నమస్తే శరణ్యే శివే సానుకమ్పే
నమస్తే జగద్వ్యాపికే విశ్వరూపే ।
నమస్తే జగద్వన్ద్యపాదారవిన్దే
నమస్తే జగత్తారిణి త్రాహి దుర్గే ॥ 1 ॥
నమస్తే జగచ్చిన్త్యమానస్వరూపే
నమస్తే మహాయోగివిజ్ఞానరూపే ।
నమస్తే నమస్తే సదానన్దరూపే
నమస్తే జగత్తారిణి త్రాహి దుర్గే ॥ 2 ॥
అనాథస్య దీనస్య తృష్ణాతురస్య
భయార్తస్య భీతస్య బద్ధస్య జన్తోః ।
త్వమేకా గతిర్దేవి నిస్తారకర్త్రీ
నమస్తే జగత్తారిణి త్రాహి దుర్గే ॥ 3 ॥
అరణ్యే రణే దారుణే శత్రుమధ్యే-
ఽనలే సాగరే ప్రాన్తరే రాజగేహే ।
త్వమేకా గతిర్దేవి నిస్తారనౌకా
నమస్తే జగత్తారిణి త్రాహి దుర్గే ॥ 4 ॥
అపారే మహాదుస్తరేఽత్యన్తఘోరే
విపత్సాగరే మజ్జతాం దేహభాజామ్ ।
త్వమేకా గతిర్దేవి నిస్తారహేతు-
ర్నమస్తే జగత్తారిణి త్రాహి దుర్గే ॥ 5 ॥
నమశ్చణ్డికే చణ్డదుర్దణ్డలీలా-
సముత్ఖణ్డితా ఖణ్డితాఽశేషశత్రోః ।
త్వమేకా గతిర్దేవి నిస్తారబీజం
నమస్తే జగత్తారిణి త్రాహి దుర్గే ॥ 6 ॥
త్వమేకా సదారాధితా సత్యవాది-
న్యనేకాఖిలా క్రోధనా క్రోధనిష్ఠా ।
ఇడా పిఙ్గళా త్వం సుషుమ్నా చ నాడీ
నమస్తే జగత్తారిణి త్రాహి దుర్గే ॥ 7 ॥
నమో దేవి దుర్గే శివే భీమనాదే
సదాసర్వసిద్ధిప్రదాతృస్వరూపే ।
విభూతిః శచీ కాలరాత్రిః సతీ త్వం
నమస్తే జగత్తారిణి త్రాహి దుర్గే ॥ 8 ॥
శరణమసి సురాణాం సిద్ధవిద్యాధరాణాం
మునిమనుజపశూనాం దస్యుభిస్త్రాసితానాం
నృపతిగృహగతానాం వ్యాధిభిః పీడితానామ్ ।
త్వమసి శరణమేకా దేవి దుర్గే ప్రసీద ॥ 9 ॥
ఇదం స్తోత్రం మయా ప్రోక్తమాపదుద్ధారహేతుకమ్ ।
త్రిసన్ధ్యమేకసన్ధ్యం వా పఠనాద్ఘోరసఙ్కటాత్ ॥ 10 ॥
ముచ్యతే నాత్ర సన్దేహో భువి స్వర్గే రసాతలే ।
సర్వం వా శ్లోకమేకం వా యః పఠేద్భక్తిమాన్సదా ॥ 11 ॥
స సర్వం దుష్కృతం త్యక్త్వా ప్రాప్నోతి పరమం పదమ్ ।
పఠనాదస్య దేవేశి కిం న సిద్ధ్యతి భూతలే ।
స్తవరాజమిదం దేవి సఙ్క్షేపాత్కథితం మయా ॥ 12
ఇతి శ్రీ సిద్ధేశ్వరీతన్త్రే పరమశివోక్త శ్రీ దుర్గా ఆపదుద్ధార స్తోత్రమ్ ।
