॥ అథ కేనోపనిషత్ ॥

ఓం స॒హ నా॑వవతు । స॒హ నౌ॑ భునక్తు । స॒హ వీ॒ర్య॑-ఙ్కరవావహై । తే॒జ॒స్వినా॒వధీ॑తమస్తు॒ మా వి॑ద్విషా॒వహై᳚ ।

ఓం శాన్తి॒-శ్శాన్తి॒-శ్శాన్తిః॑ ॥

ఓం ఆప్యాయన్తు మమాఙ్గాని వాక్ప్రాణశ్చఖ్షు-శ్శ్రోత్రమథో బలమిన్ద్రియాణి చ సర్వాణి । సర్వ-మ్బ్రహ్మౌపనిషద-మ్మా-ఽహ-మ్బ్రహ్మ నిరాకుర్యా-మ్మా మా బ్రహ్మ నిరాకరోదనిరాకరణమస్త్వనిరాకరణ-మ్మే-ఽస్తు । తదాత్మని నిరతే య ఉపనిషత్సు ధర్మాస్తే మయి సన్తు తే మయి సన్తు ।

ఓం శాన్తి॒-శ్శాన్తి॒-శ్శాన్తిః॑ ॥

కేనేషిత-మ్పతతి ప్రేషిత-మ్మనః
కేన ప్రాణః ప్రథమః ప్రైతి యుక్తః ।
కేనేషితాం-వాఀచమిమాం-వఀదన్తి
చఖ్షు-శ్శ్రోత్ర-ఙ్క ఉ దేవో యునక్తి ॥ 1 ॥

శ్రోత్రస్య శ్రోత్ర-మ్మనసో మనో యద్
వాచో హ వాచం స ఉ ప్రాణస్య ప్రాణః ।
చఖ్షుషశ్చఖ్షురతిముచ్య ధీరాః
ప్రేత్యాస్మాల్లోకాదమృతా భవన్తి ॥ 2 ॥

న తత్ర చఖ్షుర్గచ్ఛతి న వాగచ్ఛతి నో మనః ।
న విద్మో న విజానీమో యథైతదనుశిష్యాత్ ॥ 3 ॥

అన్యదేవ తద్విదితాదథో అవిదితాదధి ।
ఇతి శుశ్రుమ పూర్వేషాం-యేఀ నస్తద్వ్యాచచఖ్షిరే ॥ 4 ॥

యద్వాచా-ఽనభ్యుదితం-యేఀన వాగభ్యుద్యతే ।
తదేవ బ్రహ్మ త్వం-విఀద్ధి నేదం-యఀదిదముపాసతే ॥ 5 ॥

యన్మనసా న మనుతే యేనాహుర్మనో మతమ్ ।
తదేవ బ్రహ్మ త్వం-విఀద్ధి నేదం-యఀదిదముపాసతే ॥ 6 ॥

యచ్చఖ్షుషా న పశ్యతి యేన చఖ్షూంషి పశ్యతి ।
తదేవ బ్రహ్మ త్వం-విఀద్ధి నేదం-యఀదిదముపాసతే ॥ 7 ॥

యచ్ఛ్రోత్రేణ న శ‍ఋణోతి యేన శ్రోత్రమిదం శ్రుతమ్ ।
తదేవ బ్రహ్మ త్వం-విఀద్ధి నేదం-యఀదిదముపాసతే ॥ 8 ॥

యత్ప్రాణేన న ప్రాణితి యేన ప్రాణః ప్రణీయతే ।
తదేవ బ్రహ్మ త్వం-విఀద్ధి నేదం-యఀదిదముపాసతే ॥ 9 ॥

॥ ఇతి కేనోపనిషది ప్రథమః ఖణ్డః ॥