ఓం అస్య శ్రీకుఞ్జికాస్తోత్రమన్త్రస్య సదాశివ ఋషిః, అనుష్టుప్ ఛన్దః,
శ్రీత్రిగుణాత్మికా దేవతా, ఓం ఐం బీజం, ఓం హ్రీం శక్తిః, ఓం క్లీం కీలకమ్,
మమ సర్వాభీష్టసిద్ధ్యర్థే జపే వినియోగః ।
శివ ఉవాచ
శృణు దేవి ప్రవక్ష్యామి కుఞ్జికాస్తోత్రముత్తమమ్ ।
యేన మన్త్రప్రభావేణ చణ్డీజాపః శుభో భవేత్ ॥ 1 ॥
న కవచం నార్గలాస్తోత్రం కీలకం న రహస్యకమ్ ।
న సూక్తం నాపి ధ్యానం చ న న్యాసో న చ వార్చనమ్ ॥ 2 ॥
కుఞ్జికాపాఠమాత్రేణ దుర్గాపాఠఫలం లభేత్ ।
అతి గుహ్యతరం దేవి దేవానామపి దుర్లభమ్ ॥ 3 ॥
గోపనీయం ప్రయత్నేన స్వయోనిరివ పార్వతి ।
మారణం మోహనం వశ్యం స్తమ్భనోచ్చాటనాదికమ్ ।
పాఠమాత్రేణ సంసిద్ధ్యేత్ కుఞ్జికాస్తోత్రముత్తమమ్ ॥ 4 ॥
అథ మన్త్రః ।
ఓం ఐం హ్రీం క్లీం చాముణ్డాయై విచ్చే ।
ఓం గ్లౌం హుం క్లీం జూం సః జ్వాలయ జ్వాలయ జ్వల జ్వల ప్రజ్వల ప్రజ్వల
ఐం హ్రీం క్లీం చాముణ్డాయై విచ్చే జ్వల హం సం లం క్షం ఫట్ స్వాహా ॥ 5 ॥
ఇతి మన్త్రః ।
నమస్తే రుద్రరూపిణ్యై నమస్తే మధుమర్దిని ।
నమః కైటభహారిణ్యై నమస్తే మహిషార్దిని ॥ 6 ॥
నమస్తే శుమ్భహన్త్ర్యై చ నిశుమ్భాసురఘాతిని ।
జాగ్రతం హి మహాదేవి జపం సిద్ధం కురుష్వ మే ॥ 7 ॥
ఐఙ్కారీ సృష్టిరూపాయై హ్రీఙ్కారీ ప్రతిపాలికా ।
క్లీఙ్కారీ కామరూపిణ్యై బీజరూపే నమోఽస్తు తే ॥ 8 ॥
చాముణ్డా చణ్డఘాతీ చ యైకారీ వరదాయినీ ।
విచ్చే చాభయదా నిత్యం నమస్తే మన్త్రరూపిణి ॥ 9 ॥
ధాం ధీం ధూం ధూర్జటేః పత్నీ వాం వీం వూం వాగధీశ్వరీ ।
క్రాం క్రీం క్రూం కాలికా దేవి శాం శీం శూం మే శుభం కురు ॥ 10 ॥
హుం హుం హుఙ్కారరూపిణ్యై జం జం జం జమ్భనాదినీ ।
భ్రాం భ్రీం భ్రూం భైరవీ భద్రే భవాన్యై తే నమో నమః ॥ 11 ॥
అం కం చం టం తం పం యం శం వీం దుం ఐం వీం హం క్షమ్ ।
ధిజాగ్రం ధిజాగ్రం త్రోటయ త్రోటయ దీప్తం కురు కురు స్వాహా ॥ 12 ॥
పాం పీం పూం పార్వతీ పూర్ణా ఖాం ఖీం ఖూం ఖేచరీ తథా ।
సాం సీం సూం సప్తశతీ దేవ్యా మన్త్రసిద్ధిం కురుష్వ మే ॥ 13 ॥
కుఞ్జికాయై నమో నమః ।
ఇదం తు కుఞ్జికాస్తోత్రం మన్త్రజాగర్తిహేతవే ।
అభక్తే నైవ దాతవ్యం గోపితం రక్ష పార్వతి ॥ 14 ॥
యస్తు కుఞ్జికయా దేవి హీనాం సప్తశతీం పఠేత్ ।
న తస్య జాయతే సిద్ధిరరణ్యే రోదనం యథా ॥ 15 ॥
ఇతి శ్రీరుద్రయామలే గౌరీతన్త్రే శివపార్వతీసంవాదే కుఞ్జికాస్తోత్రం సమ్పూర్ణమ్ ।
