atha ēkādaśastōtram
udīrṇamajaraṃ divyaṃ amṛtasyandyadhīśituḥ ।
ānandasya padaṃ vandē brahmēndrādi abhivanditam ॥ 1॥
sarvavēdapadōdgītaṃ indirāvāsamuttamam (indirādhāramuttamam) ।
ānandasya padaṃ vandē brahmēndrādi abhivanditam ॥ 2॥
sarvadēvādidēvasya vidāritamahattamaḥ ।
ānandasya padaṃ vandē brahmēndrādi abhivanditam ॥ 3॥
udāramādarānnityaṃ anindyaṃ sundarīpatēḥ ।
ānandasya padaṃ vandē brahmēndrādi abhivanditam ॥ 4॥
indīvarōdaranibhaṃ supūrṇaṃ vādimōhanam (vādimōhadam) ।
ānandasya padaṃ vandē brahmēndrādi abhivanditam ॥ 5॥
dātṛsarvāmaraiśvaryavimuktyādērahō param (varam) ।
ānandasya padaṃ vandē brahmēndrādi abhivanditam ॥ 6॥
dūrāddurataraṃ yattu tadēvāntikamantikāt ।
ānandasya padaṃ vandē brahmēndrādi abhivanditam ॥ 7॥
pūrṇasarvaguṇaikārṇamanādyantaṃ surēśituḥ ।
ānandasya padaṃ vandē brahmēndrādi abhivanditam ॥ 8॥
ānandatīrthamuninā harērānandarūpiṇaḥ ।
kṛtaṃ stōtramidaṃ puṇyaṃ paṭhannānandamāpnuyāt ॥ 9॥
iti śrīmadānandatīrthabhagavatpādāchārya virachitaṃ
dvādaśastōtrēṣu ēkādaśastōtraṃ sampūrṇam
