asya śrīraṅganāthāṣṭōttaraśatanāmastōtramahāmantrasya vēdavyāsō bhagavānṛṣiḥ anuṣṭupChandaḥ bhagavān śrīmahāviṣṇurdēvatā, śrīraṅgaśāyīti bījaṃ śrīkānta iti śaktiḥ śrīprada iti kīlakaṃ mama samastapāpanāśārthē śrīraṅgarājaprasāda siddhyarthē japē viniyōgaḥ ।
dhaumya uvācha ।
śrīraṅgaśāyī śrīkāntaḥ śrīpradaḥ śritavatsalaḥ ।
anantō mādhavō jētā jagannāthō jagadguruḥ ॥ 1 ॥
suravaryaḥ surārādhyaḥ surarājānujaḥ prabhuḥ ।
harirhatārirviśvēśaḥ śāśvataḥ śambhuravyayaḥ ॥ 2 ॥
bhaktārtibhañjanō vāgmī vīrō vikhyātakīrtimān ।
bhāskaraḥ śāstratattvajñō daityaśāstā'marēśvaraḥ ॥ 3 ॥
nārāyaṇō naraharirnīrajākṣō narapriyaḥ ।
brahmaṇyō brahmakṛdbrahmā brahmāṅgō brahmapūjitaḥ ॥ 4 ॥
kṛṣṇaḥ kṛtajñō gōvindō hṛṣīkēśō'ghanāśanaḥ ।
viṣṇurjiṣṇurjitārātiḥ sajjanapriya īśvaraḥ ॥ 5 ॥
trivikramastrilōkēśaḥ trayyarthastriguṇātmakaḥ ।
kākutsthaḥ kamalākāntaḥ kāḻīyōragamardanaḥ ॥ 6 ॥
kālāmbudaśyāmalāṅgaḥ kēśavaḥ klēśanāśanaḥ ।
kēśiprabhañjanaḥ kāntō nandasūnurarindamaḥ ॥ 7 ॥
rukmiṇīvallabhaḥ śaurirbalabhadrō balānujaḥ ।
dāmōdarō hṛṣīkēśō vāmanō madhusūdanaḥ ॥ 8 ॥
pūtaḥ puṇyajanadhvaṃsī puṇyaślōkaśikhāmaṇiḥ ।
ādimūrtirdayāmūrtiḥ śāntamūrtiramūrtimān ॥ 9 ॥
parambrahma parandhāma pāvanaḥ pavanō vibhuḥ ।
chandraśChandōmayō rāmaḥ saṃsārāmbudhitārakaḥ ॥ 10 ॥
āditēyō'chyutō bhānuḥ śaṅkaraśśiva ūrjitaḥ ।
mahēśvarō mahāyōgī mahāśaktirmahatpriyaḥ ॥ 11 ॥
durjanadhvaṃsakō'śēṣasajjanōpāstasatphalam ।
pakṣīndravāhanō'kṣōbhyaḥ kṣīrābdhiśayanō vidhuḥ ॥ 12 ॥
janārdanō jagaddhēturjitamanmathavigrahaḥ ।
chakrapāṇiḥ śaṅkhadhārī śārṅgī khaḍgī gadādharaḥ ॥ 13 ॥
ēvaṃ viṣṇōśśataṃ nāmnāmaṣṭōttaramihēritam ।
stōtrāṇāmuttamaṃ guhyaṃ nāmaratnastavābhidham ॥ 14 ॥
sarvadā sarvarōgaghnaṃ chintitārthaphalapradam ।
tvaṃ tu śīghraṃ mahārāja gachCha raṅgasthalaṃ śubham ॥ 15 ॥
snātvā tulārkē kāvēryāṃ māhātmya śravaṇaṃ kuru ।
gavāśvavastradhānyānnabhūmikanyāpradō bhava ॥ 16 ॥
dvādaśyāṃ pāyasānnēna sahasraṃ daśa bhōjaya ।
nāmaratnastavākhyēna viṣṇōraṣṭaśatēna cha ।
stutvā śrīraṅganāthaṃ tvamabhīṣṭaphalamāpnuhi ॥ 17 ॥
iti tulākāvērīmāhātmyē śantanuṃ prati dhaumyōpadiṣṭa śrīraṅganāthāṣṭōttaraśatanāma stōtram ।
