॥ ద్వితీయ ముణ్డకే ద్వితీయః ఖణ్డః ॥

ఆవి-స్సన్నిహిత-ఙ్గుహాచర-న్నామ
మహత్పదమత్రైత-థ్సమర్పితమ్ ।
ఏజత్ప్రాణన్నిమిషచ్చ యదేతజ్జానథ
సదసద్వరేణ్య-మ్పరం-విఀజ్ఞానాద్యద్వరిష్ఠ-మ్ప్రజానామ్ ॥ 1॥

యదర్చిమద్యదణుభ్యో-ఽణు చ
యస్మిఁల్లోకా నిహితా లోకినశ్చ ।
తదేతదఖ్షర-మ్బ్రహ్మ స ప్రాణస్తదు వాఙ్మనః
తదేతత్సత్య-న్తదమృత-న్తద్వేద్ధవ్యం సోమ్య విద్ధి ॥ 2॥

ధనుర్ గృహీత్వౌపనిషద-మ్మహాస్త్రం
శరం హ్యుపాసా నిశితం సన్ధయీత ।
ఆయమ్య తద్భావగతేన చేతసా
లఖ్ష్య-న్తదేవాఖ్షరం సోమ్య విద్ధి ॥ 3॥

ప్రణవో ధను-శ్శారో హ్యాత్మా బ్రహ్మ తల్లఖ్ష్యముచ్యతే ।
అప్రమత్తేన వేద్ధవ్యం శరవ-త్తన్మయో భవేత్ ॥ 4॥

యస్మి-న్ద్యౌః పృథివీ చాన్తరిఖ్షమోతం
మన-స్సహ ప్రాణైశ్చ సర్వైః ।
తమేవైక-ఞ్జానథ ఆత్మానమన్యా వాచో
విముఞ్చథామృతస్యైష సేతుః ॥ 5॥

అరా ఇవ రథనాభౌ సంహతా యత్ర నాడ్యః ।
స ఏషో-ఽన్తశ్చరతే బహుధా జాయమానః ।
ఓమిత్యేవ-న్ధ్యాయథ ఆత్మానం స్వస్తి వః
పారాయ తమసః పరస్తాత్ ॥ 6॥

య-స్సర్వజ్ఞ-స్సర్వవిద్ యస్యైష మహిమా భువి ।
దివ్యే బ్రహ్మపురే హ్యేష వ్యోమ్న్యాత్మా ప్రతిష్ఠితః ॥

మనోమయః ప్రాణశరీరనేతా
ప్రతిష్ఠితో-ఽన్నే హృదయం సన్నిధాయ ।
తద్ విజ్ఞానేన పరిపశ్యన్తి ధీరా
ఆనన్దరూపమమృతం-యఀద్ విభాతి ॥ 7॥

భిద్యతే హృదయగ్రన్థిశ్ఛిద్యన్తే సర్వసంశయాః ।
ఖ్షీయన్తే చాస్య కర్మాణి తస్మి-న్దృష్టే పరావరే ॥ 8॥

హిరణ్మయే పరే కోశే విరజ-మ్బ్రహ్మ నిష్కలమ్ ।
తచ్ఛుభ్ర-ఞ్జ్యోతిష-ఞ్జ్యోతిస్తద్ యదాత్మవిదో విదుః ॥ 9॥

న తత్ర సూర్యో భాతి న చన్ద్రతారకం
నేమా విద్యుతో భాన్తి కుతో-ఽయమగ్నిః ।
తమేవ భాన్తమనుభాతి సర్వం
తస్య భాసా సర్వమిదం-విఀభాతి ॥ 10॥

బ్రహ్మైవేదమమృత-మ్పురస్తాద్ బ్రహ్మ పశ్చాద్ బ్రహ్మ దఖ్షిణతశ్చోత్తరేణ ।
అధశ్చోర్ధ్వ-ఞ్చ ప్రసృత-మ్బ్రహ్మైవేదం-విఀశ్వమిదం-వఀరిష్ఠమ్ ॥ 11॥

॥ ఇతి ముణ్డకోపనిషది ద్వితీయముణ్డకే ద్వితీయః ఖణ్డః ॥