𑌦𑍇𑌵𑌿 𑌤𑍍𑌵𑌾𑌂 𑌸𑍍𑌤𑍋𑌤𑍁𑌮𑌿𑌚𑍍𑌛𑌾𑌮𑌿 𑌸𑌾𑌧𑍍𑌵𑍀𑌨𑌾𑌂 𑌪𑍍𑌰𑌵𑌰𑌾𑌂 𑌪𑌰𑌾𑌮𑍍 ।
𑌪𑌰𑌾𑌤𑍍𑌪𑌰𑌾𑌂 𑌚 𑌪𑌰𑌮𑌾𑌂 𑌨 𑌹𑌿 𑌸𑍍𑌤𑍋𑌤𑍁𑌂 𑌕𑍍𑌷𑌮𑍋𑌽𑌧𑍁𑌨𑌾 ॥ 1 ॥

𑌸𑍍𑌤𑍋𑌤𑍍𑌰𑌾𑌣𑌾𑌂 𑌲𑌕𑍍𑌷𑌣𑌂 𑌵𑍇𑌦𑍇 𑌸𑍍𑌵𑌭𑌾𑌵𑌾𑌖𑍍𑌯𑌾𑌨𑌤𑌃 𑌪𑌰𑌮𑍍 ।
𑌨 𑌕𑍍𑌷𑌮𑌃 𑌪𑍍𑌰𑌕𑍃𑌤𑌿𑌂 𑌵𑌕𑍍𑌤𑍁𑌂 𑌗𑍁𑌣𑌾𑌨𑌾𑌂 𑌤𑌵 𑌸𑍁𑌵𑍍𑌰𑌤𑍇 ॥ 2 ॥

𑌶𑍁𑌦𑍍𑌧𑌸𑌤𑍍𑌤𑍍𑌵𑌸𑍍𑌵𑌰𑍂𑌪𑌾 𑌤𑍍𑌵𑌂 𑌕𑍋𑌪𑌹𑌿𑌂𑌸𑌾𑌵𑌿𑌵𑌰𑍍𑌜𑌿𑌤𑌾 ।
𑌨 𑌚 𑌶𑌪𑍍𑌤𑍋 𑌮𑍁𑌨𑌿𑌸𑍍𑌤𑍇𑌨 𑌤𑍍𑌯𑌕𑍍𑌤𑌯𑌾 𑌚 𑌤𑍍𑌵𑌯𑌾 𑌯𑌤𑌃 ॥ 3 ॥

𑌤𑍍𑌵𑌂 𑌮𑌯𑌾 𑌪𑍂𑌜𑌿𑌤𑌾 𑌸𑌾𑌧𑍍𑌵𑍀 𑌜𑌨𑌨𑍀 𑌚 𑌯𑌥𑌾𑌽𑌦𑌿𑌤𑌿𑌃 ।
𑌦𑌯𑌾𑌰𑍂𑌪𑌾 𑌚 𑌭𑌗𑌿𑌨𑍀 𑌕𑍍𑌷𑌮𑌾𑌰𑍂𑌪𑌾 𑌯𑌥𑌾 𑌪𑍍𑌰𑌸𑍂𑌃 ॥ 4 ॥

𑌤𑍍𑌵𑌯𑌾 𑌮𑍇 𑌰𑌕𑍍𑌷𑌿𑌤𑌾𑌃 𑌪𑍍𑌰𑌾𑌣𑌾 𑌪𑍁𑌤𑍍𑌰𑌦𑌾𑌰𑌾𑌃 𑌸𑍁𑌰𑍇𑌶𑍍𑌵𑌰𑌿 ।
𑌅𑌹𑌂 𑌕𑌰𑍋𑌮𑌿 𑌤𑍍𑌵𑌾𑌂 𑌪𑍂𑌜𑍍𑌯𑌾𑌂 𑌮𑌮 𑌪𑍍𑌰𑍀𑌤𑌿𑌶𑍍𑌚 𑌵𑌰𑍍𑌧𑌤𑍇 ॥ 5 ॥

𑌨𑌿𑌤𑍍𑌯𑌂 𑌯𑌦𑍍𑌯𑌪𑌿 𑌪𑍂𑌜𑍍𑌯𑌾 𑌤𑍍𑌵𑌂 𑌭𑌵𑍇𑌽𑌤𑍍𑌰 𑌜𑌗𑌦𑌂𑌬𑌿𑌕𑍇 ।
𑌤𑌥𑌾𑌪𑌿 𑌤𑌵 𑌪𑍂𑌜𑌾𑌂 𑌵𑍈 𑌵𑌰𑍍𑌧𑌯𑌾𑌮𑌿 𑌪𑍁𑌨𑌃 𑌪𑍁𑌨𑌃 ॥ 6 ॥

𑌯𑍇 𑌤𑍍𑌵𑌾𑌮𑌾𑌷𑌾𑌢𑌸𑌂𑌕𑍍𑌰𑌾𑌂𑌤𑍍𑌯𑌾𑌂 𑌪𑍂𑌜𑌯𑌿𑌷𑍍𑌯𑌂𑌤𑌿 𑌭𑌕𑍍𑌤𑌿𑌤𑌃 ।
𑌪𑌂𑌚𑌮𑍍𑌯𑌾𑌂 𑌮𑌨𑌸𑌾𑌖𑍍𑌯𑌾𑌯𑌾𑌂 𑌮𑌾𑌸𑌾𑌂𑌤𑍇 𑌵𑌾 𑌦𑌿𑌨𑍇 𑌦𑌿𑌨𑍇 ॥ 𑍭 ॥

𑌪𑍁𑌤𑍍𑌰𑌪𑍌𑌤𑍍𑌰𑌾𑌦𑌯𑌸𑍍𑌤𑍇𑌷𑌾𑌂 𑌵𑌰𑍍𑌧𑌂𑌤𑍇 𑌚 𑌧𑌨𑌾𑌨𑌿 𑌚 ।
𑌯𑌶𑌸𑍍𑌵𑌿𑌨𑌃 𑌕𑍀𑌰𑍍𑌤𑌿𑌮𑌂𑌤𑍋 𑌵𑌿𑌦𑍍𑌯𑌾𑌵𑌂𑌤𑍋 𑌗𑍁𑌣𑌾𑌨𑍍𑌵𑌿𑌤𑌾𑌃 ॥ 𑍮 ॥

𑌯𑍇 𑌤𑍍𑌵𑌾𑌂 𑌨 𑌪𑍂𑌜𑌯𑌿𑌷𑍍𑌯𑌂𑌤𑌿 𑌨𑌿𑌂𑌦𑌂𑌤𑍍𑌯𑌜𑍍𑌞𑌾𑌨𑌤𑍋 𑌜𑌨𑌾𑌃 ।
𑌲𑌕𑍍𑌷𑍍𑌮𑍀𑌹𑍀𑌨𑌾 𑌭𑌵𑌿𑌷𑍍𑌯𑌂𑌤𑌿 𑌤𑍇𑌷𑌾𑌂 𑌨𑌾𑌗𑌭𑌯𑌂 𑌸𑌦𑌾 ॥ 𑍯 ॥

𑌤𑍍𑌵𑌂 𑌸𑍍𑌵𑌰𑍍𑌗𑌲𑌕𑍍𑌷𑍍𑌮𑍀𑌃 𑌸𑍍𑌵𑌰𑍍𑌗𑍇 𑌚 𑌵𑍈𑌕𑍁𑌂𑌠𑍇 𑌕𑌮𑌲𑌾𑌕𑌲𑌾 ।
𑌨𑌾𑌰𑌾𑌯𑌣𑌾𑌂𑌶𑍋 𑌭𑌗𑌵𑌾𑌨𑍍 𑌜𑌰𑌤𑍍𑌕𑌾𑌰𑍁𑌰𑍍𑌮𑍁𑌨𑍀𑌶𑍍𑌵𑌰𑌃 ॥ 10 ॥

𑌤𑌪𑌸𑌾 𑌤𑍇𑌜𑌸𑌾 𑌤𑍍𑌵𑌾𑌂 𑌚 𑌮𑌨𑌸𑌾 𑌸𑌸𑍃𑌜𑍇 𑌪𑌿𑌤𑌾 ।
𑌅𑌸𑍍𑌮𑌾𑌕𑌂 𑌰𑌕𑍍𑌷𑌣𑌾𑌯𑍈𑌵 𑌤𑍇𑌨 𑌤𑍍𑌵𑌂 𑌮𑌨𑌸𑌾𑌭𑌿𑌧𑌾 ॥ 11 ॥

𑌮𑌨𑌸𑌾 𑌦𑍇𑌵𑌿 𑌤𑍁 𑌶𑌕𑍍𑌤𑌾 𑌚𑌾𑌤𑍍𑌮𑌨𑌾 𑌸𑌿𑌦𑍍𑌧𑌯𑍋𑌗𑌿𑌨𑍀 ।
𑌤𑍇𑌨 𑌤𑍍𑌵𑌂 𑌮𑌨𑌸𑌾𑌦𑍇𑌵𑍀 𑌪𑍂𑌜𑌿𑌤𑌾 𑌵𑌂𑌦𑌿𑌤𑌾 𑌭𑌵𑍇 ॥ 12 ॥

𑌯𑌾𑌂 𑌭𑌕𑍍𑌤𑍍𑌯𑌾 𑌮𑌨𑌸𑌾 𑌦𑍇𑌵𑌾𑌃 𑌪𑍂𑌜𑌯𑌂𑌤𑍍𑌯𑌨𑌿𑌶𑌂 𑌭𑍃𑌶𑌮𑍍 ।
𑌤𑍇𑌨 𑌤𑍍𑌵𑌾𑌂 𑌮𑌨𑌸𑌾𑌦𑍇𑌵𑍀𑌂 𑌪𑍍𑌰𑌵𑌦𑌂𑌤𑌿 𑌪𑍁𑌰𑌾𑌵𑌿𑌦𑌃 ॥ 13 ॥

𑌸𑌤𑍍𑌤𑍍𑌵𑌰𑍂𑌪𑌾 𑌚 𑌦𑍇𑌵𑍀 𑌤𑍍𑌵𑌂 𑌶𑌶𑍍𑌵𑌤𑍍𑌸𑌤𑍍𑌤𑍍𑌵𑌨𑌿𑌷𑍇𑌵𑌯𑌾 ।
𑌯𑍋 𑌹𑌿 𑌯𑌦𑍍𑌭𑌾𑌵𑌯𑍇𑌨𑍍𑌨𑌿𑌤𑍍𑌯𑌂 𑌶𑌤𑌂 𑌪𑍍𑌰𑌾𑌪𑍍𑌨𑍋𑌤𑌿 𑌤𑌤𑍍𑌸𑌮𑌮𑍍 ॥ 14 ॥

𑌇𑌦𑌂 𑌸𑍍𑌤𑍋𑌤𑍍𑌰𑌂 𑌪𑍁𑌣𑍍𑌯𑌬𑍀𑌜𑌂 𑌤𑌾𑌂 𑌸𑌂𑌪𑍂𑌜𑍍𑌯 𑌚 𑌯𑌃 𑌪𑌠𑍇𑌤𑍍 ।
𑌤𑌸𑍍𑌯 𑌨𑌾𑌗𑌭𑌯𑌂 𑌨𑌾𑌸𑍍𑌤𑌿 𑌤𑌸𑍍𑌯 𑌵𑌂𑌶𑍋𑌦𑍍𑌭𑌵𑌸𑍍𑌯 𑌚 ॥ 15 ॥

𑌵𑌿𑌷𑌂 𑌭𑌵𑍇𑌤𑍍𑌸𑍁𑌧𑌾𑌤𑍁𑌲𑍍𑌯𑌂 𑌸𑌿𑌦𑍍𑌧𑌸𑍍𑌤𑍋𑌤𑍍𑌰𑌂 𑌯𑌦𑌾 𑌪𑌠𑍇𑌤𑍍 ।
𑌪𑌂𑌚𑌲𑌕𑍍𑌷𑌜𑌪𑍇𑌨𑍈𑌵 𑌸𑌿𑌦𑍍𑌧𑌸𑍍𑌤𑍋𑌤𑍍𑌰𑍋 𑌭𑌵𑍇𑌨𑍍𑌨𑌰𑌃 ।
𑌸𑌰𑍍𑌪𑌶𑌾𑌯𑍀 𑌭𑌵𑍇𑌤𑍍𑌸𑍋𑌽𑌪𑌿 𑌨𑌿𑌶𑍍𑌚𑌿𑌤𑌂 𑌸𑌰𑍍𑌪𑌵𑌾𑌹𑌨𑌃 ॥ 16 ॥

𑌇𑌤𑌿 𑌶𑍍𑌰𑍀𑌬𑍍𑌰𑌹𑍍𑌮𑌵𑍈𑌵𑌰𑍍𑌤𑍇 𑌮𑌹𑌾𑌪𑍁𑌰𑌾𑌣𑍇 𑌪𑍍𑌰𑌕𑍃𑌤𑌿𑌖𑌂𑌡𑍇 𑌷𑌟𑍍𑌚𑌤𑍍𑌵𑌾𑌰𑌿𑌂𑌶𑍋𑌽𑌧𑍍𑌯𑌾𑌯𑍇 𑌮𑌹𑍇𑌂𑌦𑍍𑌰 𑌕𑍃𑌤 𑌶𑍍𑌰𑍀 𑌮𑌨𑌸𑌾𑌦𑍇𑌵𑍀 𑌸𑍍𑌤𑍋𑌤𑍍𑌰𑌮𑍍 ॥

𑌆𑌸𑍍𑌤𑍀𑌕𑌮𑍁𑌨𑌿 𑌮𑌂𑌤𑍍𑌰𑌃
𑌸𑌰𑍍𑌪𑌾𑌪𑌸𑌰𑍍𑌪 𑌭𑌦𑍍𑌰𑌂 𑌤𑍇 𑌗𑌚𑍍𑌛 𑌸𑌰𑍍𑌪 𑌮𑌹𑌾𑌵𑌿𑌷 ।
𑌜𑌨𑌮𑍇𑌜𑌯𑌸𑍍𑌯 𑌯𑌜𑍍𑌞𑌾𑌂𑌤𑍇 𑌆𑌸𑍍𑌤𑍀𑌕𑌵𑌚𑌨𑌂 𑌸𑍍𑌮𑌰 ॥