॥ ప్రథమముణ్డకే ద్వితీయః ఖణ్డః ॥

తదేత-థ్సత్య-మ్మన్త్రేషు కర్మాణి కవయో
యాన్యపశ్యంస్తాని త్రేతాయా-మ్బహుధా సన్తతాని ।
తాన్యాచరథ నియతం సత్యకామా ఏష వః
పన్థా-స్సుకృతస్య లోకే ॥ 1॥

యదా లేలాయతే హ్యర్చి-స్సమిద్ధే హవ్యవాహనే ।
తదా-ఽఽజ్యభాగావన్తరేణా-ఽఽహుతీః ప్రతిపాదయేత్ ॥ 2॥

యస్యాగ్నిహోత్రమదర్​శమపౌర్ణమాస-
మచాతుర్మాస్యమనాగ్రయణమతిథివర్జిత-ఞ్చ ।
అహుతమవైశ్వదేవమవిధినా హుత-
మాసప్తమాంస్తస్య లోకాన్ హినస్తి ॥ 3॥

కాలీ కరాలీ చ మనోజవా చ
సులోహితా యా చ సుధూమ్రవర్ణా ।
స్ఫులిఙ్గినీ విశ్వరుచీ చ దేవీ
లేలాయమానా ఇతి సప్త జిహ్వాః ॥ 4॥

ఏతేషు యశ్చరతే భ్రాజమానేషు యథాకాలం
చాహుతయో హ్యాదదాయన్న్ ।
త-న్నయన్త్యేతా-స్సూర్యస్య రశ్మయో యత్ర
దేవానా-మ్పతిరేకో-ఽధివాసః ॥ 5॥

ఏహ్యేహీతి తమాహుతయ-స్సువర్చసః
సూర్యస్య రశ్మిభిర్యజమానం-వఀహన్తి ।
ప్రియాం-వాఀచమభివదన్త్యో-ఽర్చయన్త్య
ఏష వః పుణ్య-స్సుకృతో బ్రహ్మలోకః ॥ 6॥

ప్లవా హ్యేతే అదృఢా యజ్ఞరూపా
అష్టాదశోక్తమవరం-యేఀషు కర్మ ।
ఏతచ్ఛ్రేయో యే-ఽభినన్దన్తి మూఢా
జరామృత్యు-న్తే పునరేవాపి యన్తి ॥ 7॥

అవిద్యాయామన్తరే వర్తమానాః
స్వయ-న్ధీరాః పణ్డిత-మ్మన్యమానాః ।
జఙ్ఘన్యమానాః పరియన్తి మూఢా
అన్ధేనైవ నీయమానా యథాన్ధాః ॥ 8॥

అవిద్యాయ-మ్బహుధా వర్తమానా వయం
కృతార్థా ఇత్యభిమన్యన్తి బాలాః ।
య-త్కర్మిణో న ప్రవేదయన్తి రాగాత్
తేనాతురాః, ఖ్షీణలోకాశ్చ్యవన్తే ॥ 9॥

ఇష్టాపూర్త-మ్మన్యమానా వరిష్ఠం
నాన్యచ్ఛ్రేయో వేదయన్తే ప్రమూఢాః ।
నాకస్య పృష్ఠే తే సుకృతే-ఽనుభూత్వేమం
లోకం హీనతరం-వాఀ విశన్తి ॥ 10॥

తపస్శ్రద్ధే యే హ్యుపవసన్త్యరణ్యే
శాన్తా విద్వాంసో భైఖ్ష్యచర్యా-ఞ్చరన్తః ।
సూర్యద్వారేణ తే విరజాః ప్రయాన్తి
యత్రామృత-స్స పురుషో హ్యవ్యయాత్మా ॥ 11॥

పరీఖ్ష్య లోకాన్ కర్మచితా-న్బ్రాహ్మణో
నిర్వేదమాయాన్నాస్త్యకృతః కృతేన ।
తద్విజ్ఞానార్థం స గురుమేవాభిగచ్ఛేత్
సమిత్పాణి-శ్శ్రోత్రియ-మ్బ్రహ్మనిష్ఠమ్ ॥ 12॥

తస్మై స విద్వానుపసన్నాయ సమ్యక్
ప్రశాన్తచిత్తాయ శమాన్వితాయ ।
యేనాఖ్షర-మ్పురుషం-వేఀద సత్య-మ్ప్రోవాచ
తా-న్తత్త్వతో బ్రహ్మవిద్యామ్ ॥ 13॥

॥ ఇతి ముణ్డకోపనిషది ప్రథమముణ్డకే ద్వితీయః ఖణ్డః ॥