ఓం స॒హ నా॑వవతు । స॒హ నౌ॑ భునక్తు । స॒హ వీ॒ర్య॑-ఙ్కరవావహై ।
తే॒జ॒స్వినా॒వధీ॑తమస్తు॒ మా వి॑ద్విషా॒వహై᳚ ॥
ఓం శాన్తి॒-శ్శాన్తి॒-శ్శాన్తిః॑ ॥
ఓం అథ పురుషో హ వై నారాయణో-ఽకామయత ప్రజా-స్సృ॑జేయే॒తి ।
నా॒రా॒య॒ణాత్ప్రా॑ణో జా॒యతే । మన-స్సర్వేన్ద్రి॑యాణి॒ చ ।
ఖం-వాఀయుర్జ్యోతిరాపః పృథివీ విశ్వ॑స్య ధా॒రిణీ ।
నా॒రా॒య॒ణాద్బ్ర॑హ్మా జా॒యతే ।
నా॒రా॒య॒ణాద్రు॑ద్రో జా॒యతే ।
నా॒రా॒య॒ణాది॑న్ద్రో జా॒యతే ।
నా॒రా॒య॒ణాత్ప్రజాపతయః ప్ర॑జాయ॒న్తే ।
నా॒రా॒య॒ణాద్ద్వాదశాదిత్యా రుద్రా వసవస్సర్వాణి చ ఛ॑న్దాగ్ం॒సి ।
నా॒రా॒య॒ణాదేవ సము॑త్పద్య॒న్తే ।
నా॒రా॒య॒ణే ప్ర॑వర్త॒న్తే ।
నా॒రా॒య॒ణే ప్ర॑లీయ॒న్తే ॥
ఓమ్ । అథ నిత్యో నా॑రాయ॒ణః । బ్ర॒హ్మా నా॑రాయ॒ణః ।
శి॒వశ్చ॑ నారాయ॒ణః । శ॒క్రశ్చ॑ నారాయ॒ణః ।
ద్యా॒వా॒పృ॒థి॒వ్యౌ చ॑ నారాయ॒ణః । కా॒లశ్చ॑ నారాయ॒ణః ।
ది॒శశ్చ॑ నారాయ॒ణః । ఊ॒ర్ధ్వశ్చ॑ నారాయ॒ణః ।
అ॒ధశ్చ॑ నారాయ॒ణః । అ॒న్త॒ర్బ॒హిశ్చ॑ నారాయ॒ణః ।
నారాయణ ఏవే॑దగ్ం స॒ర్వమ్ ।
యద్భూ॒తం-యఀచ్చ॒ భవ్యమ్᳚ ।
నిష్కలో నిరఞ్జనో నిర్వికల్పో నిరాఖ్యాత-శ్శుద్ధో దేవ
ఏకో॑ నారాయ॒ణః । న ద్వి॒తీయో᳚స్తి॒ కశ్చి॑త్ ।
య ఏ॑వం-వేఀ॒ద ।
స విష్ణురేవ భవతి స విష్ణురే॑వ భ॒వతి ॥
ఓమిత్య॑గ్రే వ్యా॒హరేత్ । నమ ఇ॑తి ప॒శ్చాత్ ।
నా॒రా॒య॒ణాయేత్యు॑పరి॒ష్టాత్ ।
ఓమి॑త్యేకా॒ఖ్షరమ్ । నమ ఇతి॑ ద్వే అ॒ఖ్షరే ।
నా॒రా॒య॒ణాయేతి పఞ్చా᳚ఖ్షరా॒ణి ।
ఏతద్వై నారాయణస్యాష్టాఖ్ష॑ర-మ్ప॒దమ్ ।
యో హ వై నారాయణస్యాష్టాఖ్షర-మ్పద॑మధ్యే॒తి ।
అనపబ్రవస్సర్వమా॑యురే॒తి ।
విన్దతే ప్రా॑జాప॒త్యగ్ం రాయస్పోష॑-ఙ్గౌప॒త్యమ్ ।
తతో-ఽమృతత్వమశ్నుతే తతో-ఽమృతత్వమశ్ను॑త ఇ॒తి ।
య ఏ॑వం-వేఀ॒ద ॥
ప్రత్యగానన్ద-మ్బ్రహ్మ పురుష-మ్ప్రణవ॑స్వరూ॒పమ్ ।
అకార ఉకార మకా॑ర ఇ॒తి ।
తానేకధా సమభరత్తదేత॑దోమి॒తి ।
యముక్త్వా॑ ముచ్య॑తే యో॒గీ॒ జ॒న్మ॒సంసా॑రబ॒న్ధనాత్ ।
ఓ-న్నమో నారాయణాయేతి మ॑న్త్రోపా॒సకః ।
వైకుణ్ఠభువనలోక॑-ఙ్గమి॒ష్యతి ।
తదిద-మ్పర-మ్పుణ్డరీకం-విఀ ॑జ్ఞాన॒ఘనమ్ ।
తస్మాత్తదిదా॑వన్మా॒త్రమ్ ।
బ్రహ్మణ్యో దేవ॑కీపు॒త్రో॒ బ్రహ్మణ్యో మ॑ధుసూ॒దనోమ్ ।
సర్వభూతస్థమేక॑-న్నారా॒యణమ్ ।
కారణరూపమకార ప॑రబ్ర॒హ్మోమ్ ।
ఏతదథర్వ శిరో॑యో-ఽధీ॒తే ప్రా॒తర॑ధీయా॒నో॒ రాత్రికృత-మ్పాప॑-న్నాశ॒యతి ।
సా॒యమ॑ధీయా॒నో॒ దివసకృత-మ్పాప॑-న్నాశ॒యతి ।
మాధ్యన్దినమాదిత్యాభిముఖో॑-ఽధీయా॒నః॒ పఞ్చపాతకోపపాతకా᳚త్ప్రము॒చ్యతే ।
సర్వ వేద పారాయణ పు॑ణ్యం-లఀ॒భతే ।
నారాయణసాయుజ్యమ॑వాప్నో॒తి॒ నారాయణ సాయుజ్యమ॑వాప్నో॒తి ।
య ఏ॑వం-వేఀ॒ద । ఇత్యు॑ప॒నిష॑త్ ॥
ఓం స॒హ నా॑వవతు । స॒హ నౌ॑ భునక్తు । స॒హ వీ॒ర్య॑-ఙ్కరవావహై ।
తే॒జ॒స్వినా॒వధీ॑తమస్తు॒ మా వి॑ద్విషా॒వహై᳚ ॥
ఓం శాన్తి॒-శ్శాన్తి॒-శ్శాన్తిః॑ ॥
