𑌹𑌾𑌰𑌨𑍂𑌪𑍁𑌰𑌕𑌿𑌰𑍀𑌟𑌕𑍁𑌂𑌡𑌲𑌵𑌿𑌭𑍂𑌷𑌿𑌤𑌾𑌵𑌯𑌵𑌶𑍋𑌭𑌿𑌨𑍀𑌂
𑌕𑌾𑌰𑌣𑍇𑌶𑌵𑌰𑌮𑍌𑌲𑌿𑌕𑍋𑌟𑌿𑌪𑌰𑌿𑌕𑌲𑍍𑌪𑍍𑌯𑌮𑌾𑌨𑌪𑌦𑌪𑍀𑌠𑌿𑌕𑌾𑌮𑍍 ।
𑌕𑌾𑌲𑌕𑌾𑌲𑌫𑌣𑌿𑌪𑌾𑌶𑌬𑌾𑌣𑌧𑌨𑍁𑌰𑌂𑌕𑍁𑌶𑌾𑌮𑌰𑍁𑌣𑌮𑍇𑌖𑌲𑌾𑌂
𑌫𑌾𑌲𑌭𑍂𑌤𑌿𑌲𑌕𑌲𑍋𑌚𑌨𑌾𑌂 𑌮𑌨𑌸𑌿 𑌭𑌾𑌵𑌯𑌾𑌮𑌿 𑌪𑌰𑌦𑍇𑌵𑌤𑌾𑌮𑍍 ॥ 1 ॥
𑌗𑌂𑌧𑌸𑌾𑌰𑌘𑌨𑌸𑌾𑌰𑌚𑌾𑌰𑍁𑌨𑌵𑌨𑌾𑌗𑌵𑌲𑍍𑌲𑌿𑌰𑌸𑌵𑌾𑌸𑌿𑌨𑍀𑌂
𑌸𑌾𑌂𑌧𑍍𑌯𑌰𑌾𑌗𑌮𑌧𑍁𑌰𑌾𑌧𑌰𑌾𑌭𑌰𑌣𑌸𑍁𑌂𑌦𑌰𑌾𑌨𑌨𑌶𑍁𑌚𑌿𑌸𑍍𑌮𑌿𑌤𑌾𑌮𑍍 ।
𑌮𑌂𑌧𑌰𑌾𑌯𑌤𑌵𑌿𑌲𑍋𑌚𑌨𑌾𑌮𑌮𑌲𑌬𑌾𑌲𑌚𑌂𑌦𑍍𑌰𑌕𑍃𑌤𑌶𑍇𑌖𑌰𑍀𑌂
𑌇𑌂𑌦𑌿𑌰𑌾𑌰𑌮𑌣𑌸𑍋𑌦𑌰𑍀𑌂 𑌮𑌨𑌸𑌿 𑌭𑌾𑌵𑌯𑌾𑌮𑌿 𑌪𑌰𑌦𑍇𑌵𑌤𑌾𑌮𑍍 ॥ 2 ॥
𑌸𑍍𑌮𑍇𑌰𑌚𑌾𑌰𑍁𑌮𑍁𑌖𑌮𑌂𑌡𑌲𑌾𑌂 𑌵𑌿𑌮𑌲𑌗𑌂𑌡𑌲𑌂𑌬𑌿𑌮𑌣𑌿𑌮𑌂𑌡𑌲𑌾𑌂
𑌹𑌾𑌰𑌦𑌾𑌮𑌪𑌰𑌿𑌶𑍋𑌭𑌮𑌾𑌨𑌕𑍁𑌚𑌭𑌾𑌰𑌭𑍀𑌰𑍁𑌤𑌨𑍁𑌮𑌧𑍍𑌯𑌮𑌾𑌮𑍍 ।
𑌵𑍀𑌰𑌗𑌰𑍍𑌵𑌹𑌰𑌨𑍂𑌪𑍁𑌰𑌾𑌂 𑌵𑌿𑌵𑌿𑌧𑌕𑌾𑌰𑌣𑍇𑌶𑌵𑌰𑌪𑍀𑌠𑌿𑌕𑌾𑌂
𑌮𑌾𑌰𑌵𑍈𑌰𑌿𑌸𑌹𑌚𑌾𑌰𑌿𑌣𑍀𑌂 𑌮𑌨𑌸𑌿 𑌭𑌾𑌵𑌯𑌾𑌮𑌿 𑌪𑌰𑌦𑍇𑌵𑌤𑌾𑌮𑍍 ॥ 3 ॥
𑌭𑍂𑌰𑌿𑌭𑌾𑌰𑌧𑌰𑌕𑍁𑌂𑌡𑌲𑍀𑌂𑌦𑍍𑌰𑌮𑌣𑌿𑌬𑌦𑍍𑌧𑌭𑍂𑌵𑌲𑌯𑌪𑍀𑌠𑌿𑌕𑌾𑌂
𑌵𑌾𑌰𑌿𑌰𑌾𑌶𑌿𑌮𑌣𑌿𑌮𑍇𑌖𑌲𑌾𑌵𑌲𑌯𑌵𑌹𑍍𑌨𑌿𑌮𑌂𑌡𑌲𑌶𑌰𑍀𑌰𑌿𑌣𑍀𑌮𑍍 ।
𑌵𑌾𑌰𑌿𑌸𑌾𑌰𑌵𑌹𑌕𑍁𑌂𑌡𑌲𑌾𑌂 𑌗𑌗𑌨𑌶𑍇𑌖𑌰𑍀𑌂 𑌚 𑌪𑌰𑌮𑌾𑌤𑍍𑌮𑌿𑌕𑌾𑌂
𑌚𑌾𑌰𑍁𑌚𑌂𑌦𑍍𑌰𑌵𑌿𑌲𑍋𑌚𑌨𑌾𑌂 𑌮𑌨𑌸𑌿 𑌭𑌾𑌵𑌯𑌾𑌮𑌿 𑌪𑌰𑌦𑍇𑌵𑌤𑌾𑌮𑍍 ॥ 4 ॥
𑌕𑍁𑌂𑌡𑌲𑌤𑍍𑌰𑌿𑌵𑌿𑌧𑌕𑍋𑌣𑌮𑌂𑌡𑌲𑌵𑌿𑌹𑌾𑌰𑌷𑌡𑍍𑌦𑌲𑌸𑌮𑍁𑌲𑍍𑌲𑌸-
𑌤𑍍𑌪𑍁𑌂𑌡𑌰𑍀𑌕𑌮𑍁𑌖𑌭𑍇𑌦𑌿𑌨𑍀𑌂 𑌚 𑌪𑍍𑌰𑌚𑌂𑌡𑌭𑌾𑌨𑍁𑌭𑌾𑌸𑌮𑍁𑌜𑍍𑌜𑍍𑌵𑌲𑌾𑌮𑍍 ।
𑌮𑌂𑌡𑌲𑍇𑌂𑌦𑍁𑌪𑌰𑌿𑌵𑌾𑌹𑌿𑌤𑌾𑌮𑍃𑌤𑌤𑌰𑌂𑌗𑌿𑌣𑍀𑌮𑌰𑍁𑌣𑌰𑍂𑌪𑌿𑌣𑍀𑌂
𑌮𑌂𑌡𑌲𑌾𑌂𑌤𑌮𑌣𑌿𑌦𑍀𑌪𑌿𑌕𑌾𑌂 𑌮𑌨𑌸𑌿 𑌭𑌾𑌵𑌯𑌾𑌮𑌿 𑌪𑌰𑌦𑍇𑌵𑌤𑌾𑌮𑍍 ॥ 5 ॥
𑌵𑌾𑌰𑌣𑌾𑌨𑌨𑌮𑌯𑍂𑌰𑌵𑌾𑌹𑌮𑍁𑌖𑌦𑌾𑌹𑌵𑌾𑌰𑌣𑌪𑌯𑍋𑌧𑌰𑌾𑌂
𑌚𑌾𑌰𑌣𑌾𑌦𑌿𑌸𑍁𑌰𑌸𑍁𑌂𑌦𑌰𑍀𑌚𑌿𑌕𑍁𑌰𑌶𑍇𑌕𑌰𑍀𑌕𑍃𑌤𑌪𑌦𑌾𑌂𑌬𑍁𑌜𑌾𑌮𑍍 ।
𑌕𑌾𑌰𑌣𑌾𑌧𑌿𑌪𑌤𑌿𑌪𑌂𑌚𑌕𑌪𑍍𑌰𑌕𑍃𑌤𑌿𑌕𑌾𑌰𑌣𑌪𑍍𑌰𑌥𑌮𑌮𑌾𑌤𑍃𑌕𑌾𑌂
𑌵𑌾𑌰𑌣𑌾𑌂𑌤𑌮𑍁𑌖𑌪𑌾𑌰𑌣𑌾𑌂 𑌮𑌨𑌸𑌿 𑌭𑌾𑌵𑌯𑌾𑌮𑌿 𑌪𑌰𑌦𑍇𑌵𑌤𑌾𑌮𑍍 ॥ 6 ॥
𑌪𑌦𑍍𑌮𑌕𑌾𑌂𑌤𑌿𑌪𑌦𑌪𑌾𑌣𑌿𑌪𑌲𑍍𑌲𑌵𑌪𑌯𑍋𑌧𑌰𑌾𑌨𑌨𑌸𑌰𑍋𑌰𑍁𑌹𑌾𑌂
𑌪𑌦𑍍𑌮𑌰𑌾𑌗𑌮𑌣𑌿𑌮𑍇𑌖𑌲𑌾𑌵𑌲𑌯𑌨𑍀𑌵𑌿𑌶𑍋𑌭𑌿𑌤𑌨𑌿𑌤𑌂𑌬𑌿𑌨𑍀𑌮𑍍 ।
𑌪𑌦𑍍𑌮𑌸𑌂𑌭𑌵𑌸𑌦𑌾𑌶𑌿𑌵𑌾𑌂𑌤𑌮𑌯𑌪𑌂𑌚𑌰𑌤𑍍𑌨𑌪𑌦𑌪𑍀𑌠𑌿𑌕𑌾𑌂
𑌪𑌦𑍍𑌮𑌿𑌨𑍀𑌂 𑌪𑍍𑌰𑌣𑌵𑌰𑍂𑌪𑌿𑌣𑍀𑌂 𑌮𑌨𑌸𑌿 𑌭𑌾𑌵𑌯𑌾𑌮𑌿 𑌪𑌰𑌦𑍇𑌵𑌤𑌾𑌮𑍍 ॥ ॥
𑌆𑌗𑌮𑌪𑍍𑌰𑌣𑌵𑌪𑍀𑌠𑌿𑌕𑌾𑌮𑌮𑌲𑌵𑌰𑍍𑌣𑌮𑌂𑌗𑌳𑌶𑌰𑍀𑌰𑌿𑌣𑍀𑌂
𑌆𑌗𑌮𑌾𑌵𑌯𑌵𑌶𑍋𑌭𑌿𑌨𑍀𑌮𑌖𑌿𑌲𑌵𑍇𑌦𑌸𑌾𑌰𑌕𑍃𑌤𑌶𑍇𑌖𑌰𑍀𑌮𑍍 ।
𑌮𑍂𑌲𑌮𑌂𑌤𑍍𑌰𑌮𑍁𑌖𑌮𑌂𑌡𑌲𑌾𑌂 𑌮𑍁𑌦𑌿𑌤𑌨𑌾𑌦𑌬𑌿𑌂𑌦𑍁𑌨𑌵𑌯𑍌𑌵𑌨𑌾𑌂
𑌮𑌾𑌤𑍃𑌕𑌾𑌂 𑌤𑍍𑌰𑌿𑌪𑍁𑌰𑌸𑍁𑌂𑌦𑌰𑍀𑌂 𑌮𑌨𑌸𑌿 𑌭𑌾𑌵𑌯𑌾𑌮𑌿 𑌪𑌰𑌦𑍇𑌵𑌤𑌾𑌮𑍍 ॥ ॥
𑌕𑌾𑌲𑌿𑌕𑌾𑌤𑌿𑌮𑌿𑌰𑌕𑍁𑌂𑌤𑌲𑌾𑌂𑌤𑌘𑌨𑌭𑍃𑌂𑌗𑌮𑌂𑌗𑌳𑌵𑌿𑌰𑌾𑌜𑌿𑌨𑍀𑌂
𑌚𑍂𑌲𑌿𑌕𑌾𑌶𑌿𑌖𑌰𑌮𑌾𑌲𑌿𑌕𑌾𑌵𑌲𑌯𑌮𑌲𑍍𑌲𑌿𑌕𑌾𑌸𑍁𑌰𑌭𑌿𑌸𑍌𑌰𑌭𑌾𑌮𑍍 ।
𑌵𑌾𑌲𑌿𑌕𑌾𑌮𑌧𑍁𑌰𑌗𑌂𑌡𑌮𑌂𑌡𑌲𑌮𑌨𑍋𑌹𑌰𑌾𑌨𑌨𑌸𑌰𑍋𑌰𑍁𑌹𑌾𑌂
𑌕𑌾𑌲𑌿𑌕𑌾𑌮𑌖𑌿𑌲𑌨𑌾𑌯𑌿𑌕𑌾𑌂 𑌮𑌨𑌸𑌿 𑌭𑌾𑌵𑌯𑌾𑌮𑌿 𑌪𑌰𑌦𑍇𑌵𑌤𑌾𑌮𑍍 ॥ ॥
𑌨𑌿𑌤𑍍𑌯𑌮𑍇𑌵 𑌨𑌿𑌯𑌮𑍇𑌨 𑌜𑌲𑍍𑌪𑌤𑌾𑌂 – 𑌭𑍁𑌕𑍍𑌤𑌿𑌮𑍁𑌕𑍍𑌤𑌿𑌫𑌲𑌦𑌾𑌮𑌭𑍀𑌷𑍍𑌟𑌦𑌾𑌮𑍍 ।
𑌶𑌂𑌕𑌰𑍇𑌣 𑌰𑌚𑌿𑌤𑌾𑌂 𑌸𑌦𑌾 𑌜𑌪𑍇𑌨𑍍𑌨𑌾𑌮𑌰𑌤𑍍𑌨𑌨𑌵𑌰𑌤𑍍𑌨𑌮𑌾𑌲𑌿𑌕𑌾𑌮𑍍 ॥ 10 ॥
