𑌕𑌳𑌾𑌭𑍍𑌯𑌾𑌂 𑌚𑍂𑌡𑌾𑌲𑌂𑌕𑍃𑌤-𑌶𑌶𑌿𑌕𑌳𑌾𑌭𑍍𑌯𑌾𑌂 𑌨𑌿𑌜𑌤𑌪𑌃-
-𑌫𑌲𑌾𑌭𑍍𑌯𑌾𑌂 𑌭𑌕𑍍𑌤𑍇𑌷𑍁 𑌪𑍍𑌰𑌕𑌟𑌿𑌤-𑌫𑌲𑌾𑌭𑍍𑌯𑌾𑌂 𑌭𑌵𑌤𑍁 𑌮𑍇 ।
𑌶𑌿𑌵𑌾𑌭𑍍𑌯𑌾-𑌮𑌸𑍍𑌤𑍋𑌕-𑌤𑍍𑌰𑌿𑌭𑍁𑌵𑌨-𑌶𑌿𑌵𑌾𑌭𑍍𑌯𑌾𑌂 𑌹𑍃𑌦𑌿 𑌪𑍁𑌨-
-𑌰𑍍𑌭𑌵𑌾𑌭𑍍𑌯𑌾-𑌮𑌾𑌨𑌂𑌦-𑌸𑍍𑌫𑍁𑌰𑌦𑌨𑍁𑌭𑌵𑌾𑌭𑍍𑌯𑌾𑌂 𑌨𑌤𑌿𑌰𑌿𑌯𑌮𑍍 ॥ 1 ॥

𑌗𑌳𑌂𑌤𑍀 𑌶𑌂𑌭𑍋 𑌤𑍍𑌵𑌚𑍍𑌚𑌰𑌿𑌤-𑌸𑌰𑌿𑌤𑌃 𑌕𑌿𑌲𑍍𑌬𑌿𑌷𑌰𑌜𑍋
𑌦𑌳𑌂𑌤𑍀 𑌧𑍀𑌕𑍁𑌲𑍍𑌯𑌾-𑌸𑌰𑌣𑌿𑌷𑍁 𑌪𑌤𑌂𑌤𑍀 𑌵𑌿𑌜𑌯𑌤𑌾𑌮𑍍 ।
𑌦𑌿𑌶𑌂𑌤𑍀 𑌸𑌂𑌸𑌾𑌰-𑌭𑍍𑌰𑌮𑌣-𑌪𑌰𑌿𑌤𑌾𑌪𑍋𑌪𑌶𑌮𑌨𑌂
𑌵𑌸𑌂𑌤𑍀 𑌮𑌚𑍍𑌚𑍇𑌤𑍋𑌹𑍍𑌰𑌦𑌭𑍁𑌵𑌿 𑌶𑌿𑌵𑌾𑌨𑌂𑌦𑌲𑌹𑌰𑍀 ॥ 2 ॥

𑌤𑍍𑌰𑌯𑍀𑌵𑍇𑌦𑍍𑌯𑌂 𑌹𑍃𑌦𑍍𑌯𑌂 𑌤𑍍𑌰𑌿𑌪𑍁𑌰-𑌹𑌰𑌮𑌾𑌦𑍍𑌯𑌂 𑌤𑍍𑌰𑌿𑌨𑌯𑌨𑌂
𑌜𑌟𑌾𑌭𑌾𑌰𑍋𑌦𑌾𑌰𑌂 𑌚𑌲𑌦𑍁𑌰𑌗𑌹𑌾𑌰𑌂 𑌮𑍃𑌗𑌧𑌰𑌮𑍍 ।
𑌮𑌹𑌾𑌦𑍇𑌵𑌂 𑌦𑍇𑌵𑌂 𑌮𑌯𑌿 𑌸𑌦𑌯𑌭𑌾𑌵𑌂 𑌪𑌶𑍁𑌪𑌤𑌿𑌂
𑌚𑌿𑌦𑌾𑌲𑌂𑌬𑌂 𑌸𑌾𑌂𑌬𑌂 𑌶𑌿𑌵𑌮𑌤𑌿-𑌵𑌿𑌡𑌂𑌬𑌂 𑌹𑍃𑌦𑌿 𑌭𑌜𑍇 ॥ 3 ॥

𑌸𑌹𑌸𑍍𑌰𑌂 𑌵𑌰𑍍𑌤𑌂𑌤𑍇 𑌜𑌗𑌤𑌿 𑌵𑌿𑌬𑍁𑌧𑌾𑌃 𑌕𑍍𑌷𑍁𑌦𑍍𑌰𑌫𑌲𑌦𑌾
𑌨 𑌮𑌨𑍍𑌯𑍇 𑌸𑍍𑌵𑌪𑍍𑌨𑍇 𑌵𑌾 𑌤𑌦𑌨𑍁𑌸𑌰𑌣𑌂 𑌤𑌤𑍍𑌕𑍃𑌤𑌫𑌲𑌮𑍍 ।
𑌹𑌰𑌿-𑌬𑍍𑌰𑌹𑍍𑌮𑌾𑌦𑍀𑌨𑌾-𑌮𑌪𑌿 𑌨𑌿𑌕𑌟-𑌭𑌾𑌜𑌾𑌮𑌸𑍁𑌲𑌭𑌂
𑌚𑌿𑌰𑌂 𑌯𑌾𑌚𑍇 𑌶𑌂𑌭𑍋 𑌶𑌿𑌵 𑌤𑌵 𑌪𑌦𑌾𑌂𑌭𑍋𑌜-𑌭𑌜𑌨𑌮𑍍 ॥ 4 ॥

𑌸𑍍𑌮𑍃𑌤𑍌 𑌶𑌾𑌸𑍍𑌤𑍍𑌰𑍇 𑌵𑍈𑌦𑍍𑌯𑍇 𑌶𑌕𑍁𑌨-𑌕𑌵𑌿𑌤𑌾-𑌗𑌾𑌨𑌫𑌣𑌿𑌤𑍌
𑌪𑍁𑌰𑌾𑌣𑍇 𑌮𑌂𑌤𑍍𑌰𑍇 𑌵𑌾 𑌸𑍍𑌤𑍁𑌤𑌿-𑌨𑌟𑌨-𑌹𑌾𑌸𑍍𑌯𑍇𑌷𑍍𑌵𑌚𑌤𑍁𑌰𑌃 ।
𑌕𑌥𑌂 𑌰𑌾𑌜𑍍𑌞𑌾𑌂 𑌪𑍍𑌰𑍀𑌤𑌿𑌰𑍍𑌭𑌵𑌤𑌿 𑌮𑌯𑌿 𑌕𑍋𑌽𑌹𑌂 𑌪𑌶𑍁𑌪𑌤𑍇
𑌪𑌶𑍁𑌂 𑌮𑌾𑌂 𑌸𑌰𑍍𑌵𑌜𑍍𑌞 𑌪𑍍𑌰𑌥𑌿𑌤 𑌕𑍃𑌪𑌯𑌾 𑌪𑌾𑌲𑌯 𑌵𑌿𑌭𑍋 ॥ 5 ॥

𑌘𑌟𑍋 𑌵𑌾 𑌮𑍃𑌤𑍍𑌪𑌿𑌂𑌡𑍋-𑌽𑌪𑍍𑌯𑌣𑍁𑌰𑌪𑌿 𑌚 𑌧𑍂𑌮𑍋𑌽𑌗𑍍𑌨𑌿𑌰𑌚𑌲𑌃
𑌪𑌟𑍋 𑌵𑌾 𑌤𑌂𑌤𑍁𑌰𑍍𑌵𑌾 𑌪𑌰𑌿𑌹𑌰𑌤𑌿 𑌕𑌿𑌂 𑌘𑍋𑌰𑌶𑌮𑌨𑌮𑍍 ।
𑌵𑍃𑌥𑌾 𑌕𑌂𑌠𑌕𑍍𑌷𑍋𑌭𑌂 𑌵𑌹𑌸𑌿 𑌤𑌰𑌸𑌾 𑌤𑌰𑍍𑌕𑌵𑌚𑌸𑌾
𑌪𑌦𑌾𑌂𑌭𑍋𑌜𑌂 𑌶𑌂𑌭𑍋𑌰𑍍𑌭𑌜 𑌪𑌰𑌮𑌸𑍌𑌖𑍍𑌯𑌂 𑌵𑍍𑌰𑌜 𑌸𑍁𑌧𑍀𑌃 ॥ 6 ॥

𑌮𑌨𑌸𑍍𑌤𑍇 𑌪𑌾𑌦𑌾𑌬𑍍𑌜𑍇 𑌨𑌿𑌵𑌸𑌤𑍁 𑌵𑌚𑌃 𑌸𑍍𑌤𑍋𑌤𑍍𑌰𑌫𑌣𑌿𑌤𑍌
𑌕𑌰𑍌 𑌚𑌾𑌭𑍍𑌯𑌰𑍍𑌚𑌾𑌯𑌾𑌂 𑌶𑍍𑌰𑍁𑌤𑌿𑌰𑌪𑌿 𑌕𑌥𑌾 𑌕𑌰𑍍𑌣𑌨𑌵𑌿𑌧𑍌 ।
𑌤𑌵 𑌧𑍍𑌯𑌾𑌨𑍇 𑌬𑍁𑌦𑍍𑌧𑌿𑌰𑍍𑌨𑌯𑌨𑌯𑍁𑌗𑌳𑌂 𑌮𑍂𑌰𑍍𑌤𑌿𑌵𑌿𑌭𑌵𑍇 [𑌬𑍁𑌦𑍍𑌧𑌿𑌃 𑌨𑌯𑌨𑌯𑍁𑌗𑌳𑌂]
𑌪𑌰-𑌗𑍍𑌰𑌂𑌥𑌾𑌨𑍍𑌕𑍈𑌰𑍍𑌵𑌾 𑌪𑌰𑌮𑌶𑌿𑌵 𑌜𑌾𑌨𑍇 𑌪𑌰𑌮𑌤𑌃 ॥ 𑍭 ॥

𑌯𑌥𑌾 𑌬𑍁𑌦𑍍𑌧𑌿𑌃 𑌶𑍁𑌕𑍍𑌤𑍌 𑌰𑌜𑌤𑌮𑌿𑌤𑌿 𑌕𑌾𑌚𑌾𑌶𑍍𑌮𑌨𑌿 𑌮𑌣𑌿- [𑌮𑌣𑌿𑌃 𑌜𑌲𑍇]
-𑌰𑍍𑌜𑌲𑍇 𑌪𑍈𑌷𑍍𑌟𑍇 𑌕𑍍𑌷𑍀𑌰𑌂 𑌭𑌵𑌤𑌿 𑌮𑍃𑌗𑌤𑍃𑌷𑍍𑌣𑌾-𑌸𑍁 𑌸𑌲𑌿𑌲𑌮𑍍 ।
𑌤𑌥𑌾 𑌦𑍇𑌵𑌭𑍍𑌰𑌾𑌂𑌤𑍍𑌯𑌾 𑌭𑌜𑌤𑌿 𑌭𑌵𑌦𑌨𑍍𑌯𑌂 𑌜𑌡𑌜𑌨𑍋
𑌮𑌹𑌾𑌦𑍇𑌵𑍇𑌶𑌂 𑌤𑍍𑌵𑌾𑌂 𑌮𑌨𑌸𑌿 𑌚 𑌨 𑌮𑌤𑍍𑌵𑌾 𑌪𑌶𑍁𑌪𑌤𑍇 ॥ 𑍮 ॥

𑌗𑌭𑍀𑌰𑍇 𑌕𑌾𑌸𑌾𑌰𑍇 𑌵𑌿𑌶𑌤𑌿 𑌵𑌿𑌜𑌨𑍇 𑌘𑍋𑌰𑌵𑌿𑌪𑌿𑌨𑍇
𑌵𑌿𑌶𑌾𑌲𑍇 𑌶𑍈𑌲𑍇 𑌚 𑌭𑍍𑌰𑌮𑌤𑌿 𑌕𑍁𑌸𑍁𑌮𑌾𑌰𑍍𑌥𑌂 𑌜𑌡𑌮𑌤𑌿𑌃 ।
𑌸𑌮𑌰𑍍𑌪𑍍𑌯𑍈𑌕𑌂 𑌚𑍇𑌤𑌃 𑌸𑌰𑌸𑌿𑌜𑌮𑍁-𑌮𑌾𑌨𑌾𑌥 𑌭𑌵𑌤𑍇
𑌸𑍁𑌖𑍇-𑌨𑌾𑌵𑌸𑍍𑌥𑌾𑌤𑍁𑌂 𑌜𑌨 𑌇𑌹 𑌨 𑌜𑌾𑌨𑌾𑌤𑌿 𑌕𑌿𑌮𑌹𑍋 ॥ 𑍯 ॥

𑌨𑌰𑌤𑍍𑌵𑌂 𑌦𑍇𑌵𑌤𑍍𑌵𑌂 𑌨𑌗𑌵𑌨-𑌮𑍃𑌗𑌤𑍍𑌵𑌂 𑌮𑌶𑌕𑌤𑌾
𑌪𑌶𑍁𑌤𑍍𑌵𑌂 𑌕𑍀𑌟𑌤𑍍𑌵𑌂 𑌭𑌵𑌤𑍁 𑌵𑌿𑌹𑌗𑌤𑍍𑌵𑌾𑌦𑌿 𑌜𑌨𑌨𑌮𑍍 ।
𑌸𑌦𑌾 𑌤𑍍𑌵𑌤𑍍𑌪𑌾𑌦𑌾𑌬𑍍𑌜-𑌸𑍍𑌮𑌰𑌣-𑌪𑌰𑌮𑌾𑌨𑌂𑌦𑌲𑌹𑌰𑍀-
-𑌵𑌿𑌹𑌾𑌰𑌾𑌸𑌕𑍍𑌤𑌂 𑌚𑍇𑌦𑍍𑌧𑍃𑌦𑌯𑌮𑌿𑌹 𑌕𑌿𑌂 𑌤𑍇𑌨 𑌵𑌪𑍁𑌷𑌾 ॥ 10 ॥

𑌵𑌟𑍁𑌰𑍍𑌵𑌾 𑌗𑍇𑌹𑍀 𑌵𑌾 𑌯𑌤𑌿𑌰𑌪𑌿 𑌜𑌟𑍀 𑌵𑌾 𑌤𑌦𑌿𑌤𑌰𑍋
𑌨𑌰𑍋 𑌵𑌾 𑌯𑌃 𑌕𑌶𑍍𑌚𑌿𑌦𑍍𑌭𑌵𑌤𑍁 𑌭𑌵 𑌕𑌿𑌂 𑌤𑍇𑌨 𑌭𑌵𑌤𑌿 ।
𑌯𑌦𑍀𑌯𑌂 𑌹𑍃𑌤𑍍𑌪𑌦𑍍𑌮𑌂 𑌯𑌦𑌿 𑌭𑌵𑌦𑌧𑍀𑌨𑌂 𑌪𑌶𑍁𑌪𑌤𑍇
𑌤𑌦𑍀𑌯𑌸𑍍𑌤𑍍𑌵𑌂 𑌶𑌂𑌭𑍋 𑌭𑌵𑌸𑌿 𑌭𑌵𑌭𑌾𑌰𑌂 𑌚 𑌵𑌹𑌸𑌿 ॥ 11 ॥

𑌗𑍁𑌹𑌾𑌯𑌾𑌂 𑌗𑍇𑌹𑍇 𑌵𑌾 𑌬𑌹𑌿𑌰𑌪𑌿 𑌵𑌨𑍇 𑌵𑌾𑌽𑌦𑍍𑌰𑌿𑌶𑌿𑌖𑌰𑍇
𑌜𑌲𑍇 𑌵𑌾 𑌵𑌹𑍍𑌨𑍌 𑌵𑌾 𑌵𑌸𑌤𑍁 𑌵𑌸𑌤𑍇𑌃 𑌕𑌿𑌂 𑌵𑌦 𑌫𑌲𑌮𑍍 ।
𑌸𑌦𑌾 𑌯𑌸𑍍𑌯𑍈𑌵𑌾𑌂𑌤𑌃-𑌕𑌰𑌣𑌮𑌪𑌿 𑌶𑌂𑌭𑍋 𑌤𑌵 𑌪𑌦𑍇
𑌸𑍍𑌥𑌿𑌤𑌂 𑌚𑍇𑌦𑍍𑌯𑍋𑌗𑍋𑌽𑌸𑍌 𑌸 𑌚 𑌪𑌰𑌮𑌯𑍋𑌗𑍀 𑌸 𑌚 𑌸𑍁𑌖𑍀 ॥ 12 ॥

𑌅𑌸𑌾𑌰𑍇 𑌸𑌂𑌸𑌾𑌰𑍇 𑌨𑌿𑌜-𑌭𑌜𑌨𑌦𑍂𑌰𑍇 𑌜𑌡𑌧𑌿𑌯𑌾
𑌭𑍍𑌰𑌮𑌂𑌤𑌂 𑌮𑌾𑌮𑌂𑌧𑌂 𑌪𑌰𑌮𑌕𑍃𑌪𑌯𑌾 𑌪𑌾𑌤𑍁𑌮𑍁𑌚𑌿𑌤𑌮𑍍 ।
𑌮𑌦𑌨𑍍𑌯𑌃 𑌕𑍋 𑌦𑍀𑌨𑌸𑍍𑌤𑌵 𑌕𑍃𑌪𑌣-𑌰𑌕𑍍𑌷𑌾𑌤𑌿𑌨𑌿𑌪𑍁𑌣- [𑌰𑌕𑍍𑌷𑌾𑌤𑌿𑌨𑌿𑌪𑍁𑌣𑌃 𑌤𑍍𑌵𑌦𑌨𑍍𑌯𑌃]
-𑌸𑍍𑌤𑍍𑌵𑌦𑌨𑍍𑌯𑌃 𑌕𑍋 𑌵𑌾 𑌮𑍇 𑌤𑍍𑌰𑌿𑌜𑌗𑌤𑌿 𑌶𑌰𑌣𑍍𑌯𑌃 𑌪𑌶𑍁𑌪𑌤𑍇 ॥ 13 ॥

𑌪𑍍𑌰𑌭𑍁𑌸𑍍𑌤𑍍𑌵𑌂 𑌦𑍀𑌨𑌾𑌨𑌾𑌂 𑌖𑌲𑍁 𑌪𑌰𑌮𑌬𑌂𑌧𑍁𑌃 𑌪𑌶𑍁𑌪𑌤𑍇
𑌪𑍍𑌰𑌮𑍁𑌖𑍍𑌯𑍋𑌽𑌹𑌂 𑌤𑍇𑌷𑌾𑌮𑌪𑌿 𑌕𑌿𑌮𑍁𑌤 𑌬𑌂𑌧𑍁𑌤𑍍𑌵𑌮𑌨𑌯𑍋𑌃 ।
𑌤𑍍𑌵𑌯𑍈𑌵 𑌕𑍍𑌷𑌂𑌤𑌵𑍍𑌯𑌾𑌃 𑌶𑌿𑌵 𑌮𑌦𑌪𑌰𑌾𑌧𑌾𑌶𑍍𑌚 𑌸𑌕𑌲𑌾𑌃
𑌪𑍍𑌰𑌯𑌤𑍍𑌨𑌾-𑌤𑍍𑌕𑌰𑍍𑌤𑌵𑍍𑌯𑌂 𑌮𑌦𑌵𑌨𑌮𑌿𑌯𑌂 𑌬𑌂𑌧𑍁𑌸𑌰𑌣𑌿𑌃 ॥ 14 ॥

𑌉𑌪𑍇𑌕𑍍𑌷𑌾 𑌨𑍋 𑌚𑍇𑌤𑍍𑌕𑌿𑌂 𑌨 𑌹𑌰𑌸𑌿 𑌭𑌵𑌦𑍍𑌧𑍍𑌯𑌾𑌨-𑌵𑌿𑌮𑍁𑌖𑌾𑌂
𑌦𑍁𑌰𑌾𑌶𑌾-𑌭𑍂𑌯𑌿𑌷𑍍𑌠𑌾𑌂 𑌵𑌿𑌧𑌿𑌲𑌿𑌪𑌿-𑌮𑌶𑌕𑍍𑌤𑍋 𑌯𑌦𑌿 𑌭𑌵𑌾𑌨𑍍 ।
𑌶𑌿𑌰𑌸𑍍𑌤𑌦𑍍𑌵𑍈𑌧𑌾𑌤𑍍𑌰𑌂 𑌨𑌨𑌖𑌲𑍁 𑌸𑍁𑌵𑍃𑌤𑍍𑌤𑌂 𑌪𑌶𑍁𑌪𑌤𑍇
𑌕𑌥𑌂 𑌵𑌾 𑌨𑌿𑌰𑍍𑌯𑌤𑍍𑌨𑌂 𑌕𑌰𑌨𑌖-𑌮𑍁𑌖𑍇𑌨𑍈𑌵 𑌲𑍁𑌲𑌿𑌤𑌮𑍍 ॥ 15 ॥

𑌵𑌿𑌰𑌿𑌂𑌚𑌿-𑌰𑍍𑌦𑍀𑌰𑍍𑌘𑌾𑌯𑍁-𑌰𑍍𑌭𑌵𑌤𑍁 𑌭𑌵𑌤𑌾 𑌤𑌤𑍍𑌪𑌰𑌶𑌿𑌰- [𑌤𑌤𑍍𑌪𑌰𑌶𑌿𑌰𑌃 𑌚𑌤𑍁𑌷𑍍𑌕𑌂]
-𑌶𑍍𑌚𑌤𑍁𑌷𑍍𑌕𑌂 𑌸𑌂𑌰𑌕𑍍𑌷𑍍𑌯𑌂 𑌸 𑌖𑌲𑍁 𑌭𑍁𑌵𑌿 𑌦𑍈𑌨𑍍𑌯𑌂 𑌲𑌿𑌖𑌿𑌤𑌵𑌾𑌨𑍍 ।
𑌵𑌿𑌚𑌾𑌰𑌃 𑌕𑍋 𑌵𑌾 𑌮𑌾𑌂 𑌵𑌿𑌶𑌦 𑌕𑍃𑌪𑌯𑌾 𑌪𑌾𑌤𑌿 𑌶𑌿𑌵 𑌤𑍇
𑌕𑌟𑌾𑌕𑍍𑌷𑌵𑍍𑌯𑌾𑌪𑌾𑌰𑌃 𑌸𑍍𑌵𑌯𑌮𑌪𑌿 𑌚 𑌦𑍀𑌨𑌾𑌵𑌨𑌪𑌰𑌃 ॥ 16 ॥

𑌫𑌲𑌾𑌦𑍍𑌵𑌾 𑌪𑍁𑌣𑍍𑌯𑌾𑌨𑌾𑌂 𑌮𑌯𑌿 𑌕𑌰𑍁𑌣𑌯𑌾 𑌵𑌾 𑌤𑍍𑌵𑌯𑌿 𑌵𑌿𑌭𑍋
𑌪𑍍𑌰𑌸𑌨𑍍𑌨𑍇𑌽𑌪𑌿 𑌸𑍍𑌵𑌾𑌮𑌿𑌨𑍍 𑌭𑌵𑌦𑌮𑌲-𑌪𑌾𑌦𑌾𑌬𑍍𑌜-𑌯𑍁𑌗𑌳𑌮𑍍 ।
𑌕𑌥𑌂 𑌪𑌶𑍍𑌯𑍇𑌯𑌂 𑌮𑌾𑌂 𑌸𑍍𑌥𑌗𑌯𑌤𑌿 𑌨𑌮𑌃 𑌸𑌂𑌭𑍍𑌰𑌮𑌜𑍁𑌷𑌾𑌂
𑌨𑌿𑌲𑌿𑌂𑌪𑌾𑌨𑌾𑌂 𑌶𑍍𑌰𑍇𑌣𑌿-𑌰𑍍𑌨𑌿𑌜-𑌕𑌨𑌕-𑌮𑌾𑌣𑌿𑌕𑍍𑌯-𑌮𑌕𑍁𑌟𑍈𑌃 ॥ 1𑍭 ॥

𑌤𑍍𑌵𑌮𑍇𑌕𑍋 𑌲𑍋𑌕𑌾𑌨𑌾𑌂 𑌪𑌰𑌮𑌫𑌲𑌦𑍋 𑌦𑌿𑌵𑍍𑌯𑌪𑌦𑌵𑍀𑌂
𑌵𑌹𑌂𑌤𑌸𑍍𑌤𑍍𑌵𑌨𑍍𑌮𑍂𑌲𑌾𑌂 𑌪𑍁𑌨𑌰𑌪𑌿 𑌭𑌜𑌂𑌤𑍇 𑌹𑌰𑌿𑌮𑍁𑌖𑌾𑌃 ।
𑌕𑌿𑌯𑌦𑍍𑌵𑌾 𑌦𑌾𑌕𑍍𑌷𑌿𑌣𑍍𑌯𑌂 𑌤𑌵 𑌶𑌿𑌵 𑌮𑌦𑌾𑌶𑌾 𑌚 𑌕𑌿𑌯𑌤𑍀
𑌕𑌦𑌾 𑌵𑌾 𑌮𑌦𑍍𑌰𑌕𑍍𑌷𑌾𑌂 𑌵𑌹𑌸𑌿 𑌕𑌰𑍁𑌣𑌾-𑌪𑍂𑌰𑌿𑌤𑌦𑍃𑌶𑌾 ॥ 1𑍮 ॥

𑌦𑍁𑌰𑌾𑌶𑌾-𑌭𑍂𑌯𑌿𑌷𑍍𑌠𑍇 𑌦𑍁𑌰𑌧𑌿𑌪-𑌗𑍃𑌹𑌦𑍍𑌵𑌾𑌰-𑌘𑌟𑌕𑍇
𑌦𑍁𑌰𑌂𑌤𑍇 𑌸𑌂𑌸𑌾𑌰𑍇 𑌦𑍁𑌰𑌿𑌤𑌨𑌿𑌲𑌯𑍇 𑌦𑍁𑌃𑌖𑌜𑌨𑌕𑍇 ।
𑌮𑌦𑌾𑌯𑌾𑌸𑌂 𑌕𑌿𑌂 𑌨 𑌵𑍍𑌯𑌪𑌨𑌯𑌸𑌿 𑌕𑌸𑍍𑌯𑍋𑌪-𑌕𑍃𑌤𑌯𑍇
𑌵𑌦𑍇𑌯𑌂 𑌪𑍍𑌰𑍀𑌤𑌿𑌶𑍍𑌚𑍇𑌤𑍍𑌤𑌵 𑌶𑌿𑌵 𑌕𑍃𑌤𑌾𑌰𑍍𑌥𑌾𑌃 𑌖𑌲𑍁 𑌵𑌯𑌮𑍍 ॥ 1𑍯 ॥

𑌸𑌦𑌾 𑌮𑍋𑌹𑌾𑌟𑌵𑍍𑌯𑌾𑌂 𑌚𑌰𑌤𑌿 𑌯𑍁𑌵𑌤𑍀𑌨𑌾𑌂 𑌕𑍁𑌚𑌗𑌿𑌰𑍌
𑌨𑌟𑌤𑍍𑌯𑌾𑌶𑌾-𑌶𑌾𑌖𑌾-𑌸𑍍𑌵𑌟𑌤𑌿 𑌝𑌟𑌿𑌤𑌿 𑌸𑍍𑌵𑍈𑌰𑌮𑌭𑌿𑌤𑌃 ।
𑌕𑌪𑌾𑌲𑌿𑌨𑍍 𑌭𑌿𑌕𑍍𑌷𑍋 𑌮𑍇 𑌹𑍃𑌦𑌯-𑌕𑌪𑌿𑌮𑌤𑍍𑌯𑌂𑌤-𑌚𑌪𑌲𑌂
𑌦𑍃𑌢𑌂 𑌭𑌕𑍍𑌤𑍍𑌯𑌾 𑌬𑌦𑍍𑌧𑍍𑌵𑌾 𑌶𑌿𑌵 𑌭𑌵𑌦𑌧𑍀𑌨𑌂 𑌕𑍁𑌰𑍁 𑌵𑌿𑌭𑍋 ॥ 20 ॥

𑌧𑍃𑌤𑌿-𑌸𑍍𑌤𑌂𑌭𑌾𑌧𑌾𑌰𑌾𑌂 𑌦𑍃𑌢-𑌗𑍁𑌣-𑌨𑌿𑌬𑌦𑍍𑌧𑌾𑌂 𑌸𑌗𑌮𑌨𑌾𑌂
𑌵𑌿𑌚𑌿𑌤𑍍𑌰𑌾𑌂 𑌪𑌦𑍍𑌮𑌾𑌢𑍍𑌯𑌾𑌂 𑌪𑍍𑌰𑌤𑌿𑌦𑌿𑌵𑌸-𑌸𑌨𑍍𑌮𑌾𑌰𑍍𑌗-𑌘𑌟𑌿𑌤𑌾𑌮𑍍 ।
𑌸𑍍𑌮𑌰𑌾𑌰𑍇 𑌮𑌚𑍍𑌚𑍇𑌤𑌃-𑌸𑍍𑌫𑍁𑌟-𑌪𑌟𑌕𑍁𑌟𑍀𑌂 𑌪𑍍𑌰𑌾𑌪𑍍𑌯 𑌵𑌿𑌶𑌦𑌾𑌂
𑌜𑌯 𑌸𑍍𑌵𑌾𑌮𑌿𑌨𑍍 𑌶𑌕𑍍𑌤𑍍𑌯𑌾 𑌸𑌹 𑌶𑌿𑌵 𑌗𑌣𑍈𑌃 𑌸𑍇𑌵𑌿𑌤 𑌵𑌿𑌭𑍋 ॥ 21 ॥

𑌪𑍍𑌰𑌲𑍋𑌭𑌾𑌦𑍍𑌯𑍈𑌰𑌰𑍍𑌥𑌾𑌹𑌰𑌣-𑌪𑌰𑌤𑌂𑌤𑍍𑌰𑍋 𑌧𑌨𑌿𑌗𑍃𑌹𑍇 [𑌪𑍍𑌰𑌲𑍋𑌭𑌾𑌦𑍍𑌯𑍈𑌃 𑌅𑌰𑍍𑌥𑌾𑌹𑌰𑌣-𑌪𑌰𑌤𑌂𑌤𑍍𑌰𑍋]
𑌪𑍍𑌰𑌵𑍇𑌶𑍋𑌦𑍍𑌯𑍁𑌕𑍍𑌤𑌃 𑌸𑌨𑍍 𑌭𑍍𑌰𑌮𑌤𑌿 𑌬𑌹𑍁𑌧𑌾 𑌤𑌸𑍍𑌕𑌰𑌪𑌤𑍇 ।
𑌇𑌮𑌂 𑌚𑍇𑌤𑌶𑍍𑌚𑍋𑌰𑌂 𑌕𑌥𑌮𑌿𑌹 𑌸𑌹𑍇 𑌶𑌂𑌕𑌰 𑌵𑌿𑌭𑍋
𑌤𑌵𑌾𑌧𑍀𑌨𑌂 𑌕𑍃𑌤𑍍𑌵𑌾 𑌮𑌯𑌿 𑌨𑌿𑌰𑌪𑌰𑌾𑌧𑍇 𑌕𑍁𑌰𑍁 𑌕𑍃𑌪𑌾𑌮𑍍 ॥ 22 ॥

𑌕𑌰𑍋𑌮𑌿 𑌤𑍍𑌵𑌤𑍍𑌪𑍂𑌜𑌾𑌂 𑌸𑌪𑌦𑌿 𑌸𑍁𑌖𑌦𑍋 𑌮𑍇 𑌭𑌵 𑌵𑌿𑌭𑍋
𑌵𑌿𑌧𑌿𑌤𑍍𑌵𑌂 𑌵𑌿𑌷𑍍𑌣𑍁𑌤𑍍𑌵𑌂 𑌦𑌿𑌶𑌸𑌿 𑌖𑌲𑍁 𑌤𑌸𑍍𑌯𑌾𑌃 𑌫𑌲𑌮𑌿𑌤𑌿 ।
𑌪𑍁𑌨𑌶𑍍𑌚 𑌤𑍍𑌵𑌾𑌂 𑌦𑍍𑌰𑌷𑍍𑌟𑍁𑌂 𑌦𑌿𑌵𑌿 𑌭𑍁𑌵𑌿 𑌵𑌹𑌨𑍍𑌪𑌕𑍍𑌷𑌿-𑌮𑍃𑌗𑌤𑌾-
-𑌮𑌦𑍃𑌷𑍍𑌟𑍍𑌵𑌾 𑌤𑌤𑍍𑌖𑍇𑌦𑌂 𑌕𑌥𑌮𑌿𑌹 𑌸𑌹𑍇 𑌶𑌂𑌕𑌰 𑌵𑌿𑌭𑍋 ॥ 23 ॥

𑌕𑌦𑌾 𑌵𑌾 𑌕𑍈𑌲𑌾𑌸𑍇 𑌕𑌨𑌕𑌮𑌣𑌿𑌸𑍌𑌧𑍇 𑌸𑌹 𑌗𑌣𑍈- [𑌸𑌹 𑌗𑌣𑍈𑌃 𑌵𑌸𑌨𑍍]
-𑌰𑍍𑌵𑌸𑌨𑍍 𑌶𑌂𑌭𑍋𑌰𑌗𑍍𑌰𑍇 𑌸𑍍𑌫𑍁𑌟-𑌘𑌟𑌿𑌤-𑌮𑍂𑌰𑍍𑌧𑌾𑌂𑌜𑌲𑌿𑌪𑍁𑌟𑌃 ।
𑌵𑌿𑌭𑍋 𑌸𑌾𑌂𑌬 𑌸𑍍𑌵𑌾𑌮𑌿-𑌨𑍍𑌪𑌰𑌮𑌶𑌿𑌵 𑌪𑌾𑌹𑍀𑌤𑌿 𑌨𑌿𑌗𑌦-
-𑌨𑍍𑌵𑌿𑌧𑌾𑌤𑍄𑌣𑌾𑌂 𑌕𑌲𑍍𑌪𑌾𑌨𑍍 𑌕𑍍𑌷𑌣𑌮𑌿𑌵 𑌵𑌿𑌨𑍇𑌷𑍍𑌯𑌾𑌮𑌿 𑌸𑍁𑌖𑌤𑌃 ॥ 24 ॥

𑌸𑍍𑌤𑌵𑍈-𑌰𑍍𑌬𑍍𑌰𑌹𑍍𑌮𑌾𑌦𑍀𑌨𑌾𑌂 𑌜𑌯𑌜𑌯-𑌵𑌚𑍋𑌭𑌿𑌰𑍍𑌨𑌿𑌯𑌮𑌿𑌨𑌾𑌂
𑌗𑌣𑌾𑌨𑌾𑌂 𑌕𑍇𑌳𑍀𑌭𑌿𑌰𑍍𑌮𑌦𑌕𑌲𑌮𑌹𑍋𑌕𑍍𑌷𑌸𑍍𑌯 𑌕𑌕𑍁𑌦𑌿 । [𑌕𑍇𑌳𑍀𑌭𑌿𑌃 𑌮𑌦𑌕𑌲-𑌮𑌹𑍋𑌕𑍍𑌷𑌸𑍍𑌯]
𑌸𑍍𑌥𑌿𑌤𑌂 𑌨𑍀𑌲𑌗𑍍𑌰𑍀𑌵𑌂 𑌤𑍍𑌰𑌿𑌨𑌯𑌨-𑌮𑍁𑌮𑌾𑌶𑍍𑌲𑌿𑌷𑍍𑌟-𑌵𑌪𑍁𑌷𑌂
𑌕𑌦𑌾 𑌤𑍍𑌵𑌾𑌂 𑌪𑌶𑍍𑌯𑍇𑌯𑌂 𑌕𑌰𑌧𑍃𑌤-𑌮𑍃𑌗𑌂 𑌖𑌂𑌡-𑌪𑌰𑌶𑍁𑌮𑍍 ॥ 25 ॥

𑌕𑌦𑌾 𑌵𑌾 𑌤𑍍𑌵𑌾𑌂 𑌦𑍃𑌷𑍍𑌟𑍍𑌵𑌾 𑌗𑌿𑌰𑌿𑌶 𑌤𑌵 𑌭𑌵𑍍𑌯𑌾𑌂𑌘𑍍𑌰𑌿 𑌯𑍁𑌗𑌳𑌂
𑌗𑍃𑌹𑍀𑌤𑍍𑌵𑌾 𑌹𑌸𑍍𑌤𑌾𑌭𑍍𑌯𑌾𑌂 𑌶𑌿𑌰𑌸𑌿 𑌨𑌯𑌨𑍇 𑌵𑌕𑍍𑌷𑌸𑌿 𑌵𑌹𑌨𑍍 ।
𑌸𑌮𑌾 𑌶𑍍𑌲𑌿𑌷𑍍𑌯𑌾 𑌘𑍍𑌰𑌾𑌯 𑌸𑍍𑌫𑍁𑌟 𑌜𑌲𑌜 𑌗𑌂𑌧𑌾𑌨𑍍 𑌪𑌰𑌿𑌮𑌲𑌾-
-𑌨𑌲𑌾𑌭𑍍𑌯𑌾𑌂 𑌬𑍍𑌰𑌹𑍍𑌮𑌾𑌦𑍍𑌯𑍈𑌰𑍍𑌮𑍁𑌦𑌮𑌨𑍁𑌭𑌵𑌿𑌷𑍍𑌯𑌾𑌮𑌿 𑌹𑍃𑌦𑌯𑍇 ॥ 26 ॥ [𑌬𑍍𑌰𑌹𑍍𑌮𑌾𑌦𑍍𑌯𑍈𑌃 𑌮𑍁𑌦-𑌮𑌨𑍁𑌭𑌵𑌿𑌷𑍍𑌯𑌾𑌮𑌿]

𑌕𑌰𑌸𑍍𑌥𑍇 𑌹𑍇𑌮𑌾𑌦𑍍𑌰𑍌 𑌗𑌿𑌰𑌿𑌶 𑌨𑌿𑌕𑌟𑌸𑍍𑌥𑍇 𑌧𑌨𑌪𑌤𑍌
𑌗𑍃𑌹𑌸𑍍𑌥𑍇 𑌸𑍍𑌵𑌰𑍍𑌭𑍂𑌜𑌾 𑌮𑌰 𑌸𑍁𑌰𑌭𑌿 𑌚𑌿𑌂𑌤𑌾𑌮𑌣𑌿𑌗𑌣𑍇 ।
𑌶𑌿𑌰𑌃𑌸𑍍𑌥𑍇 𑌶𑍀𑌤𑌾𑌂𑌶𑍌 𑌚𑌰𑌣𑌯𑍁𑌗𑌳𑌸𑍍𑌥𑍇𑌽𑌖𑌿𑌲𑌶𑍁𑌭𑍇
𑌕𑌮𑌰𑍍𑌥𑌂 𑌦𑌾𑌸𑍍𑌯𑍇𑌽𑌹𑌂 𑌭𑌵𑌤𑍁 𑌭𑌵𑌦𑌰𑍍𑌥𑌂 𑌮𑌮 𑌮𑌨𑌃 ॥ 2𑍭 ॥

𑌸𑌾𑌰𑍂𑌪𑍍𑌯𑌂 𑌤𑌵 𑌪𑍂𑌜𑌨𑍇 𑌶𑌿𑌵 𑌮𑌹𑌾𑌦𑍇𑌵𑍇𑌤𑌿 𑌸𑌂𑌕𑍀𑌰𑍍𑌤𑌨𑍇
𑌸𑌾𑌮𑍀𑌪𑍍𑌯𑌂 𑌶𑌿𑌵𑌭𑌕𑍍𑌤𑌿-𑌧𑍁𑌰𑍍𑌯𑌜𑌨𑌤𑌾-𑌸𑌾𑌂𑌗𑌤𑍍𑌯-𑌸𑌂𑌭𑌾𑌷𑌣𑍇 ॥
𑌸𑌾𑌲𑍋𑌕𑍍𑌯𑌂 𑌚 𑌚𑌰𑌾𑌚𑌰𑌾𑌤𑍍𑌮𑌕𑌤𑌨𑍁𑌧𑍍𑌯𑌾𑌨𑍇 𑌭𑌵𑌾𑌨𑍀𑌪𑌤𑍇
𑌸𑌾𑌯𑍁𑌜𑍍𑌯𑌂 𑌮𑌮 𑌸𑌿𑌦𑍍𑌧𑌮𑌤𑍍𑌰 𑌭𑌵𑌤𑌿 𑌸𑍍𑌵𑌾𑌮𑌿𑌨𑍍 𑌕𑍃𑌤𑌾𑌰𑍍𑌥𑍋𑌽𑌸𑍍𑌮𑍍𑌯𑌹𑌮𑍍 ॥ 2𑍮 ॥

𑌤𑍍𑌵𑌤𑍍𑌪𑌾𑌦𑌾𑌂𑌬𑍁𑌜𑌮𑌰𑍍𑌚𑌯𑌾𑌮𑌿 𑌪𑌰𑌮𑌂 𑌤𑍍𑌵𑌾𑌂 𑌚𑌿𑌂𑌤𑌯𑌾𑌮𑍍𑌯𑌨𑍍𑌵𑌹𑌂
𑌤𑍍𑌵𑌾𑌮𑍀𑌶𑌂 𑌶𑌰𑌣𑌂 𑌵𑍍𑌰𑌜𑌾𑌮𑌿 𑌵𑌚𑌸𑌾 𑌤𑍍𑌵𑌾𑌮𑍇𑌵 𑌯𑌾𑌚𑍇 𑌵𑌿𑌭𑍋 ।
𑌵𑍀𑌕𑍍𑌷𑌾𑌂 𑌮𑍇 𑌦𑌿𑌶 𑌚𑌾𑌕𑍍𑌷𑍁𑌷𑍀𑌂 𑌸𑌕𑌰𑍁𑌣𑌾𑌂 𑌦𑌿𑌵𑍍𑌯𑍈𑌶𑍍𑌚𑌿𑌰𑌂 𑌪𑍍𑌰𑌾𑌰𑍍𑌥𑌿𑌤𑌾𑌂
𑌶𑌂𑌭𑍋 𑌲𑍋𑌕𑌗𑍁𑌰𑍋 𑌮𑌦𑍀𑌯𑌮𑌨𑌸𑌃 𑌸𑍌𑌖𑍍𑌯𑍋𑌪𑌦𑍇𑌶𑌂 𑌕𑍁𑌰𑍁 ॥ 2𑍯 ॥

𑌵𑌸𑍍𑌤𑍍𑌰𑍋𑌦𑍍𑌧𑍂𑌤𑌵𑌿𑌧𑍌 𑌸𑌹𑌸𑍍𑌰𑌕𑌰𑌤𑌾 𑌪𑍁𑌷𑍍𑌪𑌾𑌰𑍍𑌚𑌨𑍇 𑌵𑌿𑌷𑍍𑌣𑍁𑌤𑌾
𑌗𑌂𑌧𑍇 𑌗𑌂𑌧𑌵𑌹𑌾𑌤𑍍𑌮𑌤𑌾𑌽𑌨𑍍𑌨𑌪𑌚𑌨𑍇 𑌬𑌰𑍍𑌹𑌿𑌰𑍍𑌮𑍁𑌖𑌾𑌧𑍍𑌯𑌕𑍍𑌷𑌤𑌾 ।
𑌪𑌾𑌤𑍍𑌰𑍇 𑌕𑌾𑌂𑌚𑌨𑌗𑌰𑍍𑌭𑌤𑌾𑌸𑍍𑌤𑌿 𑌮𑌯𑌿 𑌚𑍇𑌦𑍍𑌬𑌾𑌲𑍇𑌂𑌦𑍁𑌚𑍂𑌡𑌾𑌮𑌣𑍇
𑌶𑍁𑌶𑍍𑌰𑍂𑌷𑌾𑌂 𑌕𑌰𑌵𑌾𑌣𑌿 𑌤𑍇 𑌪𑌶𑍁𑌪𑌤𑍇 𑌸𑍍𑌵𑌾𑌮𑌿𑌂𑌸𑍍𑌤𑍍𑌰𑌿𑌲𑍋𑌕𑍀𑌗𑍁𑌰𑍋 ॥ 30 ॥

𑌨𑌾𑌲𑌂 𑌵𑌾 𑌪𑌰𑌮𑍋𑌪𑌕𑌾𑌰𑌕𑌮𑌿𑌦𑌂 𑌤𑍍𑌵𑍇𑌕𑌂 𑌪𑌶𑍂𑌨𑌾𑌂 𑌪𑌤𑍇
𑌪𑌶𑍍𑌯𑌨𑍍 𑌕𑍁𑌕𑍍𑌷𑌿𑌗𑌤𑌾𑌂𑌶𑍍𑌚𑌰𑌾𑌚𑌰𑌗𑌣𑌾𑌨𑍍 𑌬𑌾𑌹𑍍𑌯𑌸𑍍𑌥𑌿𑌤𑌾𑌨𑍍 𑌰𑌕𑍍𑌷𑌿𑌤𑍁𑌮𑍍 ।
𑌸𑌰𑍍𑌵𑌾𑌮𑌰𑍍𑌤𑍍𑌯𑌪𑌲𑌾𑌯𑌨𑍌𑌷𑌧𑌮𑌤𑌿𑌜𑍍𑌵𑌾𑌲𑌾𑌕𑌰𑌂 𑌭𑍀𑌕𑌰𑌂
𑌨𑌿𑌕𑍍𑌷𑌿𑌪𑍍𑌤𑌂 𑌗𑌰𑌳𑌂 𑌗𑌳𑍇 𑌨 𑌗𑌿𑌳𑌿𑌤𑌂 𑌨𑍋𑌦𑍍𑌗𑍀𑌰𑍍𑌣𑌮𑍇𑌵 𑌤𑍍𑌵𑌯𑌾 ॥ 31 ॥

𑌜𑍍𑌵𑌾𑌲𑍋𑌗𑍍𑌰𑌃 𑌸𑌕𑌲𑌾𑌮𑌰𑌾𑌤𑌿𑌭𑌯𑌦𑌃 𑌕𑍍𑌷𑍍𑌵𑍇𑌳𑌃 𑌕𑌥𑌂 𑌵𑌾 𑌤𑍍𑌵𑌯𑌾
𑌦𑍃𑌷𑍍𑌟𑌃 𑌕𑌿𑌂 𑌚 𑌕𑌰𑍇 𑌧𑍃𑌤𑌃 𑌕𑌰𑌤𑌲𑍇 𑌕𑌿𑌂 𑌪𑌕𑍍𑌵𑌜𑌂𑌬𑍂𑌫𑌲𑌮𑍍 ।
𑌜𑌿𑌹𑍍𑌵𑌾𑌯𑌾𑌂 𑌨𑌿𑌹𑌿𑌤𑌶𑍍𑌚 𑌸𑌿𑌦𑍍𑌧𑌘𑍁𑌟𑌿𑌕𑌾 𑌵𑌾 𑌕𑌂𑌠𑌦𑍇𑌶𑍇 𑌭𑍃𑌤𑌃
𑌕𑌿𑌂 𑌤𑍇 𑌨𑍀𑌲𑌮𑌣𑌿𑌰𑍍𑌵𑌿𑌭𑍂𑌷𑌣𑌮𑌯𑌂 𑌶𑌂𑌭𑍋 𑌮𑌹𑌾𑌤𑍍𑌮𑌨𑍍 𑌵𑌦 ॥ 32 ॥

𑌨𑌾𑌲𑌂 𑌵𑌾 𑌸𑌕𑍃𑌦𑍇𑌵 𑌦𑍇𑌵 𑌭𑌵𑌤𑌃 𑌸𑍇𑌵𑌾 𑌨𑌤𑌿𑌰𑍍𑌵𑌾 𑌨𑍁𑌤𑌿𑌃
𑌪𑍂𑌜𑌾 𑌵𑌾 𑌸𑍍𑌮𑌰𑌣𑌂 𑌕𑌥𑌾𑌶𑍍𑌰𑌵𑌣𑌮𑌪𑍍𑌯𑌾𑌲𑍋𑌕𑌨𑌂 𑌮𑌾𑌦𑍃𑌶𑌾𑌮𑍍 ।
𑌸𑍍𑌵𑌾𑌮𑌿𑌨𑍍𑌨𑌸𑍍𑌥𑌿𑌰𑌦𑍇𑌵𑌤𑌾𑌨𑍁𑌸𑌰𑌣𑌾𑌯𑌾𑌸𑍇𑌨 𑌕𑌿𑌂 𑌲𑌭𑍍𑌯𑌤𑍇
𑌕𑌾 𑌵𑌾 𑌮𑍁𑌕𑍍𑌤𑌿𑌰𑌿𑌤𑌃 𑌕𑍁𑌤𑍋 𑌭𑌵𑌤𑌿 𑌚𑍇𑌤𑍍𑌕𑌿𑌂 𑌪𑍍𑌰𑌾𑌰𑍍𑌥𑌨𑍀𑌯𑌂 𑌤𑌦𑌾 ॥ 33 ॥

𑌕𑌿𑌂 𑌬𑍍𑌰𑍂𑌮𑌸𑍍𑌤𑌵 𑌸𑌾𑌹𑌸𑌂 𑌪𑌶𑍁𑌪𑌤𑍇 𑌕𑌸𑍍𑌯𑌾𑌸𑍍𑌤𑌿 𑌶𑌂𑌭𑍋 𑌭𑌵-
-𑌦𑍍𑌧𑍈𑌰𑍍𑌯𑌂 𑌚𑍇𑌦𑍃𑌶𑌮𑌾𑌤𑍍𑌮𑌨𑌃 𑌸𑍍𑌥𑌿𑌤𑌿𑌰𑌿𑌯𑌂 𑌚𑌾𑌨𑍍𑌯𑍈𑌃 𑌕𑌥𑌂 𑌲𑌭𑍍𑌯𑌤𑍇 ।
𑌭𑍍𑌰𑌶𑍍𑌯𑌦𑍍𑌦𑍇𑌵𑌗𑌣𑌂 𑌤𑍍𑌰𑌸𑌨𑍍𑌮𑍁𑌨𑌿𑌗𑌣𑌂 𑌨𑌶𑍍𑌯𑌤𑍍𑌪𑍍𑌰𑌪𑌂𑌚𑌂 𑌲𑌯𑌂
𑌪𑌶𑍍𑌯𑌨𑍍𑌨𑌿𑌰𑍍𑌭𑌯 𑌏𑌕 𑌏𑌵 𑌵𑌿𑌹𑌰𑌤𑍍𑌯𑌾𑌨𑌂𑌦𑌸𑌾𑌂𑌦𑍍𑌰𑍋 𑌭𑌵𑌾𑌨𑍍 ॥ 34 ॥

𑌯𑍋𑌗𑌕𑍍𑌷𑍇𑌮𑌧𑍁𑌰𑌂𑌧𑌰𑌸𑍍𑌯 𑌸𑌕𑌲𑌶𑍍𑌰𑍇𑌯𑌃𑌪𑍍𑌰𑌦𑍋𑌦𑍍𑌯𑍋𑌗𑌿𑌨𑍋
𑌦𑍃𑌷𑍍𑌟𑌾𑌦𑍃𑌷𑍍𑌟𑌮𑌤𑍋𑌪𑌦𑍇𑌶𑌕𑍃𑌤𑌿𑌨𑍋 𑌬𑌾𑌹𑍍𑌯𑌾𑌂𑌤𑌰𑌵𑍍𑌯𑌾𑌪𑌿𑌨𑌃 ।
𑌸𑌰𑍍𑌵𑌜𑍍𑌞𑌸𑍍𑌯 𑌦𑌯𑌾𑌕𑌰𑌸𑍍𑌯 𑌭𑌵𑌤𑌃 𑌕𑌿𑌂 𑌵𑍇𑌦𑌿𑌤𑌵𑍍𑌯𑌂 𑌮𑌯𑌾
𑌶𑌂𑌭𑍋 𑌤𑍍𑌵𑌂 𑌪𑌰𑌮𑌾𑌂𑌤𑌰𑌂𑌗 𑌇𑌤𑌿 𑌮𑍇 𑌚𑌿𑌤𑍍𑌤𑍇 𑌸𑍍𑌮𑌰𑌾𑌮𑍍𑌯𑌨𑍍𑌵𑌹𑌮𑍍 ॥ 35 ॥

𑌭𑌕𑍍𑌤𑍋 𑌭𑌕𑍍𑌤𑌿𑌗𑍁𑌣𑌾𑌵𑍃𑌤𑍇 𑌮𑍁𑌦𑌮𑍃𑌤𑌾𑌪𑍂𑌰𑍍𑌣𑍇 𑌪𑍍𑌰𑌸𑌨𑍍𑌨𑍇 𑌮𑌨𑌃
𑌕𑍁𑌂𑌭𑍇 𑌸𑌾𑌂𑌬 𑌤𑌵𑌾𑌂𑌘𑍍𑌰𑌿𑌪𑌲𑍍𑌲𑌵𑌯𑍁𑌗𑌂 𑌸𑌂𑌸𑍍𑌥𑌾𑌪𑍍𑌯 𑌸𑌂𑌵𑌿𑌤𑍍𑌫𑌲𑌮𑍍 ।
𑌸𑌤𑍍𑌵𑌂 𑌮𑌂𑌤𑍍𑌰𑌮𑍁𑌦𑍀𑌰𑌯𑌨𑍍𑌨𑌿𑌜𑌶𑌰𑍀𑌰𑌾𑌗𑌾𑌰𑌶𑍁𑌦𑍍𑌧𑌿𑌂 𑌵𑌹𑌨𑍍
𑌪𑍁𑌣𑍍𑌯𑌾𑌹𑌂 𑌪𑍍𑌰𑌕𑌟𑍀𑌕𑌰𑍋𑌮𑌿 𑌰𑍁𑌚𑌿𑌰𑌂 𑌕𑌳𑍍𑌯𑌾𑌣𑌮𑌾𑌪𑌾𑌦𑌯𑌨𑍍 ॥ 36 ॥

𑌆𑌮𑍍𑌨𑌾𑌯𑌾𑌂𑌬𑍁𑌧𑌿𑌮𑌾𑌦𑌰𑍇𑌣 𑌸𑍁𑌮𑌨𑌃𑌸𑌂𑌘𑌾𑌃 𑌸𑌮𑍁𑌦𑍍𑌯𑌨𑍍𑌮𑌨𑍋 [𑌸𑌮𑍁𑌦𑍍𑌯𑌨𑍍𑌮𑌨𑌃]
𑌮𑌂𑌥𑌾𑌨𑌂 𑌦𑍃𑌢𑌭𑌕𑍍𑌤𑌿𑌰𑌜𑍍𑌜𑍁𑌸𑌹𑌿𑌤𑌂 𑌕𑍃𑌤𑍍𑌵𑌾 𑌮𑌥𑌿𑌤𑍍𑌵𑌾 𑌤𑌤𑌃 ।
𑌸𑍋𑌮𑌂 𑌕𑌲𑍍𑌪𑌤𑌰𑍁𑌂 𑌸𑍁𑌪𑌰𑍍𑌵𑌸𑍁𑌰𑌭𑌿𑌂 𑌚𑌿𑌂𑌤𑌾𑌮𑌣𑌿𑌂 𑌧𑍀𑌮𑌤𑌾𑌂
𑌨𑌿𑌤𑍍𑌯𑌾𑌨𑌂𑌦𑌸𑍁𑌧𑌾𑌂 𑌨𑌿𑌰𑌂𑌤𑌰𑌰𑌮𑌾𑌸𑍌𑌭𑌾𑌗𑍍𑌯𑌮𑌾𑌤𑌨𑍍𑌵𑌤𑍇 ॥ 3𑍭 ॥

𑌪𑍍𑌰𑌾𑌕𑍍𑌪𑍁𑌣𑍍𑌯𑌾𑌚𑌲𑌮𑌾𑌰𑍍𑌗𑌦𑌰𑍍𑌶𑌿𑌤𑌸𑍁𑌧𑌾𑌮𑍂𑌰𑍍𑌤𑌿𑌃 𑌪𑍍𑌰𑌸𑌨𑍍𑌨𑌃 𑌶𑌿𑌵𑌃
𑌸𑍋𑌮𑌃 𑌸𑌦𑍍𑌗𑌣𑌸𑍇𑌵𑌿𑌤𑍋 𑌮𑍃𑌗𑌧𑌰𑌃 𑌪𑍂𑌰𑍍𑌣𑌸𑍍𑌤𑌮𑍋𑌮𑍋𑌚𑌕𑌃 ।
𑌚𑍇𑌤𑌃 𑌪𑍁𑌷𑍍𑌕𑌰𑌲𑌕𑍍𑌷𑌿𑌤𑍋 𑌭𑌵𑌤𑌿 𑌚𑍇𑌦𑌾𑌨𑌂𑌦𑌪𑌾𑌥𑍋𑌨𑌿𑌧𑌿𑌃
𑌪𑍍𑌰𑌾𑌗𑌲𑍍𑌭𑍍𑌯𑍇𑌨 𑌵𑌿𑌜𑍃𑌂𑌭𑌤𑍇 𑌸𑍁𑌮𑌨𑌸𑌾𑌂 𑌵𑍃𑌤𑍍𑌤𑌿𑌸𑍍𑌤𑌦𑌾 𑌜𑌾𑌯𑌤𑍇 ॥ 3𑍮 ॥

𑌧𑌰𑍍𑌮𑍋 𑌮𑍇 𑌚𑌤𑍁𑌰𑌂𑌘𑍍𑌰𑌿𑌕𑌃 𑌸𑍁𑌚𑌰𑌿𑌤𑌃 𑌪𑌾𑌪𑌂 𑌵𑌿𑌨𑌾𑌶𑌂 𑌗𑌤𑌂
𑌕𑌾𑌮𑌕𑍍𑌰𑍋𑌧𑌮𑌦𑌾𑌦𑌯𑍋 𑌵𑌿𑌗𑌳𑌿𑌤𑌾𑌃 𑌕𑌾𑌲𑌾𑌃 𑌸𑍁𑌖𑌾𑌵𑌿𑌷𑍍𑌕𑍃𑌤𑌾𑌃 ।
𑌜𑍍𑌞𑌾𑌨𑌾𑌨𑌂𑌦𑌮𑌹𑍌𑌷𑌧𑌿𑌃 𑌸𑍁𑌫𑌲𑌿𑌤𑌾 𑌕𑍈𑌵𑌲𑍍𑌯𑌨𑌾𑌥𑍇 𑌸𑌦𑌾
𑌮𑌾𑌨𑍍𑌯𑍇 𑌮𑌾𑌨𑌸𑌪𑍁𑌂𑌡𑌰𑍀𑌕𑌨𑌗𑌰𑍇 𑌰𑌾𑌜𑌾𑌵𑌤𑌂𑌸𑍇 𑌸𑍍𑌥𑌿𑌤𑍇 ॥ 3𑍯 ॥

𑌧𑍀𑌯𑌂𑌤𑍍𑌰𑍇𑌣 𑌵𑌚𑍋𑌘𑌟𑍇𑌨 𑌕𑌵𑌿𑌤𑌾𑌕𑍁𑌲𑍍𑌯𑍋𑌪𑌕𑍁𑌲𑍍𑌯𑌾𑌕𑍍𑌰𑌮𑍈- [𑌕𑌵𑌿𑌤𑌾𑌕𑍁𑌲𑍍𑌯𑍋𑌪𑌕𑍁𑌲𑍍𑌯𑌾𑌕𑍍𑌰𑌮𑍈𑌃]
-𑌰𑌾𑌨𑍀𑌤𑍈𑌶𑍍𑌚 𑌸𑌦𑌾𑌶𑌿𑌵𑌸𑍍𑌯 𑌚𑌰𑌿𑌤𑌾𑌂𑌭𑍋𑌰𑌾𑌶𑌿𑌦𑌿𑌵𑍍𑌯𑌾𑌮𑍃𑌤𑍈𑌃 ।
𑌹𑍃𑌤𑍍𑌕𑍇𑌦𑌾𑌰𑌯𑍁𑌤𑌾𑌶𑍍𑌚 𑌭𑌕𑍍𑌤𑌿𑌕𑌲𑌮𑌾𑌃 𑌸𑌾𑌫𑌲𑍍𑌯𑌮𑌾𑌤𑌨𑍍𑌵𑌤𑍇
𑌦𑍁𑌰𑍍𑌭𑌿𑌕𑍍𑌷𑌾𑌨𑍍𑌮𑌮 𑌸𑍇𑌵𑌕𑌸𑍍𑌯 𑌭𑌗𑌵𑌨𑍍𑌵𑌿𑌶𑍍𑌵𑍇𑌶 𑌭𑍀𑌤𑌿𑌃 𑌕𑍁𑌤𑌃 ॥ 40 ॥

𑌪𑌾𑌪𑍋𑌤𑍍𑌪𑌾𑌤𑌵𑌿𑌮𑍋𑌚𑌨𑌾𑌯 𑌰𑍁𑌚𑌿𑌰𑍈𑌶𑍍𑌵𑌰𑍍𑌯𑌾𑌯 𑌮𑍃𑌤𑍍𑌯𑍁𑌂𑌜𑌯
𑌸𑍍𑌤𑍋𑌤𑍍𑌰𑌧𑍍𑌯𑌾𑌨𑌨𑌤𑌿𑌪𑍍𑌰𑌦𑌕𑍍𑌷𑌿𑌣𑌸𑌪𑌰𑍍𑌯𑌾𑌲𑍋𑌕𑌨𑌾𑌕𑌰𑍍𑌣𑌨𑍇 ।
𑌜𑌿𑌹𑍍𑌵𑌾𑌚𑌿𑌤𑍍𑌤𑌶𑌿𑌰𑍋𑌂𑌘𑍍𑌰𑌿𑌹𑌸𑍍𑌤𑌨𑌯𑌨𑌶𑍍𑌰𑍋𑌤𑍍𑌰𑍈𑌰𑌹𑌂 𑌪𑍍𑌰𑌾𑌰𑍍𑌥𑌿𑌤𑍋
𑌮𑌾𑌮𑌾𑌜𑍍𑌞𑌾𑌪𑌯 𑌤𑌨𑍍𑌨𑌿𑌰𑍂𑌪𑌯 𑌮𑍁𑌹𑍁𑌰𑍍𑌮𑌾𑌮𑍇𑌵 𑌮𑌾 𑌮𑍇𑌽𑌵𑌚𑌃 ॥ 41 ॥

𑌗𑌾𑌂𑌭𑍀𑌰𑍍𑌯𑌂 𑌪𑌰𑌿𑌖𑌾𑌪𑌦𑌂 𑌘𑌨𑌧𑍃𑌤𑌿𑌃 𑌪𑍍𑌰𑌾𑌕𑌾𑌰 𑌉𑌦𑍍𑌯𑌦𑍍𑌗𑍁𑌣- [𑌉𑌦𑍍𑌯𑌦𑍍𑌗𑍁𑌣𑌸𑍍𑌤𑍋𑌮𑌃]
-𑌸𑍍𑌤𑍋𑌮𑌶𑍍𑌚𑌾𑌪𑍍𑌤𑌬𑌲𑌂 𑌘𑌨𑍇𑌂𑌦𑍍𑌰𑌿𑌯𑌚𑌯𑍋 𑌦𑍍𑌵𑌾𑌰𑌾𑌣𑌿 𑌦𑍇𑌹𑍇 𑌸𑍍𑌥𑌿𑌤𑌃 ।
𑌵𑌿𑌦𑍍𑌯𑌾 𑌵𑌸𑍍𑌤𑍁𑌸𑌮𑍃𑌦𑍍𑌧𑌿𑌰𑌿𑌤𑍍𑌯𑌖𑌿𑌲𑌸𑌾𑌮𑌗𑍍𑌰𑍀𑌸𑌮𑍇𑌤𑍇 𑌸𑌦𑌾
𑌦𑍁𑌰𑍍𑌗𑌾𑌤𑌿𑌪𑍍𑌰𑌿𑌯𑌦𑍇𑌵 𑌮𑌾𑌮𑌕𑌮𑌨𑍋𑌦𑍁𑌰𑍍𑌗𑍇 𑌨𑌿𑌵𑌾𑌸𑌂 𑌕𑍁𑌰𑍁 ॥ 42 ॥

𑌮𑌾 𑌗𑌚𑍍𑌛 𑌤𑍍𑌵𑌮𑌿𑌤𑌸𑍍𑌤𑌤𑍋 𑌗𑌿𑌰𑌿𑌶 𑌭𑍋 𑌮𑌯𑍍𑌯𑍇𑌵 𑌵𑌾𑌸𑌂 𑌕𑍁𑌰𑍁
𑌸𑍍𑌵𑌾𑌮𑌿𑌨𑍍𑌨𑌾𑌦𑌿𑌕𑌿𑌰𑌾𑌤 𑌮𑌾𑌮𑌕𑌮𑌨𑌃𑌕𑌾𑌂𑌤𑌾𑌰𑌸𑍀𑌮𑌾𑌂𑌤𑌰𑍇 ।
𑌵𑌰𑍍𑌤𑌂𑌤𑍇 𑌬𑌹𑍁𑌶𑍋 𑌮𑍃𑌗𑌾 𑌮𑌦𑌜𑍁𑌷𑍋 𑌮𑌾𑌤𑍍𑌸𑌰𑍍𑌯𑌮𑍋𑌹𑌾𑌦𑌯- [ 𑌮𑌾𑌤𑍍𑌸𑌰𑍍𑌯𑌮𑍋𑌹𑌾𑌦𑌯𑌃]
-𑌸𑍍𑌤𑌾𑌨𑍍𑌹𑌤𑍍𑌵𑌾 𑌮𑍃𑌗𑌯𑌾𑌵𑌿𑌨𑍋𑌦𑌰𑍁𑌚𑌿𑌤𑌾 𑌲𑌾𑌭𑌂 𑌚 𑌸𑌂𑌪𑍍𑌰𑌾𑌪𑍍𑌸𑍍𑌯𑌸𑌿 ॥ 43 ॥

𑌕𑌰𑌲𑌗𑍍𑌨𑌮𑍃𑌗𑌃 𑌕𑌰𑍀𑌂𑌦𑍍𑌰𑌭𑌂𑌗𑍋
𑌘𑌨𑌶𑌾𑌰𑍍𑌦𑍂𑌲𑌵𑌿𑌖𑌂𑌡𑌨𑍋𑌽𑌸𑍍𑌤𑌜𑌂𑌤𑍁𑌃 ।
𑌗𑌿𑌰𑌿𑌶𑍋 𑌵𑌿𑌶𑌦𑌾𑌕𑍃𑌤𑌿𑌶𑍍𑌚 𑌚𑍇𑌤𑌃-
-𑌕𑍁𑌹𑌰𑍇 𑌪𑌂𑌚𑌮𑍁𑌖𑍋𑌽𑌸𑍍𑌤𑌿 𑌮𑍇 𑌕𑍁𑌤𑍋 𑌭𑍀𑌃 ॥ 44 ॥

𑌛𑌂𑌦𑌃 𑌶𑌾𑌖𑌿𑌶𑌿𑌖𑌾𑌨𑍍𑌵𑌿𑌤𑍈𑌰𑍍 [𑌶𑌾𑌖𑌿𑌶𑌿𑌖𑌾𑌨𑍍𑌵𑌿𑌤𑍈𑌰𑌃] 𑌦𑍍𑌵𑌿𑌜𑌵𑌰𑍈𑌃 𑌸𑌂𑌸𑍇𑌵𑌿𑌤𑍇 𑌶𑌾𑌶𑍍𑌵𑌤𑍇
𑌸𑍌𑌖𑍍𑌯𑌾𑌪𑌾𑌦𑌿𑌨𑌿 𑌖𑍇𑌦𑌭𑍇𑌦𑌿𑌨𑌿 𑌸𑍁𑌧𑌾𑌸𑌾𑌰𑍈𑌃 𑌫𑌲𑍈𑌰𑍍𑌦𑍀𑌪𑌿𑌤𑍇 ।
𑌚𑍇𑌤𑌃𑌪𑌕𑍍𑌷𑌿𑌶𑌿𑌖𑌾𑌮𑌣𑍇 𑌤𑍍𑌯𑌜 𑌵𑍃𑌥𑌾 𑌅𑌂𑌚𑌾𑌰𑌮𑌨𑍍𑌯𑍈𑌰𑌲𑌂
𑌨𑌿𑌤𑍍𑌯𑌂 𑌶𑌂𑌕𑌰 𑌪𑌾𑌦𑌪𑌦𑍍𑌮𑌯𑍁𑌗𑌳𑍀𑌨𑍀𑌡𑍇 𑌵𑌿𑌹𑌾𑌰𑌂 𑌕𑍁𑌰𑍁 ॥ 45 ॥

𑌆𑌕𑍀𑌰𑍍𑌣𑍇 𑌨𑌖𑌰𑌾𑌜𑌿𑌕𑌾𑌂𑌤𑌿𑌵𑌿𑌭𑌵𑍈 [𑌨𑌖𑌰𑌾𑌜𑌿𑌕𑌾𑌂𑌤𑌿𑌵𑌿𑌭𑌵𑍈𑌃] 𑌰𑍁𑌦𑍍𑌯𑌤𑍍𑌸𑍁𑌧𑌾𑌵𑍈𑌭𑌵𑍈-[𑌰𑍁𑌦𑍍𑌯𑌤𑍍𑌸𑍁𑌧𑌾𑌵𑍈𑌭𑌵𑍈𑌃]
-𑌰𑌾𑌧𑍌𑌤𑍇𑌽𑌪𑌿 𑌚 𑌪𑌦𑍍𑌮𑌰𑌾𑌗𑌲𑌲𑌿𑌤𑍇 𑌹𑌂𑌸𑌵𑍍𑌰𑌜𑍈𑌰𑌾𑌶𑍍𑌰𑌿𑌤𑍇 ।
𑌨𑌿𑌤𑍍𑌯𑌂 𑌭𑌕𑍍𑌤𑌿𑌵𑌧𑍂𑌗𑌣𑍈𑌶𑍍𑌚 𑌰𑌹𑌸𑌿 𑌸𑍍𑌵𑍇𑌚𑍍𑌛𑌾𑌵𑌿𑌹𑌾𑌰𑌂 𑌕𑍁𑌰𑍁
𑌸𑍍𑌥𑌿𑌤𑍍𑌵𑌾 𑌮𑌾𑌨𑌸𑌰𑌾𑌜𑌹𑌂𑌸 𑌗𑌿𑌰𑌿𑌜𑌾𑌨𑌾𑌥𑌾𑌂𑌘𑍍𑌰𑌿𑌸𑍌𑌧𑌾𑌂𑌤𑌰𑍇 ॥ 46 ॥

𑌶𑌂𑌭𑍁𑌧𑍍𑌯𑌾𑌨 𑌵𑌸𑌂𑌤𑌸𑌂𑌗𑌿𑌨𑌿 𑌹𑍃𑌦𑌾𑌰𑌾𑌮𑍇𑌽𑌘𑌜𑍀𑌰𑍍𑌣𑌚𑍍𑌛𑌦𑌾𑌃
𑌸𑍍𑌰𑌸𑍍𑌤𑌾 𑌭𑌕𑍍𑌤𑌿𑌲𑌤𑌾𑌚𑍍𑌛𑌟𑌾 𑌵𑌿𑌲𑌸𑌿𑌤𑌾𑌃 𑌪𑍁𑌣𑍍𑌯𑌪𑍍𑌰𑌵𑌾𑌳𑌶𑍍𑌰𑌿𑌤𑌾𑌃 ।
𑌦𑍀𑌪𑍍𑌯𑌂𑌤𑍇 𑌗𑍁𑌣𑌕𑍋𑌰𑌕𑌾 𑌜𑌪𑌵𑌚𑌃𑌪𑍁𑌷𑍍𑌪𑌾𑌣𑌿 𑌸𑌦𑍍𑌵𑌾𑌸𑌨𑌾
𑌜𑍍𑌞𑌾𑌨𑌾𑌨𑌂𑌦 𑌸𑍁𑌧𑌾𑌮𑌰𑌂𑌦𑌲𑌹𑌰𑍀 𑌸𑌂𑌵𑌿𑌤𑍍𑌫𑌲𑌾𑌭𑍍𑌯𑍁𑌨𑍍𑌨𑌤𑌿𑌃 ॥ 4𑍭 ॥

𑌨𑌿𑌤𑍍𑌯𑌾𑌨𑌂𑌦𑌰𑌸𑌾𑌲𑌯𑌂 𑌸𑍁𑌰𑌮𑍁𑌨𑌿𑌸𑍍𑌵𑌾𑌂𑌤𑌾𑌂𑌬𑍁𑌜𑌾𑌤𑌾𑌶𑍍𑌰𑌯𑌂
𑌸𑍍𑌵𑌚𑍍𑌛𑌂 𑌸𑌦𑍍𑌦𑍍𑌵𑌿𑌜𑌸𑍇𑌵𑌿𑌤𑌂 𑌕𑌲𑍁𑌷𑌹𑍃𑌤𑍍𑌸𑌦𑍍𑌵𑌾𑌸𑌨𑌾 𑌵𑌿𑌷𑍍𑌕𑍃𑌤𑌮𑍍 ।
𑌶𑌂𑌭𑍁𑌧𑍍𑌯𑌾𑌨 𑌸𑌰𑍋𑌵𑌰𑌂 𑌵𑍍𑌰𑌜 𑌮𑌨𑍋𑌹𑌂 𑌸𑌾𑌵𑌤𑌂𑌸 𑌸𑍍𑌥𑌿𑌰𑌂
𑌕𑌿𑌂 𑌕𑍍𑌷𑍁𑌦𑍍𑌰𑌾 𑌶𑍍𑌰𑌯𑌪𑌲𑍍𑌵𑌲 𑌭𑍍𑌰𑌮𑌣 𑌸𑌂𑌜𑌾𑌤𑌶𑍍𑌰𑌮𑌂 𑌪𑍍𑌰𑌾𑌪𑍍𑌸𑍍𑌯𑌸𑌿 ॥ 4𑍮 ॥

𑌆𑌨𑌂𑌦𑌾𑌮𑍃𑌤 𑌪𑍂𑌰𑌿𑌤𑌾 𑌹𑌰𑌪𑌦𑌾𑌂 𑌭𑍋𑌜𑌾 𑌲𑌵𑌾𑌲𑍋𑌦𑍍𑌯𑌤𑌾
𑌸𑍍𑌥𑍈𑌰𑍍𑌯𑍋𑌪𑌘𑍍𑌨𑌮𑍁𑌪𑍇𑌤𑍍𑌯 𑌭𑌕𑍍𑌤𑌿𑌲𑌤𑌿𑌕𑌾 𑌶𑌾𑌖𑍋𑌪 𑌶𑌾𑌖𑌾𑌨𑍍𑌵𑌿𑌤𑌾 ।
𑌉𑌚𑍍𑌛𑍈𑌰𑍍 𑌮𑌾𑌨𑌸 𑌕𑌾𑌯𑌮𑌾𑌨 𑌪𑌟𑌲𑍀𑌮𑌾𑌕𑍍𑌰𑌮𑍍𑌯 𑌨𑌿𑌷𑍍𑌕𑌲𑍍𑌮𑌷𑌾
𑌨𑌿𑌤𑍍𑌯𑌾𑌭𑍀𑌷𑍍𑌟 𑌫𑌲𑌪𑍍𑌰𑌦𑌾 𑌭𑌵𑌤𑍁 𑌮𑍇 𑌸𑌤𑍍𑌕𑌰𑍍𑌮 𑌸𑌂𑌵𑌰𑍍𑌧𑌿𑌤𑌾 ॥ 4𑍯 ॥

𑌸𑌂𑌧𑍍𑌯𑌾 𑌰𑌂𑌭 𑌵𑌿𑌜𑍃𑌂𑌭𑌿𑌤𑌂 𑌶𑍍𑌰𑍁𑌤𑌿𑌶𑌿𑌰𑌃 𑌸𑍍𑌥𑌾𑌨𑌾𑌂𑌤𑌰𑌾𑌧𑌿 𑌷𑍍𑌠𑌿𑌤𑌂
𑌸𑌪𑍍𑌰𑍇𑌮 𑌭𑍍𑌰𑌮𑌰𑌾𑌭𑌿𑌰𑌾𑌮𑌂 𑌅𑌸𑌕𑍃𑌤𑍍 𑌸𑌦𑍍𑌵𑌾𑌸𑌨𑌾 𑌶𑍋𑌭𑌿𑌤𑌮𑍍 ।
𑌭𑍋𑌗𑍀𑌂𑌦𑍍𑌰𑌾 𑌭𑌰𑌣𑌂 𑌸𑌮𑌸𑍍𑌤𑌸𑍁𑌮𑌨𑌃 𑌪𑍂𑌜𑍍𑌯𑌂 𑌗𑍁𑌣𑌾𑌵𑌿𑌷𑍍𑌕𑍃𑌤𑌂
𑌸𑍇𑌵𑍇 𑌶𑍍𑌰𑍀𑌗𑌿𑌰𑌿 𑌮𑌲𑍍𑌲𑌿𑌕𑌾𑌰𑍍𑌜𑍁𑌨 𑌮𑌹𑌾𑌲𑌿𑌂𑌗𑌂 𑌶𑌿𑌵𑌾𑌲𑌿𑌂𑌗𑌿𑌤𑌮𑍍 ॥ 50 ॥

𑌭𑍃𑌂𑌗𑍀𑌚𑍍𑌛𑌾 𑌨𑌟𑌨𑍋𑌤𑍍𑌕𑌟𑌃 𑌕𑌰𑌮𑌦𑌗𑍍𑌰𑌾𑌹𑍀 𑌸𑍍𑌫𑍁𑌰𑌨𑍍 𑌮𑌾𑌧𑌵𑌾- [𑌸𑍍𑌫𑍁𑌰𑌨𑍍 𑌮𑌾𑌧𑌵𑌾𑌵𑍍𑌹𑍍𑌲𑌾𑌦𑍋]
-𑌹𑍍𑌲𑌾𑌦𑍋 𑌨𑌾𑌦𑌯𑍁𑌤𑍋 𑌮𑌹𑌾𑌸𑌿𑌤𑌵𑌪𑍁𑌃 𑌪𑌂𑌚𑍇𑌷𑍁𑌣𑌾 𑌚𑌾𑌦𑍃𑌤𑌃 ।
𑌸𑌤𑍍𑌪𑌕𑍍𑌷𑌃 𑌸𑍁𑌮𑌨𑍋 𑌵𑌨𑍇𑌷𑍁 𑌸 𑌪𑍁𑌨𑌃 𑌸𑌾𑌕𑍍𑌷𑌾𑌨𑍍𑌮𑌦𑍀𑌯𑍇 𑌮𑌨𑍋-
-𑌰𑌾𑌜𑍀𑌵𑍇 𑌭𑍍𑌰𑌮𑌰𑌾𑌧𑌿𑌪𑍋 𑌵𑌿𑌹𑌰𑌤𑌾𑌂 𑌶𑍍𑌰𑍀𑌶𑍈𑌲𑌵𑌾𑌸𑍀 𑌵𑌿𑌭𑍁𑌃 ॥ 51 ॥

𑌕𑌾𑌰𑍁𑌣𑍍𑌯𑌾𑌮𑍃𑌤 𑌵𑌰𑍍𑌷𑌿𑌣𑌂 𑌘𑌨𑌵𑌿𑌪𑌦𑍍𑌗𑍍𑌰𑍀𑌷𑍍𑌮𑌚𑍍 𑌛𑌿𑌦𑌾𑌕𑌰𑍍𑌮𑌠𑌂
𑌵𑌿𑌦𑍍𑌯𑌾𑌸𑌸𑍍𑌯 𑌫𑌲𑍋𑌦𑌯𑌾𑌯 𑌸𑍁𑌮𑌨𑌃 𑌸𑌂𑌸𑍇𑌵𑍍𑌯 𑌮𑌿𑌚𑍍𑌛𑌾𑌕𑍃𑌤𑌿𑌮𑍍 ।
𑌨𑍃𑌤𑍍𑌯𑌦𑍍 𑌭𑌕𑍍𑌤 𑌮𑌯𑍂𑌰𑌮𑌦𑍍𑌰𑌿 𑌨𑌿𑌲𑌯𑌂 𑌚𑌂𑌚𑌜𑍍𑌜𑌟𑌾𑌮𑌂𑌡𑌲𑌂
𑌶𑌂𑌭𑍋 𑌵𑌾𑌂𑌛𑌤𑌿 𑌨𑍀𑌲𑌕𑌂𑌧𑌰 𑌸𑌦𑌾 𑌤𑍍𑌵𑌾𑌂 𑌮𑍇 𑌮𑌨𑌶𑍍𑌚𑌾𑌤𑌕𑌃 ॥ 52 ॥

𑌆𑌕𑌾𑌶𑍇𑌨 𑌶𑌿𑌖𑍀 𑌸𑌮𑌸𑍍𑌤𑌫𑌣𑌿𑌨𑌾𑌂 𑌨𑍇𑌤𑍍𑌰𑌾 𑌕𑌲𑌾𑌪𑍀 𑌨𑌤𑌾-[𑌨𑌤𑌾𑌨𑍁𑌗𑍍𑌰𑌾𑌹𑌿]
-𑌨𑍁𑌗𑍍𑌰𑌾𑌹𑌿 𑌪𑍍𑌰𑌣𑌵𑍋𑌪𑌦𑍇 𑌶𑌨𑌿𑌨𑌦𑍈𑌃 𑌕𑍇𑌕𑍀𑌤𑌿 𑌯𑍋 𑌗𑍀𑌯𑌤𑍇 ।
𑌶𑍍𑌯𑌾𑌮𑌾𑌂 𑌶𑍈𑌲𑌸𑌮𑍁𑌦𑍍𑌭𑌵𑌾𑌂 𑌘𑌨𑌰𑍁𑌚𑌿𑌂 𑌦𑍃𑌷𑍍𑌟𑍍𑌵𑌾 𑌨𑌟𑌂𑌤𑌂 𑌮𑍁𑌦𑌾
𑌵𑍇𑌦𑌾𑌂𑌤𑍋𑌪𑌵𑌨𑍇 𑌵𑌿𑌹𑌾𑌰𑌰𑌸𑌿𑌕𑌂 𑌤𑌂 𑌨𑍀𑌲𑌕𑌂𑌠𑌂 𑌭𑌜𑍇 ॥ 53 ॥

𑌸𑌂𑌧𑍍𑌯𑌾 𑌘𑌰𑍍𑌮𑌦𑌿𑌨𑌾𑌤𑍍𑌯𑌯𑍋 𑌹𑌰𑌿𑌕𑌰𑌾𑌘𑌾𑌤 𑌪𑍍𑌰𑌭𑍂𑌤𑌾𑌨𑌕- [𑌪𑍍𑌰𑌭𑍂𑌤𑌾𑌨𑌕𑌧𑍍𑌵𑌾𑌨𑍋 ]
-𑌧𑍍𑌵𑌾𑌨𑍋 𑌵𑌾𑌰𑌿𑌦𑌗𑌰𑍍𑌜𑌿𑌤𑌂 𑌦𑌿𑌵𑌿𑌷𑌦𑌾𑌂 𑌦𑍃𑌷𑍍𑌟𑌿𑌚𑍍𑌛𑌟𑌾 𑌚𑌂𑌚𑌲𑌾 ।
𑌭𑌕𑍍𑌤𑌾𑌨𑌾𑌂 𑌪𑌰𑌿𑌤𑍋𑌷𑌬𑌾𑌷𑍍𑌪 𑌵𑌿𑌤𑌤𑌿𑌰𑍍 𑌵𑍃𑌷𑍍𑌟𑌿𑌰𑍍 𑌮𑌯𑍂𑌰𑍀 𑌶𑌿𑌵𑌾
𑌯𑌸𑍍𑌮𑌿𑌨𑍍𑌨𑍁𑌜𑍍𑌜𑍍𑌵𑌲 𑌤𑌾𑌂𑌡𑌵𑌂 𑌵𑌿𑌜𑌯𑌤𑍇 𑌤𑌂 𑌨𑍀𑌲𑌕𑌂𑌠𑌂 𑌭𑌜𑍇 ॥ 54 ॥

𑌆𑌦𑍍𑌯𑌾𑌯𑌾𑌮𑌿𑌤 𑌤𑍇𑌜𑌸𑍇 𑌶𑍍𑌰𑍁𑌤𑌿𑌪𑌦𑍈𑌰𑍍𑌵𑍇𑌦𑍍𑌯𑌾𑌯 𑌸𑌾𑌧𑍍𑌯𑌾𑌯 𑌤𑍇
𑌵𑌿𑌦𑍍𑌯𑌾𑌨𑌂𑌦𑌮𑌯𑌾𑌤𑍍𑌮𑌨𑍇 𑌤𑍍𑌰𑌿𑌜𑌗𑌤𑌃 𑌸𑌂𑌰𑌕𑍍𑌷𑌣𑍋𑌦𑍍𑌯𑍋𑌗𑌿𑌨𑍇 ।
𑌧𑍍𑌯𑍇𑌯𑌾𑌯𑌾𑌖𑌿𑌲𑌯𑍋𑌗𑌿𑌭𑌿𑌃 𑌸𑍁𑌰𑌗𑌣𑍈𑌰𑍍𑌗𑍇𑌯𑌾𑌯 𑌮𑌾𑌯𑌾𑌵𑌿𑌨𑍇
𑌸𑌮𑍍𑌯𑌕𑍍𑌤𑌾𑌂𑌡𑌵 𑌸𑌂𑌭𑍍𑌰𑌮𑌾𑌯 𑌜𑌟𑌿𑌨𑍇 𑌸𑍇𑌯𑌂 𑌨𑌤𑌿𑌃 𑌶𑌂𑌭𑌵𑍇 ॥ 55 ॥

𑌨𑌿𑌤𑍍𑌯𑌾𑌯 𑌤𑍍𑌰𑌿𑌗𑍁𑌣𑌾𑌤𑍍𑌮𑌨𑍇 𑌪𑍁𑌰𑌜𑌿𑌤𑍇 𑌕𑌾𑌤𑍍𑌯𑌾𑌯𑌨𑍀 𑌶𑍍𑌰𑍇𑌯𑌸𑍇
𑌸𑌤𑍍𑌯𑌾𑌯𑌾𑌦𑌿 𑌕𑍁𑌟𑍁𑌂𑌬𑌿𑌨𑍇 𑌮𑍁𑌨𑌿𑌮𑌨𑌃 𑌪𑍍𑌰𑌤𑍍𑌯𑌕𑍍𑌷 𑌚𑌿𑌨𑍍𑌮𑍂𑌰𑍍𑌤𑌯𑍇 ।
𑌮𑌾𑌯𑌾𑌸𑍃𑌷𑍍𑌟 𑌜𑌗𑌤𑍍𑌤𑍍𑌰𑌯𑌾𑌯 𑌸𑌕𑌲𑌾𑌮𑍍𑌨𑌾𑌯𑌾𑌂𑌤𑌸𑌂𑌚𑌾𑌰𑌿𑌣𑍇
𑌸𑌾𑌯𑌂 𑌤𑌾𑌂𑌡𑌵 𑌸𑌂𑌭𑍍𑌰𑌮𑌾𑌯 𑌜𑌟𑌿𑌨𑍇 𑌸𑍇𑌯𑌂 𑌨𑌤𑌿𑌃 𑌶𑌂𑌭𑌵𑍇 ॥ 56 ॥

𑌨𑌿𑌤𑍍𑌯𑌂 𑌸𑍍𑌵𑍋𑌦𑌰𑌪𑍋𑌷𑌣𑌾𑌯 𑌸𑌕𑌲𑌾𑌨𑍁𑌦𑍍𑌦𑌿𑌶𑍍𑌯 𑌵𑌿𑌤𑍍𑌤𑌾𑌶𑌯𑌾
𑌵𑍍𑌯𑌰𑍍𑌥𑌂 𑌪𑌰𑍍𑌯𑌟𑌨𑌂 𑌕𑌰𑍋𑌮𑌿 𑌭𑌵𑌤𑌃 𑌸𑍇𑌵𑌾𑌂 𑌨 𑌜𑌾𑌨𑍇 𑌵𑌿𑌭𑍋 ।
𑌮𑌜𑍍𑌜𑌨𑍍𑌮𑌾𑌂𑌤𑌰 𑌪𑍁𑌣𑍍𑌯 𑌪𑌾𑌕 𑌬𑌲𑌤𑌸𑍍𑌤𑍍𑌵𑌂 𑌶𑌰𑍍𑌵 𑌸𑌰𑍍𑌵𑌾𑌂𑌤𑌰- [𑌸𑌰𑍍𑌵𑌾𑌂𑌤𑌰𑌃]
-𑌸𑍍𑌤𑌿𑌷𑍍𑌠𑌸𑍍𑌯𑍇𑌵 𑌹𑌿 𑌤𑍇𑌨 𑌵𑌾 𑌪𑌶𑍁𑌪𑌤𑍇 𑌤𑍇 𑌰𑌕𑍍𑌷𑌣𑍀𑌯𑍋𑌽𑌸𑍍𑌮𑍍𑌯𑌹𑌮𑍍 ॥ 5𑍭 ॥

𑌏𑌕𑍋 𑌵𑌾𑌰𑌿𑌜 𑌬𑌾𑌂𑌧𑌵𑌃 𑌕𑍍𑌷𑌿𑌤𑌿𑌨𑌭𑍋 𑌵𑍍𑌯𑌾𑌪𑍍𑌤𑌂 𑌤𑌮𑍋 𑌮𑌂𑌡𑌲𑌂
𑌭𑌿𑌤𑍍𑌤𑍍𑌵𑌾 𑌲𑍋𑌚𑌨 𑌗𑍋𑌚𑌰𑍋𑌽𑌪𑌿 𑌭𑌵𑌤𑌿 𑌤𑍍𑌵𑌂 𑌕𑍋𑌟𑌿 𑌸𑍂𑌰𑍍𑌯𑌪𑍍𑌰𑌭𑌃 ।
𑌵𑍇𑌦𑍍𑌯𑌃 𑌕𑌿𑌂 𑌨 𑌭𑌵𑌸𑍍𑌯𑌹𑍋 𑌘𑌨𑌤𑌰𑌂 𑌕𑍀𑌦𑍃𑌗𑍍𑌭𑌵𑍇𑌨𑍍𑌮𑌤𑍍𑌤𑌮- [𑌕𑍀𑌦𑍃𑌗𑍍𑌭𑌵𑍇𑌨𑍍𑌮𑌤𑍍𑌤𑌮𑌃]
-𑌸𑍍𑌤𑌤𑍍𑌸𑌰𑍍𑌵𑌂 [𑌤𑌤𑍍𑌸𑌰𑍍𑌵𑌂] 𑌵𑍍𑌯𑌪𑌨𑍀𑌯 𑌮𑍇 𑌪𑌶𑍁𑌪𑌤𑍇 𑌸𑌾𑌕𑍍𑌷𑌾𑌤𑍍𑌪𑍍𑌰𑌸𑌨𑍍𑌨𑍋 𑌭𑌵 ॥ 5𑍮 ॥

𑌹𑌂𑌸𑌃 𑌪𑌦𑍍𑌮𑌵𑌨𑌂 𑌸𑌮𑌿𑌚𑍍𑌛𑌤𑌿 𑌯𑌥𑌾 𑌨𑍀𑌲𑌾𑌂𑌬𑍁𑌦𑌂 𑌚𑌾𑌤𑌕𑌃
𑌕𑍋𑌕𑌃 𑌕𑍋𑌕𑌨𑌦𑌪𑍍𑌰𑌿𑌯𑌂 𑌪𑍍𑌰𑌤𑌿𑌦𑌿𑌨𑌂 𑌚𑌂𑌦𑍍𑌰𑌂 𑌚𑌕𑍋𑌰𑌸𑍍𑌤𑌥𑌾 ।
𑌚𑍇𑌤𑍋 𑌵𑌾𑌂𑌛𑌤𑌿 𑌮𑌾𑌮𑌕𑌂 𑌪𑌶𑍁𑌪𑌤𑍇 𑌚𑌿𑌨𑍍𑌮𑌾𑌰𑍍𑌗𑌮𑍃𑌗𑍍𑌯𑌂 𑌵𑌿𑌭𑍋
𑌗𑍌𑌰𑍀𑌨𑌾𑌥 𑌭𑌵𑌤𑍍𑌪𑌦𑌾𑌬𑍍𑌜 𑌯𑍁𑌗𑌳𑌂 𑌕𑍈𑌵𑌲𑍍𑌯 𑌸𑍌𑌖𑍍𑌯𑌪𑍍𑌰𑌦𑌮𑍍 ॥ 5𑍯 ॥

𑌰𑍋𑌧𑌸𑍍𑌤𑍋𑌯𑌹𑍃𑌤𑌃 𑌶𑍍𑌰𑌮𑍇𑌣 𑌪𑌥𑌿𑌕𑌶𑍍𑌛𑌾𑌯𑌾𑌂 𑌤𑌰𑍋𑌰𑍍𑌵𑍃𑌷𑍍𑌟𑌿𑌤𑍋 [𑌤𑌰𑍋𑌰𑍍𑌵𑍃𑌷𑍍𑌟𑌿𑌤𑌃]
𑌭𑍀𑌤𑌃 𑌸𑍍𑌵𑌸𑍍𑌥𑌗𑍃𑌹𑌂 𑌗𑍃𑌹𑌸𑍍𑌥𑌮𑌤𑌿𑌥𑌿𑌰𑍍 𑌦𑍀𑌨𑌃 𑌪𑍍𑌰𑌭𑍁𑌂 𑌧𑌾𑌰𑍍𑌮𑌿𑌕𑌮𑍍 ।
𑌦𑍀𑌪𑌂 𑌸𑌂𑌤𑌮𑌸𑌾𑌕𑍁𑌲𑌶𑍍𑌚 𑌶𑌿𑌖𑌿𑌨𑌂 𑌶𑍀𑌤𑌾 𑌵𑍃𑌤𑌸𑍍𑌤𑍍𑌵𑌂 𑌤𑌥𑌾
𑌚𑍇𑌤𑌃 𑌸𑌰𑍍𑌵𑌭𑌯𑌾𑌪𑌹𑌂 𑌵𑍍𑌰𑌜 𑌸𑍁𑌖𑌂 𑌶𑌂𑌭𑍋𑌃 𑌪𑌦𑌾𑌂𑌭𑍋𑌰𑍁𑌹𑌮𑍍 ॥ 60 ॥

𑌅𑌂𑌕𑍋𑌲𑌂 𑌨𑌿𑌜-𑌬𑍀𑌜-𑌸𑌂𑌤𑌤𑌿𑌰𑌯𑌸𑍍𑌕𑌾𑌂𑌤𑍋𑌪𑌲𑌂 [𑌸𑌂𑌤𑌤𑌿𑌃 𑌅𑌯𑌸𑍍𑌕𑌾𑌂𑌤𑍋𑌪𑌲𑌂] 𑌸𑍂𑌚𑌿𑌕𑌾
𑌸𑌾𑌧𑍍𑌵𑍀 𑌨𑍈𑌜𑌵𑌿𑌭𑍁𑌂 𑌲𑌤𑌾 𑌕𑍍𑌷𑌿𑌤𑌿𑌰𑍁𑌹𑌂 𑌸𑌿𑌂𑌧𑍁𑌃 𑌸𑌰𑌿𑌦𑍍 𑌵𑌲𑍍𑌲𑌭𑌮𑍍 ।
𑌪𑍍𑌰𑌾𑌪𑍍𑌨𑍋𑌤𑍀𑌹 𑌯𑌥𑌾 𑌤𑌥𑌾 𑌪𑌶𑍁𑌪𑌤𑍇𑌃 𑌪𑌾𑌦𑌾𑌰𑌵𑌿𑌂𑌦 𑌦𑍍𑌵𑌯𑌂
𑌚𑍇𑌤𑍋𑌵𑍃𑌤𑍍𑌤𑌿 𑌰𑍁𑌪𑍇𑌤𑍍𑌯 𑌤𑌿𑌷𑍍𑌠𑌤𑌿 𑌸𑌦𑌾 𑌸𑌾 𑌭𑌕𑍍𑌤𑌿 𑌰𑌿𑌤𑍍𑌯𑍁𑌚𑍍𑌯𑌤𑍇 ॥ 61 ॥

𑌆𑌨𑌂𑌦𑌾𑌶𑍍𑌰𑍁𑌭𑌿𑌰𑌾𑌤𑌨𑍋𑌤𑌿 𑌪𑍁𑌲𑌕𑌂 𑌨𑍈𑌰𑍍𑌮𑌲𑍍𑌯𑌤𑌶𑍍𑌛𑌾𑌦𑌨𑌂
𑌵𑌾𑌚𑌾-𑌶𑌂𑌖𑌮𑍁𑌖𑍇 𑌸𑍍𑌥𑌿𑌤𑍈𑌶𑍍𑌚 𑌜𑌠𑌰𑌾𑌪𑍂𑌰𑍍𑌤𑌿𑌂 𑌚𑌰𑌿𑌤𑍍𑌰𑌾𑌮𑍃𑌤𑍈𑌃 ।
𑌰𑍁𑌦𑍍𑌰𑌾𑌕𑍍𑌷𑍈𑌰𑍍 𑌹𑌸𑌿𑌤𑍇𑌨 𑌦𑍇𑌵 𑌵𑌪𑍁𑌷𑍋 𑌰𑌕𑍍𑌷𑌾𑌂 𑌭𑌵𑌦𑍍𑌭𑌾𑌵𑌨𑌾-
-𑌪𑌰𑍍𑌯𑌂𑌕𑍇 𑌵𑌿𑌨𑌿𑌵𑍇𑌶𑍍𑌯 𑌭𑌕𑍍𑌤𑌿𑌜𑌨𑌨𑍀 𑌭𑌕𑍍𑌤𑌾𑌰𑍍𑌭𑌕𑌂 𑌰𑌕𑍍𑌷𑌤𑌿 ॥ 62 ॥

𑌮𑌾𑌰𑍍𑌗𑌾𑌵𑌰𑍍𑌤𑌿𑌤𑌪𑌾𑌦𑍁𑌕𑌾 𑌪𑌶𑍁𑌪𑌤𑍇𑌰𑌂𑌗𑌸𑍍𑌯 𑌕𑍂𑌰𑍍𑌚𑌾𑌯𑌤𑍇
𑌗𑌂𑌡𑍂𑌷𑌾𑌂𑌬𑍁𑌨𑌿𑌷𑍇𑌚𑌨𑌂 𑌪𑍁𑌰𑌰𑌿𑌪𑍋𑌰𑍍𑌦𑌿𑌵𑍍𑌯𑌾𑌭𑌿𑌷𑍇𑌕𑌾𑌯𑌤𑍇 ।
𑌕𑌿𑌂𑌚𑌿-𑌦𑍍𑌭𑌕𑍍𑌷𑌿𑌤-𑌮𑌾𑌂𑌸-𑌶𑍇𑌷𑌕𑌬𑌳𑌂 𑌨𑌵𑍍𑌯𑍋𑌪𑌹𑌾𑌰𑌾𑌯𑌤𑍇
𑌭𑌕𑍍𑌤𑌿𑌃 𑌕𑌿𑌂 𑌨 𑌕𑌰𑍋𑌤𑍍𑌯𑌹𑍋 𑌵𑌨𑌚𑌰𑍋 𑌭𑌕𑍍𑌤𑌾𑌵𑌤𑌂𑌸𑌾𑌯𑌤𑍇 ॥ 63 ॥

𑌵𑌕𑍍𑌷𑌸𑍍𑌤𑌾𑌡𑌨𑌮𑌂𑌤𑌕𑌸𑍍𑌯 𑌕𑌠𑌿𑌨𑌾𑌪𑌸𑍍𑌮𑌾𑌰𑌸𑌂𑌮𑌰𑍍𑌦𑌨𑌂
𑌭𑍂𑌭𑍃𑌤𑍍𑌪𑌰𑍍𑌯𑌟𑌨𑌂 𑌨𑌮𑌤𑍍𑌸𑍁𑌰𑌶𑌿𑌰𑌃𑌕𑍋𑌟𑍀𑌰𑌸𑌂𑌘𑌰𑍍𑌷𑌣𑌮𑍍 ।
𑌕𑌰𑍍𑌮𑍇𑌦𑌂 𑌮𑍃𑌦𑍁𑌲𑌸𑍍𑌯 𑌤𑌾𑌵𑌕𑌪𑌦𑌦𑍍𑌵𑌂𑌦𑍍𑌵𑌸𑍍𑌯 𑌕𑌿𑌂 𑌵𑍋𑌚𑌿𑌤𑌂
𑌮𑌚𑍍𑌚𑍇𑌤𑍋𑌮𑌣𑌿𑌪𑌾𑌦𑍁𑌕𑌾𑌵𑌿𑌹𑌰𑌣𑌂 𑌶𑌂𑌭𑍋 𑌸𑌦𑌾𑌂𑌗𑍀𑌕𑍁𑌰𑍁 ॥ 64 ॥

𑌵𑌕𑍍𑌷𑌸𑍍𑌤𑌾𑌡𑌨𑌶𑌂𑌕𑌯𑌾 𑌵𑌿𑌚𑌲𑌿𑌤𑍋 𑌵𑍈𑌵𑌸𑍍𑌵𑌤𑍋 𑌨𑌿𑌰𑍍𑌜𑌰𑌾𑌃
𑌕𑍋𑌟𑍀𑌰𑍋𑌜𑍍𑌜𑍍𑌵𑌲𑌰𑌤𑍍𑌨𑌦𑍀𑌪𑌕𑌲𑌿𑌕𑌾𑌨𑍀𑌰𑌾𑌜𑌨𑌂 𑌕𑍁𑌰𑍍𑌵𑌤𑍇 ।
𑌦𑍃𑌷𑍍𑌟𑍍𑌵𑌾 𑌮𑍁𑌕𑍍𑌤𑌿𑌵𑌧𑍂𑌸𑍍𑌤𑌨𑍋𑌤𑌿 𑌨𑌿𑌭𑍃𑌤𑌾𑌶𑍍𑌲𑍇𑌷𑌂 𑌭𑌵𑌾𑌨𑍀𑌪𑌤𑍇
𑌯𑌚𑍍𑌚𑍇𑌤𑌸𑍍𑌤𑌵 𑌪𑌾𑌦𑌪𑌦𑍍𑌮𑌭𑌜𑌨𑌂 𑌤𑌸𑍍𑌯𑍇𑌹 𑌕𑌿𑌂 𑌦𑍁𑌰𑍍𑌲𑌭𑌮𑍍 ॥ 65 ॥

𑌕𑍍𑌰𑍀𑌡𑌾𑌰𑍍𑌥𑌂 𑌸𑍃𑌜𑌸𑌿 𑌪𑍍𑌰𑌪𑌂𑌚𑌮𑌖𑌿𑌲𑌂 𑌕𑍍𑌰𑍀𑌡𑌾𑌮𑍃𑌗𑌾𑌸𑍍𑌤𑍇 𑌜𑌨𑌾𑌃
𑌯𑌤𑍍𑌕𑌰𑍍𑌮𑌾𑌚𑌰𑌿𑌤𑌂 𑌮𑌯𑌾 𑌚 𑌭𑌵𑌤𑌃 𑌪𑍍𑌰𑍀𑌤𑍍𑌯𑍈 𑌭𑌵𑌤𑍍𑌯𑍇𑌵 𑌤𑌤𑍍 ।
𑌶𑌂𑌭𑍋 𑌸𑍍𑌵𑌸𑍍𑌯 𑌕𑍁𑌤𑍂𑌹𑌲𑌸𑍍𑌯 𑌕𑌰𑌣𑌂 𑌮𑌚𑍍𑌚𑍇𑌷𑍍𑌟𑌿𑌤𑌂 𑌨𑌿𑌶𑍍𑌚𑌿𑌤𑌂
𑌤𑌸𑍍𑌮𑌾𑌨𑍍𑌮𑌾𑌮𑌕𑌰𑌕𑍍𑌷𑌣𑌂 𑌪𑌶𑍁𑌪𑌤𑍇 𑌕𑌰𑍍𑌤𑌵𑍍𑌯𑌮𑍇𑌵 𑌤𑍍𑌵𑌯𑌾 ॥ 66 ॥

𑌬𑌹𑍁𑌵𑌿𑌧𑌪𑌰𑌿𑌤𑍋𑌷𑌬𑌾𑌷𑍍𑌪𑌪𑍂𑌰-
-𑌸𑍍𑌫𑍁𑌟𑌪𑍁𑌲𑌕𑌾𑌂𑌕𑌿𑌤𑌚𑌾𑌰𑍁𑌭𑍋𑌗𑌭𑍂𑌮𑌿𑌮𑍍 ।
𑌚𑌿𑌰𑌪𑌦𑌫𑌲𑌕𑌾𑌂𑌕𑍍𑌷𑌿𑌸𑍇𑌵𑍍𑌯𑌮𑌾𑌨𑌾𑌂
𑌪𑌰𑌮𑌸𑌦𑌾𑌶𑌿𑌵𑌭𑌾𑌵𑌨𑌾𑌂 𑌪𑍍𑌰𑌪𑌦𑍍𑌯𑍇 ॥ 6𑍭 ॥

𑌅𑌮𑌿𑌤𑌮𑍁𑌦𑌮𑍃𑌤𑌂 𑌮𑍁𑌹𑍁𑌰𑍍𑌦𑍁𑌹𑌂𑌤𑍀𑌂
𑌵𑌿𑌮𑌲𑌭𑌵𑌤𑍍𑌪𑌦𑌗𑍋𑌷𑍍𑌠𑌮𑌾𑌵𑌸𑌂𑌤𑍀𑌮𑍍 ।
𑌸𑌦𑌯 𑌪𑌶𑍁𑌪𑌤𑍇 𑌸𑍁𑌪𑍁𑌣𑍍𑌯𑌪𑌾𑌕𑌾𑌂
𑌮𑌮 𑌪𑌰𑌿𑌪𑌾𑌲𑌯 𑌭𑌕𑍍𑌤𑌿𑌧𑍇𑌨𑍁𑌮𑍇𑌕𑌾𑌮𑍍 ॥ 6𑍮 ॥

𑌜𑌡𑌤𑌾 𑌪𑌶𑍁𑌤𑌾 𑌕𑌳𑌂𑌕𑌿𑌤𑌾
𑌕𑍁𑌟𑌿𑌲𑌚𑌰𑌤𑍍𑌵𑌂 𑌚 𑌨𑌾𑌸𑍍𑌤𑌿 𑌮𑌯𑌿 𑌦𑍇𑌵 ।
𑌅𑌸𑍍𑌤𑌿 𑌯𑌦𑌿 𑌰𑌾𑌜𑌮𑍌𑌳𑍇
𑌭𑌵𑌦𑌾𑌭𑌰𑌣𑌸𑍍𑌯 𑌨𑌾𑌸𑍍𑌮𑌿 𑌕𑌿𑌂 𑌪𑌾𑌤𑍍𑌰𑌮𑍍 ॥ 6𑍯 ॥

𑌅𑌰𑌹𑌸𑌿 𑌰𑌹𑌸𑌿 𑌸𑍍𑌵𑌤𑌂𑌤𑍍𑌰𑌬𑍁𑌦𑍍𑌧𑍍𑌯𑌾
𑌵𑌰𑌿𑌵𑌸𑌿𑌤𑍁𑌂 𑌸𑍁𑌲𑌭𑌃 𑌪𑍍𑌰𑌸𑌨𑍍𑌨𑌮𑍂𑌰𑍍𑌤𑌿𑌃 ।
𑌅𑌗𑌣𑌿𑌤𑌫𑌲𑌦𑌾𑌯𑌕𑌃 𑌪𑍍𑌰𑌭𑍁𑌰𑍍𑌮𑍇
𑌜𑌗𑌦𑌧𑌿𑌕𑍋 𑌹𑍃𑌦𑌿 𑌰𑌾𑌜𑌶𑍇𑌖𑌰𑍋𑌽𑌸𑍍𑌤𑌿 ॥ 𑍭0 ॥

𑌰𑍂𑌢𑌭𑌕𑍍𑌤𑌿𑌗𑍁𑌣𑌕𑍁𑌂𑌚𑌿𑌤𑌭𑌾𑌵𑌚𑌾𑌪-
5𑌯𑍁𑌕𑍍𑌤𑍈𑌃 𑌶𑌿𑌵𑌸𑍍𑌮𑌰𑌣𑌬𑌾𑌣𑌗𑌣𑍈𑌰𑌮𑍋𑌘𑍈𑌃 ।
5𑌇𑌰𑍍𑌜𑌿𑌤𑍍𑌯 𑌕𑌿𑌲𑍍𑌬𑌿𑌷𑌰𑌿𑌪𑍂𑌨𑍍𑌵𑌿𑌜𑌯𑍀 𑌸𑍁𑌧𑍀𑌂𑌦𑍍𑌰𑌃
𑌸𑌾𑌨𑌂𑌦𑌮𑌾𑌵𑌹𑌤𑌿 𑌸𑍁𑌸𑍍𑌥𑌿𑌰𑌰𑌾𑌜𑌲𑌕𑍍𑌷𑍍𑌮𑍀𑌮𑍍 ॥ 𑍭1 ॥

𑌧𑍍𑌯𑌾𑌨𑌾𑌂𑌜𑌨𑍇𑌨 𑌸𑌮𑌵𑍇𑌕𑍍𑌷𑍍𑌯 𑌤𑌮𑌃𑌪𑍍𑌰𑌦𑍇𑌶𑌂
𑌭𑌿𑌤𑍍𑌤𑍍𑌵𑌾 𑌮𑌹𑌾𑌬𑌲𑌿𑌭𑌿𑌰𑍀𑌶𑍍𑌵𑌰𑌨𑌾𑌮𑌮𑌂𑌤𑍍𑌰𑍈𑌃 ।
𑌦𑌿𑌵𑍍𑌯𑌾𑌶𑍍𑌰𑌿𑌤𑌂 𑌭𑍁𑌜𑌗𑌭𑍂𑌷𑌣𑌮𑍁𑌦𑍍𑌵𑌹𑌂𑌤𑌿
𑌯𑍇 𑌪𑌾𑌦𑌪𑌦𑍍𑌮𑌮𑌿𑌹 𑌤𑍇 𑌶𑌿𑌵 𑌤𑍇 𑌕𑍃𑌤𑌾𑌰𑍍𑌥𑌾𑌃 ॥ 𑍭2 ॥

𑌭𑍂𑌦𑌾𑌰𑌤𑌾𑌮𑍁𑌦𑌵𑌹𑌦𑍍𑌯𑌦𑌪𑍇𑌕𑍍𑌷𑌯𑌾 𑌶𑍍𑌰𑍀-
-𑌭𑍂𑌦𑌾𑌰 𑌏𑌵 𑌕𑌿𑌮𑌤𑌃 𑌸𑍁𑌮𑌤𑍇 𑌲𑌭𑌸𑍍𑌵 ।
𑌕𑍇𑌦𑌾𑌰𑌮𑌾𑌕𑌲𑌿𑌤𑌮𑍁𑌕𑍍𑌤𑌿𑌮𑌹𑍌𑌷𑌧𑍀𑌨𑌾𑌂
𑌪𑌾𑌦𑌾𑌰𑌵𑌿𑌂𑌦𑌭𑌜𑌨𑌂 𑌪𑌰𑌮𑍇𑌶𑍍𑌵𑌰𑌸𑍍𑌯 ॥ 𑍭3 ॥

𑌆𑌶𑌾𑌪𑌾𑌶𑌕𑍍𑌲𑍇𑌶𑌦𑍁𑌰𑍍𑌵𑌾𑌸𑌨𑌾𑌦𑌿-
-𑌭𑍇𑌦𑍋𑌦𑍍𑌯𑍁𑌕𑍍𑌤𑍈𑌰𑍍𑌦𑌿𑌵𑍍𑌯𑌗𑌂𑌧𑍈𑌰𑌮𑌂𑌦𑍈𑌃 ।
𑌆𑌶𑌾𑌶𑌾𑌟𑍀𑌕𑌸𑍍𑌯 𑌪𑌾𑌦𑌾𑌰𑌵𑌿𑌂𑌦𑌂
𑌚𑍇𑌤𑌃𑌪𑍇𑌟𑍀𑌂 𑌵𑌾𑌸𑌿𑌤𑌾𑌂 𑌮𑍇 𑌤𑌨𑍋𑌤𑍁 ॥ 𑍭4 ॥

𑌕𑌳𑍍𑌯𑌾𑌣𑌿𑌨𑌂 𑌸𑌰𑌸𑌚𑌿𑌤𑍍𑌰𑌗𑌤𑌿𑌂 𑌸𑌵𑍇𑌗𑌂
𑌸𑌰𑍍𑌵𑍇𑌂𑌗𑌿𑌤𑌜𑍍𑌞𑌮𑌨𑌘𑌂 𑌧𑍍𑌰𑍁𑌵𑌲𑌕𑍍𑌷𑌣𑌾𑌢𑍍𑌯𑌮𑍍 ।
𑌚𑍇𑌤𑌸𑍍𑌤𑍁𑌰𑌂𑌗𑌮𑌧𑌿𑌰𑍁𑌹𑍍𑌯 𑌚𑌰 𑌸𑍍𑌮𑌰𑌾𑌰𑍇
𑌨𑍇𑌤𑌃 𑌸𑌮𑌸𑍍𑌤𑌜𑌗𑌤𑌾𑌂 𑌵𑍃𑌷𑌭𑌾𑌧𑌿𑌰𑍂𑌢 ॥ 𑍭5 ॥

𑌭𑌕𑍍𑌤𑌿𑌰𑍍𑌮𑌹𑍇𑌶𑌪𑌦𑌪𑍁𑌷𑍍𑌕𑌰𑌮𑌾𑌵𑌸𑌂𑌤𑍀
𑌕𑌾𑌦𑌂𑌬𑌿𑌨𑍀𑌵 𑌕𑍁𑌰𑍁𑌤𑍇 𑌪𑌰𑌿𑌤𑍋𑌷𑌵𑌰𑍍𑌷𑌮𑍍 ।
𑌸𑌂𑌪𑍂𑌰𑌿𑌤𑍋 𑌭𑌵𑌤𑌿 𑌯𑌸𑍍𑌯 𑌮𑌨𑌸𑍍𑌤𑌟𑌾𑌕-
-𑌸𑍍𑌤𑌜𑍍𑌜𑌨𑍍𑌮𑌸𑌸𑍍𑌯𑌮𑌖𑌿𑌲𑌂 𑌸𑌫𑌲𑌂 𑌚 𑌨𑌾𑌨𑍍𑌯𑌤𑍍 ॥ 𑍭6 ॥

𑌬𑍁𑌦𑍍𑌧𑌿𑌃 𑌸𑍍𑌥𑌿𑌰𑌾 𑌭𑌵𑌿𑌤𑍁𑌮𑍀𑌶𑍍𑌵𑌰𑌪𑌾𑌦𑌪𑌦𑍍𑌮-
-𑌸𑌕𑍍𑌤𑌾 𑌵𑌧𑍂𑌰𑍍𑌵𑌿𑌰𑌹𑌿𑌣𑍀𑌵 𑌸𑌦𑌾 𑌸𑍍𑌮𑌰𑌂𑌤𑍀 ।
𑌸𑌦𑍍𑌭𑌾𑌵𑌨𑌾𑌸𑍍𑌮𑌰𑌣𑌦𑌰𑍍𑌶𑌨𑌕𑍀𑌰𑍍𑌤𑌨𑌾𑌦𑌿
𑌸𑌮𑍍𑌮𑍋𑌹𑌿𑌤𑍇𑌵 𑌶𑌿𑌵𑌮𑌂𑌤𑍍𑌰𑌜𑌪𑍇𑌨 𑌵𑌿𑌂𑌤𑍇 ॥ 𑍭𑍭 ॥

𑌸𑌦𑍁𑌪𑌚𑌾𑌰𑌵𑌿𑌧𑌿𑌷𑍍𑌵𑌨𑍁𑌬𑍋𑌧𑌿𑌤𑌾𑌂
𑌸𑌵𑌿𑌨𑌯𑌾𑌂 𑌸𑍁𑌹𑍃𑌦𑌂 𑌸𑌮𑍁𑌪𑌾𑌶𑍍𑌰𑌿𑌤𑌾𑌮𑍍 ।
𑌮𑌮 𑌸𑌮𑍁𑌦𑍍𑌧𑌰 𑌬𑍁𑌦𑍍𑌧𑌿𑌮𑌿𑌮𑌾𑌂 𑌪𑍍𑌰𑌭𑍋
𑌵𑌰𑌗𑍁𑌣𑍇𑌨 𑌨𑌵𑍋𑌢𑌵𑌧𑍂𑌮𑌿𑌵 ॥ 𑍭𑍮 ॥

𑌨𑌿𑌤𑍍𑌯𑌂 𑌯𑍋𑌗𑌿𑌮𑌨𑌃 𑌸𑌰𑍋𑌜𑌦𑌳𑌸𑌂𑌚𑌾𑌰𑌕𑍍𑌷𑌮𑌸𑍍𑌤𑍍𑌵𑌤𑍍𑌕𑍍𑌰𑌮𑌃
𑌶𑌂𑌭𑍋 𑌤𑍇𑌨 𑌕𑌥𑌂 𑌕𑌠𑍋𑌰𑌯𑌮𑌰𑌾𑌡𑍍𑌵𑌕𑍍𑌷𑌃𑌕𑌵𑌾𑌟𑌕𑍍𑌷𑌤𑌿𑌃 ।
𑌅𑌤𑍍𑌯𑌂𑌤𑌂 𑌮𑍃𑌦𑍁𑌲𑌂 𑌤𑍍𑌵𑌦𑌂𑌘𑍍𑌰𑌿𑌯𑍁𑌗𑌳𑌂 𑌹𑌾 𑌮𑍇 𑌮𑌨𑌶𑍍𑌚𑌿𑌂𑌤𑌯-
-𑌤𑍍𑌯𑍇𑌤𑌲𑍍𑌲𑍋𑌚𑌨𑌗𑍋𑌚𑌰𑌂 𑌕𑍁𑌰𑍁 𑌵𑌿𑌭𑍋 𑌹𑌸𑍍𑌤𑍇𑌨 𑌸𑌂𑌵𑌾𑌹𑌯𑍇 ॥ 𑍭𑍯 ॥

𑌏𑌷𑍍𑌯𑌤𑍍𑌯𑍇𑌷 𑌜𑌨𑌿𑌂 𑌮𑌨𑍋𑌽𑌸𑍍𑌯 𑌕𑌠𑌿𑌨𑌂 𑌤𑌸𑍍𑌮𑌿𑌨𑍍𑌨𑌟𑌾𑌨𑍀𑌤𑌿 𑌮-
-𑌦𑍍𑌰𑌕𑍍𑌷𑌾𑌯𑍈 𑌗𑌿𑌰𑌿𑌸𑍀𑌮𑍍𑌨𑌿 𑌕𑍋𑌮𑌲𑌪𑌦𑌨𑍍𑌯𑌾𑌸𑌃 𑌪𑍁𑌰𑌾𑌭𑍍𑌯𑌾𑌸𑌿𑌤𑌃 ।
𑌨𑍋 𑌚𑍇𑌦𑍍𑌦𑌿𑌵𑍍𑌯𑌗𑍃𑌹𑌾𑌂𑌤𑌰𑍇𑌷𑍁 𑌸𑍁𑌮𑌨𑌸𑍍𑌤𑌲𑍍𑌪𑍇𑌷𑍁 𑌵𑍇𑌦𑍍𑌯𑌾𑌦𑌿𑌷𑍁
𑌪𑍍𑌰𑌾𑌯𑌃 𑌸𑌤𑍍𑌸𑍁 𑌶𑌿𑌲𑌾𑌤𑌲𑍇𑌷𑍁 𑌨𑌟𑌨𑌂 𑌶𑌂𑌭𑍋 𑌕𑌿𑌮𑌰𑍍𑌥𑌂 𑌤𑌵 ॥ 𑍮0 ॥

𑌕𑌂𑌚𑌿𑌤𑍍𑌕𑌾𑌲𑌮𑍁𑌮𑌾𑌮𑌹𑍇𑌶 𑌭𑌵𑌤𑌃 𑌪𑌾𑌦𑌾𑌰𑌵𑌿𑌂𑌦𑌾𑌰𑍍𑌚𑌨𑍈𑌃
𑌕𑌂𑌚𑌿𑌦𑍍𑌧𑍍𑌯𑌾𑌨𑌸𑌮𑌾𑌧𑌿𑌭𑌿𑌶𑍍𑌚 𑌨𑌤𑌿𑌭𑌿𑌃 𑌕𑌂𑌚𑌿𑌤𑍍𑌕𑌥𑌾𑌕𑌰𑍍𑌣𑌨𑍈𑌃 ।
𑌕𑌂𑌚𑌿𑌤𑍍𑌕𑌂𑌚𑌿𑌦𑌵𑍇𑌕𑍍𑌷𑌣𑍈𑌶𑍍𑌚 𑌨𑍁𑌤𑌿𑌭𑌿𑌃 𑌕𑌂𑌚𑌿𑌦𑍍𑌦𑌶𑌾𑌮𑍀𑌦𑍃𑌶𑍀𑌂
𑌯𑌃 𑌪𑍍𑌰𑌾𑌪𑍍𑌨𑍋𑌤𑌿 𑌮𑍁𑌦𑌾 𑌤𑍍𑌵𑌦𑌰𑍍𑌪𑌿𑌤𑌮𑌨𑌾 𑌜𑍀𑌵𑌨𑍍 𑌸 𑌮𑍁𑌕𑍍𑌤𑌃 𑌖𑌲𑍁 ॥ 𑍮1 ॥

𑌬𑌾𑌣𑌤𑍍𑌵𑌂 𑌵𑍃𑌷𑌭𑌤𑍍𑌵𑌮𑌰𑍍𑌧𑌵𑌪𑍁𑌷𑌾 𑌭𑌾𑌰𑍍𑌯𑌾𑌤𑍍𑌵𑌮𑌾𑌰𑍍𑌯𑌾𑌪𑌤𑍇
𑌘𑍋𑌣𑌿𑌤𑍍𑌵𑌂 𑌸𑌖𑌿𑌤𑌾 𑌮𑍃𑌦𑌂𑌗𑌵𑌹𑌤𑌾 𑌚𑍇𑌤𑍍𑌯𑌾𑌦𑌿 𑌰𑍂𑌪𑌂 𑌦𑌧𑍌 ।
𑌤𑍍𑌵𑌤𑍍𑌪𑌾𑌦𑍇 𑌨𑌯𑌨𑌾𑌰𑍍𑌪𑌣𑌂 𑌚 𑌕𑍃𑌤𑌵𑌾𑌂𑌸𑍍𑌤𑍍𑌵𑌦𑍍𑌦𑍇𑌹𑌭𑌾𑌗𑍋 𑌹𑌰𑌿𑌃
𑌪𑍂𑌜𑍍𑌯𑌾𑌤𑍍𑌪𑍂𑌜𑍍𑌯𑌤𑌰𑌃 𑌸 𑌏𑌵 𑌹𑌿 𑌨 𑌚𑍇𑌤𑍍𑌕𑍋 𑌵𑌾 𑌤𑌦𑌨𑍍𑌯𑍋𑌽𑌧𑌿𑌕𑌃 ॥ 𑍮2 ॥

𑌜𑌨𑌨𑌮𑍃𑌤𑌿𑌯𑍁𑌤𑌾𑌨𑌾𑌂 𑌸𑍇𑌵𑌯𑌾 𑌦𑍇𑌵𑌤𑌾𑌨𑌾𑌂
𑌨 𑌭𑌵𑌤𑌿 𑌸𑍁𑌖𑌲𑍇𑌶𑌃 𑌸𑌂𑌶𑌯𑍋 𑌨𑌾𑌸𑍍𑌤𑌿 𑌤𑌤𑍍𑌰 ।
𑌅𑌜𑌨𑌿𑌮𑌮𑍃𑌤𑌰𑍂𑌪𑌂 𑌸𑌾𑌂𑌬𑌮𑍀𑌶𑌂 𑌭𑌜𑌂𑌤𑍇
𑌯 𑌇𑌹 𑌪𑌰𑌮𑌸𑍌𑌖𑍍𑌯𑌂 𑌤𑍇 𑌹𑌿 𑌧𑌨𑍍𑌯𑌾 𑌲𑌭𑌂𑌤𑍇 ॥ 𑍮3 ॥

𑌶𑌿𑌵 𑌤𑌵 𑌪𑌰𑌿𑌚𑌰𑍍𑌯𑌾𑌸𑌨𑍍𑌨𑌿𑌧𑌾𑌨𑌾𑌯 𑌗𑍌𑌰𑍍𑌯𑌾
𑌭𑌵 𑌮𑌮 𑌗𑍁𑌣𑌧𑍁𑌰𑍍𑌯𑌾𑌂 𑌬𑍁𑌦𑍍𑌧𑌿𑌕𑌨𑍍𑌯𑌾𑌂 𑌪𑍍𑌰𑌦𑌾𑌸𑍍𑌯𑍇 ।
𑌸𑌕𑌲𑌭𑍁𑌵𑌨𑌬𑌂𑌧𑍋 𑌸𑌚𑍍𑌚𑌿𑌦𑌾𑌨𑌂𑌦𑌸𑌿𑌂𑌧𑍋
𑌸𑌦𑌯 𑌹𑍃𑌦𑌯𑌗𑍇𑌹𑍇 𑌸𑌰𑍍𑌵𑌦𑌾 𑌸𑌂𑌵𑌸 𑌤𑍍𑌵𑌮𑍍 ॥ 𑍮4 ॥

𑌜𑌲𑌧𑌿𑌮𑌥𑌨𑌦𑌕𑍍𑌷𑍋 𑌨𑍈𑌵 𑌪𑌾𑌤𑌾𑌳𑌭𑍇𑌦𑍀
𑌨 𑌚 𑌵𑌨𑌮𑍃𑌗𑌯𑌾𑌯𑌾𑌂 𑌨𑍈𑌵 𑌲𑍁𑌬𑍍𑌧𑌃 𑌪𑍍𑌰𑌵𑍀𑌣𑌃 ।
𑌅𑌶𑌨𑌕𑍁𑌸𑍁𑌮𑌭𑍂𑌷𑌾𑌵𑌸𑍍𑌤𑍍𑌰𑌮𑍁𑌖𑍍𑌯𑌾𑌂 𑌸𑌪𑌰𑍍𑌯𑌾𑌂
𑌕𑌥𑌯 𑌕𑌥𑌮𑌹𑌂 𑌤𑍇 𑌕𑌲𑍍𑌪𑌯𑌾𑌨𑍀𑌂𑌦𑍁𑌮𑍌𑌳𑍇 ॥ 𑍮5 ॥

𑌪𑍂𑌜𑌾𑌦𑍍𑌰𑌵𑍍𑌯𑌸𑌮𑍃𑌦𑍍𑌧𑌯𑍋 𑌵𑌿𑌰𑌚𑌿𑌤𑌾𑌃 𑌪𑍂𑌜𑌾𑌂 𑌕𑌥𑌂 𑌕𑍁𑌰𑍍𑌮𑌹𑍇
𑌪𑌕𑍍𑌷𑌿𑌤𑍍𑌵𑌂 𑌨 𑌚 𑌵𑌾 𑌕𑌿𑌟𑌿𑌤𑍍𑌵𑌮𑌪𑌿 𑌨 𑌪𑍍𑌰𑌾𑌪𑍍𑌤𑌂 𑌮𑌯𑌾 𑌦𑍁𑌰𑍍𑌲𑌭𑌮𑍍 ।
𑌜𑌾𑌨𑍇 𑌮𑌸𑍍𑌤𑌕𑌮𑌂𑌘𑍍𑌰𑌿𑌪𑌲𑍍𑌲𑌵𑌮𑍁𑌮𑌾𑌜𑌾𑌨𑍇 𑌨 𑌤𑍇𑌽𑌹𑌂 𑌵𑌿𑌭𑍋
𑌨 𑌜𑍍𑌞𑌾𑌤𑌂 𑌹𑌿 𑌪𑌿𑌤𑌾𑌮𑌹𑍇𑌨 𑌹𑌰𑌿𑌣𑌾 𑌤𑌤𑍍𑌤𑍍𑌵𑍇𑌨 𑌤𑌦𑍍𑌰𑍂𑌪𑌿𑌣𑌾 ॥ 𑍮6 ॥

𑌅𑌶𑌨𑌂 𑌗𑌰𑌳𑌂 𑌫𑌣𑍀 𑌕𑌲𑌾𑌪𑍋
𑌵𑌸𑌨𑌂 𑌚𑌰𑍍𑌮 𑌚 𑌵𑌾𑌹𑌨𑌂 𑌮𑌹𑍋𑌕𑍍𑌷𑌃 ।
𑌮𑌮 𑌦𑌾𑌸𑍍𑌯𑌸𑌿 𑌕𑌿𑌂 𑌕𑌿𑌮𑌸𑍍𑌤𑌿 𑌶𑌂𑌭𑍋
𑌤𑌵 𑌪𑌾𑌦𑌾𑌂𑌬𑍁𑌜𑌭𑌕𑍍𑌤𑌿𑌮𑍇𑌵 𑌦𑍇𑌹𑌿 ॥ 𑍮𑍭 ॥

𑌯𑌦𑌾 𑌕𑍃𑌤𑌾𑌂𑌭𑍋𑌨𑌿𑌧𑌿𑌸𑍇𑌤𑍁𑌬𑌂𑌧𑌨𑌃
𑌕𑌰𑌸𑍍𑌥𑌲𑌾𑌧𑌃𑌕𑍃𑌤𑌪𑌰𑍍𑌵𑌤𑌾𑌧𑌿𑌪𑌃 ।
𑌭𑌵𑌾𑌨𑌿 𑌤𑍇 𑌲𑌂𑌘𑌿𑌤𑌪𑌦𑍍𑌮𑌸𑌂𑌭𑌵-
-𑌸𑍍𑌤𑌦𑌾 𑌶𑌿𑌵𑌾𑌰𑍍𑌚𑌾𑌸𑍍𑌤𑌵𑌭𑌾𑌵𑌨𑌕𑍍𑌷𑌮𑌃 ॥ 𑍮𑍮 ॥

𑌨𑌤𑌿𑌭𑌿𑌰𑍍𑌨𑍁𑌤𑌿𑌭𑌿𑌸𑍍𑌤𑍍𑌵𑌮𑍀𑌶 𑌪𑍂𑌜𑌾-
-𑌵𑌿𑌧𑌿𑌭𑌿𑌰𑍍𑌧𑍍𑌯𑌾𑌨𑌸𑌮𑌾𑌧𑌿𑌭𑌿𑌰𑍍𑌨 𑌤𑍁𑌷𑍍𑌟𑌃 ।
𑌧𑌨𑍁𑌷𑌾 𑌮𑍁𑌸𑌲𑍇𑌨 𑌚𑌾𑌶𑍍𑌮𑌭𑌿𑌰𑍍𑌵𑌾
𑌵𑌦 𑌤𑍇 𑌪𑍍𑌰𑍀𑌤𑌿𑌕𑌰𑌂 𑌤𑌥𑌾 𑌕𑌰𑍋𑌮𑌿 ॥ 𑍮𑍯 ॥

𑌵𑌚𑌸𑌾 𑌚𑌰𑌿𑌤𑌂 𑌵𑌦𑌾𑌮𑌿 𑌶𑌂𑌭𑍋-
-𑌰𑌹𑌮𑍁𑌦𑍍𑌯𑍋𑌗𑌵𑌿𑌧𑌾𑌸𑍁 𑌤𑍇𑌽𑌪𑍍𑌰𑌸𑌕𑍍𑌤𑌃 ।
𑌮𑌨𑌸𑌾𑌕𑍃𑌤𑌿𑌮𑍀𑌶𑍍𑌵𑌰𑌸𑍍𑌯 𑌸𑍇𑌵𑍇
𑌶𑌿𑌰𑌸𑌾 𑌚𑍈𑌵 𑌸𑌦𑌾𑌶𑌿𑌵𑌂 𑌨𑌮𑌾𑌮𑌿 ॥ 𑍯0 ॥

𑌆𑌦𑍍𑌯𑌾𑌵𑌿𑌦𑍍𑌯𑌾 𑌹𑍃𑌦𑍍𑌗𑌤𑌾 𑌨𑌿𑌰𑍍𑌗𑌤𑌾𑌸𑍀-
-𑌦𑍍𑌵𑌿𑌦𑍍𑌯𑌾 𑌹𑍃𑌦𑍍𑌯𑌾 𑌹𑍃𑌦𑍍𑌗𑌤𑌾 𑌤𑍍𑌵𑌤𑍍𑌪𑍍𑌰𑌸𑌾𑌦𑌾𑌤𑍍 ।
𑌸𑍇𑌵𑍇 𑌨𑌿𑌤𑍍𑌯𑌂 𑌶𑍍𑌰𑍀𑌕𑌰𑌂 𑌤𑍍𑌵𑌤𑍍𑌪𑌦𑌾𑌬𑍍𑌜𑌂
𑌭𑌾𑌵𑍇 𑌮𑍁𑌕𑍍𑌤𑍇𑌰𑍍𑌭𑌾𑌜𑌨𑌂 𑌰𑌾𑌜𑌮𑍌𑌳𑍇 ॥ 𑍯1 ॥

𑌦𑍂𑌰𑍀𑌕𑍃𑌤𑌾𑌨𑌿 𑌦𑍁𑌰𑌿𑌤𑌾𑌨𑌿 𑌦𑍁𑌰𑌕𑍍𑌷𑌰𑌾𑌣𑌿
𑌦𑍌𑌰𑍍𑌭𑌾𑌗𑍍𑌯𑌦𑍁𑌃𑌖𑌦𑍁𑌰𑌹𑌂𑌕𑍃𑌤𑌿𑌦𑍁𑌰𑍍𑌵𑌚𑌾𑌂𑌸𑌿 ।
𑌸𑌾𑌰𑌂 𑌤𑍍𑌵𑌦𑍀𑌯𑌚𑌰𑌿𑌤𑌂 𑌨𑌿𑌤𑌰𑌾𑌂 𑌪𑌿𑌬𑌂𑌤𑌂
𑌗𑍌𑌰𑍀𑌶 𑌮𑌾𑌮𑌿𑌹 𑌸𑌮𑍁𑌦𑍍𑌧𑌰 𑌸𑌤𑍍𑌕𑌟𑌾𑌕𑍍𑌷𑍈𑌃 ॥ 𑍯2 ॥

𑌸𑍋𑌮𑌕𑌳𑌾𑌧𑌰𑌮𑍌𑌳𑍌
𑌕𑍋𑌮𑌲𑌘𑌨𑌕𑌂𑌧𑌰𑍇 𑌮𑌹𑌾𑌮𑌹𑌸𑌿 ।
𑌸𑍍𑌵𑌾𑌮𑌿𑌨𑌿 𑌗𑌿𑌰𑌿𑌜𑌾𑌨𑌾𑌥𑍇
𑌮𑌾𑌮𑌕𑌹𑍃𑌦𑌯𑌂 𑌨𑌿𑌰𑌂𑌤𑌰𑌂 𑌰𑌮𑌤𑌾𑌮𑍍 ॥ 𑍯3 ॥

𑌸𑌾 𑌰𑌸𑌨𑌾 𑌤𑍇 𑌨𑌯𑌨𑍇
𑌤𑌾𑌵𑍇𑌵 𑌕𑌰𑍌 𑌸 𑌏𑌵 𑌕𑍃𑌤𑌕𑍃𑌤𑍍𑌯𑌃 ।
𑌯𑌾 𑌯𑍇 𑌯𑍌 𑌯𑍋 𑌭𑌰𑍍𑌗𑌂
𑌵𑌦𑌤𑍀𑌕𑍍𑌷𑍇𑌤𑍇 𑌸𑌦𑌾𑌰𑍍𑌚𑌤𑌃 𑌸𑍍𑌮𑌰𑌤𑌿 ॥ 𑍯4 ॥

𑌅𑌤𑌿𑌮𑍃𑌦𑍁𑌲𑍌 𑌮𑌮 𑌚𑌰𑌣𑌾-
-𑌵𑌤𑌿𑌕𑌠𑌿𑌨𑌂 𑌤𑍇 𑌮𑌨𑍋 𑌭𑌵𑌾𑌨𑍀𑌶 ।
𑌇𑌤𑌿 𑌵𑌿𑌚𑌿𑌕𑌿𑌤𑍍𑌸𑌾𑌂 𑌸𑌂𑌤𑍍𑌯𑌜
𑌶𑌿𑌵 𑌕𑌥𑌮𑌾𑌸𑍀𑌦𑍍𑌗𑌿𑌰𑍌 𑌤𑌥𑌾 𑌵𑍇𑌶𑌃 ॥ 𑍯5 ॥

𑌧𑍈𑌰𑍍𑌯𑌾𑌂𑌕𑍁𑌶𑍇𑌨 𑌨𑌿𑌭𑍃𑌤𑌂
𑌰𑌭𑌸𑌾𑌦𑌾𑌕𑍃𑌷𑍍𑌯 𑌭𑌕𑍍𑌤𑌿𑌶𑍃𑌂𑌖𑌲𑌯𑌾 ।
𑌪𑍁𑌰𑌹𑌰 𑌚𑌰𑌣𑌾𑌲𑌾𑌨𑍇
𑌹𑍃𑌦𑌯𑌮𑌦𑍇𑌭𑌂 𑌬𑌧𑌾𑌨 𑌚𑌿𑌦𑍍𑌯𑌂𑌤𑍍𑌰𑍈𑌃 ॥ 𑍯6 ॥

𑌪𑍍𑌰𑌚𑌰𑌤𑍍𑌯𑌭𑌿𑌤𑌃 𑌪𑍍𑌰𑌗𑌲𑍍𑌭𑌵𑍃𑌤𑍍𑌤𑍍𑌯𑌾
𑌮𑌦𑌵𑌾𑌨𑍇𑌷 𑌮𑌨𑌃 𑌕𑌰𑍀 𑌗𑌰𑍀𑌯𑌾𑌨𑍍 ।
𑌰𑌿𑌗𑍃𑌹𑍍𑌯 𑌨𑌯𑍇𑌨 𑌭𑌕𑍍𑌤𑌿𑌰𑌜𑍍𑌵𑌾
𑌪𑌰𑌮 𑌸𑍍𑌥𑌾𑌣𑍁 𑌪𑌦𑌂 𑌦𑍃𑌢𑌂 𑌨𑌯𑌾𑌮𑍁𑌮𑍍 ॥ 𑍯𑍭 ॥
𑌸𑌰𑍍𑌵𑌾𑌲𑌂𑌕𑌾𑌰𑌯𑍁𑌕𑍍𑌤𑌾𑌂 𑌸𑌰𑌳𑌪𑌦𑌯𑍁𑌤𑌾𑌂 𑌸𑌾𑌧𑍁𑌵𑍃𑌤𑍍𑌤𑌾𑌂 𑌸𑍁𑌵𑌰𑍍𑌣𑌾𑌂
𑌸𑌦𑍍𑌭𑌿𑌃 𑌸𑌂𑌸𑍍𑌤𑍂𑌯𑌮𑌾𑌨𑌾𑌂 𑌸𑌰𑌸𑌗𑍁𑌣𑌯𑍁𑌤𑌾𑌂 𑌲𑌕𑍍𑌷𑌿𑌤𑌾𑌂 𑌲𑌕𑍍𑌷𑌣𑌾𑌢𑍍𑌯𑌾𑌮𑍍 ।
𑌉𑌦𑍍𑌯𑌦𑍍𑌭𑍂𑌷𑌾𑌵𑌿𑌶𑍇𑌷𑌾𑌮𑍁𑌪𑌗𑌤𑌵𑌿𑌨𑌯𑌾𑌂 𑌦𑍍𑌯𑍋𑌤𑌮𑌾𑌨𑌾𑌰𑍍𑌥𑌰𑍇𑌖𑌾𑌂
𑌕𑌲𑍍𑌯𑌾𑌣𑍀𑌂 𑌦𑍇𑌵 𑌗𑍌𑌰𑍀𑌪𑍍𑌰𑌿𑌯 𑌮𑌮 𑌕𑌵𑌿𑌤𑌾𑌕𑌨𑍍𑌯𑌕𑌾𑌂 𑌤𑍍𑌵𑌂 𑌗𑍃𑌹𑌾𑌣 ॥ 𑍯𑍮 ॥

𑌇𑌦𑌂 𑌤𑍇 𑌯𑍁𑌕𑍍𑌤𑌂 𑌵𑌾 𑌪𑌰𑌮𑌶𑌿𑌵 𑌕𑌾𑌰𑍁𑌣𑍍𑌯𑌜𑌲𑌧𑍇
𑌗𑌤𑍌 𑌤𑌿𑌰𑍍𑌯𑌗𑍍𑌰𑍂𑌪𑌂 𑌤𑌵 𑌪𑌦𑌶𑌿𑌰𑍋𑌦𑌰𑍍𑌶𑌨𑌧𑌿𑌯𑌾 ।
𑌹𑌰𑌿𑌬𑍍𑌰𑌹𑍍𑌮𑌾𑌣𑍌 𑌤𑍌 𑌦𑌿𑌵𑌿 𑌭𑍁𑌵𑌿 𑌚𑌰𑌂𑌤𑍌 𑌶𑍍𑌰𑌮𑌯𑍁𑌤𑍌
𑌕𑌥𑌂 𑌶𑌂𑌭𑍋 𑌸𑍍𑌵𑌾𑌮𑌿𑌨𑍍𑌕𑌥𑌯 𑌮𑌮 𑌵𑍇𑌦𑍍𑌯𑍋𑌽𑌸𑌿 𑌪𑍁𑌰𑌤𑌃 ॥ 𑍯𑍯 ॥

𑌸𑍍𑌤𑍋𑌤𑍍𑌰𑍇𑌣𑌾𑌲𑌮𑌹𑌂 𑌪𑍍𑌰𑌵𑌚𑍍𑌮𑌿 𑌨 𑌮𑍃𑌷𑌾 𑌦𑍇𑌵𑌾 𑌵𑌿𑌰𑌿𑌂𑌚𑌾𑌦𑌯𑌃
𑌸𑍍𑌤𑍁𑌤𑍍𑌯𑌾𑌨𑌾𑌂 𑌗𑌣𑌨𑌾𑌪𑍍𑌰𑌸𑌂𑌗𑌸𑌮𑌯𑍇 𑌤𑍍𑌵𑌾𑌮𑌗𑍍𑌰𑌗𑌣𑍍𑌯𑌂 𑌵𑌿𑌦𑍁𑌃 ।
𑌮𑌾𑌹𑌾𑌤𑍍𑌮𑍍𑌯𑌾𑌗𑍍𑌰𑌵𑌿𑌚𑌾𑌰𑌣𑌪𑍍𑌰𑌕𑌰𑌣𑍇 𑌧𑌾𑌨𑌾𑌤𑍁𑌷𑌸𑍍𑌤𑍋𑌮𑌵-
-𑌦𑍍𑌧𑍂𑌤𑌾𑌸𑍍𑌤𑍍𑌵𑌾𑌂 𑌵𑌿𑌦𑍁𑌰𑍁𑌤𑍍𑌤𑌮𑍋𑌤𑍍𑌤𑌮𑌫𑌲𑌂 𑌶𑌂𑌭𑍋 𑌭𑌵𑌤𑍍𑌸𑍇𑌵𑌕𑌾𑌃 ॥ 100 ॥

𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯 𑌶𑍍𑌰𑍀𑌗𑍋𑌵𑌿𑌂𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯 𑌶𑍍𑌰𑍀𑌮𑌚𑍍𑌛𑌂𑌕𑌰𑌭𑌗𑌵𑌤𑌃 𑌕𑍃𑌤𑍌 𑌶𑌿𑌵𑌾𑌨𑌂𑌦𑌲𑌹𑌰𑍀 ॥