బ్రహ్మ హ దేవేభ్యో విజిగ్యే తస్య హ బ్రహ్మణో విజయే దేవా అమహీయన్త ॥ 1॥
త ఐఖ్షన్తాస్మాకమేవాయం-విఀజయో-ఽస్మాకమేవాయ-మ్మహిమేతి । తద్ధైషాం-విఀజజ్ఞౌ తేభ్యో హ ప్రాదుర్బభూవ తన్న వ్యజానత కిమిదం-యఀఖ్షమితి ॥ 2॥
తే-ఽగ్నిమబ్రువఞ్జాతవేద ఏతద్విజానీహి కిమిదం-యఀఖ్షమితి తథేతి ॥ 3॥
తదభ్యద్రవత్తమభ్యవదత్కో-ఽసీత్యగ్నిర్వా అహమస్మీత్యబ్రవీజ్జాతవేదా వా అహమస్మీతి ॥ 4॥
తస్మిన్స్త్వయి కిం-వీఀర్యమిత్యపీదꣳ సర్వ-న్దహేయం-యఀదిద-మ్పృథివ్యామితి ॥ 5॥
తస్మై తృణ-న్నిదధావేతద్దహేతి । తదుపప్రేయాయ సర్వజవేన తన్న శశాక దగ్ధుం స తత ఏవ నివవృతే నైతదశకం-విఀజ్ఞాతుం-యఀదేతద్యఖ్షమితి ॥ 6॥
అథ వాయుమబ్రువన్వాయవేతద్విజానీహి కిమేతద్యఖ్షమితి తథేతి ॥ 7॥
తదభ్యద్రవత్తమభ్యవదత్కో-ఽసీతి వాయుర్వా అహమస్మీత్యబ్రవీన్మాతరిశ్వా వా అహమస్మీతి ॥ 8॥
తస్మిన్స్త్వయి కిం-వీఀర్యమిత్యపీదం సర్వమాదదీయ యదిద-మ్పృథివ్యామితి ॥ 9॥
తస్మై తృణ-న్నిదధావేతదాదత్స్వేతి తదుపప్రేయాయ సర్వజవేన తన్న శశాకాదాతుం స తత ఏవ నివవృతే నైతదశకం-విఀజ్ఞాతుం-యఀదేతద్యఖ్షమితి ॥ 10॥
అథేన్ద్రమబ్రువన్మఘవన్నేతద్విజానీహి కిమేతద్యఖ్షమితి తథేతి తదభ్యద్రవత్తస్మాత్తిరోదధే ॥ 11॥
స తస్మిన్నేవాకాశే స్త్రియమాజగామ బహుశోభమానాముమాం హైమవతీ-న్తాగ్ంహోవాచ కిమేతద్యఖ్షమితి ॥ 12॥
॥ ఇతి కేనోపనిషది తృతీయః ఖణ్డః ॥
