𑌮𑌹𑌿𑌮𑍍𑌨𑌃 𑌪𑌂𑌥𑌾𑌨𑌂 𑌮𑌦𑌨𑌪𑌰𑌿𑌪𑌂𑌥𑌿𑌪𑍍𑌰𑌣𑌯𑌿𑌨𑌿
𑌪𑍍𑌰𑌭𑍁𑌰𑍍𑌨𑌿𑌰𑍍𑌣𑍇𑌤𑍁𑌂 𑌤𑍇 𑌭𑌵𑌤𑌿 𑌯𑌤𑌮𑌾𑌨𑍋𑌽𑌪𑌿 𑌕𑌤𑌮𑌃 ।
𑌤𑌥𑌾𑌪𑌿 𑌶𑍍𑌰𑍀𑌕𑌾𑌂𑌚𑍀𑌵𑌿𑌹𑍃𑌤𑌿𑌰𑌸𑌿𑌕𑍇 𑌕𑍋𑌽𑌪𑌿 𑌮𑌨𑌸𑍋
𑌵𑌿𑌪𑌾𑌕𑌸𑍍𑌤𑍍𑌵𑌤𑍍𑌪𑌾𑌦𑌸𑍍𑌤𑍁𑌤𑌿𑌵𑌿𑌧𑌿𑌷𑍁 𑌜𑌲𑍍𑌪𑌾𑌕𑌯𑌤𑌿 𑌮𑌾𑌮𑍍 ॥1॥

𑌗𑌲𑌗𑍍𑌰𑌾𑌹𑍀 𑌪𑍌𑌰𑌂𑌦𑌰𑌪𑍁𑌰𑌵𑌨𑍀𑌪𑌲𑍍𑌲𑌵𑌰𑍁𑌚𑌾𑌂
𑌧𑍃𑌤𑌪𑌾𑌥𑌮𑍍𑌯𑌾𑌨𑌾𑌮𑌰𑍁𑌣𑌮𑌹𑌸𑌾𑌮𑌾𑌦𑌿𑌮𑌗𑍁𑌰𑍁𑌃 ।
𑌸𑌮𑌿𑌂𑌧𑍇 𑌬𑌂𑌧𑍂𑌕𑌸𑍍𑌤𑌬𑌕𑌸𑌹𑌯𑍁𑌧𑍍𑌵𑌾 𑌦𑌿𑌶𑌿 𑌦𑌿𑌶𑌿
𑌪𑍍𑌰𑌸𑌰𑍍𑌪𑌨𑍍𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌕𑌿𑌰𑌣𑌾𑌨𑌾𑌮𑌰𑍁𑌣𑌿𑌮𑌾 ॥2॥

𑌮𑌰𑌾𑌲𑍀𑌨𑌾𑌂 𑌯𑌾𑌨𑌾𑌭𑍍𑌯𑌸𑌨𑌕𑌲𑌨𑌾𑌮𑍂𑌲𑌗𑍁𑌰𑌵𑍇
𑌦𑌰𑌿𑌦𑍍𑌰𑌾𑌣𑌾𑌂 𑌤𑍍𑌰𑌾𑌣𑌵𑍍𑌯𑌤𑌿𑌕𑌰𑌸𑍁𑌰𑍋𑌦𑍍𑌯𑌾𑌨𑌤𑌰𑌵𑍇 ।
𑌤𑌮𑌸𑍍𑌕𑌾𑌂𑌡𑌪𑍍𑌰𑍌𑌢𑌿𑌪𑍍𑌰𑌕𑌟𑌨𑌤𑌿𑌰𑌸𑍍𑌕𑌾𑌰𑌪𑌟𑌵𑍇
𑌜𑌨𑍋𑌽𑌯𑌂 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌨𑌲𑌿𑌨𑌾𑌯 𑌸𑍍𑌪𑍃𑌹𑌯𑌤𑍇 ॥3॥

𑌵𑌹𑌂𑌤𑍀 𑌸𑍈𑌂𑌦𑍂𑌰𑍀𑌂 𑌸𑌰𑌣𑌿𑌮𑌵𑌨𑌮𑍍𑌰𑌾𑌮𑌰𑌪𑍁𑌱𑍀-
𑌪𑍁𑌰𑌂𑌧𑍍𑌰𑍀𑌸𑍀𑌮𑌂𑌤𑍇 𑌕𑌵𑌿𑌕𑌮𑌲𑌬𑌾𑌲𑌾𑌰𑍍𑌕𑌸𑍁𑌷𑌮𑌾 ।
𑌤𑍍𑌰𑌯𑍀𑌸𑍀𑌮𑌂𑌤𑌿𑌨𑍍𑌯𑌾𑌃 𑌸𑍍𑌤𑌨𑌤𑌟𑌨𑌿𑌚𑍋𑌲𑌾𑌰𑍁𑌣𑌪𑌟𑍀
𑌵𑌿𑌭𑌾𑌂𑌤𑍀 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌦𑌨𑌲𑌿𑌨𑌕𑌾𑌂𑌤𑌿𑌰𑍍𑌵𑌿𑌜𑌯𑌤𑍇 ॥4॥

𑌪𑍍𑌰𑌣𑌮𑍍𑌰𑍀𑌭𑍂𑌤𑌸𑍍𑌯 𑌪𑍍𑌰𑌣𑌯𑌕𑌲𑌹𑌤𑍍𑌰𑌸𑍍𑌤𑌮𑌨𑌸𑌃
𑌸𑍍𑌮𑌰𑌾𑌰𑌾𑌤𑍇𑌶𑍍𑌚𑍂𑌡𑌾𑌵𑌿𑌯𑌤𑌿 𑌗𑍃𑌹𑌮𑍇𑌧𑍀 𑌹𑌿𑌮𑌕𑌰𑌃 ।
𑌯𑌯𑍋𑌃 𑌸𑌾𑌂𑌧𑍍𑌯𑌾𑌂 𑌕𑌾𑌂𑌤𑌿𑌂 𑌵𑌹𑌤𑌿 𑌸𑍁𑌷𑌮𑌾𑌭𑌿𑌶𑍍𑌚𑌰𑌣𑌯𑍋𑌃
𑌤𑌯𑍋𑌰𑍍𑌮𑍇 𑌕𑌾𑌮𑌾𑌕𑍍𑌷𑍍𑌯𑌾 𑌹𑍃𑌦𑌯𑌮𑌪𑌤𑌂𑌦𑍍𑌰𑌂 𑌵𑌿𑌹𑌰𑌤𑌾𑌮𑍍 ॥5॥

𑌯𑌯𑍋𑌃 𑌪𑍀𑌠𑌾𑌯𑌂𑌤𑍇 𑌵𑌿𑌬𑍁𑌧𑌮𑍁𑌕𑍁𑌟𑍀𑌨𑌾𑌂 𑌪𑌟𑌲𑌿𑌕𑌾
𑌯𑌯𑍋𑌃 𑌸𑍌𑌧𑌾𑌯𑌂𑌤𑍇 𑌸𑍍𑌵𑌯𑌮𑍁𑌦𑌯𑌭𑌾𑌜𑍋 𑌭𑌣𑌿𑌤𑌯𑌃 ।
𑌯𑌯𑍋𑌃 𑌦𑌾𑌸𑌾𑌯𑌂𑌤𑍇 𑌸𑌰𑌸𑌿𑌜𑌭𑌵𑌾𑌦𑍍𑌯𑌾𑌶𑍍𑌚𑌰𑌣𑌯𑍋𑌃
𑌤𑌯𑍋𑌰𑍍𑌮𑍇 𑌕𑌾𑌮𑌾𑌕𑍍𑌷𑍍𑌯𑌾 𑌦𑌿𑌨𑌮𑌨𑍁 𑌵𑌰𑍀𑌵𑌰𑍍𑌤𑍁 𑌹𑍃𑌦𑌯𑌮𑍍 ॥6॥

𑌨𑌯𑌂𑌤𑍀 𑌸𑌂𑌕𑍋𑌚𑌂 𑌸𑌰𑌸𑌿𑌜𑌰𑍁𑌚𑌂 𑌦𑌿𑌕𑍍𑌪𑌰𑌿𑌸𑌰𑍇
𑌸𑍃𑌜𑌂𑌤𑍀 𑌲𑍌𑌹𑌿𑌤𑍍𑌯𑌂 𑌨𑌖𑌕𑌿𑌰𑌣𑌚𑌂𑌦𑍍𑌰𑌾𑌰𑍍𑌧𑌖𑌚𑌿𑌤𑌾 ।
𑌕𑌵𑍀𑌂𑌦𑍍𑌰𑌾𑌣𑌾𑌂 𑌹𑍃𑌤𑍍𑌕𑍈𑌰𑌵𑌵𑌿𑌕𑌸𑌨𑍋𑌦𑍍𑌯𑍋𑌗𑌜𑌨𑌨𑍀
𑌸𑍍𑌫𑍁𑌰𑌂𑌤𑍀 𑌕𑌾𑌮𑌾𑌕𑍍𑌷𑍍𑌯𑌾𑌃 𑌚𑌰𑌣𑌰𑍁𑌚𑌿𑌸𑌂𑌧𑍍𑌯𑌾 𑌵𑌿𑌜𑌯𑌤𑍇 ॥𑍭॥

𑌵𑌿𑌰𑌾𑌵𑍈𑌰𑍍𑌮𑌾𑌂𑌜𑍀𑌰𑍈𑌃 𑌕𑌿𑌮𑌪𑌿 𑌕𑌥𑌯𑌂𑌤𑍀𑌵 𑌮𑌧𑍁𑌰𑌂
𑌪𑍁𑌰𑌸𑍍𑌤𑌾𑌦𑌾𑌨𑌮𑍍𑌰𑍇 𑌪𑍁𑌰𑌵𑌿𑌜𑌯𑌿𑌨𑌿 𑌸𑍍𑌮𑍇𑌰𑌵𑌦𑌨𑍇 ।
𑌵𑌯𑌸𑍍𑌯𑍇𑌵 𑌪𑍍𑌰𑍌𑌢𑌾 𑌶𑌿𑌥𑌿𑌲𑌯𑌤𑌿 𑌯𑌾 𑌪𑍍𑌰𑍇𑌮𑌕𑌲𑌹-
𑌪𑍍𑌰𑌰𑍋𑌹𑌂 𑌕𑌾𑌮𑌾𑌕𑍍𑌷𑍍𑌯𑌾𑌃 𑌚𑌰𑌣𑌯𑍁𑌗𑌲𑍀 𑌸𑌾 𑌵𑌿𑌜𑌯𑌤𑍇 ॥𑍮॥

𑌸𑍁𑌪𑌰𑍍𑌵𑌸𑍍𑌤𑍍𑌰𑍀𑌲𑍋𑌲𑌾𑌲𑌕𑌪𑌰𑌿𑌚𑌿𑌤𑌂 𑌷𑌟𑍍𑌪𑌦𑌕𑍁𑌲𑍈𑌃
𑌸𑍍𑌫𑍁𑌰𑌲𑍍𑌲𑌾𑌕𑍍𑌷𑌾𑌰𑌾𑌗𑌂 𑌤𑌰𑍁𑌣𑌤𑌰𑌣𑌿𑌜𑍍𑌯𑍋𑌤𑌿𑌰𑌰𑍁𑌣𑍈𑌃 ।
𑌭𑍃𑌤𑌂 𑌕𑌾𑌂𑌤𑍍𑌯𑌂𑌭𑍋𑌭𑌿𑌃 𑌵𑌿𑌸𑍃𑌮𑌰𑌮𑌰𑌂𑌦𑍈𑌃 𑌸𑌰𑌸𑌿𑌜𑍈𑌃
𑌵𑌿𑌧𑌤𑍍𑌤𑍇 𑌕𑌾𑌮𑌾𑌕𑍍𑌷𑍍𑌯𑌾𑌃 𑌚𑌰𑌣𑌯𑍁𑌗𑌲𑌂 𑌬𑌂𑌧𑍁𑌪𑌦𑌵𑍀𑌮𑍍 ॥𑍯॥

𑌰𑌜𑌃𑌸𑌂𑌸𑌰𑍍𑌗𑍇𑌽𑌪𑌿 𑌸𑍍𑌥𑌿𑌤𑌮𑌰𑌜𑌸𑌾𑌮𑍇𑌵 𑌹𑍃𑌦𑌯𑍇
𑌪𑌰𑌂 𑌰𑌕𑍍𑌤𑌤𑍍𑌵𑍇𑌨 𑌸𑍍𑌥𑌿𑌤𑌮𑌪𑌿 𑌵𑌿𑌰𑌕𑍍𑌤𑍈𑌕𑌶𑌰𑌣𑌮𑍍 ।
𑌅𑌲𑌭𑍍𑌯𑌂 𑌮𑌂𑌦𑌾𑌨𑌾𑌂 𑌦𑌧𑌦𑌪𑌿 𑌸𑌦𑌾 𑌮𑌂𑌦𑌗𑌤𑌿𑌤𑌾𑌂
𑌵𑌿𑌧𑌤𑍍𑌤𑍇 𑌕𑌾𑌮𑌾𑌕𑍍𑌷𑍍𑌯𑌾𑌃 𑌚𑌰𑌣𑌯𑍁𑌗𑌮𑌾𑌶𑍍𑌚𑌰𑍍𑌯𑌲𑌹𑌰𑍀𑌮𑍍 ॥10॥

𑌜𑌟𑌾𑌲𑌾 𑌮𑌂𑌜𑍀𑌰𑌸𑍍𑌫𑍁𑌰𑌦𑌰𑍁𑌣𑌰𑌤𑍍𑌨𑌾𑌂𑌶𑍁𑌨𑌿𑌕𑌰𑍈𑌃
𑌨𑌿𑌷𑌿𑌦𑌂𑌤𑍀 𑌮𑌧𑍍𑌯𑍇 𑌨𑌖𑌰𑍁𑌚𑌿𑌝𑌰𑍀𑌗𑌾𑌂𑌗𑌪𑌯𑌸𑌾𑌮𑍍 ।
𑌜𑌗𑌤𑍍𑌤𑍍𑌰𑌾𑌣𑌂 𑌕𑌰𑍍𑌤𑍁𑌂 𑌜𑌨𑌨𑌿 𑌮𑌮 𑌕𑌾𑌮𑌾𑌕𑍍𑌷𑌿 𑌨𑌿𑌯𑌤𑌂
𑌤𑌪𑌶𑍍𑌚𑌰𑍍𑌯𑌾𑌂 𑌧𑌤𑍍𑌤𑍇 𑌤𑌵 𑌚𑌰𑌣𑌪𑌾𑌥𑍋𑌜𑌯𑍁𑌗𑌲𑍀 ॥11॥

𑌤𑍁𑌲𑌾𑌕𑍋𑌟𑌿𑌦𑍍𑌵𑌂𑌦𑍍𑌵𑌕𑍍𑌕𑌣𑌿𑌤𑌭𑌣𑌿𑌤𑌾𑌭𑍀𑌤𑌿𑌵𑌚𑌸𑍋𑌃
𑌵𑌿𑌨𑌮𑍍𑌰𑌂 𑌕𑌾𑌮𑌾𑌕𑍍𑌷𑍀 𑌵𑌿𑌸𑍃𑌮𑌰𑌮𑌹𑌃𑌪𑌾𑌟𑌲𑌿𑌤𑌯𑍋𑌃 ।
𑌕𑍍𑌷𑌣𑌂 𑌵𑌿𑌨𑍍𑌯𑌾𑌸𑍇𑌨 𑌕𑍍𑌷𑌪𑌿𑌤𑌤𑌮𑌸𑍋𑌰𑍍𑌮𑍇 𑌲𑌲𑌿𑌤𑌯𑍋𑌃
𑌪𑍁𑌨𑍀𑌯𑌾𑌨𑍍𑌮𑍂𑌰𑍍𑌧𑌾𑌨𑌂 𑌪𑍁𑌰𑌹𑌰𑌪𑍁𑌰𑌂𑌧𑍍𑌰𑍀 𑌚𑌰𑌣𑌯𑍋𑌃 ॥12॥

𑌭𑌵𑌾𑌨𑌿 𑌦𑍍𑌰𑍁𑌹𑍍𑌯𑍇𑌤𑌾𑌂 𑌭𑌵𑌨𑌿𑌬𑌿𑌡𑌿𑌤𑍇𑌭𑍍𑌯𑍋 𑌮𑌮 𑌮𑍁𑌹𑍁-
𑌸𑍍𑌤𑌮𑍋𑌵𑍍𑌯𑌾𑌮𑍋𑌹𑍇𑌭𑍍𑌯𑌸𑍍𑌤𑌵 𑌜𑌨𑌨𑌿 𑌕𑌾𑌮𑌾𑌕𑍍𑌷𑌿 𑌚𑌰𑌣𑍌 ।
𑌯𑌯𑍋𑌰𑍍𑌲𑌾𑌕𑍍𑌷𑌾𑌬𑌿𑌂𑌦𑍁𑌸𑍍𑌫𑍁𑌰𑌣𑌧𑌰𑌣𑌾𑌦𑍍𑌧𑍍𑌵𑌰𑍍𑌜𑌟𑌿𑌜𑌟𑌾-
𑌕𑍁𑌟𑍀𑌰𑌾 𑌶𑍋𑌣𑌾𑌂𑌕𑌂 𑌵𑌹𑌤𑌿 𑌵𑌪𑍁𑌰𑍇𑌣𑌾𑌂𑌕𑌕𑌲𑌿𑌕𑌾 ॥13॥

𑌪𑌵𑌿𑌤𑍍𑌰𑍀𑌕𑍁𑌰𑍍𑌯𑍁𑌰𑍍𑌨𑍁𑌃 𑌪𑌦𑌤𑌲𑌭𑍁𑌵𑌃 𑌪𑌾𑌟𑌲𑌰𑍁𑌚𑌃
𑌪𑌰𑌾𑌗𑌾𑌸𑍍𑌤𑍇 𑌪𑌾𑌪𑌪𑍍𑌰𑌶𑌮𑌨𑌧𑍁𑌰𑍀𑌣𑌾𑌃 𑌪𑌰𑌶𑌿𑌵𑍇 ।
𑌕𑌣𑌂 𑌲𑌬𑍍𑌧𑍁𑌂 𑌯𑍇𑌷𑌾𑌂 𑌨𑌿𑌜𑌶𑌿𑌰𑌸𑌿 𑌕𑌾𑌮𑌾𑌕𑍍𑌷𑌿 𑌵𑌿𑌵𑌶𑌾
𑌵𑌲𑌂𑌤𑍋 𑌵𑍍𑌯𑌾𑌤𑌨𑍍𑌵𑌂𑌤𑍍𑌯𑌹𑌮𑌹𑌮𑌿𑌕𑌾𑌂 𑌮𑌾𑌧𑌵𑌮𑍁𑌖𑌾𑌃 ॥14॥

𑌬𑌲𑌾𑌕𑌾𑌮𑌾𑌲𑌾𑌭𑌿𑌰𑍍𑌨𑌖𑌰𑍁𑌚𑌿𑌮𑌯𑍀𑌭𑌿𑌃 𑌪𑌰𑌿𑌵𑍃𑌤𑍇
𑌵𑌿𑌨𑌮𑍍𑌰𑌸𑍍𑌵𑌰𑍍𑌨𑌾𑌰𑍀𑌵𑌿𑌕𑌚𑌕𑌚𑌕𑌾𑌲𑌾𑌂𑌬𑍁𑌦𑌕𑍁𑌲𑍇 ।
𑌸𑍍𑌫𑍁𑌰𑌂𑌤𑌃 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌟𑌦𑌲𑌿𑌤𑌬𑌂𑌧𑍂𑌕𑌸𑍁𑌹𑍃𑌦-
𑌸𑍍𑌤𑌟𑌿𑌲𑍍𑌲𑍇𑌖𑌾𑌯𑌂𑌤𑍇 𑌤𑌵 𑌚𑌰𑌣𑌪𑌾𑌥𑍋𑌜𑌕𑌿𑌰𑌣𑌾𑌃 ॥15॥

𑌸𑌰𑌾𑌗𑌃 𑌸𑌦𑍍𑌵𑍇𑌷𑌃 𑌪𑍍𑌰𑌸𑍃𑌮𑌰𑌸𑌰𑍋𑌜𑍇 𑌪𑍍𑌰𑌤𑌿𑌦𑌿𑌨𑌂
𑌨𑌿𑌸𑌰𑍍𑌗𑌾𑌦𑌾𑌕𑍍𑌰𑌾𑌮𑌨𑍍𑌵𑌿𑌬𑍁𑌧𑌜𑌨𑌮𑍂𑌰𑍍𑌧𑌾𑌨𑌮𑌧𑌿𑌕𑌮𑍍 ।
𑌕𑌥𑌂𑌕𑌾𑌰𑌂 𑌮𑌾𑌤𑌃 𑌕𑌥𑌯 𑌪𑌦𑌪𑌦𑍍𑌮𑌸𑍍𑌤𑌵 𑌸𑌤𑌾𑌂
𑌨𑌤𑌾𑌨𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌯𑌤𑌿 𑌕𑍈𑌵𑌲𑍍𑌯𑌸𑌰𑌣𑌿𑌮𑍍 ॥16॥

𑌜𑌪𑌾𑌲𑌕𑍍𑌷𑍍𑌮𑍀𑌶𑍋𑌣𑍋 𑌜𑌨𑌿𑌤𑌪𑌰𑌮𑌜𑍍𑌞𑌾𑌨𑌨𑌲𑌿𑌨𑍀-
𑌵𑌿𑌕𑌾𑌸𑌵𑍍𑌯𑌾𑌸𑌂𑌗𑍋 𑌵𑌿𑌫𑌲𑌿𑌤𑌜𑌗𑌜𑍍𑌜𑌾𑌡𑍍𑌯𑌗𑌰𑌿𑌮𑌾 ।
𑌮𑌨𑌃𑌪𑍂𑌰𑍍𑌵𑌾𑌦𑍍𑌰𑌿𑌂 𑌮𑍇 𑌤𑌿𑌲𑌕𑌯𑌤𑍁 𑌕𑌾𑌮𑌾𑌕𑍍𑌷𑌿 𑌤𑌰𑌸𑌾
𑌤𑌮𑌸𑍍𑌕𑌾𑌂𑌡𑌦𑍍𑌰𑍋𑌹𑍀 𑌤𑌵 𑌚𑌰𑌣𑌪𑌾𑌥𑍋𑌜𑌰𑌮𑌣𑌃 ॥1𑍭॥

𑌨𑌮𑌸𑍍𑌕𑍁𑌰𑍍𑌮𑌃 𑌪𑍍𑌰𑍇𑌂𑌖𑌨𑍍𑌮𑌣𑌿𑌕𑌟𑌕𑌨𑍀𑌲𑍋𑌤𑍍𑌪𑌲𑌮𑌹𑌃-
𑌪𑌯𑍋𑌧𑍌 𑌰𑌿𑌂𑌖𑌦𑍍𑌭𑌿𑌰𑍍𑌨𑌖𑌕𑌿𑌰𑌣𑌫𑍇𑌨𑍈𑌰𑍍𑌧𑌵𑌲𑌿𑌤𑍇 ।
𑌸𑍍𑌫𑍁𑌟𑌂 𑌕𑍁𑌰𑍍𑌵𑌾𑌣𑌾𑌯 𑌪𑍍𑌰𑌬𑌲𑌚𑌲𑌦𑍌𑌰𑍍𑌵𑌾𑌨𑌲𑌶𑌿𑌖𑌾-
𑌵𑌿𑌤𑌰𑍍𑌕𑌂 𑌕𑌾𑌮𑌾𑌕𑍍𑌷𑍍𑌯𑌾𑌃 𑌸𑌤𑌤𑌮𑌰𑍁𑌣𑌿𑌮𑍍𑌨𑍇 𑌚𑌰𑌣𑌯𑍋𑌃 ॥1𑍮॥

𑌶𑌿𑌵𑍇 𑌪𑌾𑌶𑌾𑌯𑍇𑌤𑌾𑌮𑌲𑌘𑍁𑌨𑌿 𑌤𑌮𑌃𑌕𑍂𑌪𑌕𑍁𑌹𑌰𑍇
𑌦𑌿𑌨𑌾𑌧𑍀𑌶𑌾𑌯𑍇𑌤𑌾𑌂 𑌮𑌮 𑌹𑍃𑌦𑌯𑌪𑌾𑌥𑍋𑌜𑌵𑌿𑌪𑌿𑌨𑍇 ।
𑌨𑌭𑍋𑌮𑌾𑌸𑌾𑌯𑍇𑌤𑌾𑌂 𑌸𑌰𑌸𑌕𑌵𑌿𑌤𑌾𑌰𑍀𑌤𑌿𑌸𑌰𑌿𑌤𑌿
𑌤𑍍𑌵𑌦𑍀𑌯𑍌 𑌕𑌾𑌮𑌾𑌕𑍍𑌷𑌿 𑌪𑍍𑌰𑌸𑍃𑌤𑌕𑌿𑌰𑌣𑍌 𑌦𑍇𑌵𑌿 𑌚𑌰𑌣𑍌 ॥1𑍯॥

𑌨𑌿𑌷𑌕𑍍𑌤𑌂 𑌶𑍍𑌰𑍁𑌤𑍍𑌯𑌂𑌤𑍇 𑌨𑌯𑌨𑌮𑌿𑌵 𑌸𑌦𑍍𑌵𑍃𑌤𑍍𑌤𑌰𑍁𑌚𑌿𑌰𑍈𑌃
𑌸𑌮𑍈𑌰𑍍𑌜𑍁𑌷𑍍𑌟𑌂 𑌶𑍁𑌦𑍍𑌧𑍈𑌰𑌧𑌰𑌮𑌿𑌵 𑌰𑌮𑍍𑌯𑍈𑌰𑍍𑌦𑍍𑌵𑌿𑌜𑌗𑌣𑍈𑌃 ।
𑌶𑌿𑌵𑍇 𑌵𑌕𑍍𑌷𑍋𑌜𑌨𑍍𑌮𑌦𑍍𑌵𑌿𑌤𑌯𑌮𑌿𑌵 𑌮𑍁𑌕𑍍𑌤𑌾𑌶𑍍𑌰𑌿𑌤𑌮𑍁𑌮𑍇
𑌤𑍍𑌵𑌦𑍀𑌯𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌣𑌤𑌶𑌰𑌣𑌂 𑌨𑍌𑌮𑌿 𑌚𑌰𑌣𑌮𑍍 ॥20॥

𑌨𑌮𑌸𑍍𑌯𑌾𑌸𑌂𑌸𑌜𑍍𑌜𑌨𑍍𑌨𑌮𑍁𑌚𑌿𑌪𑌰𑌿𑌪𑌂𑌥𑌿𑌪𑍍𑌰𑌣𑌯𑌿𑌨𑍀-
𑌨𑌿𑌸𑌰𑍍𑌗𑌪𑍍𑌰𑍇𑌂𑌖𑍋𑌲𑌤𑍍𑌕𑍁𑌰𑌲𑌕𑍁𑌲𑌕𑌾𑌲𑌾𑌹𑌿𑌶𑌬𑌲𑍇 ।
𑌨𑌖𑌚𑍍𑌛𑌾𑌯𑌾𑌦𑍁𑌗𑍍𑌧𑍋𑌦𑌧𑌿𑌪𑌯𑌸𑌿 𑌤𑍇 𑌵𑍈𑌦𑍍𑌰𑍁𑌮𑌰𑍁𑌚𑌾𑌂
𑌪𑍍𑌰𑌚𑌾𑌰𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌚𑍁𑌰𑌯𑌤𑌿 𑌪𑌾𑌦𑌾𑌬𑍍𑌜𑌸𑍁𑌷𑌮𑌾 ॥21॥

𑌕𑌦𑌾 𑌦𑍂𑌰𑍀𑌕𑌰𑍍𑌤𑍁𑌂 𑌕𑌟𑍁𑌦𑍁𑌰𑌿𑌤𑌕𑌾𑌕𑍋𑌲𑌜𑌨𑌿𑌤𑌂
𑌮𑌹𑌾𑌂𑌤𑌂 𑌸𑌂𑌤𑌾𑌪𑌂 𑌮𑌦𑌨𑌪𑌰𑌿𑌪𑌂𑌥𑌿𑌪𑍍𑌰𑌿𑌯𑌤𑌮𑍇 ।
𑌕𑍍𑌷𑌣𑌾𑌤𑍍𑌤𑍇 𑌕𑌾𑌮𑌾𑌕𑍍𑌷𑌿 𑌤𑍍𑌰𑌿𑌭𑍁𑌵𑌨𑌪𑌰𑍀𑌤𑌾𑌪𑌹𑌰𑌣𑍇
𑌪𑌟𑍀𑌯𑌾𑌂𑌸𑌂 𑌲𑌪𑍍𑌸𑍍𑌯𑍇 𑌪𑌦𑌕𑌮𑌲𑌸𑍇𑌵𑌾𑌮𑍃𑌤𑌰𑌸𑌮𑍍 ॥22॥

𑌯𑌯𑍋𑌃 𑌸𑌾𑌂𑌧𑍍𑌯𑌂 𑌰𑍋𑌚𑌿𑌃 𑌸𑌤𑌤𑌮𑌰𑍁𑌣𑌿𑌮𑍍𑌨𑍇 𑌸𑍍𑌪𑍃𑌹𑌯𑌤𑍇
𑌯𑌯𑍋𑌶𑍍𑌚𑌾𑌂𑌦𑍍𑌰𑍀 𑌕𑌾𑌂𑌤𑌿𑌃 𑌪𑌰𑌿𑌪𑌤𑌤𑌿 𑌦𑍃𑌷𑍍𑌟𑍍𑌵𑌾 𑌨𑌖𑌰𑍁𑌚𑌿𑌮𑍍 ।
𑌯𑌯𑍋𑌃 𑌪𑌾𑌕𑍋𑌦𑍍𑌰𑍇𑌕𑌂 𑌪𑌿𑌪𑌠𑌿𑌷𑌤𑌿 𑌭𑌕𑍍𑌤𑍍𑌯𑌾 𑌕𑌿𑌸𑌲𑌯𑌂
𑌮𑍍𑌰𑌦𑌿𑌮𑍍𑌨𑌃 𑌕𑌾𑌮𑌾𑌕𑍍𑌷𑍍𑌯𑌾 𑌮𑌨𑌸𑌿 𑌚𑌰𑌣𑍌 𑌤𑍌 𑌤𑌨𑍁𑌮𑌹𑍇 ॥23॥

𑌜𑌗𑌨𑍍𑌨𑍇𑌦𑌂 𑌨𑍇𑌦𑌂 𑌪𑌰𑌮𑌿𑌤𑌿 𑌪𑌰𑌿𑌤𑍍𑌯𑌜𑍍𑌯 𑌯𑌤𑌿𑌭𑌿𑌃
𑌕𑍁𑌶𑌾𑌗𑍍𑌰𑍀𑌯𑌸𑍍𑌵𑌾𑌂𑌤𑍈𑌃 𑌕𑍁𑌶𑌲𑌧𑌿𑌷𑌣𑍈𑌃 𑌶𑌾𑌸𑍍𑌤𑍍𑌰𑌸𑌰𑌣𑍌 ।
𑌗𑌵𑍇𑌷𑍍𑌯𑌂 𑌕𑌾𑌮𑌾𑌕𑍍𑌷𑌿 𑌧𑍍𑌰𑍁𑌵𑌮𑌕𑍃𑌤𑌕𑌾𑌨𑌾𑌂 𑌗𑌿𑌰𑌿𑌸𑍁𑌤𑍇
𑌗𑌿𑌰𑌾𑌮𑍈𑌦𑌂𑌪𑌰𑍍𑌯𑌂 𑌤𑌵 𑌚𑌰𑌣𑌪𑌦𑍍𑌮𑌂 𑌵𑌿𑌜𑌯𑌤𑍇 ॥24॥

𑌕𑍃𑌤𑌸𑍍𑌨𑌾𑌨𑌂 𑌶𑌾𑌸𑍍𑌤𑍍𑌰𑌾𑌮𑍃𑌤𑌸𑌰𑌸𑌿 𑌕𑌾𑌮𑌾𑌕𑍍𑌷𑌿 𑌨𑌿𑌤𑌰𑌾𑌂
𑌦𑌧𑌾𑌨𑌂 𑌵𑍈𑌶𑌦𑍍𑌯𑌂 𑌕𑌲𑌿𑌤𑌰𑌸𑌮𑌾𑌨𑌂𑌦𑌸𑍁𑌧𑌯𑌾 ।
𑌅𑌲𑌂𑌕𑌾𑌰𑌂 𑌭𑍂𑌮𑍇𑌰𑍍𑌮𑍁𑌨𑌿𑌜𑌨𑌮𑌨𑌶𑍍𑌚𑌿𑌨𑍍𑌮𑌯𑌮𑌹𑌾-
𑌪𑌯𑍋𑌧𑍇𑌰𑌂𑌤𑌸𑍍𑌸𑍍𑌥𑌂 𑌤𑌵 𑌚𑌰𑌣𑌰𑌤𑍍𑌨𑌂 𑌮𑍃𑌗𑌯𑌤𑍇 ॥25॥

𑌮𑌨𑍋𑌗𑍇𑌹𑍇 𑌮𑍋𑌹𑍋𑌦𑍍𑌭𑌵𑌤𑌿𑌮𑌿𑌰𑌪𑍂𑌰𑍍𑌣𑍇 𑌮𑌮 𑌮𑍁𑌹𑍁𑌃
𑌦𑌰𑌿𑌦𑍍𑌰𑌾𑌣𑍀𑌕𑍁𑌰𑍍𑌵𑌂𑌦𑌿𑌨𑌕𑌰𑌸𑌹𑌸𑍍𑌰𑌾𑌣𑌿 𑌕𑌿𑌰𑌣𑍈𑌃 ।
𑌵𑌿𑌧𑌤𑍍𑌤𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌸𑍃𑌮𑌰𑌤𑌮𑍋𑌵𑌂𑌚𑌨𑌚𑌣𑌃
𑌕𑍍𑌷𑌣𑌾𑌰𑍍𑌧𑌂 𑌸𑌾𑌨𑍍𑌨𑌿𑌧𑍍𑌯𑌂 𑌚𑌰𑌣𑌮𑌣𑌿𑌦𑍀𑌪𑍋 𑌜𑌨𑌨𑌿 𑌤𑍇 ॥26॥

𑌕𑌵𑍀𑌨𑌾𑌂 𑌚𑍇𑌤𑍋𑌵𑌨𑍍𑌨𑌖𑌰𑌰𑍁𑌚𑌿𑌸𑌂𑌪𑌰𑍍𑌕𑌿 𑌵𑌿𑌬𑍁𑌧-
𑌸𑍍𑌰𑌵𑌂𑌤𑍀𑌸𑍍𑌰𑍋𑌤𑍋𑌵𑌤𑍍𑌪𑌟𑍁𑌮𑍁𑌖𑌰𑌿𑌤𑌂 𑌹𑌂𑌸𑌕𑌰𑌵𑍈𑌃 ।
𑌦𑌿𑌨𑌾𑌰𑌂𑌭𑌶𑍍𑌰𑍀𑌵𑌨𑍍𑌨𑌿𑌯𑌤𑌮𑌰𑍁𑌣𑌚𑍍𑌛𑌾𑌯𑌸𑍁𑌭𑌗𑌂
𑌮𑌦𑌂𑌤𑌃 𑌕𑌾𑌮𑌾𑌕𑍍𑌷𑍍𑌯𑌾𑌃 𑌸𑍍𑌫𑍁𑌰𑌤𑍁 𑌪𑌦𑌪𑌂𑌕𑍇𑌰𑍁𑌹𑌯𑍁𑌗𑌮𑍍 ॥2𑍭॥

𑌸𑌦𑌾 𑌕𑌿𑌂 𑌸𑌂𑌪𑌰𑍍𑌕𑌾𑌤𑍍𑌪𑍍𑌰𑌕𑍃𑌤𑌿𑌕𑌠𑌿𑌨𑍈𑌰𑍍𑌨𑌾𑌕𑌿𑌮𑍁𑌕𑍁𑌟𑍈𑌃
𑌤𑌟𑍈𑌰𑍍𑌨𑍀𑌹𑌾𑌰𑌾𑌦𑍍𑌰𑍇𑌰𑌧𑌿𑌕𑌮𑌣𑍁𑌨𑌾 𑌯𑍋𑌗𑌿𑌮𑌨𑌸𑌾 ।
𑌵𑌿𑌭𑌿𑌂𑌤𑍇 𑌸𑌂𑌮𑍋𑌹𑌂 𑌶𑌿𑌶𑌿𑌰𑌯𑌤𑌿 𑌭𑌕𑍍𑌤𑌾𑌨𑌪𑌿 𑌦𑍃𑌶𑌾𑌮𑍍
𑌅𑌦𑍃𑌶𑍍𑌯𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌯𑌤𑌿 𑌤𑍇 𑌪𑌾𑌦𑌯𑍁𑌗𑌲𑌮𑍍 ॥2𑍮॥

𑌪𑌵𑌿𑌤𑍍𑌰𑌾𑌭𑍍𑌯𑌾𑌮𑌂𑌬 𑌪𑍍𑌰𑌕𑍃𑌤𑌿𑌮𑍃𑌦𑍁𑌲𑌾𑌭𑍍𑌯𑌾𑌂 𑌤𑌵 𑌶𑌿𑌵𑍇
𑌪𑌦𑌾𑌭𑍍𑌯𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌸𑌭𑌮𑌭𑌿𑌭𑍂𑌤𑍈𑌃 𑌸𑌚𑌕𑌿𑌤𑍈𑌃 ।
𑌪𑍍𑌰𑌵𑌾𑌲𑍈𑌰𑌂𑌭𑍋𑌜𑍈𑌰𑌪𑌿 𑌚 𑌵𑌨𑌵𑌾𑌸𑌵𑍍𑌰𑌤𑌦𑌶𑌾𑌃
𑌸𑌦𑍈𑌵𑌾𑌰𑌭𑍍𑌯𑌂𑌤𑍇 𑌪𑌰𑌿𑌚𑌰𑌿𑌤𑌨𑌾𑌨𑌾𑌦𑍍𑌵𑌿𑌜𑌗𑌣𑍈𑌃 ॥2𑍯॥

𑌚𑌿𑌰𑌾𑌦𑍍𑌦𑍃𑌶𑍍𑌯𑌾 𑌹𑌂𑌸𑍈𑌃 𑌕𑌥𑌮𑌪𑌿 𑌸𑌦𑌾 𑌹𑌂𑌸𑌸𑍁𑌲𑌭𑌂
𑌨𑌿𑌰𑌸𑍍𑌯𑌂𑌤𑍀 𑌜𑌾𑌡𑍍𑌯𑌂 𑌨𑌿𑌯𑌤𑌜𑌡𑌮𑌧𑍍𑌯𑍈𑌕𑌶𑌰𑌣𑌮𑍍 ।
𑌅𑌦𑍋𑌷𑌵𑍍𑌯𑌾𑌸𑌂𑌗𑌾 𑌸𑌤𑌤𑌮𑌪𑌿 𑌦𑍋𑌷𑌾𑌪𑍍𑌤𑌿𑌮𑌲𑌿𑌨𑌂
𑌪𑌯𑍋𑌜𑌂 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌰𑌿𑌹𑌸𑌤𑌿 𑌪𑌾𑌦𑌾𑌬𑍍𑌜𑌯𑍁𑌗𑌲𑍀 ॥30॥

𑌸𑍁𑌰𑌾𑌣𑌾𑌮𑌾𑌨𑌂𑌦𑌪𑍍𑌰𑌬𑌲𑌨𑌤𑌯𑌾 𑌮𑌂𑌡𑌨𑌤𑌯𑌾
𑌨𑌖𑍇𑌂𑌦𑍁𑌜𑍍𑌯𑍋𑌤𑍍𑌸𑍍𑌨𑌾𑌭𑌿𑌰𑍍𑌵𑌿𑌸𑍃𑌮𑌰𑌤𑌮𑌃𑌖𑌂𑌡𑌨𑌤𑌯𑌾 ।
𑌪𑌯𑍋𑌜𑌶𑍍𑌰𑍀𑌦𑍍𑌵𑍇𑌷𑌵𑍍𑌰𑌤𑌰𑌤𑌤𑌯𑌾 𑌤𑍍𑌵𑌚𑍍𑌚𑌰𑌣𑌯𑍋𑌃
𑌵𑌿𑌲𑌾𑌸𑌃 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌯𑌤𑌿 𑌨𑍈𑌶𑌾𑌕𑌰𑌦𑌶𑌾𑌮𑍍 ॥31॥

𑌸𑌿𑌤𑌿𑌮𑍍𑌨𑌾 𑌕𑌾𑌂𑌤𑍀𑌨𑌾𑌂 𑌨𑌖𑌰𑌜𑌨𑍁𑌷𑌾𑌂 𑌪𑌾𑌦𑌨𑌲𑌿𑌨-
𑌚𑍍𑌛𑌵𑍀𑌨𑌾𑌂 𑌶𑍋𑌣𑌿𑌮𑍍𑌨𑌾 𑌤𑌵 𑌜𑌨𑌨𑌿 𑌕𑌾𑌮𑌾𑌕𑍍𑌷𑌿 𑌨𑌮𑌨𑍇 ।
𑌲𑌭𑌂𑌤𑍇 𑌮𑌂𑌦𑌾𑌰𑌗𑍍𑌰𑌥𑌿𑌤𑌨𑌵𑌬𑌂𑌧𑍂𑌕𑌕𑍁𑌸𑍁𑌮-
𑌸𑍍𑌰𑌜𑌾𑌂 𑌸𑌾𑌮𑍀𑌚𑍀𑌨𑍍𑌯𑌂 𑌸𑍁𑌰𑌪𑍁𑌰𑌪𑍁𑌰𑌂𑌧𑍍𑌰𑍀𑌕𑌚𑌭𑌰𑌾𑌃 ॥32॥

𑌸𑍍𑌫𑍁𑌰𑌨𑍍𑌮𑌧𑍍𑌯𑍇 𑌶𑍁𑌦𑍍𑌧𑍇 𑌨𑌖𑌕𑌿𑌰𑌣𑌦𑍁𑌗𑍍𑌧𑌾𑌬𑍍𑌧𑌿𑌪𑌯𑌸𑌾𑌂
𑌵𑌹𑌨𑍍𑌨𑌬𑍍𑌜𑌂 𑌚𑌕𑍍𑌰𑌂 𑌦𑌰𑌮𑌪𑌿 𑌚 𑌲𑍇𑌖𑌾𑌤𑍍𑌮𑌕𑌤𑌯𑌾 ।
𑌶𑍍𑌰𑌿𑌤𑍋 𑌮𑌾𑌤𑍍𑌸𑍍𑌯𑌂 𑌰𑍂𑌪𑌂 𑌶𑍍𑌰𑌿𑌯𑌮𑌪𑌿 𑌦𑌧𑌾𑌨𑍋 𑌨𑌿𑌰𑍁𑌪𑌮𑌾𑌂
𑌤𑍍𑌰𑌿𑌧𑌾𑌮𑌾 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌦𑌨𑌲𑌿𑌨𑌨𑌾𑌮𑌾 𑌵𑌿𑌜𑌯𑌤𑍇 ॥33॥

𑌨𑌖𑌶𑍍𑌰𑍀𑌸𑌨𑍍𑌨𑌦𑍍𑌧𑌸𑍍𑌤𑌬𑌕𑌨𑌿𑌚𑌿𑌤𑌃 𑌸𑍍𑌵𑍈𑌶𑍍𑌚 𑌕𑌿𑌰𑌣𑍈𑌃
𑌪𑌿𑌶𑌂𑌗𑍈𑌃 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌿𑌤𑌲𑌸𑌤𑍍𑌪𑌲𑍍𑌲𑌵𑌰𑍁𑌚𑌿𑌃 ।
𑌸𑌤𑌾𑌂 𑌗𑌮𑍍𑌯𑌃 𑌶𑌂𑌕𑍇 𑌸𑌕𑌲𑌫𑌲𑌦𑌾𑌤𑌾 𑌸𑍁𑌰𑌤𑌰𑍁𑌃
𑌤𑍍𑌵𑌦𑍀𑌯𑌃 𑌪𑌾𑌦𑍋𑌽𑌯𑌂 𑌤𑍁𑌹𑌿𑌨𑌗𑌿𑌰𑌿𑌰𑌾𑌜𑌨𑍍𑌯𑌤𑌨𑌯𑍇 ॥34॥

𑌵𑌷𑌟𑍍𑌕𑍁𑌰𑍍𑌵𑌨𑍍𑌮𑌾𑌂𑌜𑍀𑌰𑌕𑌲𑌕𑌲𑍈𑌃 𑌕𑌰𑍍𑌮𑌲𑌹𑌰𑍀-
𑌹𑌵𑍀𑌂𑌷𑌿 𑌪𑍍𑌰𑍌𑌦𑍍𑌦𑌂𑌡𑌂 𑌜𑍍𑌵𑌲𑌤𑌿 𑌪𑌰𑌮𑌜𑍍𑌞𑌾𑌨𑌦𑌹𑌨𑍇 ।
𑌮𑌹𑍀𑌯𑌾𑌨𑍍𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌟𑌮𑌹𑌸𑌿 𑌜𑍋𑌹𑍋𑌤𑌿 𑌸𑍁𑌧𑌿𑌯𑌾𑌂
𑌮𑌨𑍋𑌵𑍇𑌦𑍍𑌯𑌾𑌂 𑌮𑌾𑌤𑌸𑍍𑌤𑌵 𑌚𑌰𑌣𑌯𑌜𑍍𑌵𑌾 𑌗𑌿𑌰𑌿𑌸𑍁𑌤𑍇 ॥35॥

𑌮𑌹𑌾𑌮𑌂𑌤𑍍𑌰𑌂 𑌕𑌿𑌂𑌚𑌿𑌨𑍍𑌮𑌣𑌿𑌕𑌟𑌕𑌨𑌾𑌦𑍈𑌰𑍍𑌮𑍃𑌦𑍁 𑌜𑌪𑌨𑍍
𑌕𑍍𑌷𑌿𑌪𑌂𑌦𑌿𑌕𑍍𑌷𑍁 𑌸𑍍𑌵𑌚𑍍𑌛𑌂 𑌨𑌖𑌰𑍁𑌚𑌿𑌮𑌯𑌂 𑌭𑌾𑌸𑍍𑌮𑌨𑌰𑌜𑌃 ।
𑌨𑌤𑌾𑌨𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑍃𑌤𑌿𑌪𑌟𑍁𑌰𑌚𑍍𑌚𑌾𑌟𑍍𑌯 𑌮𑌮𑌤𑌾-
𑌪𑌿𑌶𑌾𑌚𑍀𑌂 𑌪𑌾𑌦𑍋𑌽𑌯𑌂 𑌪𑍍𑌰𑌕𑌟𑌯𑌤𑌿 𑌤𑍇 𑌮𑌾𑌂𑌤𑍍𑌰𑌿𑌕𑌦𑌶𑌾𑌮𑍍 ॥36॥

𑌉𑌦𑍀𑌤𑍇 𑌬𑍋𑌧𑍇𑌂𑌦𑍌 𑌤𑌮𑌸𑌿 𑌨𑌿𑌤𑌰𑌾𑌂 𑌜𑌗𑍍𑌮𑍁𑌷𑌿 𑌦𑌶𑌾𑌂
𑌦𑌰𑌿𑌦𑍍𑌰𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌮𑌨𑍁𑌰𑌾𑌗𑌂 𑌵𑌿𑌦𑌧𑌤𑍀 ।
𑌸𑌿𑌤𑍇𑌨𑌾𑌚𑍍𑌛𑌾𑌦𑍍𑌯𑌾𑌂𑌗𑌂 𑌨𑌖𑌰𑍁𑌚𑌿𑌪𑌟𑍇𑌨𑌾𑌂𑌘𑍍𑌰𑌿𑌯𑍁𑌗𑌲𑍀-
𑌪𑍁𑌰𑌂𑌧𑍍𑌰𑍀 𑌤𑍇 𑌮𑌾𑌤𑌃 𑌸𑍍𑌵𑌯𑌮𑌭𑌿𑌸𑌰𑌤𑍍𑌯𑍇𑌵 𑌹𑍃𑌦𑌯𑌮𑍍 ॥3𑍭॥

𑌦𑌿𑌨𑌾𑌰𑌂𑌭𑌃 𑌸𑌂𑌪𑌨𑍍𑌨𑌲𑌿𑌨𑌵𑌿𑌪𑌿𑌨𑌾𑌨𑌾𑌮𑌭𑌿𑌨𑌵𑍋
𑌵𑌿𑌕𑌾𑌸𑍋 𑌵𑌾𑌸𑌂𑌤𑌃 𑌸𑍁𑌕𑌵𑌿𑌪𑌿𑌕𑌲𑍋𑌕𑌸𑍍𑌯 𑌨𑌿𑌯𑌤𑌃 ।
𑌪𑍍𑌰𑌦𑍋𑌷𑌃 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌪𑌰𑌮𑌜𑍍𑌞𑌾𑌨𑌶𑌶𑌿𑌨-
𑌶𑍍𑌚𑌕𑌾𑌸𑍍𑌤𑌿 𑌤𑍍𑌵𑌤𑍍𑌪𑌾𑌦𑌸𑍍𑌮𑌰𑌣𑌮𑌹𑌿𑌮𑌾 𑌶𑍈𑌲𑌤𑌨𑌯𑍇 ॥3𑍮॥

𑌧𑍃𑌤𑌚𑍍𑌛𑌾𑌯𑌂 𑌨𑌿𑌤𑍍𑌯𑌂 𑌸𑌰𑌸𑌿𑌰𑍁𑌹𑌮𑍈𑌤𑍍𑌰𑍀𑌪𑌰𑌿𑌚𑌿𑌤𑌂
𑌨𑌿𑌧𑌾𑌨𑌂 𑌦𑍀𑌪𑍍𑌤𑍀𑌨𑌾𑌂 𑌨𑌿𑌖𑌿𑌲𑌜𑌗𑌤𑌾𑌂 𑌬𑍋𑌧𑌜𑌨𑌕𑌮𑍍 ।
𑌮𑍁𑌮𑍁𑌕𑍍𑌷𑍂𑌣𑌾𑌂 𑌮𑌾𑌰𑍍𑌗𑌪𑍍𑌰𑌥𑌨𑌪𑌟𑍁 𑌕𑌾𑌮𑌾𑌕𑍍𑌷𑌿 𑌪𑌦𑌵𑍀𑌂
𑌪𑌦𑌂 𑌤𑍇 𑌪𑌾𑌤𑌂𑌗𑍀𑌂 𑌪𑌰𑌿𑌕𑌲𑌯𑌤𑍇 𑌪𑌰𑍍𑌵𑌤𑌸𑍁𑌤𑍇 ॥3𑍯॥

𑌶𑌨𑍈𑌸𑍍𑌤𑍀𑌰𑍍𑌤𑍍𑌵𑌾 𑌮𑍋𑌹𑌾𑌂𑌬𑍁𑌧𑌿𑌮𑌥 𑌸𑌮𑌾𑌰𑍋𑌢𑍁𑌮𑌨𑌸𑌃
𑌕𑍍𑌰𑌮𑌾𑌤𑍍𑌕𑍈𑌵𑌲𑍍𑌯𑌾𑌖𑍍𑌯𑌾𑌂 𑌸𑍁𑌕𑍃𑌤𑌿𑌸𑍁𑌲𑌭𑌾𑌂 𑌸𑍌𑌧𑌵𑌲𑌭𑍀𑌮𑍍 ।
𑌲𑌭𑌂𑌤𑍇 𑌨𑌿𑌃𑌶𑍍𑌰𑍇𑌣𑍀𑌮𑌿𑌵 𑌝𑌟𑌿𑌤𑌿 𑌕𑌾𑌮𑌾𑌕𑍍𑌷𑌿 𑌚𑌰𑌣𑌂
𑌪𑍁𑌰𑌶𑍍𑌚𑌰𑍍𑌯𑌾𑌭𑌿𑌸𑍍𑌤𑍇 𑌪𑍁𑌰𑌮𑌥𑌨𑌸𑍀𑌮𑌂𑌤𑌿𑌨𑌿 𑌜𑌨𑌾𑌃 ॥40॥

𑌪𑍍𑌰𑌚𑌂𑌡𑌾𑌰𑍍𑌤𑌿𑌕𑍍𑌷𑍋𑌭𑌪𑍍𑌰𑌮𑌥𑌨𑌕𑍃𑌤𑍇 𑌪𑍍𑌰𑌾𑌤𑌿𑌭𑌸𑌰𑌿-
𑌤𑍍𑌪𑍍𑌰𑌵𑌾𑌹𑌪𑍍𑌰𑍋𑌦𑍍𑌦𑌂𑌡𑍀𑌕𑌰𑌣𑌜𑌲𑌦𑌾𑌯 𑌪𑍍𑌰𑌣𑌮𑌤𑌾𑌮𑍍 ।
𑌪𑍍𑌰𑌦𑍀𑌪𑌾𑌯 𑌪𑍍𑌰𑍌𑌢𑍇 𑌭𑌵𑌤𑌮𑌸𑌿 𑌕𑌾𑌮𑌾𑌕𑍍𑌷𑌿 𑌚𑌰𑌣-
𑌪𑍍𑌰𑌸𑌾𑌦𑍌𑌨𑍍𑌮𑍁𑌖𑍍𑌯𑌾𑌯 𑌸𑍍𑌪𑍃𑌹𑌯𑌤𑌿 𑌜𑌨𑍋𑌽𑌯𑌂 𑌜𑌨𑌨𑌿 𑌤𑍇 ॥41॥

𑌮𑌰𑍁𑌦𑍍𑌭𑌿𑌃 𑌸𑌂𑌸𑍇𑌵𑍍𑌯𑌾 𑌸𑌤𑌤𑌮𑌪𑌿 𑌚𑌾𑌂𑌚𑌲𑍍𑌯𑌰𑌹𑌿𑌤𑌾
𑌸𑌦𑌾𑌰𑍁𑌣𑍍𑌯𑌂 𑌯𑌾𑌂𑌤𑍀 𑌪𑌰𑌿𑌣𑌤𑌿𑌦𑌰𑌿𑌦𑍍𑌰𑌾𑌣𑌸𑍁𑌷𑌮𑌾 ।
𑌗𑍁𑌣𑍋𑌤𑍍𑌕𑌰𑍍𑌷𑌾𑌨𑍍𑌮𑌾𑌂𑌜𑍀𑌰𑌕𑌕𑌲𑌕𑌲𑍈𑌸𑍍𑌤𑌰𑍍𑌜𑌨𑌪𑌟𑍁𑌃
𑌪𑍍𑌰𑌵𑌾𑌲𑌂 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌰𑌿𑌹𑌸𑌤𑌿 𑌪𑌾𑌦𑌾𑌬𑍍𑌜𑌯𑍁𑌗𑌲𑍀 ॥42॥

𑌜𑌗𑌦𑍍𑌰𑌕𑍍𑌷𑌾𑌦𑌕𑍍𑌷𑌾 𑌜𑌲𑌜𑌰𑍁𑌚𑌿𑌶𑌿𑌕𑍍𑌷𑌾𑌪𑌟𑍁𑌤𑌰𑌾
𑌸𑌮𑍈𑌰𑍍𑌨𑌮𑍍𑌯𑌾 𑌰𑌮𑍍𑌯𑌾 𑌸𑌤𑌤𑌮𑌭𑌿𑌗𑌮𑍍𑌯𑌾 𑌬𑍁𑌧𑌜𑌨𑍈𑌃 ।
𑌦𑍍𑌵𑌯𑍀 𑌲𑍀𑌲𑌾𑌲𑍋𑌲𑌾 𑌶𑍍𑌰𑍁𑌤𑌿𑌷𑍁 𑌸𑍁𑌰𑌪𑌾𑌲𑌾𑌦𑌿𑌮𑍁𑌕𑍁𑌟𑍀-
𑌤𑌟𑍀𑌸𑍀𑌮𑌾𑌧𑌾𑌮𑌾 𑌤𑌵 𑌜𑌨𑌨𑌿 𑌕𑌾𑌮𑌾𑌕𑍍𑌷𑌿 𑌪𑌦𑌯𑍋𑌃 ॥43॥

𑌗𑌿𑌰𑌾𑌂 𑌦𑍂𑌰𑍌 𑌚𑍋𑌰𑍌 𑌜𑌡𑌿𑌮𑌤𑌿𑌮𑌿𑌰𑌾𑌣𑌾𑌂 𑌕𑍃𑌤𑌜𑌗-
𑌤𑍍𑌪𑌰𑌿𑌤𑍍𑌰𑌾𑌣𑍌 𑌶𑍋𑌣𑍌 𑌮𑍁𑌨𑌿𑌹𑍃𑌦𑌯𑌲𑍀𑌲𑍈𑌕𑌨𑌿𑌪𑍁𑌣𑍌 ।
𑌨𑌖𑍈𑌃 𑌸𑍍𑌮𑍇𑌰𑍌 𑌸𑌾𑌰𑍌 𑌨𑌿𑌗𑌮𑌵𑌚𑌸𑌾𑌂 𑌖𑌂𑌡𑌿𑌤𑌭𑌵-
𑌗𑍍𑌰𑌹𑍋𑌨𑍍𑌮𑌾𑌦𑍌 𑌪𑌾𑌦𑍌 𑌤𑌵 𑌜𑌨𑌨𑌿 𑌕𑌾𑌮𑌾𑌕𑍍𑌷𑌿 𑌕𑌲𑌯𑍇 ॥44॥

𑌅𑌵𑌿𑌶𑍍𑌰𑌾𑌂𑌤𑌂 𑌪𑌂𑌕𑌂 𑌯𑌦𑌪𑌿 𑌕𑌲𑌯𑌨𑍍𑌯𑌾𑌵𑌕𑌮𑌯𑌂
𑌨𑌿𑌰𑌸𑍍𑌯𑌨𑍍𑌕𑌾𑌮𑌾𑌕𑍍𑌷𑌿 𑌪𑍍𑌰𑌣𑌮𑌨𑌜𑍁𑌷𑌾𑌂 𑌪𑌂𑌕𑌮𑌖𑌿𑌲𑌮𑍍 ।
𑌤𑍁𑌲𑌾𑌕𑍋𑌟𑌿𑌦𑍍𑌵𑌂𑌦𑌂 𑌦𑌧𑌦𑌪𑌿 𑌚 𑌗𑌚𑍍𑌛𑌨𑍍𑌨𑌤𑍁𑌲𑌤𑌾𑌂
𑌗𑌿𑌰𑌾𑌂 𑌮𑌾𑌰𑍍𑌗𑌂 𑌪𑌾𑌦𑍋 𑌗𑌿𑌰𑌿𑌵𑌰𑌸𑍁𑌤𑍇 𑌲𑌂𑌘𑌯𑌤𑌿 𑌤𑍇 ॥45॥

𑌪𑍍𑌰𑌵𑌾𑌲𑌂 𑌸𑌵𑍍𑌰𑍀𑌲𑌂 𑌵𑌿𑌪𑌿𑌨𑌵𑌿𑌵𑌰𑍇 𑌵𑍇𑌪𑌯𑌤𑌿 𑌯𑌾
𑌸𑍍𑌫𑍁𑌰𑌲𑍍𑌲𑍀𑌲𑌂 𑌬𑌾𑌲𑌾𑌤𑌪𑌮𑌧𑌿𑌕𑌬𑌾𑌲𑌂 𑌵𑌦𑌤𑌿 𑌯𑌾 ।
𑌰𑍁𑌚𑌿𑌂 𑌸𑌾𑌂𑌧𑍍𑌯𑌾𑌂 𑌵𑌂𑌧𑍍𑌯𑌾𑌂 𑌵𑌿𑌰𑌚𑌯𑌤𑌿 𑌯𑌾 𑌵𑌰𑍍𑌧𑌯𑌤𑍁 𑌸𑌾
𑌶𑌿𑌵𑌂 𑌮𑍇 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌦𑌨𑌲𑌿𑌨𑌪𑌾𑌟𑌲𑍍𑌯𑌲𑌹𑌰𑍀 ॥46॥

𑌕𑌿𑌰𑌂𑌜𑍍𑌯𑍋𑌤𑍍𑌸𑍍𑌨𑌾𑌰𑍀𑌤𑌿𑌂 𑌨𑌖𑌮𑍁𑌖𑌰𑍁𑌚𑌾 𑌹𑌂𑌸𑌮𑌨𑌸𑌾𑌂
𑌵𑌿𑌤𑌨𑍍𑌵𑌾𑌨𑌃 𑌪𑍍𑌰𑍀𑌤𑌿𑌂 𑌵𑌿𑌕𑌚𑌤𑌰𑍁𑌣𑌾𑌂𑌭𑍋𑌰𑍁𑌹𑌰𑍁𑌚𑌿𑌃 ।
𑌪𑍍𑌰𑌕𑌾𑌶𑌃 𑌶𑍍𑌰𑍀𑌪𑌾𑌦𑌸𑍍𑌤𑌵 𑌜𑌨𑌨𑌿 𑌕𑌾𑌮𑌾𑌕𑍍𑌷𑌿 𑌤𑌨𑍁𑌤𑍇
𑌶𑌰𑌤𑍍𑌕𑌾𑌲𑌪𑍍𑌰𑍌𑌢𑌿𑌂 𑌶𑌶𑌿𑌶𑌕𑌲𑌚𑍂𑌡𑌪𑍍𑌰𑌿𑌯𑌤𑌮𑍇 ॥4𑍭॥

𑌨𑌖𑌾𑌂𑌕𑍂𑌰𑌸𑍍𑌮𑍇𑌰𑌦𑍍𑌯𑍁𑌤𑌿𑌵𑌿𑌮𑌲𑌗𑌂𑌗𑌾𑌂𑌭𑌸𑌿 𑌸𑍁𑌖𑌂
𑌕𑍃𑌤𑌸𑍍𑌨𑌾𑌨𑌂 𑌜𑍍𑌞𑌾𑌨𑌾𑌮𑍃𑌤𑌮𑌮𑌲𑌮𑌾𑌸𑍍𑌵𑌾𑌦𑍍𑌯 𑌨𑌿𑌯𑌤𑌮𑍍 ।
𑌉𑌦𑌂𑌚𑌨𑍍𑌮𑌂𑌜𑍀𑌰𑌸𑍍𑌫𑍁𑌰𑌣𑌮𑌣𑌿𑌦𑍀𑌪𑍇 𑌮𑌮 𑌮𑌨𑍋
𑌮𑌨𑍋𑌜𑍍𑌞𑍇 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌮𑌣𑌿𑌹𑌰𑍍𑌮𑍍𑌯𑍇 𑌵𑌿𑌹𑌰𑌤𑌾𑌮𑍍 ॥4𑍮॥

𑌭𑌵𑌾𑌂𑌭𑍋𑌧𑍌 𑌨𑍌𑌕𑌾𑌂 𑌜𑌡𑌿𑌮𑌵𑌿𑌪𑌿𑌨𑍇 𑌪𑌾𑌵𑌕𑌶𑌿𑌖𑌾-
𑌮𑌮𑌰𑍍𑌤𑍍𑌯𑍇𑌂𑌦𑍍𑌰𑌾𑌦𑍀𑌨𑌾𑌮𑌧𑌿𑌮𑍁𑌕𑍁𑌟𑌮𑍁𑌤𑍍𑌤𑌂𑌸𑌕𑌲𑌿𑌕𑌾𑌮𑍍 ।
𑌜𑌗𑌤𑍍𑌤𑌾𑌪𑍇 𑌜𑍍𑌯𑍋𑌤𑍍𑌸𑍍𑌨𑌾𑌮𑌕𑍃𑌤𑌕𑌵𑌚𑌃𑌪𑌂𑌜𑌰𑌪𑍁𑌟𑍇
𑌶𑍁𑌕𑌸𑍍𑌤𑍍𑌰𑍀𑌂 𑌕𑌾𑌮𑌾𑌕𑍍𑌷𑍍𑌯𑌾 𑌮𑌨𑌸𑌿 𑌕𑌲𑌯𑍇 𑌪𑌾𑌦𑌯𑍁𑌗𑌲𑍀𑌮𑍍 ॥4𑍯॥

𑌪𑌰𑌤𑍍𑌮𑌪𑍍𑌰𑌾𑌕𑌾𑌶𑍍𑌯𑌪𑍍𑌰𑌤𑌿𑌫𑌲𑌨𑌚𑍁𑌂𑌚𑍁𑌃 𑌪𑍍𑌰𑌣𑌮𑌤𑌾𑌂
𑌮𑌨𑍋𑌜𑍍𑌞𑌸𑍍𑌤𑍍𑌵𑌤𑍍𑌪𑌾𑌦𑍋 𑌮𑌣𑌿𑌮𑍁𑌕𑍁𑌰𑌮𑍁𑌦𑍍𑌰𑌾𑌂 𑌕𑌲𑌯𑌤𑍇 ।
𑌯𑌦𑍀𑌯𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑍃𑌤𑌿𑌮𑌸𑍃𑌣𑌾𑌃 𑌶𑍋𑌧𑌕𑌦𑌶𑌾𑌂
𑌵𑌿𑌧𑌾𑌤𑍁𑌂 𑌚𑍇𑌷𑍍𑌠𑌂𑌤𑍇 𑌬𑌲𑌰𑌿𑌪𑍁𑌵𑌧𑍂𑌟𑍀𑌕𑌚𑌭𑌰𑌾𑌃 ॥50॥

𑌅𑌵𑌿𑌶𑍍𑌰𑌾𑌂𑌤𑌂 𑌤𑌿𑌷𑍍𑌠𑌨𑍍𑌨𑌕𑍃𑌤𑌕𑌵𑌚𑌃𑌕𑌂𑌦𑌰𑌪𑍁𑌟𑍀-
𑌕𑍁𑌟𑍀𑌰𑌾𑌂𑌤𑌃 𑌪𑍍𑌰𑍌𑌢𑌂 𑌨𑌖𑌰𑍁𑌚𑌿𑌸𑌟𑌾𑌲𑍀𑌂 𑌪𑍍𑌰𑌕𑌟𑌯𑌨𑍍 ।
𑌪𑍍𑌰𑌚𑌂𑌡𑌂 𑌖𑌂𑌡𑌤𑍍𑌵𑌂 𑌨𑌯𑌤𑍁 𑌮𑌮 𑌕𑌾𑌮𑌾𑌕𑍍𑌷𑌿 𑌤𑌰𑌸𑌾
𑌤𑌮𑍋𑌵𑍇𑌤𑌂𑌡𑍇𑌂𑌦𑍍𑌰𑌂 𑌤𑌵 𑌚𑌰𑌣𑌕𑌂𑌠𑍀𑌰𑌵𑌪𑌤𑌿𑌃 ॥51॥

𑌪𑍁𑌰𑌸𑍍𑌤𑌾𑌤𑍍𑌕𑌾𑌮𑌾𑌕𑍍𑌷𑌿 𑌪𑍍𑌰𑌚𑍁𑌰𑌰𑌸𑌮𑌾𑌖𑌂𑌡𑌲𑌪𑍁𑌰𑍀-
𑌪𑍁𑌰𑌂𑌧𑍍𑌰𑍀𑌣𑌾𑌂 𑌲𑌾𑌸𑍍𑌯𑌂 𑌤𑌵 𑌲𑌲𑌿𑌤𑌮𑌾𑌲𑍋𑌕𑍍𑌯 𑌶𑌨𑌕𑍈𑌃 ।
𑌨𑌖𑌶𑍍𑌰𑍀𑌭𑌿𑌃 𑌸𑍍𑌮𑍇𑌰𑌾 𑌬𑌹𑍁 𑌵𑌿𑌤𑌨𑍁𑌤𑍇 𑌨𑍂𑌪𑍁𑌰𑌰𑌵𑍈-
𑌶𑍍𑌚𑌮𑌤𑍍𑌕𑍃𑌤𑍍𑌯𑌾 𑌶𑌂𑌕𑍇 𑌚𑌰𑌣𑌯𑍁𑌗𑌲𑍀 𑌚𑌾𑌟𑍁𑌰𑌚𑌨𑌾𑌃 ॥52॥

𑌸𑌰𑍋𑌜𑌂 𑌨𑌿𑌂𑌦𑌂𑌤𑍀 𑌨𑌖𑌕𑌿𑌰𑌣𑌕𑌰𑍍𑌪𑍂𑌰𑌶𑌿𑌶𑌿𑌰𑌾
𑌨𑌿𑌷𑌿𑌕𑍍𑌤𑌾 𑌮𑌾𑌰𑌾𑌰𑍇𑌰𑍍𑌮𑍁𑌕𑍁𑌟𑌶𑌶𑌿𑌰𑍇𑌖𑌾𑌹𑌿𑌮𑌜𑌲𑍈𑌃 ।
𑌸𑍍𑌫𑍁𑌰𑌂𑌤𑍀 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌟𑌰𑍁𑌚𑌿𑌮𑌯𑍇 𑌪𑌲𑍍𑌲𑌵𑌚𑌯𑍇
𑌤𑌵𑌾𑌧𑌤𑍍𑌤𑍇 𑌮𑍈𑌤𑍍𑌰𑍀𑌂 𑌪𑌥𑌿𑌕𑌸𑍁𑌦𑍃𑌶𑌾 𑌪𑌾𑌦𑌯𑍁𑌗𑌲𑍀 ॥53॥

𑌨𑌤𑌾𑌨𑌾𑌂 𑌸𑌂𑌪𑌤𑍍𑌤𑍇𑌰𑌨𑌵𑌰𑌤𑌮𑌾𑌕𑌰𑍍𑌷𑌣𑌜𑌪𑌃
𑌪𑍍𑌰𑌰𑍋𑌹𑌤𑍍𑌸𑌂𑌸𑌾𑌰𑌪𑍍𑌰𑌸𑌰𑌗𑌰𑌿𑌮𑌸𑍍𑌤𑌂𑌭𑌨𑌜𑌪𑌃 ।
𑌤𑍍𑌵𑌦𑍀𑌯𑌃 𑌕𑌾𑌮𑌾𑌕𑍍𑌷𑌿 𑌸𑍍𑌮𑌰𑌹𑌰𑌮𑌨𑍋𑌮𑍋𑌹𑌨𑌜𑌪𑌃
𑌪𑌟𑍀𑌯𑌾𑌨𑍍𑌨𑌃 𑌪𑌾𑌯𑌾𑌤𑍍𑌪𑌦𑌨𑌲𑌿𑌨𑌮𑌂𑌜𑍀𑌰𑌨𑌿𑌨𑌦𑌃 ॥54॥

𑌵𑌿𑌤𑌨𑍍𑌵𑍀𑌥𑌾 𑌨𑌾𑌥𑍇 𑌮𑌮 𑌶𑌿𑌰𑌸𑌿 𑌕𑌾𑌮𑌾𑌕𑍍𑌷𑌿 𑌕𑍃𑌪𑌯𑌾
𑌪𑌦𑌾𑌂𑌭𑍋𑌜𑌨𑍍𑌯𑌾𑌸𑌂 𑌪𑌶𑍁𑌪𑌰𑌿𑌬𑍃𑌢𑌪𑍍𑌰𑌾𑌣𑌦𑌯𑌿𑌤𑍇 ।
𑌪𑌿𑌬𑌂𑌤𑍋 𑌯𑌨𑍍𑌮𑍁𑌦𑍍𑌰𑌾𑌂 𑌪𑍍𑌰𑌕𑌟𑌮𑍁𑌪𑌕𑌂𑌪𑌾𑌪𑌰𑌿𑌸𑌰𑌂
𑌦𑍃𑌶𑌾 𑌨𑌾𑌨𑌂𑌦𑍍𑌯𑌂𑌤𑍇 𑌨𑌲𑌿𑌨𑌭𑌵𑌨𑌾𑌰𑌾𑌯𑌣𑌮𑍁𑌖𑌾𑌃 ॥55॥

𑌪𑍍𑌰𑌣𑌾𑌮𑍋𑌦𑍍𑌯𑌦𑍍𑌬𑍃𑌂𑌦𑌾𑌰𑌮𑍁𑌕𑍁𑌟𑌮𑌂𑌦𑌾𑌰𑌕𑌲𑌿𑌕𑌾-
𑌵𑌿𑌲𑍋𑌲𑌲𑍍𑌲𑍋𑌲𑌂𑌬𑌪𑍍𑌰𑌕𑌰𑌮𑌯𑌧𑍂𑌮𑌪𑍍𑌰𑌚𑍁𑌰𑌿𑌮𑌾 ।
𑌪𑍍𑌰𑌦𑍀𑌪𑍍𑌤𑌃 𑌪𑌾𑌦𑌾𑌬𑍍𑌜𑌦𑍍𑌯𑍁𑌤𑌿𑌵𑌿𑌤𑌤𑌿𑌪𑌾𑌟𑌲𑍍𑌯𑌲𑌹𑌰𑍀-
𑌕𑍃𑌶𑌾𑌨𑍁𑌃 𑌕𑌾𑌮𑌾𑌕𑍍𑌷𑍍𑌯𑌾 𑌮𑌮 𑌦𑌹𑌤𑍁 𑌸𑌂𑌸𑌾𑌰𑌵𑌿𑌪𑌿𑌨𑌮𑍍 ॥56॥

𑌵𑌲𑌕𑍍𑌷𑌶𑍍𑌰𑍀𑌰𑍃𑌕𑍍𑌷𑌾𑌧𑌿𑌪𑌶𑌿𑌶𑍁𑌸𑌦𑍃𑌕𑍍𑌷𑍈𑌸𑍍𑌤𑌵 𑌨𑌖𑍈𑌃
𑌜𑌿𑌘𑍃𑌕𑍍𑌷𑍁𑌰𑍍𑌦𑌕𑍍𑌷𑌤𑍍𑌵𑌂 𑌸𑌰𑌸𑌿𑌰𑍁𑌹𑌭𑌿𑌕𑍍𑌷𑍁𑌤𑍍𑌵𑌕𑌰𑌣𑍇 ।
𑌕𑍍𑌷𑌣𑌾𑌨𑍍𑌮𑍇 𑌕𑌾𑌮𑌾𑌕𑍍𑌷𑌿 𑌕𑍍𑌷𑌪𑌿𑌤𑌭𑌵𑌸𑌂𑌕𑍍𑌷𑍋𑌭𑌗𑌰𑌿𑌮𑌾
𑌵𑌚𑍋𑌵𑍈𑌚𑌕𑍍𑌷𑌨𑍍𑌯𑌂 𑌚𑌰𑌣𑌯𑍁𑌗𑌲𑍀 𑌪𑌕𑍍𑌷𑍍𑌮𑌲𑌯𑌤𑌾𑌤𑍍 ॥5𑍭॥

𑌸𑌮𑌂𑌤𑌾𑌤𑍍𑌕𑌾𑌮𑌾𑌕𑍍𑌷𑌿 𑌕𑍍𑌷𑌤𑌤𑌿𑌮𑌿𑌰𑌸𑌂𑌤𑌾𑌨𑌸𑍁𑌭𑌗𑌾𑌨𑍍
𑌅𑌨𑌂𑌤𑌾𑌭𑌿𑌰𑍍𑌭𑌾𑌭𑌿𑌰𑍍𑌦𑌿𑌨𑌮𑌨𑍁 𑌦𑌿𑌗𑌂𑌤𑌾𑌨𑍍𑌵𑌿𑌰𑌚𑌯𑌨𑍍 ।
𑌅𑌹𑌂𑌤𑌾𑌯𑌾 𑌹𑌂𑌤𑌾 𑌮𑌮 𑌜𑌡𑌿𑌮𑌦𑌂𑌤𑌾𑌵𑌲𑌹𑌰𑌿𑌃
𑌵𑌿𑌭𑌿𑌂𑌤𑌾𑌂 𑌸𑌂𑌤𑌾𑌪𑌂 𑌤𑌵 𑌚𑌰𑌣𑌚𑌿𑌂𑌤𑌾𑌮𑌣𑌿𑌰𑌸𑍌 ॥5𑍮॥

𑌦𑌧𑌾𑌨𑍋 𑌭𑌾𑌸𑍍𑌵𑌤𑍍𑌤𑌾𑌮𑌮𑍃𑌤𑌨𑌿𑌲𑌯𑍋 𑌲𑍋𑌹𑌿𑌤𑌵𑌪𑍁𑌃
𑌵𑌿𑌨𑌮𑍍𑌰𑌾𑌣𑌾𑌂 𑌸𑍌𑌮𑍍𑌯𑍋 𑌗𑍁𑌰𑍁𑌰𑌪𑌿 𑌕𑌵𑌿𑌤𑍍𑌵𑌂 𑌚 𑌕𑌲𑌯𑌨𑍍 ।
𑌗𑌤𑍌 𑌮𑌂𑌦𑍋 𑌗𑌂𑌗𑌾𑌧𑌰𑌮𑌹𑌿𑌷𑌿 𑌕𑌾𑌮𑌾𑌕𑍍𑌷𑌿 𑌭𑌜𑌤𑌾𑌂
𑌤𑌮𑌃𑌕𑍇𑌤𑍁𑌰𑍍𑌮𑌾𑌤𑌸𑍍𑌤𑌵 𑌚𑌰𑌣𑌪𑌦𑍍𑌮𑍋 𑌵𑌿𑌜𑌯𑌤𑍇 ॥5𑍯॥

𑌨𑌯𑌂𑌤𑍀𑌂 𑌦𑌾𑌸𑌤𑍍𑌵𑌂 𑌨𑌲𑌿𑌨𑌭𑌵𑌮𑍁𑌖𑍍𑌯𑌾𑌨𑌸𑍁𑌲𑌭-
𑌪𑍍𑌰𑌦𑌾𑌨𑌾𑌦𑍍𑌦𑍀𑌨𑌾𑌨𑌾𑌮𑌮𑌰𑌤𑌰𑍁𑌦𑍌𑌰𑍍𑌭𑌾𑌗𑍍𑌯𑌜𑌨𑌨𑍀𑌮𑍍 ।
𑌜𑌗𑌜𑍍𑌜𑌨𑍍𑌮𑌕𑍍𑌷𑍇𑌮𑌕𑍍𑌷𑌯𑌵𑌿𑌧𑌿𑌷𑍁 𑌕𑌾𑌮𑌾𑌕𑍍𑌷𑌿 𑌪𑌦𑌯𑍋-
𑌰𑍍𑌧𑍁𑌰𑍀𑌣𑌾𑌮𑍀𑌷𑍍𑌟𑍇 𑌕𑌰𑌸𑍍𑌤𑌵 𑌭𑌣𑌿𑌤𑍁𑌮𑌾𑌹𑍋𑌪𑍁𑌰𑍁𑌷𑌿𑌕𑌾𑌮𑍍 ॥60॥

𑌜𑌨𑍋𑌽𑌯𑌂 𑌸𑌂𑌤𑌪𑍍𑌤𑍋 𑌜𑌨𑌨𑌿 𑌭𑌵𑌚𑌂𑌡𑌾𑌂𑌶𑍁𑌕𑌿𑌰𑌣𑍈𑌃
𑌅𑌲𑌬𑍍𑌧𑌵𑍈𑌕𑌂 𑌶𑍀𑌤𑌂 𑌕𑌣𑌮𑌪𑌿 𑌪𑌰𑌜𑍍𑌞𑌾𑌨𑌪𑌯𑌸𑌃 ।
𑌤𑌮𑍋𑌮𑌾𑌰𑍍𑌗𑍇 𑌪𑌾𑌂𑌥𑌸𑍍𑌤𑌵 𑌝𑌟𑌿𑌤𑌿 𑌕𑌾𑌮𑌾𑌕𑍍𑌷𑌿 𑌶𑌿𑌶𑌿𑌰𑌾𑌂
𑌪𑌦𑌾𑌂𑌭𑍋𑌜𑌚𑍍𑌛𑌾𑌯𑌾𑌂 𑌪𑌰𑌮𑌶𑌿𑌵𑌜𑌾𑌯𑍇 𑌮𑍃𑌗𑌯𑌤𑍇 ॥61॥

𑌜𑌯𑌤𑍍𑌯𑌂𑌬 𑌶𑍍𑌰𑍀𑌮𑌨𑍍𑌨𑌖𑌕𑌿𑌰𑌣𑌚𑍀𑌨𑌾𑌂𑌶𑍁𑌕𑌮𑌯𑌂
𑌵𑌿𑌤𑌾𑌨𑌂 𑌬𑌿𑌭𑍍𑌰𑌾𑌣𑍇 𑌸𑍁𑌰𑌮𑍁𑌕𑍁𑌟𑌸𑌂𑌘𑌟𑍍𑌟𑌮𑌸𑍃𑌣𑍇 ।
𑌨𑌿𑌜𑌾𑌰𑍁𑌣𑍍𑌯𑌕𑍍𑌷𑍌𑌮𑌾𑌸𑍍𑌤𑌰𑌣𑌵𑌤𑌿 𑌕𑌾𑌮𑌾𑌕𑍍𑌷𑌿 𑌸𑍁𑌲𑌭𑌾
𑌬𑍁𑌧𑍈𑌃 𑌸𑌂𑌵𑌿𑌨𑍍𑌨𑌾𑌰𑍀 𑌤𑌵 𑌚𑌰𑌣𑌮𑌾𑌣𑌿𑌕𑍍𑌯𑌭𑌵𑌨𑍇 ॥62॥

𑌪𑍍𑌰𑌤𑍀𑌮𑌃 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌰𑌿𑌤𑌤𑌰𑍁𑌣𑌾𑌦𑌿𑌤𑍍𑌯𑌕𑌿𑌰𑌣-
𑌶𑍍𑌰𑌿𑌯𑍋 𑌮𑍂𑌲𑌦𑍍𑌰𑌵𑍍𑌯𑌂 𑌤𑌵 𑌚𑌰𑌣𑌮𑌦𑍍𑌰𑍀𑌂𑌦𑍍𑌰𑌤𑌨𑌯𑍇 ।
𑌸𑍁𑌰𑍇𑌂𑌦𑍍𑌰𑌾𑌶𑌾𑌮𑌾𑌪𑍂𑌰𑌯𑌤𑌿 𑌯𑌦𑌸𑍌 𑌧𑍍𑌵𑌾𑌂𑌤𑌮𑌖𑌿𑌲𑌂
𑌧𑍁𑌨𑍀𑌤𑍇 𑌦𑌿𑌗𑍍𑌭𑌾𑌗𑌾𑌨𑌪𑌿 𑌚 𑌮𑌹𑌸𑌾 𑌪𑌾𑌟𑌲𑌯𑌤𑍇 ॥63॥

𑌮𑌹𑌾𑌭𑌾𑌷𑍍𑌯𑌵𑍍𑌯𑌾𑌖𑍍𑌯𑌾𑌪𑌟𑍁𑌶𑌯𑌨𑌮𑌾𑌰𑍋𑌪𑌯𑌤𑌿 𑌵𑌾
𑌸𑍍𑌮𑌰𑌵𑍍𑌯𑌾𑌪𑌾𑌰𑍇𑌰𑍍𑌷𑍍𑌯𑌾𑌪𑌿𑌶𑍁𑌨𑌨𑌿𑌟𑌿𑌲𑌂 𑌕𑌾𑌰𑌯𑌤𑌿 𑌵𑌾 ।
𑌦𑍍𑌵𑌿𑌰𑍇𑌫𑌾𑌣𑌾𑌮𑌧𑍍𑌯𑌾𑌸𑌯𑌤𑌿 𑌸𑌤𑌤𑌂 𑌵𑌾𑌧𑌿𑌵𑌸𑌤𑌿𑌂
𑌪𑍍𑌰𑌣𑌮𑍍𑌰𑌾𑌨𑍍𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌦𑌨𑌲𑌿𑌨𑌮𑌾𑌹𑌾𑌤𑍍𑌮𑍍𑌯𑌗𑌰𑌿𑌮𑌾 ॥64॥

𑌵𑌿𑌵𑍇𑌕𑌾𑌂𑌭𑌸𑍍𑌸𑍍𑌰𑍋𑌤𑌸𑍍𑌸𑍍𑌨𑌪𑌨𑌪𑌰𑌿𑌪𑌾𑌟𑍀𑌶𑌿𑌶𑌿𑌰𑌿𑌤𑍇
𑌸𑌮𑍀𑌭𑍂𑌤𑍇 𑌶𑌾𑌸𑍍𑌤𑍍𑌰𑌸𑍍𑌮𑌰𑌣𑌹𑌲𑌸𑌂𑌕𑌰𑍍𑌷𑌣𑌵𑌶𑌾𑌤𑍍 ।
𑌸𑌤𑌾𑌂 𑌚𑍇𑌤𑌃𑌕𑍍𑌷𑍇𑌤𑍍𑌰𑍇 𑌵𑌪𑌤𑌿 𑌤𑌵 𑌕𑌾𑌮𑌾𑌕𑍍𑌷𑌿 𑌚𑌰𑌣𑍋
𑌮𑌹𑌾𑌸𑌂𑌵𑌿𑌤𑍍𑌸𑌸𑍍𑌯𑌪𑍍𑌰𑌕𑌰𑌵𑌰𑌬𑍀𑌜𑌂 𑌗𑌿𑌰𑌿𑌸𑍁𑌤𑍇 ॥65॥

𑌦𑌧𑌾𑌨𑍋 𑌮𑌂𑌦𑌾𑌰𑌸𑍍𑌤𑌬𑌕𑌪𑌰𑌿𑌪𑌾𑌟𑍀𑌂 𑌨𑌖𑌰𑍁𑌚𑌾
𑌵𑌹𑌂𑌦𑍀𑌪𑍍𑌤𑌾𑌂 𑌶𑍋𑌣𑌾𑌂𑌗𑍁𑌲𑌿𑌪𑌟𑌲𑌚𑌾𑌂𑌪𑍇𑌯𑌕𑌲𑌿𑌕𑌾𑌮𑍍 ।
𑌅𑌶𑍋𑌕𑍋𑌲𑍍𑌲𑌾𑌸𑌂 𑌨𑌃 𑌪𑍍𑌰𑌚𑍁𑌰𑌯𑌤𑍁 𑌕𑌾𑌮𑌾𑌕𑍍𑌷𑌿 𑌚𑌰𑌣𑍋
𑌵𑌿𑌕𑌾𑌸𑍀 𑌵𑌾𑌸𑌂𑌤𑌃 𑌸𑌮𑌯 𑌇𑌵 𑌤𑍇 𑌶𑌰𑍍𑌵𑌦𑌯𑌿𑌤𑍇 ॥66॥

𑌨𑌖𑌾𑌂𑌶𑍁𑌪𑍍𑌰𑌾𑌚𑍁𑌰𑍍𑌯𑌪𑍍𑌰𑌸𑍃𑌮𑌰𑌮𑌰𑌾𑌲𑌾𑌲𑌿𑌧𑌵𑌲𑌃
𑌸𑍍𑌫𑍁𑌰𑌨𑍍𑌮𑌂𑌜𑍀𑌰𑍋𑌦𑍍𑌯𑌨𑍍𑌮𑌰𑌕𑌤𑌮𑌹𑌶𑍍𑌶𑍈𑌵𑌲𑌯𑍁𑌤𑌃 ।
𑌭𑌵𑌤𑍍𑌯𑌾𑌃 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌟𑌚𑌰𑌣𑌪𑌾𑌟𑌲𑍍𑌯𑌕𑌪𑌟𑍋
𑌨𑌦𑌃 𑌶𑍋𑌣𑌾𑌭𑌿𑌖𑍍𑌯𑍋 𑌨𑌗𑌪𑌤𑌿𑌤𑌨𑍂𑌜𑍇 𑌵𑌿𑌜𑌯𑌤𑍇 ॥6𑍭॥

𑌧𑍁𑌨𑌾𑌨𑌂 𑌪𑌂𑌕𑍌𑌘𑌂 𑌪𑌰𑌮𑌸𑍁𑌲𑌭𑌂 𑌕𑌂𑌟𑌕𑌕𑍁𑌲𑍈𑌃
𑌵𑌿𑌕𑌾𑌸𑌵𑍍𑌯𑌾𑌸𑌂𑌗𑌂 𑌵𑌿𑌦𑌧𑌦𑌪𑌰𑌾𑌧𑍀𑌨𑌮𑌨𑌿𑌶𑌮𑍍 ।
𑌨𑌖𑍇𑌂𑌦𑍁𑌜𑍍𑌯𑍋𑌤𑍍𑌸𑍍𑌨𑌾𑌭𑌿𑌰𑍍𑌵𑌿𑌶𑌦𑌰𑍁𑌚𑌿 𑌕𑌾𑌮𑌾𑌕𑍍𑌷𑌿 𑌨𑌿𑌤𑌰𑌾𑌮𑍍
𑌅𑌸𑌾𑌮𑌾𑌨𑍍𑌯𑌂 𑌮𑌨𑍍𑌯𑍇 𑌸𑌰𑌸𑌿𑌜𑌮𑌿𑌦𑌂 𑌤𑍇 𑌪𑌦𑌯𑍁𑌗𑌮𑍍 ॥6𑍮॥

𑌕𑌰𑍀𑌂𑌦𑍍𑌰𑌾𑌯 𑌦𑍍𑌰𑍁𑌹𑍍𑌯𑌤𑍍𑌯𑌲𑌸𑌗𑌤𑌿𑌲𑍀𑌲𑌾𑌸𑍁 𑌵𑌿𑌮𑌲𑍈𑌃
𑌪𑌯𑍋𑌜𑍈𑌰𑍍𑌮𑌾𑌤𑍍𑌸𑌰𑍍𑌯𑌂 𑌪𑍍𑌰𑌕𑌟𑌯𑌤𑌿 𑌕𑌾𑌮𑌂 𑌕𑌲𑌯𑌤𑍇 ।
𑌪𑌦𑌾𑌂𑌭𑍋𑌜𑌦𑍍𑌵𑌂𑌦𑍍𑌵𑌂 𑌤𑌵 𑌤𑌦𑌪𑌿 𑌕𑌾𑌮𑌾𑌕𑍍𑌷𑌿 𑌹𑍃𑌦𑌯𑌂
𑌮𑍁𑌨𑍀𑌨𑌾𑌂 𑌶𑌾𑌂𑌤𑌾𑌨𑌾𑌂 𑌕𑌥𑌮𑌨𑌿𑌶𑌮𑌸𑍍𑌮𑍈 𑌸𑍍𑌪𑍃𑌹𑌯𑌤𑍇 ॥6𑍯॥

𑌨𑌿𑌰𑌸𑍍𑌤𑌾 𑌶𑍋𑌣𑌿𑌮𑍍𑌨𑌾 𑌚𑌰𑌣𑌕𑌿𑌰𑌣𑌾𑌨𑌾𑌂 𑌤𑌵 𑌶𑌿𑌵𑍇
𑌸𑌮𑌿𑌂𑌧𑌾𑌨𑌾 𑌸𑌂𑌧𑍍𑌯𑌾𑌰𑍁𑌚𑌿𑌰𑌚𑌲𑌰𑌾𑌜𑌨𑍍𑌯𑌤𑌨𑌯𑍇 ।
𑌅𑌸𑌾𑌮𑌰𑍍𑌥𑍍𑌯𑌾𑌦𑍇𑌨𑌂 𑌪𑌰𑌿𑌭𑌵𑌿𑌤𑍁𑌮𑍇𑌤𑌤𑍍𑌸𑌮𑌰𑍁𑌚𑌾𑌂
𑌸𑌰𑍋𑌜𑌾𑌨𑌾𑌂 𑌜𑌾𑌨𑍇 𑌮𑍁𑌕𑍁𑌲𑌯𑌤𑌿 𑌶𑍋𑌭𑌾𑌂 𑌪𑍍𑌰𑌤𑌿𑌦𑌿𑌨𑌮𑍍 ॥𑍭0॥

𑌉𑌪𑌾𑌦𑌿𑌕𑍍𑌷𑌦𑍍𑌦𑌾𑌕𑍍𑌷𑍍𑌯𑌂 𑌤𑌵 𑌚𑌰𑌣𑌨𑌾𑌮𑌾 𑌗𑍁𑌰𑍁𑌰𑌸𑍌
𑌮𑌰𑌾𑌲𑌾𑌨𑌾𑌂 𑌶𑌂𑌕𑍇 𑌮𑌸𑍃𑌣𑌗𑌤𑌿𑌲𑌾𑌲𑌿𑌤𑍍𑌯𑌸𑌰𑌣𑍌 ।
𑌅𑌤𑌸𑍍𑌤𑍇 𑌨𑌿𑌸𑍍𑌤𑌂𑌦𑍍𑌰𑌂 𑌨𑌿𑌯𑌤𑌮𑌮𑍁𑌨𑌾 𑌸𑌖𑍍𑌯𑌪𑌦𑌵𑍀𑌂
𑌪𑍍𑌰𑌪𑌨𑍍𑌨𑌂 𑌪𑌾𑌥𑍋𑌜𑌂 𑌪𑍍𑌰𑌤𑌿 𑌦𑌧𑌤𑌿 𑌕𑌾𑌮𑌾𑌕𑍍𑌷𑌿 𑌕𑍁𑌤𑍁𑌕𑌮𑍍 ॥𑍭1॥

𑌦𑌧𑌾𑌨𑍈𑌃 𑌸𑌂𑌸𑌰𑍍𑌗𑌂 𑌪𑍍𑌰𑌕𑍃𑌤𑌿𑌮𑌲𑌿𑌨𑍈𑌃 𑌷𑌟𑍍𑌪𑌦𑌕𑍁𑌲𑍈𑌃
𑌦𑍍𑌵𑌿𑌜𑌾𑌧𑍀𑌶𑌶𑍍𑌲𑌾𑌘𑌾𑌵𑌿𑌧𑌿𑌷𑍁 𑌵𑌿𑌦𑌧𑌦𑍍𑌭𑌿𑌰𑍍𑌮𑍁𑌕𑍁𑌲𑌤𑌾𑌮𑍍 ।
𑌰𑌜𑍋𑌮𑌿𑌶𑍍𑌰𑍈𑌃 𑌪𑌦𑍍𑌮𑍈𑌰𑍍𑌨𑌿𑌯𑌤𑌮𑌪𑌿 𑌕𑌾𑌮𑌾𑌕𑍍𑌷𑌿 𑌪𑌦𑌯𑍋𑌃
𑌵𑌿𑌰𑍋𑌧𑌸𑍍𑌤𑍇 𑌯𑍁𑌕𑍍𑌤𑍋 𑌵𑌿𑌷𑌮𑌶𑌰𑌵𑍈𑌰𑌿𑌪𑍍𑌰𑌿𑌯𑌤𑌮𑍇 ॥𑍭2॥

𑌕𑌵𑌿𑌤𑍍𑌵𑌶𑍍𑌰𑍀𑌮𑌿𑌶𑍍𑌰𑍀𑌕𑌰𑌣𑌨𑌿𑌪𑍁𑌣𑍌 𑌰𑌕𑍍𑌷𑌣𑌚𑌣𑍌
𑌵𑌿𑌪𑌨𑍍𑌨𑌾𑌨𑌾𑌂 𑌶𑍍𑌰𑍀𑌮𑌨𑍍𑌨𑌲𑌿𑌨𑌮𑌸𑍃𑌣𑍌 𑌶𑍋𑌣𑌕𑌿𑌰𑌣𑍌 ।
𑌮𑍁𑌨𑍀𑌂𑌦𑍍𑌰𑌾𑌣𑌾𑌮𑌂𑌤𑌃𑌕𑌰𑌣𑌶𑌰𑌣𑍌 𑌮𑌂𑌦𑌸𑌰𑌣𑍌
𑌮𑌨𑍋𑌜𑍍𑌞𑍌 𑌕𑌾𑌮𑌾𑌕𑍍𑌷𑍍𑌯𑌾 𑌦𑍁𑌰𑌿𑌤𑌹𑌰𑌣𑍌 𑌨𑍌𑌮𑌿 𑌚𑌰𑌣𑍌 ॥𑍭3॥

𑌪𑌰𑌸𑍍𑌮𑌾𑌤𑍍𑌸𑌰𑍍𑌵𑌸𑍍𑌮𑌾𑌦𑌪𑌿 𑌚 𑌪𑌰𑌯𑍋𑌰𑍍𑌮𑍁𑌕𑍍𑌤𑌿𑌕𑌰𑌯𑍋𑌃
𑌨𑌖𑌶𑍍𑌰𑍀𑌭𑌿𑌰𑍍𑌜𑍍𑌯𑍋𑌤𑍍𑌸𑍍𑌨𑌾𑌕𑌲𑌿𑌤𑌤𑍁𑌲𑌯𑍋𑌸𑍍𑌤𑌾𑌮𑍍𑌰𑌤𑌲𑌯𑍋𑌃 ।
𑌨𑌿𑌲𑍀𑌯𑍇 𑌕𑌾𑌮𑌾𑌕𑍍𑌷𑍍𑌯𑌾 𑌨𑌿𑌗𑌮𑌨𑍁𑌤𑌯𑍋𑌰𑍍𑌨𑌾𑌕𑌿𑌨𑌤𑌯𑍋𑌃
𑌨𑌿𑌰𑌸𑍍𑌤𑌪𑍍𑌰𑍋𑌨𑍍𑌮𑍀𑌲𑌨𑍍𑌨𑌲𑌿𑌨𑌮𑌦𑌯𑍋𑌰𑍇𑌵 𑌪𑌦𑌯𑍋𑌃 ॥𑍭4॥

𑌸𑍍𑌵𑌭𑌾𑌵𑌾𑌦𑌨𑍍𑌯𑍋𑌨𑍍𑌯𑌂 𑌕𑌿𑌸𑌲𑌯𑌮𑌪𑍀𑌦𑌂 𑌤𑌵 𑌪𑌦𑌂
𑌮𑍍𑌰𑌦𑌿𑌮𑍍𑌨𑌾 𑌶𑍋𑌣𑌿𑌮𑍍𑌨𑌾 𑌭𑌗𑌵𑌤𑌿 𑌦𑌧𑌾𑌤𑍇 𑌸𑌦𑍃𑌶𑌤𑌾𑌮𑍍 ।
𑌵𑌨𑍇 𑌪𑍂𑌰𑍍𑌵𑌸𑍍𑌯𑍇𑌚𑍍𑌛𑌾 𑌸𑌤𑌤𑌮𑌵𑌨𑍇 𑌕𑌿𑌂 𑌤𑍁 𑌜𑌗𑌤𑌾𑌂
𑌪𑌰𑌸𑍍𑌯𑍇𑌤𑍍𑌥𑌂 𑌭𑍇𑌦𑌃 𑌸𑍍𑌫𑍁𑌰𑌤𑌿 𑌹𑍃𑌦𑌿 𑌕𑌾𑌮𑌾𑌕𑍍𑌷𑌿 𑌸𑍁𑌧𑌿𑌯𑌾𑌮𑍍 ॥𑍭5॥

𑌕𑌥𑌂 𑌵𑌾𑌚𑌾𑌲𑍋𑌽𑌪𑌿 𑌪𑍍𑌰𑌕𑌟𑌮𑌣𑌿𑌮𑌂𑌜𑍀𑌰𑌨𑌿𑌨𑌦𑍈𑌃
𑌸𑌦𑍈𑌵𑌾𑌨𑌂𑌦𑌾𑌰𑍍𑌦𑍍𑌰𑌾𑌨𑍍𑌵𑌿𑌰𑌚𑌯𑌤𑌿 𑌵𑌾𑌚𑌂𑌯𑌮𑌜𑌨𑌾𑌨𑍍 ।
𑌪𑍍𑌰𑌕𑍃𑌤𑍍𑌯𑌾 𑌤𑍇 𑌶𑍋𑌣𑌚𑍍𑌛𑌵𑌿𑌰𑌪𑌿 𑌚 𑌕𑌾𑌮𑌾𑌕𑍍𑌷𑌿 𑌚𑌰𑌣𑍋
𑌮𑌨𑍀𑌷𑌾𑌨𑍈𑌰𑍍𑌮𑌲𑍍𑌯𑌂 𑌕𑌥𑌮𑌿𑌵 𑌨𑍃𑌣𑌾𑌂 𑌮𑌾𑌂𑌸𑌲𑌯𑌤𑍇 ॥𑍭6॥

𑌚𑌲𑌤𑍍𑌤𑍃𑌷𑍍𑌣𑌾𑌵𑍀𑌚𑍀𑌪𑌰𑌿𑌚𑌲𑌨𑌪𑌰𑍍𑌯𑌾𑌕𑍁𑌲𑌤𑌯𑌾
𑌮𑍁𑌹𑍁𑌰𑍍𑌭𑍍𑌰𑌾𑌂𑌤𑌸𑍍𑌤𑌾𑌂𑌤𑌃 𑌪𑌰𑌮𑌶𑌿𑌵𑌵𑌾𑌮𑌾𑌕𑍍𑌷𑌿 𑌪𑌰𑌵𑌾𑌨𑍍 ।
𑌤𑌿𑌤𑍀𑌰𑍍𑌷𑍁𑌃 𑌕𑌾𑌮𑌾𑌕𑍍𑌷𑌿 𑌪𑍍𑌰𑌚𑍁𑌰𑌤𑌰𑌕𑌰𑍍𑌮𑌾𑌂𑌬𑍁𑌧𑌿𑌮𑌮𑍁𑌂
𑌕𑌦𑌾𑌹𑌂 𑌲𑌪𑍍𑌸𑍍𑌯𑍇 𑌤𑍇 𑌚𑌰𑌣𑌮𑌣𑌿𑌸𑍇𑌤𑍁𑌂 𑌗𑌿𑌰𑌿𑌸𑍁𑌤𑍇 ॥𑍭𑍭॥

𑌵𑌿𑌶𑍁𑌷𑍍𑌯𑌂𑌤𑍍𑌯𑌾𑌂 𑌪𑍍𑌰𑌜𑍍𑌞𑌾𑌸𑌰𑌿𑌤𑌿 𑌦𑍁𑌰𑌿𑌤𑌗𑍍𑌰𑍀𑌷𑍍𑌮𑌸𑌮𑌯-
𑌪𑍍𑌰𑌭𑌾𑌵𑍇𑌣 𑌕𑍍𑌷𑍀𑌣𑍇 𑌸𑌤𑌿 𑌮𑌮 𑌮𑌨𑌃𑌕𑍇𑌕𑌿𑌨𑌿 𑌶𑍁𑌚𑌾 ।
𑌤𑍍𑌵𑌦𑍀𑌯𑌃 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌰𑌿𑌤𑌚𑌰𑌣𑌾𑌂𑌭𑍋𑌦𑌮𑌹𑌿𑌮𑌾
𑌨𑌭𑍋𑌮𑌾𑌸𑌾𑌟𑍋𑌪𑌂 𑌨𑌗𑌪𑌤𑌿𑌸𑍁𑌤𑍇 𑌕𑌿𑌂 𑌨 𑌕𑍁𑌰𑍁𑌤𑍇 ॥𑍭𑍮॥

𑌵𑌿𑌨𑌮𑍍𑌰𑌾𑌣𑌾𑌂 𑌚𑍇𑌤𑍋𑌭𑌵𑌨𑌵𑌲𑌭𑍀𑌸𑍀𑌮𑍍𑌨𑌿 𑌚𑌰𑌣-
𑌪𑍍𑌰𑌦𑍀𑌪𑍇 𑌪𑍍𑌰𑌾𑌕𑌾𑌶𑍍𑌯𑌂 𑌦𑌧𑌤𑌿 𑌤𑌵 𑌨𑌿𑌰𑍍𑌧𑍂𑌤𑌤𑌮𑌸𑌿 ।
𑌅𑌸𑍀𑌮𑌾 𑌕𑌾𑌮𑌾𑌕𑍍𑌷𑌿 𑌸𑍍𑌵𑌯𑌮𑌲𑌘𑍁𑌦𑍁𑌷𑍍𑌕𑌰𑍍𑌮𑌲𑌹𑌰𑍀
𑌵𑌿𑌘𑍂𑌰𑍍𑌣𑌂𑌤𑍀 𑌶𑌾𑌂𑌤𑌿𑌂 𑌶𑌲𑌭𑌪𑌰𑌿𑌪𑌾𑌟𑍀𑌵 𑌭𑌜𑌤𑍇 ॥𑍭𑍯॥

𑌵𑌿𑌰𑌾𑌜𑌂𑌤𑍀 𑌶𑍁𑌕𑍍𑌤𑌿𑌰𑍍𑌨𑌖𑌕𑌿𑌰𑌣𑌮𑍁𑌕𑍍𑌤𑌾𑌮𑌣𑌿𑌤𑌤𑍇𑌃
𑌵𑌿𑌪𑌤𑍍𑌪𑌾𑌥𑍋𑌰𑌾𑌶𑍌 𑌤𑌰𑌿𑌰𑌪𑌿 𑌨𑌰𑌾𑌣𑌾𑌂 𑌪𑍍𑌰𑌣𑌮𑌤𑌾𑌮𑍍 ।
𑌤𑍍𑌵𑌦𑍀𑌯𑌃 𑌕𑌾𑌮𑌾𑌕𑍍𑌷𑌿 𑌧𑍍𑌰𑍁𑌵𑌮𑌲𑌘𑍁𑌵𑌹𑍍𑌨𑌿𑌰𑍍𑌭𑌵𑌵𑌨𑍇
𑌮𑍁𑌨𑍀𑌨𑌾𑌂 𑌜𑍍𑌞𑌾𑌨𑌾𑌗𑍍𑌨𑍇𑌰𑌰𑌣𑌿𑌰𑌯𑌮𑌂𑌘𑌿𑌰𑍍𑌵𑌿𑌜𑌯𑌤𑍇 ॥𑍮0॥

𑌸𑌮𑌸𑍍𑌤𑍈𑌃 𑌸𑌂𑌸𑍇𑌵𑍍𑌯𑌃 𑌸𑌤𑌤𑌮𑌪𑌿 𑌕𑌾𑌮𑌾𑌕𑍍𑌷𑌿 𑌵𑌿𑌬𑍁𑌧𑍈𑌃
𑌸𑍍𑌤𑍁𑌤𑍋 𑌗𑌂𑌧𑌰𑍍𑌵𑌸𑍍𑌤𑍍𑌰𑍀𑌸𑍁𑌲𑌲𑌿𑌤𑌵𑌿𑌪𑌂𑌚𑍀𑌕𑌲𑌰𑌵𑍈𑌃 ।
𑌭𑌵𑌤𑍍𑌯𑌾 𑌭𑌿𑌂𑌦𑌾𑌨𑍋 𑌭𑌵𑌗𑌿𑌰𑌿𑌕𑍁𑌲𑌂 𑌜𑍃𑌂𑌭𑌿𑌤𑌤𑌮𑍋-
𑌬𑌲𑌦𑍍𑌰𑍋𑌹𑍀 𑌮𑌾𑌤𑌶𑍍𑌚𑌰𑌣𑌪𑍁𑌰𑍁𑌹𑍂𑌤𑍋 𑌵𑌿𑌜𑌯𑌤𑍇 ॥𑍮1॥

𑌵𑌸𑌂𑌤𑌂 𑌭𑌕𑍍𑌤𑌾𑌨𑌾𑌮𑌪𑌿 𑌮𑌨𑌸𑌿 𑌨𑌿𑌤𑍍𑌯𑌂 𑌪𑌰𑌿𑌲𑌸𑌦𑍍-
𑌘𑌨𑌚𑍍𑌛𑌾𑌯𑌾𑌪𑍂𑌰𑍍𑌣𑌂 𑌶𑍁𑌚𑌿𑌮𑌪𑌿 𑌨𑍃𑌣𑌾𑌂 𑌤𑌾𑌪𑌶𑌮𑌨𑌮𑍍 ।
𑌨𑌖𑍇𑌂𑌦𑍁𑌜𑍍𑌯𑍋𑌤𑍍𑌸𑍍𑌨𑌾𑌭𑌿𑌃 𑌶𑌿𑌶𑌿𑌰𑌮𑌪𑌿 𑌪𑌦𑍍𑌮𑍋𑌦𑌯𑌕𑌰𑌂
𑌨𑌮𑌾𑌮𑌃 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌮𑌧𑌿𑌕𑌾𑌶𑍍𑌚𑌰𑍍𑌯𑌕𑌰𑌣𑌮𑍍 ॥𑍮2॥

𑌕𑌵𑍀𑌂𑌦𑍍𑌰𑌾𑌣𑌾𑌂 𑌨𑌾𑌨𑌾𑌭𑌣𑌿𑌤𑌿𑌗𑍁𑌣𑌚𑌿𑌤𑍍𑌰𑍀𑌕𑍃𑌤𑌵𑌚𑌃-
𑌪𑍍𑌰𑌪𑌂𑌚𑌵𑍍𑌯𑌾𑌪𑌾𑌰𑌪𑍍𑌰𑌕𑌟𑌨𑌕𑌲𑌾𑌕𑍌𑌶𑌲𑌨𑌿𑌧𑌿𑌃 ।
𑌅𑌧𑌃𑌕𑍁𑌰𑍍𑌵𑌨𑍍𑌨𑌬𑍍𑌜𑌂 𑌸𑌨𑌕𑌭𑍃𑌗𑍁𑌮𑍁𑌖𑍍𑌯𑍈𑌰𑍍𑌮𑍁𑌨𑌿𑌜𑌨𑍈𑌃
𑌨𑌮𑌸𑍍𑌯𑌃 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌪𑌰𑌮𑍇𑌷𑍍𑌠𑍀 𑌵𑌿𑌜𑌯𑌤𑍇 ॥𑍮3॥

𑌭𑌵𑌤𑍍𑌯𑌾𑌃 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌰𑌿𑌤𑌪𑌦𑌪𑌂𑌕𑍇𑌰𑍁𑌹𑌭𑍁𑌵𑌾𑌂
𑌪𑌰𑌾𑌗𑌾𑌣𑌾𑌂 𑌪𑍂𑌰𑍈𑌃 𑌪𑌰𑌿𑌹𑍃𑌤𑌕𑌲𑌂𑌕𑌵𑍍𑌯𑌤𑌿𑌕𑌰𑍈𑌃 ।
𑌨𑌤𑌾𑌨𑌾𑌮𑌾𑌮𑍃𑌷𑍍𑌟𑍇 𑌹𑍃𑌦𑌯𑌮𑍁𑌕𑍁𑌰𑍇 𑌨𑌿𑌰𑍍𑌮𑌲𑌰𑍁𑌚𑌿
𑌪𑍍𑌰𑌸𑌨𑍍𑌨𑍇 𑌨𑌿𑌶𑍍𑌶𑍇𑌷𑌂 𑌪𑍍𑌰𑌤𑌿𑌫𑌲𑌤𑌿 𑌵𑌿𑌶𑍍𑌵𑌂 𑌗𑌿𑌰𑌿𑌸𑍁𑌤𑍇 ॥𑍮4॥

𑌤𑌵 𑌤𑍍𑌰𑌸𑍍𑌤𑌂 𑌪𑌾𑌦𑌾𑌤𑍍𑌕𑌿𑌸𑌲𑌯𑌮𑌰𑌣𑍍𑌯𑌾𑌂𑌤𑌰𑌮𑌗𑌾𑌤𑍍
𑌪𑌰𑌂 𑌰𑍇𑌖𑌾𑌰𑍂𑌪𑌂 𑌕𑌮𑌲𑌮𑌮𑍁𑌮𑍇𑌵𑌾𑌶𑍍𑌰𑌿𑌤𑌮𑌭𑍂𑌤𑍍 ।
𑌜𑌿𑌤𑌾𑌨𑌾𑌂 𑌕𑌾𑌮𑌾𑌕𑍍𑌷𑌿 𑌦𑍍𑌵𑌿𑌤𑌯𑌮𑌪𑌿 𑌯𑍁𑌕𑍍𑌤𑌂 𑌪𑌰𑌿𑌭𑌵𑍇
𑌵𑌿𑌦𑍇𑌶𑍇 𑌵𑌾𑌸𑍋 𑌵𑌾 𑌶𑌰𑌣𑌗𑌮𑌨𑌂 𑌵𑌾 𑌨𑌿𑌜𑌰𑌿𑌪𑍋𑌃 ॥𑍮5॥

𑌗𑍃𑌹𑍀𑌤𑍍𑌵𑌾 𑌯𑌾𑌥𑌾𑌰𑍍𑌥𑍍𑌯𑌂 𑌨𑌿𑌗𑌮𑌵𑌚𑌸𑌾𑌂 𑌦𑍇𑌶𑌿𑌕𑌕𑍃𑌪𑌾-
𑌕𑌟𑌾𑌕𑍍𑌷𑌰𑍍𑌕𑌜𑍍𑌯𑍋𑌤𑌿𑌶𑍍𑌶𑌮𑌿𑌤𑌮𑌮𑌤𑌾𑌬𑌂𑌧𑌤𑌮𑌸𑌃 ।
𑌯𑌤𑌂𑌤𑍇 𑌕𑌾𑌮𑌾𑌕𑍍𑌷𑌿 𑌪𑍍𑌰𑌤𑌿𑌦𑌿𑌵𑌸𑌮𑌂𑌤𑌰𑍍𑌦𑍍𑌰𑌢𑌯𑌿𑌤𑍁𑌂
𑌤𑍍𑌵𑌦𑍀𑌯𑌂 𑌪𑌾𑌦𑌾𑌬𑍍𑌜𑌂 𑌸𑍁𑌕𑍃𑌤𑌪𑌰𑌿𑌪𑌾𑌕𑍇𑌨 𑌸𑍁𑌜𑌨𑌾𑌃 ॥𑍮6॥

𑌜𑌡𑌾𑌨𑌾𑌮𑌪𑍍𑌯𑌂𑌬 𑌸𑍍𑌮𑌰𑌣𑌸𑌮𑌯𑍇 𑌤𑌵𑌚𑍍𑌚𑌰𑌣𑌯𑍋𑌃
𑌭𑍍𑌰𑌮𑌨𑍍𑌮𑌂𑌥𑌕𑍍𑌷𑍍𑌮𑌾𑌭𑍃𑌦𑍍𑌧𑍁𑌮𑍁𑌘𑍁𑌮𑌿𑌤𑌸𑌿𑌂𑌧𑍁𑌪𑍍𑌰𑌤𑌿𑌭𑌟𑌾𑌃 ।
𑌪𑍍𑌰𑌸𑌨𑍍𑌨𑌾𑌃 𑌕𑌾𑌮𑌾𑌕𑍍𑌷𑌿 𑌪𑍍𑌰𑌸𑌭𑌮𑌧𑌰𑌸𑍍𑌪𑌂𑌦𑌨𑌕𑌰𑌾
𑌭𑌵𑌂𑌤𑌿 𑌸𑍍𑌵𑌚𑍍𑌛𑌂𑌦𑌂 𑌪𑍍𑌰𑌕𑍃𑌤𑌿𑌪𑌰𑌿𑌪𑌕𑍍𑌕𑌾 𑌭𑌣𑌿𑌤𑌯𑌃 ॥𑍮𑍭॥

𑌵𑌹𑌨𑍍𑌨𑌪𑍍𑌯𑌶𑍍𑌰𑌾𑌂𑌤𑌂 𑌮𑌧𑍁𑌰𑌨𑌿𑌨𑌦𑌂 𑌹𑌂𑌸𑌕𑌮𑌸𑍌
𑌤𑌮𑍇𑌵𑌾𑌧𑌃 𑌕𑌰𑍍𑌤𑍁𑌂 𑌕𑌿𑌮𑌿𑌵 𑌯𑌤𑌤𑍇 𑌕𑍇𑌲𑌿𑌗𑌮𑌨𑍇 ।
𑌭𑌵𑌸𑍍𑌯𑍈𑌵𑌾𑌨𑌂𑌦𑌂 𑌵𑌿𑌦𑌧𑌦𑌪𑌿 𑌕𑌾𑌮𑌾𑌕𑍍𑌷𑌿 𑌚𑌰𑌣𑍋
𑌭𑌵𑌤𑍍𑌯𑌾𑌸𑍍𑌤𑌦𑍍𑌦𑍍𑌰𑍋𑌹𑌂 𑌭𑌗𑌵𑌤𑌿 𑌕𑌿𑌮𑍇𑌵𑌂 𑌵𑌿𑌤𑌨𑍁𑌤𑍇 ॥𑍮𑍮॥

𑌯𑌦𑌤𑍍𑌯𑌂𑌤𑌂 𑌤𑌾𑌮𑍍𑌯𑌤𑍍𑌯𑌲𑌸𑌗𑌤𑌿𑌵𑌾𑌰𑍍𑌤𑌾𑌸𑍍𑌵𑌪𑌿 𑌶𑌿𑌵𑍇
𑌤𑌦𑍇𑌤𑌤𑍍𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑍃𑌤𑌿𑌮𑍃𑌦𑍁𑌲𑌂 𑌤𑍇 𑌪𑌦𑌯𑍁𑌗𑌮𑍍 ।
𑌕𑌿𑌰𑍀𑌟𑍈𑌃 𑌸𑌂𑌘𑌟𑍍𑌟𑌂 𑌕𑌥𑌮𑌿𑌵 𑌸𑍁𑌰𑍌𑌘𑌸𑍍𑌯 𑌸𑌹𑌤𑍇
𑌮𑍁𑌨𑍀𑌂𑌦𑍍𑌰𑌾𑌣𑌾𑌮𑌾𑌸𑍍𑌤𑍇 𑌮𑌨𑌸𑌿 𑌚 𑌕𑌥𑌂 𑌸𑍂𑌚𑌿𑌨𑌿𑌶𑌿𑌤𑍇 ॥𑍮𑍯॥

𑌮𑌨𑍋𑌰𑌂𑌗𑍇 𑌮𑌤𑍍𑌕𑍇 𑌵𑌿𑌬𑍁𑌧𑌜𑌨𑌸𑌂𑌮𑍋𑌦𑌜𑌨𑌨𑍀
𑌸𑌰𑌾𑌗𑌵𑍍𑌯𑌾𑌸𑌂𑌗𑌂 𑌸𑌰𑌸𑌮𑍃𑌦𑍁𑌸𑌂𑌚𑌾𑌰𑌸𑍁𑌭𑌗𑌾 ।
𑌮𑌨𑍋𑌜𑍍𑌞𑌾 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌯𑌤𑍁 𑌲𑌾𑌸𑍍𑌯𑌪𑍍𑌰𑌕𑌰𑌣𑌂
𑌰𑌣𑌨𑍍𑌮𑌂𑌜𑍀𑌰𑌾 𑌤𑍇 𑌚𑌰𑌣𑌯𑍁𑌗𑌲𑍀𑌨𑌰𑍍𑌤𑌕𑌵𑌧𑍂𑌃 ॥𑍯0॥

𑌪𑌰𑌿𑌷𑍍𑌕𑍁𑌰𑍍𑌵𑌨𑍍𑌮𑌾𑌤𑌃 𑌪𑌶𑍁𑌪𑌤𑌿𑌕𑌪𑌰𑍍𑌦𑌂 𑌚𑌰𑌣𑌰𑌾𑌟𑍍
𑌪𑌰𑌾𑌚𑌾𑌂 𑌹𑍃𑌤𑍍𑌪𑌦𑍍𑌮𑌂 𑌪𑌰𑌮𑌭𑌣𑌿𑌤𑍀𑌨𑌾𑌂 𑌚 𑌮𑌕𑍁𑌟𑌮𑍍 ।
𑌭𑌵𑌾𑌖𑍍𑌯𑍇 𑌪𑌾𑌥𑍋𑌧𑍌 𑌪𑌰𑌿𑌹𑌰𑌤𑍁 𑌕𑌾𑌮𑌾𑌕𑍍𑌷𑌿 𑌮𑌮𑌤𑌾-
𑌪𑌰𑌾𑌧𑍀𑌨𑌤𑍍𑌵𑌂 𑌮𑍇 𑌪𑌰𑌿𑌮𑍁𑌷𑌿𑌤𑌪𑌾𑌥𑍋𑌜𑌮𑌹𑌿𑌮𑌾 ॥𑍯1॥

𑌪𑍍𑌰𑌸𑍂𑌨𑍈𑌃 𑌸𑌂𑌪𑌰𑍍𑌕𑌾𑌦𑌮𑌰𑌤𑌰𑍁𑌣𑍀𑌕𑍁𑌂𑌤𑌲𑌭𑌵𑍈𑌃
𑌅𑌭𑍀𑌷𑍍𑌟𑌾𑌨𑌾𑌂 𑌦𑌾𑌨𑌾𑌦𑌨𑌿𑌶𑌮𑌪𑌿 𑌕𑌾𑌮𑌾𑌕𑍍𑌷𑌿 𑌨𑌮𑌤𑌾𑌮𑍍 ।
𑌸𑍍𑌵𑌸𑌂𑌗𑌾𑌤𑍍𑌕𑌂𑌕𑍇𑌲𑌿𑌪𑍍𑌰𑌸𑌵𑌜𑌨𑌕𑌤𑍍𑌵𑍇𑌨 𑌚 𑌶𑌿𑌵𑍇
𑌤𑍍𑌰𑌿𑌧𑌾 𑌧𑌤𑍍𑌤𑍇 𑌵𑌾𑌰𑍍𑌤𑌾𑌂 𑌸𑍁𑌰𑌭𑌿𑌰𑌿𑌤𑌿 𑌪𑌾𑌦𑍋 𑌗𑌿𑌰𑌿𑌸𑍁𑌤𑍇 ॥𑍯2॥

𑌮𑌹𑌾𑌮𑍋𑌹𑌸𑍍𑌤𑍇𑌨𑌵𑍍𑌯𑌤𑌿𑌕𑌰𑌭𑌯𑌾𑌤𑍍𑌪𑌾𑌲𑌯𑌤𑌿 𑌯𑍋
𑌵𑌿𑌨𑌿𑌕𑍍𑌷𑌿𑌪𑍍𑌤𑌂 𑌸𑍍𑌵𑌸𑍍𑌮𑌿𑌨𑍍𑌨𑌿𑌜𑌜𑌨𑌮𑌨𑍋𑌰𑌤𑍍𑌨𑌮𑌨𑌿𑌶𑌮𑍍 ।
𑌸 𑌰𑌾𑌗𑌸𑍍𑌯𑍋𑌦𑍍𑌰𑍇𑌕𑌾𑌤𑍍𑌸𑌤𑌤𑌮𑌪𑌿 𑌕𑌾𑌮𑌾𑌕𑍍𑌷𑌿 𑌤𑌰𑌸𑌾
𑌕𑌿𑌮𑍇𑌵𑌂 𑌪𑌾𑌦𑍋𑌽𑌸𑍌 𑌕𑌿𑌸𑌲𑌯𑌰𑍁𑌚𑌿𑌂 𑌚𑍋𑌰𑌯𑌤𑌿 𑌤𑍇 ॥𑍯3॥

𑌸𑌦𑌾 𑌸𑍍𑌵𑌾𑌦𑍁𑌂𑌕𑌾𑌰𑌂 𑌵𑌿𑌷𑌯𑌲𑌹𑌰𑍀𑌶𑌾𑌲𑌿𑌕𑌣𑌿𑌕𑌾𑌂
𑌸𑌮𑌾𑌸𑍍𑌵𑌾𑌦𑍍𑌯 𑌶𑍍𑌰𑌾𑌂𑌤𑌂 𑌹𑍃𑌦𑌯𑌶𑍁𑌕𑌪𑍋𑌤𑌂 𑌜𑌨𑌨𑌿 𑌮𑍇 ।
𑌕𑍃𑌪𑌾𑌜𑌾𑌲𑍇 𑌫𑌾𑌲𑍇𑌕𑍍𑌷𑌣𑌮𑌹𑌿𑌷𑌿 𑌕𑌾𑌮𑌾𑌕𑍍𑌷𑌿 𑌰𑌭𑌸𑌾𑌤𑍍
𑌗𑍃𑌹𑍀𑌤𑍍𑌵𑌾 𑌰𑍁𑌂𑌧𑍀𑌥𑌾𑌰𑌸𑍍𑌤𑌵 𑌪𑌦𑌯𑍁𑌗𑍀𑌪𑌂𑌜𑌰𑌪𑍁𑌟𑍇 ॥𑍯4॥

𑌧𑍁𑌨𑌾𑌨𑌂 𑌕𑌾𑌮𑌾𑌕𑍍𑌷𑌿 𑌸𑍍𑌮𑌰𑌣𑌲𑌵𑌮𑌾𑌤𑍍𑌰𑍇𑌣 𑌜𑌡𑌿𑌮-
𑌜𑍍𑌵𑌰𑌪𑍍𑌰𑍌𑌢𑌿𑌂 𑌗𑍂𑌢𑌸𑍍𑌥𑌿𑌤𑌿 𑌨𑌿𑌗𑌮𑌨𑍈𑌕𑍁𑌂𑌜𑌕𑍁𑌹𑌰𑍇 ।
𑌅𑌲𑌭𑍍𑌯𑌂 𑌸𑌰𑍍𑌵𑍇𑌷𑌾𑌂 𑌕𑌤𑌿𑌚𑌨 𑌲𑌭𑌂𑌤𑍇 𑌸𑍁𑌕𑍃𑌤𑌿𑌨𑌃
𑌚𑌿𑌰𑌾𑌦𑌨𑍍𑌵𑌿𑌷𑍍𑌯𑌂𑌤𑌸𑍍𑌤𑌵 𑌚𑌰𑌣𑌸𑌿𑌦𑍍𑌧𑍌𑌷𑌧𑌮𑌿𑌦𑌮𑍍 ॥𑍯5॥

𑌰𑌣𑌨𑍍𑌮𑌂𑌜𑍀𑌰𑌾𑌭𑍍𑌯𑌾𑌂 𑌲𑌲𑌿𑌤𑌗𑌮𑌨𑌾𑌭𑍍𑌯𑌾𑌂 𑌸𑍁𑌕𑍃𑌤𑌿𑌨𑌾𑌂
𑌮𑌨𑍋𑌵𑌾𑌸𑍍𑌤𑌵𑍍𑌯𑌾𑌭𑍍𑌯𑌾𑌂 𑌮𑌥𑌿𑌤𑌤𑌿𑌮𑌿𑌰𑌾𑌭𑍍𑌯𑌾𑌂 𑌨𑌖𑌰𑍁𑌚𑌾 ।
𑌨𑌿𑌧𑍇𑌯𑌾𑌭𑍍𑌯𑌾𑌂 𑌪𑌤𑍍𑌯𑌾 𑌨𑌿𑌜𑌶𑌿𑌰𑌸𑌿 𑌕𑌾𑌮𑌾𑌕𑍍𑌷𑌿 𑌸𑌤𑌤𑌂
𑌨𑌮𑌸𑍍𑌤𑍇 𑌪𑌾𑌦𑌾𑌭𑍍𑌯𑌾𑌂 𑌨𑌲𑌿𑌨𑌮𑍃𑌦𑍁𑌲𑌾𑌭𑍍𑌯𑌾𑌂 𑌗𑌿𑌰𑌿𑌸𑍁𑌤𑍇 ॥𑍯6॥

𑌸𑍁𑌰𑌾𑌗𑍇 𑌰𑌾𑌕𑍇𑌂𑌦𑍁𑌪𑍍𑌰𑌤𑌿𑌨𑌿𑌧𑌿𑌮𑍁𑌖𑍇 𑌪𑌰𑍍𑌵𑌤𑌸𑍁𑌤𑍇
𑌚𑌿𑌰𑌾𑌲𑍍𑌲𑌭𑍍𑌯𑍇 𑌭𑌕𑍍𑌤𑍍𑌯𑌾 𑌶𑌮𑌧𑌨𑌜𑌨𑌾𑌨𑌾𑌂 𑌪𑌰𑌿𑌷𑌦𑌾 ।
𑌮𑌨𑍋𑌭𑍃𑌂𑌗𑍋 𑌮𑌤𑍍𑌕𑌃 𑌪𑌦𑌕𑌮𑌲𑌯𑍁𑌗𑍍𑌮𑍇 𑌜𑌨𑌨𑌿 𑌤𑍇
𑌪𑍍𑌰𑌕𑌾𑌮𑌂 𑌕𑌾𑌮𑌾𑌕𑍍𑌷𑌿 𑌤𑍍𑌰𑌿𑌪𑍁𑌰𑌹𑌰𑌵𑌾𑌮𑌾𑌕𑍍𑌷𑌿 𑌰𑌮𑌤𑌾𑌮𑍍 ॥𑍯𑍭॥

𑌶𑌿𑌵𑍇 𑌸𑌂𑌵𑌿𑌦𑍍𑌰𑍂𑌪𑍇 𑌶𑌶𑌿𑌶𑌕𑌲𑌚𑍂𑌡𑌪𑍍𑌰𑌿𑌯𑌤𑌮𑍇
𑌶𑌨𑍈𑌰𑍍𑌗𑌤𑍍𑌯𑌾𑌗𑌤𑍍𑌯𑌾 𑌜𑌿𑌤𑌸𑍁𑌰𑌵𑌰𑍇𑌭𑍇 𑌗𑌿𑌰𑌿𑌸𑍁𑌤𑍇 ।
𑌯𑌤𑌂𑌤𑍇 𑌸𑌂𑌤𑌸𑍍𑌤𑍇 𑌚𑌰𑌣𑌨𑌲𑌿𑌨𑌾𑌲𑌾𑌨𑌯𑍁𑌗𑌲𑍇
𑌸𑌦𑌾 𑌬𑌦𑍍𑌧𑌂 𑌚𑌿𑌤𑍍𑌤𑌪𑍍𑌰𑌮𑌦𑌕𑌰𑌿𑌯𑍂𑌥𑌂 𑌦𑍃𑌢𑌤𑌰𑌮𑍍 ॥𑍯𑍮॥

𑌯𑌶𑌃 𑌸𑍂𑌤𑍇 𑌮𑌾𑌤𑌰𑍍𑌮𑌧𑍁𑌰𑌕𑌵𑌿𑌤𑌾𑌂 𑌪𑌕𑍍𑌷𑍍𑌮𑌲𑌯𑌤𑍇
𑌶𑍍𑌰𑌿𑌯𑌂 𑌦𑌤𑍍𑌤𑍇 𑌚𑌿𑌤𑍍𑌤𑍇 𑌕𑌮𑌪𑌿 𑌪𑌰𑌿𑌪𑌾𑌕𑌂 𑌪𑍍𑌰𑌥𑌯𑌤𑍇 ।
𑌸𑌤𑌾𑌂 𑌪𑌾𑌶𑌗𑍍𑌰𑌂𑌥𑌿𑌂 𑌶𑌿𑌥𑌿𑌲𑌯𑌤𑌿 𑌕𑌿𑌂 𑌕𑌿𑌂 𑌨 𑌕𑍁𑌰𑍁𑌤𑍇
𑌪𑍍𑌰𑌪𑌨𑍍𑌨𑍇 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑍍𑌰𑌣𑌤𑌿𑌪𑌰𑌿𑌪𑌾𑌟𑍀 𑌚𑌰𑌣𑌯𑍋𑌃 ॥𑍯𑍯॥

𑌮𑌨𑍀𑌷𑌾𑌂 𑌮𑌾𑌹𑍇𑌂𑌦𑍍𑌰𑍀𑌂 𑌕𑌕𑍁𑌭𑌮𑌿𑌵 𑌤𑍇 𑌕𑌾𑌮𑌪𑌿 𑌦𑌶𑌾𑌂
𑌪𑍍𑌰𑌧𑌤𑍍𑌤𑍇 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌤𑌰𑍁𑌣𑌾𑌦𑌿𑌤𑍍𑌯𑌕𑌿𑌰𑌣𑌃 ।
𑌯𑌦𑍀𑌯𑍇 𑌸𑌂𑌪𑌰𑍍𑌕𑍇 𑌧𑍃𑌤𑌰𑌸𑌮𑌰𑌂𑌦𑌾 𑌕𑌵𑌯𑌤𑌾𑌂
𑌪𑌰𑍀𑌪𑌾𑌕𑌂 𑌧𑌤𑍍𑌤𑍇 𑌪𑌰𑌿𑌮𑌲𑌵𑌤𑍀 𑌸𑍂𑌕𑍍𑌤𑌿𑌨𑌲𑌿𑌨𑍀 ॥100॥

𑌪𑍁𑌰𑌾 𑌮𑌾𑌰𑌾𑌰𑌾𑌤𑌿𑌃 𑌪𑍁𑌰𑌮𑌜𑌯𑌦𑌂𑌬 𑌸𑍍𑌤𑌵𑌶𑌤𑍈𑌃
𑌪𑍍𑌰𑌸𑌨𑍍𑌨𑌾𑌯𑌾𑌂 𑌸𑌤𑍍𑌯𑌾𑌂 𑌤𑍍𑌵𑌯𑌿 𑌤𑍁𑌹𑌿𑌨𑌶𑍈𑌲𑍇𑌂𑌦𑍍𑌰𑌤𑌨𑌯𑍇 ।
𑌅𑌤𑌸𑍍𑌤𑍇 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌰𑌤𑍁 𑌤𑌰𑌸𑌾 𑌕𑌾𑌲𑌸𑌮𑌯𑍇
𑌸𑌮𑌾𑌯𑌾𑌤𑍇 𑌮𑌾𑌤𑌰𑍍𑌮𑌮 𑌮𑌨𑌸𑌿 𑌪𑌾𑌦𑌾𑌬𑍍𑌜𑌯𑍁𑌗𑌲𑌮𑍍 ॥101॥

𑌪𑌦𑌦𑍍𑌵𑌂𑌦𑍍𑌵𑌂 𑌮𑌂𑌦𑌂 𑌗𑌤𑌿𑌷𑍁 𑌨𑌿𑌵𑌸𑌂𑌤𑌂 𑌹𑍃𑌦𑌿 𑌸𑌤𑌾𑌂
𑌗𑌿𑌰𑌾𑌮𑌂𑌤𑍇 𑌭𑍍𑌰𑌾𑌂𑌤𑌂 𑌕𑍃𑌤𑌕𑌰𑌹𑌿𑌤𑌾𑌨𑌾𑌂 𑌪𑌰𑌿𑌬𑍃𑌢𑍇 ।
𑌜𑌨𑌾𑌨𑌾𑌮𑌾𑌨𑌂𑌦𑌂 𑌜𑌨𑌨𑌿 𑌜𑌨𑌯𑌂𑌤𑌂 𑌪𑍍𑌰𑌣𑌮𑌤𑌾𑌂
𑌤𑍍𑌵𑌦𑍀𑌯𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌤𑌿𑌦𑌿𑌨𑌮𑌹𑌂 𑌨𑍌𑌮𑌿 𑌵𑌿𑌮𑌲𑌮𑍍 ॥102॥

𑌇𑌦𑌂 𑌯𑌃 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌨𑌲𑌿𑌨𑌸𑍍𑌤𑍋𑌤𑍍𑌰𑌶𑌤𑌕𑌂
𑌜𑌪𑍇𑌨𑍍𑌨𑌿𑌤𑍍𑌯𑌂 𑌭𑌕𑍍𑌤𑍍𑌯𑌾 𑌨𑌿𑌖𑌿𑌲𑌜𑌗𑌦𑌾𑌹𑍍𑌲𑌾𑌦𑌜𑌨𑌕𑌮𑍍 ।
𑌸 𑌵𑌿𑌶𑍍𑌵𑍇𑌷𑌾𑌂 𑌵𑌂𑌦𑍍𑌯𑌃 𑌸𑌕𑌲𑌕𑌵𑌿𑌲𑍋𑌕𑍈𑌕𑌤𑌿𑌲𑌕𑌃
𑌚𑌿𑌰𑌂 𑌭𑍁𑌕𑍍𑌤𑍍𑌵𑌾 𑌭𑍋𑌗𑌾𑌨𑍍𑌪𑌰𑌿𑌣𑌮𑌤𑌿 𑌚𑌿𑌦𑍍𑌰𑍂𑌪𑌕𑌲𑌯𑌾 ॥103॥

॥ 𑌇𑌤𑌿 𑌪𑌾𑌦𑌾𑌰𑌵𑌿𑌂𑌦𑌶𑌤𑌕𑌂 𑌸𑌂𑌪𑍂𑌰𑍍𑌣𑌮𑍍 ॥