తైత్తిరీయ అరణ్యక - చతుర్థః ప్రశ్నః

ఓం స॒హ నా॑ వవతు । స॒హ నౌ॑ భునక్తు । స॒హ వీ॒ర్య॑-ఙ్కరవావహై । తే॒జ॒స్వినా॒ వధీ॑తమస్తు॒ మా వి॑ద్విషా॒వహై᳚ ॥
ఓం శాన్తి॒-శ్శాన్తి॒-శ్శాన్తిః॑ ॥

అమ్భస్యపారే (4.1)
అమ్భ॑స్య పా॒రే భువ॑నస్య॒ మద్ధ్యే॒ నాక॑స్య పృ॒ష్ఠే మ॑హ॒తో మహీ॑యాన్ । శు॒క్రేణ॒ జ్యోతీగ్ం॑షి సమను॒ప్రవి॑ష్టః ప్ర॒జాప॑తిశ్చరతి॒ గర్భే॑ అ॒న్తః । యస్మి॑న్ని॒దగ్ం సఞ్చ॒ విచైతి॒ సర్వం॒-యఀస్మి॑-న్దే॒వా అధి॒ విశ్వే॑ నిషే॒దుః । తదే॒వ భూ॒త-న్తదు॒ భవ్య॑మా ఇ॒ద-న్తద॒ఖ్షరే॑ పర॒మే వ్యో॑మన్న్ । యేనా॑ వృ॒త-ఙ్ఖఞ్చ॒ దివ॑-మ్మ॒హీఞ్చ॒ యేనా॑ది॒త్య-స్తప॑తి॒ తేజ॑సా॒ భ్రాజ॑సా చ । యమ॒న్త-స్స॑ము॒ద్రే క॒వయో॒ వయ॑న్తి॒ యద॒ఖ్షరే॑ పర॒మే ప్ర॒జాః । యతః॑ ప్రసూ॒తా జ॒గతః॑ ప్రసూతీ॒ తోయే॑న జీ॒వాన్ వ్యచ॑సర్జ॒ (వ్యస॑సర్జ॒) భూమ్యా᳚మ్ । యదోష॑ధీభిః పు॒రుషా᳚-న్ప॒శూగ్​శ్చ॒ వివే॑శ భూ॒తాని॑ చరాచ॒రాణి॑ । అతః॑ పర॒-న్నాన్య॒-దణీ॑యసహి॒ పరా᳚-త్పరం॒-యఀ-న్మహ॑తో మ॒హాన్త᳚మ్ । యదే॑క-మ॒వ్యక్త॒-మన॑న్తరూపం॒-విఀశ్వ॑-మ్పురా॒ణ-న్తమ॑సః॒ పర॑స్తాత్ ॥ 1.5 (తై. అర. 6.1.1)

తదే॒వర్త-న్తదు॑ స॒త్యమా॑హు॒-స్తదే॒వ బ్రహ్మ॑ పర॒మ-ఙ్క॑వీ॒నామ్ । ఇ॒ష్టా॒పూ॒ర్త-మ్బ॑హు॒ధా జా॒త-ఞ్జాయ॑మానం-విఀ॒శ్వ-మ్బి॑భర్తి॒ భువ॑నస్య॒ నాభిః॑ । తదే॒వాగ్ని-స్తద్వా॒యు-స్తథ్సూర్య॒స్తదు॑ చ॒న్ద్రమాః᳚ । తదే॒వ శు॒క్రమ॒మృత॒-న్తద్బ్రహ్మ॒ తదాప॒-స్స ప్ర॒జాప॑తిః । సర్వే॑ నిమే॒షా జ॒జ్ఞిరే॑ వి॒ద్యుతః॒ పురు॑షా॒దధి॑ । క॒లా ము॑హూ॒ర్తాః కాష్ఠా᳚శ్చాహో-రా॒త్రాశ్చ॑ సర్వ॒శః । అ॒ర్ధ॒మా॒సా మాసా॑ ఋ॒తవ॑-స్సం​వఀథ్స॒రశ్చ॑ కల్పన్తామ్ । స ఆపః॑ ప్రదు॒ఘే ఉ॒భే ఇ॒మే అ॒న్తరి॑ఖ్ష॒-మథో॒ సువః॑ । నైన॑-మూ॒ర్ధ్వ-న్న తి॒ర్య-ఞ్చ॒ న మద్ధ్యే॒ పరి॑జగ్రభత్ । న తస్యే॑శే॒ కశ్చ॒న తస్య॑ నామ మ॒హద్యశః॑ ॥ 1.10 (తై. అర. 6.1.2)

న స॒దృంశే॑ తిష్ఠతి॒ రూప॑మస్య॒ న చఖ్షు॑షా పశ్యతి॒ కశ్చ॒నైన᳚మ్ । హృ॒దా మ॑నీ॒షా మన॑సా॒-ఽభి క్లృ॑ప్తో॒ య ఏ॑నం-విఀ॒దు-రమృ॑తా॒స్తే భ॑వన్తి । అ॒ద్భ్య-స్సమ్భూ॑తో హిరణ్యగ॒ర్భ ఇత్య॒ష్టౌ । ఏ॒ష హి దే॒వః ప్ర॒దిశో-ఽను॒ సర్వాః॒ పూర్వో॑ హి జా॒త-స్స ఉ॒ గర్భే॑ అ॒న్తః । స వి॒జాయ॑మాన-స్సజని॒ష్యమా॑ణః ప్ర॒త్యం-ముఖా᳚ స్తిష్ఠతి వి॒శ్వతో॑ముఖః । వి॒శ్వత॑శ్చ-ఖ్షురు॒త వి॒శ్వతో॑ ముఖో వి॒శ్వతో॑ హస్త ఉ॒త వి॒శ్వత॑స్పాత్ । స-మ్బా॒హుభ్యా॒-న్నమ॑తి॒ స-మ్పత॑త్రై॒-ర్ద్యావా॑ పృథి॒వీ జ॒నయ॑-న్దే॒వ ఏకః॑ । వే॒నస్త-త్పశ్య॒న్. విశ్వా॒ భువ॑నాని వి॒ద్వాన్. యత్ర॒ విశ్వ॒-మ్భవ॒త్యేక॑-నీళమ్ । యస్మి॑న్ని॒దగ్ం సఞ్చ॒ విచైక॒గ్ం॒ స ఓతః॒ ప్రోత॑శ్చ వి॒భుః ప్ర॒జాసు॑ । ప్రతద్వో॑చే అ॒మృత॒న్ను వి॒ద్వా-న్గ॑న్ధ॒ర్వో నామ॒ నిహి॑త॒-ఙ్గుహా॑సు ॥ 1.15 (తై. అర. 6.1.3)

త్రీణి॑ ప॒దా నిహి॑తా॒ గుహా॑సు॒ యస్తద్వేద॑ సవి॒తుః పి॒తా-ఽస॑త్ । స నో॒ బన్ధు॑-ర్జని॒తా స వి॑ధా॒తా ధామా॑ని॒ వేద॒ భువ॑నాని॒ విశ్వా᳚ । యత్ర॑ దే॒వా అ॒మృత॑మాన-శా॒నాస్తృ॒తీయే॒ ధామా᳚న్య॒-భ్యైర॑యన్త । పరి॒ ద్యావా॑పృథి॒వీ య॑న్తి స॒ద్యః పరి॑ లో॒కా-న్పరి॒ దిశః॒ పరి॒ సువః॑ । ఋ॒తస్య॒ తన్తుం॑-విఀతతం-విఀ॒చృత్య॒ తద॑పశ్య॒-త్తద॑భవ-త్ప్ర॒జాసు॑ । ప॒రీత్య॑ లో॒కా-న్ప॒రీత్య॑ భూ॒తాని॑ ప॒రీత్య॒ సర్వాః᳚ ప్ర॒దిశో॒ దిశ॑శ్చ । ప్ర॒జాప॑తిః ప్రథమ॒జా ఋ॒తస్యా॒త్మనా॒-ఽఽత్మాన॑-మ॒భి-సమ్బ॑భూవ । సద॑స॒స్పతి॒-మద్భు॑త-మ్ప్రి॒యమిన్ద్ర॑స్య॒ కామ్య᳚మ్ । సని॑-మ్మే॒ధా మ॑యాసిషమ్ । ఉద్దీ᳚ప్యస్వ జాతవేదో ఽప॒ఘ్నన్నిర్-ఋ॑తి॒-మ్మమ॑ ॥ 1.19 (తై. అర. 6.1.4)

ప॒శూగ్​శ్చ॒ మహ్య॒మావ॑హ॒ జీవ॑నఞ్చ॒ దిశో॑ దిశ । మానో॑ హిగ్ంసీ జ్జాతవేదో॒ గామశ్వ॒-మ్పురు॑ష॒-ఞ్జగ॑త్ । అబి॑భ్ర॒దగ్న॒ ఆగ॑హి శ్రి॒యా మా॒ పరి॑పాతయ ॥ 1.21 (తై. అర. 6.1.5)

గాయత్రీ మన్త్రాః (4.2)
పురు॑షస్య విద్మ సహస్రా॒ఖ్షస్య॑ మహాదే॒వస్య॑ ధీమహి । తన్నో॑ రుద్రః ప్రచో॒దయా᳚త్ ॥
తత్పురు॑షాయ వి॒ద్మహే॑ మహాదే॒వాయ॑ ధీమహి । తన్నో॑ రుద్రః ప్రచో॒దయా᳚త్ ॥।
తత్పురు॑షాయ వి॒ద్మహే॑ వక్రతు॒ణ్డాయ॑ ధీమహి । తన్నో॑ దన్తిః ప్రచో॒దయా᳚త్ ॥
తత్పురు॑షాయ వి॒ద్మహే॑ చక్రతు॒ణ్డాయ॑ ధీమహి । తన్నో॑ నన్దిః ప్రచో॒దయా᳚త్ ॥
తత్పురు॑షాయ వి॒ద్మహే॑ మహాసే॒నాయ॑ ధీమహి । తన్న॑-ష్షణ్ముఖః ప్రచో॒దయా᳚త్ ॥
తత్పురు॑షాయ వి॒ద్మహే॑ సువర్ణప॒ఖ్షాయ॑ ధీమహి । తన్నో॑ గరుడః ప్రచో॒దయా᳚త్ ॥
వే॒దా॒త్మ॒నాయ॑ వి॒ద్మహే॑ హిరణ్యగ॒ర్భాయ॑ ధీమహి । తన్నో᳚ బ్రహ్మ ప్రచో॒దయా᳚త్ ॥
నా॒రా॒య॒ణాయ॑ వి॒ద్మహే॑ వాసుదే॒వాయ॑ ధీమహి । తన్నో॑ విష్ణుః ప్రచో॒దయా᳚త్ ॥
వ॒జ్ర॒న॒ఖాయ॑ వి॒ద్మహే॑ తీఖ్ష్ణ-ద॒గ్గ్॒ష్ట్రాయ॑ ధీమహి । తన్నో॑ నారసిగ్ంహః ప్రచో॒దయా᳚త్ ॥
భా॒స్క॒రాయ॑ వి॒ద్మహే॑ మహద్ద్యుతిక॒రాయ॑ ధీమహి । తన్నో॑ ఆదిత్యః ప్రచో॒దయా᳚త్ ॥
వై॒శ్వా॒న॒రాయ॑ వి॒ద్మహే॑ లాలీ॒లాయ॑ ధీమహి । తన్నో॑ అగ్నిః ప్రచో॒దయా᳚త్ ॥
కా॒త్యా॒య॒నాయ॑ వి॒ద్మహే॑ కన్యకు॒మారి॑ ధీమహి । తన్నో॑ దుర్గిః ప్రచో॒దయా᳚త్ ॥ 1.33 (తై. అర. 6.1.5-7)

దూర్వా సూక్తం (4.3)
స॒హ॒స్ర॒పర॑మా దే॒వీ॒ శ॒తమూ॑లా శ॒తాఙ్కు॑రా । సర్వగ్ం॑ హరతు॑ మే పా॒ప॒-న్దూ॒ర్వా దు॑స్స్వప్న॒ నాశ॑నీ । కాణ్డా᳚-త్కాణ్డా-త్ప్ర॒రోహ॑న్తీ॒ పరు॑షః పరుషః॒ పరి॑ ।

ఏ॒వా నో॑ దూర్వే॒ ప్రత॑ను స॒హస్రే॑ణ శ॒తేన॑ చ । యా శ॒తేన॑ ప్రత॒నోషి॑ స॒హస్రే॑ణ వి॒రోహ॑సి । తస్యా᳚స్తే దేవీష్టకే వి॒ధేమ॑ హ॒విషా॑ వ॒యమ్ । అశ్వ॑క్రా॒న్తే ర॑థక్రా॒న్తే॒ వి॒ష్ణుక్రా᳚న్తే వ॒సున్ధ॑రా । శిరసా॑ ధార॑యిష్యా॒మి॒ ర॒ఖ్ష॒స్వ మా᳚-మ్పదే॒ పదే ॥ 1.37 (తై. అర. 6.1.8)

మృత్తికా సూక్తమ్ (4.4)
భూమి-ర్ధేను-ర్ధరణీ లో॑కధా॒రిణీ । ఉ॒ధృతా॑-ఽసి వ॑రాహే॒ణ॒ కృ॒ష్ణే॒న శ॑త బా॒హునా । మృ॒త్తికే॑ హన॑ మే పా॒పం॒-యఀ॒న్మ॒యా దు॑ష్కృత॒-ఙ్కృతమ్ । మృ॒త్తికే᳚ బ్రహ్మ॑దత్తా॒-ఽసి॒ కా॒శ్యపే॑నాభి॒మన్త్రి॑తా । మృ॒త్తికే॑ దేహి॑ మే పు॒ష్టి॒-న్త్వ॒యి స॑ర్వ-మ్ప్ర॒తిష్ఠి॑తమ్ ॥ 1.39

మృ॒త్తికే᳚ ప్రతిష్ఠి॑తే స॒ర్వ॒-న్త॒న్మే ని॑ర్ణుద॒ మృత్తి॑కే । తయా॑ హ॒తేన॑ పాపే॒న॒ గ॒చ్ఛా॒మి ప॑రమా॒-ఙ్గతిమ్ ॥ 1.40 (తై. అర. 6.1.9)

శత్రుజయ మన్త్రాః (4.5)
యత॑ ఇన్ద్ర॒ భయా॑మహే॒ తతో॑ నో॒ అభ॑య-ఙ్కృధి । మఘ॑వన్ ఛ॒గ్ధి తవ॒ తన్న॑ ఊ॒తయే॒ విద్విషో॒ విమృధో॑ జహి । స్వ॒స్తి॒దా వి॒శస్పతి॑-ర్వృత్ర॒హా విమృధో॑ వ॒శీ । వృషేన్ద్రః॑ పు॒ర ఏ॑తు న-స్స్వస్తి॒దా అ॑భయఙ్క॒రః । స్వ॒స్తి న॒ ఇన్ద్రో॑ వృ॒ద్ధశ్ర॑వా-స్స్వ॒స్తి నః॑ పూ॒షా వి॒శ్వవే॑దాః । స్వ॒స్తి న॒స్తార్ఖ్ష్యో॒ అరి॑ష్టనేమి-స్స్వ॒స్తి నో॒ బృహ॒స్పతి॑-ర్దధాతు । ఆపా᳚న్త-మన్యుస్తృ॒పల॑ప్రభర్మా॒ ధుని॒-శ్శిమీ॑వాం॒-ఛరు॑మాగ్ం ఋజీ॒షీ । సోమో॒ విశ్వా᳚న్యత॒సా వనా॑ని॒ నార్వాగిన్ద్ర॑-మ్ప్రతి॒మానా॑ని దేభుః ॥ 1.44

బ్రహ్మ॑ జజ్ఞా॒న-మ్ప్ర॑థ॒మ-మ్పు॒రస్తా॒-ద్విసీ॑మ॒త-స్సు॒రుచో॑ వే॒న ఆ॑వః । స బు॒ధ్నియా॑ ఉప॒మా అ॑స్య వి॒ష్ఠా-స్స॒తశ్చ॒ యోని॒-మస॑తశ్చ॒ వివః॑ । స్యో॒నా పృ॑థివి॒ భవా॑ నృఖ్ష॒రా ని॒వేశ॑నీ । యచ్ఛా॑ న॒-శ్శర్మ॑ స॒ప్రథాః᳚ । గ॒న్ధ॒ద్వా॒రా-న్దు॑రాధ॒ర్​షా॒-న్ని॒త్యపు॑ష్టా-ఙ్కరీ॒షిణీ᳚మ్ । ఈ॒శ్వరీగ్ం॑ సర్వ॑భూతా॒నా॒-న్తామి॒హోప॑హ్వయే॒ శ్రియమ్ । శ్రీ᳚ర్మే భ॒జతు । అలఖ్ష్మీ᳚ర్మే న॒శ్యతు । విష్ణు॑ముఖా॒ వై దే॒వా-శ్ఛన్దో॑-భిరి॒మాం​ల్లోఀ॒కా-న॑నపజ॒య్య-మ॒భ్య॑జయన్న్ । మ॒హాగ్ం ఇన్ద్రో॒ వజ్ర॑బాహు-ష్షోడ॒శీ శర్మ॑ యచ్ఛతు ॥ 1.48 (తై. అర. 6.1.10)

స్వ॒స్తి నో॑ మ॒ఘవా॑ కరోతు॒ హన్తు॑ పా॒ప్మానం॒-యోఀ᳚-ఽస్మా-న్ద్వేష్టి॑ । సో॒మాన॒గ్గ్॒ స్వర॑ణ-ఙ్కృణు॒హి బ్ర॑హ్మణస్పతే । క॒ఖ్షీవ॑న్తం॒-యఀ ఔ॑శి॒జమ్ । శరీ॑రం-యఀజ్ఞశమ॒ల-ఙ్కుసీ॑ద॒-న్తస్మి᳚-న్థ్సీదతు॒ యో᳚-ఽస్మా-న్ద్వేష్టి॑ । చర॑ణ-మ్ప॒విత్రం॒-విఀత॑త-మ్పురా॒ణం-యేఀన॑ పూ॒త-స్తర॑తి దుష్కృ॒తాని॑ । తేన॑ ప॒విత్రే॑ణ శు॒ద్ధేన॑ పూ॒తా అతి॑ పా॒ప్మాన॒-మరా॑తి-న్తరేమ । స॒జోషా॑ ఇన్ద్ర॒ సగ॑ణో మ॒రుద్భి॒-స్సోమ॑-మ్పిబ వృత్రహఞ్ఛూర వి॒ద్వాన్ । జ॒హి శత్రూ॒గ్ం॒ రప॒ మృధో॑ నుద॒స్వాథాభ॑య-ఙ్కృణుహి వి॒శ్వతో॑ నః । సు॒మి॒త్రా న॒ ఆప॒ ఓష॑ధయ-స్సన్తు దుర్మి॒త్రాస్తస్మై॑ భూయాసు॒-ర్యా᳚-ఽస్మా-న్ద్వేష్టి॒ యఞ్చ॑ వ॒య-న్ద్వి॒ష్మః । ఆపో॒ హిష్ఠా మ॑యో॒ భువ॒స్తా న॑ ఊ॒ర్జే ద॑ధాతన । 1.53 (తై. అర. 6.1.11)

మ॒హేరణా॑య॒ చఖ్ష॑సే । యో వ॑-శ్శి॒వత॑మో॒ రస॒-స్తస్య॑ భాజయతే॒ హ నః॑ । ఉ॒శ॒తీ-రి॑వ మా॒తరః॑ । తస్మా॒ అర॑ఙ్గమామవో॒ యస్య॒ ఖ్షయా॑య॒ జిన్వ॑థ । ఆపో॑ జ॒నయ॑థా చ నః ॥ 1.54 (తై. అర. 6.1.12)

అఘమర్​షణ సూక్తమ్ (4.6)
హిర॑ణ్యశృఙ్గం॒-వఀరు॑ణ॒-మ్ప్రప॑ద్యే తీ॒ర్థ-మ్మే॑ దేహి॒ యాచి॑తః । య॒న్మయా॑ భు॒క్త-మ॒సాధూ॑నా-మ్పా॒పేభ్య॑శ్చ ప్ర॒తిగ్ర॑హః । యన్మే॒ మన॑సా వా॒చా॒ క॒ర్మ॒ణా వా దు॑ష్కృత॒-ఙ్కృతమ్ । తన్న॒ ఇన్ద్రో॒ వరు॑ణో॒ బృహ॒స్పతి॑-స్సవి॒తా చ॑ పునన్తు॒ పునః॑ పునః । నమో॒-ఽగ్నయే᳚-ఽఫ్సు॒మతే॒ నమ॒ ఇన్ద్రా॑య॒ నమో॒ వరు॑ణాయ॒ నమో వారుణ్యై॑ నమో॒-ఽద్భ్యః ॥ 1.57

యద॒పా-ఙ్క్రూ॒రం-యఀద॑మే॒ద్ధ్యం-యఀద॑శా॒న్త-న్తదప॑గచ్ఛతాత్ । అ॒త్యా॒శ॒నా-ద॑తీపా॒నా॒-ద్య॒చ్చ ఉ॒గ్రా-త్ప్ర॑తి॒గ్రహా᳚త్ । తన్నో॒ వరు॑ణో రా॒జా॒ పా॒ణినా᳚ హ్యవ॒మర్​శ॑తు । సో॑-ఽహమ॑పా॒పో వి॒రజో॒ నిర్ము॒క్తో ము॑క్తకి॒ల్బిషః । నాక॑స్య పృ॒ష్ఠమారు॑హ్య॒ గచ్ఛే॒-ద్బ్రహ్మ॑సలో॒కతామ్ । యశ్చా॒॑ఫ్సు వరు॑ణ॒-స్స పు॒నాత్వ॑ఘమర్​ష॒ణః । ఇ॒మ-మ్మే॑ గఙ్గే యమునే సరస్వతి॒ శుతు॑ద్రి॒ స్తోమగ్ం॑ సచతా॒ పరు॒ష్ణియా । అ॒సి॒క్ని॒యా మ॑రుద్వృధే వి॒తస్త॒యా-ఽఽర్జీ॑కీయే శృణు॒హ్యా సు॒షోమ॑యా । ఋ॒తఞ్చ॑ స॒త్యఞ్చా॒-భీ᳚ద్ధా॒ త్తప॒సో-ఽద్ధ్య॑జాయత । తతో॒ రాత్రి॑-రజాయత॒ తత॑-స్సము॒ద్రో అ॑ర్ణ॒వః ॥ 1.63 (తై. అర. 6.1.13)

స॒ము॒ద్రా-ద॑ర్ణ॒వా-దధి॑ సం​వఀథ్స॒రో అ॑జాయత । అ॒హో॒రా॒త్రాణి॑ వి॒దధ॒-ద్(మి॒దధ॒ద్) విశ్వ॑స్య మిష॒తో వ॒శీ । సూ॒ర్యా॒చ॒న్ద్ర॒మసౌ॑ ధా॒తా య॑థా పూ॒ర్వ మ॑కల్పయత్ । దివ॑ఞ్చ పృథి॒వీ-ఞ్చా॒న్తరి॑ఖ్ష॒ మథో॒ సువః॑ । య-త్పృ॑థి॒వ్యాగ్ం రజ॑స్స్వ॒ మాన్తరి॑ఖ్షే వి॒రోద॑సీ । ఇ॒మాగ్​ స్తదా॒పో వ॑రుణః పు॒నాత్వ॑ఘమర్​ష॒ణః । పు॒నన్తు॒ వస॑వః పు॒నాతు॒ వరు॑ణః పు॒నాత్వ॑ఘమర్​ష॒ణః । ఏ॒ష భూ॒తస్య॑ మ॒ద్ధ్యే భువ॑నస్య గో॒ప్తా । ఏ॒ష పు॒ణ్యకృ॑తాం-లోఀ॒కా॒నే॒ష మృ॒త్యోర్-హి॑ర॒ణ్మయ᳚మ్ । ద్యావా॑పృథి॒వ్యోర్-హి॑ర॒ణ్మయ॒గ్ం॒ సగ్గ్​శ్రి॑త॒గ్ం॒ సువః॑ । 1.66 (తై. అర. 6.1.14)

స న॒-స్సువ॒-స్సగ్ం శి॑శాధి । ఆర్ద్ర॒-ఞ్జ్వల॑తి॒ జ్యోతి॑-ర॒హమ॑స్మి । జ్యోతి॒-ర్జ్వల॑తి॒ బ్రహ్మా॒హమ॑స్మి । యో॑-ఽహమ॑స్మి॒ బ్రహ్మా॒హమ॑స్మి । అ॒హమ॑స్మి॒ బ్రహ్మా॒హమ॑స్మి । అ॒హమే॒వాహ-మ్మా-ఞ్జు॑హోమి॒ స్వాహా᳚ । అ॒కా॒ర్య॒-కా॒ర్య॑వ కీ॒ర్ణీ స్తే॒నో భ్రూ॑ణ॒హా గు॑రుత॒ల్పగః । వరు॑ణో॒-ఽపామ॑ఘమర్​ష॒ణ-స్తస్మా᳚-త్పా॒పా-త్ప్రము॑చ్యతే । ర॒జోభూమి॑స్త్వ॒మాగ్ం రోద॑యస్వ॒ ప్రవ॑దన్తి॒ ధీరాః᳚ । ఆక్రా᳚న్-థ్సము॒ద్రః ప్ర॑థ॒మే విధ॑ర్మ-ఞ్జ॒నయ॑-న్ప్ర॒జా భువ॑నస్య॒ రాజా᳚ । వృషా॑ ప॒విత్రే॒ అధి॒సానో॒ అవ్యే॑ బృ॒హ-థ్సోమో॑ వావృధే సువా॒న ఇన్దుః॑ ॥ 1.70

(పుర॑స్తా॒--ద్యశో॒ - గుహా॑సు॒ - మమ॑ - చక్రతు॒ణ్డాయ॑ ధీమహి - తీఖ్షద॒గ్గ్॒ష్ఠ్రాయ॑ ధీమహి॒ - పరి॑ - ప్ర॒తిష్ఠి॑తం - దేభు--ర్ యచ్ఛతు - దధాతనా॒- ద్భ్యో᳚ - ఽర్ణ॒వః - సువో॒ - రాజైక॑-ఞ్చ) (ఆ1)

దుర్గా సూక్తమ్ (4.7)
జా॒తవే॑దసే సునవామ॒ సోమ॑-మరాతీయ॒తో నిద॑హాతి॒ వేదః॑ । స నః॑ పర్​ష॒దతి॑ దు॒ర్గాణి॒ విశ్వా॑ నా॒వేవ॒ సిన్ధు॑-న్దురి॒తా-ఽత్య॒గ్నిః ।తామ॒గ్నివ॑ర్ణా॒-న్తప॑సా జ్వల॒న్తీం-వైఀ ॑రోచ॒నీ-ఙ్క॑ర్మఫ॒లేషు॒ జుష్టా᳚మ్ । దు॒ర్గా-న్దే॒వీగ్ం శర॑ణమ॒హ-మ్ప్రప॑ద్యే సు॒తర॑సి తరసే॒ నమః॑ ।అగ్నే॒ త్వ-మ్పా॑రయా॒ నవ్యో॑ అ॒స్మాన్-థ్స్వ॒స్తి-భి॒రతి॑ దు॒ర్గాణి॒ విశ్వా᳚ । పూశ్చ॑ పృ॒థ్వీ బ॑హు॒లా న॑ ఉ॒ర్వీ భవా॑ తో॒కాయ॒ తన॑యాయ॒ శం​యోఀః । విశ్వా॑ని నో దు॒ర్గహా॑ జాతవేద॒-స్సిన్ధు॒-న్న నా॒వా దు॑రి॒తా-ఽతి॑పర్​షి । అగ్నే॑ అత్రి॒వ-న్మన॑సా గృణా॒నో᳚-ఽస్మాక॑-మ్బోద్ధ్యవి॒తా త॒నూనా᳚మ్ । పృ॒త॒నా॒జిత॒గ్ం॒ సహ॑మాన-ము॒గ్రమ॒గ్నిగ్ం హు॑వేమ పర॒మా-థ్స॒ధస్థా᳚త్ । స నః॑ పర్​ష॒దతి॑ దు॒ర్గాణి॒ విశ్వా॒ ఖ్షామ॑ద్దే॒వో అతి॑ దురి॒తా-ఽత్య॒గ్నిః । ప్ర॒త్నోషి॑-క॒మీడ్యో॑ అద్ధ్వ॒రేషు॑ స॒నాచ్చ॒ హోతా॒ నవ్య॑శ్చ॒ సథ్సి॑ । స్వాఞ్చా᳚గ్నే త॒నువ॑-మ్పి॒ప్రయ॑స్వా॒స్మభ్య॑ఞ్చ॒ సౌభ॑గ॒మాయ॑జస్వ । గోభి॒-ర్జుష్ట॑మ॒యుజో॒ నిషి॑క్త॒-న్తవే᳚న్ద్ర విష్ణో॒-రను॒సఞ్చ॑రేమ । నాక॑స్య పృ॒ష్ఠమ॒భి సం॒​వఀసా॑నో॒ వైష్ణ॑వీం-లోఀ॒క ఇ॒హ మా॑దయన్తామ్ ॥ 2.7 (దు॒రి॒తా-ఽత్య॒గ్నిశ్చ॒త్వారి॑ చ) (తై. అర. 6.2.1)

[ ఓ-ఙ్కా॒త్యా॒య॒నాయ॑ వి॒ద్మహే॑ కన్యకు॒మారి॑ ధీమహి । తన్నో॑ దుర్గిః ప్రచో॒దయా᳚త్ ॥ ]

వ్యాహృతి హోమ మన్త్రాః (4.8)
భూ-రన్న॑-మ॒గ్నయే॑ పృథి॒వ్యై స్వాహా॒, భువో-ఽన్నం॑-వాఀ॒యవే॒-ఽన్తరి॑ఖ్షాయ॒ స్వాహా॒, సువ॒రన్న॑-మాది॒త్యాయ॑ ది॒వే స్వాహా॒, భూర్భువ॒స్సువ॒-రన్న॑-ఞ్చ॒న్ద్రమ॑సే ది॒గ్భ్య-స్స్వాహా॒, నమో॑ దే॒వేభ్య॑-స్స్వ॒ధా పి॒తృభ్యో॒ భూర్భువ॒స్సువ॒-రన్న॒మోమ్ ॥ 3.1 (తై. అర. 6.3.1)

భూ-ర॒గ్నయే॑ పృథి॒వ్యై స్వాహా॒, భువో॑ వా॒యవే॒-ఽన్తరి॑ఖ్షాయ॒ స్వాహా॒ ,
సువ॑రాది॒త్యాయ॑ ది॒వే స్వాహా॒, భూ-ర్భువ॒స్సువ॑-శ్చ॒న్ద్రమ॑సే ది॒గ్భ్య-స్స్వాహా॒, నమో॑ దే॒వేభ్య॑-స్స్వ॒ధా పి॒తృభ్యో॒ భూర్భువ॒స్సువ॒-రగ్న॒ ఓమ్ ॥ 4.1

భూ-ర॒గ్నయే॑ చ పృథి॒వ్యై చ॑ మహ॒తే చ॒ స్వాహా॒, భువో॑ వా॒యవే॑ చా॒న్తరి॑ఖ్షాయ చ మహ॒తే చ॒ స్వాహా॒, సువ॑రాది॒త్యాయ॑ చ ది॒వే చ॑ మహ॒తే చ॒ స్వాహా॒, భూ-ర్భువ॒స్సువ॑-శ్చ॒న్ద్రమ॑సే చ॒ నఖ్ష॑త్రేభ్యశ్చ ది॒గ్భ్యశ్చ॑ మహ॒తే చ॒ స్వాహా॒, నమో॑ దే॒వేభ్య॑-స్స్వ॒ధా పి॒తృభ్యో॒ భూర్భువ॒స్సువ॒-ర్మహ॒రోమ్ ॥ 5.1 (తై. అర. 6.4.1)

జ్ఞానప్రాప్త్యర్థా హోమమన్త్రాః (4.9)
పాహి నో అగ్న ఏన॑సే స్వా॒హా । పాహి నో విశ్వవేద॑సే స్వా॒హా । యజ్ఞ-మ్పాహి విభావ॑సో స్వా॒హా । సర్వ-మ్పాహి శతక్ర॑తో స్వా॒హా ॥ 6.1 (తై. అర. 6.7.1)

పా॒హి నో॑ అగ్న॒ ఏక॑యా । పా॒హ్యు॑త ద్వి॒తీయ॑యా । పా॒హ్యూర్జ॑-న్తృ॒తీయ॑యా । పా॒హి గీ॒ర్భి-శ్చ॑త॒సృభి॑-ర్వసో॒ స్వాహా᳚ ॥ 7.1 (తై. అర. 6.6.1)

వేదావిస్మరణాయ జపమన్త్రాః (4.10)
య-శ్ఛన్ద॑సా-మృష॒భో వి॒శ్వరూ॑ప॒-శ్ఛన్దో᳚భ్య॒-శ్ఛన్దాగ్॑స్యా వి॒వేశ॑ । సచాగ్ం శిక్యః పురో వాచో॑పని॒ష-దిన్ద్రో᳚ జ్యే॒ష్ఠ ఇ॑న్ద్రి॒యాయ॒ ఋషి॑భ్యో॒ నమో॑ దే॒వేభ్య॑-స్స్వ॒ధా పి॒తృభ్యో॒ భూర్భువ॒స్సువ॒-శ్ఛన్ద॒ ఓమ్ ॥ 8.1 (తై. అర. 6.8.1)

నమో॒ బ్రహ్మ॑ణే ధా॒రణ॑-మ్మే అ॒స్త్వ-ని॑రాకరణం-ధా॒రయి॑తా భూయాస॒-ఙ్కర్ణ॑యో-శ్శ్రు॒త-మ్మాచ్యో᳚ఢ్వ॒-మ్మమా॒ముష్య॒ ఓమ్ ॥ 9.1 (తై. అర. 6.9.1)

తపః ప్రశంసా (4.11)
ఋ॒త-న్తప॑-స్స॒త్య-న్తప॑-శ్శ్రు॒త-న్తప॑-శ్శా॒న్త-న్తపో॒ దమ॒ స్తప॒-శ్శమ॒స్తపో॒ దాన॒-న్తపో॒ యజ్ఞ॒-న్తపో॒ భూర్భువ॒స్సువ॒-ర్బ్రహ్మై॒-తదుపా᳚స్యై॒-తత్తపః॑ ॥ 10.1 (తై. అర. 6.10.1)

విహితాచరణ ప్రశంసా నిషిద్ధాచరణ నిన్దా చ (4.12)
యథా॑ వృ॒ఖ్షస్య॑ స॒పుంష్పి॑తస్య దూ॒రా-ద్గ॒న్ధో వా᳚త్యే॒వ-మ్పుణ్య॑స్య క॒ర్మణో॑ దూ॒రా-ద్గ॒న్ధో వా॑తి॒ యథా॑-ఽసిధా॒రా-ఙ్క॒ర్తే-ఽవ॑హితా-మవ॒క్రామే॒ యద్యువే॒ యువే॒ హవా॑ వి॒హ్వయి॑ష్యామి క॒ర్త-మ్ప॑తిష్యా॒మీత్యే॒వ-మ॒మృతా॑-దా॒త్మాన॑-ఞ్జు॒గుఫ్సే᳚త్ ॥ 11.1 (తై. అర. 6.11.1)

దహర విద్యా (4.13)
అ॒ణో-రణీ॑యా-న్మహ॒తో మహీ॑యా-నా॒త్మా గుహా॑యా॒-న్నిహి॑తో-ఽస్య జ॒న్తోః । తమ॑క్రతు-మ్పశ్యతి వీతశో॒కో ధా॒తుః ప్ర॒సాదా᳚-న్మహి॒మాన॑మీశమ్ । స॒ప్త ప్రా॒ణాః ప్ర॒భవ॑న్తి॒ తస్మా᳚-థ్స॒ప్తార్చిష॑-స్స॒మిధ॑-స్స॒ప్త జి॒హ్వాః । స॒ప్త ఇ॒మే లో॒కా యేషు॒ చర॑న్తి ప్రా॒ణా గు॒హాశ॑యా॒-న్నిహి॑తా-స్స॒ప్త స॑ప్త । అత॑-స్సము॒ద్రా గి॒రయ॑శ్చ॒ సర్వే॒-ఽస్మా-థ్స్యన్ద॑న్తే॒ సిన్ధ॑వ॒-స్సర్వ॑రూపాః । అత॑శ్చ॒ విశ్వా॒ ఓష॑ధయో॒ రసా᳚చ్చ॒ యేనై॑ష భూ॒త-స్తి॑ష్ఠత్యన్తరా॒త్మా । బ్ర॒హ్మా దే॒వానా᳚-మ్పద॒వీః క॑వీ॒నా-మృషి॒-ర్విప్రా॑ణా-మ్మహి॒షో మృ॒గాణా᳚మ్ । శ్యే॒నో గృధ్రా॑ణా॒గ్॒ స్వధి॑తి॒-ర్వనా॑నా॒గ్ం॒ సోమః॑ ప॒విత్ర॒ మత్యే॑తి॒ రేభన్న్॑ । అ॒జా మేకాం॒-లోఀహి॑త-శుక్ల-కృ॒ష్ణా-మ్బ॒హ్వీ-మ్ప్ర॒జా-ఞ్జ॒నయ॑న్తీ॒గ్ం॒ సరూ॑పామ్ । అ॒జో హ్యేకో॑ జు॒షమా॑ణో-ఽను॒శేతే॒ జహా᳚త్యేనా-మ్భు॒క్త-భో॑గా॒మజో᳚-ఽన్యః ॥ 12.5 (తై. అర. 6.12.1)

హ॒గ్ం॒స-శ్శు॑చి॒ష-ద్వసు॑-రన్తరిఖ్ష॒-సద్ధోతా॑ వేది॒ష-దతి॑థి-ర్దురోణ॒సత్ । నృ॒ష-ద్వ॑ర॒స-దృ॑త॒స-ద్వ్యో॑మ॒స-ద॒బ్జా గో॒జా ఋ॑త॒జా అ॑ద్రి॒జా ఋ॒త-మ్బృ॒హత్ । ఘృ॒త-మ్మి॑మిఖ్షిరే ఘృ॒తమ॑స్య॒ యోని॑-ర్ఘృ॒తే శ్రి॒తో ఘృ॒తము॑వస్య॒ ధామ॑ । అ॒ను॒ష్వ॒ధమావ॑హ మా॒దయ॑స్వ॒ స్వాహా॑ కృతం-వృఀషభ వఖ్షి హ॒వ్యమ్ । స॒ము॒ద్రా దూ॒ర్మి-ర్మధు॑మా॒గ్ం॒ ఉదా॑ర-దుపా॒గ్ం॒శునా॒ సమ॑మృత॒త్వ మా॑నట్ । ఘృ॒తస్య॒ నామ॒ గుహ్యం॒-యఀదస్తి॑ జి॒హ్వా దే॒వానా॑-మ॒మృత॑స్య॒ నాభిః॑ । వ॒య-న్నామ॒ ప్రబ్ర॑వామా ఘృ॒తేనా॒స్మిన్. య॒జ్ఞే ధా॑రయామా॒ నమో॑భిః । ఉప॑ బ్ర॒హ్మా శృ॑ణవచ్ఛ॒స్యమా॑న॒-ఞ్చతు॑-శ్శృఙ్గో ఽవమీ-ద్గౌ॒ర ఏ॒తత్ । చ॒త్వారి॒ శృఙ్గా॒ త్రయో॑ అస్య॒ పాదా॒ ద్వే శీ॒ర॒.షే స॒ప్త హస్తా॑సో అ॒స్య । త్రిధా॑ బ॒ద్ధో వృ॑ష॒భో రో॑రవీతి మ॒హో దే॒వో మర్త్యా॒గ్ం॒ ఆవి॑వేశ ॥ 12.10 (తై. అర. 6.12.2)

త్రిధా॑ హి॒త-మ్ప॒ణిభి॑-ర్గు॒హ్యమా॑న॒-ఙ్గవి॑-దే॒వాసో॑ ఘృ॒తమన్వ॑విన్దన్న్ । ఇన్ద్ర॒ ఏక॒గ్ం॒ సూర్య॒ ఏక॑-ఞ్జజాన వే॒నా దేకగ్గ్॑ స్వ॒ధయా॒ నిష్ట॑తఖ్షుః । యో దే॒వానా᳚-మ్ప్రథ॒మ-మ్పు॒రస్తా॒-ద్విశ్వా॒ధియో॑ రు॒ద్రో మ॒హర్​షిః॑ । హి॒ర॒ణ్య॒గ॒ర్భ-మ్ప॑శ్యత॒ జాయ॑మాన॒గ్ం॒ సనో॑ దే॒వ-శ్శు॒భయా॒ స్మృత్యా॒ సం​యుఀ ॑నక్తు । యస్మా॒త్పర॒-న్నాప॑ర॒ మస్తి॒ కిఞ్చి॒ద్యస్మా॒-న్నాణీ॑యో॒ న జ్యాయో᳚-ఽస్తి॒ కశ్చి॑త్ । వృ॒ఖ్ష ఇ॑వ స్తబ్ధో ది॒వి తి॑ష్ఠ॒-త్యేక॒స్తేనే॒ద-మ్పూ॒ర్ణ-మ్పురు॑షేణ॒ సర్వ᳚మ్ ॥ 12.13

(సన్యాస సూక్తమ్)
న కర్మ॑ణా న ప్ర॒జయా॒ ధనే॑న॒ త్యాగే॑నైకే అమృత॒త్వ-మా॑న॒శుః । పరే॑ణ॒ నాక॒-న్నిహి॑త॒-ఙ్గుహా॑యాం-విఀ॒భ్రాజ॑దే॒త-ద్యత॑యో వి॒శన్తి॑ ॥ వే॒దా॒న్త॒ వి॒జ్ఞాన॒-సుని॑శ్చితా॒ర్థా-స్సన్యా॑స యో॒గాద్యత॑య-శ్శుద్ధ॒ సత్త్వాః᳚ । తే బ్ర॑హ్మలో॒కే తు॒ పరా᳚న్తకాలే॒ పరా॑మృతా॒-త్పరి॑ముచ్యన్తి॒ సర్వే᳚ । ద॒హ్రం॒-విఀ॒పా॒ప-మ్ప॒రమే᳚శ్మ భూతం॒-యఀ-త్పు॑ణ్డరీ॒క-మ్పు॒రమ॑ద్ధ్య స॒గ్గ్॒స్థమ్ ।
త॒త్రా॒పి॒ ద॒హ్ర-ఙ్గ॒గనం॑-విఀశోక॒-స్తస్మి॑న్. యద॒న్తస్త-దుపా॑సిత॒వ్యమ్ ॥ యో వేదాదౌ స్వ॑రః ప్రో॒క్తో॒ వే॒దాన్తే॑ చ ప్ర॒తిష్ఠి॑తః । తస్య॑ ప్ర॒కృతి॑-లీన॒స్య॒ యః॒ పర॑-స్స॒ మ॒హేశ్వ॑రః ॥ 12.17 (తై. అర. 6.12.3)

(అజో᳚-ఽన్య॒ - ఆవి॑వేశ॒ - సర్వే॑ చ॒త్వారి॑ చ)

నారాయణ సూక్తం (4.14)

స॒హ॒స్ర॒శీర్​ష॑-న్దే॒వం॒-విఀ॒శ్వాఖ్షం॑-విఀ॒శ్వ శ॑-మ్భువమ్ । విశ్వ॑-న్నా॒రాయ॑ణ-న్దే॒వ॒మ॒ఖ్షర॑-మ్పర॒మ-మ్ప॒దమ్ । వి॒శ్వతః॒ పర॑మాన్ని॒త్యం॒-విఀ॒శ్వ-న్నా॑రాయ॒ణగ్ం హ॑రిమ్ । విశ్వ॑మే॒వేద-మ్పురు॑ష॒-స్త-ద్విశ్వ॒ముప॑జీవతి । పతిం॒-విఀశ్వ॑స్యా॒త్మేశ్వ॑ర॒గ్ం॒ శాశ్వ॑తగ్ం శి॒వమ॑చ్యుతమ్ । నా॒రాయ॒ణ-మ్మ॑హాజ్ఞే॒యం॒-విఀ॒శ్వాత్మా॑న-మ్ప॒రాయ॑ణమ్ । నా॒రాయ॒ణ ప॑రో జ్యో॒తి॒రా॒త్మా నా॑రయ॒ణః ప॑రః । నా॒రాయ॒ణ ప॑ర-మ్బ్ర॒హ్మ॒ త॒త్త్వ-న్నా॑రాయ॒ణః ప॑రః । నా॒రాయ॒ణ ప॑రో ధ్యా॒తా॒ ధ్యా॒న-న్నా॑రాయ॒ణః ప॑రః । యచ్చ॑ కి॒ఞ్చిజ్-జ॑గ-థ్స॒ర్వ॒-న్దృ॒శ్యతే᳚ శ్రూయ॒తే-ఽపి॑ వా । 13.4 (తై. అర. 6.13.1)

అన్త॑-ర్బ॒హిశ్చ॑ త-థ్స॒ర్వం॒-వ్యాఀ॒ప్య నా॑రాయ॒ణ-స్స్థి॑తః । అన॑న్త॒ మవ్య॑య-ఙ్క॒విగ్ం స॑ము॒ద్రే-ఽన్తం॑-విఀ॒శ్వ శ॑భుం​వఀమ్ । ప॒ద్మ॒కో॒శ-ప్ర॑తీకా॒శ॒గ్ం॒ హృ॒దయ॑-ఞ్చాప్య॒ధోము॑ఖమ్ । అధో॑ ని॒ష్ట్యా వి॑తస్త్యా॒న్తే॒ నా॒భ్యాము॑పరి॒ తిష్ఠ॑తి । జ్వా॒ల॒మా॒లా కు॑ల-మ్భా॒తీ॒ వి॒శ్వస్యా॑యత॒న-మ్మ॑హత్ । సన్త॑తగ్ం శి॒లాభి॑స్తు॒ లమ్బ॑త్యా కోశ॒సన్ని॑భమ్ । తస్యాన్తే॑ సుషి॒రగ్ం సూ॒ఖ్ష్మ-న్తస్మి᳚న్-థ్స॒ర్వ-మ్ప్రతి॑ష్ఠితమ్ । తస్య॒ మద్ధ్యే॑ మ॒హాన॑గ్ని-ర్వి॒శ్వార్చి॑-ర్వి॒శ్వతో॑ ముఖః । సో-ఽగ్ర॑భు॒గ్ విభ॑జ-న్తి॒ష్ఠ॒-న్నాహా॑ర-మజ॒రః క॒విః । తి॒ర్య॒గూ॒ర్ధ్వ మ॑ధ-శ్శా॒యీ॒ ర॒శ్మయ॑స్తస్య॒ సన్త॑తా । స॒న్తా॒పయ॑తి స్వ-న్దే॒హమాపా॑దతల॒ మస్త॑కః । తస్య॒ మద్ధ్యే॒ వహ్ని॑శిఖా అ॒ణీయో᳚ర్ధ్వా వ్య॒వస్థి॑తః । నీ॒లతో॑ యద॑ మద్ధ్య॒స్థా॒-ద్వి॒ద్యుల్లే॑ఖేవ॒ భాస్వ॑రా । నీ॒వార॒ శూక॑వత్త॒న్వీ॒ పీ॒తా భా᳚స్వత్య॒ణూప॑మా । తస్యా᳚-శ్శిఖా॒యా మ॑ద్ధ్యే ప॒రమా᳚త్మా వ్య॒వస్థి॑తః । స బ్రహ్మ॒ స శివ॒-స్స హరి॒-స్సేన్ద్ర॒-స్సో-ఽఖ్ష॑రః పర॒మ-స్స్వ॒రాట్ ॥ 13.12 (తై. అర. 6.13.2)
(అపి॑ వా॒ - సన్త॑తా॒ షట్ చ॑)

ఆదిత్య మణ్డలే పరబ్రహ్మోపాసనం (4.15)
ఆ॒ది॒త్యో వా ఏ॒ష ఏ॒త-న్మ॒ణ్డల॒-న్తప॑తి॒ తత్ర॒ తా ఋచ॒స్తదృ॒చా మ॑ణ్డల॒గ్ం॒ స ఋ॒చాం-లోఀ॒కో-ఽథ॒య ఏ॒ష ఏ॒తస్మి॑-న్మ॒ణ్డలే॒-ఽర్​చి-ర్దీ॒ప్యతే॒ తాని॒ సామా॑ని॒ స సా॒మ్నాం-లోఀ॒కో-ఽథ॒ య ఏ॒ష ఏ॒తస్మి॑-న్మ॒ణ్డలే॒-ఽర్చిషి॒ పురు॑ష॒స్తాని॒ యజూగ్ం॑షి॒ స యజు॑షా మణ్డల॒గ్ం॒ స యజు॑షాం-లోఀ॒క-స్సైషా త్ర॒య్యేవ॑ వి॒ద్యా త॑పతి॒ య ఏ॒షో᳚-ఽన్త-రా॑ది॒త్యే హి॑ర॒ణ్మయః॒ పురు॑షః ॥ 14.1 (తై. అర. 6.14.1)

ఆదిత్యపురుషస్య సర్వాత్మకత్వ ప్రదర్​శనం (4.16)
ఆ॒ది॒త్యో వై తేజ॒ ఓజో॒ బలం॒-యఀశ॒-శ్చఖ్షు॒-శ్శ్రోత్ర॑మా॒త్మా మనో॑ మ॒న్యు-ర్మను॑-ర్మృ॒త్యు-స్స॒త్యో మి॒త్రో వా॒యురా॑కా॒శః ప్రా॒ణో లో॑కపా॒లః కః కి-ఙ్క-న్త-థ్స॒త్యమన్న॑-మ॒మృతా॑ జీ॒వో విశ్వః॑ కత॒మ-స్స్వ॑య॒భు-మ్బ్రహ్మై॒ తదమృ॑త ఏ॒ష పురు॑ష ఏ॒ష భూ॒తానా॒-మధి॑పతి॒-ర్బ్రహ్మ॑ణ॒-స్సాయు॑జ్యగ్ం సలో॒కతా॑-మాప్నో-త్యే॒తాసా॑మే॒వ దే॒వతా॑నా॒గ్ం॒ సాయు॑జ్యగ్ం సా॒ర్​ష్టితాగ్ం॑ సమాన లో॒కతా॑-మాప్నోతి॒ య ఏ॒వం-వేఀదే᳚త్యుప॒నిషత్ ॥ 15.1 (తై. అర. 6.15.1)

శివోపాసన మన్త్రాః (4.17)
నిధ॑నపతయే॒ నమః । నిధ॑నపతాన్తికాయ॒ నమః ।
ఊర్ధ్వాయ॒ నమః । ఊర్ధ్వలిఙ్గాయ॒ నమః ।
హిరణ్యాయ॒ నమః । హిరణ్యలిఙ్గాయ॒ నమః ।
సువర్ణాయ॒ నమః । సువర్ణలిఙ్గాయ॒ నమః ।
దివ్యాయ॒ నమః । దివ్యలిఙ్గాయ॒ నమః । 16.1 (తై. అర. 6.16.1)

భవాయ॒ నమః । భవలిఙ్గాయ॒ నమః ।
శర్వాయ॒ నమః । శర్వలిఙ్గాయ॒ నమః ।
శివాయ॒ నమః । శివలిఙ్గాయ॒ నమః ।
జ్వలాయ॒ నమః । జ్వలలిఙ్గాయ॒ నమః ।
ఆత్మాయ॒ నమః । ఆత్మలిఙ్గాయ॒ నమః ।
పరమాయ॒ నమః । పరమలిఙ్గాయ॒ నమః ।
ఏతథ్సోమస్య॑ సూర్య॒స్య॒ సర్వలిఙ్గగ్గ్॑ స్థాప॒య॒తి॒ పాణిమన్త్ర॑-మ్పవి॒త్రమ్ ॥ 16.1 (తై. అర. 6.16.2)

పశ్చిమవక్త్ర ప్రతిపాదక మన్త్రః (4.18)
తై. అర. 6.17.1
స॒ద్యోజా॒త-మ్ప్ర॑పద్యా॒మి॒ స॒ద్యోజా॒తాయ॒ వై నమో॒ నమః॑ । భ॒వే భ॑వే॒ నాతి॑భవే భవస్వ॒ మామ్ । భ॒వోద్భ॑వాయ॒ నమః॑ ॥ 17.1

ఉత్తర వక్త్ర ప్రతిపాదక మన్త్రః (4.19)
వా॒మ॒దే॒వాయ॒ నమో᳚ జ్యే॒ష్ఠాయ॒ నమ॑-శ్శ్రే॒ష్ఠాయ॒ నమో॑ రు॒ద్రాయ॒ నమః॒ కాలా॑య॒ నమః॒ కల॑వికరణాయ॒ నమో॒ బల॑వికరణాయ॒ నమో॒ బలా॑య॒ నమో॒ బల॑ప్రమథనాయ॒ నమ॒-స్సర్వ॑భూతదమనాయ॒ నమో॑ మ॒నోన్మ॑నాయ॒ నమః॑ ॥ 18.1 (తై. అర. 6.18.1)

దఖ్షిణ వక్త్ర ప్రతిపాదక మన్త్రః (4.20)
అ॒ఘోరే᳚భ్యో-ఽథ॒ ఘోరే᳚భ్యో॒ ఘోర॒ఘోర॑తరేభ్యః ।
సర్వే᳚భ్య-స్సర్వ॒ శర్వే᳚భ్యో॒ నమ॑స్తే అస్తు రు॒ద్రరూ॑పేభ్యః ॥ 19.1 (తై. అర. 6.19.1)

ప్రాగ్వక్త్ర ప్రతిపాదక మన్త్రః (4.21)
తత్పురు॑షాయ వి॒ద్మహే॑ మహాదే॒వాయ॑ ధీమహి । తన్నో॑ రుద్రః ప్రచో॒దయా᳚త్ ॥ 20.1 (తై. అర. 6.20.1)

ఊర్ధ్వ వక్త్ర ప్రతిపాదక మన్త్రః (4.22)
ఈశాన-స్సర్వ॑విద్యా॒నా॒- మీశ్వర-స్సర్వ॑భూతా॒నా॒-మ్బ్రహ్మాధి॑పతి॒-ర్బ్రహ్మ॒ణో-ఽధి॑పతి॒-ర్బ్రహ్మా॑ శి॒వో మే॑ అస్తు సదాశి॒వోమ్ ॥ 21.1 (తై. అర. 6.21.1)

నమస్కారార్థ మన్త్రాః (4.23)
నమో హిరణ్యబాహవే హిరణ్యవర్ణాయ హిరణ్యరూపాయ హిరణ్యపతయే ఽబిఙ్కాపతయ ఉమాపతయే పశుపతయే॑ నమో॒ నమః ॥ 22.1 (తై. అర. 6.22.1)

ఋ॒తగ్ం స॒త్య-మ్ప॑ర-మ్బ్ర॒హ్మ॒ పు॒రుష॑-ఙ్కృష్ణ॒పిఙ్గ॑లమ్ । ఊ॒ర్ధ్వరే॑తం-విఀ ॑రూపా॒ఖ్షం॒-విఀ॒శ్వరూ॑పాయ॒ వై నమో॒ నమః॑ ॥ 23.1 (తై. అర. 6.23.1)

సర్వో॒ వై రు॒ద్రస్తస్మై॑ రు॒ద్రాయ॒ నమో॑ అస్తు । పురు॑షో॒ వై రు॒ద్ర-స్సన్మ॒హో నమో॒ నమః॑ । విశ్వ॑-మ్భూ॒త-మ్భువ॑న-ఞ్చి॒త్ర-మ్బ॑హు॒ధా జా॒త-ఞ్జాయ॑మాన-ఞ్చ॒ యత్ । సర్వో॒ హ్యే॑ష రు॒ద్రస్తస్మై॑ రు॒ద్రాయ॒ నమో॑ అస్తు ॥ 24.1 (తై. అర. 6.24.1)

కద్రు॒ద్రాయ॒ ప్రచే॑తసే మీ॒ఢుష్ట॑మాయ॒ తవ్య॑సే । వో॒చేమ॒ శన్త॑మగ్ం హృ॒దే ॥ సర్వో॒హ్యే॑ష రు॒ద్రస్తస్మై॑ రు॒ద్రాయ॒ నమో॑ అస్తు ॥ 25.1 (తై. అర. 6.25.1)

అగ్నిహోత్ర హవణ్యాః ఉపయుక్తస్య వృఖ్ష విశేష-స్యాభిధానమ్ (4.24-25)
యస్య॒ వై క॑ఙ్కత్యగ్ని-హోత్ర॒హవ॑ణీ భవతి॒ ప్రత్యే॒వా-స్యాహు॑తయ-స్తిష్ఠ॒న్త్యథో॒ ప్రతి॑ష్ఠిత్యై ॥ 26.1 (తై. అర. 6.26.1)

భూదేవతాక మన్త్రః (4.26)
అది॑తి-ర్దే॒వా గ॑న్ధ॒ర్వా మ॑ను॒ష్యాః᳚ పి॒తరో-ఽసు॑రా॒-స్తేషాగ్ం॑ సర్వ భూ॒తానా᳚-మ్మా॒తా మే॒దినీ॑ మహ॒తా మ॒హీ సా॑వి॒త్రీ గా॑య॒త్రీ జగ॑త్యు॒ర్వీ పృ॒థ్వీ బ॑హు॒లా విశ్వా॑ భూ॒తా క॑త॒మా కాయా సా స॒త్యే-త్య॒మృతేతి॑ వసి॒ష్ఠః ॥ 28.1 (తై. అర. 6.28.1)

సర్వా దేవతా ఆపః (4.27)
ఆపో॒ వా ఇ॒దగ్ం సర్వం॒-విఀశ్వా॑ భూ॒తాన్యాపః॑ ప్రా॒ణా వా ఆపః॑ ప॒శవ॒ ఆపో-ఽన్న॒మాపో -ఽమృ॑త॒మాప॑-స్స॒మ్రాడాపో॑ వి॒రాడాప॑-స్స్వ॒రాడాపః॒
ఛన్దా॒గ్॒స్యాపో॒ జ్యోతీ॒గ్॒ష్యాపో॒ యజూ॒గ్॒ష్యాప॑-స్స॒త్యమాప॒-స్సర్వా॑
దే॒వతా॒ ఆపో॒ భూర్భువ॒స్సువ॒రాప॒ ఓమ్ ॥ 29.1 (తై. అర. 6.29.1)

సన్ధ్యావన్దన మన్త్రాః (4.28)
ఆపః॑ పునన్తు పృథి॒వీ-మ్పృ॑థి॒వీ పూ॒తా పు॑నాతు॒ మామ్ । పు॒నన్తు॒ బ్రహ్మ॑ణ॒స్పతి॒-ర్బ్రహ్మ॑ పూ॒తా పు॑నాతు॒ మామ్ । యదుచ్ఛి॑ష్ట॒-మభో᳚జ్యం॒-యఀద్వా॑ దు॒శ్చరి॑త॒-మ్మమ॑ । సర్వ॑-మ్పునన్తు॒ మామాపో॑-ఽస॒తాఞ్చ॑ ప్రతి॒గ్రహ॒గ్గ్॒ స్వాహా᳚ ॥ 30.2 (తై. అర. 6.30.1)

అగ్నిశ్చ మా మన్యుశ్చ మన్యుపతయశ్చ మన్యు॑కృతే॒భ్యః । పాపేభ్యో॑ రఖ్ష॒న్తామ్ । యదహ్నా పాప॑మకా॒ర్॒షమ్ । మనసా వాచా॑ హస్తా॒భ్యామ్ । పద్భ్యా-ముదరే॑ణ శి॒శ్నా । అహ॒స్తద॑వలు॒పన్తు । యత్కిఞ్చ॑ దురి॒త-మ్మయి॑ । ఇదమహ-మామమృ॑త యో॒నౌ । సత్యే జ్యోతిషి జుహో॑మి స్వా॒హా ॥ 31.1 (తై. అర. 6.31.1)

సూర్యశ్చ మా మన్యుశ్చ మన్యుపతయశ్చ మన్యు॑కృతే॒భ్యః । పాపేభ్యో॑ రఖ్ష॒న్తామ్ । యద్రాత్రియా పాప॑మకా॒ర్॒షమ్ । మనసా వాచా॑ హస్తా॒భ్యామ్ । పద్భ్యా-ముదరే॑ణ శి॒శ్నా । రాత్రి॒-స్తద॑వలు॒పన్తు । యత్కిఞ్చ॑ దురి॒త-మ్మయి॑ । ఇదమహ-మామమృ॑త యో॒నౌ । సూర్యే జ్యోతిషి జుహో॑మి స్వా॒హా ॥ 32.1 (తై. అర. 6.32.1)

ప్రణవస్య ఋష్యాది వివరణం (4.29)
ఓమిత్యేకాఖ్ష॑ర-మ్బ్ర॒హ్మ । అగ్నిర్దేవతా బ్రహ్మ॑ ఇత్యా॒ర్​షమ్ । గాయత్ర-ఞ్ఛన్ద-మ్పరమాత్మం॑ సరూ॒పమ్ । సాయుజ్యం-విఀ ॑నియో॒గమ్ ॥ 33.1 (తై. అర. 6.33.1)

గాయత్ర్యావాహన మన్త్రాః (4.30)
ఆయా॑తు॒ వర॑దా దే॒వీ॒ అ॒ఖ్షర॑-మ్బ్రహ్మ॒ సమ్మి॑తమ్ । గా॒య॒త్రీ᳚-ఞ్ఛన్ద॑సా-మ్మా॒తేద-మ్బ్ర॑హ్మ జు॒షస్వ॑ మే । యదహ్నా᳚-త్కురు॑తే పా॒ప॒-న్తదహ్నా᳚-త్ప్రతి॒ముచ్య॑తే । య-ద్రాత్రియా᳚-త్కురు॑తే పా॒ప॒-న్త-ద్రాత్రియా᳚-త్ప్రతి॒ముచ్య॑తే । సర్వ॑ వ॒ర్ణే మ॑హాదే॒వి॒ స॒న్ధ్యా వి॑ద్యే స॒రస్వ॑తి ॥ 34.2 (తై. అర. 6.34.1)

ఓజో॑-ఽసి॒ సహో॑-ఽసి॒ బల॑మసి॒ భ్రాజో॑-ఽసి దే॒వానా॒-న్ధామ॒నామా॑॑-ఽసి॒ విశ్వ॑మసి వి॒శ్వాయు॒-స్సర్వ॑మసి స॒ర్వాయు-రభిభూరోం-గాయత్రీ-మావా॑హయా॒మి॒ సావిత్రీ-మావా॑హయా॒మి॒ సరస్వతీ-మావా॑హయా॒మి॒ ఛన్దర్​షీ-నావా॑హయా॒మి॒ శ్రియ-మావా॑హయా॒మి॒ గాయత్రియా గాయత్రీ ఛన్దో విశ్వామిత్ర ఋషి-స్సవితా దేవతా-ఽగ్నిర్ముఖ-మ్బ్రహ్మా శిరో విష్ణుర్​హృదయగ్ం రుద్ర-శ్శిఖా పృథివీయోనిః ప్రాణాపాన-వ్యానోదాన-సమానా సప్రాణా శ్వేతవర్ణా సాఙ్ఖ్యాయన-సగోత్రా గాయత్రీ చతుర్విగ్ంశత్యఖ్షరా త్రిపదా॑ షట్కు॒ఖ్షిః॒ పఞ్చ శీర్​షోపనయనే వి॑నియో॒గ॒, ఓ-మ్భూః । ఓ-మ్భువః । ఓగ్ం సువః । ఓ-మ్మహః । ఓ-ఞ్జనః । ఓ-న్తపః । ఓగ్ం స॒త్యమ్ । ఓ-న్త-థ్స॑వి॒తుర్వరే᳚ణ్య॒-మ్భర్గో॑ దే॒వస్య॑ ధీమహి । ధియో॒ యో నః॑ ప్రచో॒దయా᳚త్ । ఓమాపో॒ జ్యోతీ॒ రసో॒-ఽమృత॒-మ్బ్రహ్మ॒ భూర్భువ॒స్సువ॒రోమ్ ॥ 35.2 (తై. అర. 6.35.1)

గాయత్రీ ఉపస్థాన మన్త్రాః (4.31)
ఉ॒త్తమే॑ శిఖ॑రే జా॒తే॒ భూ॒మ్యా-మ్ప॑ర్వత॒ మూర్ధ॑ని । బ్రా॒హ్మణే᳚భ్యో-ఽభ్య॑నుజ్ఞా॒తా॒ గ॒చ్ఛ దే॑వి య॒థాసు॑ఖమ్ । స్తుతో మయా వరదా వే॑దమా॒తా॒ ప్రచోదయన్తీ పవనే᳚ ద్విజా॒తా । ఆయుః పృథివ్యాం-ద్రవిణ-మ్బ్ర॑హ్మవ॒ర్చ॒స॒-మ్మహ్య-న్దత్వా ప్రజాతు-మ్బ్ర॑హ్మలో॒కమ్ ॥ 36.2 (తై. అర. 6.36.1)

ఆదిత్యదేవతా మన్త్రః (4.32)
ఘృణి॒-స్సూర్య॑ ఆది॒త్యో న ప్రభా॑-వా॒త్యఖ్ష॑రమ్ । మధు॑ఖ్షరన్తి॒ త-ద్ర॑సమ్ । స॒త్యం-వైఀ త-ద్రస॒-మాపో॒ జ్యోతీ॒రసో॒-ఽమృత॒-మ్బ్రహ్మ॒ భూర్భువ॒స్సువ॒రోమ్ ॥ 37.1 (తై. అర. 6.37.1)

త్రిసుపర్ణమన్త్రాః (4.33)
బ్రహ్మ॑ మేతు॒ మామ్ । మధు॑ మేతు॒ మామ్ । బ్రహ్మ॑-మే॒వ మధు॑ మేతు॒ మామ్ । యాస్తే॑ సోమ ప్ర॒జావ॒థ్సో-ఽభి॒సో అ॒హమ్ । దుస్ష్వ॑ప్న॒హ-న్దు॑రుష్వహ । యాస్తే॑ సోమ ప్రా॒ణాగ్​స్తా-ఞ్జు॑హోమి । త్రిసు॑పర్ణ॒ మయా॑చిత-మ్బ్రాహ్మ॒ణాయ॑ దద్యాత్ । బ్ర॒హ్మ॒హ॒త్యాం-వాఀ ఏ॒తే ఘ్న॑న్తి । యే బ్రా᳚హ్మ॒ణా-స్త్రిసు॑పర్ణ॒-మ్పఠ॑న్తి । తే సోమ॒-మ్ప్రాప్ను॑వన్తి । ఆ॒స॒హ॒స్రా-త్ప॒క్తి-మ్పున॑న్తి । ఓమ్ ॥ 38.1 (తై. అర. 6.38.1)

బ్రహ్మ॑ మే॒ధయా᳚ । మధు॑ మే॒ధయా᳚ । బ్రహ్మ॑మే॒వ మధు॑ మే॒ధయా᳚ । అ॒ద్యా నో॑ దేవ సవితః ప్ర॒జావ॑థ్సావీ॒-స్సౌభ॑గమ్ । పరా॑ దు॒స్ష్వప్ని॑యగ్ం సువ । విశ్వా॑ని దేవ సవిత-ర్దురి॒తాని॒ పరా॑సువ । య-ద్భ॒ద్ర-న్తన్మ॒ ఆసు॑వ । మధు॒వాతా॑ ఋతాయ॒తే మధు॑ఖ్షరన్తి॒ సిన్ధ॑వః । మాద్ధ్వీ᳚ర్న-స్స॒న్త్వోష॑ధీః । మధు॒నక్త॑ ము॒తోషసి॒ మధు॑మ॒-త్పార్థి॑వ॒గ్ం॒ రజః॑ । మధు॒ద్యౌర॑స్తు నః పి॒తా । మధు॑మాన్నో॒ వన॒స్పతి॒-ర్మధు॑మాగ్ం అస్తు॒ సూర్యః॑ । మాద్ధ్వీ॒ ర్గావో॑ భవన్తు నః । య ఇ॒మ-న్త్రిసు॑పర్ణ॒-మయా॑చిత-మ్బ్రాహ్మ॒ణాయ॑ దద్యాత్ । భ్రూ॒ణ॒హ॒త్యాం-వాఀ ఏ॒తే ఘ్న॑న్తి । యే బ్రా᳚హ్మ॒ణా-స్త్రిసు॑పర్ణ॒-మ్పఠ॑న్తి । తే సోమ॒-మ్ప్రాప్ను॑వన్తి । ఆ॒స॒హ॒స్రా-త్ప॒క్తి-మ్పున॑న్తి । ఓమ్ ॥ 39.7 (తై. అర. 6.39.1)

బ్రహ్మ॑ మే॒ధవా᳚ । మధు॑ మే॒ధవా᳚ । బ్రహ్మ॑మే॒వ మధు॑ మే॒ధవా᳚ । బ్ర॒హ్మా దే॒వానా᳚-మ్పద॒వీః క॑వీ॒నా-మృషి॒-ర్విప్రా॑ణా-మ్మహి॒షో మృ॒గాణా᳚మ్ । శ్యే॒నో గృద్ధ్రా॑ణా॒గ్॒ స్వధి॑తి॒-ర్వనా॑నా॒గ్ం॒ సోమః॑ ప॒విత్ర॒-మత్యే॑తి॒ రేభన్న్॑ । హ॒గ్ం॒స-శ్శు॑చి॒ష-ద్వసు॑రన్తరిఖ్ష॒ సద్ధోతా॑- వేది॒ష-దతి॑థి-ర్దురోణ॒సత్ । నృ॒షద్వ॑ర॒-సదృ॑త॒-స-ద్వ్యో॑మ॒-సద॒బ్జా- గో॒జా ఋ॑త॒జా అ॑ద్రి॒జా ఋ॒త-మ్బృ॒హత్ । ఋ॒చేత్వా॑ రు॒చేత్వా॒ సమి-థ్స్ర॑వన్తి స॒రితో॒ న ధేనాః᳚ । అ॒న్తర్-హృ॒దా మన॑సా పూ॒యమా॑నాః । ఘృ॒తస్య॒ ధారా॑ అ॒భిచా॑కశీమి । హి॒ర॒ణ్యయో॑ వేత॒సో మద్ధ్య॑ ఆసామ్ । తస్మి᳚న్-థ్సుప॒ర్ణో మ॑ధు॒కృ-త్కు॑లా॒యీ భజ॑న్నాస్తే॒ మధు॑ దే॒వతా᳚భ్యః । తస్యా॑ సతే॒ హర॑య-స్స॒ప్తతీరే᳚ స్వ॒ధా-న్దుహా॑నా అ॒మృత॑స్య॒ ధారా᳚మ్ । య ఇ॒ద-న్త్రిసు॑పర్ణ॒-మయా॑చిత-మ్బ్రాహ్మ॒ణాయ॑ దద్యాత్ । వీ॒ర॒హ॒త్యాం-వాఀ ఏ॒తే ఘ్న॑న్తి । యే బ్రా᳚హ్మ॒ణా-స్త్రిసు॑పర్ణ॒-మ్పఠ॑న్తి । తే సోమ॒-మ్ప్రాప్ను॑వన్తి । ఆ॒స॒హ॒స్రా-త్ప॒ఙ్క్తి-మ్పున॑న్తి । ఓమ్ ॥ 40.6 (తై. అర. 6.40.1)

మేధా సూక్తం (4.34)
మే॒ధాదే॒వీ జు॒షమా॑ణా న॒ ఆగా᳚-ద్వి॒శ్వాచీ॑ భ॒ద్రా సు॑మన॒స్య మా॑నా । త్వయా॒ జుష్టా॑ ను॒దమా॑నా దు॒రుక్తా᳚-న్బృ॒హద్వ॑దేమ వి॒దథే॑ సు॒వీరాః᳚ । త్వయా॒ జుష్ట॑ ఋ॒షి-ర్భ॑వతి దేవి॒ త్వయా॒ బ్రహ్మా॑-ఽఽగ॒తశ్రీ॑ రు॒త త్వయా᳚ । త్వయా॒ జుష్ట॑శ్చి॒త్రం-విఀ ॑న్దతే వసు॒ సా నో॑ జుషస్వ॒ ద్రవి॑ణో నమేధే ॥ 41.1 (తై. అర. 6.41.1)

మే॒ధా-మ్మ॒ ఇన్ద్రో॑ దదాతు మే॒ధా-న్దే॒వీ సర॑స్వతీ । మే॒ధా-మ్మే॑ అ॒శ్వినా॑-వు॒భావాధ॑త్తా॒-మ్పుష్క॑రస్రజా ॥ అ॒ఫ్స॒రాసు॑ చ॒ యా మే॒ధా గ॑న్ధ॒ర్వేషు॑ చ॒ యన్మనః॑ । దైవీ᳚-మ్మే॒ధా సర॑స్వతీ॒ సా మా᳚-మ్మే॒ధా సు॒రభి॑-ర్జుషతా॒గ్॒ స్వాహా᳚ ॥ 42.1 (తై. అర. 6.42.1)

ఆమా᳚-మ్మే॒ధా సు॒రభి॑-ర్వి॒శ్వరూ॑పా॒ హిర॑ణ్యవర్ణా॒ జగ॑తీ జగ॒మ్యా । ఊర్జ॑స్వతీ॒ పయ॑సా॒ పిన్వ॑మానా॒ సా మా᳚-మ్మే॒ధా సు॒ప్రతీ॑కా జుషన్తామ్ ॥ 43.1 (తై. అర. 6.43.1)

మయి॑ మే॒ధా-మ్మయి॑ ప్ర॒జా-మ్మయ్య॒గ్నిస్తేజో॑ దధాతు॒ మయి॑ మే॒ధా-మ్మయి॑ ప్ర॒జా-మ్మయీన్ద్ర॑ ఇన్ద్రి॒య-న్ద॑ధాతు॒ మయి॑ మే॒ధా-మ్మయి॑ ప్ర॒జా-మ్మయి॒ సూర్యో॒ భ్రాజో॑ దధాతు ॥ 44.1 (తై. అర. 6.44.1)

మృత్యునివారణ మన్త్రాః (4.35)
అపై॑తు మృ॒త్యు-ర॒మృత॑న్న॒ ఆగ॑న్. వైవస్వ॒తో నో॒ అభ॑యఙ్కృణోతు । ప॒ర్ణం-వఀన॒స్పతే॑ రివా॒భిన॑-శ్శీయతాగ్ం ర॒యి-స్సచ॑తాన్న॒-శ్శచీ॒పతిః॑ ॥ 45.1 (తై. అర. 6.45.1)

పర॑-మ్మృత్యో॒ అను॒ పరే॑హి॒ పన్థాం॒-యఀస్తే॒స్వ ఇత॑రో దేవ॒యానా᳚త్ । చఖ్షు॑ష్మతే శృణ్వ॒తే తే᳚ బ్రవీమి॒ మానః॑ ప్ర॒జాగ్ం రీ॑రిషో॒ మోత వీ॒రాన్ ॥ 46.1 (తై. అర. 6.46.1)

వాత॑-మ్ప్రా॒ణ-మ్మన॑సా॒ న్వార॑భామహే ప్ర॒జాప॑తిం॒-యోఀ భువ॑నస్య గో॒పాః । సనో॑ మృ॒త్యో స్త్రా॑యతా॒-మ్పాత్వగ్ంహ॑సో॒ జ్యోగ్ జీ॒వా జ॒రామ॑శీమహి ॥ 47.1 (తై. అర. 6.47.1)

అ॒ము॒త్ర॒ భూయా॒దధ॒ యద్య॒మస్య॒ బృహ॑స్పతే అ॒భిశ॑స్తే॒ర ము॑ఞ్చః । ప్రత్యౌ॑హతా మ॒శ్వినా॑ మృ॒త్యు మ॑స్మా-ద్దే॒వానా॑మగ్నే భి॒షజా॒ శచీ॑భిః ॥ 48.1 (తై. అర. 6.48.1)

హరి॒గ్ం॒ హర॑న్త॒- మను॑యన్తి దే॒వా విశ్వ॒స్యేశా॑నం-వృఀష॒భ-మ్మ॑తీ॒నామ్ । బ్రహ్మ॒ సరూ॑ప॒-మను॑మే॒దమా॑గా॒-దయ॑న॒-మ్మా వివ॑ధీ॒-ర్విక్ర॑మస్వ ॥ 49.1 (తై. అర. 6.49.1)

శల్కై॑ర॒గ్ని-మి॑న్ధా॒న ఉ॒భౌ లో॒కౌ స॑నేమ॒హమ్ । ఉ॒భయో᳚ ర్లో॒కయా॑ర్-ఋ॒ధ్ద్వా-ఽతి॑ మృ॒త్యు-న్త॑రామ్య॒హమ్ ॥ 50.1 (తై. అర. 6.50.1)

మా ఛి॑దో మృత్యో॒ మా వ॑ధీ॒ర్​మా మే॒ బలం॒-విఀవృ॑హో॒ మా ప్రమో॑షీః । ప్ర॒జా-మ్మా మే॑ రీరిష॒ ఆయు॑రుగ్ర నృ॒చఖ్ష॑స-న్త్వా హ॒విషా॑ విధేమ ॥ 51.1 (తై. అర. 6.51.1)

మా నో॑ మ॒హాన్త॑ము॒త మా నో॑ అర్భ॒క-మ్మా న॒ ఉఖ్ష॑న్తము॒త మా న॑ ఉఖ్షి॒తమ్ । మా నో॑ వధీః పి॒తర॒-మ్మోత మా॒తర॑-మ్ప్రి॒యా మా న॑స్త॒నువో॑ రుద్ర రీరిషః ॥ 52.1 (తై. అర. 6.52.1)

మా న॑స్తో॒కే తన॑యే॒ మా న॒ ఆయు॑షి॒ మా నో॒ గోషు॒ మా నో॒ అశ్వే॑షు రీరిషః । వీ॒రాన్మా నో॑ రుద్ర భామి॒తోవ॑ధీర్-హ॒విష్మ॑న్తో॒ నమ॑సా విధేమ తే ॥ 53.1 (తై. అర. 6.53.1)

ప్రజాపతి-ప్రార్థనా మన్త్రః (4.36)
ప్రజా॑పతే॒ న త్వదే॒తా-న్య॒న్యో విశ్వా॑ జా॒తాని॒ పరి॒తా బ॑భూవ । య-త్కా॑మాస్తే జుహు॒మస్తన్నో॑ అస్తు వ॒యగ్గ్​ స్యా॑మ॒ పత॑యో రయీ॒ణామ్ ॥ 54.1 (తై. అర. 6.54.1)

ఇన్ద్రప్రార్థనా మన్త్రః (4.37)
స్వ॒స్తి॒దా వి॒శస్పతి॑-ర్వృత్ర॒హా విమృధో॑ వ॒శీ । వృషేన్ద్రః॑ పు॒ర ఏ॑తు నస్స్వస్తి॒దా అ॑భయ-ఙ్క॒రః ॥ 55.1 (తై. అర. 6.55.1)

మృత్యుఞ్జయ మన్త్రాః (4.38)
త్ర్య॑మ్బకం-యఀజామహే సుగ॒న్ధి-మ్పు॑ష్టి॒వర్ధ॑నమ్ । ఉ॒ర్వా॒రు॒కమి॑వ॒ బన్ధ॑నా-న్మృ॒త్యో-ర్ము॑ఖ్షీయ॒ మా-ఽమృతా᳚త్ ॥ 56.1 (తై. అర. 6.56.1)

యే తే॑ స॒హస్ర॑మ॒యుత॒-మ్పాశా॒ మృత్యో॒ మర్త్యా॑య॒ హన్త॑వే । తాన్. య॒జ్ఞస్య॑ మా॒యయా॒ సర్వా॒నవ॑ యజామహే । మృ॒త్యవే॒ స్వాహా॑ మృ॒త్యవే॒ స్వాహా᳚ ॥ 58.1 (తై. అర. 6.57-58)

పాపనివారకా మన్త్రాః (4.39)
దే॒వకృ॑త॒స్యైన॑సో-ఽవ॒యజ॑నమసి॒ స్వాహా᳚ ।
మ॒ను॒ష్య॑కృత॒స్యైన॑సో ఽవ॒యజ॑నమసి॒ స్వాహా᳚ ।
పి॒తృకృ॑త॒స్యైన॑సో ఽవ॒యజ॑నమసి॒ స్వాహా᳚ ।
ఆ॒త్మకృ॑త॒స్యైన॑సో ఽవ॒యజ॑నమసి॒ స్వాహా᳚ ।
అ॒న్యకృ॑త॒స్యైన॑సో ఽవ॒యజ॑నమసి॒ స్వాహా᳚ ।
అ॒స్మత్కృ॑త॒స్యైన॑సో ఽవ॒యజ॑నమసి॒ స్వాహా᳚ ।
యద్ది॒వా చ॒ నక్త॒-ఞ్చైన॑శ్చకృ॒మ తస్యా॑ వ॒యజ॑నమసి॒ స్వాహా᳚ ।
య-థ్స్వ॒పన్త॑శ్చ॒ జాగ్ర॑త॒-శ్చైన॑శ్చ-కృ॒మ తస్యా॑ వ॒యజ॑నమసి॒ స్వాహా᳚ ।
య-థ్సు॒షుప్త॑శ్చ॒ జాగ్ర॑త॒-శ్చైన॑శ్చ-కృ॒మ తస్యా॑ వ॒యజ॑నమసి॒ స్వాహా᳚ ।
య-ద్వి॒ద్వాగ్ంస॒శ్చా వి॑ద్వాగ్ంస॒శ్చైన॑శ్చ-కృ॒మ తస్యా॑ వ॒యజ॑నమసి॒ స్వాహా᳚ ।
ఏనస ఏనసో వయజనమ॑సి స్వా॒హా ॥ 59.1 (తై. అర. 6.59.1)

వసు-ప్రార్థనా మన్త్రః (4.40)
యద్వో॑ దేవాశ్చకృ॒మ జి॒హ్వయా॑ గు॒రుమన॑సో వా॒ ప్రయు॑తీ దేవ॒ హేడ॑నమ్ । అరా॑వా॒యో నో॑ అ॒భిదు॑చ్ఛునా॒యతే॒ తస్మి॒-న్తదేనో॑ వసవో॒
నిధే॑తన॒ స్వాహా᳚ ॥ 60.1 (తై. అర. 6.60.1)

కామో-ఽకార్​షీత్ - మన్యురకార్​షీత్ మన్త్రః (4.41)
కామో-ఽకార్​షీ᳚-న్నమో॒ నమః । కామో-ఽకార్​షీ-త్కామః కరోతి నాహ-ఙ్కరోమి కామః కర్తా నాహ-ఙ్కర్తా కామః॑ కార॒యితా నాహ॑-ఙ్కార॒యితా ఏష తే కామ కామా॑య స్వా॒హా ॥ 61.1 (తై. అర. 6.61.1)

మన్యురకార్​షీ᳚-న్నమో॒ నమః । మన్యురకార్​షీ-న్మన్యుః కరోతి నాహ-ఙ్కరోమి మన్యుః కర్తా నాహ-ఙ్కర్తా మన్యుః॑ కార॒యితా నాహ॑-ఙ్కార॒యితా ఏష తే మన్యో మన్య॑వే స్వా॒హా ॥ 62.1 (తై. అర. 6.62.1)

విరజా హోమ మన్త్రాః (4.42)
తిలాఞ్జుహోమి సరసాగ్ం సపిష్టా-న్గన్ధార మమ చిత్తే రమ॑న్తు స్వా॒హా । గావో హిరణ్య-న్ధనమన్నపానగ్ం సర్వేషాగ్​ శ్రి॑యై స్వా॒హా । శ్రియఞ్చ లఖ్ష్మిఞ్చ పుష్టిఞ్చ కీర్తి॑-ఞ్చా నృ॒ణ్యతామ్ । బ్రహ్మణ్య-మ్బ॑హుపు॒త్రతామ్ । శ్రద్ధామేధే ప్రజా-స్సన్దదా॑తు స్వా॒హా ॥ 63.3 (తై. అర. 6.63.1)

తిలాః కృష్ణా-స్తి॑లా-శ్శ్వే॒తా॒-స్తిలా-స్సౌమ్యా వ॑శాను॒గాః । తిలాః పునన్తు॑ మే పా॒పం॒-యఀత్కిఞ్చి-ద్దురిత-మ్మ॑యి స్వా॒హా । చోర॒స్యాన్న-న్న॑వశ్రా॒ద్ధ॒-మ్బ్ర॒హ్మ॒హా గు॑రుత॒ల్పగః । గోస్తేయగ్ం స॑రాపా॒న॒-మ్భ్రూణహత్యా తిలా శాన్తిగ్ం శమయ॑న్తు స్వా॒హా । శ్రీశ్చ లఖ్ష్మీశ్చ పుష్టీశ్చ కీర్తి॑-ఞ్చా నృ॒ణ్యతామ్ । బ్రహ్మణ్య-మ్బ॑హుపు॒త్రతామ్ । శ్రద్ధామేధే ప్రజ్ఞాతు జాతవేద-స్సన్దదా॑తు స్వా॒హా ॥ 64.3 (తై. అర. 6.64.1)

ప్రాణాపాన-వ్యానోదాన-సమానా మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ । వాం-మన-శ్చఖ్షుః-శ్రోత్ర-జిహ్వా-ఘ్రాణ-రేతో-బుద్ధ్యాకూతి-స్సఙ్కల్పా మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ । త్వక్-చర్మ-మాగ్ంస-రుధిర-మేదో-మజ్జా-స్నాయవో-ఽస్థీని మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ । శిరః పాణి పాద పార్​శ్వ పృష్ఠో-రూదర-జఙ్ఘ-శిశ్ర్నోపస్థ పాయవో మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ । ఉత్తిష్ఠ పురుష హరిత-పిఙ్గల లోహితాఖ్షి దేహి దేహి దదాపయితా మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ ॥ 65.5 (తై. అర. 6.65.1)

పృథివ్యాప స్తేజో వాయు-రాకాశా మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ । శబ్ద-స్పర్​శ-రూపరస-గన్ధా మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ । మనో-వాక్-కాయ-కర్మాణి మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ । అవ్యక్తభావై-ర॑హఙ్కా॒ర॒-ర్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ । ఆత్మా మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ । అన్తరాత్మా మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ । పరమాత్మా మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ । ఖ్షు॒ధే స్వాహా᳚ । ఖ్షుత్పి॑పాసాయ॒ స్వాహా᳚ । వివి॑ట్యై॒ స్వాహా᳚ । ఋగ్వి॑ధానాయ॒ స్వాహా᳚ । క॒షో᳚త్కాయ॒ స్వాహా᳚ । ఖ్షు॒త్పి॒పా॒సామ॑ల-ఞ్జ్యే॒ష్ఠా॒మ॒ల॒ఖ్ష్మీ-ర్నా॑శయా॒మ్యహమ్ । అభూ॑తి॒-మస॑మృద్ధి॒ఞ్చ॒ సర్వాం (సర్వా) నిర్ణుద మే పాప్మా॑నగ్గ్​ స్వా॒హా । అన్నమయ-ప్రాణమయ-మనోమయ-విజ్ఞానమయ-మానన్దమయ-మాత్మా మే॑ శుద్ధ్య॒న్తా॒-ఞ్జ్యోతి॑ ర॒హం-విఀ॒రజా॑ విపా॒ప్మా భూ॑యాస॒గ్గ్॒ స్వాహా᳚ ॥ 66.10 (తై. అర. 6.66.1)

వైశ్వదేవ మన్త్రాః (4.43)
అ॒గ్నయే॒ స్వాహా᳚ । విశ్వే᳚భ్యో దే॒వేభ్య॒-స్స్వాహా᳚ । ధ్రు॒వాయ॑ భూ॒మాయ॒ స్వాహా᳚ । ధ్రు॒వ॒ఖ్షిత॑యే॒ స్వాహా᳚ । అ॒చ్యు॒త॒ఖ్షిత॑యే॒ స్వాహా᳚ । అ॒గ్నయే᳚ స్విష్ట॒కృతే॒ స్వాహా᳚ । ధర్మా॑య॒ స్వాహా᳚ । అధ॑ర్మాయ॒ స్వాహా᳚ । అ॒ద్భ్య-స్స్వాహా᳚ । ఓ॒ష॒ధి॒వ॒న॒స్ప॒తిభ్య॒-స్స్వాహా᳚ । 67.1 (తై. అర. 6.67.1)

ర॒ఖ్షో॒దే॒వ॒జ॒నేభ్య॒-స్స్వాహా᳚ ।
గృహ్యా᳚భ్య॒-స్స్వాహా᳚ । అ॒వ॒సానే᳚భ్య॒-స్స్వాహా᳚ । అ॒వ॒సాన॑పతిభ్య॒-స్స్వాహా᳚ । స॒ర్వ॒భూ॒తేభ్య॒-స్స్వాహా᳚ । కామా॑య॒ స్వాహా᳚ । అ॒న్తరి॑ఖ్షాయ॒ స్వాహా᳚ । యదేజ॑తి॒ జగ॑తి॒ యచ్చ॒ చేష్ట॑తి॒ నామ్నో॑ భా॒గో-ఽయ-న్నామ్నే॒ స్వాహా᳚ । పృ॒థి॒వ్యై స్వాహా᳚ । అ॒న్తరి॑ఖ్షాయ॒ స్వాహా᳚ । 67.2 (తై. అర. 6.67.2)

ది॒వే స్వాహా᳚ । సూర్యా॑య॒ స్వాహా᳚ । చ॒న్ద్రమ॑సే॒ స్వాహా᳚ । నఖ్ష॑త్రేభ్య॒-స్స్వాహా᳚ । ఇన్ద్రా॑య॒ స్వాహా᳚ । బృహ॒స్పత॑యే॒ స్వాహా᳚ । ప్ర॒జాప॑తయే॒ స్వాహా᳚ । బ్రహ్మ॑ణే॒ స్వాహా᳚ । స్వ॒ధా పి॒తృభ్య॒-స్స్వాహా᳚ । నమో॑ రు॒ద్రాయ॑ పశు॒పత॑యే॒ స్వాహా᳚ । 67.3 (తై. అర. 6.67.3)

దే॒వేభ్య॒-స్స్వాహా᳚ । పి॒తృభ్య॑-స్స్వ॒ధా-ఽస్తు॑ । భూ॒తేభ్యో॒ నమః॑ । మ॒ను॒ష్యే᳚భ్యో॒ హన్తా᳚ । ప్ర॒జాప॑తయే॒ స్వాహా᳚ । ప॒ర॒మే॒ష్ఠినే॒ స్వాహా᳚ । యథా కూ॑ప-శ్శ॒తధా॑ర-స్స॒హస్ర॑ధారో॒ అఖ్షి॑తః । ఏ॒వా మే॑ అస్తు ధా॒న్యగ్ం స॒హస్ర॑ధార॒-మఖ్షి॑తమ్ । ధన॑ధాన్యై॒ స్వాహా᳚ ॥ యే భూ॒తాః ప్ర॒చర॑న్తి॒ దివా॒నక్త॒-మ్బలి॑-మి॒చ్ఛన్తో॑ వి॒తుద॑స్య॒ ప్రేష్యాః᳚ । తేభ్యో॑ బ॒లి-మ్పు॑ష్టి॒కామో॑ హరామి॒ మయి॒ పుష్టి॒-మ్పుష్టి॑పతి-ర్దధాతు॒ స్వాహా᳚ ॥ 67.4 (తై. అర. 6.67.4)

(ఓ॒ష॒ధి॒వ॒న॒స్ప॒తిభ్య॒-స్స్వాహా॒ - ఽన్తరి॑ఖ్షాయ॒ స్వాహా॒ - నమో॑ రు॒ద్రాయ॑ పశు॒పత॑యే॒ స్వాహా॑ - వి॒తుద॑స్య॒ ప్రేష్యా॒ ఏక॑-ఞ్చ)

ఓ᳚-న్త-ద్బ్ర॒హ్మ । ఓ᳚-న్త-ద్వా॒యుః । ఓ᳚-న్తదా॒త్మా । ఓ᳚-న్త-థ్స॒త్యమ్ । ఓ᳚-న్త-థ్సర్వ᳚మ్ । ఓ᳚-న్త-త్పురో॒-ర్నమః । అన్తశ్చరతి॑ భూతే॒షు॒ గుహాయాం-విఀ ॑శ్వ మూ॒ర్తిషు । త్వం-యఀజ్ఞస్త్వం-వఀషట్కారస్త్వ-మిద్రస్త్వగ్ం రుద్రస్త్వం​విఀష్ణుస్త్వ-మ్బ్రహ్మత్వ॑-మ్ప్రజా॒పతిః । త్వ-న్త॑దాప॒ ఆపో॒ జ్యోతీ॒ రసో॒-ఽమృత॒-మ్బ్రహ్మ॒ భూర్భువ॒స్సువ॒రోమ్ ॥ 68.2 (తై. అర. 6.68.1)

4.44 ప్రాణాహుతి మన్త్రాః
శ్ర॒ద్ధాయా᳚-మ్ప్రా॒ణే నివి॑ష్టో॒-ఽమృత॑-ఞ్జుహోమి ।
శ్ర॒ద్ధాయా॑మపా॒నే నివి॑ష్టో॒-ఽమృత॑-ఞ్జుహోమి ।
శ్ర॒ద్ధాయాం᳚-వ్యాఀ॒నే నివి॑ష్టో॒-ఽమృత॑-ఞ్జుహోమి ।
శ్ర॒ద్ధాయా॑ముదా॒నే నివి॑ష్టో॒-ఽమృత॑-ఞ్జుహోమి ।
శ్ర॒ద్ధాయాగ్ం॑ సమా॒నే నివి॑ష్టో॒-ఽమృత॑-ఞ్జుహోమి ।
బ్రహ్మ॑ణి మ ఆ॒త్మా-ఽమృ॑త॒త్వాయ॑ ॥
అ॒మృ॒తో॒ప॒స్తర॑ణమసి ॥
శ్ర॒ద్ధాయా᳚-మ్ప్రా॒ణే నివి॑ష్టో॒-ఽమృత॑-ఞ్జుహోమి ।
శి॒వో మా॑ వి॒శాప్ర॑దాహాయ । ప్రా॒ణాయ॒ స్వాహా᳚ ।
శ్ర॒ద్ధాయా॑మపా॒నే నివి॑ష్టో॒-ఽమృత॑-ఞ్జుహోమి ।
శి॒వో మా॑ వి॒శాప్ర॑దాహాయ । అ॒పా॒నాయ॒ స్వాహా᳚ ।
శ్ర॒ద్ధాయాం᳚-వ్యాఀ॒నే నివి॑ష్టో॒-ఽమృత॑-ఞ్జుహోమి ।
శి॒వో మా॑ వి॒శాప్ర॑దాహాయ । వ్యా॒నాయ॒ స్వాహా᳚ ।
శ్ర॒ద్ధాయా॑-ముదా॒నే నివి॑ష్టో॒-ఽమృత॑-ఞ్జుహోమి ।
శి॒వో మా॑ వి॒శాప్ర॑దాహాయ । ఉ॒దా॒నాయ॒ స్వాహా᳚ ।
శ్ర॒ద్ధాయాగ్ం॑ సమా॒నే నివి॑ష్టో॒-ఽమృత॑-ఞ్జుహోమి ।
శి॒వో మా॑ వి॒శాప్ర॑దాహాయ । స॒మా॒నాయ॒ స్వాహా᳚ ।
బ్రహ్మ॑ణి మ ఆ॒త్మా-ఽమృ॑త॒త్వాయ॑ ॥
అ॒మృ॒తా॒పి॒ధా॒నమ॑సి ॥ 69.4 (తై. అర. 6.69.1)

భుక్తాన్నాభిమన్త్రణ మన్త్రాః (4.45)
శ్ర॒ద్ధాయా᳚-మ్ప్రా॒ణే నివి॑శ్యా॒-ఽమృతగ్ం॑ హు॒తమ్ । ప్రా॒ణ మన్నే॑నాప్యాయస్వ ।
శ్ర॒ద్ధాయా॑మపా॒నే నివి॑శ్యా॒-ఽమృతగ్ం॑ హు॒తమ్ । అ॒పా॒న మన్నే॑నాప్యాయస్వ ।
శ్ర॒ద్ధాయాం᳚-వ్యాఀ॒నే నివి॑శ్యా॒-ఽమృతగ్ం॑ హు॒తమ్ । వ్యా॒న మన్నే॑నాప్యాయస్వ ।
శ్ర॒ద్ధాయా॑-ముదా॒నే నివి॑శ్యా॒-ఽమృతగ్ం॑ హు॒తమ్ । ఉ॒దా॒న మన్నే॑నాప్యాయస్వ ।
శ్ర॒ద్ధాయాగ్ం॑ సమా॒నే నివి॑శ్యా॒-ఽమృతగ్ం॑ హు॒తమ్ । స॒మాన॒ మన్నే॑నాప్యాయస్వ ॥ 70.1 (తై. అర. 6.70.1)

భోజనాన్తే ఆత్మానుసన్ధాన మన్త్రాః (4.46)
అఙ్గుష్ఠమాత్రః పురుషో-ఽఙ్గుష్ఠఞ్చ॑ సమా॒శ్రితః । ఈశ-స్సర్వస్య జగతః ప్రభుః ప్రీణాతి॑ విశ్వ॒భుక్ ॥ 71.1 (తై. అర. 6.71.1)

అవయవస్వస్థతా ప్రార్థనా మన్త్రః (4.47)
వామ్మ॑ ఆ॒సన్న్ । న॒సోః ప్రా॒ణః । అ॒ఖ్ష్యో-శ్చఖ్షుః॑ । కర్ణ॑యో॒-శ్శ్రోత్ర᳚మ్ । బా॒హు॒వో-ర్బల᳚మ్ । ఊ॒రు॒వో రోజః॑ । అరి॑ష్టా॒ విశ్వా॒న్యఙ్గా॑ని త॒నూః । త॒నువా॑ మే స॒హ నమ॑స్తే అస్తు॒ మా మా॑ హిగ్ంసీః ॥ 72.1 (తై. అర. 6.72.1)

ఇన్ద్ర సప్తర్​షి సం​వాఀద మన్త్రః (4.48)
వయ॑-స్సుప॒ర్ణా ఉప॑సేదు॒రిన్ద్ర॑-మ్ప్రి॒య మే॑ధా॒ ఋష॑యో॒ నాధ॑మానాః । అప॑ద్ధ్వా॒న్త మూ᳚ర్ణు॒హి పూ॒ర్ధి చఖ్షు॑-ర్ముము॒గ్ధ్య॑స్మా-న్ని॒ధయే॑ ఽవబ॒ద్ధాన్ ॥ 73.1 (తై. అర. 6.73.1)

హృదయాలమ్భన మన్త్రః (4.49)
ప్రాణానా-ఙ్గ్రన్థిరసి రుద్రో మా॑ విశా॒న్తకః । తేనాన్నేనా᳚-ప్యాయ॒స్వ ॥ 74.1 (తై. అర. 6.74.1)

దేవతా ప్రాణనిరూపణ మన్త్రః (4.50)
నమో రుద్రాయ విష్ణవే మృత్యు॑ర్మే పా॒హి ॥ 75.1 (తై. అర. 6.75.1)

అగ్ని స్తుతి మన్త్రః (4.51)
త్వమ॑గ్నే॒ ద్యుభి॒-స్త్వమా॑శు-శు॒ఖ్షణి॒-స్త్వమ॒ద్భ్య-స్త్వమశ్మ॑న॒స్పరి॑ । త్వం-వఀనే᳚భ్య॒-స్త్వమోష॑ధీభ్య॒-స్త్వ-న్నృ॒ణా-న్నృ॑పతే జాయసే॒ శుచిః॑ ॥ 76.1 (తై. అర. 6.76.1)

అభీష్ట యాచనా మన్త్రః (4.52)
శి॒వేన॑ మే॒ సన్తి॑ష్ఠస్వ స్యో॒నేన॑ మే॒ సన్తి॑ష్ఠస్వ సుభూ॒తేన॑ మే॒ సన్తి॑ష్ఠస్వ బ్రహ్మవర్చ॒సేన॑ మే॒ సన్తి॑ష్ఠస్వ య॒జ్ఞస్యర్ధి॒ మను॒ సన్తి॑ష్ఠ॒ స్వోప॑ తే యజ్ఞ॒ నమ॒ ఉప॑ తే॒ నమ॒ ఉప॑ తే॒ నమః॑ ॥ 77.1 (తై. అర. 6.77.1)

పర తత్త్వ నిరూపణం (4.53)
స॒త్య-మ్పర॒-మ్పరగ్ం॑ స॒త్యగ్ం స॒త్యేన॒ న సు॑వ॒ర్గా-ల్లో॒కాచ్చ్య॑వన్తే
క॒దాచ॒న స॒తాగ్ం హి స॒త్య-న్తస్మా᳚-థ్స॒త్యే ర॑మన్తే॒,
తప॒ ఇతి॒ తపో॒ నానశ॑నా॒-త్పరం॒-యఀద్ధి పర॒-న్తప॒స్త-ద్దుధ॑ర్​షం॒
త-ద్దురా॑ధర్​ష॒-న్తస్మా॒-త్తప॑సి రమన్తే॒,
దమ॒ ఇతి॒ నియ॑త-మ్బ్రహ్మచా॒రిణ॒-స్తస్మా॒-ద్దమే॑ రమన్తే॒,
శమ॒ ఇత్యర॑ణ్యే ము॒నయ॒-స్తస్మా॒చ్ఛమే॑ రమన్తే,
దా॒నమితి॒ సర్వా॑ణి భూ॒తాని॑ ప్ర॒శగ్ంస॑న్తి దా॒నాన్నాతి॑ దు॒శ్చర॒-న్తస్మా᳚-ద్దా॒నే ర॑మన్తే,
ధ॒ర్మ ఇతి॒ ధర్మే॑ణ॒ సర్వ॑మి॒ద-మ్పరి॑గృహీత-న్ధ॒ర్మాన్నాతి॑-దు॒ష్కర॒-న్తస్మా᳚--ద్ధ॒ర్మే ర॑మన్తే,
ప్ర॒జన॒ ఇతి॒ భూయాగ్ం॑॑స॒-స్తస్మా॒-ద్భూయి॑ష్ఠాః॒ ప్రజా॑యన్తే॒ తస్మా॒-ద్భూయి॑ష్ఠాః ప్ర॒జన॑నే రమన్తే॒,
-ఽగ్నయ॒ ఇత్యా॑హ॒ తస్మా॑-ద॒గ్నయ॒ ఆధా॑తవ్యా అగ్నిహో॒త్ర-మిత్యా॑హ॒ తస్మా॑-దగ్నిహో॒త్రే ర॑మన్తే,
య॒జ్ఞ ఇతి॑ య॒జ్ఞో హి దే॒వా స్తస్మా᳚-ద్య॒జ్ఞే ర॑మన్తే,
మాన॒స-మితి॑ వి॒ద్వాగ్ంస॒-స్తస్మా᳚-ద్వి॒ద్వాగ్ంస॑ ఏ॒వ మా॑న॒సే ర॑మన్తే,
న్యా॒స ఇతి॑ బ్ర॒హ్మా బ్ర॒హ్మా హి పరః॒ పరో॑ హి బ్ర॒హ్మా తాని॒ వా ఏ॒తాన్యవ॑రాణి॒ పరాగ్ం॑సి న్యా॒స ఏ॒వాత్య॑రేచయ॒-ద్య ఏ॒వం-వేఀదే᳚త్యుప॒నిషత్ ॥ 78.11 (తై. అర. 6.78.1)

4.54 జ్ఞాన సాధన నిరూపణం
ప్రా॒జా॒ప॒త్యో హారు॑ణి-స్సుప॒ర్ణేయః॑ ప్ర॒జాప॑తి-మ్పి॒తర॒-ముప॑ససార॒ కి-మ్భ॑గవ॒న్తః ప॑ర॒మం-వఀ ॑ద॒న్తీతి॒ తస్మై॒ ప్రో॑వాచ,
స॒త్యేన॑ వా॒యురావా॑తి స॒త్యే-నా॑ది॒త్యో రో॑చతే ది॒వి స॒త్యం-వాఀ॒చః ప్ర॑తి॒ష్ఠా స॒త్యే స॒ర్వ-మ్ప్రతి॑ష్ఠిత॒-న్తస్మా᳚-థ్స॒త్య-మ్ప॑ర॒మం-వఀద॑న్తి॒,
తప॑సా దే॒వా దే॒వతా॒-మగ్ర॑ ఆయ॒-న్తప॒సర్​ష॑య॒-స్సువ॒రన్వ॑-విన్ద॒-న్తప॑సా స॒పత్నా॒-న్ప్రణు॑దా॒-మారా॑తీ॒ స్తప॑సి స॒ర్వ-మ్ప్రతి॑ష్ఠిత॒-న్తస్మా॒-త్తపః॑ పర॒మం-వఀద॑న్తి॒,
దమే॑న దా॒న్తాః కి॒ల్బిష॑-మవధూ॒న్వన్తి॒ దమే॑న బ్రహ్మచా॒రిణ॒-స్సువ॑రగచ్ఛ॒-న్దమో॑ భూ॒తానా᳚-న్దురా॒ధర్​ష॒-న్దమే॑ స॒ర్వ-మ్ప్రతి॑ష్ఠిత॒-న్తస్మా॒-ద్దమః॑ పర॒మం-వఀద॑న్తి॒,
శమే॑న శా॒న్తా-శ్శి॒వ-మా॒చర॑న్తి॒ శమే॑న నా॒క-మ్ము॒నయో॒-ఽన్వవి॑న్ద॒న్ ఛమో॑ భూ॒తానా᳚-న్దురా॒ధర్​ష॒-ఞ్ఛమే॑ స॒ర్వ-మ్ప్రతి॑ష్ఠిత॒-న్తస్మా॒చ్ఛమః॑ పర॒మం-వఀద॑న్తి,
దా॒నం-యఀ॒జ్ఞానాం॒-వఀరూ॑థ॒-న్దఖ్షి॑ణా లో॒కే దా॒తారగ్ం॑ సర్వ భూ॒తాన్యు॑పజీ॒వన్తి॑ దా॒నేనారా॑తీ॒-రపా॑నుదన్త దా॒నేన॑ ద్విష॒న్తో మి॒త్రా భ॑వన్తి దా॒నే స॒ర్వ-మ్ప్రతి॑ష్ఠిత॒-న్తస్మా᳚-ద్దా॒న-మ్ప॑ర॒మం-వఀద॑న్తి,
ధ॒ర్మో విశ్వ॑స్య॒ జగ॑తః ప్రతి॒ష్ఠా లో॒కే ధ॒ర్మిష్ఠ॑-మ్ప్ర॒జా ఉ॑పస॒ర్పన్తి॑ ధ॒ర్మేణ॑ పా॒ప-మ॑ప॒నుద॑తి ధ॒ర్మే స॒ర్వ-మ్ప్రతి॑ష్ఠిత॒-న్తస్మా᳚-ద్ధ॒ర్మ-మ్ప॑ర॒మం-వఀద॑న్తి,
ప్ర॒జన॑నం॒-వైఀ ప్ర॑తి॒ష్ఠా లో॒కే సా॒ధు ప్ర॒జాయా᳚ స్త॒న్తున్-త॑న్వా॒నః పి॑తృ॒ణా మ॑నృ॒ణో భవ॑తి॒ తదే॑వ త॒స్యా అనృ॑ణ॒-న్తస్మా᳚-త్ప్ర॒జన॑న-మ్పర॒మం-వఀద॑న్త్య॒,
గ్నయో॒ వై త్రయీ॑ వి॒ద్యా దే॑వ॒యానః॒ పన్థా॑ గార్​హప॒త్య ఋక్-పృ॑థి॒వీ ర॑థన్త॒ర-మ॑న్వాహా-ర్య॒పచ॑నం॒-యఀజు॑ర॒న్తరి॑ఖ్షం-వాఀమదే॒వ్య మా॑హవ॒నీయ॒-స్సామ॑సువ॒ర్గో లో॒కో బృ॒హత్-తస్మా॑-ద॒గ్నీ-న్ప॑ర॒మం-వఀద॑న్త్య,
గ్నిహో॒త్రగ్ం సా॑య-మ్ప్రా॒త-ర్గృ॒హాణాం॒-నిష్కృ॑తి॒-స్స్వి॑ష్టగ్ం సుహు॒తం-యఀ ॑జ్ఞక్రతూ॒నా-మ్ప్రాయ॑ణగ్ం సువ॒ర్గస్య॑ లో॒కస్య॒ జ్యోతి॒-స్తస్మా॑-దగ్నిహో॒త్ర-మ్ప॑ర॒మం-వఀద॑న్తి,
య॒జ్ఞ ఇతి॑ య॒జ్ఞేన॒ హి దే॒వా దివ॑-ఙ్గ॒తా య॒జ్ఞేనాసు॑రా॒-నపా॑నుదన్త య॒జ్ఞేన॑ ద్విష॒న్తో మి॒త్రా భ॑వన్తి య॒జ్ఞే స॒ర్వ-మ్ప్రతి॑ష్ఠిత॒-న్తస్మా᳚-ద్య॒జ్ఞ-మ్ప॑ర॒మం-వఀద॑న్తి,
మాన॒సం-వైఀ ప్రా॑జాప॒త్య-మ్ప॒విత్ర॑-మ్మాన॒సేన॒ మన॑సా సా॒ధు ప॑శ్యతి మాన॒సా ఋష॑యః ప్ర॒జా అ॑సృజన్త మాన॒సే స॒ర్వ-మ్ప్రతి॑ష్ఠిత॒-న్తస్మా᳚-న్మాన॒స-మ్ప॑ర॒మం-వఀద॑న్తి,
న్యా॒స ఇ॒త్యాహు॑-ర్మనీ॒షిణో᳚ బ్ర॒హ్మాణ॑-మ్బ్ర॒హ్మా విశ్వః॑ కత॒మ-స్స్వ॑య॒భుంః ప్ర॒జాప॑తి-స్సం​వఀథ్సర॒ ఇతి॑, సం​వఀథ్స॒రో॑ ఽసావా॑ది॒త్యో య ఏ॒ష ఆ॑ది॒త్యే పురు॑ష॒-స్స ప॑రమే॒ష్ఠీ బ్రహ్మా॒త్మా,

యాభి॑రాది॒త్య-స్తప॑తి ర॒శ్మిభి॒స్తాభిః॑ ప॒ర్జన్యో॑ వర్​షతి ప॒ర్జన్యే॑-నౌషధి-వనస్ప॒తయః॒ ప్రజా॑యన్త ఓషధి-వనస్ప॒తిభి॒-రన్న॑-మ్భవ॒త్యన్నే॑న ప్రా॒ణాః ప్రా॒ణై-ర్బల॒-మ్బలే॑న॒ తప॒-స్తప॑సా శ్ర॒ద్ధా శ్ర॒ద్ధయా॑ మే॒ధా మే॒ధయా॑ మనీ॒షా మ॑నీ॒షయా॒ మనో॒ మన॑సా॒ శాన్తి॒-శ్శాన్త్యా॑ చి॒త్త-ఞ్చి॒త్తేన॒ స్మృతి॒గ్గ్॒ స్మృత్యా॒ స్మార॒గ్గ్॒ స్మారే॑ణ వి॒జ్ఞానం॑-విఀ॒జ్ఞానే॑-నా॒త్మానం॑-వేఀదయతి॒ తస్మా॑ద॒న్న-న్దద॒న్-థ్సర్వా᳚ణ్యే॒తాని॑ దదా॒-త్యన్నా᳚-త్ప్రా॒ణా భ॑వన్తి,
భూ॒తానా᳚-మ్ప్రా॒ణై-ర్మనో॒ మన॑సశ్చ వి॒జ్ఞానం॑-విఀ॒జ్ఞానా॑-దాన॒న్దో బ్ర॑హ్మ యో॒ని-స్స వా ఏ॒ష పురు॑షః పఞ్చ॒ధా ప॑ఞ్చా॒త్మా యేన॒ సర్వ॑మి॒ద-మ్ప్రోత॑-మ్పృథి॒వీ చా॒న్తరి॑ఖ్ష-ఞ్చ॒ ద్యౌశ్చ॒ దిశ॑శ్చావాన్తరది॒శాశ్చ॒ స వై సర్వ॑మి॒ద-ఞ్జగ॒థ్స స॒భూతగ్ం॑ స భ॒వ్య-ఞ్జి॑జ్ఞాస క్లృ॒ప్త ఋ॑త॒జా రయి॑ష్ఠా,
శ్ర॒ద్ధా స॒త్యో మహ॑స్వా-న్త॒పసో॒ పరి॑ష్ఠా॒ద్ (వరి॑ష్ఠా॒ద్) జ్ఞాత్వా॑ తమే॒వ-మ్మన॑సా హృ॒దా చ॒ భూయో॑ న మృ॒త్యు-ముప॑యాహి వి॒ద్వా-న్తస్మా᳚-న్న్యా॒స-మే॒షా-న్తప॑సా-మతిరిక్త॒మాహు॑-ర్వసుర॒ణ్వో॑ వి॒భూర॑సి ప్రా॒ణే త్వమసి॑ సన్ధా॒తా
బ్రహ్మ॑-న్త్వమసి॑ విశ్వ॒ధృత్తే॑-జో॒దాస్ త్వమ॑స్య॒గ్ని-ర॑సి వర్చో॒దా-స్త్వమ॑సి॒ సూర్య॑స్య ద్యుమ్నో॒దా స్త్వమ॑సి చ॒న్ద్రమ॑స ఉపయా॒మగృ॑హీతో-ఽసి బ్ర॒హ్మణే᳚ త్వా॒ మహస॒,
ఓమిత్యా॒త్మానం॑-యుఀఞ్జీతై॒తద్వై మ॑హోప॒నిష॑ద-న్దే॒వానా॒-ఙ్గుహ్యం॒-యఀ ఏ॒వం-వేఀద॑ బ్ర॒హ్మణో॑ మహి॒మాన॑-మాప్నోతి॒ తస్మా᳚-ద్బ్ర॒హ్మణో॑ మహి॒మాన॑-మిత్యుప॒నిషత్ ॥ 79.20 (తై. అర. 6.79.1)

జ్ఞానయజ్ఞః (4.55)
తస్యై॒వం-విఀ॒దుషో॑ య॒జ్ఞస్యా॒త్మా యజ॑మానః-శ్ర॒ధ్దాపత్నీ॒ శరీ॑ర-మి॒ద్ధ్మమురో॒
వేది॒-ర్లోమా॑ని బ॒ర॒ఃఇ-ర్వే॒దః-శిఖా॒ హృద॑యం॒-యూఀపః॒ కామ॒ ఆజ్య॑-మ్మ॒న్యుః ప॒శు-స్తపో॒-ఽగ్ని-ర్దమ॑-శ్శమయి॒తా దఖ్షి॑ణా॒-వాఘోతా᳚ ప్రా॒ణ
ఉ॑ద్గ॒తా చఖ్షు॑రధ్వ॒ర్యు-ర్మనో॒ బ్రహ్మా॒ శ్రోత్ర॑మ॒గ్నీ-ధ్యావ॒ధ్ద్రియ॑తే॒ సా దీ॒ఖ్షా యదశ్ర్నా॑తి॒ తధ్దవి॒-ర్యత్పిబ॑తి॒ తద॑స్య సోమపా॒నం-యఀద్రమ॑తే॒ తదు॑ప॒సదో॒ య-థ్స॒ఞ్చర॑-త్యుప॒విశ॑-త్యు॒త్తిష్ఠ॑తే చ॒ సప్ర॑వ॒ర్గ్యో॑ యన్ముఖ॒-న్తదా॑హవ॒నీయో॒ యా వ్యాహృ॑తి-రాహు॒తి-ర్యద॑స్య వి॒జ్ఞాన॒-న్తజ్జు॒హోతి॒ యథ్సా॒య-మ్ప్రా॒తర॑త్తి॒ తథ్స॒మిధం॒-యఀత్ప్రా॒త-ర్మ॒ద్ధ్యన్ది॑నగ్ం సా॒య-ఞ్చ॒ తాని॒ సవ॑నాని॒ యే అ॑హోరా॒త్రే తే ద॑ర్​శపూర్ణమా॒సౌ యే᳚-ఽర్ధమా॒సాశ్చ॒ మాసా᳚శ్చ॒ తే చా॑తుర్మా॒స్యాని॒ య ఋ॒తవ॒స్తే ప॑శుబ॒న్ధా యే సం॑​వఀథ్స॒రాశ్చ॑ పరివథ్స॒రాశ్చ॒ తే-ఽహ॑ర్​గ॒ణా-స్స॑ర్వ వేద॒సం-వాఀ ఏ॒త-థ్స॒త్రం-యఀన్మర॑ణ॒-న్తద॑వ॒భృథ॑
ఏ॒తద్వై జ॑రామర్య-మగ్నిహో॒త్రగ్ం స॒త్రం-యఀ ఏ॒వం-విఀ॒ద్వా-ను॑ద॒గయ॑నే ప్ర॒మీయ॑తే
దే॒వానా॑మే॒వ మ॑హి॒మాన॑-ఙ్గ॒త్వా-ఽఽది॒త్యస్య॒ సాయు॑జ్య-ఙ్గచ్ఛ॒త్యథ॒ యో ద॑ఖ్షి॒ణే ప్ర॒మీయ॑తే పితృ॒ణా-మే॒వ మ॑హి॒మాన॑-ఙ్గ॒త్వా చ॒న్ద్రమ॑స॒-స్సాయు॑జ్యగ్ం సలో॒కతా॑-మాప్నోత్యే॒తౌ వై సూ᳚ర్యా చన్ద్ర॒మసౌ᳚-ర్మహి॒మానౌ᳚ బ్రాహ్మ॒ణో వి॒ద్వా-న॒భిజ॑యతి॒ తస్మా᳚-ద్బ్ర॒హ్మణో॑ మహి॒మాన॑మాప్నోతి॒ తస్మా᳚-ద్బ్ర॒హ్మణో॑ మహి॒మాన॑-మిత్యుప॒నిషత్ ॥ 80.1 (తై. అర. 6.80.1)

స॒హ నా॑ వవతు । స॒హ నౌ॑ భునక్తు । స॒హ వీ॒ర్య॑-ఙ్కరవావహై । తే॒జ॒స్వినా॒ వధీ॑తమస్తు॒ మా వి॑ద్విషా॒వహై᳚ ॥
॥ ఓం శాన్తి॒-శ్శాన్తి॒-శ్శాన్తిః॑ ॥

ఇతి మహానారాయణోపనిష-థ్సమాప్తా

(అమ్భ॒స్యైక॑పఞ్చా॒శచ్ఛ॒తం - జా॒తవే॑దసే॒ చతు॑ర్దశ॒ - భూరన్నం॒ - భూర॒గ్నయే॒ - భూర॒గ్నయే॒ చైక॑మేకం - పాహి - పా॒హి చ॒త్వారి॑ చత్వారి॒ - య-శ్ఛన్ద॑సా॒-న్ద్వే - నమో॒ బ్రహ్మ॑ణే - ఋ॒త-న్తపో॒ - యథా॑ వృ॒ఖ్షస్యైక॑ మేక - మ॒ణోరణీ॑యా॒గ్॒ శ్చతు॑స్త్రిగ్ంశథ్ - సహస్ర॒శీ॑ష॒గ్ం॒ షట్వి॑గ్ంశతి - రాది॒త్యో వా ఏ॒ష - ఆ॑ది॒త్యో వై తేజ॒ ఏక॑మేకం॒ - నిధ॑నపతయే॒ త్రయో॑విగ్ంశతిః - స॒ద్యోజా॒త-న్త్రీణి॑ - వామదే॒వాయైక॑ - మ॒ఘోరే᳚భ్య॒ - స్తత్పురు॑షాయ॒ ద్వే ద్వే॒ - ఈశానో - నమో హిరణ్యబాహవ॒ ఏక॑మేక - మృ॒తగ్ం స॒త్య-న్ద్వే - సర్వో॒ వై చ॒త్వారి॒ - కద్రు॒ద్రాయ॒ త్రీణి॒ - యస్య॒ వై కఙ్క॑తీ - కృణు॒ష్వ పాజో - ఽది॑తి॒ - రాపో॒ వా ఇ॒దగ్ం సర్వ॒ మేక॑మేక॒ - మాపః॑ పునన్తు చ॒త్వా - ర్యగ్నిశ్చ - సూర్యశ్చ నవ॑ - న॒వోమితి॑ చ॒త్వా - ర్యాయా॑తు॒ పచౌ - జో॑-ఽసి॒ దశో॒ - త్తమే॑ చ॒త్వారి॒ - ఘృణి॒స్త్రీణి॒ - బ్రహ్మ॑మేతు॒ మాం-యాఀస్తే᳚ బ్రహ్మహ॒త్యా-న్ద్వాద॑శ॒ - బ్రహ్మ॑ మే॒ధయా॒-ఽద్యా న॑ ఇ॒మ-మ్భ్రూ॑షహ॒త్యాం - బ్రహ్మ॑ మే॒ధవా᳚ బ్ర॒హ్మా దే॒వానా॑మి॒దం-వీఀ ॑రహ॒త్యామేకా॒న్న వి॑గ్ంశతి॒ రేకా॒న్నవి॑గ్ంశతి--ర్ మే॒ధా దే॒వీ - మే॒ధా-మ్మ॒ ఇన్ద్ర॑శ్చ॒త్వారి॑ చత్వా॒ర్యా - మా᳚-మ్మే॒ధా ద్వే - మయి॑ మే॒ధా మేక॒- మపై॑తు॒ - పరం॒ - ఀవాత॑-మ్ప్రా॒ణ - మ॑ముత్ర॒భూయా॒-ద్- ద్ధరి॒గ్ం॒ - శల్కై॑ర॒గ్నిం - మా ఛి॑దో మృత్యో॒ - మా నో॑ మ॒హాన్తం॒ - మాన॑స్తో॒కే - ప్రజా॑పతే - స్వస్తి॒దా - త్ర్య॑మ్బకం॒ - ఀయే తే॑ స॒హస్ర॒-న్ద్వే ద్వే - మృ॒త్యవే॒ స్వాహైకం॑ - దే॒వకృ॑త॒స్యైకా॑దశ॒ - యద్వో॑ దేవాః॒ - కామో-ఽకార్​షీ॒న్ - మన్యురకార్​షీ॒-ద్ద్వే ద్వే॒ - తిలాఞ్జుహోమి గావ-శ్శ్రియ-మ్ప్ర॑జాః పఞ్చ॒ - తిలాః కృణ్షాశ్చోర॑స్య॒ శ్రీః ప్రజ్ఞాతు జాతవే॑ద-స్స॒ప్త - ప్రాణ వా-క్త్వక్ ఛిర ఉత్తిష్ఠ పురుష॑ పఞ్చ॒ - పృథివీ శబ్ద మనో వాగ్ వ్యక్తా-ఽఽత్మా-ఽన్తరాత్మా పరమాత్మా మే᳚ ఖ్షు॒ధే-ఽన్నమయ॒ పఞ్చ॑దశా॒ - గ్నయే॒ స్వాహైక॑చత్వారి॒గ్ం॒శ - ర్దో᳚ న్తద్బ్ర॒హ్మ నవ॑ - శ్ర॒ద్ధాయా᳚-మ్ప్రా॒ణే నివిష్ట॒ శ్చతు॑ర్విగ్ంశతిః - శ్ర॒ద్ధాయా॒-న్దశా - ఙ్గుష్ఠ మాత్రః పురుషో ద్వే - వామ్మ॑ ఆ॒సన్న॒ష్టౌ - వయ॑-స్సుప॒ర్​షాః - ప్రాణానా-ఙ్గ్రన్థిరసి ద్వే ద్వే - నమో రుద్రాయైకం॒ - త్వమ॑గ్నే॒ ద్యుభిర్॒ ద్వే - శి॒వేన॑ మే॒ సన్తి॑ష్ఠస్వ - స॒త్యం - ప్రా॑జాప॒త్య - స్తస్యై॒వ మేక॑ మేక॒ మశతిః)