॥ తృతీయముణ్డకే ద్వితీయః ఖణ్డః ॥

స వేదైత-త్పరమ-మ్బ్రహ్మ ధామ
యత్ర విశ్వ-న్నిహిత-మ్భాతి శుభ్రమ్ ।
ఉపాసతే పురుషం-యేఀ హ్యకామాస్తే
శుక్రమేతదతివర్తన్తి ధీరాః ॥ 1॥

కామాన్ యః కామయతే మన్యమానః
స కామభిర్జాయతే తత్ర తత్ర ।
పర్యాప్తకామస్య కృతాత్మనస్తు
ఇహైవ సర్వే ప్రవిలీయన్తి కామాః ॥ 2॥

నాయమాత్మా ప్రవచనేన లభ్యో
న మేధయా న బహునా శ్రుతేన ।
యమేవైష వృణుతే తేన లభ్య-
స్తస్యైష ఆత్మా వివృణుతే తనూం స్వామ్ ॥ 3॥

నాయమాత్మా బలహీనేన లభ్యో
న చ ప్రమాదా-త్తపసో వాప్యలిఙ్గాత్ ।
ఏతైరుపాయైర్యతతే యస్తు విద్వాం-
స్తస్యైష ఆత్మా విశతే బ్రహ్మధామ ॥ 4॥

సమ్ప్రాప్యైనమృషయో జ్ఞానతృప్తాః
కృతాత్మానో వీతరాగాః ప్రశాన్తాః
తే సర్వగం సర్వతః ప్రాప్య ధీరా
యుక్తాత్మాన-స్సర్వమేవావిశన్తి ॥ 5॥

వేదాన్తవిజ్ఞానసునిశ్చితార్థాః
సన్న్యాసయోగాద్ యతయ-శ్శుద్ధసత్త్వాః ।
తే బ్రహ్మలోకేషు పరాన్తకాలే
పరామృతాః పరిముచ్యన్తి సర్వే ॥ 6॥

గతాః కలాః పఞ్చదశ ప్రతిష్ఠా
దేవాశ్చ సర్వే ప్రతిదేవతాసు ।
కర్మాణి విజ్ఞానమయశ్చ ఆత్మా
పరే-ఽవ్యయే సర్వే ఏకీభవన్తి ॥ 7॥

యథా నద్య-స్స్యన్దమానా-స్సముద్రే-ఽ
స్త-ఙ్గచ్ఛన్తి నామరూపే విహాయ ।
తథా విద్వా-న్నామరూపాద్విముక్తః
పరాత్పర-మ్పురుషముపైతి దివ్యమ్ ॥ 8॥

స యో హ వై త-త్పరమ-మ్బ్రహ్మ వేద
బ్రహ్మైవ భవతి నాస్యాబ్రహ్మవిత్కులే భవతి ।
తరతి శోక-న్తరతి పాప్మాన-ఙ్గుహాగ్రన్థిభ్యో
విముక్తో-ఽమృతో భవతి ॥ 9॥

తదేతదృచా-ఽభ్యుక్తమ్ ।
క్రియావన్త-శ్శ్రోత్రియా బ్రహ్మనిష్ఠాః
స్వయ-ఞ్జుహ్వత ఏకర్​షిం శ్రద్ధయన్తః ।
తేషామేవైతా-మ్బ్రహ్మవిద్యాం-వఀదేత
శిరోవ్రతం-విఀధివద్ యైస్తు చీర్ణమ్ ॥ 10॥

తదేత-థ్సత్యమృషిరఙ్గిరాః
పురోవాచ నైతదచీర్ణవ్రతో-ఽధీతే ।
నమః పరమృషిభ్యో నమః పరమృషిభ్యః ॥ 11॥

॥ ఇతి ముణ్డకోపనిషది తృతీయముణ్డకే ద్వితీయః ఖణ్డః ॥

॥ ఇత్యథర్వవేదీయ ముణ్డకోపనిషత్సమాప్తా ॥

ఓ-మ్భ॒ద్ర-ఙ్కర్ణే॑భి-శ్శృణు॒యామ॑ దేవాః । భ॒ద్ర-మ్ప॑శ్యేమా॒ఖ్షభి॒-ర్యజ॑త్రాః । స్థి॒రైరఙ్గై᳚స్తుష్టు॒వాగ్ం స॑స్త॒నూభిః॑ । వ్యశే॑మ దే॒వహి॑తం॒-యఀదాయుః॑ । స్వ॒స్తి న॒ ఇన్ద్రో॑ వృ॒ద్ధశ్ర॑వాః । స్వ॒స్తి నః॑ పూ॒షా వి॒శ్వవే॑దాః । స్వ॒స్తి న॒స్తార్ఖ్ష్యో॒ అరి॑ష్టనేమిః । స్వ॒స్తి నో॒ బృహ॒స్పతి॑-ర్దధాతు ॥
ఓం శాన్తి॒-శ్శాన్తి॒-శ్శాన్తిః॑ ॥

॥ ఓం శాన్తి-శ్శాన్తి-శ్శాన్తిః ॥