ఓం సర్వే వై దేవా దేవీముపతస్థుః కాసి త్వ-మ్మహాదేవీతి ॥ 1 ॥
సా-ఽబ్రవీదహ-మ్బ్రహ్మస్వరూపిణీ ।
మత్తః ప్రకృతిపురుషాత్మక-ఞ్జగత్ ।
శూన్య-ఞ్చాశూన్య-ఞ్చ ॥ 2 ॥
అహమానన్దానానన్దౌ ।
అహం-విఀజ్ఞానావిజ్ఞానే ।
అహ-మ్బ్రహ్మాబ్రహ్మణి వేదితవ్యే ।
అహ-మ్పఞ్చభూతాన్యపఞ్చభూతాని ।
అహమఖిల-ఞ్జగత్ ॥ 3 ॥
వేదో-ఽహమవేదో-ఽహమ్ ।
విద్యా-ఽహమవిద్యా-ఽహమ్ ।
అజా-ఽహమనజా-ఽహమ్ ।
అధశ్చోర్ధ్వ-ఞ్చ తిర్యక్చాహమ్ ॥ 4 ॥
అహం రుద్రేభిర్వసుభిశ్చరామి ।
అహమాదిత్యైరుత విశ్వదేవైః ।
అహ-మ్మిత్రావరుణావుభౌ బిభర్మి ।
అహమిన్ద్రాగ్నీ అహమశ్వినావుభౌ ॥ 5 ॥
అహం సోమ-న్త్వష్టార-మ్పూషణ-మ్భగ-న్దధామి ।
అహం-విఀష్ణుమురుక్రమ-మ్బ్రహ్మాణముత ప్రజాపతి-న్దధామి ॥ 6 ॥
అ॒హ-న్ద॑ధామి॒ ద్రవి॑ణం హ॒విష్మ॑తే సుప్రా॒వ్యే॒3 యజ॑మానాయ సున్వ॒తే ।
అ॒హం రాష్ట్రీ॑ స॒ఙ్గమ॑నీ॒ వసూ॑నా-ఞ్చికి॒తుషీ॑ ప్రథ॒మా య॒జ్ఞియా॑నామ్ ।
అ॒హం సు॑వే పి॒తర॑మస్య మూ॒ర్ధన్మమ॒ యోని॑ర॒ప్స్వన్త-స్స॑ము॒ద్రే ।
య ఏవం-వేఀద । స దేవీం సమ్పదమాప్నోతి ॥ 7 ॥
తే దేవా అబ్రువన్ –
నమో దేవ్యై మహాదేవ్యై శివాయై సతత-న్నమః ।
నమః ప్రకృత్యై భద్రాయై నియతాః ప్రణతా-స్స్మ తామ్ ॥ 8 ॥
తామ॒గ్నివ॑ర్ణా॒-న్తప॑సా జ్వల॒న్తీం-వైఀ ॑రోచ॒నీ-ఙ్క॑ర్మఫ॒లేషు॒ జుష్టా᳚మ్ ।
దు॒ర్గా-న్దే॒వీం శర॑ణ-మ్ప్రప॑ద్యామహే-ఽసురాన్నాశయిత్ర్యై తే నమః ॥ 9 ॥
(ఋ.వే.8.100.11)
దే॒వీం-వాఀచ॑మజనయన్త దే॒వాస్తాం-విఀ॒శ్వరూ॑పాః ప॒శవో॑ వదన్తి ।
సా నో॑ మ॒న్ద్రేష॒మూర్జ॒-న్దుహా॑నా ధే॒నుర్వాగ॒స్మానుప॒ సుష్టు॒తైతు॑ ॥ 10 ॥
కాలరాత్రీ-మ్బ్రహ్మస్తుతాం-వైఀష్ణవీం స్కన్దమాతరమ్ ।
సరస్వతీమదితి-న్దఖ్షదుహితర-న్నమామః పావనాం శివామ్ ॥ 11 ॥
మహాలఖ్ష్మ్యై చ విద్మహే సర్వశక్త్యై చ ధీమహి ।
తన్నో దేవీ ప్రచోదయాత్ ॥ 12 ॥
అదితిర్హ్యజనిష్ట దఖ్ష యా దుహితా తవ ।
తా-న్దేవా అన్వజాయన్త భద్రా అమృతబన్ధవః ॥ 13 ॥
కామో యోనిః కమలా వజ్రపాణి-
ర్గుహా హసా మాతరిశ్వాభ్రమిన్ద్రః ।
పునర్గుహా సకలా మాయయా చ
పురూచ్యైషా విశ్వమాతాదివిద్యోమ్ ॥ 14 ॥
ఏషా-ఽఽత్మశక్తిః ।
ఏషా విశ్వమోహినీ ।
పాశాఙ్కుశధనుర్బాణధరా ।
ఏషా శ్రీమహావిద్యా ।
య ఏవం-వేఀద స శోక-న్తరతి ॥ 15 ॥
నమస్తే అస్తు భగవతి మాతరస్మాన్పాహి సర్వతః ॥ 16 ॥
సైషాష్టౌ వసవః ।
సైషైకాదశ రుద్రాః ।
సైషా ద్వాదశాదిత్యాః ।
సైషా విశ్వేదేవా-స్సోమపా అసోమపాశ్చ ।
సైషా యాతుధానా అసురా రఖ్షాంసి పిశాచా యఖ్షా సిద్ధాః ।
సైషా సత్త్వరజస్తమాంసి ।
సైషా బ్రహ్మవిష్ణురుద్రరూపిణీ ।
సైషా ప్రజాపతీన్ద్రమనవః ।
సైషా గ్రహనఖ్షత్రజ్యోతీంషి । కలాకాష్ఠాదికాలరూపిణీ ।
తామహ-మ్ప్రణౌమి నిత్యమ్ ।
పాపాపహారిణీ-న్దేవీ-మ్భుక్తిముక్తిప్రదాయినీమ్ ।
అనన్తాం-విఀజయాం శుద్ధాం శరణ్యాం శివదాం శివామ్ ॥ 17 ॥
వియదీకారసంయుఀక్తం-వీఀతిహోత్రసమన్వితమ్ ।
అర్ధేన్దులసిత-న్దేవ్యా బీజం సర్వార్థసాధకమ్ ॥ 18 ॥
ఏవమేకాఖ్షర-మ్బ్రహ్మ యతయ-శ్శుద్ధచేతసః ।
ధ్యాయన్తి పరమానన్దమయా జ్ఞానామ్బురాశయః ॥ 19 ॥
వాఙ్మాయా బ్రహ్మసూస్తస్మా-థ్షష్ఠం-వఀక్త్రసమన్వితమ్ ।
సూర్యో-ఽవామశ్రోత్రబిన్దుసంయుఀక్తష్టాత్తృతీయకః ।
నారాయణేన సమ్మిశ్రో వాయుశ్చాధరయుక్తతః ।
విచ్చే నవార్ణకో-ఽర్ణ-స్స్యాన్మహదానన్దదాయకః ॥ 20 ॥
హృత్పుణ్డరీకమధ్యస్థా-మ్ప్రాతస్సూర్యసమప్రభామ్ ।
పాశాఙ్కుశధరాం సౌమ్యాం-వఀరదాభయహస్తకామ్ ।
త్రినేత్రాం రక్తవసనా-మ్భక్తకామదుఘా-మ్భజే ॥ 21 ॥
నమామి త్వా-మ్మహాదేవీ-మ్మహాభయవినాశినీమ్ ।
మహాదుర్గప్రశమనీ-మ్మహాకారుణ్యరూపిణీమ్ ॥ 22 ॥
యస్యా-స్స్వరూప-మ్బ్రహ్మాదయో న జానన్తి తస్మాదుచ్యతే అజ్ఞేయా ।
యస్యా అన్తో న లభ్యతే తస్మాదుచ్యతే అనన్తా ।
యస్యా లఖ్ష్య-న్నోపలఖ్ష్యతే తస్మాదుచ్యతే అలఖ్ష్యా ।
యస్యా జనన-న్నోపలభ్యతే తస్మాదుచ్యతే అజా ।
ఏకైవ సర్వత్ర వర్తతే తస్మాదుచ్యతే ఏకా ।
ఏకైవ విశ్వరూపిణీ తస్మాదుచ్యతే నైకా ।
అత ఏవోచ్యతే అజ్ఞేయానన్తాలఖ్ష్యాజైకా నైకేతి ॥ 23 ॥
మన్త్రాణా-మ్మాతృకా దేవీ శబ్దానా-ఞ్జ్ఞానరూపిణీ ।
జ్ఞానానా-ఞ్చిన్మయాతీతా శూన్యానాం శూన్యసాఖ్షిణీ ।
యస్యాః పరతర-న్నాస్తి సైషా దుర్గా ప్రకీర్తితా ॥ 24 ॥
తా-న్దుర్గా-న్దుర్గమా-న్దేవీ-న్దురాచారవిఘాతినీమ్ ।
నమామి భవభీతో-ఽహం సంసారార్ణవతారిణీమ్ ॥ 25 ॥
ఇదమథర్వశీర్షం-యోఀ-ఽధీతే స పఞ్చాథర్వశీర్షజపఫలమాప్నోతి ।
ఇదమథర్వశీర్షమజ్ఞాత్వా యో-ఽర్చాం స్థాపయతి ।
శతలఖ్ష-మ్ప్రజప్త్వా-ఽపి సో-ఽర్చాసిద్ధి-న్న విన్దతి ।
శతమష్టోత్తర-ఞ్చాస్య పురశ్చర్యావిధి-స్స్మృతః ।
దశవార-మ్పఠేద్యస్తు సద్యః పాపైః ప్రముచ్యతే ।
మహాదుర్గాణి తరతి మహాదేవ్యాః ప్రసాదతః । 26 ॥
సాయమధీయానో దివసకృత-మ్పాప-న్నాశయతి ।
ప్రాతరధీయానో రాత్రికృత-మ్పాప-న్నాశయతి ।
సాయ-మ్ప్రాతః ప్రయుఞ్జానో అపాపో భవతి ।
నిశీథే తురీయసన్ధ్యాయా-ఞ్జప్త్వా వాక్సిద్ధిర్భవతి ।
నూతనాయా-మ్ప్రతిమాయా-ఞ్జప్త్వా దేవతాసాన్నిధ్య-మ్భవతి ।
ప్రాణప్రతిష్ఠాయా-ఞ్జప్త్వా ప్రాణానా-మ్ప్రతిష్ఠా భవతి ।
భౌమాశ్విన్యా-మ్మహాదేవీసన్నిధౌ జప్త్వా మహామృత్యు-న్తరతి ।
స మహామృత్యు-న్తరతి ।
య ఏవం-వేఀద ।
ఇత్యుపనిషత్ ॥ 27 ॥
ఇతి దేవ్యథర్వశీర్షమ్ ।
