𑌓𑌂 𑌨𑌮𑌶𑍍𑌚𑌂𑌡𑌿𑌕𑌾𑌯𑍈
𑌨𑍍𑌯𑌾𑌸𑌃
𑌅𑌸𑍍𑌯 𑌶𑍍𑌰𑍀 𑌚𑌂𑌡𑍀 𑌕𑌵𑌚𑌸𑍍𑌯 । 𑌬𑍍𑌰𑌹𑍍𑌮𑌾 𑌋𑌷𑌿𑌃 । 𑌅𑌨𑍁𑌷𑍍𑌟𑍁𑌪𑍍 𑌛𑌂𑌦𑌃 ।
𑌚𑌾𑌮𑍁𑌂𑌡𑌾 𑌦𑍇𑌵𑌤𑌾 । 𑌅𑌂𑌗𑌨𑍍𑌯𑌾𑌸𑍋𑌕𑍍𑌤 𑌮𑌾𑌤𑌰𑍋 𑌬𑍀𑌜𑌮𑍍 । 𑌨𑌵𑌾𑌵𑌰𑌣𑍋 𑌮𑌂𑌤𑍍𑌰𑌶𑌕𑍍𑌤𑌿𑌃 । 𑌦𑌿𑌗𑍍𑌬𑌂𑌧 𑌦𑍇𑌵𑌤𑌾𑌃 𑌤𑌤𑍍𑌵𑌮𑍍 । 𑌶𑍍𑌰𑍀 𑌜𑌗𑌦𑌂𑌬𑌾 𑌪𑍍𑌰𑍀𑌤𑍍𑌯𑌰𑍍𑌥𑍇 𑌸𑌪𑍍𑌤𑌶𑌤𑍀 𑌪𑌾𑌠𑌾𑌂𑌗𑌤𑍍𑌵𑍇𑌨 𑌜𑌪𑍇 𑌵𑌿𑌨𑌿𑌯𑍋𑌗𑌃 ॥
𑌓𑌂 𑌨𑌮𑌶𑍍𑌚𑌂𑌡𑌿𑌕𑌾𑌯𑍈
𑌮𑌾𑌰𑍍𑌕𑌂𑌡𑍇𑌯 𑌉𑌵𑌾𑌚 ।
𑌓𑌂 𑌯𑌦𑍍𑌗𑍁𑌹𑍍𑌯𑌂 𑌪𑌰𑌮𑌂 𑌲𑍋𑌕𑍇 𑌸𑌰𑍍𑌵𑌰𑌕𑍍𑌷𑌾𑌕𑌰𑌂 𑌨𑍃𑌣𑌾𑌮𑍍 ।
𑌯𑌨𑍍𑌨 𑌕𑌸𑍍𑌯𑌚𑌿𑌦𑌾𑌖𑍍𑌯𑌾𑌤𑌂 𑌤𑌨𑍍𑌮𑍇 𑌬𑍍𑌰𑍂𑌹𑌿 𑌪𑌿𑌤𑌾𑌮𑌹 ॥ 1 ॥
𑌬𑍍𑌰𑌹𑍍𑌮𑍋𑌵𑌾𑌚 ।
𑌅𑌸𑍍𑌤𑌿 𑌗𑍁𑌹𑍍𑌯𑌤𑌮𑌂 𑌵𑌿𑌪𑍍𑌰 𑌸𑌰𑍍𑌵𑌭𑍂𑌤𑍋𑌪𑌕𑌾𑌰𑌕𑌮𑍍 ।
𑌦𑍇𑌵𑍍𑌯𑌾𑌸𑍍𑌤𑍁 𑌕𑌵𑌚𑌂 𑌪𑍁𑌣𑍍𑌯𑌂 𑌤𑌚𑍍𑌛𑍃𑌣𑍁𑌷𑍍𑌵 𑌮𑌹𑌾𑌮𑍁𑌨𑍇 ॥ 2 ॥
𑌪𑍍𑌰𑌥𑌮𑌂 𑌶𑍈𑌲𑌪𑍁𑌤𑍍𑌰𑍀 𑌚 𑌦𑍍𑌵𑌿𑌤𑍀𑌯𑌂 𑌬𑍍𑌰𑌹𑍍𑌮𑌚𑌾𑌰𑌿𑌣𑍀 ।
𑌤𑍃𑌤𑍀𑌯𑌂 𑌚𑌂𑌦𑍍𑌰𑌘𑌂𑌟𑍇𑌤𑌿 𑌕𑍂𑌷𑍍𑌮𑌾𑌂𑌡𑍇𑌤𑌿 𑌚𑌤𑍁𑌰𑍍𑌥𑌕𑌮𑍍 ॥ 3 ॥
𑌪𑌂𑌚𑌮𑌂 𑌸𑍍𑌕𑌂𑌦𑌮𑌾𑌤𑍇𑌤𑌿 𑌷𑌷𑍍𑌠𑌂 𑌕𑌾𑌤𑍍𑌯𑌾𑌯𑌨𑍀𑌤𑌿 𑌚 ।
𑌸𑌪𑍍𑌤𑌮𑌂 𑌕𑌾𑌲𑌰𑌾𑌤𑍍𑌰𑍀𑌤𑌿 𑌮𑌹𑌾𑌗𑍌𑌰𑍀𑌤𑌿 𑌚𑌾𑌷𑍍𑌟𑌮𑌮𑍍 ॥ 4 ॥
𑌨𑌵𑌮𑌂 𑌸𑌿𑌦𑍍𑌧𑌿𑌦𑌾𑌤𑍍𑌰𑍀 𑌚 𑌨𑌵𑌦𑍁𑌰𑍍𑌗𑌾𑌃 𑌪𑍍𑌰𑌕𑍀𑌰𑍍𑌤𑌿𑌤𑌾𑌃 ।
𑌉𑌕𑍍𑌤𑌾𑌨𑍍𑌯𑍇𑌤𑌾𑌨𑌿 𑌨𑌾𑌮𑌾𑌨𑌿 𑌬𑍍𑌰𑌹𑍍𑌮𑌣𑍈𑌵 𑌮𑌹𑌾𑌤𑍍𑌮𑌨𑌾 ॥ 5 ॥
𑌅𑌗𑍍𑌨𑌿𑌨𑌾 𑌦𑌹𑍍𑌯𑌮𑌾𑌨𑌸𑍍𑌤𑍁 𑌶𑌤𑍍𑌰𑍁𑌮𑌧𑍍𑌯𑍇 𑌗𑌤𑍋 𑌰𑌣𑍇 ।
𑌵𑌿𑌷𑌮𑍇 𑌦𑍁𑌰𑍍𑌗𑌮𑍇 𑌚𑍈𑌵 𑌭𑌯𑌾𑌰𑍍𑌤𑌾𑌃 𑌶𑌰𑌣𑌂 𑌗𑌤𑌾𑌃 ॥ 6 ॥
𑌨 𑌤𑍇𑌷𑌾𑌂 𑌜𑌾𑌯𑌤𑍇 𑌕𑌿𑌂𑌚𑌿𑌦𑌶𑍁𑌭𑌂 𑌰𑌣𑌸𑌂𑌕𑌟𑍇 ।
𑌨𑌾𑌪𑌦𑌂 𑌤𑌸𑍍𑌯 𑌪𑌶𑍍𑌯𑌾𑌮𑌿 𑌶𑍋𑌕𑌦𑍁𑌃𑌖𑌭𑌯𑌂 𑌨 𑌹𑌿 ॥ ॥
𑌯𑍈𑌸𑍍𑌤𑍁 𑌭𑌕𑍍𑌤𑍍𑌯𑌾 𑌸𑍍𑌮𑍃𑌤𑌾 𑌨𑍂𑌨𑌂 𑌤𑍇𑌷𑌾𑌂 𑌵𑍃𑌦𑍍𑌧𑌿𑌃 𑌪𑍍𑌰𑌜𑌾𑌯𑌤𑍇 ।
𑌯𑍇 𑌤𑍍𑌵𑌾𑌂 𑌸𑍍𑌮𑌰𑌂𑌤𑌿 𑌦𑍇𑌵𑍇𑌶𑌿 𑌰𑌕𑍍𑌷𑌸𑍇 𑌤𑌾𑌨𑍍𑌨𑌸𑌂𑌶𑌯𑌃 ॥ ॥
𑌪𑍍𑌰𑍇𑌤𑌸𑌂𑌸𑍍𑌥𑌾 𑌤𑍁 𑌚𑌾𑌮𑍁𑌂𑌡𑌾 𑌵𑌾𑌰𑌾𑌹𑍀 𑌮𑌹𑌿𑌷𑌾𑌸𑌨𑌾 ।
𑌐𑌂𑌦𑍍𑌰𑍀 𑌗𑌜𑌸𑌮𑌾𑌰𑍂𑌢𑌾 𑌵𑍈𑌷𑍍𑌣𑌵𑍀 𑌗𑌰𑍁𑌡𑌾𑌸𑌨𑌾 ॥ ॥
𑌮𑌾𑌹𑍇𑌶𑍍𑌵𑌰𑍀 𑌵𑍃𑌷𑌾𑌰𑍂𑌢𑌾 𑌕𑍌𑌮𑌾𑌰𑍀 𑌶𑌿𑌖𑌿𑌵𑌾𑌹𑌨𑌾 ।
𑌲𑌕𑍍𑌷𑍍𑌮𑍀𑌃 𑌪𑌦𑍍𑌮𑌾𑌸𑌨𑌾 𑌦𑍇𑌵𑍀 𑌪𑌦𑍍𑌮𑌹𑌸𑍍𑌤𑌾 𑌹𑌰𑌿𑌪𑍍𑌰𑌿𑌯𑌾 ॥ 10 ॥
𑌶𑍍𑌵𑍇𑌤𑌰𑍂𑌪𑌧𑌰𑌾 𑌦𑍇𑌵𑍀 𑌈𑌶𑍍𑌵𑌰𑍀 𑌵𑍃𑌷𑌵𑌾𑌹𑌨𑌾 ।
𑌬𑍍𑌰𑌾𑌹𑍍𑌮𑍀 𑌹𑌂𑌸𑌸𑌮𑌾𑌰𑍂𑌢𑌾 𑌸𑌰𑍍𑌵𑌾𑌭𑌰𑌣𑌭𑍂𑌷𑌿𑌤𑌾 ॥ 11 ॥
𑌇𑌤𑍍𑌯𑍇𑌤𑌾 𑌮𑌾𑌤𑌰𑌃 𑌸𑌰𑍍𑌵𑌾𑌃 𑌸𑌰𑍍𑌵𑌯𑍋𑌗𑌸𑌮𑌨𑍍𑌵𑌿𑌤𑌾𑌃 ।
𑌨𑌾𑌨𑌾𑌭𑌰𑌣𑌾𑌶𑍋𑌭𑌾𑌢𑍍𑌯𑌾 𑌨𑌾𑌨𑌾𑌰𑌤𑍍𑌨𑍋𑌪𑌶𑍋𑌭𑌿𑌤𑌾𑌃 ॥ 12 ॥
𑌦𑍃𑌶𑍍𑌯𑌂𑌤𑍇 𑌰𑌥𑌮𑌾𑌰𑍂𑌢𑌾 𑌦𑍇𑌵𑍍𑌯𑌃 𑌕𑍍𑌰𑍋𑌧𑌸𑌮𑌾𑌕𑍁𑌲𑌾𑌃 ।
𑌶𑌂𑌖𑌂 𑌚𑌕𑍍𑌰𑌂 𑌗𑌦𑌾𑌂 𑌶𑌕𑍍𑌤𑌿𑌂 𑌹𑌲𑌂 𑌚 𑌮𑍁𑌸𑌲𑌾𑌯𑍁𑌧𑌮𑍍 ॥ 13 ॥
𑌖𑍇𑌟𑌕𑌂 𑌤𑍋𑌮𑌰𑌂 𑌚𑍈𑌵 𑌪𑌰𑌶𑍁𑌂 𑌪𑌾𑌶𑌮𑍇𑌵 𑌚 ।
𑌕𑍁𑌂𑌤𑌾𑌯𑍁𑌧𑌂 𑌤𑍍𑌰𑌿𑌶𑍂𑌲𑌂 𑌚 𑌶𑌾𑌰𑍍𑌙𑍍𑌗𑌮𑌾𑌯𑍁𑌧𑌮𑍁𑌤𑍍𑌤𑌮𑌮𑍍 ॥ 14 ॥
𑌦𑍈𑌤𑍍𑌯𑌾𑌨𑌾𑌂 𑌦𑍇𑌹𑌨𑌾𑌶𑌾𑌯 𑌭𑌕𑍍𑌤𑌾𑌨𑌾𑌮𑌭𑌯𑌾𑌯 𑌚 ।
𑌧𑌾𑌰𑌯𑌂𑌤𑍍𑌯𑌾𑌯𑍁𑌧𑌾𑌨𑍀𑌤𑍍𑌥𑌂 𑌦𑍇𑌵𑌾𑌨𑌾𑌂 𑌚 𑌹𑌿𑌤𑌾𑌯 𑌵𑍈 ॥ 15 ॥
𑌨𑌮𑌸𑍍𑌤𑍇𑌽𑌸𑍍𑌤𑍁 𑌮𑌹𑌾𑌰𑍌𑌦𑍍𑌰𑍇 𑌮𑌹𑌾𑌘𑍋𑌰𑌪𑌰𑌾𑌕𑍍𑌰𑌮𑍇 ।
𑌮𑌹𑌾𑌬𑌲𑍇 𑌮𑌹𑍋𑌤𑍍𑌸𑌾𑌹𑍇 𑌮𑌹𑌾𑌭𑌯𑌵𑌿𑌨𑌾𑌶𑌿𑌨𑌿 ॥ 16 ॥
𑌤𑍍𑌰𑌾𑌹𑌿 𑌮𑌾𑌂 𑌦𑍇𑌵𑌿 𑌦𑍁𑌷𑍍𑌪𑍍𑌰𑍇𑌕𑍍𑌷𑍍𑌯𑍇 𑌶𑌤𑍍𑌰𑍂𑌣𑌾𑌂 𑌭𑌯𑌵𑌰𑍍𑌧𑌿𑌨𑌿 ।
𑌪𑍍𑌰𑌾𑌚𑍍𑌯𑌾𑌂 𑌰𑌕𑍍𑌷𑌤𑍁 𑌮𑌾𑌮𑍈𑌂𑌦𑍍𑌰𑍀 𑌆𑌗𑍍𑌨𑍇𑌯𑍍𑌯𑌾𑌮𑌗𑍍𑌨𑌿𑌦𑍇𑌵𑌤𑌾 ॥ 1 ॥
𑌦𑌕𑍍𑌷𑌿𑌣𑍇𑌽𑌵𑌤𑍁 𑌵𑌾𑌰𑌾𑌹𑍀 𑌨𑍈𑌰𑍃𑌤𑍍𑌯𑌾𑌂 𑌖𑌡𑍍𑌗𑌧𑌾𑌰𑌿𑌣𑍀 ।
𑌪𑍍𑌰𑌤𑍀𑌚𑍍𑌯𑌾𑌂 𑌵𑌾𑌰𑍁𑌣𑍀 𑌰𑌕𑍍𑌷𑍇𑌦𑍍𑌵𑌾𑌯𑌵𑍍𑌯𑌾𑌂 𑌮𑍃𑌗𑌵𑌾𑌹𑌿𑌨𑍀 ॥ 1 ॥
𑌉𑌦𑍀𑌚𑍍𑌯𑌾𑌂 𑌪𑌾𑌤𑍁 𑌕𑍌𑌮𑌾𑌰𑍀 𑌐𑌶𑌾𑌨𑍍𑌯𑌾𑌂 𑌶𑍂𑌲𑌧𑌾𑌰𑌿𑌣𑍀 ।
𑌊𑌰𑍍𑌧𑍍𑌵𑌂 𑌬𑍍𑌰𑌹𑍍𑌮𑌾𑌣𑍀 𑌮𑍇 𑌰𑌕𑍍𑌷𑍇𑌦𑌧𑌸𑍍𑌤𑌾𑌦𑍍𑌵𑍈𑌷𑍍𑌣𑌵𑍀 𑌤𑌥𑌾 ॥ 1 ॥
𑌏𑌵𑌂 𑌦𑌶 𑌦𑌿𑌶𑍋 𑌰𑌕𑍍𑌷𑍇𑌚𑍍𑌚𑌾𑌮𑍁𑌂𑌡𑌾 𑌶𑌵𑌵𑌾𑌹𑌨𑌾 ।
𑌜𑌯𑌾 𑌮𑍇 𑌚𑌾𑌗𑍍𑌰𑌤𑌃 𑌪𑌾𑌤𑍁 𑌵𑌿𑌜𑌯𑌾 𑌪𑌾𑌤𑍁 𑌪𑍃𑌷𑍍𑌠𑌤𑌃 ॥ 20 ॥
𑌅𑌜𑌿𑌤𑌾 𑌵𑌾𑌮𑌪𑌾𑌰𑍍𑌶𑍍𑌵𑍇 𑌤𑍁 𑌦𑌕𑍍𑌷𑌿𑌣𑍇 𑌚𑌾𑌪𑌰𑌾𑌜𑌿𑌤𑌾 ।
𑌶𑌿𑌖𑌾𑌮𑍁𑌦𑍍𑌯𑍋𑌤𑌿𑌨𑍀 𑌰𑌕𑍍𑌷𑍇𑌦𑍁𑌮𑌾 𑌮𑍂𑌰𑍍𑌧𑍍𑌨𑌿 𑌵𑍍𑌯𑌵𑌸𑍍𑌥𑌿𑌤𑌾 ॥ 21 ॥
𑌮𑌾𑌲𑌾𑌧𑌰𑍀 𑌲𑌲𑌾𑌟𑍇 𑌚 𑌭𑍍𑌰𑍁𑌵𑍌 𑌰𑌕𑍍𑌷𑍇𑌦𑍍𑌯𑌶𑌸𑍍𑌵𑌿𑌨𑍀 ।
𑌤𑍍𑌰𑌿𑌨𑍇𑌤𑍍𑌰𑌾 𑌚 𑌭𑍍𑌰𑍁𑌵𑍋𑌰𑍍𑌮𑌧𑍍𑌯𑍇 𑌯𑌮𑌘𑌂𑌟𑌾 𑌚 𑌨𑌾𑌸𑌿𑌕𑍇 ॥ 22 ॥
𑌶𑌂𑌖𑌿𑌨𑍀 𑌚𑌕𑍍𑌷𑍁𑌷𑍋𑌰𑍍𑌮𑌧𑍍𑌯𑍇 𑌶𑍍𑌰𑍋𑌤𑍍𑌰𑌯𑍋𑌰𑍍𑌦𑍍𑌵𑌾𑌰𑌵𑌾𑌸𑌿𑌨𑍀 ।
𑌕𑌪𑍋𑌲𑍌 𑌕𑌾𑌲𑌿𑌕𑌾 𑌰𑌕𑍍𑌷𑍇𑌤𑍍𑌕𑌰𑍍𑌣𑌮𑍂𑌲𑍇 𑌤𑍁 𑌶𑌾𑌂𑌕𑌰𑍀 ॥ 23 ॥
𑌨𑌾𑌸𑌿𑌕𑌾𑌯𑌾𑌂 𑌸𑍁𑌗𑌂𑌧𑌾 𑌚 𑌉𑌤𑍍𑌤𑌰𑍋𑌷𑍍𑌠𑍇 𑌚 𑌚𑌰𑍍𑌚𑌿𑌕𑌾 ।
𑌅𑌧𑌰𑍇 𑌚𑌾𑌮𑍃𑌤𑌕𑌲𑌾 𑌜𑌿𑌹𑍍𑌵𑌾𑌯𑌾𑌂 𑌚 𑌸𑌰𑌸𑍍𑌵𑌤𑍀 ॥ 24 ॥
𑌦𑌂𑌤𑌾𑌨𑍍 𑌰𑌕𑍍𑌷𑌤𑍁 𑌕𑍌𑌮𑌾𑌰𑍀 𑌕𑌂𑌠𑌦𑍇𑌶𑍇 𑌤𑍁 𑌚𑌂𑌡𑌿𑌕𑌾 ।
𑌘𑌂𑌟𑌿𑌕𑌾𑌂 𑌚𑌿𑌤𑍍𑌰𑌘𑌂𑌟𑌾 𑌚 𑌮𑌹𑌾𑌮𑌾𑌯𑌾 𑌚 𑌤𑌾𑌲𑍁𑌕𑍇 ॥ 25 ॥
𑌕𑌾𑌮𑌾𑌕𑍍𑌷𑍀 𑌚𑌿𑌬𑍁𑌕𑌂 𑌰𑌕𑍍𑌷𑍇𑌦𑍍𑌵𑌾𑌚𑌂 𑌮𑍇 𑌸𑌰𑍍𑌵𑌮𑌂𑌗𑌳𑌾 ।
𑌗𑍍𑌰𑍀𑌵𑌾𑌯𑌾𑌂 𑌭𑌦𑍍𑌰𑌕𑌾𑌳𑍀 𑌚 𑌪𑍃𑌷𑍍𑌠𑌵𑌂𑌶𑍇 𑌧𑌨𑍁𑌰𑍍𑌧𑌰𑍀 ॥ 26 ॥
𑌨𑍀𑌲𑌗𑍍𑌰𑍀𑌵𑌾 𑌬𑌹𑌿𑌃 𑌕𑌂𑌠𑍇 𑌨𑌲𑌿𑌕𑌾𑌂 𑌨𑌲𑌕𑍂𑌬𑌰𑍀 ।
𑌸𑍍𑌕𑌂𑌧𑌯𑍋𑌃 𑌖𑌡𑍍𑌗𑌿𑌨𑍀 𑌰𑌕𑍍𑌷𑍇𑌦𑍍𑌬𑌾𑌹𑍂 𑌮𑍇 𑌵𑌜𑍍𑌰𑌧𑌾𑌰𑌿𑌣𑍀 ॥ 2 ॥
𑌹𑌸𑍍𑌤𑌯𑍋𑌰𑍍𑌦𑌂𑌡𑌿𑌨𑍀 𑌰𑌕𑍍𑌷𑍇𑌦𑌂𑌬𑌿𑌕𑌾 𑌚𑌾𑌂𑌗𑍁𑌲𑍀𑌷𑍁 𑌚 ।
𑌨𑌖𑌾𑌂𑌛𑍂𑌲𑍇𑌶𑍍𑌵𑌰𑍀 𑌰𑌕𑍍𑌷𑍇𑌤𑍍𑌕𑍁𑌕𑍍𑌷𑍌 𑌰𑌕𑍍𑌷𑍇𑌤𑍍𑌕𑍁𑌲𑍇𑌶𑍍𑌵𑌰𑍀 ॥ 2 ॥
𑌸𑍍𑌤𑌨𑍌 𑌰𑌕𑍍𑌷𑍇𑌨𑍍𑌮𑌹𑌾𑌦𑍇𑌵𑍀 𑌮𑌨𑌃𑌶𑍋𑌕𑌵𑌿𑌨𑌾𑌶𑌿𑌨𑍀 ।
𑌹𑍃𑌦𑌯𑍇 𑌲𑌲𑌿𑌤𑌾 𑌦𑍇𑌵𑍀 𑌉𑌦𑌰𑍇 𑌶𑍂𑌲𑌧𑌾𑌰𑌿𑌣𑍀 ॥ 2 ॥
𑌨𑌾𑌭𑍌 𑌚 𑌕𑌾𑌮𑌿𑌨𑍀 𑌰𑌕𑍍𑌷𑍇𑌦𑍍𑌗𑍁𑌹𑍍𑌯𑌂 𑌗𑍁𑌹𑍍𑌯𑍇𑌶𑍍𑌵𑌰𑍀 𑌤𑌥𑌾 ।
𑌪𑍂𑌤𑌨𑌾 𑌕𑌾𑌮𑌿𑌕𑌾 𑌮𑍇𑌢𑍍𑌰𑌂 𑌗𑍁𑌦𑍇 𑌮𑌹𑌿𑌷𑌵𑌾𑌹𑌿𑌨𑍀 ॥ 30 ॥
𑌕𑌟𑍍𑌯𑌾𑌂 𑌭𑌗𑌵𑌤𑍀 𑌰𑌕𑍍𑌷𑍇𑌜𑍍𑌜𑌾𑌨𑍁𑌨𑍀 𑌵𑌿𑌂𑌧𑍍𑌯𑌵𑌾𑌸𑌿𑌨𑍀 ।
𑌜𑌂𑌘𑍇 𑌮𑌹𑌾𑌬𑌲𑌾 𑌰𑌕𑍍𑌷𑍇𑌤𑍍𑌸𑌰𑍍𑌵𑌕𑌾𑌮𑌪𑍍𑌰𑌦𑌾𑌯𑌿𑌨𑍀 ॥ 31 ॥
𑌗𑍁𑌲𑍍𑌫𑌯𑍋𑌰𑍍𑌨𑌾𑌰𑌸𑌿𑌂𑌹𑍀 𑌚 𑌪𑌾𑌦𑌪𑍃𑌷𑍍𑌠𑍇 𑌤𑍁 𑌤𑍈𑌜𑌸𑍀 ।
𑌪𑌾𑌦𑌾𑌂𑌗𑍁𑌲𑍀𑌷𑍁 𑌶𑍍𑌰𑍀 𑌰𑌕𑍍𑌷𑍇𑌤𑍍𑌪𑌾𑌦𑌾𑌧𑌸𑍍𑌤𑌲𑌵𑌾𑌸𑌿𑌨𑍀 ॥ 32 ॥
𑌨𑌖𑌾𑌨𑍍 𑌦𑌂𑌷𑍍𑌟𑍍𑌰𑌕𑌰𑌾𑌲𑍀 𑌚 𑌕𑍇𑌶𑌾𑌂𑌶𑍍𑌚𑍈𑌵𑍋𑌰𑍍𑌧𑍍𑌵𑌕𑍇𑌶𑌿𑌨𑍀 ।
𑌰𑍋𑌮𑌕𑍂𑌪𑍇𑌷𑍁 𑌕𑍌𑌮𑌾𑌰𑍀 𑌤𑍍𑌵𑌚𑌂 𑌵𑌾𑌗𑍀𑌶𑍍𑌵𑌰𑍀 𑌤𑌥𑌾 ॥ 33 ॥
𑌰𑌕𑍍𑌤𑌮𑌜𑍍𑌜𑌾𑌵𑌸𑌾𑌮𑌾𑌂𑌸𑌾𑌨𑍍𑌯𑌸𑍍𑌥𑌿𑌮𑍇𑌦𑌾𑌂𑌸𑌿 𑌪𑌾𑌰𑍍𑌵𑌤𑍀 ।
𑌅𑌂𑌤𑍍𑌰𑌾𑌣𑌿 𑌕𑌾𑌲𑌰𑌾𑌤𑍍𑌰𑌿𑌶𑍍𑌚 𑌪𑌿𑌤𑍍𑌤𑌂 𑌚 𑌮𑍁𑌕𑍁𑌟𑍇𑌶𑍍𑌵𑌰𑍀 ॥ 34 ॥
𑌪𑌦𑍍𑌮𑌾𑌵𑌤𑍀 𑌪𑌦𑍍𑌮𑌕𑍋𑌶𑍇 𑌕𑌫𑍇 𑌚𑍂𑌡𑌾𑌮𑌣𑌿𑌸𑍍𑌤𑌥𑌾 ।
𑌜𑍍𑌵𑌾𑌲𑌾𑌮𑍁𑌖𑍀 𑌨𑌖𑌜𑍍𑌵𑌾𑌲𑌾𑌮𑌭𑍇𑌦𑍍𑌯𑌾 𑌸𑌰𑍍𑌵𑌸𑌂𑌧𑌿𑌷𑍁 ॥ 35 ॥
𑌶𑍁𑌕𑍍𑌰𑌂 𑌬𑍍𑌰𑌹𑍍𑌮𑌾𑌣𑌿! 𑌮𑍇 𑌰𑌕𑍍𑌷𑍇𑌚𑍍𑌛𑌾𑌯𑌾𑌂 𑌛𑌤𑍍𑌰𑍇𑌶𑍍𑌵𑌰𑍀 𑌤𑌥𑌾 ।
𑌅𑌹𑌂𑌕𑌾𑌰𑌂 𑌮𑌨𑍋 𑌬𑍁𑌦𑍍𑌧𑌿𑌂 𑌰𑌕𑍍𑌷𑍇𑌨𑍍𑌮𑍇 𑌧𑌰𑍍𑌮𑌧𑌾𑌰𑌿𑌣𑍀 ॥ 36 ॥
𑌪𑍍𑌰𑌾𑌣𑌾𑌪𑌾𑌨𑍌 𑌤𑌥𑌾 𑌵𑍍𑌯𑌾𑌨𑌮𑍁𑌦𑌾𑌨𑌂 𑌚 𑌸𑌮𑌾𑌨𑌕𑌮𑍍 ।
𑌵𑌜𑍍𑌰𑌹𑌸𑍍𑌤𑌾 𑌚 𑌮𑍇 𑌰𑌕𑍍𑌷𑍇𑌤𑍍𑌪𑍍𑌰𑌾𑌣𑌂 𑌕𑌲𑍍𑌯𑌾𑌣𑌶𑍋𑌭𑌨𑌾 ॥ 3 ॥
𑌰𑌸𑍇 𑌰𑍂𑌪𑍇 𑌚 𑌗𑌂𑌧𑍇 𑌚 𑌶𑌬𑍍𑌦𑍇 𑌸𑍍𑌪𑌰𑍍𑌶𑍇 𑌚 𑌯𑍋𑌗𑌿𑌨𑍀 ।
𑌸𑌤𑍍𑌤𑍍𑌵𑌂 𑌰𑌜𑌸𑍍𑌤𑌮𑌶𑍍𑌚𑍈𑌵 𑌰𑌕𑍍𑌷𑍇𑌨𑍍𑌨𑌾𑌰𑌾𑌯𑌣𑍀 𑌸𑌦𑌾 ॥ 3 ॥
𑌆𑌯𑍂 𑌰𑌕𑍍𑌷𑌤𑍁 𑌵𑌾𑌰𑌾𑌹𑍀 𑌧𑌰𑍍𑌮𑌂 𑌰𑌕𑍍𑌷𑌤𑍁 𑌵𑍈𑌷𑍍𑌣𑌵𑍀 ।
𑌯𑌶𑌃 𑌕𑍀𑌰𑍍𑌤𑌿𑌂 𑌚 𑌲𑌕𑍍𑌷𑍍𑌮𑍀𑌂 𑌚 𑌧𑌨𑌂 𑌵𑌿𑌦𑍍𑌯𑌾𑌂 𑌚 𑌚𑌕𑍍𑌰𑌿𑌣𑍀 ॥ 3 ॥
𑌗𑍋𑌤𑍍𑌰𑌮𑌿𑌂𑌦𑍍𑌰𑌾𑌣𑌿! 𑌮𑍇 𑌰𑌕𑍍𑌷𑍇𑌤𑍍𑌪𑌶𑍂𑌨𑍍𑌮𑍇 𑌰𑌕𑍍𑌷 𑌚𑌂𑌡𑌿𑌕𑍇 ।
𑌪𑍁𑌤𑍍𑌰𑌾𑌨𑍍 𑌰𑌕𑍍𑌷𑍇𑌨𑍍𑌮𑌹𑌾𑌲𑌕𑍍𑌷𑍍𑌮𑍀𑌰𑍍𑌭𑌾𑌰𑍍𑌯𑌾𑌂 𑌰𑌕𑍍𑌷𑌤𑍁 𑌭𑍈𑌰𑌵𑍀 ॥ 40 ॥
𑌪𑌂𑌥𑌾𑌨𑌂 𑌸𑍁𑌪𑌥𑌾 𑌰𑌕𑍍𑌷𑍇𑌨𑍍𑌮𑌾𑌰𑍍𑌗𑌂 𑌕𑍍𑌷𑍇𑌮𑌕𑌰𑍀 𑌤𑌥𑌾 ।
𑌰𑌾𑌜𑌦𑍍𑌵𑌾𑌰𑍇 𑌮𑌹𑌾𑌲𑌕𑍍𑌷𑍍𑌮𑍀𑌰𑍍𑌵𑌿𑌜𑌯𑌾 𑌸𑌰𑍍𑌵𑌤𑌃 𑌸𑍍𑌥𑌿𑌤𑌾 ॥ 41 ॥
𑌰𑌕𑍍𑌷𑌾𑌹𑍀𑌨𑌂 𑌤𑍁 𑌯𑌤𑍍-𑌸𑍍𑌥𑌾𑌨𑌂 𑌵𑌰𑍍𑌜𑌿𑌤𑌂 𑌕𑌵𑌚𑍇𑌨 𑌤𑍁 ।
𑌤𑌤𑍍𑌸𑌰𑍍𑌵𑌂 𑌰𑌕𑍍𑌷 𑌮𑍇 𑌦𑍇𑌵𑌿! 𑌜𑌯𑌂𑌤𑍀 𑌪𑌾𑌪𑌨𑌾𑌶𑌿𑌨𑍀 ॥ 42 ॥
𑌪𑌦𑌮𑍇𑌕𑌂 𑌨 𑌗𑌚𑍍𑌛𑍇𑌤𑍍𑌤𑍁 𑌯𑌦𑍀𑌚𑍍𑌛𑍇𑌚𑍍𑌛𑍁𑌭𑌮𑌾𑌤𑍍𑌮𑌨𑌃 ।
𑌕𑌵𑌚𑍇𑌨𑌾𑌵𑍃𑌤𑍋 𑌨𑌿𑌤𑍍𑌯𑌂 𑌯𑌤𑍍𑌰 𑌯𑌤𑍍𑌰𑍈𑌵 𑌗𑌚𑍍𑌛𑌤𑌿 ॥ 43 ॥
𑌤𑌤𑍍𑌰 𑌤𑌤𑍍𑌰𑌾𑌰𑍍𑌥𑌲𑌾𑌭𑌶𑍍𑌚 𑌵𑌿𑌜𑌯𑌃 𑌸𑌾𑌰𑍍𑌵𑌕𑌾𑌮𑌿𑌕𑌃 ।
𑌯𑌂 𑌯𑌂 𑌚𑌿𑌂𑌤𑌯𑌤𑍇 𑌕𑌾𑌮𑌂 𑌤𑌂 𑌤𑌂 𑌪𑍍𑌰𑌾𑌪𑍍𑌨𑍋𑌤𑌿 𑌨𑌿𑌶𑍍𑌚𑌿𑌤𑌮𑍍 ॥ 44 ॥
𑌪𑌰𑌮𑍈𑌶𑍍𑌵𑌰𑍍𑌯𑌮𑌤𑍁𑌲𑌂 𑌪𑍍𑌰𑌾𑌪𑍍𑌸𑍍𑌯𑌤𑍇 𑌭𑍂𑌤𑌲𑍇 𑌪𑍁𑌮𑌾𑌨𑍍 ।
𑌨𑌿𑌰𑍍𑌭𑌯𑍋 𑌜𑌾𑌯𑌤𑍇 𑌮𑌰𑍍𑌤𑍍𑌯𑌃 𑌸𑌂𑌗𑍍𑌰𑌾𑌮𑍇𑌷𑍍𑌵𑌪𑌰𑌾𑌜𑌿𑌤𑌃 ॥ 45 ॥
𑌤𑍍𑌰𑍈𑌲𑍋𑌕𑍍𑌯𑍇 𑌤𑍁 𑌭𑌵𑍇𑌤𑍍𑌪𑍂𑌜𑍍𑌯𑌃 𑌕𑌵𑌚𑍇𑌨𑌾𑌵𑍃𑌤𑌃 𑌪𑍁𑌮𑌾𑌨𑍍 ।
𑌇𑌦𑌂 𑌤𑍁 𑌦𑍇𑌵𑍍𑌯𑌾𑌃 𑌕𑌵𑌚𑌂 𑌦𑍇𑌵𑌾𑌨𑌾𑌮𑌪𑌿 𑌦𑍁𑌰𑍍𑌲𑌭𑌮𑍍 ॥ 46 ॥
𑌯𑌃 𑌪𑌠𑍇𑌤𑍍𑌪𑍍𑌰𑌯𑌤𑍋 𑌨𑌿𑌤𑍍𑌯𑌂 𑌤𑍍𑌰𑌿𑌸𑌂𑌧𑍍𑌯𑌂 𑌶𑍍𑌰𑌦𑍍𑌧𑌯𑌾𑌨𑍍𑌵𑌿𑌤𑌃 ।
𑌦𑍈𑌵𑍀𑌕𑌲𑌾 𑌭𑌵𑍇𑌤𑍍𑌤𑌸𑍍𑌯 𑌤𑍍𑌰𑍈𑌲𑍋𑌕𑍍𑌯𑍇𑌷𑍍𑌵𑌪𑌰𑌾𑌜𑌿𑌤𑌃 । 4 ॥
𑌜𑍀𑌵𑍇𑌦𑍍𑌵𑌰𑍍𑌷𑌶𑌤𑌂 𑌸𑌾𑌗𑍍𑌰𑌮𑌪𑌮𑍃𑌤𑍍𑌯𑍁𑌵𑌿𑌵𑌰𑍍𑌜𑌿𑌤𑌃 ।
𑌨𑌶𑍍𑌯𑌂𑌤𑌿 𑌵𑍍𑌯𑌾𑌧𑌯𑌃 𑌸𑌰𑍍𑌵𑍇 𑌲𑍂𑌤𑌾𑌵𑌿𑌸𑍍𑌫𑍋𑌟𑌕𑌾𑌦𑌯𑌃 ॥ 4 ॥
𑌸𑍍𑌥𑌾𑌵𑌰𑌂 𑌜𑌂𑌗𑌮𑌂 𑌚𑍈𑌵 𑌕𑍃𑌤𑍍𑌰𑌿𑌮𑌂 𑌚𑍈𑌵 𑌯𑌦𑍍𑌵𑌿𑌷𑌮𑍍 ।
𑌅𑌭𑌿𑌚𑌾𑌰𑌾𑌣𑌿 𑌸𑌰𑍍𑌵𑌾𑌣𑌿 𑌮𑌂𑌤𑍍𑌰𑌯𑌂𑌤𑍍𑌰𑌾𑌣𑌿 𑌭𑍂𑌤𑌲𑍇 ॥ 4 ॥
𑌭𑍂𑌚𑌰𑌾𑌃 𑌖𑍇𑌚𑌰𑌾𑌶𑍍𑌚𑍈𑌵 𑌜𑍁𑌲𑌜𑌾𑌶𑍍𑌚𑍋𑌪𑌦𑍇𑌶𑌿𑌕𑌾𑌃 ।
𑌸𑌹𑌜𑌾 𑌕𑍁𑌲𑌜𑌾 𑌮𑌾𑌲𑌾 𑌡𑌾𑌕𑌿𑌨𑍀 𑌶𑌾𑌕𑌿𑌨𑍀 𑌤𑌥𑌾 ॥ 50 ॥
𑌅𑌂𑌤𑌰𑌿𑌕𑍍𑌷𑌚𑌰𑌾 𑌘𑍋𑌰𑌾 𑌡𑌾𑌕𑌿𑌨𑍍𑌯𑌶𑍍𑌚 𑌮𑌹𑌾𑌬𑌲𑌾𑌃 ।
𑌗𑍍𑌰𑌹𑌭𑍂𑌤𑌪𑌿𑌶𑌾𑌚𑌾𑌶𑍍𑌚 𑌯𑌕𑍍𑌷𑌗𑌂𑌧𑌰𑍍𑌵𑌰𑌾𑌕𑍍𑌷𑌸𑌾𑌃 ॥ 51 ॥
𑌬𑍍𑌰𑌹𑍍𑌮𑌰𑌾𑌕𑍍𑌷𑌸𑌵𑍇𑌤𑌾𑌲𑌾𑌃 𑌕𑍂𑌷𑍍𑌮𑌾𑌂𑌡𑌾 𑌭𑍈𑌰𑌵𑌾𑌦𑌯𑌃 ।
𑌨𑌶𑍍𑌯𑌂𑌤𑌿 𑌦𑌰𑍍𑌶𑌨𑌾𑌤𑍍𑌤𑌸𑍍𑌯 𑌕𑌵𑌚𑍇 𑌹𑍃𑌦𑌿 𑌸𑌂𑌸𑍍𑌥𑌿𑌤𑍇 ॥ 52 ॥
𑌮𑌾𑌨𑍋𑌨𑍍𑌨𑌤𑌿𑌰𑍍𑌭𑌵𑍇𑌦𑍍𑌰𑌾𑌜𑍍𑌞𑌸𑍍𑌤𑍇𑌜𑍋𑌵𑍃𑌦𑍍𑌧𑌿𑌕𑌰𑌂 𑌪𑌰𑌮𑍍 ।
𑌯𑌶𑌸𑌾 𑌵𑌰𑍍𑌧𑌤𑍇 𑌸𑍋𑌽𑌪𑌿 𑌕𑍀𑌰𑍍𑌤𑌿𑌮𑌂𑌡𑌿𑌤𑌭𑍂𑌤𑌲𑍇 ॥ 53 ॥
𑌜𑌪𑍇𑌤𑍍𑌸𑌪𑍍𑌤𑌶𑌤𑍀𑌂 𑌚𑌂𑌡𑍀𑌂 𑌕𑍃𑌤𑍍𑌵𑌾 𑌤𑍁 𑌕𑌵𑌚𑌂 𑌪𑍁𑌰𑌾 ।
𑌯𑌾𑌵𑌦𑍍𑌭𑍂𑌮𑌂𑌡𑌲𑌂 𑌧𑌤𑍍𑌤𑍇 𑌸𑌶𑍈𑌲𑌵𑌨𑌕𑌾𑌨𑌨𑌮𑍍 ॥ 54 ॥
𑌤𑌾𑌵𑌤𑍍𑌤𑌿𑌷𑍍𑌠𑌤𑌿 𑌮𑍇𑌦𑌿𑌨𑍍𑌯𑌾𑌂 𑌸𑌂𑌤𑌤𑌿𑌃 𑌪𑍁𑌤𑍍𑌰𑌪𑍌𑌤𑍍𑌰𑌿𑌕𑍀 ।
𑌦𑍇𑌹𑌾𑌂𑌤𑍇 𑌪𑌰𑌮𑌂 𑌸𑍍𑌥𑌾𑌨𑌂 𑌯𑌤𑍍𑌸𑍁𑌰𑍈𑌰𑌪𑌿 𑌦𑍁𑌰𑍍𑌲𑌭𑌮𑍍 ॥ 55 ॥
𑌪𑍍𑌰𑌾𑌪𑍍𑌨𑍋𑌤𑌿 𑌪𑍁𑌰𑍁𑌷𑍋 𑌨𑌿𑌤𑍍𑌯𑌂 𑌮𑌹𑌾𑌮𑌾𑌯𑌾𑌪𑍍𑌰𑌸𑌾𑌦𑌤𑌃 ।
𑌲𑌭𑌤𑍇 𑌪𑌰𑌮𑌂 𑌰𑍂𑌪𑌂 𑌶𑌿𑌵𑍇𑌨 𑌸𑌹 𑌮𑍋𑌦𑌤𑍇 ॥ 56 ॥
॥ 𑌇𑌤𑌿 𑌵𑌾𑌰𑌾𑌹𑌪𑍁𑌰𑌾𑌣𑍇 𑌹𑌰𑌿𑌹𑌰𑌬𑍍𑌰𑌹𑍍𑌮 𑌵𑌿𑌰𑌚𑌿𑌤𑌂 𑌦𑍇𑌵𑍍𑌯𑌾𑌃 𑌕𑌵𑌚𑌂 𑌸𑌂𑌪𑍂𑌰𑍍𑌣𑌮𑍍 ॥
