ఓ-మ్భ॒ద్ర-ఙ్కర్ణే॑భి-శ్శృణు॒యామ॑ దేవాః । భ॒ద్ర-మ్ప॑శ్యేమా॒ఖ్షభి॒-ర్యజ॑త్రాః । స్థి॒రైరఙ్గై᳚స్తుష్టు॒వాగ్ం స॑స్త॒నూభిః॑ । వ్యశే॑మ దే॒వహి॑తం॒-యఀదాయుః॑ । స్వ॒స్తి న॒ ఇన్ద్రో॑ వృ॒ద్ధశ్ర॑వాః । స్వ॒స్తి నః॑ పూ॒షా వి॒శ్వవే॑దాః । స్వ॒స్తి న॒స్తార్ఖ్ష్యో॒ అరి॑ష్టనేమిః । స్వ॒స్తి నో॒ బృహ॒స్పతి॑-ర్దధాతు ॥
ఓం శాన్తి॒-శ్శాన్తి॒-శ్శాన్తిః॑ ॥

॥ అథ మాణ్డూక్యోపనిషత్ ॥

హరిః ఓమ్ ।
ఓమిత్యేతదఖ్షరమిదగ్ం సర్వ-న్తస్యోపవ్యాఖ్యానం
భూత-మ్భవద్ భవిష్యదితి సర్వమోఙ్కార ఏవ
యచ్చాన్య-త్త్రికాలాతీత-న్తదప్యోఙ్కార ఏవ ॥ 1 ॥

సర్వగ్ం హ్యేతద్ బ్రహ్మాయమాత్మా బ్రహ్మ సో-ఽయమాత్మా చతుష్పాత్ ॥ 2 ॥

జాగరితస్థానో బహిష్ప్రజ్ఞ-స్సప్తాఙ్గ ఏకోనవింశతిముఖః
స్థూలభుగ్వైశ్వానరః ప్రథమః పాదః ॥ 3 ॥

స్వప్నస్థానో-ఽన్తఃప్రజ్ఞ-స్సప్తాఙ్గ ఏకోనవింశతిముఖః
ప్రవివిక్తభుక్తైజసో ద్వితీయః పాదః ॥ 4 ॥

యత్ర సుప్తో న కఞ్చన కామ-ఙ్కామయతే న కఞ్చన స్వప్నం
పశ్యతి త-థ్సుషుప్తమ్ । సుషుప్తస్థాన ఏకీభూతః ప్రజ్ఞానఘన
ఏవానన్దమయో హ్యానన్దభుక్చేతోముఖః ప్రాజ్ఞస్తృతీయః పాదః ॥ 5 ॥

ఏష సర్వేశ్వరః ఏష సర్వజ్ఞ ఏషో-ఽన్తర్యామ్యేష యోని-స్సర్వస్య
ప్రభవాప్యయౌ హి భూతానామ్ ॥ 6 ॥

నాన్తఃప్రజ్ఞ-న్న బహిష్ప్రజ్ఞ-న్నోభయతఃప్రజ్ఞ-న్న ప్రజ్ఞానఘనం
న ప్రజ్ఞ-న్నాప్రజ్ఞమ్ । అదృష్టమవ్యవహార్యమగ్రాహ్యమలఖ్షణం
అచిన్త్యమవ్యపదేశ్యమేకాత్మప్రత్యయసార-మ్ప్రపఞ్చోపశమం
శాన్తం శివమద్వైత-ఞ్చతుర్థ-మ్మన్యన్తే స ఆత్మా స విజ్ఞేయః ॥ 7 ॥

సో-ఽయమాత్మాధ్యఖ్షరమోఙ్కారో-ఽధిమాత్ర-మ్పాదా మాత్రా మాత్రాశ్చ పాదా
అకార ఉకారో మకార ఇతి ॥ 8 ॥

జాగరితస్థానో వైశ్వానరో-ఽకారః ప్రథమా మాత్రా-ఽఽప్తేరాదిమత్త్వాద్
వా-ఽఽప్నోతి హ వై సర్వాన్ కామానాదిశ్చ భవతి య ఏవం-వేఀద ॥ 9 ॥

స్వప్నస్థానస్తైజస ఉకారో ద్వితీయా మాత్రోత్కర్​షాత్
ఉభయత్వాద్వోత్కర్​షతి హ వై జ్ఞానసన్తతిం సమానశ్చ భవతి
నాస్యాబ్రహ్మవిత్కులే భవతి య ఏవం-వేఀద ॥ 10 ॥

సుషుప్తస్థానః ప్రాజ్ఞో మకారస్తృతీయా మాత్రా మితేరపీతేర్వా
మినోతి హ వా ఇదం సర్వమపీతిశ్చ భవతి య ఏవం-వేఀద ॥ 11 ॥

అమాత్రశ్చతుర్థో-ఽవ్యవహార్యః ప్రపఞ్చోపశమ-శ్శివో-ఽద్వైత
ఏవమోఙ్కార ఆత్మైవ సం​విఀశత్యాత్మనా-ఽఽత్మానం-యఀ ఏవం-వేఀద ॥ 12 ॥

॥ ఇతి మాణ్డూక్యోపనిష-థ్సమాప్తా ॥