ధ్యానమ్
ఉమాకాన్తే రమాకాన్తే ఏషామాసీ-న్మతిస్సమా ।
నమామి దీక్షితేన్ద్రాం స్తాన్ నయషట్క-విశారదామ్ ॥
వేధోహరీశ్వరస్తుత్యాం విహర్త్రీం విన్ధ్యభూధరే ।
హరప్రాణేశ్వరీం వన్దే హన్త్రీం విబుధవిద్విషామ్ ॥ 1 ॥
అభ్యర్థనేన సరసీరుహసమ్భవస్య
త్యక్త్వోదితా భగవదక్షిపిధానలీలామ్ ।
విశ్వేశ్వరీ విపదపాకరణే పురస్తాత్
మాతా మమాస్తు మధుకైటభయోర్నిహన్త్రీ ॥ 2 ॥
ప్రాఙ్నిర్జరేషు నిహతైర్నిజశక్తిలేశైః
ఏకీభవద్భిరుదితాఽఖిలలోకగుప్త్యై ।
సమ్పన్నశస్త్రనికరా చ తదాయుధస్థైః
మాతా మమాస్తు మహిషాన్తకరీ పురస్తాత్ ॥ 3 ॥
ప్రాలేయశైలతనయా తనుకాన్తిసమ్పత్
కోశోదితా కువలయచ్ఛవిచారుదేహా ।
నారాయణీ నమదభీప్సితకల్పవల్లీ
సుప్రీతిమావహతు శుమ్భనిశుమ్భహన్త్రీ ॥ 4 ॥
విశ్వేశ్వరీతి మహిషాన్తకరీతి యస్యాః
నారాయణీత్యపి చ నామభిరఙ్కితాని ।
సూక్తాని పఙ్కజభువా చ సురర్షిభిశ్చ
దృష్టాని పావకముఖైశ్చ శివాం భజే తామ్ ॥ 5 ॥
ఉత్పత్తిదైత్యహననస్తవనాత్మకాని
సంరక్షకాణ్యఖిలభూతహితాయ యస్యాః ।
సూక్తాన్యశేషనిగమాన్తవిదః పఠన్తి
తాం విశ్వమాతరమజస్రమభిష్టవీమి ॥ 6 ॥
యే వైప్రచిత్తపునరుత్థితశుమ్భముఖ్యైః
దుర్భిక్షఘోరసమయేన చ కారితాసు ।
ఆవిష్కృతాస్త్రిజగదార్తిషు రూపభేదాః
తైరమ్బికా సమభిరక్షతు మాం విపద్భ్యః ॥ 7 ॥
సూక్తం యదీయమరవిన్దభవాది దృష్టం
ఆవర్త్య దేవ్యనుపదం సురథః సమాధిః ।
ద్వావప్యవాపతురభీష్టమనన్యలభ్యం
తామాదిదేవతరుణీం ప్రణమామి మూర్ధ్నా ॥ 8 ॥
మాహిష్మతీతనుభవం చ రురుం చ హన్తుం
ఆవిష్కృతైర్నిజరసాదవతారభేదైః ।
అష్టాదశాహతనవాహతకోటిసఙ్ఖ్యైః
అమ్బా సదా సమభిరక్షతు మాం విపద్భ్యః ॥ 9 ॥
ఏతచ్చరిత్రమఖిలం లిఖితం హి యస్యాః
సమ్పూజితం సదన ఏవ నివేశితం వా ।
దుర్గం చ తారయతి దుస్తరమప్యశేషం
శ్రేయః ప్రయచ్ఛతి చ సర్వముమాం భజే తామ్ ॥ 10 ॥
యత్పూజనస్తుతినమస్కృతిభిర్భవన్తి
ప్రీతాః పితామహరమేశహరాస్త్రయోఽపి ।
తేషామపి స్వకగుణైర్దదతీ వపూంషి
తామీశ్వరస్య తరుణీం శరణం ప్రపద్యే ॥ 11 ॥
కాన్తారమధ్యదృఢలగ్నతయాఽవసన్నాః
మగ్నాశ్చ వారిధిజలే రిపుభిశ్చ రుద్ధాః ।
యస్యాః ప్రపద్య చరణౌ విపదస్తరన్తి
సా మే సదాఽస్తు హృది సర్వజగత్సవిత్రీ ॥ 12 ॥
బన్ధే వధే మహతి మృత్యుభయే ప్రసక్తే
విత్తక్షయే చ వివిధే య మహోపతాపే ।
యత్పాదపూజనమిహ ప్రతికారమాహుః
సా మే సమస్తజననీ శరణం భవానీ ॥ 13 ॥
బాణాసురప్రహితపన్నగబన్ధమోక్షః
తద్బాహుదర్పదలనాదుషయా చ యోగః ।
ప్రాద్యుమ్నినా ద్రుతమలభ్యత యత్ప్రసాదాత్
సా మే శివా సకలమప్యశుభం క్షిణోతు ॥ 14 ॥
పాపః పులస్త్యతనయః పునరుత్థితో మాం
అద్యాపి హర్తుమయమాగత ఇత్యుదీతమ్ ।
యత్సేవనేన భయమిన్దిరయాఽవధూతం
తామాదిదేవతరుణీం శరణం గతోఽస్మి ॥ 15 ॥
యద్ధ్యానజం సుఖమవాప్యమనన్తపుణ్యైః
సాక్షాత్తమచ్యుత పరిగ్రహమాశ్వవాపుః ।
గోపాఙ్గనాః కిల యదర్చనపుణ్యమాత్రాః
సా మే సదా భగవతీ భవతు ప్రసన్నా ॥ 16 ॥
రాత్రిం ప్రపద్య ఇతి మన్త్రవిదః ప్రపన్నాన్
ఉద్బోధ్య మృత్యువధిమన్యఫలైః ప్రలోభ్య ।
బుద్ధ్వా చ తద్విముఖతాం ప్రతనం నయన్తీం
ఆకాశమాదిజననీం జగతాం భజే తామ్ ॥ 17 ॥
దేశకాలేషు దుష్టేషు దుర్గాచన్ద్రకలాస్తుతిః ।
సన్ధ్యయోరనుసన్ధేయా సర్వాపద్వినివృత్తయే ॥ 18 ॥
ఇతి శ్రీమదపయ్యదీక్షితవిరచితా దుర్గాచన్ద్రకళాస్తుతిః ॥
