𑌅𑌶𑍍𑌵𑌤𑌰 𑌉𑌵𑌾𑌚 ।
𑌜𑌗𑌦𑍍𑌧𑌾𑌤𑍍𑌰𑍀𑌮𑌹𑌂 𑌦𑍇𑌵𑍀𑌮𑌾𑌰𑌿𑌰𑌾𑌧𑌯𑌿𑌷𑍁𑌃 𑌶𑍁𑌭𑌾𑌮𑍍 ।
𑌸𑍍𑌤𑍋𑌷𑍍𑌯𑍇 𑌪𑍍𑌰𑌣𑌮𑍍𑌯 𑌶𑌿𑌰𑌸𑌾 𑌬𑍍𑌰𑌹𑍍𑌮𑌯𑍋𑌨𑌿𑌂 𑌸𑌰𑌸𑍍𑌵𑌤𑍀𑌮𑍍 ॥ 1 ॥
𑌸𑌦𑌸𑌦𑍍𑌦𑍇𑌵𑌿 𑌯𑌤𑍍𑌕𑌿𑌂𑌚𑌿𑌨𑍍𑌮𑍋𑌕𑍍𑌷𑌵𑌚𑍍𑌚𑌾𑌰𑍍𑌥𑌵𑌤𑍍𑌪𑌦𑌮𑍍 ।
𑌤𑌤𑍍𑌸𑌰𑍍𑌵𑌂 𑌤𑍍𑌵𑌯𑍍𑌯𑌸𑌂𑌯𑍋𑌗𑌂 𑌯𑍋𑌗𑌵𑌦𑍍𑌦𑍇𑌵𑌿 𑌸𑌂𑌸𑍍𑌥𑌿𑌤𑌮𑍍 ॥ 2 ॥
𑌤𑍍𑌵𑌮𑌕𑍍𑌷𑌰𑌂 𑌪𑌰𑌂 𑌦𑍇𑌵𑌿 𑌯𑌤𑍍𑌰 𑌸𑌰𑍍𑌵𑌂 𑌪𑍍𑌰𑌤𑌿𑌷𑍍𑌠𑌿𑌤𑌮𑍍 ।
𑌅𑌕𑍍𑌷𑌰𑌂 𑌪𑌰𑌮𑌂 𑌦𑍇𑌵𑌿 𑌸𑌂𑌸𑍍𑌥𑌿𑌤𑌂 𑌪𑌰𑌮𑌾𑌣𑍁𑌵𑌤𑍍 ॥ 3 ॥
𑌅𑌕𑍍𑌷𑌰𑌂 𑌪𑌰𑌮𑌂 𑌬𑍍𑌰𑌹𑍍𑌮 𑌵𑌿𑌶𑍍𑌵𑌂𑌚𑍈𑌤𑌤𑍍𑌕𑍍𑌷𑌰𑌾𑌤𑍍𑌮𑌕𑌮𑍍 ।
𑌦𑌾𑌰𑍁𑌣𑍍𑌯𑌵𑌸𑍍𑌥𑌿𑌤𑍋 𑌵𑌹𑍍𑌨𑌿𑌰𑍍𑌭𑍌𑌮𑌾𑌶𑍍𑌚 𑌪𑌰𑌮𑌾𑌣𑌵𑌃 ॥ 4 ॥
𑌤𑌥𑌾 𑌤𑍍𑌵𑌯𑌿 𑌸𑍍𑌥𑌿𑌤𑌂 𑌬𑍍𑌰𑌹𑍍𑌮 𑌜𑌗𑌚𑍍𑌚𑍇𑌦𑌮𑌶𑍇𑌷𑌤𑌃 ।
𑌓𑌂𑌕𑌾𑌰𑌾𑌕𑍍𑌷𑌰𑌸𑌂𑌸𑍍𑌥𑌾𑌨𑌂 𑌯𑌤𑍍𑌤𑍁 𑌦𑍇𑌵𑌿 𑌸𑍍𑌥𑌿𑌰𑌾𑌸𑍍𑌥𑌿𑌰𑌮𑍍 ॥ 5 ॥
𑌤𑌤𑍍𑌰 𑌮𑌾𑌤𑍍𑌰𑌾𑌤𑍍𑌰𑌯𑌂 𑌸𑌰𑍍𑌵𑌮𑌸𑍍𑌤𑌿 𑌯𑌦𑍍𑌦𑍇𑌵𑌿 𑌨𑌾𑌸𑍍𑌤𑌿 𑌚 ।
𑌤𑍍𑌰𑌯𑍋 𑌲𑍋𑌕𑌾𑌸𑍍𑌤𑍍𑌰𑌯𑍋 𑌵𑍇𑌦𑌾𑌸𑍍𑌤𑍍𑌰𑍈𑌵𑌿𑌦𑍍𑌯𑌂 𑌪𑌾𑌵𑌕𑌤𑍍𑌰𑌯𑌮𑍍 ॥ 6 ॥
𑌤𑍍𑌰𑍀𑌣𑌿 𑌜𑍍𑌯𑍋𑌤𑍀𑌂𑌷𑌿 𑌵𑌰𑍍𑌣𑌾𑌶𑍍𑌚 𑌤𑍍𑌰𑌯𑍋 𑌧𑌰𑍍𑌮𑌾𑌗𑌮𑌾𑌸𑍍𑌤𑌥𑌾 ।
𑌤𑍍𑌰𑌯𑍋 𑌗𑍁𑌣𑌾𑌸𑍍𑌤𑍍𑌰𑌯𑌃 𑌶𑌬𑍍𑌦𑌸𑍍𑌤𑍍𑌰𑌯𑍋 𑌵𑍇𑌦𑌾𑌸𑍍𑌤𑌥𑌾𑌶𑍍𑌰𑌮𑌾𑌃 ॥ ॥
𑌤𑍍𑌰𑌯𑌃 𑌕𑌾𑌲𑌾𑌸𑍍𑌤𑌥𑌾𑌵𑌸𑍍𑌥𑌾𑌃 𑌪𑌿𑌤𑌰𑍋𑌽𑌹𑌰𑍍𑌨𑌿𑌶𑌾𑌦𑌯𑌃 ।
𑌏𑌤𑌨𑍍𑌮𑌾𑌤𑍍𑌰𑌾𑌤𑍍𑌰𑌯𑌂 𑌦𑍇𑌵𑌿 𑌤𑌵 𑌰𑍂𑌪𑌂 𑌸𑌰𑌸𑍍𑌵𑌤𑌿 ॥ ॥
𑌵𑌿𑌭𑌿𑌨𑍍𑌨𑌦𑌰𑍍𑌶𑌿𑌨𑌾𑌮𑌾𑌦𑍍𑌯𑌾 𑌬𑍍𑌰𑌹𑍍𑌮𑌣𑍋 𑌹𑌿 𑌸𑌨𑌾𑌤𑌨𑌾𑌃 ।
𑌸𑍋𑌮𑌸𑌂𑌸𑍍𑌥𑌾 𑌹𑌵𑌿𑌃 𑌸𑌂𑌸𑍍𑌥𑌾𑌃 𑌪𑌾𑌕𑌸𑌂𑌸𑍍𑌥𑌾𑌶𑍍𑌚 𑌸𑌪𑍍𑌤 𑌯𑌾𑌃 ॥ ॥
𑌤𑌾𑌸𑍍𑌤𑍍𑌵𑌦𑍁𑌚𑍍𑌚𑌾𑌰𑌣𑌾𑌦𑍍𑌦𑍇𑌵𑌿 𑌕𑍍𑌰𑌿𑌯𑌂𑌤𑍇 𑌬𑍍𑌰𑌹𑍍𑌮𑌵𑌾𑌦𑌿𑌭𑌿𑌃 ।
𑌅𑌨𑌿𑌰𑍍𑌦𑍇𑌶𑍍𑌯𑌂 𑌤𑌥𑌾 𑌚𑌾𑌨𑍍𑌯𑌦𑌰𑍍𑌧𑌮𑌾𑌤𑍍𑌰𑌾𑌨𑍍𑌵𑌿𑌤𑌂 𑌪𑌰𑌮𑍍 ॥ 10 ॥
𑌅𑌵𑌿𑌕𑌾𑌰𑍍𑌯𑌕𑍍𑌷𑌯𑌂 𑌦𑌿𑌵𑍍𑌯𑌂 𑌪𑌰𑌿𑌣𑌾𑌮𑌵𑌿𑌵𑌰𑍍𑌜𑌿𑌤𑌮𑍍 ।
𑌤𑌵𑍈𑌤𑌤𑍍𑌪𑌰𑌮𑌂 𑌰𑍂𑌪𑌂 𑌯𑌨𑍍𑌨 𑌶𑌕𑍍𑌯𑌂 𑌮𑌯𑍋𑌦𑌿𑌤𑍁𑌮𑍍 ॥ 11 ॥
𑌨 𑌚𑌾𑌸𑍍𑌯𑍇𑌨 𑌚 𑌤𑌜𑍍𑌜𑌿𑌹𑍍𑌵𑌾 𑌤𑌾𑌮𑍍𑌰𑍋𑌷𑍍𑌠𑌾𑌦𑌿𑌭𑌿𑌰𑍁𑌚𑍍𑌯𑌤𑍇 ।
𑌇𑌂𑌦𑍍𑌰𑍋𑌽𑌪𑌿 𑌵𑌸𑌵𑍋 𑌬𑍍𑌰𑌹𑍍𑌮𑌾 𑌚𑌂𑌦𑍍𑌰𑌾𑌰𑍍𑌕𑍌 𑌜𑍍𑌯𑍋𑌤𑌿𑌰𑍇𑌵 𑌚 ॥ 12 ॥
𑌵𑌿𑌶𑍍𑌵𑌾𑌵𑌾𑌸𑌂 𑌵𑌿𑌶𑍍𑌵𑌰𑍂𑌪𑌂 𑌵𑌿𑌶𑍍𑌵𑍇𑌶𑌂 𑌪𑌰𑌮𑍇𑌶𑍍𑌵𑌰𑌮𑍍 ।
𑌸𑌾𑌂𑌖𑍍𑌯𑌵𑍇𑌦𑌾𑌂𑌤𑌵𑌾𑌦𑍋𑌕𑍍𑌤𑌂 𑌬𑌹𑍁𑌶𑌾𑌖𑌾𑌸𑍍𑌥𑌿𑌰𑍀𑌕𑍃𑌤𑌮𑍍 ॥ 13 ॥
𑌅𑌨𑌾𑌦𑌿𑌮𑌧𑍍𑌯𑌨𑌿𑌧𑌨𑌂 𑌸𑌦𑌸𑌨𑍍𑌨 𑌸𑌦𑍇𑌵 𑌯𑌤𑍍 ।
𑌏𑌕𑌂𑌤𑍍𑌵𑌨𑍇𑌕𑌂 𑌨𑌾𑌪𑍍𑌯𑍇𑌕𑌂 𑌭𑌵𑌭𑍇𑌦𑌸𑌮𑌾𑌶𑍍𑌰𑌿𑌤𑌮𑍍 ॥ 14 ॥
𑌅𑌨𑌾𑌖𑍍𑌯𑌂 𑌷𑌡𑍍𑌗𑍁𑌣𑌾𑌖𑍍𑌯𑌂𑌚 𑌵𑌰𑍍𑌗𑌾𑌖𑍍𑌯𑌂 𑌤𑍍𑌰𑌿𑌗𑍁𑌣𑌾𑌶𑍍𑌰𑌯𑌮𑍍 ।
𑌨𑌾𑌨𑌾𑌶𑌕𑍍𑌤𑌿𑌮𑌤𑌾𑌮𑍇𑌕𑌂 𑌶𑌕𑍍𑌤𑌿𑌵𑍈𑌭𑌵𑌿𑌕𑌂 𑌪𑌰𑌮𑍍 ॥ 15 ॥
𑌸𑍁𑌖𑌾𑌸𑍁𑌖𑌂 𑌮𑌹𑌾𑌸𑍌𑌖𑍍𑌯𑌰𑍂𑌪𑌂 𑌤𑍍𑌵𑌯𑌿 𑌵𑌿𑌭𑌾𑌵𑍍𑌯𑌤𑍇 ।
𑌏𑌵𑌂 𑌦𑍇𑌵𑌿 𑌤𑍍𑌵𑌯𑌾 𑌵𑍍𑌯𑌾𑌪𑍍𑌤𑌂 𑌸𑌕𑌲𑌂 𑌨𑌿𑌷𑍍𑌕𑌲𑌂𑌚 𑌯𑌤𑍍 ।
𑌅𑌦𑍍𑌵𑍈𑌤𑌾𑌵𑌸𑍍𑌥𑌿𑌤𑌂 𑌬𑍍𑌰𑌹𑍍𑌮 𑌯𑌚𑍍𑌚 𑌦𑍍𑌵𑍈𑌤𑍇 𑌵𑍍𑌯𑌵𑌸𑍍𑌥𑌿𑌤𑌮𑍍 ॥ 16 ॥
𑌯𑍇𑌽𑌰𑍍𑌥𑌾 𑌨𑌿𑌤𑍍𑌯𑌾 𑌯𑍇 𑌵𑌿𑌨𑌶𑍍𑌯𑌂𑌤𑌿 𑌚𑌾𑌨𑍍𑌯𑍇
𑌯𑍇 𑌵𑌾 𑌸𑍍𑌥𑍂𑌲𑌾 𑌯𑍇 𑌚 𑌸𑍂𑌕𑍍𑌷𑍍𑌮𑌾𑌤𑌿𑌸𑍂𑌕𑍍𑌷𑍍𑌮𑌾𑌃 ।
𑌯𑍇 𑌵𑌾 𑌭𑍂𑌮𑍌 𑌯𑍇𑌽𑌂𑌤𑌰𑍀𑌕𑍍𑌷𑍇𑌽𑌨𑍍𑌯𑌤𑍋 𑌵𑌾
𑌤𑍇𑌷𑌾𑌂 𑌤𑍇𑌷𑌾𑌂 𑌤𑍍𑌵𑌤𑍍𑌤 𑌏𑌵𑍋𑌪𑌲𑌬𑍍𑌧𑌿𑌃 ॥ 1 ॥
𑌯𑌚𑍍𑌚𑌾𑌮𑍂𑌰𑍍𑌤𑌂 𑌯𑌚𑍍𑌚 𑌮𑍂𑌰𑍍𑌤𑌂 𑌸𑌮𑌸𑍍𑌤𑌂
𑌯𑌦𑍍𑌵𑌾 𑌭𑍂𑌤𑍇𑌷𑍍𑌵𑍇𑌕𑌮𑍇𑌕𑌂𑌚 𑌕𑌿𑌂𑌚𑌿𑌤𑍍 ।
𑌯𑌦𑍍𑌦𑌿𑌵𑍍𑌯𑌸𑍍𑌤𑌿 𑌕𑍍𑌷𑍍𑌮𑌾𑌤𑌲𑍇 𑌖𑍇𑌽𑌨𑍍𑌯𑌤𑍋 𑌵𑌾
𑌤𑍍𑌵𑌤𑍍𑌸𑌂𑌬𑌂𑌧𑌂 𑌤𑍍𑌵𑌤𑍍𑌸𑍍𑌵𑌰𑍈𑌰𑍍𑌵𑍍𑌯𑌂𑌜𑌨𑍈𑌶𑍍𑌚 ॥ 1 ॥
𑌇𑌤𑌿 𑌶𑍍𑌰𑍀𑌮𑌾𑌰𑍍𑌕𑌂𑌡𑍇𑌯𑌪𑍁𑌰𑌾𑌣𑍇 𑌤𑍍𑌰𑌯𑍋𑌵𑌿𑌂𑌶𑍋𑌽𑌧𑍍𑌯𑌾𑌯𑍇 𑌅𑌶𑍍𑌵𑌤𑌰 𑌪𑍍𑌰𑍋𑌕𑍍𑌤 𑌮𑌹𑌾𑌸𑌰𑌸𑍍𑌵𑌤𑍀 𑌸𑍍𑌤𑌵𑌮𑍍 ।
