𑌪𑌂𑌚𑌸𑍍𑌤𑌵𑌿 – 2 𑌚𑌰𑍍𑌚𑌾𑌸𑍍𑌤𑌵𑌃 >>
𑌸𑍌𑌂𑌦𑌰𑍍𑌯𑌵𑌿𑌭𑍍𑌰𑌮𑌭𑍁𑌵𑍋 𑌭𑍁𑌵𑌨𑌾𑌧𑌿𑌪𑌤𑍍𑌯-
-𑌸𑌂𑌕𑌲𑍍𑌪𑌕𑌲𑍍𑌪𑌤𑌰𑌵𑌸𑍍𑌤𑍍𑌰𑌿𑌪𑍁𑌰𑍇 𑌜𑌯𑌂𑌤𑌿 ।
𑌏𑌤𑍇 𑌕𑌵𑌿𑌤𑍍𑌵𑌕𑍁𑌮𑌦𑌪𑍍𑌰𑌕𑌰𑌾𑌵𑌬𑍋𑌧-
-𑌪𑍂𑌰𑍍𑌣𑍇𑌂𑌦𑌵𑌸𑍍𑌤𑍍𑌵𑌯𑌿 𑌜𑌗𑌜𑍍𑌜𑌨𑌨𑌿 𑌪𑍍𑌰𑌣𑌾𑌮𑌾𑌃 ॥ 1 ॥
𑌦𑍇𑌵𑌿 𑌸𑍍𑌤𑍁𑌤𑌿𑌵𑍍𑌯𑌤𑌿𑌕𑌰𑍇 𑌕𑍃𑌤𑌬𑍁𑌦𑍍𑌧𑌯𑌸𑍍𑌤𑍇
𑌵𑌾𑌚𑌸𑍍𑌪𑌤𑌿 𑌪𑍍𑌰𑌭𑍃𑌤𑌯𑍋𑌽𑌪𑌿 𑌜𑌡𑍀 𑌭𑌵𑌂𑌤𑌿 ।
𑌤𑌸𑍍𑌮𑌾𑌨𑍍𑌨𑌿𑌸𑌰𑍍𑌗𑌜𑌡𑌿𑌮𑌾 𑌕𑌤𑌮𑍋𑌽𑌹𑌮𑌤𑍍𑌰
𑌸𑍍𑌤𑍋𑌤𑍍𑌰𑌂 𑌤𑌵 𑌤𑍍𑌰𑌿𑌪𑍁𑌰𑌤𑌾𑌪𑌨𑌪𑌤𑍍𑌨𑌿 𑌕𑌰𑍍𑌤𑍁𑌮𑍍 ॥ 2 ॥
𑌮𑌾𑌤𑌸𑍍𑌤𑌥𑌾𑌪𑌿 𑌭𑌵𑌤𑍀𑌂 𑌭𑌵𑌤𑍀𑌵𑍍𑌰𑌤𑌾𑌪-
-𑌵𑌿𑌚𑍍𑌛𑌿𑌤𑍍𑌤𑌯𑍇 𑌸𑍍𑌤𑍁𑌤𑌿𑌮𑌹𑌾𑌰𑍍𑌣𑌵 𑌕𑌰𑍍𑌣𑌧𑌾𑌰𑌃 ।
𑌸𑍍𑌤𑍋𑌤𑍁𑌂 𑌭𑌵𑌾𑌨𑌿 𑌸 𑌭𑌵𑌚𑍍𑌚𑌰𑌣𑌾𑌰𑌵𑌿𑌂𑌦-
-𑌭𑌕𑍍𑌤𑌿𑌗𑍍𑌰𑌹𑌃 𑌕𑌿𑌮𑌪𑌿 𑌮𑌾𑌂 𑌮𑍁𑌖𑌰𑍀 𑌕𑌰𑍋𑌤𑌿 ॥ 3 ॥
𑌸𑍂𑌤𑍇 𑌜𑌗𑌂𑌤𑌿 𑌭𑌵𑌤𑍀 𑌭𑌵𑌤𑍀 𑌬𑌿𑌭𑌰𑍍𑌤𑌿
𑌜𑌾𑌗𑌰𑍍𑌤𑌿 𑌤𑌤𑍍𑌕𑍍𑌷𑌯𑌕𑍃𑌤𑍇 𑌭𑌵𑌤𑍀 𑌭𑌵𑌾𑌨𑌿 ।
𑌮𑍋𑌹𑌂 𑌭𑌿𑌨𑌤𑍍𑌤𑌿 𑌭𑌵𑌤𑍀 𑌭𑌵𑌤𑍀 𑌰𑍁𑌣𑌦𑍍𑌧𑌿
𑌲𑍀𑌲𑌾𑌯𑌿𑌤𑌂 𑌜𑌯𑌤𑌿 𑌚𑌿𑌤𑍍𑌰𑌮𑌿𑌦𑌂 𑌭𑌵𑌤𑍍𑌯𑌾𑌃 ॥ 4 ॥
𑌯𑌸𑍍𑌮𑌿𑌨𑍍𑌮𑌨𑌾𑌗𑌪𑌿 𑌨𑌵𑌾𑌂𑌬𑍁𑌜𑌪𑌤𑍍𑌰𑌗𑍌𑌰𑍀𑌂
𑌗𑍌𑌰𑍀𑌂 𑌪𑍍𑌰𑌸𑌾𑌦𑌮𑌧𑍁𑌰𑌾𑌂 𑌦𑍃𑌶𑌮𑌾𑌦𑌧𑌾𑌸𑌿 ।
𑌤𑌸𑍍𑌮𑌿𑌨𑍍𑌨𑌿𑌰𑌂𑌤𑌰𑌮𑌨𑌂𑌗𑌶𑌰𑌾𑌵𑌕𑍀𑌰𑍍𑌣-
-𑌸𑍀𑌮𑌂𑌤𑌿𑌨𑍀𑌨𑌯𑌨𑌸𑌂𑌤𑌤𑌯𑌃 𑌪𑌤𑌂𑌤𑌿 ॥ 5 ॥
𑌪𑍃𑌥𑍍𑌵𑍀𑌭𑍁𑌜𑍋𑌽𑌪𑍍𑌯𑍁𑌦𑌯𑌨𑌪𑍍𑌰𑌭𑌵𑌸𑍍𑌯 𑌤𑌸𑍍𑌯
𑌵𑌿𑌦𑍍𑌯𑌾𑌧𑌰 𑌪𑍍𑌰𑌣𑌤𑌿 𑌚𑍁𑌂𑌬𑌿𑌤 𑌪𑌾𑌦𑌪𑍀𑌠𑌃 ।
𑌤𑌚𑍍𑌚𑌕𑍍𑌰𑌵𑌰𑍍𑌤𑌿𑌪𑌦𑌵𑍀𑌪𑍍𑌰𑌣𑌯𑌃 𑌸 𑌏𑌷𑌃
𑌤𑍍𑌵𑌤𑍍𑌪𑌾𑌦𑌪𑌂𑌕𑌜𑌰𑌜𑌃 𑌕𑌣𑌜𑌃 𑌪𑍍𑌰𑌸𑌾𑌦𑌃 ॥ 6 ॥
𑌤𑍍𑌵𑌤𑍍𑌪𑌾𑌦𑌪𑌂𑌕𑌜𑌰𑌜 𑌪𑍍𑌰𑌣𑌿𑌪𑌾𑌤𑌪𑍂𑌰𑍍𑌵𑍈𑌃
𑌪𑍁𑌣𑍍𑌯𑍈𑌰𑌨𑌲𑍍𑌪𑌮𑌤𑌿𑌭𑌿𑌃 𑌕𑍃𑌤𑌿𑌭𑌿𑌃 𑌕𑌵𑍀𑌂𑌦𑍍𑌰𑍈𑌃 ।
𑌕𑍍𑌷𑍀𑌰𑌕𑍍𑌷𑌪𑌾𑌕𑌰𑌦𑍁𑌕𑍂𑌲𑌹𑌿𑌮𑌾𑌵𑌦𑌾𑌤𑌾
𑌕𑍈𑌰𑌪𑍍𑌯𑌵𑌾𑌪𑌿 𑌭𑍁𑌵𑌨𑌤𑍍𑌰𑌿𑌤𑌯𑍇𑌽𑌪𑌿 𑌕𑍀𑌰𑍍𑌤𑌿𑌃 ॥ ॥
𑌕𑌲𑍍𑌪𑌦𑍍𑌰𑍁𑌮𑌪𑍍𑌰𑌸𑌵𑌕𑌲𑍍𑌪𑌿𑌤𑌚𑌿𑌤𑍍𑌰𑌪𑍂𑌜𑌾𑌂
𑌉𑌦𑍍𑌦𑍀𑌪𑌿𑌤 𑌪𑍍𑌰𑌿𑌯𑌤𑌮𑌾𑌮𑌦𑌰𑌕𑍍𑌤𑌗𑍀𑌤𑌿𑌮𑍍 ।
𑌨𑌿𑌤𑍍𑌯𑌂 𑌭𑌵𑌾𑌨𑌿 𑌭𑌵𑌤𑍀𑌮𑍁𑌪𑌵𑍀𑌣𑌯𑌂𑌤𑌿
𑌵𑌿𑌦𑍍𑌯𑌾𑌧𑌰𑌾𑌃 𑌕𑌨𑌕𑌶𑍈𑌲𑌗𑍁𑌹𑌾𑌗𑍃𑌹𑍇𑌷𑍁 ॥ ॥
𑌲𑌕𑍍𑌷𑍍𑌮𑍀𑌵𑌶𑍀𑌕𑌰𑌣𑌕𑌰𑍍𑌮𑌣𑌿 𑌕𑌾𑌮𑌿𑌨𑍀𑌨𑌾𑌂
𑌆𑌕𑌰𑍍𑌷𑌣𑌵𑍍𑌯𑌤𑌿𑌕𑌰𑍇𑌷𑍁 𑌚 𑌸𑌿𑌦𑍍𑌧𑌮𑌂𑌤𑍍𑌰𑌃 ।
𑌨𑍀𑌰𑌂𑌧𑍍𑌰𑌮𑍋𑌹𑌤𑌿𑌮𑌿𑌰𑌚𑍍𑌛𑌿𑌦𑍁𑌰𑌪𑍍𑌰𑌦𑍀𑌪𑍋
𑌦𑍇𑌵𑌿 𑌤𑍍𑌵𑌦𑌂𑌘𑍍𑌰𑌿𑌜𑌨𑌿𑌤𑍋 𑌜𑌯𑌤𑌿 𑌪𑍍𑌰𑌸𑌾𑌦𑌃 ॥ ॥
𑌦𑍇𑌵𑌿 𑌤𑍍𑌵𑌦𑌂𑌘𑍍𑌰𑌿𑌨𑌖𑌰𑌤𑍍𑌨𑌭𑍁𑌵𑍋 𑌮𑌯𑍂𑌖𑌾𑌃
𑌪𑍍𑌰𑌤𑍍𑌯𑌗𑍍𑌰𑌮𑍌𑌕𑍍𑌤𑌿𑌕𑌰𑍁𑌚𑍋 𑌮𑍁𑌦𑌮𑍁𑌦𑍍𑌵𑌹𑌂𑌤𑌿 ।
𑌸𑍇𑌵𑌾𑌨𑌤𑌿𑌵𑍍𑌯𑌤𑌿𑌕𑌰𑍇 𑌸𑍁𑌰𑌸𑍁𑌂𑌦𑌰𑍀𑌣𑌾𑌂
𑌸𑍀𑌮𑌂𑌤𑌸𑍀𑌮𑍍𑌨𑌿 𑌕𑍁𑌸𑍁𑌮𑌸𑍍𑌤𑌬𑌕𑌾𑌯𑌿𑌤𑌂 𑌯𑍈𑌃 ॥ 10 ॥
𑌮𑍂𑌰𑍍𑌧𑍍𑌨𑌿 𑌸𑍍𑌫𑍁𑌰𑌤𑍍𑌤𑍁𑌹𑌿𑌨𑌦𑍀𑌧𑌿𑌤𑌿𑌦𑍀𑌪𑍍𑌤𑌿𑌦𑍀𑌪𑍍𑌤𑌂
𑌮𑌧𑍍𑌯𑍇 𑌲𑌲𑌾𑌟𑌮𑌮𑌰𑌾𑌯𑍁𑌧𑌰𑌶𑍍𑌮𑌿𑌚𑌿𑌤𑍍𑌰𑌮𑍍 ।
𑌹𑍃𑌚𑍍𑌚𑌕𑍍𑌰𑌚𑍁𑌂𑌬𑌿 𑌹𑍁𑌤𑌭𑍁𑌕𑍍𑌕𑌣𑌿𑌕𑌾𑌨𑍁𑌕𑌾𑌰𑌿
𑌜𑍍𑌯𑍋𑌤𑌿𑌰𑍍𑌯𑌦𑍇𑌤𑌦𑌿𑌦𑌮𑌂𑌬 𑌤𑌵 𑌸𑍍𑌵𑌰𑍂𑌪𑌮𑍍 ॥ 11 ॥
𑌰𑍂𑌪𑌂 𑌤𑌵 𑌸𑍍𑌫𑍁𑌰𑌿𑌤𑌚𑌂𑌦𑍍𑌰𑌮𑌰𑍀𑌚𑌿𑌗𑍌𑌰𑌂
𑌆𑌲𑍋𑌕𑌤𑍇 𑌶𑌿𑌰𑌸𑌿 𑌵𑌾𑌗𑌧𑌿𑌦𑍈𑌵𑌤𑌂 𑌯𑌃 ।
𑌨𑌿𑌃𑌸𑍀𑌮𑌸𑍂𑌕𑍍𑌤𑌿𑌰𑌚𑌨𑌾𑌮𑍃𑌤𑌨𑌿𑌰𑍍𑌝𑌰𑌸𑍍𑌯
𑌤𑌸𑍍𑌯 𑌪𑍍𑌰𑌸𑌾𑌦𑌮𑌧𑍁𑌰𑌾𑌃 𑌪𑍍𑌰𑌸𑌰𑌂𑌤𑌿 𑌵𑌾𑌚𑌃 ॥ 12 ॥
𑌸𑌿𑌂𑌦𑍂𑌰𑌪𑌾𑌂𑌸𑍁𑌪𑌟𑌲𑌚𑍍𑌛𑍁𑌰𑌿𑌤𑌾𑌮𑌿𑌵 𑌦𑍍𑌯𑌾𑌂
𑌤𑍍𑌵𑌤𑍍𑌤𑍇𑌜𑌸𑌾 𑌜𑌤𑍁𑌰𑌸𑌸𑍍𑌨𑌪𑌿𑌤𑌾𑌮𑌿𑌵𑍋𑌰𑍍𑌵𑍀𑌮𑍍 ।
𑌯𑌃 𑌪𑌶𑍍𑌯𑌤𑌿 𑌕𑍍𑌷𑌣𑌮𑌪𑌿 𑌤𑍍𑌰𑌿𑌪𑍁𑌰𑍇 𑌵𑌿𑌹𑌾𑌯
𑌵𑍍𑌰𑍀𑌡𑌾𑌂 𑌮𑍃𑌡𑌾𑌨𑌿 𑌸𑍁𑌦𑍃𑌶𑌸𑍍𑌤𑌮𑌨𑍁𑌦𑍍𑌰𑌵𑌂𑌤𑌿 ॥ 13 ॥
𑌮𑌾𑌤𑌰𑍍𑌮𑍁𑌹𑍂𑌰𑍍𑌤𑌮𑌪𑌿 𑌯𑌃 𑌸𑍍𑌮𑌰𑌤𑌿 𑌸𑍍𑌵𑌰𑍂𑌪𑌂
𑌲𑌾𑌕𑍍𑌷𑌾𑌰𑌸𑌪𑍍𑌰𑌸𑌰𑌤𑌂𑌤𑍁𑌨𑌿𑌭𑌂 𑌭𑌵𑌤𑍍𑌯𑌾𑌃 ।
𑌧𑍍𑌯𑌾𑌯𑌂𑌤𑍍𑌯𑌨𑌨𑍍𑌯𑌮𑌨𑌸𑌸𑍍𑌤𑌮𑌨𑌂𑌗𑌤𑌪𑍍𑌤𑌾𑌃
𑌪𑍍𑌰𑌦𑍍𑌯𑍁𑌮𑍍𑌨𑌸𑍀𑌮𑍍𑌨𑌿 𑌸𑍁𑌭𑌗𑌤𑍍𑌵𑌗𑍁𑌣𑌂 𑌤𑌰𑍁𑌣𑍍𑌯𑌃 ॥ 14 ॥
𑌯𑍋𑌽𑌯𑌂 𑌚𑌕𑌾𑌸𑍍𑌤𑌿 𑌗𑌗𑌨𑌾𑌰𑍍𑌣𑌵𑌰𑌤𑍍𑌨𑌮𑌿𑌂𑌦𑍁𑌃
𑌯𑍋𑌽𑌯𑌂 𑌸𑍁𑌰𑌾𑌸𑍁𑌰𑌗𑍁𑌰𑍁𑌃 𑌪𑍁𑌰𑍁𑌷𑌃 𑌪𑍁𑌰𑌾𑌣𑌃 ।
𑌯𑌦𑍍𑌵𑌾𑌮𑌮𑌰𑍍𑌧𑌮𑌿𑌦𑌮𑌂𑌧𑌕𑌸𑍂𑌦𑌨𑌸𑍍𑌯
𑌦𑍇𑌵𑌿 𑌤𑍍𑌵𑌮𑍇𑌵 𑌤𑌦𑌿𑌤𑌿 𑌪𑍍𑌰𑌤𑌿𑌪𑌾𑌦𑌯𑌂𑌤𑌿 ॥ 15 ॥
𑌇𑌚𑍍𑌛𑌾𑌨𑍁𑌰𑍂𑌪𑌮𑌨𑍁𑌰𑍂𑌪𑌗𑍁𑌣𑌪𑍍𑌰𑌕𑌰𑍍𑌷
𑌸𑌂𑌕𑌰𑍍𑌷𑌿𑌣𑌿 𑌤𑍍𑌵𑌮𑌭𑌿𑌮𑍃𑌶𑍍𑌯 𑌯𑌦𑌾 𑌬𑌿𑌭𑌰𑍍𑌷𑌿 ।
𑌜𑌾𑌯𑍇𑌤 𑌸 𑌤𑍍𑌰𑌿𑌭𑍁𑌵𑌨𑍈𑌕 𑌗𑍁𑌰𑍁𑌸𑍍𑌤𑌦𑌾𑌨𑍀𑌂
𑌦𑍇𑌵𑌃 𑌶𑌿𑌵𑍋𑌽𑌪𑌿 𑌭𑍁𑌵𑌨𑌤𑍍𑌰𑌯𑌸𑍂𑌤𑍍𑌰𑌧𑌾𑌰𑌃 ॥ 16 ॥
𑌧𑍍𑌯𑌾𑌤𑌾𑌸𑌿 𑌹𑍈𑌮𑌵𑌤𑌿 𑌯𑍇𑌨 𑌹𑌿𑌮𑌾𑌂𑌶𑍁𑌰𑌶𑍍𑌮𑌿-
-𑌮𑌾𑌲𑌾𑌮𑌲𑌦𑍍𑌯𑍁𑌤𑌿𑌰𑌕𑌲𑍍𑌮𑌷𑌮𑌾𑌨𑌸𑍇𑌨 ।
𑌤𑌸𑍍𑌯𑌾𑌵𑌿𑌲𑌂𑌬𑌮𑌨𑌵𑌦𑍍𑌯𑌮𑌨𑌂𑌤𑌕𑌲𑍍𑌪𑌂
𑌅𑌲𑍍𑌪𑍈𑌰𑍍𑌦𑌿𑌨𑍈𑌃 𑌸𑍃𑌜𑌸𑌿 𑌸𑍁𑌂𑌦𑌰𑌿 𑌵𑌾𑌗𑍍𑌵𑌿𑌲𑌾𑌸𑌮𑍍 ॥ 1 ॥
𑌆𑌧𑌾𑌰𑌮𑌾𑌰𑍁𑌤𑌨𑌿𑌰𑍋𑌧𑌵𑌶𑍇𑌨 𑌯𑍇𑌷𑌾𑌂
𑌸𑌿𑌂𑌦𑍂𑌰𑌰𑌂𑌜𑌿𑌤𑌸𑌰𑍋𑌜𑌗𑍁𑌣𑌾𑌨𑍁𑌕𑌾𑌰𑌿 ।
𑌦𑍀𑌪𑍍𑌤𑌂 𑌹𑍃𑌦𑌿 𑌸𑍍𑌫𑍁𑌰𑌤𑌿 𑌦𑍇𑌵𑌿 𑌵𑌪𑍁𑌸𑍍𑌤𑍍𑌵𑌦𑍀𑌯𑌂
𑌧𑍍𑌯𑌾𑌯𑌂𑌤𑌿 𑌤𑌾𑌨𑌿𑌹 𑌸𑌮𑍀𑌹𑌿𑌤𑌸𑌿𑌦𑍍𑌧𑌿𑌸𑌾𑌰𑍍𑌥𑌾𑌃 ॥ 1 ॥
𑌯𑍇 𑌚𑌿𑌂𑌤𑌯𑌂𑌤𑍍𑌯𑌰𑍁𑌣𑌮𑌂𑌡𑌲𑌮𑌧𑍍𑌯𑌵𑌰𑍍𑌤𑌿
𑌰𑍂𑌪𑌂 𑌤𑌵𑌾𑌂𑌬 𑌨𑌵𑌯𑌾𑌵𑌕𑌪𑌂𑌕𑌪𑌿𑌂𑌗𑌮𑍍 ।
𑌤𑍇𑌷𑌾𑌂 𑌸𑌦𑍈𑌵 𑌕𑍁𑌸𑍁𑌮𑌾𑌯𑍁𑌧𑌬𑌾𑌣𑌭𑌿𑌨𑍍𑌨-
-𑌵𑌕𑍍𑌷𑌃𑌸𑍍𑌥𑌲𑌾 𑌮𑍃𑌗𑌦𑍃𑌶𑍋 𑌵𑌶𑌗𑌾 𑌭𑌵𑌂𑌤𑌿 ॥ 1 ॥
𑌤𑍍𑌵𑌾𑌮𑍈𑌂𑌦𑌵𑍀𑌮𑌿𑌵 𑌕𑌲𑌾𑌮𑌨𑍁𑌫𑌾𑌲𑌦𑍇𑌶𑌂
𑌉𑌦𑍍𑌭𑌾𑌸𑌿𑌤𑌾𑌂𑌬𑌰𑌤𑌲𑌾𑌮𑌵𑌲𑍋𑌕𑌯𑌂𑌤𑌃 ।
𑌸𑌦𑍍𑌯𑍋 𑌭𑌵𑌾𑌨𑌿 𑌸𑍁𑌧𑌿𑌯𑌃 𑌕𑌵𑌯𑍋 𑌭𑌵𑌂𑌤𑌿
𑌤𑍍𑌵𑌂 𑌭𑌾𑌵𑌨𑌾𑌹𑌿𑌤𑌧𑌿𑌯𑌾𑌂 𑌕𑍁𑌲𑌕𑌾𑌮𑌧𑍇𑌨𑍁𑌃 ॥ 20 ॥
𑌶𑌰𑍍𑌵𑌾𑌣𑌿 𑌸𑌰𑍍𑌵𑌜𑌨𑌵𑌂𑌦𑌿𑌤𑌪𑌾𑌦𑌪𑌦𑍍𑌮𑍇
𑌪𑌦𑍍𑌮𑌚𑍍𑌛𑌦𑌦𑍍𑌯𑍁𑌤𑌿𑌵𑌿𑌡𑌂𑌬𑌿𑌤𑌨𑍇𑌤𑍍𑌰𑌲𑌕𑍍𑌷𑍍𑌮𑌿 ।
𑌨𑌿𑌷𑍍𑌪𑌾𑌪𑌮𑍂𑌰𑍍𑌤𑌿𑌜𑌨𑌮𑌾𑌨𑌸𑌰𑌾𑌜𑌹𑌂𑌸𑌿
𑌹𑌂𑌸𑌿 𑌤𑍍𑌵𑌮𑌾𑌪𑌦𑌮𑌨𑍇𑌕𑌵𑌿𑌧𑌾𑌂 𑌜𑌨𑌸𑍍𑌯 ॥ 21 ॥
𑌉𑌤𑍍𑌤𑌪𑍍𑌤𑌹𑍇𑌮𑌰𑍁𑌚𑌿𑌰𑍇 𑌤𑍍𑌰𑌿𑌪𑍁𑌰𑍇 𑌪𑍁𑌨𑍀𑌹𑌿
𑌚𑍇𑌤𑌶𑍍𑌚𑌿𑌰𑌂𑌤𑌨𑌮𑌘𑍌𑌘𑌵𑌨𑌂 𑌲𑍁𑌨𑍀𑌹𑌿 ।
𑌕𑌾𑌰𑌾𑌗𑍃𑌹𑍇 𑌨𑌿𑌗𑌲𑌬𑌂𑌧𑌨𑌯𑌂𑌤𑍍𑌰𑌿𑌤𑌸𑍍𑌯
𑌤𑍍𑌵𑌤𑍍𑌸𑌂𑌸𑍍𑌮𑍃𑌤𑍌 𑌝𑌟𑌿𑌤𑌿 𑌮𑍇 𑌨𑌿𑌗𑌲𑌾𑌸𑍍𑌤𑍍𑌰𑍁𑌟𑌂𑌤𑌿 ॥ 22 ॥
𑌤𑍍𑌵𑌾𑌂 𑌵𑍍𑌯𑌾𑌪𑌿𑌨𑍀𑌤𑌿 𑌸𑍁𑌮𑌨𑌾 𑌇𑌤𑌿 𑌕𑍁𑌂𑌡𑌲𑍀𑌤𑌿
𑌤𑍍𑌵𑌾𑌂 𑌕𑌾𑌮𑌿𑌨𑍀𑌤𑌿 𑌕𑌮𑌲𑍇𑌤𑌿 𑌕𑌲𑌾𑌵𑌤𑍀𑌤𑌿 ।
𑌤𑍍𑌵𑌾𑌂 𑌮𑌾𑌲𑌿𑌨𑍀𑌤𑌿 𑌲𑌲𑌿𑌤𑍇𑌤𑍍𑌯𑌪𑌰𑌾𑌜𑌿𑌤𑍇𑌤𑌿
𑌦𑍇𑌵𑌿 𑌸𑍍𑌤𑍁𑌵𑌂𑌤𑌿 𑌵𑌿𑌜𑌯𑍇𑌤𑌿 𑌜𑌯𑍇𑌤𑍍𑌯𑍁𑌮𑍇𑌤𑌿 ॥ 23 ॥
𑌉𑌦𑍍𑌦𑌾𑌮𑌕𑌾𑌮𑌪𑌰𑌮𑌾𑌰𑍍𑌥𑌸𑌰𑍋𑌜𑌖𑌂𑌡-
𑌚𑌂𑌡𑌦𑍍𑌯𑍁𑌤𑌿𑌦𑍍𑌯𑍁𑌤𑌿𑌮𑌪𑌾𑌸𑌿𑌤𑌷𑌡𑍍𑌵𑌿𑌕𑌾𑌰𑌾𑌮𑍍 ।
𑌮𑍋𑌹𑌦𑍍𑌵𑌿𑌪𑍇𑌂𑌦𑍍𑌰𑌕𑌦𑌨𑍋𑌦𑍍𑌯𑌤𑌬𑍋𑌧𑌸𑌿𑌂𑌹-
-𑌲𑍀𑌲𑌾𑌗𑍁𑌹𑌾𑌂 𑌭𑌗𑌵𑌤𑍀𑌂 𑌤𑍍𑌰𑌿𑌪𑍁𑌰𑌾𑌂 𑌨𑌮𑌾𑌮𑌿 ॥ 24 ॥
𑌗𑌣𑍇𑌶𑌵𑌟𑍁𑌕𑌸𑍍𑌤𑍁𑌤𑌾 𑌰𑌤𑌿𑌸𑌹𑌾𑌯𑌕𑌾𑌮𑌾𑌨𑍍𑌵𑌿𑌤𑌾
𑌸𑍍𑌮𑌰𑌾𑌰𑌿𑌵𑌰𑌵𑌿𑌷𑍍𑌟𑌰𑌾 𑌕𑍁𑌸𑍁𑌮𑌬𑌾𑌣𑌬𑌾𑌣𑍈𑌰𑍍𑌯𑍁𑌤𑌾 ।
𑌅𑌨𑌂𑌗𑌕𑍁𑌸𑍁𑌮𑌾𑌦𑌿𑌭𑌿𑌃 𑌪𑌰𑌿𑌵𑍃𑌤𑌾 𑌚 𑌸𑌿𑌦𑍍𑌧𑍈𑌸𑍍𑌤𑍍𑌰𑌿𑌭𑌿𑌃
𑌕𑌦𑌂𑌬𑌵𑌨𑌮𑌧𑍍𑌯𑌗𑌾 𑌤𑍍𑌰𑌿𑌪𑍁𑌰𑌸𑍁𑌂𑌦𑌰𑍀 𑌪𑌾𑌤𑍁 𑌨𑌃 ॥ 25 ॥
𑌰𑍁𑌦𑍍𑌰𑌾𑌣𑌿 𑌵𑌿𑌦𑍍𑌰𑍁𑌮𑌮𑌯𑍀𑌂 𑌪𑍍𑌰𑌤𑌿𑌮𑌾𑌮𑌿𑌵 𑌤𑍍𑌵𑌾𑌂
𑌯𑍇 𑌚𑌿𑌂𑌤𑌯𑌂𑌤𑍍𑌯𑌰𑍁𑌣𑌕𑌾𑌂𑌤𑌿𑌮𑌨𑌨𑍍𑌯𑌰𑍂𑌪𑌾𑌮𑍍 ।
𑌤𑌾𑌨𑍇𑌤𑍍𑌯 𑌪𑌕𑍍𑌷𑍍𑌮𑌲𑌦𑍃𑌶𑌃 𑌪𑍍𑌰𑌸𑌭𑌂 𑌭𑌜𑌂𑌤𑍇
𑌕𑌂𑌠𑌾𑌵𑌸𑌕𑍍𑌤𑌮𑍃𑌦𑍁𑌬𑌾𑌹𑍁𑌲𑌤𑌾𑌸𑍍𑌤𑌰𑍁𑌣𑍍𑌯𑌃 ॥ 26 ॥
𑌤𑍍𑌵𑌦𑍍𑌰𑍂𑌪𑍈𑌕𑌨𑌿𑌰𑍂𑌪𑌣𑌪𑍍𑌰𑌣𑌯𑌿𑌤𑌾𑌬𑌂𑌧𑍋 𑌦𑍃𑌶𑍋𑌸𑍍𑌤𑍍𑌵𑌦𑍍𑌗𑍁𑌣-
-𑌗𑍍𑌰𑌾𑌮𑌾𑌕𑌰𑍍𑌣𑌨𑌰𑌾𑌗𑌿𑌤𑌾 𑌶𑍍𑌰𑌵𑌣𑌯𑍋𑌸𑍍𑌤𑍍𑌵𑌤𑍍𑌸𑌂𑌸𑍍𑌮𑍃𑌤𑌿𑌶𑍍𑌚𑍇𑌤𑌸𑌿 ।
𑌤𑍍𑌵𑌤𑍍𑌪𑌾𑌦𑌾𑌰𑍍𑌚𑌨𑌚𑌾𑌤𑍁𑌰𑍀 𑌕𑌰𑌯𑍁𑌗𑍇 𑌤𑍍𑌵𑌤𑍍𑌕𑍀𑌰𑍍𑌤𑌿𑌤𑌂 𑌵𑌾𑌚𑌿 𑌮𑍇
𑌕𑍁𑌤𑍍𑌰𑌾𑌪𑌿 𑌤𑍍𑌵𑌦𑍁𑌪𑌾𑌸𑌨𑌵𑍍𑌯𑌸𑌨𑌿𑌤𑌾 𑌮𑍇 𑌦𑍇𑌵𑌿 𑌮𑌾 𑌶𑌾𑌮𑍍𑌯𑌤𑍁 ॥ 2 ॥
𑌤𑍍𑌵𑌦𑍍𑌰𑍂𑌪𑌮𑍁𑌲𑍍𑌲𑌸𑌿𑌤𑌦𑌾𑌡𑌿𑌮𑌪𑍁𑌷𑍍𑌪𑌰𑌕𑍍𑌤𑌂
𑌉𑌦𑍍𑌭𑌾𑌵𑌯𑍇𑌨𑍍𑌮𑌦𑌨𑌦𑍈𑌵𑌤𑌮𑌕𑍍𑌷𑌰𑌂 𑌯𑌃 ।
𑌤𑌂 𑌰𑍂𑌪𑌹𑍀𑌨𑌮𑌪𑌿 𑌮𑌨𑍍𑌮𑌥𑌨𑌿𑌰𑍍𑌵𑌿𑌶𑍇𑌷𑌂
𑌆𑌲𑍋𑌕𑌯𑌂𑌤𑍍𑌯𑍁𑌰𑍁𑌨𑌿𑌤𑌂𑌬𑌤𑌟𑌾𑌸𑍍𑌤𑌰𑍁𑌣𑍍𑌯𑌃 ॥ 2 ॥
𑌬𑍍𑌰𑌹𑍍𑌮𑍇𑌂𑌦𑍍𑌰𑌰𑍁𑌦𑍍𑌰𑌹𑌰𑌿𑌚𑌂𑌦𑍍𑌰𑌸𑌹𑌸𑍍𑌰𑌰𑌶𑍍𑌮𑌿-
-𑌸𑍍𑌕𑌂𑌦𑌦𑍍𑌵𑌿𑌪𑌾𑌨𑌨𑌹𑍁𑌤𑌾𑌶𑌨𑌵𑌂𑌦𑌿𑌤𑌾𑌯𑍈 ।
𑌵𑌾𑌗𑍀𑌶𑍍𑌵𑌰𑌿 𑌤𑍍𑌰𑌿𑌭𑍁𑌵𑌨𑍇𑌶𑍍𑌵𑌰𑌿 𑌵𑌿𑌶𑍍𑌵𑌮𑌾𑌤𑌃
𑌅𑌂𑌤𑌰𑍍𑌬𑌹𑌿𑌶𑍍𑌚 𑌕𑍃𑌤𑌸𑌂𑌸𑍍𑌥𑌿𑌤𑌯𑍇 𑌨𑌮𑌸𑍍𑌤𑍇 ॥ 2 ॥
𑌕𑌸𑍍𑌤𑍋𑌤𑍍𑌰𑌮𑍇𑌤𑌦𑌨𑍁𑌵𑌾𑌸𑌰𑌮𑍀𑌶𑍍𑌵𑌰𑌾𑌯𑌾𑌃
𑌶𑍍𑌰𑍇𑌯𑌸𑍍𑌕𑌰𑌂 𑌪𑌠𑌤𑌿 𑌵𑌾 𑌯𑌦𑌿 𑌵𑌾 𑌶𑍃𑌣𑍋𑌤𑌿 ।
𑌤𑌸𑍍𑌯𑍇𑌪𑍍𑌸𑌿𑌤𑌂 𑌫𑌲𑌤𑌿 𑌰𑌾𑌜𑌭𑌿𑌰𑍀𑌡𑍍𑌯𑌤𑍇𑌽𑌸𑍌
𑌜𑌾𑌯𑍇𑌤 𑌸 𑌪𑍍𑌰𑌿𑌯𑌤𑌮𑍋 𑌮𑌦𑌿𑌰𑍇𑌕𑍍𑌷𑌣𑌾𑌨𑌾𑌮𑍍 ॥ 30 ॥
𑌇𑌤𑌿 𑌶𑍍𑌰𑍀𑌕𑌾𑌳𑌿𑌦𑌾𑌸 𑌵𑌿𑌰𑌚𑌿𑌤 𑌪𑌂𑌚𑌸𑍍𑌤𑌵𑍍𑌯𑌾𑌂 𑌦𑍍𑌵𑌿𑌤𑍀𑌯𑌃 𑌚𑌰𑍍𑌚𑌾𑌸𑍍𑌤𑌵𑌃 ।
