ఆపదామపహర్తారం దాతారం సర్వసమ్పదామ్ ।
లోకాభిరామం శ్రీరామం భూయో భూయో నమామ్యహమ్ ॥
నమః కోదణ్డహస్తాయ సన్ధీకృతశరాయ చ ।
దణ్డితాఖిలదైత్యాయ రామాయాపన్నివారిణే ॥ 1 ॥
ఆపన్నజనరక్షైకదీక్షాయామితతేజసే ।
నమోఽస్తు విష్ణవే తుభ్యం రామాయాపన్నివారిణే ॥ 2 ॥
పదామ్భోజరజస్స్పర్శపవిత్రమునియోషితే ।
నమోఽస్తు సీతాపతయే రామాయాపన్నివారిణే ॥ 3 ॥
దానవేన్ద్రమహామత్తగజపఞ్చాస్యరూపిణే ।
నమోఽస్తు రఘునాథాయ రామాయాపన్నివారిణే ॥ 4 ॥
మహిజాకుచసంలగ్నకుఙ్కుమారుణవక్షసే ।
నమః కల్యాణరూపాయ రామాయాపన్నివారిణే ॥ 5 ॥
పద్మసమ్భవ భూతేశ మునిసంస్తుతకీర్తయే ।
నమో మార్తాణ్డవంశ్యాయ రామాయాపన్నివారిణే ॥ 6 ॥
హరత్యార్తిం చ లోకానాం యో వా మధునిషూదనః ।
నమోఽస్తు హరయే తుభ్యం రామాయాపన్నివారిణే ॥ 7 ॥
తాపకారణసంసారగజసింహస్వరూపిణే ।
నమో వేదాన్తవేద్యాయ రామాయాపన్నివారిణే ॥ 8 ॥
రఙ్గత్తరఙ్గజలధిగర్వహృచ్ఛరధారిణే ।
నమః ప్రతాపరూపాయ రామాయాపన్నివారిణే ॥ 9 ॥
దారోపహితచన్ద్రావతంసధ్యాతస్వమూర్తయే ।
నమః సత్యస్వరూపాయ రామాయాపన్నివారిణే ॥ 10 ॥
తారానాయకసఙ్కాశవదనాయ మహౌజసే ।
నమోఽస్తు తాటకాహన్త్రే రామాయాపన్నివారిణే ॥ 11 ॥
రమ్యసానులసచ్చిత్రకూటాశ్రమవిహారిణే ।
నమః సౌమిత్రిసేవ్యాయ రామాయాపన్నివారిణే ॥ 12 ॥
సర్వదేవహితాసక్త దశాననవినాశినే ।
నమోఽస్తు దుఃఖధ్వంసాయ రామాయాపన్నివారిణే ॥ 13 ॥
రత్నసానునివాసైక వన్ద్యపాదామ్బుజాయ చ ।
నమస్త్రైలోక్యనాథాయ రామాయాపన్నివారిణే ॥ 14 ॥
సంసారబన్ధమోక్షైకహేతుధామప్రకాశినే ।
నమః కలుషసంహర్త్రే రామాయాపన్నివారిణే ॥ 15 ॥
పవనాశుగ సఙ్క్షిప్త మారీచాది సురారయే ।
నమో మఖపరిత్రాత్రే రామాయాపన్నివారిణే ॥ 16 ॥
దామ్భికేతరభక్తౌఘమహదానన్దదాయినే ।
నమః కమలనేత్రాయ రామాయాపన్నివారిణే ॥ 17 ॥
లోకత్రయోద్వేగకర కుమ్భకర్ణశిరశ్ఛిదే ।
నమో నీరదదేహాయ రామాయాపన్నివారిణే ॥ 18 ॥
కాకాసురైకనయనహరల్లీలాస్త్రధారిణే ।
నమో భక్తైకవేద్యాయ రామాయాపన్నివారిణే ॥ 19 ॥
భిక్షురూపసమాక్రాన్త బలిసర్వైకసమ్పదే ।
నమో వామనరూపాయ రామాయాపన్నివారిణే ॥ 20 ॥
రాజీవనేత్రసుస్పన్ద రుచిరాఙ్గసురోచిషే ।
నమః కైవల్యనిధయే రామాయాపన్నివారిణే ॥ 21 ॥
మన్దమారుతసంవీత మన్దారద్రుమవాసినే ।
నమః పల్లవపాదాయ రామాయాపన్నివారిణే ॥ 22 ॥
శ్రీకణ్ఠచాపదళనధురీణబలబాహవే ।
నమః సీతానుషక్తాయ రామాయాపన్నివారిణే ॥ 23 ॥
రాజరాజసుహృద్యోషార్చిత మఙ్గళమూర్తయే ।
నమ ఇక్ష్వాకువంశ్యాయ రామాయాపన్నివారిణే ॥ 24 ॥
మఞ్జులాదర్శవిప్రేక్షణోత్సుకైకవిలాసినే ।
నమః పాలితభక్తాయ రామాయాపన్నివారిణే ॥ 25 ॥
భూరిభూధర కోదణ్డమూర్తి ధ్యేయస్వరూపిణే ।
నమోఽస్తు తేజోనిధయే రామాయాపన్నివారిణే ॥ 26 ॥
యోగీన్ద్రహృత్సరోజాతమధుపాయ మహాత్మనే ।
నమో రాజాధిరాజాయ రామాయాపన్నివారిణే ॥ 27 ॥
భూవరాహస్వరూపాయ నమో భూరిప్రదాయినే ।
నమో హిరణ్యగర్భాయ రామాయాపన్నివారిణే ॥ 28 ॥
యోషాఞ్జలివినిర్ముక్త లాజాఞ్చితవపుష్మతే ।
నమః సౌన్దర్యనిధయే రామాయాపన్నివారిణే ॥ 29 ॥
నఖకోటివినిర్భిన్నదైత్యాధిపతివక్షసే ।
నమో నృసింహరూపాయ రామాయాపన్నివారిణే ॥ 30 ॥
మాయామానుషదేహాయ వేదోద్ధరణహేతవే ।
నమోఽస్తు మత్స్యరూపాయ రామాయాపన్నివారిణే ॥ 31 ॥
మితిశూన్య మహాదివ్యమహిమ్నే మానితాత్మనే ।
నమో బ్రహ్మస్వరూపాయ రామాయాపన్నివారిణే ॥ 32 ॥
అహఙ్కారేతరజన స్వాన్తసౌధవిహారిణే ।
నమోఽస్తు చిత్స్వరూపాయ రామాయాపన్నివారిణే ॥ 33 ॥
సీతాలక్ష్మణసంశోభిపార్శ్వాయ పరమాత్మనే ।
నమః పట్టాభిషిక్తాయ రామాయాపన్నివారిణే ॥ 34 ॥
అగ్రతః పృష్ఠతశ్చైవ పార్శ్వతశ్చ మహాబలౌ ।
ఆకర్ణపూర్ణధన్వానౌ రక్షేతాం రామలక్ష్మణౌ ॥ 35 ॥
సన్నద్ధః కవచీ ఖడ్గీ చాపబాణధరో యువా ।
తిష్ఠన్మమాగ్రతో నిత్యం రామః పాతు సలక్ష్మణః ॥ 36 ॥
ఆపదామపహర్తారం దాతారం సర్వసమ్పదామ్ ।
లోకాభిరామం శ్రీరామం భూయో భూయో నమామ్యహమ్ ॥
ఫలశ్రుతి
ఇమం స్తవం భగవతః పఠేద్యః ప్రీతమానసః ।
ప్రభాతే వా ప్రదోషే వా రామస్య పరమాత్మనః ॥ 1 ॥
స తు తీర్త్వా భవామ్బోధిమాపదస్సకలానపి ।
రామసాయుజ్యమాప్నోతి దేవదేవప్రసాదతః ॥ 2 ॥
కారాగృహాదిబాధాసు సమ్ప్రాప్తే బహుసఙ్కటే ।
ఆపన్నివారకస్తోత్రం పఠేద్యస్తు యథావిధిః ॥ 3 ॥
సంయోజ్యానుష్టుభం మన్త్రమనుశ్లోకం స్మరన్విభుమ్ ।
సప్తాహాత్సర్వబాధాభ్యో ముచ్యతే నాత్ర సంశయః ॥ 4 ॥
ద్వాత్రింశద్వారజపతః ప్రత్యహం తు దృఢవ్రతః ।
వైశాఖే భానుమాలోక్య ప్రత్యహం శతసఙ్ఖ్యయా ॥ 5 ॥
ధనవాన్ ధనదప్రఖ్యస్స భవేన్నాత్ర సంశయః ।
బహునాత్ర కిముక్తేన యం యం కామయతే నరః ॥ 6 ॥
తం తం కామమవాప్నోతి స్తోత్రేణానేన మానవః ।
యన్త్రపూజావిధానేన జపహోమాదితర్పణైః ॥ 7 ॥
యస్తు కుర్వీత సహసా సర్వాన్కామానవాప్నుయాత్ ।
ఇహ లోకే సుఖీ భూత్వా పరే ముక్తో భవిష్యతి ॥ 8 ॥
