॥ తృతీయ ముణ్డకే ప్రథమః ఖణ్డః ॥

ద్వా సుపర్ణా సయుజా సఖాయా సమానం-వృఀఖ్ష-మ్పరిషస్వజాతే ।
తయోరన్యః పిప్పలం స్వాద్వత్త్యనశ్నన్నన్యో అభిచాకశీతి ॥ 1॥

సమానే వృఖ్షే పురుషో నిమగ్నో-ఽనిశయా శోచతి ముహ్యమానః ।
జుష్టం-యఀదా పశ్యత్యన్యమీశమస్య
మహిమానమితి వీతశోకః ॥ 2॥

యదా పశ్యః పశ్యతే రుక్మవర్ణం
కర్తారమీశ-మ్పురుష-మ్బ్రహ్మయోనిమ్ ।
తదా విద్వా-న్పుణ్యపాపే విధూయ
నిరఞ్జనః పరమం సామ్యముపైతి ॥ 3॥

ప్రణో హ్యేష య-స్సర్వభూతైర్విభాతి
విజానన్ విద్వా-న్భవతే నాతివాదీ ।
ఆత్మక్రీడ ఆత్మరతిః క్రియావా-
నేష బ్రహ్మవిదాం-వఀరిష్ఠః ॥ 4॥

సత్యేన లభ్యస్తపసా హ్యేష ఆత్మా
సమ్యగ్జ్ఞానేన బ్రహ్మచర్యేణ నిత్యమ్ ।
అన్తస్శరీరే జ్యోతిర్మయో హి శుభ్రో
య-మ్పశ్యన్తి యతయః, ఖ్షీణదోషాః ॥ 5॥

సత్యమేవ జయతే నానృతం
సత్యేన పన్థా వితతో దేవయానః ।
యేనా-ఽఽక్రమన్త్యృషయో హ్యాప్తకామా
యత్ర త-థ్సత్యస్య పరమ-న్నిధానమ్ ॥ 6॥

బృహచ్చ తద్ దివ్యమచిన్త్యరూపం
సూఖ్ష్మాచ్చ త-థ్సూఖ్ష్మతరం-విఀభాతి ।
దూరా-థ్సుదూరే తదిహాన్తికే చ
పశ్యన్త్విహైవ నిహిత-ఙ్గుహాయామ్ ॥ 7॥

న చఖ్షుషా గృహ్యతే నాపి వాచా
నాన్యైర్దేవైస్తపసా కర్మణ వా ।
జ్ఞానప్రసాదేన విశుద్ధసత్త్వ-
స్తతస్తు త-మ్పశ్యతే నిష్కలం
ధ్యాయమానః ॥ 8॥

ఏషో-ఽణురాత్మా చేతసా వేదితవ్యో
యస్మి-న్ప్రాణః పఞ్చధా సం​విఀవేశ ।
ప్రాణైశ్చిత్తం సర్వమోత-మ్ప్రజానాం
యస్మిన్ విశుద్ధే విభవత్యేష ఆత్మా ॥ 9॥

యం-యంఀ లోక-మ్మనసా సం​విఀభాతి
విశుద్ధసత్త్వః కామయతే యాంశ్చ కామాన్ ।
త-న్తం-లోఀక-ఞ్జయతే తాంశ్చ కామాం-
స్తస్మాదాత్మజ్ఞం హ్యర్చయేత్ భూతికామః ॥ 10॥

॥ ఇతి ముణ్డకోపనిషది తృతీయముణ్డకే ప్రథమః ఖణ్డః ॥