𑌦𑍇𑌵𑍀 𑌮𑌾𑌹𑌾𑌤𑍍𑌮𑍍𑌯𑌂 𑌦𑍁𑌰𑍍𑌗𑌾 𑌸𑌪𑍍𑌤𑌶𑌤𑌿 𑌦𑍍𑌵𑌿𑌤𑍀𑌯𑍋𑌽𑌧𑍍𑌯𑌾𑌯𑌃

𑌅𑌸𑍍𑌯 𑌸𑌪𑍍𑌤 𑌸𑌤𑍀𑌮𑌧𑍍𑌯𑌮 𑌚𑌰𑌿𑌤𑍍𑌰𑌸𑍍𑌯 𑌵𑌿𑌷𑍍𑌣𑍁𑌰𑍍 𑌋𑌷𑌿𑌃 । 𑌉𑌷𑍍𑌣𑌿𑌕𑍍 𑌛𑌂𑌦𑌃 । 𑌶𑍍𑌰𑍀𑌮𑌹𑌾𑌲𑌕𑍍𑌷𑍍𑌮𑍀𑌦𑍇𑌵𑌤𑌾। 𑌶𑌾𑌕𑌂𑌭𑌰𑍀 𑌶𑌕𑍍𑌤𑌿𑌃 । 𑌦𑍁𑌰𑍍𑌗𑌾 𑌬𑍀𑌜𑌮𑍍 । 𑌵𑌾𑌯𑍁𑌸𑍍𑌤𑌤𑍍𑌤𑍍𑌵𑌮𑍍 । 𑌯𑌜𑍁𑌰𑍍𑌵𑍇𑌦𑌃 𑌸𑍍𑌵𑌰𑍂𑌪𑌮𑍍 । 𑌶𑍍𑌰𑍀 𑌮𑌹𑌾𑌲𑌕𑍍𑌷𑍍𑌮𑍀𑌪𑍍𑌰𑍀𑌤𑍍𑌯𑌰𑍍𑌥𑍇 𑌮𑌧𑍍𑌯𑌮 𑌚𑌰𑌿𑌤𑍍𑌰 𑌜𑌪𑍇 𑌵𑌿𑌨𑌿𑌯𑍋𑌗𑌃 ॥

𑌧𑍍𑌯𑌾𑌨𑌂
𑌓𑌂 𑌅𑌕𑍍𑌷𑌸𑍍𑌰𑌕𑍍𑌪𑌰𑌶𑍁𑌂 𑌗𑌦𑍇𑌷𑍁𑌕𑍁𑌲𑌿𑌶𑌂 𑌪𑌦𑍍𑌮𑌂 𑌧𑌨𑍁𑌃 𑌕𑍁𑌂𑌡𑌿𑌕𑌾𑌂
𑌦𑌂𑌡𑌂 𑌶𑌕𑍍𑌤𑌿𑌮𑌸𑌿𑌂 𑌚 𑌚𑌰𑍍𑌮 𑌜𑌲𑌜𑌂 𑌘𑌂𑌟𑌾𑌂 𑌸𑍁𑌰𑌾𑌭𑌾𑌜𑌨𑌮𑍍 ।
𑌶𑍂𑌲𑌂 𑌪𑌾𑌶𑌸𑍁𑌦𑌰𑍍𑌶𑌨𑍇 𑌚 𑌦𑌧𑌤𑍀𑌂 𑌹𑌸𑍍𑌤𑍈𑌃 𑌪𑍍𑌰𑌵𑌾𑌳 𑌪𑍍𑌰𑌭𑌾𑌂
𑌸𑍇𑌵𑍇 𑌸𑍈𑌰𑌿𑌭𑌮𑌰𑍍𑌦𑌿𑌨𑍀𑌮𑌿𑌹 𑌮𑌹𑌲𑌕𑍍𑌷𑍍𑌮𑍀𑌂 𑌸𑌰𑍋𑌜𑌸𑍍𑌥𑌿𑌤𑌾𑌮𑍍 ॥

𑌋𑌷𑌿𑌰𑍁𑌵𑌾𑌚 ॥1॥

𑌦𑍇𑌵𑌾𑌸𑍁𑌰𑌮𑌭𑍂𑌦𑍍𑌯𑍁𑌦𑍍𑌧𑌂 𑌪𑍂𑌰𑍍𑌣𑌮𑌬𑍍𑌦𑌶𑌤𑌂 𑌪𑍁𑌰𑌾।
𑌮𑌹𑌿𑌷𑍇𑌽𑌸𑍁𑌰𑌾𑌣𑌾𑌂 𑌅𑌧𑌿𑌪𑍇 𑌦𑍇𑌵𑌾𑌨𑌾𑌂𑌚 𑌪𑍁𑌰𑌂𑌦𑌰𑍇

𑌤𑌤𑍍𑌰𑌾𑌸𑍁𑌰𑍈𑌰𑍍𑌮𑌹𑌾𑌵𑍀𑌰𑍍𑌯𑌿𑌰𑍍𑌦𑍇𑌵𑌸𑍈𑌨𑍍𑌯𑌂 𑌪𑌰𑌾𑌜𑌿𑌤𑌂।
𑌜𑌿𑌤𑍍𑌵𑌾 𑌚 𑌸𑌕𑌲𑌾𑌨𑍍 𑌦𑍇𑌵𑌾𑌨𑍍 𑌇𑌂𑌦𑍍𑌰𑍋𑌽𑌭𑍂𑌨𑍍𑌮𑌹𑌿𑌷𑌾𑌸𑍁𑌰𑌃 ॥3॥

𑌤𑌤𑌃 𑌪𑌰𑌾𑌜𑌿𑌤𑌾 𑌦𑍇𑌵𑌾𑌃 𑌪𑌦𑍍𑌮𑌯𑍋𑌨𑌿𑌂 𑌪𑍍𑌰𑌜𑌾𑌪𑌤𑌿𑌮𑍍।
𑌪𑍁𑌰𑌸𑍍𑌕𑍃𑌤𑍍𑌯𑌗𑌤𑌾𑌸𑍍𑌤𑌤𑍍𑌰 𑌯𑌤𑍍𑌰𑍇𑌶 𑌗𑌰𑍁𑌡𑌧𑍍𑌵𑌜𑍌 ॥4॥

𑌯𑌥𑌾𑌵𑍃𑌤𑍍𑌤𑌂 𑌤𑌯𑍋𑌸𑍍𑌤𑌦𑍍𑌵𑌨𑍍 𑌮𑌹𑌿𑌷𑌾𑌸𑍁𑌰𑌚𑍇𑌷𑍍𑌟𑌿𑌤𑌮𑍍।
𑌤𑍍𑌰𑌿𑌦𑌶𑌾𑌃 𑌕𑌥𑌯𑌾𑌮𑌾𑌸𑍁𑌰𑍍𑌦𑍇𑌵𑌾𑌭𑌿𑌭𑌵𑌵𑌿𑌸𑍍𑌤𑌰𑌮𑍍 ॥5॥

𑌸𑍂𑌰𑍍𑌯𑍇𑌂𑌦𑍍𑌰𑌾𑌗𑍍𑌨𑍍𑌯𑌨𑌿𑌲𑍇𑌂𑌦𑍂𑌨𑌾𑌂 𑌯𑌮𑌸𑍍𑌯 𑌵𑌰𑍁𑌣𑌸𑍍𑌯 𑌚
𑌅𑌨𑍍𑌯𑍇𑌷𑌾𑌂 𑌚𑌾𑌧𑌿𑌕𑌾𑌰𑌾𑌨𑍍𑌸 𑌸𑍍𑌵𑌯𑌮𑍇𑌵𑌾𑌧𑌿𑌤𑌿𑌷𑍍𑌟𑌤𑌿 ॥6॥

𑌸𑍍𑌵𑌰𑍍𑌗𑌾𑌨𑍍𑌨𑌿𑌰𑌾𑌕𑍃𑌤𑌾𑌃 𑌸𑌰𑍍𑌵𑍇 𑌤𑍇𑌨 𑌦𑍇𑌵 𑌗𑌣𑌾 𑌭𑍁𑌵𑌿𑌃।
𑌵𑌿𑌚𑌰𑌂𑌤𑌿 𑌯𑌥𑌾 𑌮𑌰𑍍𑌤𑍍𑌯𑌾 𑌮𑌹𑌿𑌷𑍇𑌣 𑌦𑍁𑌰𑌾𑌤𑍍𑌮𑌨𑌾 ॥6॥

𑌏𑌤𑌦𑍍𑌵𑌃 𑌕𑌥𑌿𑌤𑌂 𑌸𑌰𑍍𑌵𑌂 𑌅𑌮𑌰𑌾𑌰𑌿𑌵𑌿𑌚𑍇𑌷𑍍𑌟𑌿𑌤𑌮𑍍।
𑌶𑌰𑌣𑌂 𑌵𑌃 𑌪𑍍𑌰𑌪𑌨𑍍𑌨𑌾𑌃 𑌸𑍍𑌮𑍋 𑌵𑌧𑌸𑍍𑌤𑌸𑍍𑌯 𑌵𑌿𑌚𑌿𑌂𑌤𑍍𑌯𑌤𑌾𑌮𑍍 ॥𑍮॥

𑌇𑌤𑍍𑌥𑌂 𑌨𑌿𑌶𑌮𑍍𑌯 𑌦𑍇𑌵𑌾𑌨𑌾𑌂 𑌵𑌚𑌾𑌂𑌸𑌿 𑌮𑌧𑍁𑌸𑍂𑌧𑌨𑌃
𑌚𑌕𑌾𑌰 𑌕𑍋𑌪𑌂 𑌶𑌂𑌭𑍁𑌶𑍍𑌚 𑌭𑍍𑌰𑍁𑌕𑍁𑌟𑍀𑌕𑍁𑌟𑌿𑌲𑌾𑌨𑌨𑍌 ॥𑍯॥

𑌤𑌤𑍋𑌽𑌤𑌿𑌕𑍋𑌪𑌪𑍂𑌰𑍍𑌣𑌸𑍍𑌯 𑌚𑌕𑍍𑌰𑌿𑌣𑍋 𑌵𑌦𑌨𑌾𑌤𑍍𑌤𑌤𑌃।
𑌨𑌿𑌶𑍍𑌚𑌕𑍍𑌰𑌾𑌮 𑌮𑌹𑌤𑍍𑌤𑍇𑌜𑍋 𑌬𑍍𑌰𑌹𑍍𑌮𑌣𑌃 𑌶𑌂𑌕𑌰𑌸𑍍𑌯 𑌚 ॥10॥

𑌅𑌨𑍍𑌯𑍇𑌷𑌾𑌂 𑌚𑍈𑌵 𑌦𑍇𑌵𑌾𑌨𑌾𑌂 𑌶𑌕𑍍𑌰𑌾𑌦𑍀𑌨𑌾𑌂 𑌶𑌰𑍀𑌰𑌤𑌃।
𑌨𑌿𑌰𑍍𑌗𑌤𑌂 𑌸𑍁𑌮𑌹𑌤𑍍𑌤𑍇𑌜𑌃 𑌸𑍍𑌤𑌚𑍍𑌚𑍈𑌕𑍍𑌯𑌂 𑌸𑌮𑌗𑌚𑍍𑌛𑌤 ॥11॥

𑌅𑌤𑍀𑌵 𑌤𑍇𑌜𑌸𑌃 𑌕𑍂𑌟𑌂 𑌜𑍍𑌵𑌲𑌂𑌤𑌮𑌿𑌵 𑌪𑌰𑍍𑌵𑌤𑌮𑍍।
𑌦𑌦𑍃𑌶𑍁𑌸𑍍𑌤𑍇 𑌸𑍁𑌰𑌾𑌸𑍍𑌤𑌤𑍍𑌰 𑌜𑍍𑌵𑌾𑌲𑌾𑌵𑍍𑌯𑌾𑌪𑍍𑌤𑌦𑌿𑌗𑌂𑌤𑌰𑌮𑍍 ॥12॥

𑌅𑌤𑍁𑌲𑌂 𑌤𑌤𑍍𑌰 𑌤𑌤𑍍𑌤𑍇𑌜𑌃 𑌸𑌰𑍍𑌵𑌦𑍇𑌵 𑌶𑌰𑍀𑌰𑌜𑌮𑍍।
𑌏𑌕𑌸𑍍𑌥𑌂 𑌤𑌦𑌭𑍂𑌨𑍍𑌨𑌾𑌰𑍀 𑌵𑍍𑌯𑌾𑌪𑍍𑌤𑌲𑍋𑌕𑌤𑍍𑌰𑌯𑌂 𑌤𑍍𑌵𑌿𑌷𑌾 ॥13॥

𑌯𑌦𑌭𑍂𑌚𑍍𑌛𑌾𑌂𑌭𑌵𑌂 𑌤𑍇𑌜𑌃 𑌸𑍍𑌤𑍇𑌨𑌾𑌜𑌾𑌯𑌤 𑌤𑌨𑍍𑌮𑍁𑌖𑌮𑍍।
𑌯𑌾𑌮𑍍𑌯𑍇𑌨 𑌚𑌾𑌭𑌵𑌨𑍍 𑌕𑍇𑌶𑌾 𑌬𑌾𑌹𑌵𑍋 𑌵𑌿𑌷𑍍𑌣𑍁𑌤𑍇𑌜𑌸𑌾 ॥14॥

𑌸𑍌𑌮𑍍𑌯𑍇𑌨 𑌸𑍍𑌤𑌨𑌯𑍋𑌰𑍍𑌯𑍁𑌗𑍍𑌮𑌂 𑌮𑌧𑍍𑌯𑌂 𑌚𑍈𑌂𑌦𑍍𑌰𑍇𑌣 𑌚𑌾𑌭𑌵𑌤𑍍।
𑌵𑌾𑌰𑍁𑌣𑍇𑌨 𑌚 𑌜𑌂𑌘𑍋𑌰𑍂 𑌨𑌿𑌤𑌂𑌬𑌸𑍍𑌤𑍇𑌜𑌸𑌾 𑌭𑍁𑌵𑌃 ॥15॥

𑌬𑍍𑌰𑌹𑍍𑌮𑌣𑌸𑍍𑌤𑍇𑌜𑌸𑌾 𑌪𑌾𑌦𑍌 𑌤𑌦𑌂𑌗𑍁𑌳𑍍𑌯𑍋𑌽𑌰𑍍𑌕 𑌤𑍇𑌜𑌸𑌾।
𑌵𑌸𑍂𑌨𑌾𑌂 𑌚 𑌕𑌰𑌾𑌂𑌗𑍁𑌳𑍍𑌯𑌃 𑌕𑍌𑌬𑍇𑌰𑍇𑌣 𑌚 𑌨𑌾𑌸𑌿𑌕𑌾 ॥16॥

𑌤𑌸𑍍𑌯𑌾𑌸𑍍𑌤𑍁 𑌦𑌂𑌤𑌾𑌃 𑌸𑌂𑌭𑍂𑌤𑌾 𑌪𑍍𑌰𑌾𑌜𑌾𑌪𑌤𑍍𑌯𑍇𑌨 𑌤𑍇𑌜𑌸𑌾
𑌨𑌯𑌨𑌤𑍍𑌰𑌿𑌤𑌯𑌂 𑌜𑌜𑍍𑌞𑍇 𑌤𑌥𑌾 𑌪𑌾𑌵𑌕𑌤𑍇𑌜𑌸𑌾 ॥1𑍭॥

𑌭𑍍𑌰𑍁𑌵𑍌 𑌚 𑌸𑌂𑌧𑍍𑌯𑌯𑍋𑌸𑍍𑌤𑍇𑌜𑌃 𑌶𑍍𑌰𑌵𑌣𑌾𑌵𑌨𑌿𑌲𑌸𑍍𑌯 𑌚
𑌅𑌨𑍍𑌯𑍇𑌷𑌾𑌂 𑌚𑍈𑌵 𑌦𑍇𑌵𑌾𑌨𑌾𑌂 𑌸𑌂𑌭𑌵𑌸𑍍𑌤𑍇𑌜𑌸𑌾𑌂 𑌶𑌿𑌵 ॥1𑍮॥

𑌤𑌤𑌃 𑌸𑌮𑌸𑍍𑌤 𑌦𑍇𑌵𑌾𑌨𑌾𑌂 𑌤𑍇𑌜𑍋𑌰𑌾𑌶𑌿𑌸𑌮𑍁𑌦𑍍𑌭𑌵𑌾𑌮𑍍।
𑌤𑌾𑌂 𑌵𑌿𑌲𑍋𑌕𑍍𑌯 𑌮𑍁𑌦𑌂 𑌪𑍍𑌰𑌾𑌪𑍁𑌃 𑌅𑌮𑌰𑌾 𑌮𑌹𑌿𑌷𑌾𑌰𑍍𑌦𑌿𑌤𑌾𑌃 ॥1𑍯॥

𑌶𑍂𑌲𑌂 𑌶𑍂𑌲𑌾𑌦𑍍𑌵𑌿𑌨𑌿𑌷𑍍𑌕𑍃𑌷𑍍𑌯 𑌦𑌦𑍌 𑌤𑌸𑍍𑌯𑍈 𑌪𑌿𑌨𑌾𑌕𑌧𑍃𑌕𑍍।
𑌚𑌕𑍍𑌰𑌂 𑌚 𑌦𑌤𑍍𑌤𑌵𑌾𑌨𑍍 𑌕𑍃𑌷𑍍𑌣𑌃 𑌸𑌮𑍁𑌤𑍍𑌪𑌾𑌟𑍍𑌯 𑌸𑍍𑌵𑌚𑌕𑍍𑌰𑌤𑌃 ॥20॥

𑌶𑌂𑌖𑌂 𑌚 𑌵𑌰𑍁𑌣𑌃 𑌶𑌕𑍍𑌤𑌿𑌂 𑌦𑌦𑍌 𑌤𑌸𑍍𑌯𑍈 𑌹𑍁𑌤𑌾𑌶𑌨𑌃
𑌮𑌾𑌰𑍁𑌤𑍋 𑌦𑌤𑍍𑌤𑌵𑌾𑌂𑌶𑍍𑌚𑌾𑌪𑌂 𑌬𑌾𑌣𑌪𑍂𑌰𑍍𑌣𑍇 𑌤𑌥𑍇𑌷𑍁𑌧𑍀 ॥21॥

𑌵𑌜𑍍𑌰𑌮𑌿𑌂𑌦𑍍𑌰𑌃 𑌸𑌮𑍁𑌤𑍍𑌪𑌾𑌟𑍍𑌯 𑌕𑍁𑌲𑌿𑌶𑌾𑌦𑌮𑌰𑌾𑌧𑌿𑌪𑌃।
𑌦𑌦𑍌 𑌤𑌸𑍍𑌯𑍈 𑌸𑌹𑌸𑍍𑌰𑌾𑌕𑍍𑌷𑍋 𑌘𑌂𑌟𑌾𑌮𑍈𑌰𑌾𑌵𑌤𑌾𑌦𑍍𑌗𑌜𑌾𑌤𑍍 ॥22॥

𑌕𑌾𑌲𑌦𑌂𑌡𑌾𑌦𑍍𑌯𑌮𑍋 𑌦𑌂𑌡𑌂 𑌪𑌾𑌶𑌂 𑌚𑌾𑌂𑌬𑍁𑌪𑌤𑌿𑌰𑍍𑌦𑌦𑍌।
𑌪𑍍𑌰𑌜𑌾𑌪𑌤𑌿𑌶𑍍𑌚𑌾𑌕𑍍𑌷𑌮𑌾𑌲𑌾𑌂 𑌦𑌦𑍌 𑌬𑍍𑌰𑌹𑍍𑌮𑌾 𑌕𑌮𑌂𑌡𑌲𑌂 ॥23॥

𑌸𑌮𑌸𑍍𑌤𑌰𑍋𑌮𑌕𑍂𑌪𑍇𑌷𑍁 𑌨𑌿𑌜 𑌰𑌶𑍍𑌮𑍀𑌨𑍍 𑌦𑌿𑌵𑌾𑌕𑌰𑌃
𑌕𑌾𑌲𑌶𑍍𑌚 𑌦𑌤𑍍𑌤𑌵𑌾𑌨𑍍 𑌖𑌡𑍍𑌗𑌂 𑌤𑌸𑍍𑌯𑌾𑌃 𑌶𑍍𑌚𑌰𑍍𑌮 𑌚 𑌨𑌿𑌰𑍍𑌮𑌲𑌮𑍍 ॥24॥

𑌕𑍍𑌷𑍀𑌰𑍋𑌦𑌶𑍍𑌚𑌾𑌮𑌲𑌂 𑌹𑌾𑌰𑌂 𑌅𑌜𑌰𑍇 𑌚 𑌤𑌥𑌾𑌂𑌬𑌰𑍇
𑌚𑍂𑌡𑌾𑌮𑌣𑌿𑌂 𑌤𑌥𑌾𑌦𑌿𑌵𑍍𑌯𑌂 𑌕𑍁𑌂𑌡𑌲𑍇 𑌕𑌟𑌕𑌾𑌨𑌿𑌚 ॥25॥

𑌅𑌰𑍍𑌧𑌚𑌂𑌦𑍍𑌰𑌂 𑌤𑌧𑌾 𑌶𑍁𑌭𑍍𑌰𑌂 𑌕𑍇𑌯𑍂𑌰𑌾𑌨𑍍 𑌸𑌰𑍍𑌵 𑌬𑌾𑌹𑍁𑌷𑍁
𑌨𑍂𑌪𑍁𑌰𑍌 𑌵𑌿𑌮𑌲𑍌 𑌤𑌦𑍍𑌵 𑌦𑍍𑌗𑍍𑌰𑍈𑌵𑍇𑌯𑌕𑌮𑌨𑍁𑌤𑍍𑌤𑌮𑌮𑍍 ॥26॥

𑌅𑌂𑌗𑍁𑌳𑍀𑌯𑌕𑌰𑌤𑍍𑌨𑌾𑌨𑌿 𑌸𑌮𑌸𑍍𑌤𑌾𑌸𑍍𑌵𑌂𑌗𑍁𑌳𑍀𑌷𑍁 𑌚
𑌵𑌿𑌶𑍍𑌵 𑌕𑌰𑍍𑌮𑌾 𑌦𑌦𑍌 𑌤𑌸𑍍𑌯𑍈 𑌪𑌰𑌶𑍁𑌂 𑌚𑌾𑌤𑌿 𑌨𑌿𑌰𑍍𑌮𑌲𑌂 ॥2𑍭॥

𑌅𑌸𑍍𑌤𑍍𑌰𑌾𑌣𑍍𑌯𑌨𑍇𑌕𑌰𑍂𑌪𑌾𑌣𑌿 𑌤𑌥𑌾𑌽𑌭𑍇𑌦𑍍𑌯𑌂 𑌚 𑌦𑌂𑌶𑌨𑌮𑍍।
𑌅𑌮𑍍𑌲𑌾𑌨 𑌪𑌂𑌕𑌜𑌾𑌂 𑌮𑌾𑌲𑌾𑌂 𑌶𑌿𑌰𑌸𑍍𑌯𑍁 𑌰𑌸𑌿 𑌚𑌾𑌪𑌰𑌾𑌮𑍍॥2𑍮॥

𑌅𑌦𑌦𑌜𑍍𑌜𑌲𑌧𑌿𑌸𑍍𑌤𑌸𑍍𑌯𑍈 𑌪𑌂𑌕𑌜𑌂 𑌚𑌾𑌤𑌿𑌶𑍋𑌭𑌨𑌮𑍍।
𑌹𑌿𑌮𑌵𑌾𑌨𑍍 𑌵𑌾𑌹𑌨𑌂 𑌸𑌿𑌂𑌹𑌂 𑌰𑌤𑍍𑌨𑌾𑌨𑌿 𑌵𑌿𑌵𑌿𑌧𑌾𑌨𑌿𑌚॥2𑍯॥

𑌦𑌦𑌾𑌵𑌶𑍂𑌨𑍍𑌯𑌂 𑌸𑍁𑌰𑌯𑌾 𑌪𑌾𑌨𑌪𑌾𑌤𑍍𑌰𑌂 𑌦𑌨𑌾𑌧𑌿𑌪𑌃।
𑌶𑍇𑌷𑌶𑍍𑌚 𑌸𑌰𑍍𑌵 𑌨𑌾𑌗𑍇𑌶𑍋 𑌮𑌹𑌾𑌮𑌣𑌿 𑌵𑌿𑌭𑍂𑌷𑌿𑌤𑌮𑍍 ॥30॥

𑌨𑌾𑌗𑌹𑌾𑌰𑌂 𑌦𑌦𑍌 𑌤𑌸𑍍𑌯𑍈 𑌧𑌤𑍍𑌤𑍇 𑌯𑌃 𑌪𑍃𑌥𑌿𑌵𑍀𑌮𑌿𑌮𑌾𑌮𑍍।
𑌅𑌨𑍍𑌯𑍈𑌰𑌪𑌿 𑌸𑍁𑌰𑍈𑌰𑍍𑌦𑍇𑌵𑍀 𑌭𑍂𑌷𑌣𑍈𑌃 𑌆𑌯𑍁𑌧𑍈𑌸𑍍𑌤𑌥𑌾𑌃 ॥31॥

𑌸𑌮𑍍𑌮𑌾𑌨𑌿𑌤𑌾 𑌨𑌨𑌾𑌦𑍋𑌚𑍍𑌚𑍈𑌃 𑌸𑌾𑌟𑍍𑌟𑌹𑌾𑌸𑌂 𑌮𑍁𑌹𑍁𑌰𑍍𑌮𑍁𑌹𑍁।
𑌤𑌸𑍍𑌯𑌾𑌨𑌾𑌦𑍇𑌨 𑌘𑍋𑌰𑍇𑌣 𑌕𑍃𑌤𑍍𑌸𑍍𑌨 𑌮𑌾𑌪𑍂𑌰𑌿𑌤𑌂 𑌨𑌭𑌃 ॥32॥

𑌅𑌮𑌾𑌯𑌤𑌾𑌤𑌿𑌮𑌹𑌤𑌾 𑌪𑍍𑌰𑌤𑌿𑌶𑌬𑍍𑌦𑍋 𑌮𑌹𑌾𑌨𑌭𑍂𑌤𑍍।
𑌚𑍁𑌕𑍍𑌷𑍁𑌭𑍁𑌃 𑌸𑌕𑌲𑌾𑌲𑍋𑌕𑌾𑌃 𑌸𑌮𑍁𑌦𑍍𑌰𑌾𑌶𑍍𑌚 𑌚𑌕𑌂𑌪𑌿𑌰𑍇 ॥33॥

𑌚𑌚𑌾𑌲 𑌵𑌸𑍁𑌧𑌾 𑌚𑍇𑌲𑍁𑌃 𑌸𑌕𑌲𑌾𑌶𑍍𑌚 𑌮𑌹𑍀𑌧𑌰𑌾𑌃।
𑌜𑌯𑍇𑌤𑌿 𑌦𑍇𑌵𑌾𑌶𑍍𑌚 𑌮𑍁𑌦𑌾 𑌤𑌾𑌮𑍂𑌚𑍁𑌃 𑌸𑌿𑌂𑌹𑌵𑌾𑌹𑌿𑌨𑍀𑌮𑍍 ॥34॥

𑌤𑍁𑌷𑍍𑌟𑍁𑌵𑍁𑌰𑍍𑌮𑍁𑌨𑌯𑌶𑍍𑌚𑍈𑌨𑌾𑌂 𑌭𑌕𑍍𑌤𑌿𑌨𑌮𑍍𑌰𑌾𑌤𑍍𑌮𑌮𑍂𑌰𑍍𑌤𑌯𑌃।
𑌦𑍃𑌷𑍍𑌟𑍍𑌵𑌾 𑌸𑌮𑌸𑍍𑌤𑌂 𑌸𑌂𑌕𑍍𑌷𑍁𑌬𑍍𑌧𑌂 𑌤𑍍𑌰𑍈𑌲𑍋𑌕𑍍𑌯𑌂 𑌅𑌮𑌰𑌾𑌰𑌯𑌃 ॥35॥

𑌸𑌨𑍍𑌨𑌦𑍍𑌧𑌾𑌖𑌿𑌲𑌸𑍈𑌨𑍍𑌯𑌾𑌸𑍍𑌤𑍇 𑌸𑌮𑍁𑌤𑍍𑌤𑌸𑍍𑌥𑍁𑌰𑍁𑌦𑌾𑌯𑍁𑌦𑌾𑌃।
𑌆𑌃 𑌕𑌿𑌮𑍇𑌤𑌦𑌿𑌤𑌿 𑌕𑍍𑌰𑍋𑌧𑌾𑌦𑌾𑌭𑌾𑌷𑍍𑌯 𑌮𑌹𑌿𑌷𑌾𑌸𑍁𑌰𑌃 ॥36॥

𑌅𑌭𑍍𑌯𑌧𑌾𑌵𑌤 𑌤𑌂 𑌶𑌬𑍍𑌦𑌂 𑌅𑌶𑍇𑌷𑍈𑌰𑌸𑍁𑌰𑍈𑌰𑍍𑌵𑍃𑌤𑌃।
𑌸 𑌦𑌦𑌰𑍍𑌷 𑌤𑌤𑍋 𑌦𑍇𑌵𑍀𑌂 𑌵𑍍𑌯𑌾𑌪𑍍𑌤𑌲𑍋𑌕𑌤𑍍𑌰𑌯𑌾𑌂 𑌤𑍍𑌵𑌿𑌷𑌾॥3𑍭॥

𑌪𑌾𑌦𑌾𑌕𑍍𑌰𑌾𑌂𑌤𑍍𑌯𑌾 𑌨𑌤𑌭𑍁𑌵𑌂 𑌕𑌿𑌰𑍀𑌟𑍋𑌲𑍍𑌲𑌿𑌖𑌿𑌤𑌾𑌂𑌬𑌰𑌾𑌮𑍍।
𑌕𑍍𑌷𑍋𑌭𑌿𑌤𑌾𑌶𑍇𑌷𑌪𑌾𑌤𑌾𑌳𑌾𑌂 𑌧𑌨𑍁𑌰𑍍𑌜𑍍𑌯𑌾𑌨𑌿𑌃𑌸𑍍𑌵𑌨𑍇𑌨 𑌤𑌾𑌮𑍍 ॥3𑍮॥

𑌦𑌿𑌶𑍋 𑌭𑍁𑌜𑌸𑌹𑌸𑍍𑌰𑍇𑌣 𑌸𑌮𑌂𑌤𑌾𑌦𑍍𑌵𑍍𑌯𑌾𑌪𑍍𑌯 𑌸𑌂𑌸𑍍𑌥𑌿𑌤𑌾𑌮𑍍।
𑌤𑌤𑌃 𑌪𑍍𑌰𑌵𑌵𑍃𑌤𑍇 𑌯𑍁𑌦𑍍𑌧𑌂 𑌤𑌯𑌾 𑌦𑍇𑌵𑍍𑌯𑌾 𑌸𑍁𑌰𑌦𑍍𑌵𑌿𑌷𑌾𑌂 ॥3𑍯॥

𑌶𑌸𑍍𑌤𑍍𑌰𑌾𑌸𑍍𑌤𑍍𑌰𑍈𑌰𑍍𑌭𑌹𑍁𑌧𑌾 𑌮𑍁𑌕𑍍𑌤𑍈𑌰𑌾𑌦𑍀𑌪𑌿𑌤𑌦𑌿𑌗𑌂𑌤𑌰𑌮𑍍।
𑌮𑌹𑌿𑌷𑌾𑌸𑍁𑌰𑌸𑍇𑌨𑌾𑌨𑍀𑌶𑍍𑌚𑌿𑌕𑍍𑌷𑍁𑌰𑌾𑌖𑍍𑌯𑍋 𑌮𑌹𑌾𑌸𑍁𑌰𑌃 ॥40॥

𑌯𑍁𑌯𑍁𑌧𑍇 𑌚𑌮𑌰𑌶𑍍𑌚𑌾𑌨𑍍𑌯𑍈𑌶𑍍𑌚𑌤𑍁𑌰𑌂𑌗𑌬𑌲𑌾𑌨𑍍𑌵𑌿𑌤𑌃।
𑌰𑌥𑌾𑌨𑌾𑌮𑌯𑍁𑌤𑍈𑌃 𑌷𑌡𑍍𑌭𑌿𑌃 𑌰𑍁𑌦𑌗𑍍𑌰𑌾𑌖𑍍𑌯𑍋 𑌮𑌹𑌾𑌸𑍁𑌰𑌃 ॥41॥

𑌅𑌯𑍁𑌧𑍍𑌯𑌤𑌾𑌯𑍁𑌤𑌾𑌨𑌾𑌂 𑌚 𑌸𑌹𑌸𑍍𑌰𑍇𑌣 𑌮𑌹𑌾𑌹𑌨𑍁𑌃।
𑌪𑌂𑌚𑌾𑌶𑌦𑍍𑌭𑌿𑌶𑍍𑌚 𑌨𑌿𑌯𑍁𑌤𑍈𑌰𑌸𑌿𑌲𑍋𑌮𑌾 𑌮𑌹𑌾𑌸𑍁𑌰𑌃 ॥42॥

𑌅𑌯𑍁𑌤𑌾𑌨𑌾𑌂 𑌶𑌤𑍈𑌃 𑌷𑌡𑍍𑌭𑌿𑌃𑌰𑍍𑌭𑌾𑌷𑍍𑌕𑌲𑍋 𑌯𑍁𑌯𑍁𑌧𑍇 𑌰𑌣𑍇।
𑌗𑌜𑌵𑌾𑌜𑌿 𑌸𑌹𑌸𑍍𑌰𑍌𑌘𑍈 𑌰𑌨𑍇𑌕𑍈𑌃 𑌪𑌰𑌿𑌵𑌾𑌰𑌿𑌤𑌃 ॥43॥

𑌵𑍃𑌤𑍋 𑌰𑌥𑌾𑌨𑌾𑌂 𑌕𑍋𑌟𑍍𑌯𑌾 𑌚 𑌯𑍁𑌦𑍍𑌧𑍇 𑌤𑌸𑍍𑌮𑌿𑌨𑍍𑌨𑌯𑍁𑌧𑍍𑌯𑌤।
𑌬𑌿𑌡𑌾𑌲𑌾𑌖𑍍𑌯𑍋𑌽𑌯𑍁𑌤𑌾𑌨𑌾𑌂 𑌚 𑌪𑌂𑌚𑌾𑌶𑌦𑍍𑌭𑌿𑌰𑌥𑌾𑌯𑍁𑌤𑍈𑌃 ॥44॥

𑌯𑍁𑌯𑍁𑌧𑍇 𑌸𑌂𑌯𑍁𑌗𑍇 𑌤𑌤𑍍𑌰 𑌰𑌥𑌾𑌨𑌾𑌂 𑌪𑌰𑌿𑌵𑌾𑌰𑌿𑌤𑌃।
𑌅𑌨𑍍𑌯𑍇 𑌚 𑌤𑌤𑍍𑌰𑌾𑌯𑍁𑌤𑌶𑍋 𑌰𑌥𑌨𑌾𑌗𑌹𑌯𑍈𑌰𑍍𑌵𑍃𑌤𑌾𑌃 ॥45॥

𑌯𑍁𑌯𑍁𑌧𑍁𑌃 𑌸𑌂𑌯𑍁𑌗𑍇 𑌦𑍇𑌵𑍍𑌯𑌾 𑌸𑌹 𑌤𑌤𑍍𑌰 𑌮𑌹𑌾𑌸𑍁𑌰𑌾𑌃।
𑌕𑍋𑌟𑌿𑌕𑍋𑌟𑌿𑌸𑌹𑌸𑍍𑌤𑍍𑌰𑍈𑌸𑍍𑌤𑍁 𑌰𑌥𑌾𑌨𑌾𑌂 𑌦𑌂𑌤𑌿𑌨𑌾𑌂 𑌤𑌥𑌾 ॥46॥

𑌹𑌯𑌾𑌨𑌾𑌂 𑌚 𑌵𑍃𑌤𑍋 𑌯𑍁𑌦𑍍𑌧𑍇 𑌤𑌤𑍍𑌰𑌾𑌭𑍂𑌨𑍍𑌮𑌹𑌿𑌷𑌾𑌸𑍁𑌰𑌃।
𑌤𑍋𑌮𑌰𑍈𑌰𑍍𑌭𑌿𑌂𑌧𑌿𑌪𑌾𑌲𑍈𑌶𑍍𑌚 𑌶𑌕𑍍𑌤𑌿𑌭𑌿𑌰𑍍𑌮𑍁𑌸𑌲𑍈𑌸𑍍𑌤𑌥𑌾 ॥4𑍭॥

𑌯𑍁𑌯𑍁𑌧𑍁𑌃 𑌸𑌂𑌯𑍁𑌗𑍇 𑌦𑍇𑌵𑍍𑌯𑌾 𑌖𑌡𑍍𑌗𑍈𑌃 𑌪𑌰𑌸𑍁𑌪𑌟𑍍𑌟𑌿𑌸𑍈𑌃।
𑌕𑍇𑌚𑌿𑌚𑍍𑌛 𑌚𑌿𑌕𑍍𑌷𑌿𑌪𑍁𑌃 𑌶𑌕𑍍𑌤𑍀𑌃 𑌕𑍇𑌚𑌿𑌤𑍍 𑌪𑌾𑌶𑌾𑌂𑌸𑍍𑌤𑌥𑌾𑌪𑌰𑍇 ॥4𑍮॥

𑌦𑍇𑌵𑍀𑌂 𑌖𑌡𑍍𑌗𑌪𑍍𑌰𑌹𑌾𑌰𑍈𑌸𑍍𑌤𑍁 𑌤𑍇 𑌤𑌾𑌂 𑌹𑌂𑌤𑍁𑌂 𑌪𑍍𑌰𑌚𑌕𑍍𑌰𑌮𑍁𑌃।
𑌸𑌾𑌪𑌿 𑌦𑍇𑌵𑍀 𑌤𑌤𑌸𑍍𑌤𑌾𑌨𑌿 𑌶𑌸𑍍𑌤𑍍𑌰𑌾𑌣𑍍𑌯𑌸𑍍𑌤𑍍𑌰𑌾𑌣𑌿 𑌚𑌂𑌡𑌿𑌕𑌾 ॥4𑍯॥

𑌲𑍀𑌲 𑌯𑍈𑌵 𑌪𑍍𑌰𑌚𑌿𑌚𑍍𑌛𑍇𑌦 𑌨𑌿𑌜𑌶𑌸𑍍𑌤𑍍𑌰𑌾𑌸𑍍𑌤𑍍𑌰𑌵𑌰𑍍𑌷𑌿𑌣𑍀।
𑌅𑌨𑌾𑌯𑌸𑍍𑌤𑌾𑌨𑌨𑌾 𑌦𑍇𑌵𑍀 𑌸𑍍𑌤𑍂𑌯𑌮𑌾𑌨𑌾 𑌸𑍁𑌰𑌰𑍍𑌷𑌿𑌭𑌿𑌃 ॥50॥

𑌮𑍁𑌮𑍋𑌚𑌾𑌸𑍁𑌰𑌦𑍇𑌹𑍇𑌷𑍁 𑌶𑌸𑍍𑌤𑍍𑌰𑌾𑌣𑍍𑌯𑌸𑍍𑌤𑍍𑌰𑌾𑌣𑌿 𑌚𑍇𑌶𑍍𑌵𑌰𑍀।
𑌸𑍋𑌽𑌪𑌿 𑌕𑍍𑌰𑍁𑌦𑍍𑌧𑍋 𑌧𑍁𑌤𑌸𑌟𑍋 𑌦𑍇𑌵𑍍𑌯𑌾 𑌵𑌾𑌹𑌨𑌕𑍇𑌸𑌰𑍀 ॥51॥

𑌚𑌚𑌾𑌰𑌾𑌸𑍁𑌰 𑌸𑍈𑌨𑍍𑌯𑍇𑌷𑍁 𑌵𑌨𑍇𑌷𑍍𑌵𑌿𑌵 𑌹𑍁𑌤𑌾𑌶𑌨𑌃।
𑌨𑌿𑌃𑌶𑍍𑌵𑌾𑌸𑌾𑌨𑍍 𑌮𑍁𑌮𑍁𑌚𑍇𑌯𑌾𑌂𑌶𑍍𑌚 𑌯𑍁𑌧𑍍𑌯𑌮𑌾𑌨𑌾𑌰𑌣𑍇𑌽𑌂𑌬𑌿𑌕𑌾॥52॥

𑌤 𑌏𑌵 𑌸𑌧𑍍𑌯𑌸𑌂𑌭𑍂𑌤𑌾 𑌗𑌣𑌾𑌃 𑌶𑌤𑌸𑌹𑌸𑍍𑌰𑌶𑌃।
𑌯𑍁𑌯𑍁𑌧𑍁𑌸𑍍𑌤𑍇 𑌪𑌰𑌶𑍁𑌭𑌿𑌰𑍍𑌭𑌿𑌂𑌦𑌿𑌪𑌾𑌲𑌾𑌸𑌿𑌪𑌟𑍍𑌟𑌿𑌶𑍈𑌃 ॥53॥

𑌨𑌾𑌶𑌯𑌂𑌤𑍋𑌽𑌅𑌸𑍁𑌰𑌗𑌣𑌾𑌨𑍍 𑌦𑍇𑌵𑍀𑌶𑌕𑍍𑌤𑍍𑌯𑍁𑌪𑌬𑍃𑌂𑌹𑌿𑌤𑌾𑌃।
𑌅𑌵𑌾𑌦𑌯𑌂𑌤𑌾 𑌪𑌟𑌹𑌾𑌨𑍍 𑌗𑌣𑌾𑌃 𑌶𑌙𑌾𑌂 𑌸𑍍𑌤𑌥𑌾𑌪𑌰𑍇॥54॥

𑌮𑍃𑌦𑌂𑌗𑌾𑌂𑌶𑍍𑌚 𑌤𑌥𑍈𑌵𑌾𑌨𑍍𑌯𑍇 𑌤𑌸𑍍𑌮𑌿𑌨𑍍𑌯𑍁𑌦𑍍𑌧 𑌮𑌹𑍋𑌤𑍍𑌸𑌵𑍇।
𑌤𑌤𑍋𑌦𑍇𑌵𑍀 𑌤𑍍𑌰𑌿𑌶𑍂𑌲𑍇𑌨 𑌗𑌦𑌯𑌾 𑌶𑌕𑍍𑌤𑌿𑌵𑍃𑌷𑍍𑌟𑌿𑌭𑌿𑌃॥55॥

𑌖𑌡𑍍𑌗𑌾𑌦𑌿𑌭𑌿𑌶𑍍𑌚 𑌶𑌤𑌶𑍋 𑌨𑌿𑌜𑌘𑌾𑌨 𑌮𑌹𑌾𑌸𑍁𑌰𑌾𑌨𑍍।
𑌪𑌾𑌤𑌯𑌾𑌮𑌾𑌸 𑌚𑍈𑌵𑌾𑌨𑍍𑌯𑌾𑌨𑍍 𑌘𑌂𑌟𑌾𑌸𑍍𑌵𑌨𑌵𑌿𑌮𑍋𑌹𑌿𑌤𑌾𑌨𑍍 ॥56॥

𑌅𑌸𑍁𑌰𑌾𑌨𑍍 𑌭𑍁𑌵𑌿𑌪𑌾𑌶𑍇𑌨 𑌬𑌧𑍍𑌵𑌾𑌚𑌾𑌨𑍍𑌯𑌾𑌨𑌕𑌰𑍍𑌷𑌯𑌤𑍍।
𑌕𑍇𑌚𑌿𑌦𑍍 𑌦𑍍𑌵𑌿𑌧𑌾𑌕𑍃𑌤𑌾 𑌸𑍍𑌤𑍀𑌕𑍍𑌷𑍍𑌣𑍈𑌃 𑌖𑌡𑍍𑌗𑌪𑌾𑌤𑍈𑌸𑍍𑌤𑌥𑌾𑌪𑌰𑍇॥5𑍭॥

𑌵𑌿𑌪𑍋𑌥𑌿𑌤𑌾 𑌨𑌿𑌪𑌾𑌤𑍇𑌨 𑌗𑌦𑌯𑌾 𑌭𑍁𑌵𑌿 𑌶𑍇𑌰𑌤𑍇।
𑌵𑍇𑌮𑍁𑌶𑍍𑌚 𑌕𑍇𑌚𑌿𑌦𑍍𑌰𑍁𑌧𑌿𑌰𑌂 𑌮𑍁𑌸𑌲𑍇𑌨 𑌭𑍃𑌶𑌂 𑌹𑌤𑌾𑌃 ॥5𑍮॥

𑌕𑍇𑌚𑌿𑌨𑍍𑌨𑌿𑌪𑌤𑌿𑌤𑌾 𑌭𑍂𑌮𑍌 𑌭𑌿𑌨𑍍𑌨𑌾𑌃 𑌶𑍂𑌲𑍇𑌨 𑌵𑌕𑍍𑌷𑌸𑌿।
𑌨𑌿𑌰𑌂𑌤𑌰𑌾𑌃 𑌶𑌰𑍌𑌘𑍇𑌨 𑌕𑍃𑌤𑌾𑌃 𑌕𑍇𑌚𑌿𑌦𑍍𑌰𑌣𑌾𑌜𑌿𑌰𑍇 ॥5𑍯॥

𑌶𑌲𑍍𑌯𑌾𑌨𑍁𑌕𑌾𑌰𑌿𑌣𑌃 𑌪𑍍𑌰𑌾𑌣𑌾𑌨𑍍 𑌮𑌮𑍁𑌚𑍁𑌸𑍍𑌤𑍍𑌰𑌿𑌦𑌶𑌾𑌰𑍍𑌦𑌨𑌾𑌃।
𑌕𑍇𑌷𑌾𑌂𑌚𑌿𑌦𑍍𑌬𑌾𑌹𑌵𑌶𑍍𑌚𑌿𑌨𑍍𑌨𑌾𑌶𑍍𑌚𑌿𑌨𑍍𑌨𑌗𑍍𑌰𑍀𑌵𑌾𑌸𑍍𑌤𑌥𑌾𑌪𑌰𑍇 ॥60॥

𑌶𑌿𑌰𑌾𑌂𑌸𑌿 𑌪𑍇𑌤𑍁𑌰𑌨𑍍𑌯𑍇𑌷𑌾𑌂 𑌅𑌨𑍍𑌯𑍇 𑌮𑌧𑍍𑌯𑍇 𑌵𑌿𑌦𑌾𑌰𑌿𑌤𑌾𑌃।
𑌵𑌿𑌚𑍍𑌛𑌿𑌨𑍍𑌨𑌜𑌜𑍍𑌘𑌾𑌸𑍍𑌵𑌪𑌰𑍇 𑌪𑍇𑌤𑍁𑌰𑍁𑌰𑍍𑌵𑍍𑌯𑌾𑌂 𑌮𑌹𑌾𑌸𑍁𑌰𑌾𑌃 ॥61॥

𑌏𑌕𑌬𑌾𑌹𑍍𑌵𑌕𑍍𑌷𑌿𑌚𑌰𑌣𑌾𑌃 𑌕𑍇𑌚𑌿𑌦𑍍𑌦𑍇𑌵𑍍𑌯𑌾 𑌦𑍍𑌵𑌿𑌧𑌾𑌕𑍃𑌤𑌾𑌃।
𑌛𑌿𑌨𑍍𑌨𑍇𑌪𑌿 𑌚𑌾𑌨𑍍𑌯𑍇 𑌶𑌿𑌰𑌸𑌿 𑌪𑌤𑌿𑌤𑌾𑌃 𑌪𑍁𑌨𑌰𑍁𑌤𑍍𑌥𑌿𑌤𑌾𑌃 ॥62॥

𑌕𑌬𑌂𑌧𑌾 𑌯𑍁𑌯𑍁𑌧𑍁𑌰𑍍𑌦𑍇𑌵𑍍𑌯𑌾 𑌗𑍃𑌹𑍀𑌤𑌪𑌰𑌮𑌾𑌯𑍁𑌧𑌾𑌃।
𑌨𑌨𑍃𑌤𑍁𑌶𑍍𑌚𑌾𑌪𑌰𑍇 𑌤𑌤𑍍𑌰 𑌯𑍁𑌦𑍍𑌦𑍇 𑌤𑍂𑌰𑍍𑌯𑌲𑌯𑌾𑌶𑍍𑌰𑌿𑌤𑌾𑌃 ॥63॥

𑌕𑌬𑌂𑌧𑌾𑌶𑍍𑌚𑌿𑌨𑍍𑌨𑌶𑌿𑌰𑌸𑌃 𑌖𑌡𑍍𑌗𑌶𑌕𑍍𑌯𑍍𑌤𑍃𑌷𑍍𑌟𑌿𑌪𑌾𑌣𑌯𑌃।
𑌤𑌿𑌷𑍍𑌠 𑌤𑌿𑌷𑍍𑌠𑍇𑌤𑌿 𑌭𑌾𑌷𑌂𑌤𑍋 𑌦𑍇𑌵𑍀 𑌮𑌨𑍍𑌯𑍇 𑌮𑌹𑌾𑌸𑍁𑌰𑌾𑌃 ॥64॥

𑌪𑌾𑌤𑌿𑌤𑍈 𑌰𑌥𑌨𑌾𑌗𑌾𑌶𑍍𑌵𑍈𑌃 𑌆𑌸𑍁𑌰𑍈𑌶𑍍𑌚 𑌵𑌸𑍁𑌂𑌧𑌰𑌾।
𑌅𑌗𑌮𑍍𑌯𑌾 𑌸𑌾𑌭𑌵𑌤𑍍𑌤𑌤𑍍𑌰 𑌯𑌤𑍍𑌰𑌾𑌭𑍂𑌤𑍍 𑌸 𑌮𑌹𑌾𑌰𑌣𑌃 ॥65॥

𑌶𑍋𑌣𑌿𑌤𑍌𑌘𑌾 𑌮𑌹𑌾𑌨𑌦𑍍𑌯𑌸𑍍𑌸𑌦𑍍𑌯𑌸𑍍𑌤𑌤𑍍𑌰 𑌵𑌿𑌸𑍁𑌸𑍍𑌰𑍁𑌵𑍁𑌃।
𑌮𑌧𑍍𑌯𑍇 𑌚𑌾𑌸𑍁𑌰𑌸𑍈𑌨𑍍𑌯𑌸𑍍𑌯 𑌵𑌾𑌰𑌣𑌾𑌸𑍁𑌰𑌵𑌾𑌜𑌿𑌨𑌾𑌮𑍍 ॥66॥

𑌕𑍍𑌷𑌣𑍇𑌨 𑌤𑌨𑍍𑌮𑌹𑌾𑌸𑍈𑌨𑍍𑌯𑌮𑌸𑍁𑌰𑌾𑌣𑌾𑌂 𑌤𑌥𑌾𑌽𑌂𑌬𑌿𑌕𑌾।
𑌨𑌿𑌨𑍍𑌯𑍇 𑌕𑍍𑌷𑌯𑌂 𑌯𑌥𑌾 𑌵𑌹𑍍𑌨𑌿𑌸𑍍𑌤𑍃𑌣𑌦𑌾𑌰𑍁 𑌮𑌹𑌾𑌚𑌯𑌮𑍍 ॥6𑍭॥

𑌸𑌚 𑌸𑌿𑌂𑌹𑍋 𑌮𑌹𑌾𑌨𑌾𑌦𑌮𑍁𑌤𑍍𑌸𑍃𑌜𑌨𑍍 𑌧𑍁𑌤𑌕𑍇𑌸𑌰𑌃।
𑌶𑌰𑍀𑌰𑍇𑌭𑍍𑌯𑍋𑌽𑌮𑌰𑌾𑌰𑍀𑌣𑌾𑌮𑌸𑍂𑌨𑌿𑌵 𑌵𑌿𑌚𑌿𑌨𑍍𑌵𑌤𑌿 ॥6𑍮॥

𑌦𑍇𑌵𑍍𑌯𑌾 𑌗𑌣𑍈𑌶𑍍𑌚 𑌤𑍈𑌸𑍍𑌤𑌤𑍍𑌰 𑌕𑍃𑌤𑌂 𑌯𑍁𑌦𑍍𑌧𑌂 𑌤𑌥𑌾𑌸𑍁𑌰𑍈𑌃।
𑌯𑌥𑍈𑌷𑌾𑌂 𑌤𑍁𑌷𑍍𑌟𑍁𑌵𑍁𑌰𑍍𑌦𑍇𑌵𑌾𑌃 𑌪𑍁𑌷𑍍𑌪𑌵𑍃𑌷𑍍𑌟𑌿𑌮𑍁𑌚𑍋 𑌦𑌿𑌵𑌿 ॥6𑍯॥

𑌜𑌯 𑌜𑌯 𑌶𑍍𑌰𑍀 𑌮𑌾𑌰𑍍𑌕𑌂𑌡𑍇𑌯 𑌪𑍁𑌰𑌾𑌣𑍇 𑌸𑌾𑌵𑌰𑍍𑌨𑌿𑌕𑍇 𑌮𑌨𑍍𑌵𑌂𑌤𑌰𑍇 𑌦𑍇𑌵𑌿 𑌮𑌹𑌤𑍍𑌮𑍍𑌯𑍇 𑌮𑌹𑌿𑌷𑌾𑌸𑍁𑌰𑌸𑍈𑌨𑍍𑌯𑌵𑌧𑍋 𑌨𑌾𑌮 𑌦𑍍𑌵𑌿𑌤𑍀𑌯𑍋𑌽𑌧𑍍𑌯𑌾𑌯𑌃॥

𑌆𑌹𑍁𑌤𑌿
𑌓𑌂 𑌹𑍍𑌰𑍀𑌂 𑌸𑌾𑌂𑌗𑌾𑌯𑍈 𑌸𑌾𑌯𑍁𑌧𑌾𑌯𑍈 𑌸𑌶𑌕𑍍𑌤𑌿𑌕𑌾𑌯𑍈 𑌸𑌪𑌰𑌿𑌵𑌾𑌰𑌾𑌯𑍈 𑌸𑌵𑌾𑌹𑌨𑌾𑌯𑍈 𑌅𑌷𑍍𑌟𑌾𑌵𑌿𑌂𑌶𑌤𑌿 𑌵𑌰𑍍𑌣𑌾𑌤𑍍𑌮𑌿𑌕𑌾𑌯𑍈 𑌲𑌕𑍍𑌶𑍍𑌮𑍀 𑌬𑍀𑌜𑌾𑌦𑌿𑌷𑍍𑌟𑌾𑌯𑍈 𑌮𑌹𑌾𑌹𑍁𑌤𑌿𑌂 𑌸𑌮𑌰𑍍𑌪𑌯𑌾𑌮𑌿 𑌨𑌮𑌃 𑌸𑍍𑌵𑌾𑌹𑌾 ।

Browse Related Categories: