశ్చరమత ఉదభూదాదిసర్గే ప్రజానాం
సాహస్రీ చాపి సఙ్ఖ్యా ప్రకటమభిహితా సర్వవేదేషు యేషామ్ ।
ప్రాప్తా విశ్వమ్భరా యైరతివితతతనోర్విశ్వమూర్తేర్విరాజో
విష్ణోస్తేభ్యో మహద్భ్యః సతతమపి నమోఽస్త్వఙ్ఘ్రిపఙ్కేరుహేభ్యః ॥ 14 ॥

విష్ణోః పాదద్వయాగ్రే విమలనఖమణిభ్రాజితా రాజతే యా
రాజీవస్యేవ రమ్యా హిమజలకణికాలఙ్కృతాగ్రా దలాలీ ।
అస్మాకం విస్మయార్హాణ్యఖిలజనమన ప్రార్థనీయా హి సేయం
దద్యాదాద్యానవద్యా తతిరతిరుచిరా మఙ్గళాన్యఙ్గుళీనామ్ ॥ 15 ॥

యస్యాం దృష్ట్వామలాయాం ప్రతికృతిమమరాః సమ్భవన్త్యానమన్తః
సేన్ద్రాః సాన్ద్రీకృతేర్ష్యాస్త్వపరసురకులాశఙ్కయాతఙ్కవన్తః ।
సా సద్యః సాతిరేకాం సకలసుఖకరీం సమ్పదం సాధయేన్న-
-శ్చఞ్చచ్చార్వంశుచక్రా చరణనళినయోశ్చక్రపాణేర్నఖాలీ ॥ 16 ॥

పాదామ్భోజన్మసేవాసమవనతసురవ్రాతభాస్వత్కిరీట-
-ప్రత్యుప్తోచ్చావచాశ్మప్రవరకరగణైశ్చిన్తితం యద్విభాతి ।
నమ్రాఙ్గానాం హరేర్నో హరిదుపలమహాకూర్మసౌన్దర్యహారి-
-చ్ఛాయం శ్రేయఃప్రదాయి ప్రపదయుగమిదం ప్రాపయేత్పాపమన్తమ్ ॥ 17 ॥

శ్రీమత్యౌ చారువృత్తే కరపరిమలనానన్దహృష్టే రమాయాః
సౌన్దర్యాఢ్యేన్ద్రనీలోపలరచితమహాదణ్డయోః కాన్తిచోరే ।
సూరీన్ద్రైః స్తూయమానే సురకులసుఖదే సూదితారాతిసఙ్ఘే
జఙ్ఘే నారాయణీయే ముహురపి జయతామస్మదంహో హరన్త్యౌ ॥ 18 ॥

సమ్యక్సాహ్యం విధాతుం సమమివ సతతం జఙ్ఘయోః ఖిన్నయోర్యే
భారీభూతోరుదణ్డద్వయభరణకృతోత్తమ్భభావం భజేతే ।
చిత్తాదర్శం నిధాతుం మహితమివ సతాం తే సముద్రాయమానే
వృత్తాకారే విధత్తాం హ్యది ముదమజితస్యానిశం జానునీ నః ॥ 19 ॥

దేవో భీతిం విధాతుః సపది విదధతౌ కైటభాఖ్యం మధుం చా-
-ప్యారోప్యారూఢగర్వావధిజలధి యయోరాదిదైత్యౌ జఘాన ।
వృత్తావన్యోన్యతుల్యౌ చతురముపచయం బిభ్రతావభ్రనీలా-
-వూరూ చారూ హరేస్తౌ ముదమతిశయినీం మానసే నో విధత్తామ్ ॥ 20 ॥

పీతేన ద్యోతతే యచ్చతురపరిహితేనామ్బరేణాత్యుదారం
జాతాలఙ్కారయోగం జలమివ జలధేర్బాడబాగ్నిప్రభాభిః ।
ఏతత్పాతిత్యదాన్నో జఘనమతిఘనాదేనసో మాననీయం
సాతత్యేనైవ చేతోవిషయమవతరత్పాతు పీతామ్బరస్య ॥ 21 ॥

యస్యా దామ్నా త్రిధామ్నో జఘనకలితయా భ్రాజతేఽఙ్గం యథాబ్ధే-
-ర్మధ్యస్థో మన్దరాద్రిర్భుజగపతిమహాభోగసన్నద్ధమధ్యః ।
కాఞ్చీ సా కాఞ్చనాభా మణివరకిరణైరుల్లసద్భిః ప్రదీప్తా
కల్యాం కళ్యాణదాత్రీం మమ మతిమనిశం కమ్రరూపాం కరోతు ॥ 22 ॥

ఉన్నమ్రం కమ్రముచ్చైరుపచితముదభూద్యత్ర పత్రైర్విచిత్రైః
పూర్వం గీర్వాణపూజ్యం కమలజమధుపస్యాస్పదం తత్పయోజమ్ ।
యస్మిన్నీలాశ్మనీలైస్తరలరుచిజలైః పూరితే కేలిబుద్ధ్యా
నాలీకాక్షస్య నాభీసరసి వసతు నశ్చిత్తహంసశ్చిరాయ ॥ 23 ॥

పాతాలం యస్య నాలం వలయమపి దిశాం పత్రపఙ్క్తీర్నగేన్ద్రా-
-న్విద్వాంసః కేసరాలీర్విదురిహ విపులాం కర్ణికాం స్వర్ణశైలమ్ ।
భూయాద్గాయత్స్వయమ్భూమధుకరభవనం భూమయం కామదం నో
నాలీకం నాభిపద్మాకరభవమురు తన్నాగశయ్యస్య శౌరేః ॥ 24 ॥

ఆదౌ కల్పస్య యస్మాత్ప్రభవతి వితతం విశ్వమేతద్వికల్పైః
కల్పాన్తే యస్య చాన్త ప్రవిశతి సకలం స్థావరం జఙ్గమం చ ।
అత్యన్తాచిన్త్యమూర్తేశ్చిరతరమజితస్యాన్తరిక్షస్వరూపే
తస్మిన్నస్మాకమన్తఃకరణమతిముదా క్రీడతాత్క్రోడభాగే ॥ 25 ॥

కాన్త్యమ్భఃపూరపూర్ణే లసదసితవలీభఙ్గభాస్వత్తరఙ్గే
గమ్భీరాకారనాభీచతురతరమహావర్తశోభిన్యుదారే ।
క్రీడత్వానద్వహేమోదరనహనమహాబాడబాగ్నిప్రభాఢ్యే
కామం దామోదరీయోదరసలిలనిధౌ చిత్తమత్స్యశ్చిరం నః ॥ 26 ॥

నాభీనాలీకమూలాదధికపరిమళోన్మోహితానామలీనాం
మాలా నీలేవ యాన్తీ స్ఫురతి రుచిమతీ వక్త్రపద్మోన్ముఖీ యా ।
రమ్యా సా రోమరాజిర్మహితరుచికరీ మధ్యభాగస్య విష్ణో-
-శ్చిత్తస్థా మా విరంసీచ్చిరతరముచితాం సాధయన్తీ శ్రియం నః ॥ 27 ॥

సంస్తీర్ణం కౌస్తుభాంశుప్రసరకిసలయైర్ముగ్ధముక్తాఫలాఢ్యం
శ్రీవత్సోల్లాసి ఫుల్లప్రతినవవనమాలాఙ్కి రాజద్భుజాన్తమ్ ।
వక్షః శ్రీవృక్షకాన్తం మధుకరనికరశ్యామలం శార్ఙ్గపాణేః
సంసారాధ్వశ్రమార్తైరుపవనమివ యత్సేవితం తత్ప్రపద్యే ॥ 28 ॥

కాన్తం వక్షో నితాన్తం విదధదివ గలం కాలిమా కాలశత్రో-
-రిన్దోర్బిమ్బం యథాఙ్కో మధుప ఇవ తరోర్మఞ్జరీం రాజతే యః ।
శ్రీమాన్నిత్యం విధేయాదవిరలమిలితః కౌస్తుభశ్రీప్రతానైః
శ్రీవత్సః శ్రీపతేః స శ్రియ ఇవ దయితో వత్స ఉచ్చైఃశ్రియం నః ॥ 29 ॥

సమ్భూయామ్భోధిమధ్యాత్సపది సహజయా యః శ్రియా సన్నిధత్తే
నీలే నారాయణోరఃస్థలగగనతలే హారతారోపసేవ్యే ।
ఆశాః సర్వాః ప్రకాశా విదధదపిదధచ్చాత్మభాసాన్యతేజా-
-స్యాశ్చర్యస్యాకరో నో ద్యుమణిరివ మణిః కౌస్తుభః సోఽస్తుభూత్యై ॥ 30 ॥

యా వాయావానుకూల్యాత్సరతి మణిరుచా భాసమానా సమానా
సాకం సాకమ్పమంసే వసతి విదధతీ వాసుభద్రం సుభద్రమ్ ।
సారం సారఙ్గసఙ్ఘైర్ముఖరితకుసుమా మేచకాన్తా చ కాన్తా
మాలా మాలాలితాస్మాన్న విరమతు సుఖైర్యోజయన్తీ జయన్తీ ॥ 31 ॥

హారస్యోరుప్రభాభిః ప్రతినవవనమాలాశుభిః ప్రాంశురూపైః
శ్రీభిశ్చాప్యఙ్గదానాం కబలితరుచి యన్నిష్కభాభిశ్చ భాతి ।
బాహుల్యేనైవ బద్ధాఞ్జలిపుటమజితస్యాభియాచామహే త-
-ద్వన్ధార్తిం బాధతాం నో బహువిహతికరీం బన్ధురం బాహుమూలమ్ ॥ 32 ॥

విశ్వత్రాణైకదీక్షాస్తదనుగుణగుణక్షత్రనిర్మాణదక్షాః
కర్తారో దుర్నిరూపస్ఫుటగుణయశసా కర్మణామద్భుతానామ్ ।
శార్ఙ్గం బాణం కృపాణం ఫలకమరిగదే పద్మశఙ్ఖౌ సహస్రం
బిభ్రాణాః శస్త్రజాలం మమ దధతు హరేర్బాహవో మోహహానిమ్ ॥ 33 ॥

కణ్ఠాకల్పోద్గతైర్యః కనకమయలసత్కుణ్డలోత్థైరుదారై-
-రుద్యోతైః కౌస్తుభస్యాప్యురుభిరుపచితశ్చిత్రవర్ణో విభాతి ।
కణ్ఠాశ్లేషే రమాయాః కరవలయపదైర్ముద్రితే భద్రరూపే
వైకుణ్ఠీయేఽత్ర కణ్ఠే వసతు మమ మతిః కుణ్ఠభావం విహాయ ॥ 34 ॥

పద్మానన్దప్రదాతా పరిలసదరుణశ్రీపరీతాగ్రభాగః
కాలే కాలే చ కమ్బుప్రవరశశధరాపూరణే యః ప్రవీణః ।
వక్త్రాకాశాన్తరస్థస్తిరయతి నితరాం దన్తతారౌఘశోభాం
శ్రీభర్తుర్దన్తవాసోద్యుమణిరఘతమోనాశనాయాస్త్వసౌ నః ॥ 35 ॥

నిత్యం స్నేహాతిరేకాన్నిజకమితురలం విప్రయోగాక్షమా యా
వక్త్రేన్దోరన్తరాలే కృతవసతిరివాభాతి నక్షత్రరాజిః ।
లక్ష్మీకాన్తస్య కాన్తాకృతిరతివిలసన్ముగ్ధముక్తావలిశ్రీ-
-ర్దన్తాలీ సన్తతం సా నతినుతినిరతానక్షతాన్రక్షతాన్నః ॥ 36 ॥

బ్రహ్మన్బ్రహ్మణ్యజిహ్మాం మతిమపి కురుషే దేవ సమ్భావయే త్వాం
శమ్భో శక్ర త్రిలోకీమవసి కిమమరైర్నారదాద్యాః సుఖం వః ।
ఇత్థం సేవావనమ్రం సురమునినికరం వీక్ష్య విష్ణోః ప్రసన్న-
-స్యాస్యేన్దోరాస్రవన్తీ వరవచనసుధాహ్లాదయేన్మానసం నః ॥ 37 ॥

కర్ణస్థస్వర్ణకమ్రోజ్జ్వలమకరమహాకుణ్డలప్రోతదీప్య-
-న్మాణిక్యశ్రీప్రతానైః పరిమిలితమలిశ్యామలం కోమలం యత్ ।
ప్రోద్యత్సూర్యాంశురాజన్మరకతముకురాకారచోరం మురారే-
-ర్గాఢామాగామినీం నః శమయతు విపదం గణ్డయోర్మణ్డలం తత్ ॥ 38 ॥

వక్త్రామ్భోజే లసన్తం ముహురధరమణిం పక్వబిమ్బాభిరామం
దృష్ట్వా ద్రష్టుం శుకస్య స్ఫుటమవతరతస్తుణ్డదణ్డాయతే యః ।
ఘోణః శోణీకృతాత్మా శ్రవణయుగళసత్కుణ్డలోస్రైర్మురారేః
ప్రాణాఖ్యస్యానిలస్య ప్రసరణసరణిః ప్రాణదానాయ నః స్యాత్ ॥ 39 ॥

దిక్కాలౌ వేదయన్తౌ జగతి ముహురిమౌ సఞ్చరన్తౌ రవీన్దూ
త్రైలోక్యాలోకదీపావభిదధతి యయోరేవ రూపం మునీన్ద్రాః ।
అస్మానబ్జప్రభే తే ప్రచురతరకృపానిర్భరం ప్రేక్షమాణే
పాతామాతామ్రశుక్లాసితరుచిరుచిరే పద్మనేత్రస్య నేత్రే ॥ 40 ॥

పాతాత్పాతాలపాతాత్పతగపతిగతేర్భ్రూయుగం భుగ్నమధ్యం
యేనేషచ్చాలితేన స్వపదనియమితాః సాసురా దేవసఙ్ఘాః ।
నృత్యల్లాలాటరఙ్గే రజనికరతనోరర్ధఖణ్డావదాతే
కాలవ్యాలద్వయం వా విలసతి సమయా వాలికామాతరం నః ॥ 41 ॥

లక్ష్మాకారాలకాలిస్ఫురదలికశశాఙ్కార్ధసన్దర్శమీల-
-న్నేత్రామ్భోజప్రబోధోత్సుకనిభృతతరాలీనభృఙ్గచ్ఛటాభే ।
లక్ష్మీనాథస్య లక్ష్యీకృతవిబుధగణాపాఙ్గబాణాసనార్ధ-
-చ్ఛాయే నో భూరిభూతిప్రసవకుశలతే భ్రూలతే పాలయేతామ్ ॥ 42 ॥

రూక్షస్మారేక్షుచాపచ్యుతశరనికరక్షీణలక్ష్మీకటాక్ష-
-ప్రోత్ఫుల్లత్పద్మమాలావిలసితమహితస్ఫాటికైశానలిఙ్గమ్ ।
భూయాద్భూయో విభూత్యై మమ భువనపతేర్భ్రూలతాద్వన్ద్వమధ్యా-
-దుత్థం తత్పుణ్డ్రమూర్ధ్వం జనిమరణతమఃఖణ్డనం మణ్డనం చ ॥ 43 ॥

పీఠీభూతాలకాన్తే కృతమకుటమహాదేవలిఙ్గప్రతిష్ఠే
లాలాటే నాట్యరఙ్గే వికటతరతటే కైటభారేశ్చిరాయ ।
ప్రోద్ధాట్యైవాత్మతన్ద్రీప్రకటపటకుటీం ప్రస్ఫురన్తీం స్ఫుటాఙ్గం
పట్వీయం భావనాఖ్యాం చటులమతినటీ నాటికాం నాటయేన్నః ॥ 44 ॥

మాలాలీవాలిధామ్నః కువలయకలితా శ్రీపతేః కున్తలాలీ
కాలిన్ద్యారుహ్య మూర్ధ్నో గలతి హరశిరఃస్వర్ధునీస్పర్ధయా ను ।
రాహుర్వా యాతి వక్త్రం సకలశశికలాభ్రాన్తిలోలాన్తరాత్మా
లోకైరాలోక్యతే యా ప్రదిశతు సతతం సాఖిలం మఙ్గళం నః ॥ 45 ॥

సుప్తాకారాః ప్రసుప్తే భగవతి విబుధైరప్యదృష్టస్వరూపా
వ్యాప్తవ్యోమాన్తరాలాస్తరలమణిరుచా రఞ్జితాః స్పష్టభాసః ।
దేహచ్ఛాయోద్గమాభా రిపువపురగురుప్లోషరోషాగ్నిధూమ్యాః
కేశాః కేశిద్విషో నో విదధతు విపులక్లేశపాశప్రణాశమ్ ॥ 46 ॥

యత్ర ప్రత్యుప్తరత్నప్రవరపరిలసద్భూరిరోచిష్ప్రతాన-
-స్ఫూర్త్యాం మూర్తిర్మురారేర్ద్యుమణిశతచితవ్యోమవద్దుర్నిరీక్ష్యా ।
కుర్వత్పారేపయోధి జ్వలదకృశశిఖాభాస్వదౌర్వాగ్నిశఙ్కాం
శశ్వన్నః శర్మ దిశ్యాత్కలికలుషతమఃపాటనం తత్కిరీటమ్ ॥ 47 ॥

భ్రాన్త్వా భ్రాన్త్వా యదన్తస్త్రిభువనగురురప్యబ్దకోటీరనేకా
గన్తుం నాన్తం సమర్థో భ్రమర ఇవ పునర్నాభినాలీకనాలాత్ ।
ఉన్మజ్జన్నూర్జితశ్రీస్త్రిభువనమపరం నిర్మమే తత్సదృక్షం
దేహామ్భోధిః స దేయాన్నిరవధిరమృతం దైత్యవిద్వేషిణో నః ॥ 48 ॥

మత్స్యః కూర్మో వరాహో నరహరిణపతిర్వామనో జామదగ్న్యః
కాకుత్స్థః కంసఘాతీ మనసిజవిజయీ యశ్చ కల్కిర్భవిష్యన్ ।
విష్ణోరంశావతరా భువనహితకరా ధర్మసంస్థాపనార్థాః
పాయాసుర్మాం త ఏతే గురుతరకరుణాభారఖిన్నాశయా యే ॥ 49 ॥

యస్మాద్వాచో నివృత్తాః సమమపి మనసా లక్షణామీక్షమాణాః
స్వార్థాలాభాత్పరార్థవ్యపగమకథనశ్లాఘినో వేదవాదాః ।
నిత్యానన్దం స్వసంవిన్నిరవధివిమలస్వాన్తసఙ్క్రాన్తబిమ్బ-
-చ్ఛాయాపత్యాపి నిత్యం సుఖయతి యమినో యత్తదవ్యాన్మహో నః ॥ 50 ॥

ఆపాదాదా చ శీర్షాద్వపురిదమనఘం వైష్ణవం యః స్వచిత్తే
ధత్తే నిత్యం నిరస్తాఖిలకలికలుష సన్తతాన్తః ప్రమోదమ్ ।
జుహ్వజ్జిహ్వాకృశానౌ హరిచరితహవిః స్తోత్రమన్త్రానుపాఠై-
-స్తత్పాదామ్భోరుహాభ్యాం సతతమపి నమస్కుర్మహే నిర్మలాభ్యామ్ ॥ 51 ॥

మోదాత్పాదాదికేశస్తుతిమితిరచితా కీర్తయిత్వా త్రిధామ్న
పాదాబ్జద్వన్ద్వసేవాసమయనతమతిర్మస్తకేనానమేద్య ।
ఉన్ముచ్యైవాత్మనైనోనిచయకవచక పఞ్చతామేత్య భానో-
-ర్బిమ్బాన్తర్గోచర స ప్రవిశతి పరమానన్దమాత్మస్వరూపమ్ ॥ 52 ॥

ఇతి శ్రీమత్పరమహంసపరివ్రాజకాచార్యస్య శ్రీగోవిన్దభగవత్పూజ్యపాదశిష్యస్య శ్రీమచ్ఛఙ్కరభగవతః కృతౌ శ్రీ విష్ణు పాదాదికేశాన్తవర్ణణ స్తోత్రం సమ్పూర్ణమ్ ।