(తై. సం. 1.4.6)
య ఇ॒మా విశ్వా॒ భువ॑నాని॒ జుహ్వ॒దృషి॒ర్హోతా॑ నిష॒సాదా॑ పి॒తా నః॑ ।
స ఆ॒శిషా॒ ద్రవి॑ణమి॒చ్ఛమా॑నః పరమ॒చ్ఛదో॒ వర॒ ఆ వి॑వేశ ॥ 1
వి॒శ్వక॑ర్మా॒ మన॑సా॒ యద్విహా॑యా ధా॒తా వి॑ధా॒తా ప॑ర॒మోత స॒న్దృక్ ।
తేషా॑మి॒ష్టాని॒ సమి॒షా మ॑దన్తి॒ యత్ర॑ సప్త॒ర్షీన్ప॒ర ఏక॑మా॒హుః ॥ 2
యో నః॑ పి॒తా జ॑ని॒తా యో వి॑ధా॒తా యో న॑-స్స॒తో అ॒భ్యా సజ్జ॒జాన॑ ।
యో దే॒వానా॑-న్నామ॒ధా ఏక॑ ఏ॒వ తగ్ం స॑మ్ప్ర॒శ్నమ్భువ॑నా యన్త్య॒న్యా ॥ 3
త ఆయ॑జన్త॒ ద్రవి॑ణ॒గ్ం సమ॑స్మా॒ ఋష॑యః॒ పూర్వే॑ జరి॒తారో॒ న భూ॒నా ।
అ॒సూర్తా॒ సూర్తా॒ రజ॑సో వి॒మానే॒ యే భూ॒తాని॑ స॒మకృ॑ణ్వన్ని॒మాని॑ ॥ 4
న తం-విఀ ॑దాథ॒ య ఇ॒ద-ఞ్జ॒జానా॒న్యద్యు॒ష్మాక॒మన్త॑రమ్భవాతి ।
నీ॒హా॒రేణ॒ ప్రావృ॑తా జల్ప్యా॑ చాసు॒తృప॑ ఉక్థ॒శాస॑శ్చరన్తి ॥ 5
ప॒రో ది॒వా ప॒ర ఏ॒నా పృ॑థి॒వ్యా ప॒రో దే॒వేభి॒రసు॑రై॒ర్గుహా॒ యత్ ।
కగ్ం స్వి॒ద్గర్భ॑-మ్ప్రథ॒మ-న్ద॑ధ్ర॒ ఆపో॒ యత్ర॑ దే॒వా-స్స॒మగ॑చ్ఛన్త॒ విశ్వే ॥ 6
తమిద్గర్భ॑మ్ప్రథ॒మ-న్ద॑ధ్ర॒ ఆపో॒ యత్ర॑ దే॒వా-స్స॒మగ॑చ్ఛన్త॒ విశ్వే॑ ।
అ॒జస్య॒ నాభా॒వధ్యేక॒మర్పి॑తం॒-యఀస్మి॑న్ని॒దం-విఀశ్వ॒మ్భువన॒మధి॑ శ్రి॒తమ్ ॥ 7
వి॒శ్వక॑ర్మా॒ హ్యజ॑నిష్ట దే॒వ ఆదిద్గ॑న్ధ॒ర్వో అ॑భవద్ద్వి॒తీయః॑ ।
తృ॒తీయః॑ పి॒తా జ॑ని॒తౌష॑ధీనామ॒పా-ఙ్గర్భం॒-వ్యఀ ॑దధాత్పురు॒త్రా ॥ 8
చఖ్షు॑షః పి॒తా మన॑సా॒ హి ధీరో॑ ఘృ॒తమే॑నే అజన॒న్నన్న॑మానే ।
య॒దేదన్తా॒ అద॑దృగ్ంహన్త॒ పూర్వ॒ ఆదిద్ద్యావా॑పృథి॒వీ అ॑ప్రథేతామ్ ॥ 9
వి॒శ్వత॑శ్చఖ్షురు॒త వి॒శ్వతో॑ముఖో వి॒శ్వతో॑హస్త ఉ॒త వి॒శ్వత॑స్పాత్ ।
సమ్బా॒హుభ్యా॒-న్నమ॑తి॒ సమ్పత॑త్రై॒ర్ద్యావా॑పృథి॒వీ జ॒నయ॑న్దే॒వ ఏకః॑ ॥ 10
కిగ్ం స్వి॑దాసీదధి॒ష్ఠాన॑మా॒రమ్భ॑ణ-ఙ్కత॒మత్స్వి॒త్కిమా॑సీత్ ।
యదీ॒ భూమి॑-ఞ్జ॒నయ॑న్వి॒శ్వక॑ర్మా॒ వి ద్యామౌర్ణో॑న్మహి॒నా వి॒శ్వచ॑ఖ్షాః ॥ 11
కిగ్ం స్వి॒ద్వన॒-ఙ్క ఉ॒ స వృ॒ఖ్ష ఆ॑సీ॒ద్యతో॒ ద్యావా॑పృథి॒వీ ని॑ష్టత॒ఖ్షుః ।
మనీ॑షిణో॒ మన॑సా పృ॒చ్ఛతేదు॒ తద్యద॒ధ్యతి॑ష్ఠ॒ద్భువ॑నాని ధా॒రయన్॑ ॥ 12
యా తే॒ ధామా॑ని పర॒మాణి॒ యావ॒మా యా మ॑ధ్య॒మా వి॑శ్వకర్మన్ను॒తేమా ।
శిఖ్షా॒ సఖి॑భ్యో హ॒విషి॑ స్వధావ-స్స్వ॒యం-యఀ ॑జస్వ త॒నువ॑-ఞ్జుషా॒ణః ॥ 13
వా॒చస్పతిం॑-విఀ॒శ్వక॑ర్మాణమూ॒తయే॑ మనో॒యుజం॒-వాఀజే॑ అ॒ద్యా హు॑వేమ ।
స నో॒ నేది॑ష్ఠా॒ హవ॑నాని జోషతే వి॒శ్వశ॑మ్భూ॒రవ॑సే సా॒ధుక॑ర్మా ॥ 14
విశ్వ॑కర్మన్హ॒విషా॑ వావృధా॒న-స్స్వ॒యం-యఀ ॑జస్వ త॒నువ॑-ఞ్జుషా॒ణః ।
ముహ్య॑న్త్వ॒న్యే అ॒భిత॑-స్స॒పత్నా॑ ఇ॒హాస్మాక॑మ్మ॒ఘవా॑ సూ॒రిర॑స్తు ॥ 15
విశ్వ॑కర్మన్హ॒విషా వర్ధ॑నేన త్రా॒తార॒మిన్ద్ర॑మకృణోరవ॒ధ్యమ్ ।
తస్మై॒ విశ॒-స్సమ॑నమన్త పూ॒ర్వీర॒యము॒గ్రో వి॑హ॒వ్యో॑ యథాస॑త్ ॥ 16
స॒ము॒ద్రాయ॑ వ॒యునా॑య॒ సిన్ధూ॑నా॒మ్పత॑యే॒ నమః॑ ।
న॒దీనా॒గ్ం సర్వా॑సామ్పి॒త్రే జు॑హు॒తా
వి॒శ్వక॑ర్మణే॒ విశ్వాహామ॑ర్త్యగ్ం హ॒విః ।
