𑌶𑍍𑌰𑍀𑌕𑍍𑌷𑍋𑌣𑍍𑌯𑍌 𑌰𑌮𑌣𑍀𑌯𑍁𑌗𑌂 𑌸𑍁𑌰𑌮𑌣𑍀𑌪𑍁𑌤𑍍𑌰𑍋𑌽𑌪𑌿 𑌵𑌾𑌣𑍀𑌪𑌤𑌿𑌃
𑌪𑍌𑌤𑍍𑌰𑌶𑍍𑌚𑌂𑌦𑍍𑌰𑌶𑌿𑌰𑍋𑌮𑌣𑌿𑌃 𑌫𑌣𑌿𑌪𑌤𑌿𑌃 𑌶𑌯𑍍𑌯𑌾 𑌸𑍁𑌰𑌾𑌃 𑌸𑍇𑌵𑌕𑌾𑌃 ।
𑌤𑌾𑌰𑍍𑌕𑍍𑌷𑍍𑌯𑍋 𑌯𑌸𑍍𑌯 𑌰𑌥𑍋 𑌮𑌹𑌶𑍍𑌚 𑌭𑌵𑌨𑌂 𑌬𑍍𑌰𑌹𑍍𑌮𑌾𑌂𑌡𑌮𑌾𑌦𑍍𑌯𑌃 𑌪𑍁𑌮𑌾𑌨𑍍
𑌶𑍍𑌰𑍀𑌮𑌦𑍍𑌵𑍇𑌂𑌕𑌟𑌭𑍂𑌧𑌰𑍇𑌂𑌦𑍍𑌰𑌰𑌮𑌣𑌃 𑌕𑍁𑌰𑍍𑌯𑌾𑌦𑍍𑌧𑌰𑌿𑌰𑍍𑌮𑌂𑌗𑌳𑌮𑍍 ॥ 1 ॥
𑌯𑌤𑍍𑌤𑍇𑌜𑍋 𑌰𑌵𑌿𑌕𑍋𑌟𑌿𑌕𑍋𑌟𑌿𑌕𑌿𑌰𑌣𑌾𑌨𑍍 𑌧𑌿𑌕𑍍𑌕𑍃𑌤𑍍𑌯 𑌜𑍇𑌜𑍀𑌯𑌤𑍇
𑌯𑌸𑍍𑌯 𑌶𑍍𑌰𑍀𑌵𑌦𑌨𑌾𑌂𑌬𑍁𑌜𑌸𑍍𑌯 𑌸𑍁𑌷𑌮𑌾 𑌰𑌾𑌕𑍇𑌂𑌦𑍁𑌕𑍋𑌟𑍀𑌰𑌪𑌿 ।
𑌸𑍌𑌂𑌦𑌰𑍍𑌯𑌂 𑌚 𑌮𑌨𑍋𑌭𑌵𑌾𑌨𑌪𑌿 𑌬𑌹𑍂𑌨𑍍 𑌕𑌾𑌂𑌤𑌿𑌶𑍍𑌚 𑌕𑌾𑌦𑌂𑌬𑌿𑌨𑍀𑌂
𑌶𑍍𑌰𑍀𑌮𑌦𑍍𑌵𑍇𑌂𑌕𑌟𑌭𑍂𑌧𑌰𑍇𑌂𑌦𑍍𑌰𑌰𑌮𑌣𑌃 𑌕𑍁𑌰𑍍𑌯𑌾𑌦𑍍𑌧𑌰𑌿𑌰𑍍𑌮𑌂𑌗𑌳𑌮𑍍 ॥ 2 ॥
𑌨𑌾𑌨𑌾𑌰𑌤𑍍𑌨 𑌕𑌿𑌰𑍀𑌟𑌕𑍁𑌂𑌡𑌲𑌮𑍁𑌖𑍈𑌰𑍍𑌭𑍂𑌷𑌾𑌗𑌣𑍈𑌰𑍍𑌭𑍂𑌷𑌿𑌤𑌃
𑌶𑍍𑌰𑍀𑌮𑌤𑍍𑌕𑍌𑌸𑍍𑌤𑍁𑌭𑌰𑌤𑍍𑌨 𑌭𑌵𑍍𑌯𑌹𑍃𑌦𑌯𑌃 𑌶𑍍𑌰𑍀𑌵𑌤𑍍𑌸𑌸𑌲𑍍𑌲𑌾𑌂𑌛𑌨𑌃 ।
𑌵𑌿𑌦𑍍𑌯𑍁𑌦𑍍𑌵𑌰𑍍𑌣𑌸𑍁𑌵𑌰𑍍𑌣𑌵𑌸𑍍𑌤𑍍𑌰𑌰𑍁𑌚𑌿𑌰𑍋 𑌯𑌃 𑌶𑌂𑌖𑌚𑌕𑍍𑌰𑌾𑌦𑌿𑌭𑌿𑌃
𑌶𑍍𑌰𑍀𑌮𑌦𑍍𑌵𑍇𑌂𑌕𑌟𑌭𑍂𑌧𑌰𑍇𑌂𑌦𑍍𑌰𑌰𑌮𑌣𑌃 𑌕𑍁𑌰𑍍𑌯𑌾𑌦𑍍𑌧𑌰𑌿𑌰𑍍𑌮𑌂𑌗𑌳𑌮𑍍 ॥ 3 ॥
𑌯𑌤𑍍𑌫𑌾𑌲𑍇 𑌮𑍃𑌗𑌨𑌾𑌭𑌿𑌚𑌾𑌰𑍁𑌤𑌿𑌲𑌕𑍋 𑌨𑍇𑌤𑍍𑌰𑍇𑌽𑌬𑍍𑌜𑌪𑌤𑍍𑌰𑌾𑌯𑌤𑍇
𑌕𑌸𑍍𑌤𑍂𑌰𑍀𑌘𑌨𑌸𑌾𑌰𑌕𑍇𑌸𑌰𑌮𑌿𑌲𑌚𑍍𑌛𑍍𑌰𑍀𑌗𑌂𑌧𑌸𑌾𑌰𑍋 𑌦𑍍𑌰𑌵𑍈𑌃 ।
𑌗𑌂𑌧𑍈𑌰𑍍𑌲𑌿𑌪𑍍𑌤𑌤𑌨𑍁𑌃 𑌸𑍁𑌗𑌂𑌧𑌸𑍁𑌮𑌨𑍋𑌮𑌾𑌲𑌾𑌧𑌰𑍋 𑌯𑌃 𑌪𑍍𑌰𑌭𑍁𑌃
𑌶𑍍𑌰𑍀𑌮𑌦𑍍𑌵𑍇𑌂𑌕𑌟𑌭𑍂𑌧𑌰𑍇𑌂𑌦𑍍𑌰𑌰𑌮𑌣𑌃 𑌕𑍁𑌰𑍍𑌯𑌾𑌦𑍍𑌧𑌰𑌿𑌰𑍍𑌮𑌂𑌗𑌳𑌮𑍍 ॥ 4 ॥
𑌏𑌤𑌦𑍍𑌦𑌿𑌵𑍍𑌯𑌪𑌦𑌂 𑌮𑌮𑌾𑌸𑍍𑌤𑌿 𑌭𑍁𑌵𑌿 𑌤𑌤𑍍𑌸𑌂𑌪𑌶𑍍𑌯𑌤𑍇𑌤𑍍𑌯𑌾𑌦𑌰𑌾-
-𑌦𑍍𑌭𑌕𑍍𑌤𑍇𑌭𑍍𑌯𑌃 𑌸𑍍𑌵𑌕𑌰𑍇𑌣 𑌦𑌰𑍍𑌶𑌯𑌤𑌿 𑌯𑌦𑍍𑌦𑍃𑌷𑍍𑌟𑍍𑌯𑌾𑌽𑌤𑌿𑌸𑍌𑌖𑍍𑌯𑌂 𑌗𑌤𑌃 ।
𑌏𑌤𑌦𑍍𑌭𑌕𑍍𑌤𑌿𑌮𑌤𑍋 𑌮𑌹𑌾𑌨𑌪𑌿 𑌭𑌵𑌾𑌂𑌭𑍋𑌧𑌿𑌰𑍍𑌨𑌦𑍀𑌤𑌿 𑌸𑍍𑌪𑍃𑌶𑌨𑍍
𑌶𑍍𑌰𑍀𑌮𑌦𑍍𑌵𑍇𑌂𑌕𑌟𑌭𑍂𑌧𑌰𑍇𑌂𑌦𑍍𑌰𑌰𑌮𑌣𑌃 𑌕𑍁𑌰𑍍𑌯𑌾𑌦𑍍𑌧𑌰𑌿𑌰𑍍𑌮𑌂𑌗𑌳𑌮𑍍 ॥ 5 ॥
𑌯𑌃 𑌸𑍍𑌵𑌾𑌮𑍀 𑌸𑌰𑌸𑌸𑍍𑌤𑌟𑍇 𑌵𑌿𑌹𑌰𑌤𑍋 𑌶𑍍𑌰𑍀𑌸𑍍𑌵𑌾𑌮𑌿𑌨𑌾𑌮𑍍𑌨𑌃 𑌸𑌦𑌾
𑌸𑍌𑌵𑌰𑍍𑌣𑌾𑌲𑌯𑌮𑌂𑌦𑌿𑌰𑍋 𑌵𑌿𑌧𑌿𑌮𑍁𑌖𑍈𑌰𑍍𑌬𑌰𑍍𑌹𑌿𑌰𑍍𑌮𑍁𑌖𑍈𑌃 𑌸𑍇𑌵𑌿𑌤𑌃 ।
𑌯𑌃 𑌶𑌤𑍍𑌰𑍂𑌨𑍍 𑌹𑌨𑌯𑌨𑍍 𑌨𑌿𑌜𑌾𑌨𑌵𑌤𑌿 𑌚 𑌶𑍍𑌰𑍀𑌭𑍂𑌵𑌰𑌾𑌹𑌾𑌤𑍍𑌮𑌕𑌃
𑌶𑍍𑌰𑍀𑌮𑌦𑍍𑌵𑍇𑌂𑌕𑌟𑌭𑍂𑌧𑌰𑍇𑌂𑌦𑍍𑌰𑌰𑌮𑌣𑌃 𑌕𑍁𑌰𑍍𑌯𑌾𑌦𑍍𑌧𑌰𑌿𑌰𑍍𑌮𑌂𑌗𑌳𑌮𑍍 ॥ 6 ॥
𑌯𑍋 𑌬𑍍𑌰𑌹𑍍𑌮𑌾𑌦𑌿𑌸𑍁𑌰𑌾𑌨𑍍 𑌮𑍁𑌨𑍀𑌂𑌶𑍍𑌚 𑌮𑌨𑍁𑌜𑌾𑌨𑍍 𑌬𑍍𑌰𑌹𑍍𑌮𑍋𑌤𑍍𑌸𑌵𑌾𑌯𑌾𑌗𑌤𑌾𑌨𑍍
𑌦𑍃𑌷𑍍𑌟𑍍𑌵𑌾 𑌹𑍃𑌷𑍍𑌟𑌮𑌨𑌾 𑌬𑌭𑍂𑌵 𑌬𑌹𑍁𑌶𑌸𑍍𑌤𑍈𑌰𑌰𑍍𑌚𑌿𑌤𑌃 𑌸𑌂𑌸𑍍𑌤𑍁𑌤𑌃 ।
𑌤𑍇𑌭𑍍𑌯𑍋 𑌯𑌃 𑌪𑍍𑌰𑌦𑌦𑌾𑌦𑍍𑌵𑌰𑌾𑌨𑍍 𑌬𑌹𑍁𑌵𑌿𑌧𑌾𑌨𑍍 𑌲𑌕𑍍𑌷𑍍𑌮𑍀𑌨𑌿𑌵𑌾𑌸𑍋 𑌵𑌿𑌭𑍁𑌃
𑌶𑍍𑌰𑍀𑌮𑌦𑍍𑌵𑍇𑌂𑌕𑌟𑌭𑍂𑌧𑌰𑍇𑌂𑌦𑍍𑌰𑌰𑌮𑌣𑌃 𑌕𑍁𑌰𑍍𑌯𑌾𑌦𑍍𑌧𑌰𑌿𑌰𑍍𑌮𑌂𑌗𑌳𑌮𑍍 ॥ ॥
𑌯𑍋 𑌦𑍇𑌵𑍋 𑌭𑍁𑌵𑌿 𑌵𑌰𑍍𑌤𑌤𑍇 𑌕𑌲𑌿𑌯𑍁𑌗𑍇 𑌵𑍈𑌕𑍁𑌂𑌠𑌲𑍋𑌕𑌸𑍍𑌥𑌿𑌤𑍋
𑌭𑌕𑍍𑌤𑌾𑌨𑌾𑌂 𑌪𑌰𑌿𑌪𑌾𑌲𑌨𑌾𑌯 𑌸𑌤𑌤𑌂 𑌕𑌾𑌰𑍁𑌣𑍍𑌯𑌵𑌾𑌰𑌾𑌂 𑌨𑌿𑌧𑌿𑌃 ।
𑌶𑍍𑌰𑍀𑌶𑍇𑌷𑌾𑌖𑍍𑌯𑌮𑌹𑍀𑌂𑌧𑍍𑌰𑌮𑌸𑍍𑌤𑌕𑌮𑌣𑌿𑌰𑍍𑌭𑌕𑍍𑌤𑍈𑌕𑌚𑌿𑌂𑌤𑌾𑌮𑌣𑌿𑌃
𑌶𑍍𑌰𑍀𑌮𑌦𑍍𑌵𑍇𑌂𑌕𑌟𑌭𑍂𑌧𑌰𑍇𑌂𑌦𑍍𑌰𑌰𑌮𑌣𑌃 𑌕𑍁𑌰𑍍𑌯𑌾𑌦𑍍𑌧𑌰𑌿𑌰𑍍𑌮𑌂𑌗𑌳𑌮𑍍 ॥ ॥
𑌶𑍇𑌷𑌾𑌦𑍍𑌰𑌿𑌪𑍍𑌰𑌭𑍁𑌮𑌂𑌗𑌳𑌾𑌷𑍍𑌟𑌕𑌮𑌿𑌦𑌂 𑌤𑍁𑌷𑍍𑌟𑍇𑌨 𑌯𑌸𑍍𑌯𑍇𑌶𑌿𑌤𑍁𑌃
𑌪𑍍𑌰𑍀𑌤𑍍𑌯𑌰𑍍𑌥𑌂 𑌰𑌚𑌿𑌤𑌂 𑌰𑌮𑍇𑌶𑌚𑌰𑌣𑌦𑍍𑌵𑌂𑌦𑍍𑌵𑍈𑌕𑌨𑌿𑌷𑍍𑌠𑌾𑌵𑌤𑌾 ।
𑌵𑍈𑌵𑌾𑌹𑍍𑌯𑌾𑌦𑌿𑌶𑍁𑌭𑌕𑍍𑌰𑌿𑌯𑌾𑌸𑍁 𑌪𑌠𑌿𑌤𑌂 𑌯𑍈𑌃 𑌸𑌾𑌧𑍁 𑌤𑍇𑌷𑌾𑌮𑌪𑌿
𑌶𑍍𑌰𑍀𑌮𑌦𑍍𑌵𑍇𑌂𑌕𑌟𑌭𑍂𑌧𑌰𑍇𑌂𑌦𑍍𑌰𑌰𑌮𑌣𑌃 𑌕𑍁𑌰𑍍𑌯𑌾𑌦𑍍𑌧𑌰𑌿𑌰𑍍𑌮𑌂𑌗𑌳𑌮𑍍 ॥ ॥
𑌇𑌤𑌿 𑌶𑍍𑌰𑍀 𑌵𑍇𑌂𑌕𑌟𑍇𑌶 𑌮𑌂𑌗𑌳𑌾𑌷𑍍𑌟𑌕𑌮𑍍 ।
