𑌧𑍍𑌯𑌾𑌨𑌮𑍍
𑌮𑌾𑌣𑌿𑌕𑍍𑌯𑌵𑍀𑌣𑌾𑌮𑍁𑌪𑌲𑌾𑌲𑌯𑌂𑌤𑍀𑌂 𑌮𑌦𑌾𑌲𑌸𑌾𑌂 𑌮𑌂𑌜𑍁𑌲𑌵𑌾𑌗𑍍𑌵𑌿𑌲𑌾𑌸𑌾𑌮𑍍 ।
𑌮𑌾𑌹𑍇𑌂𑌦𑍍𑌰𑌨𑍀𑌲𑌦𑍍𑌯𑍁𑌤𑌿𑌕𑍋𑌮𑌲𑌾𑌂𑌗𑍀𑌂 𑌮𑌾𑌤𑌂𑌗𑌕𑌨𑍍𑌯𑌾𑌂 𑌮𑌨𑌸𑌾 𑌸𑍍𑌮𑌰𑌾𑌮𑌿 ॥ 1 ॥
𑌚𑌤𑍁𑌰𑍍𑌭𑍁𑌜𑍇 𑌚𑌂𑌦𑍍𑌰𑌕𑌲𑌾𑌵𑌤𑌂𑌸𑍇 𑌕𑍁𑌚𑍋𑌨𑍍𑌨𑌤𑍇 𑌕𑍁𑌂𑌕𑍁𑌮𑌰𑌾𑌗𑌶𑍋𑌣𑍇 ।
𑌪𑍁𑌂𑌡𑍍𑌰𑍇𑌕𑍍𑌷𑍁𑌪𑌾𑌶𑌾𑌂𑌕𑍁𑌶𑌪𑍁𑌷𑍍𑌪𑌬𑌾𑌣𑌹𑌸𑍍𑌤𑍇 𑌨𑌮𑌸𑍍𑌤𑍇 𑌜𑌗𑌦𑍇𑌕𑌮𑌾𑌤𑌃 ॥ 2 ॥
𑌵𑌿𑌨𑌿𑌯𑍋𑌗𑌃
𑌮𑌾𑌤𑌾 𑌮𑌰𑌕𑌤𑌶𑍍𑌯𑌾𑌮𑌾 𑌮𑌾𑌤𑌂𑌗𑍀 𑌮𑌦𑌶𑌾𑌲𑌿𑌨𑍀 ।
𑌕𑍁𑌰𑍍𑌯𑌾𑌤𑍍𑌕𑌟𑌾𑌕𑍍𑌷𑌂 𑌕𑌳𑍍𑌯𑌾𑌣𑍀 𑌕𑌦𑌂𑌬𑌵𑌨𑌵𑌾𑌸𑌿𑌨𑍀 ॥ 3 ॥
𑌸𑍍𑌤𑍁𑌤𑌿
𑌜𑌯 𑌮𑌾𑌤𑌂𑌗𑌤𑌨𑌯𑍇 𑌜𑌯 𑌨𑍀𑌲𑍋𑌤𑍍𑌪𑌲𑌦𑍍𑌯𑍁𑌤𑍇 ।
𑌜𑌯 𑌸𑌂𑌗𑍀𑌤𑌰𑌸𑌿𑌕𑍇 𑌜𑌯 𑌲𑍀𑌲𑌾𑌶𑍁𑌕𑌪𑍍𑌰𑌿𑌯𑍇 ॥ 4 ॥
𑌦𑌂𑌡𑌕𑌮𑍍
𑌜𑌯 𑌜𑌨𑌨𑌿 𑌸𑍁𑌧𑌾𑌸𑌮𑍁𑌦𑍍𑌰𑌾𑌂𑌤𑌰𑍁𑌦𑍍𑌯𑌨𑍍𑌮𑌣𑍀𑌦𑍍𑌵𑍀𑌪𑌸𑌂𑌰𑍂𑌢 𑌬𑌿𑌲𑍍𑌵𑌾𑌟𑌵𑍀𑌮𑌧𑍍𑌯𑌕𑌲𑍍𑌪𑌦𑍍𑌰𑍁𑌮𑌾𑌕𑌲𑍍𑌪𑌕𑌾𑌦𑌂𑌬𑌕𑌾𑌂𑌤𑌾𑌰𑌵𑌾𑌸𑌪𑍍𑌰𑌿𑌯𑍇 𑌕𑍃𑌤𑍍𑌤𑌿𑌵𑌾𑌸𑌪𑍍𑌰𑌿𑌯𑍇 𑌸𑌰𑍍𑌵𑌲𑍋𑌕𑌪𑍍𑌰𑌿𑌯𑍇, 𑌸𑌾𑌦𑌰𑌾𑌰𑌬𑍍𑌧𑌸𑌂𑌗𑍀𑌤𑌸𑌂𑌭𑌾𑌵𑌨𑌾𑌸𑌂𑌭𑍍𑌰𑌮𑌾𑌲𑍋𑌲𑌨𑍀𑌪𑌸𑍍𑌰𑌗𑌾𑌬𑌦𑍍𑌧𑌚𑍂𑌲𑍀𑌸𑌨𑌾𑌥𑌤𑍍𑌰𑌿𑌕𑍇 𑌸𑌾𑌨𑍁𑌮𑌤𑍍𑌪𑍁𑌤𑍍𑌰𑌿𑌕𑍇, 𑌶𑍇𑌖𑌰𑍀𑌭𑍂𑌤𑌶𑍀𑌤𑌾𑌂𑌶𑍁𑌰𑍇𑌖𑌾𑌮𑌯𑍂𑌖𑌾𑌵𑌲𑍀𑌬𑌦𑍍𑌧𑌸𑍁𑌸𑍍𑌨𑌿𑌗𑍍𑌧𑌨𑍀𑌲𑌾𑌲𑌕𑌶𑍍𑌰𑍇𑌣𑌿𑌶𑍃𑌂𑌗𑌾𑌰𑌿𑌤𑍇 𑌲𑍋𑌕𑌸𑌂𑌭𑌾𑌵𑌿𑌤𑍇 𑌕𑌾𑌮𑌲𑍀𑌲𑌾𑌧𑌨𑍁𑌸𑍍𑌸𑌨𑍍𑌨𑌿𑌭𑌭𑍍𑌰𑍂𑌲𑌤𑌾𑌪𑍁𑌷𑍍𑌪𑌸𑌂𑌦𑍋𑌹𑌸𑌂𑌦𑍇𑌹𑌕𑍃𑌲𑍍𑌲𑍋𑌚𑌨𑍇 𑌵𑌾𑌕𑍍𑌸𑍁𑌧𑌾𑌸𑍇𑌚𑌨𑍇 𑌚𑌾𑌰𑍁𑌗𑍋𑌰𑍋𑌚𑌨𑌾𑌪𑌂𑌕𑌕𑍇𑌳𑍀𑌲𑌲𑌾𑌮𑌾𑌭𑌿𑌰𑌾𑌮𑍇 𑌸𑍁𑌰𑌾𑌮𑍇 𑌰𑌮𑍇, 𑌪𑍍𑌰𑍋𑌲𑍍𑌲𑌸𑌦𑍍𑌵𑌾𑌲𑌿𑌕𑌾𑌮𑍌𑌕𑍍𑌤𑌿𑌕𑌶𑍍𑌰𑍇𑌣𑌿𑌕𑌾𑌚𑌂𑌦𑍍𑌰𑌿𑌕𑌾𑌮𑌂𑌡𑌲𑍋𑌦𑍍𑌭𑌾𑌸𑌿 𑌲𑌾𑌵𑌣𑍍𑌯𑌗𑌂𑌡𑌸𑍍𑌥𑌲𑌨𑍍𑌯𑌸𑍍𑌤𑌕𑌸𑍍𑌤𑍂𑌰𑌿𑌕𑌾𑌪𑌤𑍍𑌰𑌰𑍇𑌖𑌾𑌸𑌮𑍁𑌦𑍍𑌭𑍂𑌤 𑌸𑍌𑌰𑌭𑍍𑌯𑌸𑌂𑌭𑍍𑌰𑌾𑌂𑌤𑌭𑍃𑌂𑌗𑌾𑌂𑌗𑌨𑌾𑌗𑍀𑌤𑌸𑌾𑌂𑌦𑍍𑌰𑍀𑌭𑌵𑌨𑍍𑌮𑌂𑌦𑍍𑌰𑌤𑌂𑌤𑍍𑌰𑍀𑌸𑍍𑌵𑌰𑍇 𑌸𑍁𑌸𑍍𑌵𑌰𑍇 𑌭𑌾𑌸𑍍𑌵𑌰𑍇, 𑌵𑌲𑍍𑌲𑌕𑍀𑌵𑌾𑌦𑌨𑌪𑍍𑌰𑌕𑍍𑌰𑌿𑌯𑌾𑌲𑍋𑌲𑌤𑌾𑌲𑍀𑌦𑌲𑌾𑌬𑌦𑍍𑌧-𑌤𑌾𑌟𑌂𑌕𑌭𑍂𑌷𑌾𑌵𑌿𑌶𑍇𑌷𑌾𑌨𑍍𑌵𑌿𑌤𑍇 𑌸𑌿𑌦𑍍𑌧𑌸𑌮𑍍𑌮𑌾𑌨𑌿𑌤𑍇, 𑌦𑌿𑌵𑍍𑌯𑌹𑌾𑌲𑌾𑌮𑌦𑍋𑌦𑍍𑌵𑍇𑌲𑌹𑍇𑌲𑌾𑌲𑌸𑌚𑍍𑌚𑌕𑍍𑌷𑍁𑌰𑌾𑌂𑌦𑍋𑌲𑌨𑌶𑍍𑌰𑍀𑌸𑌮𑌾𑌕𑍍𑌷𑌿𑌪𑍍𑌤𑌕𑌰𑍍𑌣𑍈𑌕𑌨𑍀𑌲𑍋𑌤𑍍𑌪𑌲𑍇 𑌶𑍍𑌯𑌾𑌮𑌲𑍇 𑌪𑍂𑌰𑌿𑌤𑌾𑌶𑍇𑌷𑌲𑍋𑌕𑌾𑌭𑌿𑌵𑌾𑌂𑌛𑌾𑌫𑌲𑍇 𑌶𑍍𑌰𑍀𑌫𑌲𑍇, 𑌸𑍍𑌵𑍇𑌦𑌬𑌿𑌂𑌦𑍂𑌲𑍍𑌲𑌸𑌦𑍍𑌫𑌾𑌲𑌲𑌾𑌵𑌣𑍍𑌯 𑌨𑌿𑌷𑍍𑌯𑌂𑌦𑌸𑌂𑌦𑍋𑌹𑌸𑌂𑌦𑍇𑌹𑌕𑍃𑌨𑍍𑌨𑌾𑌸𑌿𑌕𑌾𑌮𑍌𑌕𑍍𑌤𑌿𑌕𑍇 𑌸𑌰𑍍𑌵𑌵𑌿𑌶𑍍𑌵𑌾𑌤𑍍𑌮𑌿𑌕𑍇 𑌸𑌰𑍍𑌵𑌸𑌿𑌦𑍍𑌧𑍍𑌯𑌾𑌤𑍍𑌮𑌿𑌕𑍇 𑌕𑌾𑌲𑌿𑌕𑍇 𑌮𑍁𑌗𑍍𑌧𑌮𑌂𑌦𑌸𑍍𑌮𑌿𑌤𑍋𑌦𑌾𑌰𑌵𑌕𑍍𑌤𑍍𑌰𑌸𑍍𑌫𑍁𑌰𑌤𑍍 𑌪𑍂𑌗𑌤𑌾𑌂𑌬𑍂𑌲𑌕𑌰𑍍𑌪𑍂𑌰𑌖𑌂𑌡𑍋𑌤𑍍𑌕𑌰𑍇 𑌜𑍍𑌞𑌾𑌨𑌮𑍁𑌦𑍍𑌰𑌾𑌕𑌰𑍇 𑌸𑌰𑍍𑌵𑌸𑌂𑌪𑌤𑍍𑌕𑌰𑍇 𑌪𑌦𑍍𑌮𑌭𑌾𑌸𑍍𑌵𑌤𑍍𑌕𑌰𑍇 𑌶𑍍𑌰𑍀𑌕𑌰𑍇, 𑌕𑍁𑌂𑌦𑌪𑍁𑌷𑍍𑌪𑌦𑍍𑌯𑍁𑌤𑌿𑌸𑍍𑌨𑌿𑌗𑍍𑌧𑌦𑌂𑌤𑌾𑌵𑌲𑍀𑌨𑌿𑌰𑍍𑌮𑌲𑌾𑌲𑍋𑌲𑌕𑌲𑍍𑌲𑍋𑌲𑌸𑌮𑍍𑌮𑍇𑌲𑌨 𑌸𑍍𑌮𑍇𑌰𑌶𑍋𑌣𑌾𑌧𑌰𑍇 𑌚𑌾𑌰𑍁𑌵𑍀𑌣𑌾𑌧𑌰𑍇 𑌪𑌕𑍍𑌵𑌬𑌿𑌂𑌬𑌾𑌧𑌰𑍇,
𑌸𑍁𑌲𑌲𑌿𑌤 𑌨𑌵𑌯𑍌𑌵𑌨𑌾𑌰𑌂𑌭𑌚𑌂𑌦𑍍𑌰𑍋𑌦𑌯𑍋𑌦𑍍𑌵𑍇𑌲𑌲𑌾𑌵𑌣𑍍𑌯𑌦𑍁𑌗𑍍𑌧𑌾𑌰𑍍𑌣𑌵𑌾𑌵𑌿𑌰𑍍𑌭𑌵𑌤𑍍𑌕𑌂𑌬𑍁𑌬𑌿𑌂𑌬𑍋𑌕𑌭𑍃𑌤𑍍𑌕𑌂𑌥𑌰𑍇 𑌸𑌤𑍍𑌕𑌲𑌾𑌮𑌂𑌦𑌿𑌰𑍇 𑌮𑌂𑌥𑌰𑍇 𑌦𑌿𑌵𑍍𑌯𑌰𑌤𑍍𑌨𑌪𑍍𑌰𑌭𑌾𑌬𑌂𑌧𑍁𑌰𑌚𑍍𑌛𑌨𑍍𑌨𑌹𑌾𑌰𑌾𑌦𑌿𑌭𑍂𑌷𑌾𑌸𑌮𑍁𑌦𑍍𑌯𑍋𑌤𑌮𑌾𑌨𑌾𑌨𑌵𑌦𑍍𑌯𑌾𑌂𑌗𑌶𑍋𑌭𑍇 𑌶𑍁𑌭𑍇, 𑌰𑌤𑍍𑌨𑌕𑍇𑌯𑍂𑌰𑌰𑌶𑍍𑌮𑌿𑌚𑍍𑌛𑌟𑌾𑌪𑌲𑍍𑌲𑌵𑌪𑍍𑌰𑍋𑌲𑍍𑌲𑌸𑌦𑍍𑌦𑍋𑌲𑍍𑌲𑌤𑌾𑌰𑌾𑌜𑌿𑌤𑍇 𑌯𑍋𑌗𑌿𑌭𑌿𑌃 𑌪𑍂𑌜𑌿𑌤𑍇 𑌵𑌿𑌶𑍍𑌵𑌦𑌿𑌙𑍍𑌮𑌂𑌡𑌲𑌵𑍍𑌯𑌾𑌪𑍍𑌤𑌮𑌾𑌣𑌿𑌕𑍍𑌯𑌤𑍇𑌜𑌸𑍍𑌸𑍍𑌫𑍁𑌰𑌤𑍍𑌕𑌂𑌕𑌣𑌾𑌲𑌂𑌕𑍃𑌤𑍇 𑌵𑌿𑌭𑍍𑌰𑌮𑌾𑌲𑌂𑌕𑍃𑌤𑍇 𑌸𑌾𑌧𑍁𑌭𑌿𑌃 𑌪𑍂𑌜𑌿𑌤𑍇 𑌵𑌾𑌸𑌰𑌾𑌰𑌂𑌭𑌵𑍇𑌲𑌾𑌸𑌮𑍁𑌜𑍍𑌜𑍃𑌂𑌭
𑌮𑌾𑌣𑌾𑌰𑌵𑌿𑌂𑌦𑌪𑍍𑌰𑌤𑌿𑌦𑍍𑌵𑌂𑌦𑍍𑌵𑌿𑌪𑌾𑌣𑌿𑌦𑍍𑌵𑌯𑍇 𑌸𑌂𑌤𑌤𑍋𑌦𑍍𑌯𑌦𑍍𑌦𑌯𑍇 𑌅𑌦𑍍𑌵𑌯𑍇 𑌦𑌿𑌵𑍍𑌯𑌰𑌤𑍍𑌨𑍋𑌰𑍍𑌮𑌿𑌕𑌾𑌦𑍀𑌧𑌿𑌤𑌿𑌸𑍍𑌤𑍋𑌮 𑌸𑌂𑌧𑍍𑌯𑌾𑌯𑌮𑌾𑌨𑌾𑌂𑌗𑍁𑌲𑍀𑌪𑌲𑍍𑌲𑌵𑍋𑌦𑍍𑌯𑌨𑍍𑌨𑌖𑍇𑌂𑌦𑍁𑌪𑍍𑌰𑌭𑌾𑌮𑌂𑌡𑌲𑍇 𑌸𑌨𑍍𑌨𑍁𑌤𑌾𑌖𑌂𑌡𑌲𑍇 𑌚𑌿𑌤𑍍𑌪𑍍𑌰𑌭𑌾𑌮𑌂𑌡𑌲𑍇 𑌪𑍍𑌰𑍋𑌲𑍍𑌲𑌸𑌤𑍍𑌕𑍁𑌂𑌡𑌲𑍇,
𑌤𑌾𑌰𑌕𑌾𑌰𑌾𑌜𑌿𑌨𑍀𑌕𑌾𑌶𑌹𑌾𑌰𑌾𑌵𑌲𑌿𑌸𑍍𑌮𑍇𑌰 𑌚𑌾𑌰𑍁𑌸𑍍𑌤𑌨𑌾𑌭𑍋𑌗𑌭𑌾𑌰𑌾𑌨𑌮𑌨𑍍𑌮𑌧𑍍𑌯𑌵𑌲𑍍𑌲𑍀𑌵𑌲𑌿𑌚𑍍𑌛𑍇𑌦 𑌵𑍀𑌚𑍀𑌸𑌮𑍁𑌦𑍍𑌯𑌤𑍍𑌸𑌮𑍁𑌲𑍍𑌲𑌾𑌸𑌸𑌂𑌦𑌰𑍍𑌶𑌿𑌤𑌾𑌕𑌾𑌰𑌸𑍌𑌂𑌦𑌰𑍍𑌯𑌰𑌤𑍍𑌨𑌾𑌕𑌰𑍇 𑌵𑌲𑍍𑌲𑌕𑍀𑌭𑍃𑌤𑍍𑌕𑌰𑍇 𑌕𑌿𑌂𑌕𑌰𑌶𑍍𑌰𑍀𑌕𑌰𑍇, 𑌹𑍇𑌮𑌕𑍁𑌂𑌭𑍋𑌪𑌮𑍋𑌤𑍍𑌤𑍁𑌂𑌗 𑌵𑌕𑍍𑌷𑍋𑌜𑌭𑌾𑌰𑌾𑌵𑌨𑌮𑍍𑌰𑍇 𑌤𑍍𑌰𑌿𑌲𑍋𑌕𑌾𑌵𑌨𑌮𑍍𑌰𑍇 𑌲𑌸𑌦𑍍𑌵𑍃𑌤𑍍𑌤𑌗𑌂𑌭𑍀𑌰 𑌨𑌾𑌭𑍀𑌸𑌰𑌸𑍍𑌤𑍀𑌰𑌶𑍈𑌵𑌾𑌲𑌶𑌂𑌕𑌾𑌕𑌰𑌶𑍍𑌯𑌾𑌮𑌰𑍋𑌮𑌾𑌵𑌲𑍀𑌭𑍂𑌷𑌣𑍇 𑌮𑌂𑌜𑍁𑌸𑌂𑌭𑌾𑌷𑌣𑍇, 𑌚𑌾𑌰𑍁𑌶𑌿𑌂𑌚𑌤𑍍𑌕𑌟𑍀𑌸𑍂𑌤𑍍𑌰𑌨𑌿𑌰𑍍𑌭𑌤𑍍𑌸𑌿𑌤𑌾𑌨𑌂𑌗𑌲𑍀𑌲𑌧𑌨𑍁𑌶𑍍𑌶𑌿𑌂𑌚𑌿𑌨𑍀𑌡𑌂𑌬𑌰𑍇 𑌦𑌿𑌵𑍍𑌯𑌰𑌤𑍍𑌨𑌾𑌂𑌬𑌰𑍇,
𑌪𑌦𑍍𑌮𑌰𑌾𑌗𑍋𑌲𑍍𑌲𑌸 𑌨𑍍𑌮𑍇𑌖𑌲𑌾𑌮𑍌𑌕𑍍𑌤𑌿𑌕𑌶𑍍𑌰𑍋𑌣𑌿𑌶𑍋𑌭𑌾𑌜𑌿𑌤𑌸𑍍𑌵𑌰𑍍𑌣𑌭𑍂𑌭𑍃𑌤𑍍𑌤𑌲𑍇 𑌚𑌂𑌦𑍍𑌰𑌿𑌕𑌾𑌶𑍀𑌤𑌲𑍇 𑌵𑌿𑌕𑌸𑌿𑌤𑌨𑌵𑌕𑌿𑌂𑌶𑍁𑌕𑌾𑌤𑌾𑌮𑍍𑌰𑌦𑌿𑌵𑍍𑌯𑌾𑌂𑌶𑍁𑌕𑌚𑍍𑌛𑌨𑍍𑌨 𑌚𑌾𑌰𑍂𑌰𑍁𑌶𑍋𑌭𑌾𑌪𑌰𑌾𑌭𑍂𑌤𑌸𑌿𑌂𑌦𑍂𑌰𑌶𑍋𑌣𑌾𑌯𑌮𑌾𑌨𑍇𑌂𑌦𑍍𑌰𑌮𑌾𑌤𑌂𑌗 𑌹𑌸𑍍𑌤𑌾𑌰𑍍𑌗𑌲𑍇 𑌵𑍈𑌭𑌵𑌾𑌨𑌰𑍍𑌗𑌲𑍇 𑌶𑍍𑌯𑌾𑌮𑌲𑍇 𑌕𑍋𑌮𑌲𑌸𑍍𑌨𑌿𑌗𑍍𑌧 𑌨𑍀𑌲𑍋𑌤𑍍𑌪𑌲𑍋𑌤𑍍𑌪𑌾𑌦𑌿𑌤𑌾𑌨𑌂𑌗𑌤𑍂𑌣𑍀𑌰𑌶𑌂𑌕𑌾𑌕𑌰𑍋𑌦𑌾𑌰 𑌜𑌂𑌘𑌾𑌲𑌤𑍇 𑌚𑌾𑌰𑍁𑌲𑍀𑌲𑌾𑌗𑌤𑍇 𑌨𑌮𑍍𑌰𑌦𑌿𑌕𑍍𑌪𑌾𑌲𑌸𑍀𑌮𑌂𑌤𑌿𑌨𑍀 𑌕𑍁𑌂𑌤𑌲𑌸𑍍𑌨𑌿𑌗𑍍𑌧𑌨𑍀𑌲𑌪𑍍𑌰𑌭𑌾𑌪𑍁𑌂𑌚𑌸𑌂𑌜𑌾𑌤𑌦𑍁𑌰𑍍𑌵𑌾𑌂𑌕𑍁𑌰𑌾𑌶𑌂𑌕 𑌸𑌾𑌰𑌂𑌗𑌸𑌂𑌯𑍋𑌗𑌰𑌿𑌂𑌖𑌨𑍍𑌨𑌖𑍇𑌂𑌦𑍂𑌜𑍍𑌜𑍍𑌵𑌲𑍇 𑌪𑍍𑌰𑍋𑌜𑍍𑌜𑍍𑌵𑌲𑍇 𑌨𑌿𑌰𑍍𑌮𑌲𑍇 𑌪𑍍𑌰𑌹𑍍𑌵 𑌦𑍇𑌵𑍇𑌶 𑌲𑌕𑍍𑌷𑍍𑌮𑍀𑌶 𑌭𑍂𑌤𑍇𑌶 𑌤𑍋𑌯𑍇𑌶 𑌵𑌾𑌣𑍀𑌶 𑌕𑍀𑌨𑌾𑌶 𑌦𑍈𑌤𑍍𑌯𑍇𑌶 𑌯𑌕𑍍𑌷𑍇𑌶 𑌵𑌾𑌯𑍍𑌵𑌗𑍍𑌨𑌿𑌕𑍋𑌟𑍀𑌰𑌮𑌾𑌣𑌿𑌕𑍍𑌯 𑌸𑌂𑌹𑍃𑌷𑍍𑌟𑌬𑌾𑌲𑌾𑌤𑌪𑍋𑌦𑍍𑌦𑌾𑌮 𑌲𑌾𑌕𑍍𑌷𑌾𑌰𑌸𑌾𑌰𑍁𑌣𑍍𑌯𑌤𑌾𑌰𑍁𑌣𑍍𑌯 𑌲𑌕𑍍𑌷𑍍𑌮𑍀𑌗𑍃𑌹𑌿𑌤𑌾𑌂𑌘𑍍𑌰𑌿𑌪𑌦𑍍𑌮𑍇 𑌸𑍁𑌪𑌦𑍍𑌮𑍇 𑌉𑌮𑍇,
𑌸𑍁𑌰𑍁𑌚𑌿𑌰𑌨𑌵𑌰𑌤𑍍𑌨𑌪𑍀𑌠𑌸𑍍𑌥𑌿𑌤𑍇 𑌸𑍁𑌸𑍍𑌥𑌿𑌤𑍇 𑌰𑌤𑍍𑌨𑌪𑌦𑍍𑌮𑌾𑌸𑌨𑍇 𑌰𑌤𑍍𑌨𑌸𑌿𑌂𑌹𑌾𑌸𑌨𑍇 𑌶𑌂𑌖𑌪𑌦𑍍𑌮𑌦𑍍𑌵𑌯𑍋𑌪𑌾𑌶𑍍𑌰𑌿𑌤𑍇 𑌵𑌿𑌶𑍍𑌰𑍁𑌤𑍇 𑌤𑌤𑍍𑌰 𑌵𑌿𑌘𑍍𑌨𑍇𑌶𑌦𑍁𑌰𑍍𑌗𑌾𑌵𑌟𑍁𑌕𑍍𑌷𑍇𑌤𑍍𑌰𑌪𑌾𑌲𑍈𑌰𑍍𑌯𑍁𑌤𑍇 𑌮𑌤𑍍𑌤𑌮𑌾𑌤𑌂𑌗 𑌕𑌨𑍍𑌯𑌾𑌸𑌮𑍂𑌹𑌾𑌨𑍍𑌵𑌿𑌤𑍇 𑌭𑍈𑌰𑌵𑍈𑌰𑌷𑍍𑌟𑌭𑌿𑌰𑍍𑌵𑍇𑌷𑍍𑌟𑌿𑌤𑍇 𑌮𑌂𑌚𑍁𑌲𑌾𑌮𑍇𑌨𑌕𑌾𑌦𑍍𑌯𑌂𑌗𑌨𑌾𑌮𑌾𑌨𑌿𑌤𑍇 𑌦𑍇𑌵𑌿 𑌵𑌾𑌮𑌾𑌦𑌿𑌭𑌿𑌃 𑌶𑌕𑍍𑌤𑌿𑌭𑌿𑌸𑍍𑌸𑍇𑌵𑌿𑌤𑍇 𑌧𑌾𑌤𑍍𑌰𑌿 𑌲𑌕𑍍𑌷𑍍𑌮𑍍𑌯𑌾𑌦𑌿𑌶𑌕𑍍𑌤𑍍𑌯𑌷𑍍𑌟𑌕𑍈𑌃 𑌸𑌂𑌯𑍁𑌤𑍇 𑌮𑌾𑌤𑍃𑌕𑌾𑌮𑌂𑌡𑌲𑍈𑌰𑍍𑌮𑌂𑌡𑌿𑌤𑍇 𑌯𑌕𑍍𑌷𑌗𑌂𑌧𑌰𑍍𑌵𑌸𑌿𑌦𑍍𑌧𑌾𑌂𑌗𑌨𑌾 𑌮𑌂𑌡𑌲𑍈𑌰𑌰𑍍𑌚𑌿𑌤𑍇, 𑌭𑍈𑌰𑌵𑍀 𑌸𑌂𑌵𑍃𑌤𑍇 𑌪𑌂𑌚𑌬𑌾𑌣𑌾𑌤𑍍𑌮𑌿𑌕𑍇 𑌪𑌂𑌚𑌬𑌾𑌣𑍇𑌨 𑌰𑌤𑍍𑌯𑌾 𑌚 𑌸𑌂𑌭𑌾𑌵𑌿𑌤𑍇 𑌪𑍍𑌰𑍀𑌤𑌿𑌭𑌾𑌜𑌾 𑌵𑌸𑌂𑌤𑍇𑌨 𑌚𑌾𑌨𑌂𑌦𑌿𑌤𑍇 𑌭𑌕𑍍𑌤𑌿𑌭𑌾𑌜𑌂 𑌪𑌰𑌂 𑌶𑍍𑌰𑍇𑌯𑌸𑍇 𑌕𑌲𑍍𑌪𑌸𑍇 𑌯𑍋𑌗𑌿𑌨𑌾𑌂 𑌮𑌾𑌨𑌸𑍇 𑌦𑍍𑌯𑍋𑌤𑌸𑍇 𑌛𑌂𑌦𑌸𑌾𑌮𑍋𑌜𑌸𑌾 𑌭𑍍𑌰𑌾𑌜𑌸𑍇 𑌗𑍀𑌤𑌵𑌿𑌦𑍍𑌯𑌾 𑌵𑌿𑌨𑍋𑌦𑌾𑌤𑌿 𑌤𑍃𑌷𑍍𑌣𑍇𑌨 𑌕𑍃𑌷𑍍𑌣𑍇𑌨 𑌸𑌂𑌪𑍂𑌜𑍍𑌯𑌸𑍇 𑌭𑌕𑍍𑌤𑌿𑌮𑌚𑍍𑌚𑍇𑌤𑌸𑌾 𑌵𑍇𑌧𑌸𑌾 𑌸𑍍𑌤𑍂𑌯𑌸𑍇 𑌵𑌿𑌶𑍍𑌵𑌹𑍃𑌦𑍍𑌯𑍇𑌨 𑌵𑌾𑌦𑍍𑌯𑍇𑌨 𑌵𑌿𑌦𑍍𑌯𑌾𑌧𑌰𑍈𑌰𑍍𑌗𑍀𑌯𑌸𑍇, 𑌶𑍍𑌰𑌵𑌣𑌹𑌰𑌦𑌕𑍍𑌷𑌿𑌣𑌕𑍍𑌵𑌾𑌣𑌯𑌾 𑌵𑍀𑌣𑌯𑌾 𑌕𑌿𑌨𑍍𑌨𑌰𑍈𑌰𑍍𑌗𑍀𑌯𑌸𑍇 𑌯𑌕𑍍𑌷𑌗𑌂𑌧𑌰𑍍𑌵𑌸𑌿𑌦𑍍𑌧𑌾𑌂𑌗𑌨𑌾 𑌮𑌂𑌡𑌲𑍈𑌰𑌰𑍍𑌚𑍍𑌯𑌸𑍇 𑌸𑌰𑍍𑌵𑌸𑍌𑌭𑌾𑌗𑍍𑌯𑌵𑌾𑌂𑌛𑌾𑌵𑌤𑍀𑌭𑌿𑌰𑍍 𑌵𑌧𑍂𑌭𑌿𑌸𑍍𑌸𑍁𑌰𑌾𑌣𑌾𑌂 𑌸𑌮𑌾𑌰𑌾𑌧𑍍𑌯𑌸𑍇 𑌸𑌰𑍍𑌵𑌵𑌿𑌦𑍍𑌯𑌾𑌵𑌿𑌶𑍇𑌷𑌤𑍍𑌮𑌕𑌂 𑌚𑌾𑌟𑍁𑌗𑌾𑌥𑌾 𑌸𑌮𑍁𑌚𑍍𑌚𑌾𑌰𑌣𑌾𑌕𑌂𑌠𑌮𑍂𑌲𑍋𑌲𑍍𑌲𑌸𑌦𑍍𑌵𑌰𑍍𑌣𑌰𑌾𑌜𑌿𑌤𑍍𑌰𑌯𑌂 𑌕𑍋𑌮𑌲𑌶𑍍𑌯𑌾𑌮𑌲𑍋𑌦𑌾𑌰𑌪𑌕𑍍𑌷𑌦𑍍𑌵𑌯𑌂 𑌤𑍁𑌂𑌡𑌶𑍋𑌭𑌾𑌤𑌿𑌦𑍂𑌰𑍀𑌭𑌵𑌤𑍍 𑌕𑌿𑌂𑌶𑍁𑌕𑌂 𑌤𑌂 𑌶𑍁𑌕𑌂 𑌲𑌾𑌲𑌯𑌂𑌤𑍀 𑌪𑌰𑌿𑌕𑍍𑌰𑍀𑌡𑌸𑍇,
𑌪𑌾𑌣𑌿𑌪𑌦𑍍𑌮𑌦𑍍𑌵𑌯𑍇𑌨𑌾𑌕𑍍𑌷𑌮𑌾𑌲𑌾𑌮𑌪𑌿 𑌸𑍍𑌫𑌾𑌟𑌿𑌕𑍀𑌂 𑌜𑍍𑌞𑌾𑌨𑌸𑌾𑌰𑌾𑌤𑍍𑌮𑌕𑌂 𑌪𑍁𑌸𑍍𑌤𑌕𑌂𑌚𑌂𑌕𑍁𑌶𑌂 𑌪𑌾𑌶𑌮𑌾𑌬𑌿𑌭𑍍𑌰𑌤𑍀 𑌤𑍇𑌨 𑌸𑌂𑌚𑌿𑌂𑌤𑍍𑌯𑌸𑍇 𑌤𑌸𑍍𑌯 𑌵𑌕𑍍𑌤𑍍𑌰𑌾𑌂𑌤𑌰𑌾𑌤𑍍 𑌗𑌦𑍍𑌯𑌪𑌦𑍍𑌯𑌾𑌤𑍍𑌮𑌿𑌕𑌾 𑌭𑌾𑌰𑌤𑍀 𑌨𑌿𑌸𑍍𑌸𑌰𑍇𑌤𑍍 𑌯𑍇𑌨 𑌵𑌾𑌧𑍍𑌵𑌂𑌸𑌨𑌾𑌦𑌾 𑌕𑍃𑌤𑌿𑌰𑍍𑌭𑌾𑌵𑍍𑌯𑌸𑍇 𑌤𑌸𑍍𑌯 𑌵𑌶𑍍𑌯𑌾 𑌭𑌵𑌂𑌤𑌿𑌸𑍍𑌤𑌿𑌯𑌃 𑌪𑍂𑌰𑍁𑌷𑌾𑌃 𑌯𑍇𑌨 𑌵𑌾 𑌶𑌾𑌤𑌕𑌂𑌬𑌦𑍍𑌯𑍁𑌤𑌿𑌰𑍍𑌭𑌾𑌵𑍍𑌯𑌸𑍇 𑌸𑍋𑌪𑌿 𑌲𑌕𑍍𑌷𑍍𑌮𑍀𑌸𑌹𑌸𑍍𑌰𑍈𑌃 𑌪𑌰𑌿𑌕𑍍𑌰𑍀𑌡𑌤𑍇, 𑌕𑌿𑌨𑍍𑌨 𑌸𑌿𑌦𑍍𑌧𑍍𑌯𑍇𑌦𑍍𑌵𑌪𑍁𑌃 𑌶𑍍𑌯𑌾𑌮𑌲𑌂 𑌕𑍋𑌮𑌲𑌂 𑌚𑌂𑌦𑍍𑌰𑌚𑍂𑌡𑌾𑌨𑍍𑌵𑌿𑌤𑌂 𑌤𑌾𑌵𑌕𑌂 𑌧𑍍𑌯𑌾𑌯𑌤𑌃 𑌤𑌸𑍍𑌯 𑌲𑍀𑌲𑌾 𑌸𑌰𑍋𑌵𑌾𑌰𑌿𑌧𑍀𑌃 𑌤𑌸𑍍𑌯 𑌕𑍇𑌲𑍀𑌵𑌨𑌂 𑌨𑌂𑌦𑌨𑌂 𑌤𑌸𑍍𑌯 𑌭𑌦𑍍𑌰𑌾𑌸𑌨𑌂 𑌭𑍂𑌤𑌲𑌂 𑌤𑌸𑍍𑌯 𑌗𑍀𑌰𑍍𑌦𑍇𑌵𑌤𑌾 𑌕𑌿𑌂𑌕𑌰𑌿 𑌤𑌸𑍍𑌯 𑌚𑌾𑌜𑍍𑌞𑌾𑌕𑌰𑍀 𑌶𑍍𑌰𑍀 𑌸𑍍𑌵𑌯𑌂,
𑌸𑌰𑍍𑌵𑌤𑍀𑌰𑍍𑌥𑌾𑌤𑍍𑌮𑌿𑌕𑍇 𑌸𑌰𑍍𑌵 𑌮𑌂𑌤𑍍𑌰𑌾𑌤𑍍𑌮𑌿𑌕𑍇, 𑌸𑌰𑍍𑌵 𑌯𑌂𑌤𑍍𑌰𑌾𑌤𑍍𑌮𑌿𑌕𑍇 𑌸𑌰𑍍𑌵 𑌤𑌂𑌤𑍍𑌰𑌾𑌤𑍍𑌮𑌿𑌕𑍇, 𑌸𑌰𑍍𑌵 𑌚𑌕𑍍𑌰𑌾𑌤𑍍𑌮𑌿𑌕𑍇 𑌸𑌰𑍍𑌵 𑌶𑌕𑍍𑌤𑍍𑌯𑌾𑌤𑍍𑌮𑌿𑌕𑍇, 𑌸𑌰𑍍𑌵 𑌪𑍀𑌠𑌾𑌤𑍍𑌮𑌿𑌕𑍇 𑌸𑌰𑍍𑌵 𑌵𑍇𑌦𑌾𑌤𑍍𑌮𑌿𑌕𑍇, 𑌸𑌰𑍍𑌵 𑌵𑌿𑌦𑍍𑌯𑌾𑌤𑍍𑌮𑌿𑌕𑍇 𑌸𑌰𑍍𑌵 𑌯𑍋𑌗𑌾𑌤𑍍𑌮𑌿𑌕𑍇, 𑌸𑌰𑍍𑌵 𑌵𑌰𑍍𑌣𑌾𑌤𑍍𑌮𑌿𑌕𑍇 𑌸𑌰𑍍𑌵𑌗𑍀𑌤𑌾𑌤𑍍𑌮𑌿𑌕𑍇, 𑌸𑌰𑍍𑌵 𑌨𑌾𑌦𑌾𑌤𑍍𑌮𑌿𑌕𑍇 𑌸𑌰𑍍𑌵 𑌶𑌬𑍍𑌦𑌾𑌤𑍍𑌮𑌿𑌕𑍇, 𑌸𑌰𑍍𑌵 𑌵𑌿𑌶𑍍𑌵𑌾𑌤𑍍𑌮𑌿𑌕𑍇 𑌸𑌰𑍍𑌵 𑌵𑌰𑍍𑌗𑌾𑌤𑍍𑌮𑌿𑌕𑍇, 𑌸𑌰𑍍𑌵 𑌸𑌰𑍍𑌵𑌾𑌤𑍍𑌮𑌿𑌕𑍇 𑌸𑌰𑍍𑌵𑌗𑍇 𑌸𑌰𑍍𑌵 𑌰𑍂𑌪𑍇, 𑌜𑌗𑌨𑍍𑌮𑌾𑌤𑍃𑌕𑍇 𑌪𑌾𑌹𑌿 𑌮𑌾𑌂 𑌪𑌾𑌹𑌿 𑌮𑌾𑌂 𑌪𑌾𑌹𑌿 𑌮𑌾𑌂 𑌦𑍇𑌵𑌿 𑌤𑍁𑌭𑍍𑌯𑌂 𑌨𑌮𑍋 𑌦𑍇𑌵𑌿 𑌤𑍁𑌭𑍍𑌯𑌂 𑌨𑌮𑍋 𑌦𑍇𑌵𑌿 𑌤𑍁𑌭𑍍𑌯𑌂 𑌨𑌮𑍋 𑌦𑍇𑌵𑌿 𑌤𑍁𑌭𑍍𑌯𑌂 𑌨𑌮𑌃 ॥
