(తై-ఆ-10-38ః40)
ఓ-మ్బ్రహ్మ॑మేతు॒ మామ్ । మధు॑మేతు॒ మామ్ ।
బ్రహ్మ॑మే॒వ మధు॑మేతు॒ మామ్ ।
యాస్తే॑ సోమ ప్ర॒జా వ॒థ్సో-ఽభి॒ సో అ॒హమ్ ।
దుష్ష్వ॑ప్న॒హన్దు॑రుష్వ॒హ ।
యాస్తే॑ సోమ ప్రా॒ణాగ్ంస్తాఞ్జు॑హోమి ।
త్రిసు॑పర్ణ॒మయా॑చిత-మ్బ్రాహ్మ॒ణాయ॑ దద్యాత్ ।
బ్ర॒హ్మ॒హ॒త్యాం-వాఀ ఏ॒తే ఘ్న॑న్తి ।
యే బ్రా᳚హ్మ॒ణాస్త్రిసు॑పర్ణ॒-మ్పఠ॑న్తి ।
తే సోమ॒-మ్ప్రాప్ను॑వన్తి ।
ఆ॒స॒హ॒స్రాత్ప॒ఙ్క్తి-మ్పున॑న్తి ।
ఓమ్ ॥ 1
బ్రహ్మ॑ మే॒ధయా᳚ ।
మధు॑ మే॒ధయా᳚ ।
బ్రహ్మ॑మే॒వ మధు॑ మే॒ధయా᳚ ।
అ॒ద్యా నో॑ దేవ సవితః ప్ర॒జావ॑త్సావీ॒స్సౌభ॑గమ్ ।
పరా॑ దు॒ష్వప్ని॑యగ్ం సువ ।
విశ్వా॑ని దేవ సవితర్దురి॒తాని॒ పరా॑సువ ।
యద్భ॒ద్ర-న్తన్మ॒ ఆసు॑వ ।
మధు॒ వాతా॑ ఋతాయ॒తే మధు॑ ఖ్షరన్తి॒ సిన్ధ॑వః ।
మాధ్వీ᳚ర్నస్స॒న్త్వోష॑ధీః ।
మధు॒ నక్త॑ము॒తోషసి॒ మధు॑మ॒త్పార్థి॑వ॒గ్ం॒ రజః॑ ।
మధు॒ ద్యౌర॑స్తు నః పి॒తా ।
మధు॑ మాన్నో॒ వన॒స్పతి॒ర్మధు॑మాగ్ం అస్తు॒ సూర్యః॑ ।
మాధ్వీ॒ర్గావో॑ భవన్తు నః ।
య ఇ॒మ-న్త్రిసు॑పర్ణ॒మయా॑చిత-మ్బ్రాహ్మ॒ణాయ॑ దద్యాత్ ।
భ్రూ॒ణ॒హ॒త్యాం-వాఀ ఏ॒తే ఘ్న॑న్తి ।
యే బ్రా᳚హ్మ॒ణాస్త్రిసు॑పర్ణ॒-మ్పఠ॑న్తి ।
తే సోమ॒-మ్ప్రాప్ను॑వన్తి ।
ఆ॒స॒హ॒స్రాత్ప॒ఙ్క్తి-మ్పున॑న్తి ।
ఓమ్ ॥ 2
బ్రహ్మ॑ మే॒ధవా᳚ ।
మధు॑ మే॒ధవా᳚ ।
బ్రహ్మ॑మే॒వ మధు॑ మే॒ధవా᳚ ।
బ్ర॒హ్మా దే॒వానా᳚-మ్పద॒వీః క॑వీ॒నామృషి॒ర్విప్రా॑ణా-మ్మహి॒షో మృ॒గాణా᳚మ్ ।
శ్యే॒నో గృద్ధ్రా॑ణా॒గ్ం॒ స్వధి॑తి॒ర్వనా॑నా॒గ్ం॒ సోమః॑ ప॒విత్ర॒మత్యే॑తి॒ రేభన్న్॑ ।
హ॒గ్ం॒సశ్శు॑చి॒షద్వసు॑రన్తరిఖ్ష॒సద్ధోతా॑ వేది॒షదతి॑థిర్దురోణ॒సత్ ।
నృ॒షద్వ॑ర॒సదృ॑త॒సద్వ్యో॑మ॒సద॒బ్జా గో॒జా ఋ॑త॒జా అ॑ద్రి॒జా ఋ॒త-మ్బృ॒హత్ ।
ఋ॒చే త్వా॑ రు॒చే త్వా॒ సమిత్స్ర॑వన్తి స॒రితో॒ న ధేనాః᳚ ।
అ॒న్తర్హృ॒దా మన॑సా పూ॒యమా॑నాః ।
ఘృ॒తస్య॒ ధారా॑ అ॒భిచా॑కశీమి ।
హి॒ర॒ణ్యయో॑ వేత॒సో మద్ధ్య॑ ఆసామ్ ।
తస్మి᳚న్థ్సుప॒ర్ణో మ॑ధు॒కృ-త్కు॑లా॒యీ భజ॑న్నాస్తే॒ మధు॑ దే॒వతా᳚భ్యః ।
తస్యా॑సతే॒ హర॑యస్స॒ప్త తీరే᳚ స్వ॒ధా-న్దుహా॑నా అ॒మృత॑స్య॒ ధారా᳚మ్ ।
య ఇ॒ద-న్త్రిసు॑పర్ణ॒మయా॑చిత-మ్బ్రాహ్మ॒ణాయ॑ దద్యాత్ ।
వీ॒ర॒హ॒త్యాం-వాఀ ఏ॒తే ఘ్నన్తి ।
యే బ్రా᳚హ్మ॒ణాస్త్రిసు॑పర్ణ॒-మ్పఠ॑న్తి ।
తే సోమ॒-మ్ప్రాప్ను॑వన్తి ।
ఆ॒స॒హ॒స్రాత్ప॒ఙ్క్తి-మ్పున॑న్తి ।
ఓమ్ ॥ 3
ఓం శాన్తి॒-శ్శాన్తి॒-శ్శాన్తిః॑ ॥
