𑌧𑍍𑌯𑌾𑌨𑌮𑍍 ।
𑌤𑍍𑌰𑌿𑌨𑍇𑌤𑍍𑌰𑌂 𑌗𑌜𑌾𑌸𑍍𑌯𑌂 𑌚𑌤𑍁𑌰𑍍𑌬𑌾𑌹𑍁𑌧𑌾𑌰𑌂
𑌪𑌰𑌶𑍍𑌵𑌾𑌦𑌿𑌶𑌸𑍍𑌤𑍍𑌰𑍈𑌰𑍍𑌯𑍁𑌤𑌂 𑌭𑌾𑌲𑌚𑌂𑌦𑍍𑌰𑌮𑍍 ।
𑌨𑌰𑌾𑌕𑌾𑌰𑌦𑍇𑌹𑌂 𑌸𑌦𑌾 𑌯𑍋𑌗𑌶𑌾𑌂𑌤𑌂
𑌗𑌣𑍇𑌶𑌂 𑌭𑌜𑍇 𑌸𑌰𑍍𑌵𑌵𑌂𑌦𑍍𑌯𑌂 𑌪𑌰𑍇𑌶𑌮𑍍 ॥ 1 ॥

𑌬𑌿𑌂𑌦𑍁𑌰𑍂𑌪𑍋 𑌵𑌕𑍍𑌰𑌤𑍁𑌂𑌡𑍋 𑌰𑌕𑍍𑌷𑌤𑍁 𑌮𑍇 𑌹𑍃𑌦𑌿 𑌸𑍍𑌥𑌿𑌤𑌃 ।
𑌦𑍇𑌹𑌾𑌂𑌶𑍍𑌚𑌤𑍁𑌰𑍍𑌵𑌿𑌧𑌾𑌂𑌸𑍍𑌤𑌤𑍍𑌤𑍍𑌵𑌾𑌂𑌸𑍍𑌤𑌤𑍍𑌤𑍍𑌵𑌾𑌧𑌾𑌰𑌃 𑌸𑌨𑌾𑌤𑌨𑌃 ॥ 2 ॥

𑌦𑍇𑌹𑌮𑍋𑌹𑌯𑍁𑌤𑌂 𑌹𑍍𑌯𑍇𑌕𑌦𑌂𑌤𑌃 𑌸𑍋𑌽𑌹𑌂 𑌸𑍍𑌵𑌰𑍂𑌪𑌧𑍃𑌕𑍍 ।
𑌦𑍇𑌹𑌿𑌨𑌂 𑌮𑌾𑌂 𑌵𑌿𑌶𑍇𑌷𑍇𑌣 𑌰𑌕𑍍𑌷𑌤𑍁 𑌭𑍍𑌰𑌮𑌨𑌾𑌶𑌕𑌃 ॥ 3 ॥

𑌮𑌹𑍋𑌦𑌰𑌸𑍍𑌤𑌥𑌾 𑌦𑍇𑌵𑍋 𑌨𑌾𑌨𑌾𑌬𑍋𑌧𑌾𑌨𑍍 𑌪𑍍𑌰𑌤𑌾𑌪𑌵𑌾𑌨𑍍 ।
𑌸𑌦𑌾 𑌰𑌕𑍍𑌷𑌤𑍁 𑌮𑍇 𑌬𑍋𑌧𑌾𑌨𑌂𑌦𑌸𑌂𑌸𑍍𑌥𑍋 𑌹𑍍𑌯𑌹𑌰𑍍𑌨𑌿𑌶𑌮𑍍 ॥ 4 ॥

𑌸𑌾𑌂𑌖𑍍𑌯𑌾𑌨𑍍 𑌰𑌕𑍍𑌷𑌤𑍁 𑌸𑌾𑌂𑌖𑍍𑌯𑍇𑌶𑍋 𑌗𑌜𑌾𑌨𑌨𑌃 𑌸𑍁𑌸𑌿𑌦𑍍𑌧𑌿𑌦𑌃 ।
𑌅𑌸𑌤𑍍𑌯𑍇𑌷𑍁 𑌸𑍍𑌥𑌿𑌤𑌂 𑌮𑌾𑌂 𑌸 𑌲𑌂𑌬𑍋𑌦𑌰𑌶𑍍𑌚 𑌰𑌕𑍍𑌷𑌤𑍁 ॥ 5 ॥

𑌸𑌤𑍍𑌸𑍁 𑌸𑍍𑌥𑌿𑌤𑌂 𑌸𑍁𑌮𑍋𑌹𑍇𑌨 𑌵𑌿𑌕𑌟𑍋 𑌮𑌾𑌂 𑌪𑌰𑌾𑌤𑍍𑌪𑌰𑌃 ।
𑌰𑌕𑍍𑌷𑌤𑍁 𑌭𑌕𑍍𑌤𑌵𑌾𑌤𑍍𑌸𑌲𑍍𑌯𑌾𑌤𑍍 𑌸𑌦𑍈𑌕𑌾𑌮𑍃𑌤𑌧𑌾𑌰𑌕𑌃 ॥ 6 ॥

𑌆𑌨𑌂𑌦𑍇𑌷𑍁 𑌸𑍍𑌥𑌿𑌤𑌂 𑌨𑌿𑌤𑍍𑌯𑌂 𑌮𑌾𑌂 𑌰𑌕𑍍𑌷𑌤𑍁 𑌸𑌮𑌾𑌤𑍍𑌮𑌕𑌃 ।
𑌵𑌿𑌘𑍍𑌨𑌰𑌾𑌜𑍋 𑌮𑌹𑌾𑌵𑌿𑌘𑍍𑌨𑍈𑌰𑍍𑌨𑌾𑌨𑌾𑌖𑍇𑌲𑌕𑌰𑌃 𑌪𑍍𑌰𑌭𑍁𑌃 ॥ 𑍭 ॥

𑌅𑌵𑍍𑌯𑌕𑍍𑌤𑍇𑌷𑍁 𑌸𑍍𑌥𑌿𑌤𑌂 𑌨𑌿𑌤𑍍𑌯𑌂 𑌧𑍂𑌮𑍍𑌰𑌵𑌰𑍍𑌣𑌃 𑌸𑍍𑌵𑌰𑍂𑌪𑌧𑍃𑌕𑍍 ।
𑌮𑌾𑌂 𑌰𑌕𑍍𑌷𑌤𑍁 𑌸𑍁𑌖𑌾𑌕𑌾𑌰𑌃 𑌸𑌹𑌜𑌃 𑌸𑌰𑍍𑌵𑌪𑍂𑌜𑌿𑌤𑌃 ॥ 𑍮 ॥

𑌸𑍍𑌵𑌸𑌂𑌵𑍇𑌦𑍍𑌯𑍇𑌷𑍁 𑌸𑌂𑌸𑍍𑌥𑌂 𑌮𑌾𑌂 𑌗𑌣𑍇𑌶𑌃 𑌸𑍍𑌵𑌸𑍍𑌵𑌰𑍂𑌪𑌧𑍃𑌕𑍍 ।
𑌰𑌕𑍍𑌷𑌤𑍁 𑌯𑍋𑌗𑌭𑌾𑌵𑍇𑌨 𑌸𑌂𑌸𑍍𑌥𑌿𑌤𑍋 𑌭𑌵𑌨𑌾𑌯𑌕𑌃 ॥ 𑍯 ॥

𑌅𑌯𑍋𑌗𑍇𑌷𑍁 𑌸𑍍𑌥𑌿𑌤𑌂 𑌨𑌿𑌤𑍍𑌯𑌂 𑌮𑌾𑌂 𑌰𑌕𑍍𑌷𑌤𑍁 𑌗𑌣𑍇𑌶𑍍𑌵𑌰𑌃 ।
𑌨𑌿𑌵𑍃𑌤𑍍𑌤𑌿𑌰𑍂𑌪𑌧𑍃𑌕𑍍 𑌸𑌾𑌕𑍍𑌷𑌾𑌦𑌸𑌮𑌾𑌧𑌿𑌸𑍁𑌖𑍇 𑌰𑌤𑌃 ॥ 10 ॥

𑌯𑍋𑌗𑌶𑌾𑌂𑌤𑌿𑌧𑌰𑍋 𑌮𑌾𑌂 𑌤𑍁 𑌰𑌕𑍍𑌷𑌤𑍁 𑌯𑍋𑌗𑌸𑌂𑌸𑍍𑌥𑌿𑌤𑌮𑍍 ।
𑌗𑌣𑌾𑌧𑍀𑌶𑌃 𑌪𑍍𑌰𑌸𑌨𑍍𑌨𑌾𑌤𑍍𑌮𑌾 𑌸𑌿𑌦𑍍𑌧𑌿𑌬𑍁𑌦𑍍𑌧𑌿𑌸𑌮𑌨𑍍𑌵𑌿𑌤𑌃 ॥ 11 ॥

𑌪𑍁𑌰𑍋 𑌮𑌾𑌂 𑌗𑌜𑌕𑌰𑍍𑌣𑌶𑍍𑌚 𑌰𑌕𑍍𑌷𑌤𑍁 𑌵𑌿𑌘𑍍𑌨𑌹𑌾𑌰𑌕𑌃 ।
𑌵𑌾𑌹𑍍𑌨𑍍𑌯𑌾𑌂 𑌯𑌾𑌮𑍍𑌯𑌾𑌂 𑌚 𑌨𑍈𑌰𑍃𑌤𑍍𑌯𑌾𑌂 𑌚𑌿𑌂𑌤𑌾𑌮𑌣𑌿𑌰𑍍𑌵𑌰𑌪𑍍𑌰𑌦𑌃 ॥ 12 ॥

𑌰𑌕𑍍𑌷𑌤𑍁 𑌪𑌶𑍍𑌚𑌿𑌮𑍇 𑌢𑍁𑌂𑌢𑌿𑌰𑍍𑌹𑍇𑌰𑌂𑌬𑍋 𑌵𑌾𑌯𑍁𑌦𑌿𑌕𑍍 𑌸𑍍𑌥𑌿𑌤𑌮𑍍 ।
𑌵𑌿𑌨𑌾𑌯𑌕𑌶𑍍𑌚𑍋𑌤𑍍𑌤𑌰𑍇 𑌤𑍁 𑌪𑍍𑌰𑌮𑍋𑌦𑌶𑍍𑌚𑍇𑌶𑌦𑌿𑌕𑍍 𑌸𑍍𑌥𑌿𑌤𑌮𑍍 ॥ 13 ॥

𑌊𑌰𑍍𑌧𑍍𑌵𑌂 𑌸𑌿𑌦𑍍𑌧𑌿𑌪𑌤𑌿𑌃 𑌪𑌾𑌤𑍁 𑌬𑍁𑌦𑍍𑌧𑍀𑌶𑍋𑌽𑌧𑌃 𑌸𑍍𑌥𑌿𑌤𑌂 𑌸𑌦𑌾 ।
𑌸𑌰𑍍𑌵𑌾𑌂𑌗𑍇𑌷𑍁 𑌮𑌯𑍂𑌰𑍇𑌶𑌃 𑌪𑌾𑌤𑍁 𑌮𑌾𑌂 𑌭𑌕𑍍𑌤𑌿𑌲𑌾𑌲𑌸𑌃 ॥ 14 ॥

𑌯𑌤𑍍𑌰 𑌤𑌤𑍍𑌰 𑌸𑍍𑌥𑌿𑌤𑌂 𑌮𑌾𑌂 𑌤𑍁 𑌸𑌦𑌾 𑌰𑌕𑍍𑌷𑌤𑍁 𑌯𑍋𑌗𑌪𑌃 ।
𑌪𑍁𑌰𑌶𑍁𑌪𑌾𑌶𑌸𑌂𑌯𑍁𑌕𑍍𑌤𑍋 𑌵𑌰𑌦𑌾𑌭𑌯𑌧𑌾𑌰𑌕𑌃 ॥ 15 ॥

𑌇𑌦𑌂 𑌗𑌣𑌪𑌤𑍇𑌃 𑌪𑍍𑌰𑍋𑌕𑍍𑌤𑌂 𑌵𑌜𑍍𑌰𑌪𑌂𑌜𑌰𑌕𑌂 𑌪𑌰𑌮𑍍 ।
𑌧𑌾𑌰𑌯𑌸𑍍𑌵 𑌮𑌹𑌾𑌦𑍇𑌵 𑌵𑌿𑌜𑌯𑍀 𑌤𑍍𑌵𑌂 𑌭𑌵𑌿𑌷𑍍𑌯𑌸𑌿 ॥ 16 ॥

𑌯 𑌇𑌦𑌂 𑌪𑌂𑌜𑌰𑌂 𑌧𑍃𑌤𑍍𑌵𑌾 𑌯𑌤𑍍𑌰 𑌕𑍁𑌤𑍍𑌰 𑌸𑍍𑌥𑌿𑌤𑍋 𑌭𑌵𑍇𑌤𑍍 ।
𑌨 𑌤𑌸𑍍𑌯 𑌜𑌾𑌯𑌤𑍇 𑌕𑍍𑌵𑌾𑌪𑌿 𑌭𑌯𑌂 𑌨𑌾𑌨𑌾𑌸𑍍𑌵𑌭𑌾𑌵𑌜𑌮𑍍 ॥ 1𑍭 ॥

𑌯𑌃 𑌪𑌠𑍇𑌤𑍍 𑌪𑌂𑌜𑌰𑌂 𑌨𑌿𑌤𑍍𑌯𑌂 𑌸 𑌈𑌪𑍍𑌸𑌿𑌤𑌮𑌵𑌾𑌪𑍍𑌨𑍁𑌯𑌾𑌤𑍍 ।
𑌵𑌜𑍍𑌰𑌸𑌾𑌰𑌤𑌨𑍁𑌰𑍍𑌭𑍂𑌤𑍍𑌵𑌾 𑌚𑌰𑍇𑌤𑍍𑌸𑌰𑍍𑌵𑌤𑍍𑌰 𑌮𑌾𑌨𑌵𑌃 ॥ 1𑍮 ॥

𑌤𑍍𑌰𑌿𑌕𑌾𑌲𑌂 𑌯𑌃 𑌪𑌠𑍇𑌨𑍍𑌨𑌿𑌤𑍍𑌯𑌂 𑌸 𑌗𑌣𑍇𑌶 𑌇𑌵𑌾𑌪𑌰𑌃 ।
𑌨𑌿𑌰𑍍𑌵𑌿𑌘𑍍𑌨𑌃 𑌸𑌰𑍍𑌵𑌕𑌾𑌰𑍍𑌯𑍇𑌷𑍁 𑌬𑍍𑌰𑌹𑍍𑌮𑌭𑍂𑌤𑍋 𑌭𑌵𑍇𑌨𑍍𑌨𑌰𑌃 ॥ 1𑍯 ॥

𑌯𑌃 𑌶𑍃𑌣𑍋𑌤𑌿 𑌗𑌣𑍇𑌶𑌸𑍍𑌯 𑌪𑌂𑌜𑌰𑌂 𑌵𑌜𑍍𑌰𑌸𑌂𑌜𑍍𑌞𑌕𑌮𑍍 ।
𑌆𑌰𑍋𑌗𑍍𑌯𑌾𑌦𑌿𑌸𑌮𑌾𑌯𑍁𑌕𑍍𑌤𑍋 𑌭𑌵𑌤𑍇 𑌗𑌣𑌪𑌪𑍍𑌰𑌿𑌯𑌃 ॥ 20 ॥

𑌧𑌨𑌂 𑌧𑌾𑌨𑍍𑌯𑌂 𑌪𑌶𑍂𑌨𑍍 𑌵𑌿𑌦𑍍𑌯𑌾𑌮𑌾𑌯𑍁𑌷𑍍𑌯𑌂 𑌪𑍁𑌤𑍍𑌰𑌪𑍌𑌤𑍍𑌰𑌕𑌮𑍍 ।
𑌸𑌰𑍍𑌵𑌸𑌂𑌪𑌤𑍍𑌸𑌮𑌾𑌯𑍁𑌕𑍍𑌤𑌮𑍈𑌶𑍍𑌵𑌰𑍍𑌯𑌂 𑌪𑌠𑌨𑌾𑌲𑍍𑌲𑌭𑍇𑌤𑍍 ॥ 21 ॥

𑌨 𑌭𑌯𑌂 𑌤𑌸𑍍𑌯 𑌵𑌜𑍍𑌰𑌾𑌤𑍍𑌤𑍁 𑌚𑌕𑍍𑌰𑌾𑌚𑍍𑌛𑍂𑌲𑌾𑌦𑍍𑌭𑌵𑍇𑌤𑍍 𑌕𑌦𑌾 ।
𑌶𑌂𑌕𑌰𑌾𑌦𑍇𑌰𑍍𑌮𑌹𑌾𑌦𑍇𑌵 𑌪𑌠𑌨𑌾𑌦𑌸𑍍𑌯 𑌨𑌿𑌤𑍍𑌯𑌶𑌃 ॥ 22 ॥

𑌯𑌂 𑌯𑌂 𑌚𑌿𑌂𑌤𑌯𑌤𑍇 𑌮𑌰𑍍𑌤𑍍𑌯𑌸𑍍𑌤𑌂 𑌤𑌂 𑌪𑍍𑌰𑌾𑌪𑍍𑌨𑍋𑌤𑌿 𑌶𑌾𑌶𑍍𑌵𑌤𑌮𑍍 ।
𑌪𑌠𑌨𑌾𑌦𑌸𑍍𑌯 𑌵𑌿𑌘𑍍𑌨𑍇𑌶 𑌪𑌂𑌜𑌰𑌸𑍍𑌯 𑌨𑌿𑌰𑌂𑌤𑌰𑌮𑍍 ॥ 23 ॥

𑌲𑌕𑍍𑌷𑌾𑌵𑍃𑌤𑍍𑌤𑌿𑌭𑌿𑌰𑍇𑌵𑌂 𑌸 𑌸𑌿𑌦𑍍𑌧𑌪𑌂𑌜𑌰𑌕𑍋 𑌭𑌵𑍇𑌤𑍍 ।
𑌸𑍍𑌤𑌂𑌭𑌯𑍇𑌦𑌪𑌿 𑌸𑍂𑌰𑍍𑌯𑌂 𑌤𑍁 𑌬𑍍𑌰𑌹𑍍𑌮𑌾𑌂𑌡𑌂 𑌵𑌶𑌮𑌾𑌨𑌯𑍇𑌤𑍍 ॥ 24 ॥

𑌏𑌵𑌮𑍁𑌕𑍍𑌤𑍍𑌵𑌾 𑌗𑌣𑍇𑌶𑌾𑌨𑍋𑌽𑌂𑌤𑌰𑍍𑌦𑌧𑍇 𑌮𑍁𑌨𑌿𑌸𑌤𑍍𑌤𑌮 ।
𑌶𑌿𑌵𑍋 𑌦𑍇𑌵𑌾𑌦𑌿𑌭𑌿𑌰𑍍𑌯𑍁𑌕𑍍𑌤𑍋 𑌹𑌰𑍍𑌷𑌿𑌤𑌃 𑌸𑌂𑌬𑌭𑍂𑌵 𑌹 ॥ 25 ॥

𑌇𑌤𑌿 𑌶𑍍𑌰𑍀𑌮𑌨𑍍𑌮𑍁𑌦𑍍𑌗𑌲𑍇 𑌮𑌹𑌾𑌪𑍁𑌰𑌾𑌣𑍇 𑌧𑍂𑌮𑍍𑌰𑌵𑌰𑍍𑌣𑌚𑌰𑌿𑌤𑍇 𑌵𑌜𑍍𑌰𑌪𑌂𑌜𑌰𑌕𑌥𑌨𑌂 𑌨𑌾𑌮 𑌤𑍍𑌰𑌯𑍋𑌵𑌿𑌂𑌶𑍋𑌽𑌧𑍍𑌯𑌾𑌯𑌃 ।