𑌲𑍀𑌲𑌾𑌲𑌬𑍍𑌧𑌸𑍍𑌥𑌾𑌪𑌿𑌤𑌲𑍁𑌪𑍍𑌤𑌾𑌖𑌿𑌲𑌲𑍋𑌕𑌾𑌂
𑌲𑍋𑌕𑌾𑌤𑍀𑌤𑍈𑌰𑍍𑌯𑍋𑌗𑌿𑌭𑌿𑌰𑌂𑌤𑌶𑍍𑌚𑌿𑌰𑌮𑍃𑌗𑍍𑌯𑌾𑌮𑍍 ।
𑌬𑌾𑌲𑌾𑌦𑌿𑌤𑍍𑌯𑌶𑍍𑌰𑍇𑌣𑌿𑌸𑌮𑌾𑌨𑌦𑍍𑌯𑍁𑌤𑌿𑌪𑍁𑌂𑌜𑌾𑌂
𑌗𑍌𑌰𑍀𑌮𑌂𑌬𑌾𑌮𑌂𑌬𑍁𑌰𑍁𑌹𑌾𑌕𑍍𑌷𑍀𑌮𑌹𑌮𑍀𑌡𑍇 ॥ 1 ॥
𑌪𑍍𑌰𑌤𑍍𑌯𑌾𑌹𑌾𑌰𑌧𑍍𑌯𑌾𑌨𑌸𑌮𑌾𑌧𑌿𑌸𑍍𑌥𑌿𑌤𑌿𑌭𑌾𑌜𑌾𑌂
𑌨𑌿𑌤𑍍𑌯𑌂 𑌚𑌿𑌤𑍍𑌤𑍇 𑌨𑌿𑌰𑍍𑌵𑍃𑌤𑌿𑌕𑌾𑌷𑍍𑌠𑌾𑌂 𑌕𑌲𑌯𑌂𑌤𑍀𑌮𑍍 ।
𑌸𑌤𑍍𑌯𑌜𑍍𑌞𑌾𑌨𑌾𑌨𑌂𑌦𑌮𑌯𑍀𑌂 𑌤𑌾𑌂 𑌤𑌨𑍁𑌰𑍂𑌪𑌾𑌂
𑌗𑍌𑌰𑍀𑌮𑌂𑌬𑌾𑌮𑌂𑌬𑍁𑌰𑍁𑌹𑌾𑌕𑍍𑌷𑍀𑌮𑌹𑌮𑍀𑌡𑍇 ॥ 2 ॥
𑌚𑌂𑌦𑍍𑌰𑌾𑌪𑍀𑌡𑌾𑌨𑌂𑌦𑌿𑌤𑌮𑌂𑌦𑌸𑍍𑌮𑌿𑌤𑌵𑌕𑍍𑌤𑍍𑌰𑌾𑌂
𑌚𑌂𑌦𑍍𑌰𑌾𑌪𑍀𑌡𑌾𑌲𑌂𑌕𑍃𑌤𑌨𑍀𑌲𑌾𑌲𑌕𑌭𑌾𑌰𑌾𑌮𑍍 ।
𑌇𑌂𑌦𑍍𑌰𑍋𑌪𑍇𑌂𑌦𑍍𑌰𑌾𑌦𑍍𑌯𑌰𑍍𑌚𑌿𑌤𑌪𑌾𑌦𑌾𑌂𑌬𑍁𑌜𑌯𑍁𑌗𑍍𑌮𑌾𑌂
𑌗𑍌𑌰𑍀𑌮𑌂𑌬𑌾𑌮𑌂𑌬𑍁𑌰𑍁𑌹𑌾𑌕𑍍𑌷𑍀𑌮𑌹𑌮𑍀𑌡𑍇 ॥ 3 ॥
𑌆𑌦𑌿𑌕𑍍𑌷𑌾𑌂𑌤𑌾𑌮𑌕𑍍𑌷𑌰𑌮𑍂𑌰𑍍𑌤𑍍𑌯𑌾 𑌵𑌿𑌲𑌸𑌂𑌤𑍀𑌂
𑌭𑍂𑌤𑍇 𑌭𑍂𑌤𑍇 𑌭𑍂𑌤𑌕𑌦𑌂𑌬𑌪𑍍𑌰𑌸𑌵𑌿𑌤𑍍𑌰𑍀𑌮𑍍 ।
𑌶𑌬𑍍𑌦𑌬𑍍𑌰𑌹𑍍𑌮𑌾𑌨𑌂𑌦𑌮𑌯𑍀𑌂 𑌤𑌾𑌂 𑌤𑌟𑌿𑌦𑌾𑌭𑌾𑌂
𑌗𑍌𑌰𑍀𑌮𑌂𑌬𑌾𑌮𑌂𑌬𑍁𑌰𑍁𑌹𑌾𑌕𑍍𑌷𑍀𑌮𑌹𑌮𑍀𑌡𑍇 ॥ 4 ॥
𑌮𑍂𑌲𑌾𑌧𑌾𑌰𑌾𑌦𑍁𑌤𑍍𑌥𑌿𑌤𑌵𑍀𑌥𑍍𑌯𑌾 𑌵𑌿𑌧𑌿𑌰𑌂𑌧𑍍𑌰𑌂
𑌸𑍌𑌰𑌂 𑌚𑌾𑌂𑌦𑍍𑌰𑌂 𑌵𑍍𑌯𑌾𑌪𑍍𑌯 𑌵𑌿𑌹𑌾𑌰𑌜𑍍𑌵𑌲𑌿𑌤𑌾𑌂𑌗𑍀𑌮𑍍 ।
𑌯𑍇𑌯𑌂 𑌸𑍂𑌕𑍍𑌷𑍍𑌮𑌾𑌤𑍍𑌸𑍂𑌕𑍍𑌷𑍍𑌮𑌤𑌨𑍁𑌸𑍍𑌤𑌾𑌂 𑌸𑍁𑌖𑌰𑍂𑌪𑌾𑌂
𑌗𑍌𑌰𑍀𑌮𑌂𑌬𑌾𑌮𑌂𑌬𑍁𑌰𑍁𑌹𑌾𑌕𑍍𑌷𑍀𑌮𑌹𑌮𑍀𑌡𑍇 ॥ 5 ॥
𑌨𑌿𑌤𑍍𑌯𑌃 𑌶𑍁𑌦𑍍𑌧𑍋 𑌨𑌿𑌷𑍍𑌕𑌲 𑌏𑌕𑍋 𑌜𑌗𑌦𑍀𑌶𑌃
𑌸𑌾𑌕𑍍𑌷𑍀 𑌯𑌸𑍍𑌯𑌾𑌃 𑌸𑌰𑍍𑌗𑌵𑌿𑌧𑍌 𑌸𑌂𑌹𑌰𑌣𑍇 𑌚 ।
𑌵𑌿𑌶𑍍𑌵𑌤𑍍𑌰𑌾𑌣𑌕𑍍𑌰𑍀𑌡𑌨𑌲𑍋𑌲𑌾𑌂 𑌶𑌿𑌵𑌪𑌤𑍍𑌨𑍀𑌂
𑌗𑍌𑌰𑍀𑌮𑌂𑌬𑌾𑌮𑌂𑌬𑍁𑌰𑍁𑌹𑌾𑌕𑍍𑌷𑍀𑌮𑌹𑌮𑍀𑌡𑍇 ॥ 6 ॥
𑌯𑌸𑍍𑌯𑌾𑌃 𑌕𑍁𑌕𑍍𑌷𑍌 𑌲𑍀𑌨𑌮𑌖𑌂𑌡𑌂 𑌜𑌗𑌦𑌂𑌡𑌂
𑌭𑍂𑌯𑍋 𑌭𑍂𑌯𑌃 𑌪𑍍𑌰𑌾𑌦𑍁𑌰𑌭𑍂𑌦𑍁𑌤𑍍𑌥𑌿𑌤𑌮𑍇𑌵 ।
𑌪𑌤𑍍𑌯𑌾 𑌸𑌾𑌰𑍍𑌧𑌂 𑌤𑌾𑌂 𑌰𑌜𑌤𑌾𑌦𑍍𑌰𑍌 𑌵𑌿𑌹𑌰𑌂𑌤𑍀𑌂
𑌗𑍌𑌰𑍀𑌮𑌂𑌬𑌾𑌮𑌂𑌬𑍁𑌰𑍁𑌹𑌾𑌕𑍍𑌷𑍀𑌮𑌹𑌮𑍀𑌡𑍇 ॥ ॥
𑌯𑌸𑍍𑌯𑌾𑌮𑍋𑌤𑌂 𑌪𑍍𑌰𑍋𑌤𑌮𑌶𑍇𑌷𑌂 𑌮𑌣𑌿𑌮𑌾𑌲𑌾-
-𑌸𑍂𑌤𑍍𑌰𑍇 𑌯𑌦𑍍𑌵𑌤𑍍𑌕𑌾𑌪𑌿 𑌚𑌰𑌂 𑌚𑌾𑌪𑍍𑌯𑌚𑌰𑌂 𑌚 ।
𑌤𑌾𑌮𑌧𑍍𑌯𑌾𑌤𑍍𑌮𑌜𑍍𑌞𑌾𑌨𑌪𑌦𑌵𑍍𑌯𑌾 𑌗𑌮𑌨𑍀𑌯𑌾𑌂
𑌗𑍌𑌰𑍀𑌮𑌂𑌬𑌾𑌮𑌂𑌬𑍁𑌰𑍁𑌹𑌾𑌕𑍍𑌷𑍀𑌮𑌹𑌮𑍀𑌡𑍇 ॥ ॥
𑌨𑌾𑌨𑌾𑌕𑌾𑌰𑍈𑌃 𑌶𑌕𑍍𑌤𑌿𑌕𑌦𑌂𑌬𑍈𑌰𑍍𑌭𑍁𑌵𑌨𑌾𑌨𑌿
𑌵𑍍𑌯𑌾𑌪𑍍𑌯 𑌸𑍍𑌵𑍈𑌰𑌂 𑌕𑍍𑌰𑍀𑌡𑌤𑌿 𑌯𑍇𑌯𑌂 𑌸𑍍𑌵𑌯𑌮𑍇𑌕𑌾 ।
𑌕𑌲𑍍𑌯𑌾𑌣𑍀𑌂 𑌤𑌾𑌂 𑌕𑌲𑍍𑌪𑌲𑌤𑌾𑌮𑌾𑌨𑌤𑌿𑌭𑌾𑌜𑌾𑌂
𑌗𑍌𑌰𑍀𑌮𑌂𑌬𑌾𑌮𑌂𑌬𑍁𑌰𑍁𑌹𑌾𑌕𑍍𑌷𑍀𑌮𑌹𑌮𑍀𑌡𑍇 ॥ ॥
𑌆𑌶𑌾𑌪𑌾𑌶𑌕𑍍𑌲𑍇𑌶𑌵𑌿𑌨𑌾𑌶𑌂 𑌵𑌿𑌦𑌧𑌾𑌨𑌾𑌂
𑌪𑌾𑌦𑌾𑌂𑌭𑍋𑌜𑌧𑍍𑌯𑌾𑌨𑌪𑌰𑌾𑌣𑌾𑌂 𑌪𑍁𑌰𑍁𑌷𑌾𑌣𑌾𑌮𑍍 ।
𑌈𑌶𑌾𑌮𑍀𑌶𑌾𑌰𑍍𑌧𑌾𑌂𑌗𑌹𑌰𑌾𑌂 𑌤𑌾𑌮𑌭𑌿𑌰𑌾𑌮𑌾𑌂
𑌗𑍌𑌰𑍀𑌮𑌂𑌬𑌾𑌮𑌂𑌬𑍁𑌰𑍁𑌹𑌾𑌕𑍍𑌷𑍀𑌮𑌹𑌮𑍀𑌡𑍇 ॥ 10 ॥
𑌪𑍍𑌰𑌾𑌤𑌃𑌕𑌾𑌲𑍇 𑌭𑌾𑌵𑌵𑌿𑌶𑍁𑌦𑍍𑌧𑌃 𑌪𑍍𑌰𑌣𑌿𑌧𑌾𑌨𑌾-
-𑌦𑍍𑌭𑌕𑍍𑌤𑍍𑌯𑌾 𑌨𑌿𑌤𑍍𑌯𑌂 𑌜𑌲𑍍𑌪𑌤𑌿 𑌗𑍌𑌰𑍀𑌦𑌶𑌕𑌂 𑌯𑌃 ।
𑌵𑌾𑌚𑌾𑌂 𑌸𑌿𑌦𑍍𑌧𑌿𑌂 𑌸𑌂𑌪𑌦𑌮𑌗𑍍𑌰𑍍𑌯𑌾𑌂 𑌶𑌿𑌵𑌭𑌕𑍍𑌤𑌿𑌂
𑌤𑌸𑍍𑌯𑌾𑌵𑌶𑍍𑌯𑌂 𑌪𑌰𑍍𑌵𑌤𑌪𑍁𑌤𑍍𑌰𑍀 𑌵𑌿𑌦𑌧𑌾𑌤𑌿 ॥ 11 ॥
𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯 𑌶𑍍𑌰𑍀𑌗𑍋𑌵𑌿𑌂𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯 𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌗𑌵𑌤𑌃 𑌕𑍃𑌤𑍌 𑌗𑍌𑌰𑍀 𑌦𑌶𑌕𑌮𑍍 ।
